ଭୁବନେଶ୍ବର: ଶ୍ରମିକଙ୍କୁ ପୂର୍ବ ସରକାର ଯାହା ଦେଉଥିଲେ ତାହା ନୂଆ ସରକାର ଛଡ଼ାଇନେଲେ। ଆଉ ଏବେ ଶ୍ରମିକ ଦିବସ ପାଳନ ବେଳେ ବଡ଼ବଡ଼ କଥା କହୁଛନ୍ତି। ଯାହାକୁ ନେଇ କେନ୍ଦୁପତ୍ର ତୋଳାଳି ଓ ଶ୍ରମିକ ନିଜର ଦୁଃଖ ବଖାଣିଛନ୍ତି। ଜଙ୍ଗଲ ଅଧିକାର ଆଇନ ଲାଗୁ ପରେ କେନ୍ଦୁପତ୍ର ସଂସ୍ଥାରୁ ଯେଉଁ ଲାଭ ମିଳେ ସେ ଲାଭାଂଶ କେନ୍ଦୁପତ୍ର ତୋଳାଳି ଓ ସିଜନାଲ କର୍ମଚାରୀଙ୍କ ମଧ୍ୟରେ ବାଣ୍ଟିବା ପାଇଁ ପୂର୍ବ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଷ୍ପତ୍ତି ନେଇଥିଲେ। କେନ୍ଦୁପତ୍ର କ୍ଷେତ୍ରରେ କାର୍ଯ୍ୟ କରୁଥିବା ତୋଳାଳି ଓ ଶ୍ରମିକଙ୍କୁ ବୋନସଠୁ ଆରମ୍ଭ କରି ମୃତ୍ୟୁକାଳୀନ ସହାୟତା, ପାଣି, ଚପଲ ଓ ଟୋପି ପାଇଁ ଭତ୍ତା ଓ କନ୍ୟା ବିବାହ ପାଇଁ ସହାୟତା ମିଳୁଥିଲା। ହେଲେ ଏସବୁ ଏବେ ଠପ। କେନ୍ଦୁପତ୍ରରେ ଜିଏସଟି ଲାଗୁ ପରେ ଲାଭାଂଶ କମିଲା। ଯାହାକୁ ନେଇ କେନ୍ଦ୍ର ସରକାରଙ୍କୁ ବାରମ୍ବାର ଚିଠି ଲେଖିଥିଲେ ନବୀନ ପଟ୍ଟନାୟକ। ଜିଏସଟି ଉଚ୍ଛେଦ ପାଇଁ ଦାବି କରିଥିଲେ। କିନ୍ତୁ କେନ୍ଦ୍ର ସରକାର କୌଣସି ପଦକ୍ଷେପ ନେଲେ ନାହିଁ। ଯାହା ଫଳରେ ଏବେ ରାଜ୍ୟର ୧୫ ଲକ୍ଷ ମହିଳା କେନ୍ଦୁପତ୍ର ତୋଳାଳିଙ୍କ ସମେତ ୧୮ ହଜାର ସିଜିନାଲ କର୍ମଚାରୀ ଓ ୨୦ ହଜାର ବନ୍ଧେଇ ଶ୍ରମିକ ସଂକଟରେ। ସରକାର ପରିବର୍ତ୍ତନ ହେଲେ କଣ ଯୋଜନା ପରିବର୍ତ୍ତନ ହୁଏକି ବୋଲି ପ୍ରଶ୍ନ କରିଛି କେନ୍ଦୁପତ୍ର କର୍ମଚାରୀ ସଂଘ। ଆଦିବାସୀ ମୁଖ୍ୟମନ୍ତ୍ରୀ ଆଦିବାସୀଙ୍କ କଥା ଶୁଣିବା କଥା। କିନ୍ତୁ ଗତ ୨୧ ତାରିଖରେ ସମ୍ବଲପୁର ଜନଶୁଣାଣି ପାଇଁ ଗଲେ କିନ୍ତୁ, ଏକଥା ଶୁଣିଲେ ନାହିଁ ବୋଲି ଅଭିଯୋଗ ହୋଇଛି। କନ୍ୟା ବିବାହ ସହାୟତା ବନ୍ଦ କରିଦେଲେ। ତେଣୁ ଲୋକଙ୍କ ପାଖକୁ ଯିବାର ଲାଭ କଣ ବୋଲି କହିଛି ସଙ୍ଘ।

