ନନ୍ଦିଘେୋଷ ବ୍ୟୁରୋ: ଆଜି ମହାପ୍ରଭୁ ଜଗନ୍ନାଥଙ୍କ ରାମାଭିଷେକ ନୀତି ଅନୁଷ୍ଠିତ ହେବ । ଏହା ସହ ଶ୍ରୀରାମ ନବମୀରୁ ଆରମ୍ଭ ହୋଇଥିବା ଶ୍ରୀକ୍ଷେତ୍ର ସାହିଯାତ ମଧ୍ୟ ଚଳିତବର୍ଷ ପାଇଁ ଶେଷ ହେବ । ଆଜି ଶ୍ରୀମନ୍ଦିରରେ ମଧ୍ୟାହ୍ନ ଧୂପ ପରେ ନକ୍ଷତ୍ର ଦିଅଁ ଭିତରକୁ ବିଜେ କରିବା ପରେ ନକ୍ଷତ୍ର ବନ୍ଦାପନା କରାଯାଇ ନକ୍ଷତ୍ର ବେଢାକୁ ଦିଅଁ ବିଜେ କରିବେ । ଜୟବିଜୟ ଦ୍ୱାରରେ ଭୋଗ ଓ ବନ୍ଦାପନା ନୀତି ସରିବା ପରେ ଦିଅଁ ଦକ୍ଷିଣୀ ଘରକୁ ବିଜେ କରିବେ । ସେଠାରେ ଅନ୍ୟାନ୍ୟ ନୀତି ସରିବା ପରେ ସନ୍ଧ୍ୟାରେ ଅଜ୍ଞାମାଳ ପାଇଁ ଶ୍ରୀରାମ, ଶ୍ରୀ ଲକ୍ଷ୍ମଣ ଓ ଦେବୀସୀତା ପାଲିଙ୍କିଙ୍କୁ ବିଜେ କରି ଶ୍ରୀଜଗନ୍ନାଥ ବଲ୍ଳବ ମଠକୁ ବିଜେ କରିବେ । ଦୁଇ ସେବାୟତ ଭରତ ଓ ଶତ୍ରୁଘ୍ନ ଚରିତ୍ର ଧାରଣ କରି ପ୍ରଭୁ ଶ୍ରୀରାମଙ୍କ ରୂପାର ପାଦୁକା ଦ୍ବୟ ସାଙ୍ଗରେ ଧରି ଶ୍ରୀଜଗନ୍ନାଥ ବଲ୍ଳବ ମଠରେ ପହଂଚିବା ପରେ ଗୌଡ଼ବାଡ଼ ସାହି ଆଖେଡା ପକ୍ଷରୁ ସେଠାରେ ଶ୍ରୀରାମଙ୍କ ଅଭିଷେକ ନୀତି ଅନୁଷ୍ଠିତ ହେବା । ପରେ ଶ୍ରୀମନ୍ଦିରକୁ ଠାକୁର ବାହୁଡା଼ ବିଜେ କରିବେ । ଆଜି ସାହିଯାତ୍ରାର ଅନ୍ତିମ ଦିନରେ ଗୌଡ଼ବାଡ଼ ସାହି ପକ୍ଷରୁ ନାଗା, ମେଢ଼, ନବଶିରା, ସପ୍ତଶିରା, ପଞ୍ଚଶିରା, ପାରମ୍ପରିକ ସମରକଳା ଆଦି ପରିବେଷଣ କରାଯିବ ।…
ଗୁଣି ଗାରେଡି ସନ୍ଦେହରେ ଆକ୍ରମଣ: ଜଣେ ମୃତ
ନନ୍ଦିଘୋଷ ବ୍ୟୁରୋ: ରାୟଗଡ଼ା ଜିଲ୍ଲା ପଦ୍ମପୁର ଥାନା ନିକଟ ହାଟପଦା ସାହିରେ ଗତ ବିଳମ୍ବିତ ରାତିରେ ସଂଘବଦ୍ଧ ଆକ୍ରମଣ କରି ଜଣେ ବ୍ୟକ୍ତିଙ୍କୁ ହତ୍ୟା । ମୃତକ ହେଲେ ଭୈରବ ସାହୁ । ଗୁଣିଗାରେଡ଼ିକୁ ନେଇ ହତ୍ୟା କରାଯାଇଥିବା ଅଭିଯୋଗ। ଘଟଣାସ୍ଥଳରେ ପଦ୍ମପୁର ପୋଲିସ ପହଞ୍ଚିବା ପରେ ଥାନା ଅଧିକାରୀ ଧରଣୀଧର ପ୍ରଧାନଙ୍କୁ ଆକ୍ରମଣ । ଥାନା ଅଧିକାରୀଙ୍କ ମୁଣ୍ଡରେ ଲାଗିଛି ଶକ୍ତ ଆଘାତ ଲାଗିଥିବା ବେଳେ ପୋଲିସ ଗାଡି ଭାଙ୍ଗିଛି । ପଦ୍ମପୁର ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରରେ ଥାନା ଅଧିକାରୀ ଚିକିତ୍ସିତ ହୋଇଛନ୍ତି । ଅପ୍ରିତିକର ପରିସ୍ଥିତି ମୁକାବିଲା ପାଇଁ ଘଟଣାସ୍ଥଳରେ ପୋଲିସ ଫୋର୍ସ ମୂତୟନ ରହିଛି ।