ସେପଟେ ବିଜେଡି ଏ ପ୍ରସଙ୍ଗରେ ସରକାରଙ୍କ ଆଭିମୁଖ୍ୟକୁ ସମାଲୋଚନା କରିଛି। ପାହାଡ଼ ଅଞ୍ଚଳରେ ଆଦିବାସୀ ସମ୍ପ୍ରଦାୟର ଜୀବନ ଜୀବିକାର ବାଟ ହେଉଛି କେନ୍ଦୁପତ୍ର। ତେଣୁ ଏଥିରେ ଜିଏସଟି ମାଡ଼ ପ୍ରହାର ସଦୃଶ।ଏପରିକି ବିଜେଡି ସରକାର ସମୟରେ ସେମାନଙ୍କୁ ମିଳୁଥିବା ସୁବିଧା ସୁଯୋଗ ଏବେ ନମିଳିବାକୁ ନେଇ  ସମାଲୋଚନା କଲା ବିଜେଡି।ସେପଟେ ଏହାକୁ ନେଇ ଉତ୍ତର ରଖିଛନ୍ତି ଶ୍ରମମନ୍ତ୍ରୀ। କହିଛନ୍ତି, କେନ୍ଦୁପତ୍ର ତୋଳାଳି ଓ କର୍ମଚାରୀଙ୍କ ଉପରେ ଜିଏସଟିର କିଛି ପ୍ରଭାବ ପଡେନି।ଯେଉଁମାନେ କେନ୍ଦୁପତ୍ର କିଣୁଥିବେ ସେମାନେ ଜିଏସଟି ଦେଉଥିବେ।ଏପରିକି ସେମାନଙ୍କ ପାଇଁ ୫୦କୋଟି ବୋନସ ପ୍ରଦାନ କରାଯାଇଛି। ପରବର୍ତ୍ତୀ ପର୍ଯ୍ୟାୟରେ ୧୦୦ କୋଟି ଦିଆଯିବ ।

ରଥକାଠ ସମସ୍ୟା ଦୂର କରିବାକୁ ପ୍ରସ୍ତୁତ ହେବ ସ୍ବତନ୍ତ୍ର ଡାଟାବେସ୍ । ଠିକଣା ସମୟରେ ପହଞ୍ଚିବ ରଥକନା । ତାମିଲନାଡୁରୁ ଆସିବ ଚନ୍ଦନ କାଠ । ରଥଯାତ୍ରା ସମୟରେ ୩୦ ଜଣଭକ୍ତଙ୍କ ପାଇଁ ୫ ଲକ୍ଷ ଟଙ୍କାର ସ୍ୱତନ୍ତ୍ର ବୀମା ବ୍ୟବସ୍ଥା । ସେବାୟତଙ୍କ ପାଇଁ ମଧ୍ୟ ହେବ ବୀମା । ରଥଯାତ୍ରା ପାଇଁ ପୁରୀରେ କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରଥମ ସମନ୍ବୟ କମିଟି ବୈଠକରେ ହୋଇଛି ଗୁରୁତ୍ବପୂର୍ଣ୍ଣ ଆଲୋଚନା । ରଥଯାତ୍ରା ପାଇଁ ୮୬୫ ଖଣ୍ଡ କାଠର ଆବଶ୍ୟକତା ଥିବାବେଳେ ବର୍ତ୍ତମାନ ସୁଦ୍ଧା ରଥଖଳାକୁ ଓ ଖପୁରିଆ କରତ କଳକୁ ଆବଶ୍ୟକୀୟ କାଠ ଆସିଛି । ଭବିଷ୍ୟତରେ ଯେପରି ରଥକାଠ ସମସ୍ୟା ନହୁଏ, ସେଥିପାଇଁ  ଶ୍ରୀଜଗନ୍ନାଥ ବନ ପ୍ରକଳ୍ପ ସ୍ଥିତି ନେଇ ଡାଟାବେସ ପ୍ରସ୍ତୁତ ହେବ । ୧୪ ଟି ରଥଟଣା ଓ ୬ଟି ଇନର ଓ ଆଉଟର କର୍ଡନ ଦଉଡ଼ି ଆସିସାରିଛି । ତେବେ ସ୍ୱାସ୍ଥ୍ୟ, ଔଷଧ ଯୋଗାଣ ଓ ଡାକ୍ତର ଅଭାବକୁ ନେଇ ଉଦବେଗ ପ୍ରକାଶ ପାଇଛି ।

ବଡ଼ଦାଣ୍ଡର ଉଭୟ ପାର୍ଶ୍ଵର ନାଳ ସଫେଇ କାର୍ଯ୍ୟ ଆରମ୍ଭ ହୋଇଛି । ରେଡ଼କ୍ରସ ରୋଡ ସମେତ କ୍ରସ ଡ୍ରେନ୍ ଓ ବଡ଼ଦାଣ୍ଡର ସଫେଇ କାର୍ଯ୍ୟ ଯଥାଶୀଘ୍ର ଶେଷ ହେବ । ବଡ଼ଦାଣ୍ଡକୁ ୧୫ ଟି ଜୋନରେ ବିଭକ୍ତ କରାଯାଇଛି । ସହରରେ ବିଶୁଦ୍ଧ ପାନୀୟ ଜଳ ଯୋଗାଣ ଉପରେ ଗୁରୁତ୍ବ ଦିଆଯାଇଛି । ବିଦ୍ୟୁତ ସମସ୍ୟା ନେଇ ହୋଇଛି ଆଲୋଚନା । ସ୍ବତନ୍ତ୍ର ବସ୍ ଚଳାଚଳ, ନିର୍ଦ୍ଧାରିତ ରେଟଚାର୍ଟ, ଦୁର୍ଘଟଣା ରୋକିବା ପାଇଁ ଇଣ୍ଟରସେପ୍ଟର କ୍ରେନ୍ ନିୟୋଜିତ ହେବ । ପୂର୍ବତଟ ରେଳବାଇ ପକ୍ଷରୁ ୩୬୫ଟି ସ୍ବତନ୍ତ୍ର ଟ୍ରେନ ଚଳାଚଳ କରିବ । ୩୦ ହଜାର ଲୋକଙ୍କ ପାଇଁ ଷ୍ଟେସନରେ ବ୍ୟବସ୍ଥା ସହ ଟ୍ରେନ୍ ସୂଚନା ପ୍ରଦାନ ପାଇଁ ଭିଡିଓ ୱାଲ୍ ସହ ୩୫ଟି ଟିକେଟ ବୁକିଙ୍ଗ କାଉଣ୍ଟର ଓ ୬ଟି ଅଟୋମେଟିକ୍ ଟିକେଟ ଭେଣ୍ଡିଙ୍ଗ ମେସିନ୍ ଲଗାଯିବ । ଶାନ୍ତି ଶୃଙ୍ଖଳା ରକ୍ଷା, ଆଇନ ଶୃଙ୍ଖଳା ପରିସ୍ଥିତି, ଜନଗହଳି ନିୟନ୍ତ୍ରଣ, ଟ୍ରାଫିକ ସୁପରିଚାଳନା ପାଇଁ ପର୍ଯ୍ୟାପ୍ତ ପୋଲିସ ମୁତୟନ ସହ ସହରରେ ସିସିଟିଭି କ୍ୟାମେରା ଲଗାଯିବ ।

ଭୁବନେଶ୍ବର: ବସ୍ତିରେ ବଢୁଛି ହିଂସା, ଗଡୁଛି ମୁଣ୍ଡ । ରକ୍ତ ଚରିତ୍ର ଫିଲ୍ମ ଷ୍ଟାଇଲରେ ବୁଲୁଛି ହତିଆର । ନିଶା ଖାଇ ନାରକୀୟ କାଣ୍ଡ ଘଟାଉଛନ୍ତି ବସ୍ତି ବାସିନ୍ଦା । ସକାଳୁ ସାଇନ୍ସପାର୍କ ଆଉ ରାତିରେ ଶାନ୍ତିପଲ୍ଲୀରେ ଗଡ଼ିଲା ମୁଣ୍ଡ । ଗତ ୨୬ ତାରିଖରେ ସହିଦନଗର ଥାନା ଅନ୍ତର୍ଗତ ସାଇନ୍ସ ପାର୍କ ବସ୍ତିରେ ହୋଇଥିବା ଛୁରାମାଡ଼ ଘଟଣାରେ ବୁଧବାର ଜନ୍ମେଜୟ ନାୟକଙ୍କ ମୃତ୍ୟୁ ହୋଇଛି । ଆଉ ଠିକ ପରେ ପରେ ପୁଣି ଶାନ୍ତିପଲ୍ଲୀ ବସ୍ତିରେ ହୋଇଛି