ପିସିଆରକୁ ଚାପିଦେଲା ହାଇଓ୍ବା : ୨ ପୋଲିସ କର୍ମଚାରୀଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ: କଟକ ଗତିରାଉତ ପାଟଣା କେନାଲ ରୋଡ଼ ରାସ୍ତାରେ ଦୁର୍ଘଟଣା। ପୋଲିସ ପିସିଆର୍ ଉପରେ ଚଢ଼ିଗଲା ହାଇୱା। ଡ୍ୟୁଟିରେ ଥିବା ୨ ପୋଲିସ କର୍ମଚାରୀ ମୃତ। ଜଣେ ହୋମଗାର୍ଡ ହୋଇଥିବା ବେଳେ ଜଣେ ଏପିଆଇ ପୋଲିସ କର୍ମଚାରୀ। ଘଟଣା ସ୍ଥଳରେ ବରିଷ୍ଠ ପୋଲିସ ଅଧିକାରୀ ପହଂଚି ତଦନ୍ତ କରୁଛନ୍ତି। ପିସିଆର ଟି CRRI ଥାନାର ବୋଲି ଜଣାପଡ଼ିଛି। ଆଉ ଜଣେ ଗୁରୁତରଙ୍କୁ କଟକ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିବା ଜଣାପଡ଼ିଛି।
ମୁର୍ଶିଦାବାଦ ହିଂସା:ଝାରସୁଗୁଡ଼ାରୁ ୮ ଗିରଫ
ନନ୍ଦିଘୋଷ ବ୍ୟୁରୋ: ୱାକଫ ଆଇନକୁ ନେଇ ପଶ୍ଚିମବଂଗ ମୁର୍ସିଦାବାଦରେର ହିଂସାକାଣ୍ଡ ଘଟଣା। ମୋଟ ୮ ଜଣଙ୍କୁ ଗିରଫ କଲା ପଶ୍ଚିମବଂଗ ପୋଲିସର ଏସଟିଏଫ। ମୁର୍ସିଦାବାଦର ହର ଗୋବିନ୍ଦ ଦାଶ ଏବଂ ତାଙ୍କ ପୁଅଙ୍କୁ ହତ୍ୟା ଘଟଣାରେ ଏହି ଗିରଫ କରାଯାଇଛି। ପଶ୍ଚିମବଙ୍ଗର ଏସଟିଏଫ ଝାରସୁଗୁଡ଼ା ପୋଲିସ ସହାୟତାରେ ଗତକାଲି ରାତିରେ ଚଢ଼ାଉ କରି ବାଣୀ ଇସ୍ରାଏଲ, ସେଫାଉଲ ହକଙ୍କ ସମେତ ଅନ୍ୟ ୬ ଅଭିଯୁକ୍ତ ବାବୁଲ ଏସକେ, ଅବଦୁଲ ଖାଲେକ, ସାବା କରିମ, ରୋନୀ ଏସକେ, ମନରୁଲ ଏସକେ, ଅଜ଼ଫୁରଲ ଏସକେଙ୍କୁ ଗିରଫ କରିଛି।ତେବେ ପୋଲିସଙ୍କୁ ଦେଖିବା ପରେ ଏ ସମସ୍ତ ଅଭିଯୁକ୍ତ ଫେରାର ମାରିବାକୁ ଚେଷ୍ଟା କରୁଥିବା ବେଳେ ପୋଲିସ ଏମାନଙ୍କ ଉପରକୁ ଫାଙ୍କା ଗୁଳି ଚାଳନା କରିଥିଲା। ଚାରିଟି ବ୍ଲାଙ୍କ ଫାୟାରିଂ କରାଯାଇଥିବା ଆଇଜି ହିମାଂଶୁ ଲାଲ ସୂଚନା ଦେଇଛନ୍ତି। ସେହିପରି ଏଭଳି ଘଟଣାରେ ଆହୁରି ତଦନ୍ତ ଚାଲିଛି ଯଦି ଅନ୍ୟ କେଉଁ ବ୍ୟକ୍ତିଙ୍କ ସମ୍ପୃକ୍ତି ଥିବ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଏସପି ସ୍ମିଥ ପରମାର ସୁଚନା ଦେଇଛନ୍ତି।