ଆଉଏକ ମର୍ଡର । ନିଶାଖାଇ ଭାଇକୁ ମାରିଛି ଭାଇ । ମୃତକଙ୍କ ନାଁ ହମ୍ମିଦୁଲ ଖାଁ । ଭାଇ ଇମ୍ମତ ଖାଁ ଲୁହାରଡରେ ପିଟିଦେବାରୁ ତାଙ୍କର ମୃତ୍ଯୁ ହୋଇଛି । ପୋଲିସ ମୁଖ୍ୟ ଅଭିଯୁକ୍ତକୁ ଗିରଫ କରିଥିବା ବେଳେ ଅତ୍ୟଧିକ ନିଶା ଖାଇ ଏଭଳି ଘଟଣା ଘଟାଇଥିବା ସୂଚନା ଦେଇଛନ୍ତି ଏସିପି । କ୍ୟାପିଟାଲ ହସ୍ପିଟାଲକୁ ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଛି । ମୃତକଙ୍କ ମାଆ ଓ ପତ୍ନୀଙ୍କ ଅଭିଯୋଗ ଆଧାରରେ ତଦନ୍ତ ଚଳାଇଛି ସହିଦନଗର ଥାନା ପୋଲିସ ।

ହୋଲି ଦିନ ସହିଦନଗର ଥାନା ଅନ୍ତର୍ଗତ ଶାନ୍ତିପଲ୍ଲୀ ବସ୍ତିରେ ଗୋପୀ ଗୁଣିଙ୍କୁ ଦିନ ଦ୍ୱିପ୍ରହରେ ନିର୍ମମ ହତ୍ୟା ଓ ଠିକ ସେହିଦିନ ମଞ୍ଚେଶ୍ୱର ଥାନା ଠାରୁ କିଛି ଦୂରରେ ସମେଇଗାଡ଼ିଆର ଆୟୁସ୍ମାନ ପତିଙ୍କୁ ହତ୍ୟା କରିଥିଲେ ଦୁର୍ବୃତ୍ତ । ଏହି ଦୁଇଟି ଘଟଣା ପୂର୍ବରୁ ରାଜରାସ୍ତା ଉପରେ ସହଦେବ ନାୟକଙ୍କୁ ଗଣ୍ଡି ମୁଣ୍ଡ ଅଲଗା କରି ବିଭତ୍ସ ହତ୍ୟା କରାଯାଇଥିଲା । ବସ୍ତିରେ ରହୁଥିବା ଯୁବକଙ୍କୁ ହତ୍ୟା ପଛରେ ନିଶା ସାଜିଛି ମୂଳ କାରଣ । ବସ୍ତିରେ ଅପରାଧ ରୋକିବା ପାଇଁ କମିଶନରେଟ ପୋଲିସ ପକ୍ଷରୁ କିଛିଦିନ ତଳେ ବସ୍ତି ମାନଙ୍କରେ ଲାଗିଥିଲା ଲଟକା । ଅପରାଧୀଙ୍କ ଘର ଆଗରେ ବାଜିଥିଲା ଡେଙ୍ଗୁରା । ସେପଟେ ବସ୍ତିକୁ ଚାଲ, ଖେଳକୁଦ ଭଳି ପ୍ରତିଯୋଗିତା କରି କମ୍ୟୁନିଟି ପୋଲିସିଂ ବ୍ୟବସ୍ଥାକୁ ସୁଦୃଢ଼ କରାଯାଉଥିଲେ ମଧ୍ୟ ନିଶା ପାଇଁ ପାଣି ଫୋଟକା ଭଳି ଚାଲିଯାଉଛି ଜୀବନ । ଖୋଲାଖୋଲି ପୋଲିସକୁ ଚ୍ୟାଲେଞ୍ଜ ଦେଉଛନ୍ତି ଅପରାଧୀ ।