ଗତ ୧୩ ତାରିଖ ଦିନ ମୁର୍ସିଦାବାଦରେ ଘଟିଥିବା ହିଂସାରେ ମୁଖ୍ୟ ଅଭିଯୁକ୍ତ ସମେତ ଅନ୍ୟ ଅଭିଯୁକ୍ତଙ୍କ ସମ୍ପୃକ୍ତି ଥିବା ଅଭିଯୋଗ ହୋଇଥିଲା। ସମସ୍ତେ ଆସି ବନହରପାଳି ଥାନା ଅଂଚଳରେ ଲୁଚିଥିବା ସୂଚନା ମିଳିଥିଲା।
ମହାକାଳପଡାରେ ତେଜୁଛି ବିଜେପି ଗୋଷ୍ଠୀ କନ୍ଦଳ
ନନ୍ଦିଘୋଷ ବ୍ୟୁରୋ: ମହାକାଳପଡାରେ ତେଜୁଛି ବିଜେପି ଗୋଷ୍ଠୀ କନ୍ଦଳ । ରାମନଗର ଠାରେ ଚାଲିଥିବା ଜମ୍ବୁଦ୍ବୀପ ମହୋତ୍ସବ ଓ ପଲ୍ଲୀଶ୍ରୀ ମେଳାକୁ ନେଇ ପଦାକୁ ଆସିଲା ଅନ୍ତଃକନ୍ଦଳ। ମହୋତ୍ସବ ପାଇଁ ଚାରିଆଡେ ମୁଖ୍ୟମନ୍ତ୍ରୀଙ୍କ ବ୍ୟାନର ଏବଂ ହୋଡିଙ୍ଗ ଲଗାଯାଇଥିବା ବେଳେ କାହିଁକି ଦୁଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଓ କନକ ବର୍ଦ୍ଧନ ସିଂଦେଓ ଏବଂ କେନ୍ଦ୍ର ମନ୍ତ୍ରୀ ଜୁଏଲ ଓରାମଙ୍କ ପୋଷ୍ଟର ଲଗାଗଲାନାହିଁ ବୋଲି କିଛି ନେତା ପ୍ରଶ୍ନ କରିଛନ୍ତି । ଏହାସହ ମହୋତ୍ସବ ପ୍ରସ୍ତୁତି ବୈଠକକୁ କିଛି ପୁରୁଖା ନେତାଙ୍କୁ ଡକାଯାଇନଥିବା ଅଭିଯୋଗ ବାଢିଛନ୍ତି ବିଜେପି ନେତା ପବିତ୍ର ପରିଡା । ଏନେଇ ସେ କିଛି ଫଟୋ ଓ ଲେଖା ସୋସିଆଲ ମିଡ଼ିଆରେ ପୋଷ୍ଟ କରିଥିଲେ । ଏଥିରେ ଉତକ୍ଷିପ୍ତ ହୋଇ ମହାକାଳପଡା ବିଧାୟକଙ୍କ ଦୁଇ ଜଣ ସମର୍ଥକ ପ୍ରବିତ୍ରଙ୍କୁ ଭେଟି ସେହି ପୋଷ୍ଟକୁ ହଟାଇବାକୁ ଧମକ ଦେଇଥିବା ଅଭିଯୋଗ କରିଛନ୍ତି ପବିତ୍ର ।
ଗତ ୧୯ ତାରିଖ ରାତି ନଅଟା ସମୟରେ ପବିତ୍ର ପରିଡା ନିଜ ମୋଟରସାଇକେଲରେ ଘରକୁ ଫେରୁଥିବା ବେଳେ ରାମଚଣ୍ଡୀ ପୋଲ ପୂର୍ବରୁ ତାଙ୍କୁ ଛଅ ଗୋଟି ମଟର ସାଇକେଲରେ ୧୦ରୁ ୧୨ ଜଣ ବ୍ୟକ୍ତି ଅଟକାଇ ବିଧାୟକଙ୍କ ନାମରେ ଫେସବୁକ ପୋଷ୍ଟ ହଟାଇବାକୁ ଧମକ ଦେଇଥିଲେ । ଜଣେ ପବିତ୍ରଙ୍କ ମୁଣ୍ଡରେ ବନ୍ଧୁକ ଲଗାଇଥିବା ବି ଅଭିଯୋଗ ହୋଇଛି । ଏନେଇ ଗତକାଲି ବିଜେପି ନେତା ପବିତ୍ର ପରିଡା ଜମ୍ବୁ ସାମୁଦ୍ରିକ ଥାନାରେ ଲିଖିତ ଅଭିଯୋଗ କରିବା ପରେ ବିଜେପି ଦଳର ଭିତିରି କନ୍ଦଳ ପଦାକୁ ଆସିଛି । ନିଜ ଜୀବନ ପ୍ରତି ବିପଦ ଥିବା ସେ ଏଫଆଇଆରରେ ଅଭିଯୋଗ କରିଛନ୍ତି । ତେବେ ଏନେଇ ମହାକାଳପଡା ବିଧାୟକ କିମ୍ବା ତାଙ୍କ ସମର୍ଥକଙ୍କ ପ୍ରତିକ୍ରିୟା ମିଳିପାରିନି।
ଭଦ୍ରକ ଖଣ୍ଡତଡ଼ା ପଞ୍ଚାୟତରେ ଚାଞ୍ଚଲ୍ୟ : ୧୦ ଫୁଟ ମାଟି ଖୋଳିଲେ ବାହାରୁଛି କିରୋସିନ୍ ଗନ୍ଧ
ନନ୍ଦିଘୋଷ ବ୍ୟୁରୋ: ଭଦ୍ରକ ଖଣ୍ଡତଡ଼ା ପଞ୍ଚାୟତରେ ଚାଞ୍ଚଲ୍ୟ । ୧୦ ଫୁଟ ମାଟି ଖୋଳିଲେ ବାହାରୁଛି କିରାସିନର ଗନ୍ଧ । କିରାସିନ ଗନ୍ଧ ବାହାରିବା ସହ ଆଖପାଖ ଅଞ୍ଚଳରେ ଗନ୍ଧ ଖେଳିଯାଇଛି । ଘଟଣା ପ୍ରଘଟ ହେବା ପରେ ଅଞ୍ଚଳରେ ଲୋକଙ୍କ ଭିଡ଼ ଜମୁଛି । ପଞ୍ଚାୟତର ନୂତନ ଗୃହ ନିର୍ମାଣ ପାଇଁ ପିଲାର ପାଇଁ ଗାତ ଖୋଳାଯାଉଥିଲା । ୧୦ ଫୁଟ ଗଭୀରର ପିଲାର ଖୋଲିବା ପରେ ଗାତ ଭିତରୁ ଆସିଥିଲା କିରାସିନର ଉତ୍କଟ ଗନ୍ଧ । ଏପରିକି ଭିତରୁ ଯାହାବି ମାଟି ବାହାରୁଥିଲା ତାହା କିରାସିନ ଗନ୍ଧ କରିବା ସହିତ ତେଲ ଚିକିଟା ମାଟି ବାହାରୁଛି । ଏପରିକି ଭିତରୁ ବାହାରୁଥିବା ପାଣିରୁ ମଧ୍ୟ କିରାସିନ ଗନ୍ଧ ବାହାରୁଛି । ଆଖପାଖ ଅଞ୍ଚଳ କିରାସିନ ଗନ୍ଧ ବାରିହେଉଛି । ଯାହା ଏବେ ସ୍ଥାନୀୟ ଅଞ୍ଚଳରେ ବେଶ ଚର୍ଚ୍ଚାର ବିଷୟ ପାଲଟିଛି । ଆଖପାଖ ଅଞ୍ଚଳରୁ ଏହାକୁ ଦେଖିବାକୁ ଲୋକଙ୍କ ଧାଡ଼ି ଛୁଟୁଛି । ଯାହାକୁ ନେଇ ମାଟିତଳେ କିରାସିନ ଥିବା ସ୍ଥାନୀୟ ଲୋକେ ସନ୍ଦେହ କରୁଥିବା ବେଳେ ଘଟଣାର ସରକାରୀ ଯାଞ୍ଚ କରିବାକୁ ଦାବି କରିଛନ୍ତି ।
ଡବଲ ଇଞ୍ଜିନ ସରକାରରେ ଘୋଷଣା ବେଶୀ, ମିଳୁଛି କମ୍
ନନ୍ଦିଘୋଷ ବ୍ୟୁରୋ: ଡବଲ ଇଞ୍ଜିନ ସରକାରରେ କେନ୍ଦ୍ରଠାରୁ ଅଧିକ ଅର୍ଥ ଆସିବ କଣ ରାଜ୍ୟକୁ ମିଳୁଛି କମ୍ ଆବଣ୍ଟନ ଓ ଅନୁଦାନ । ୨୦୨୪-୨୫ ଆର୍ଥିକ ବର୍ଷର ଜାନୁଆରୀ ମାସରେ କେନ୍ଦ୍ର ଅନୁଦାନ ୧୭ ପ୍ରତିଶତ କମ୍ ମିଳିଛି । ଖୋଦ ଅର୍ଥ ବିଭାଗର ତଥ୍ୟ କହୁଛି, ପୂର୍ବ ନବୀନ ସରକାର ସମୟରେ ଯାହା ମିଳିଥିଲା ତାଠୁ କମ୍ ମିଳିଛି । ରାଜ୍ୟ ଆୟ କମୁଛି । ଋଣଭାର ବଢୁଛି । ସେପଟେ କେନ୍ଦ୍ର ଦେଉଛି କମ୍ । ଏହାକୁ ନେଇ ଉଦବେଗ ପ୍ରକାଶ କରିଛନ୍ତି ପୂର୍ବତନ ଅର୍ଥମନ୍ତ୍ରୀ ଓ ଆର୍ଥିକ ବିଶେଷଜ୍ଞ । ଅଭିଯୋଗ କରିଛନ୍ତି ଏପରି ଚାଲିଲେ ଓଡ଼ିଶା ପୁଣି ଥରେ ଆର୍ଥିକ ଦୁଃସ୍ଥିତି ଆଡ଼କୁ ଚାଲିଯିବ ।
କ୍ଷମତା ବଦଳିଲା ହେଲେ ବଦଳିଲାନି କେନ୍ଦ୍ରର ଆଭିମୁଖ୍ଯ । କମିବାରେ ଲାଗିଛି କେନ୍ଦ୍ରୀୟ ଅନୁଦାନ । ବିଜେଡି ଅମଳ ଅପେକ୍ଷା ଡବଲ ଇଞ୍ଜିନରେ ଅଧିକ ନିରାଶା ।.. ..ବିଜେପିର ଦାବିଥିଲା ରାଜ୍ୟରେ ଡବଲ ଇଞ୍ଜିନ ସରକାର ହେଲେ କେନ୍ଦ୍ରଠାରୁ ଅଧିକ ଅର୍ଥ ଆସିବ । କିନ୍ତୁ ୨୦୨୪-୨୫ ଆର୍ଥିକ ବର୍ଷର ହିସାବ ଅଲଗା କାହାଣୀ ବଖାଣୁଛି । ଅଙ୍କ ସବୁ ଗଡ଼ବଡ଼ । ଖୋଦ ଅର୍ଥ ବିଭାଗ ଉପଲବ୍ଧ କରିଥିବା ଆୟ ତାଲିକାରୁ ଜଣାପଡ଼ିଛି, ଗତ ଆର୍ଥିକ ବର୍ଷରେ କେନ୍ଦ୍ର ଅନୁଦାନ ବାବଦରେ ବଜେଟ୍ ଅର୍ଥଠାରୁ କମ ମିଳିଛି । ୨୦୨୪-୨୫ ବର୍ଷରେ କେନ୍ଦ୍ର ଅନୁଦାନ ବାବଦରେ ରାଜ୍ୟକୁ ମିଳିବା କଥା ୩୭ ହଜାର ୭୬୮ କୋଟି ୨୪ ଲକ୍ଷ ଟଙ୍କା । ହେଲେ ଗତ ଜାନୁଆରୀ ସୁଦ୍ଧା ମିଳିଛି ମାତ୍ର ୧୨ ହଜାର ୯୯୮ କୋଟି ୯ ଲକ୍ଷ ଟଙ୍କା । ଯାହାକି ୧୬.୯୧ ପ୍ରତିଶତ କମ୍ । ଅଥଚ ସମାନ ସମୟରେ ପୂର୍ବବର୍ଷ ନବୀନ ସରକାରଙ୍କ ସମୟରେ ଆସିଥିଲା ଅଧିକ ଅର୍ଥ । ୨୦୨୩-୨୪ ଆର୍ଥିକ ବର୍ଷ ୩୨ ହଜାର ୭୪୮ କୋଟି ୮୨ ଲକ୍ଷରୁ ମିଳିଥିଲା ୧୫ ହଜାର ୬୪୩ କୋଟି ୬୮ ଲକ୍ଷ ଟଙ୍କା । ପୂର୍ବତନ ମୁଖ୍ୟମନ୍ତ୍ରୀ ସିଙ୍ଗଲ ଇଞ୍ଜିନ ହୋଇ କେନ୍ଦ୍ରଠାରୁ ଅଧିକ ଅର୍ଥ ଟାଣିପାରୁଥିଲେ । ଏବେ କେନ୍ଦ୍ର ଓ ରାଜ୍ୟରେ ବିଜେପି ସରକାର ଡବଲ ଇଞ୍ଜିନ ହୋଇ ଅର୍ଥ କାହିଁକି ଆସୁନି ବୋଲି ପ୍ରଶ୍ନ ଉଠାଇଛନ୍ତି ପୂର୍ବତନ ଅର୍ଥମନ୍ତ୍ରୀ । ଅଭିଯୋଗ କରିଛନ୍ତି ଗୋଟିଏ ପଟେ ରାଜ୍ୟର ରାଜସ୍ବ ଆୟ କମୁଛି । ଋଣଭାର ବଢୁଛି । ବୋଝ ଉପରେ ନଳିତା ବିଡ଼ା ଭଳି ବିଭିନ୍ନ କେନ୍ଦ୍ରୀୟ ଯୋଜନା କାର୍ଯ୍ୟକାରୀ କରିବାକୁ ରାଜ୍ୟ ଉପରେ ଅର୍ଥ ବୋଝ ଲଦାଚାଲିଛି । ଏପରି ଜାରି ରହିଲେ ରାଜ୍ୟ ପୁଣି ଥରେ ନିଅଣ୍ଟିଆ ସ୍ଥିତିକୁ ଚାଲିଯିବ ବୋଲି ଆଶଙ୍କା ପ୍ରକାଶ କରିଛନ୍ତି ।
ରାଜ୍ୟରେ ବିଜେପି ସରକାର ଆସିବା ପରଠୁ ବଜେଟ୍ ଆକାର ବଢୁଛି । ହେଲେ ବିଭିନ୍ନ ବିଭାଗ ପାଇଁ ବଜେଟ୍ ଅର୍ଥ ଖର୍ଚ୍ଚ ହୋଇପାରିନି । ଓଡ଼ିଶାଠାରୁ ଛୋଟ ରାଜ୍ୟମାନେ କମ୍ ପରିମାଣର ବାର୍ଷିକ ବଜେଟ୍ କରି ରାଜ୍ୟ ଘରୋଇ ଉତ୍ପାଦ ଅଧିକ ଲକ୍ଷ୍ୟ ରଖୁଛନ୍ତି । କିନ୍ତୁ ଖଣିଜ ସମ୍ପଦ ଭରା ରାଜ୍ୟ ହୋଇ ରାଜ୍ୟ ଘରୋଇ ଉତ୍ପାଦ ଲକ୍ଷ୍ୟ କମ ରଖିଛି । ପୂର୍ବ ସରକାରଙ୍କ ସମୟରେ ହୋଇଥିବା ଭିତ୍ତିଭୂମି ବିକାଶର ସୁଫଳ ଏବର ସରକାର ଅମଳ କରୁଛନ୍ତି । ୧୦ ମାସର ସରକାରରେ ରାଜ୍ୟର ଋଣବୋଝ ଯେତିକି ବଢିଲାଣି ବିଗତ ସରକାରରେ ଏତେ ପରିମାଣର ହୋଇନଥିଲା । ୨୦୩୬ ବେଳକୁ ଓଡ଼ିଶା ହେବ ୫୦୦ ବିଲିୟନ ଡଲାର ଅର୍ଥନୀତି । କିନ୍ତୁ ରାଜସ୍ବ ଆୟର ଗତି ଯଦି ଏପରି ମନ୍ଥର ରହିବ ତାହେଲେ ଏହି ଲକ୍ଷ୍ୟ ହାସଲ କେବଳ ସ୍ଲୋଗାନ୍ ହୋଇ ରହିଯିବ ।
ଗାଁ ଶ୍ମଶାନରେ ହେଲା ଆଶୀର୍ବାଦର ଅନ୍ତିମ ସଂସ୍କାର
ନନ୍ଦିଘୋଷ ବ୍ୟୁରୋ: ଗାଁ ଶ୍ମଶାନରେ ଆଶୀର୍ବାଦର ଅନ୍ତିମ ସଂସ୍କାର କରାଯାଇଛି। ପୋଷ୍ଟମୋର୍ଟମ ପରେ ଆମ୍ବୁଲାନସରେ ମୃତଦେହକୁ ଗାଁକୁ ନେଇଥିଲା ପୋଲିସ ଓ ସ୍ଥାନୀୟ ପ୍ରଶାସନ। ହଜାର ହଜାର ଲୋକ ଶୋଭାଯାତ୍ରାରେ ନେଇ ଗାଁ ପରିକ୍ରମା କରିବା ପରେ ଶ୍ମଶାନରେ ଶେଷକୃତ୍ୟ ସମ୍ପନ୍ନ କଲେ। ଶୋଭାଯାତ୍ରା ବେଳେ ଉତ୍ତ୍ୟକ୍ତ ଲୋକଙ୍କ ସ୍ଲୋଗାନ ଥିଲା ଅଭିଯୁକ୍ତକୁ ଫାଶୀ ଦିଅ। ଏହି ଘଟଣାକୁ ନେଇ ଗାଁରେ ଉତ୍ତେଜନା ଲାଗି ରହିଥିବାରୁ ପୋଲିସ ଫୋର୍ସ ମଧ୍ୟ ମୁତୟନ କରାଯାଇଥିଲା। ଏକ ଶୋକାକୂଳ ପରିବେଶ ମଧ୍ୟରେ ଆଶୀର୍ବାଦକୁ ଅନ୍ତିମ ବିଦାୟ ଦିଆଯାଇଥିଲା।ଏହି ଅବସରରେ ପରିବାରକୁ ଆର୍ଥିକ କ୍ଷତିପୂରଣ ସହ ଗାଁରୁ ନିଶା କାରବାରକୁ କଠୋର ହସ୍ତରେ ଦମନ କରିବାକୁ ଗାଁ ଲୋକେ ଦାବି କରି ଉପଜିଲ୍ଲାପାଳଙ୍କୁ ଏକ ଦାବିପତ୍ର ଦେଇଛନ୍ତି। ଏଥିସହିତ ଅଭିଯୁକ୍ତ ବାପି ସାହୁ ଆଶୀର୍ବାଦ ସହ ଅପ୍ରାକୃତିକ ଯୌନ ସଂପର୍କ ରଖିବା ପରେ ତାଙ୍କୁ ହତ୍ୟା କରିଛି ବୋଲି ଗ୍ରାମବାସୀ ସନ୍ଦେହ ପ୍ରକାଶ କରିଛନ୍ତି। ଏହି ଘଟଣାରେ ଡେଲାଙ୍ଗ ଓକିଲ ସଂଘ ମଧ୍ୟ ବାପି ପକ୍ଷରୁ କେସ ଲଢିବେ ନାହିଁ ବୋଲି ନିଷ୍ପତ୍ତି ନେଇଛି।
ପୋଲିସ ଡିଜିଙ୍କୁ ଭେଟିଲା ବିଜେଡି ଟିମ୍
ନନ୍ଦିଘୋଷ ବ୍ୟୁରୋ: ପୋଲିସ ଡିଜିଙ୍କୁ ଭେଟିଲା ବିଜେଡି ଟିମ୍ । ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟସ୍ତକୁ ନେଇ ପୋଲିସ ଡିଜିଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି ବିଜେଡିର ବରିଷ୍ଠ ନେତା । ଟିମରେ ବିଜେଡି ୯ ଜଣ ବରିଷ୍ଠ ନେତା ଓ ଅନ୍ୟ ବିଜେଡି କର୍ମୀ ସାମିଲ୍ ହୋଇଥିଲେ । ବିଜୁ ଜନତା ଦଳର ବରିଷ୍ଠ ନେତା ସଞ୍ଜୟ ଦାସବର୍ମା, ବିଧାୟକ ସୁଶାନ୍ତ ରାଉତ, ବିଧାୟକ ଅନନ୍ତ ନାରାୟଣ ଜେନା, ପ୍ରତାପ ଜେନା, ଅତନୁ ସବ୍ୟସାଚୀ, ବିଭୂତି ବଳବନ୍ତରାୟ, ଲେନିନ ମହାନ୍ତି, ବିଧାୟକ ଅରୁଣ ସାହୁ, ବିଧାୟକ ବିଶ୍ଵରଞ୍ଜନ ମଲ୍ଲିକଙ୍କ ସହ ଦଳୀୟ କର୍ମୀମାନେ କ୍ୟାମ୍ପ ଅଫିସରେ ପୋଲିସ ଡିଜିଙ୍କୁ ସାକ୍ଷାତ କରି ଦାବିପତ୍ର ପ୍ରଦାନ କରିଛନ୍ତି । ରାଜ୍ୟରେ ବିପର୍ଯ୍ୟସ୍ତ ହୋଇପଡ଼ିଛି ଆଇଶୃଙ୍ଖଳା ପରିସ୍ଥିତି । ଯାଜପୁର ଧର୍ମଶାଳା ନିର୍ବାଚନ ମଣ୍ଡଳୀରେ ନିର୍ବାଚନ ପରଠାରୁ ୧୦ ମାସ ମଧ୍ୟରେ ୮ଟି ଆପରାଧିକ ମାମଲା ଘଟି ସାରିଲାଣି । ବିଧାୟକଙ୍କ ପ୍ରରୋଚନାରେ ଆପରାଧିକ କାର୍ଯ୍ୟ ହେଉଥିବା ବେଳେ, ଜିଲ୍ଲା ପୋଲିସ ନୀରବ ଦ୍ରଷ୍ଟା ସାଜିଛି । ଏଯାଏଁ ପୂର୍ବତନ ବିଧାୟକଙ୍କୁ ମରଣାନ୍ତକ ଆକ୍ରମଣ ଘଟଣାରେ ସମ୍ପୃକ୍ତ ଜଣେ ହେଲେ ଅପରାଧୀଙ୍କୁ ଗିରଫ କରାଯାଇନାହିଁ । ଯାଜପୁର ଜିଲ୍ଲା ପୋଲିସ ପ୍ରଶାସନ ଓ ଏସପିଙ୍କ ଆଭିମୁଖ୍ୟ ବିରୁଦ୍ଧରେ ପୋଲିସ ଡିଜିଙ୍କୁ ଭେଟି ବିଜୁ ଜନତା ଦଳ ତରଫରୁ ଦାବିପତ୍ର ପ୍ରଦାନ କରାଯାଇଛି ।
ବ୍ୟାଙ୍କ ଠକେଇ ମାମଲାରେ ୪ ଜଣ ଠକଙ୍କୁ ଗିରଫ କଲା ଇଓଡବ୍ଲୁ
ନନ୍ଦିଘୋଷ ବ୍ୟୁରୋ: ବ୍ୟାଙ୍କ ଠକେଇ ମାମଲାରେ ୪ ଜଣ ଠକଙ୍କୁ ଗିରଫ କରିଛି ଇଓଡବ୍ଲୁ । ଗିରଫମାନେ ହେଲେ ଜଗତସିଂହପୁରର ସ୍ମୃତି ରଞ୍ଜନ ସେଠୀ, ଏମ୍. ଦିବ୍ୟଶ୍ରୀ ଜ୍ୟୋତି ରଞ୍ଜନ, ଭୁବନେଶ୍ୱର ନୟାପଲ୍ଲୀର ନିରଞ୍ଜନ ବେହେରା ଓ ଦେବାଶିଷ ବେହେରା । ଗିରଫ ଅଭିଯୁକ୍ତଙ୍କୁ ଆଜି କୋର୍ଟରେ ହାଜର କରିବ ଇଓଡବ୍ଲୁ । ଗିରଫ ଅଭିଯୁକ୍ତମାନେ ଭୁବନେଶ୍ଵର ସ୍ଥିତ ଜୟଦେବ ବିହାର ଓ ଡମଣା ଷ୍ଟେଟ୍ ବ୍ୟାଙ୍କ ଶାଖାରୁ ଜାଲ ଡକ୍ୟୁମେଣ୍ଟ ଦେଇ ୮କୋଟି କୋଟି ୧ ଲକ୍ଷ ଟଙ୍କାର ୨୩୪ ଟି ଏକ୍ସପ୍ରେସ୍ କ୍ରେଡିଟ୍ ଋଣ ନେଇଥିଲେ । ୨୦୨୧ରୁ ଜାନୁଆରୀ ୨୦୨୩ ମଧ୍ୟରେ ବିଭିନ୍ନ ସଂଗଠନର କର୍ମଚାରୀ ଭାବରେ ଜାଲ/ନକଲି ନିଯୁକ୍ତି ରେକର୍ଡ ପ୍ରସ୍ତୁତ କରିଥିଲେ । ଭୁବନେଶ୍ଵର ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆର ଆଞ୍ଚଳିକ ପରିଚାଳକ ଶିବ ସୁନ୍ଦର ସାହୁଙ୍କ ଲିଖିତ ଅଭିଯୋଗ କରିଥିଲେ । ଏତଲା ଆଧାରରେ ତଦନ୍ତ କରି ୪ ଅଭିଯୁକ୍ତଙ୍କୁ ଗିରଫ କରିଛି ଇଓଡବ୍ଲୁ । ସେମାନେ ବିଭିନ୍ନ ସଂସ୍ଥା ନାଁରେ କାର୍ଯ୍ୟକରିଥିବା ଅଯୋଗ୍ୟ ବ୍ୟକ୍ତିଙ୍କ ପାଇଁ ନକଲି ନିଯୁକ୍ତି ପମାଣପତ୍ର ସହିତ ନକଲି ଦରମା ପ୍ରମାଣ ପତ୍ର, ନକଲି ବ୍ୟାଙ୍କ ତଥ୍ୟ ଏବଂ ନକଲି କେୱାସି ଡକ୍ୟୁମେଣ୍ଟ ପ୍ରସ୍ତୁତ କରି ୨୩୪ଟି ଏକ୍ସପ୍ରେସ୍ କ୍ରେଡିଟ୍ ଋଣ ହାସଲ କରିଥିଲେ । ଗିରଫ ଅଭିଯୁକ୍ତମାନଙ୍କଠାରୁ ଗୋଟିଏ ଲାପଟପ୍ ଏବଂ ୫ଟି ମୋବାଇଲ୍ ଫୋନ୍ ଭଳି ଅନେକ ଆପରାଧିକ ସାମଗ୍ରୀ ଜବତ କରି ତଦନ୍ତ ଜାରି ରଖିଛି ଇଓଡବ୍ଲୁ ।