ଭୁବନେଶ୍ବର: ଭୁବନେଶ୍ଵର ଓ କଟକ ମଧ୍ୟରେ ମେଟ୍ରୋ ଟ୍ରେନ ଚଳାଚଳ ପାଇଁ ରାଜ୍ୟ ସରକାର ପ୍ରକ୍ରିୟା ଆରମ୍ଭ କରିବାକୁ ଯାଉଛନ୍ତି । ଭୁବନେଶ୍ୱର ବିମାନ ବନ୍ଦରରୁ ତ୍ରିଶୁଳିଆ ପରିବର୍ତ୍ତେ କଟକ ବସଷ୍ଟାଣ୍ଡ ଓ କଟକ ବଡ଼ ମେଡିକାଲ ପର୍ଯ୍ୟନ୍ତ ସମ୍ପ୍ରସାରଣ ହେବ ମେଟ୍ରୋ ପ୍ରକଳ୍ପ । ଲୋକଙ୍କ ସୁବିଧା ଦୃଷ୍ଟିରୁ ସରକାର ଏଭଳି ନିଷ୍ପତ୍ତି ନେଇଛନ୍ତି । ମେଟ୍ରୋ ପାଇଁ ଏକ କମିଟି ଗଠନ କରାଯାଇଛି । ଦେଶରେ ମେଟ୍ରୋ ଚାଲୁଥିବା ବିଭିନ୍ନ ସହର ବୁଲି ଅନୁଧ୍ୟାନ କରୁଛି କମିଟି । ନୂଆ DPR ପ୍ରସ୍ତୁତ କରାଯାଉଛି । କେବଳ ରାଜ୍ୟ ପାଣ୍ଠିରୁ ନୁହେଁ, କେନ୍ଦ୍ର ସରକାରଙ୍କ ସହଯୋଗରେ ମେଟ୍ରୋ ପ୍ରକଳ୍ପ ତିଆରି ହେବ ବୋଲି ସୂଚନା ଦେଇଛନ୍ତି ନଗର ଉନ୍ନୟନ ମନ୍ତ୍ରୀ ।

ବାସୁଦେବପୁର: ପରିଣତ ବୟସରେ ହାରିଯାଇନାହାଁନ୍ତି । ଆଜିବି ଆଖିରେ ରହିଛି ଆଖିଏ ସ୍ଵପ୍ନ । ମନରେ ଅଦ୍ୟମ ସାହସ । ଆଉ କିଛି କରି ଦେଖାଇବାକୁ ରହିଛି ଇଚ୍ଛା । ସେହି ଇଚ୍ଛା ଆଜି ଦେଇଛି ସଫଳତା । ବାସୁଦେବପୁର ବ୍ଲକ ଚୂଡାମଣୀ ପଞ୍ଚାୟତ ତଳସାହିର ଶଙ୍କର୍ଷଣ ମଲ୍ଲିକ । ସେ ନିଜ ଟାଙ୍ଗରା ଭୂଇଁରେ ଫଳାଇଛନ୍ତି ସୁନାର ଫସଲ । ଆମ୍ବ, କଦଳୀ, ମୁଗ, ବିରି ଭଳି ବିଭିନ୍ନ ପନିପରିବା ଚାଷ କରିଛନ୍ତି  । ସବୁଠୁ ବଡ କଥା ହେଲା ସେ ନିଜଜ୍ଵ ଜ୍ଞାନ କୌଶଳରେ ଆଳୁ ଚାଷ କରି କୁଇଣ୍ଟାଲ କୁଇଣ୍ଟାଲ ଆଳୁ ଉତ୍ପାଦନ କରୁଛନ୍ତି । ପରିବା ଚାଷ କରି ନିଜ ପରିବାରର ଆବଶ୍ଯକତା ମେଣ୍ଟାଇବା ସହ ବର୍ଷକୁ ପାଞ୍ଚ ଲକ୍ଷ ଟଙ୍କାର ପରିବା ବିକ୍ରି କରୁଛନ୍ତି ।

ଶଙ୍କର୍ଷଣ ବ୍ଲକ ସ୍ତରରୁ ଜିଲ୍ଲା ଓ ରାଜ୍ୟସ୍ତର ପର୍ଯ୍ୟନ୍ତ ଜଣେ ସଫଳ ଚାଷୀ ଭାବେ ବହୁ ପୁରସ୍କାର ପାଇ ଭଦ୍ରକ ଜିଲ୍ଲା ପାଇଁ ଗୌରବ ଆଣି ସାରିଲେଣି । ବିଭିନ୍ନ ସାମାଜିକ ଅନୁଷ୍ଠାନ ମଧ୍ୟ ଶଙ୍କର୍ଷଣଙ୍କୁ ସମ୍ବର୍ଦ୍ଧିତ କରିଛନ୍ତି । ତେବେ ବାସୁଦେବପୁର ବ୍ଲକର ଉଦ୍ୟାନ ବିଭାଗ ପକ୍ଷରୁ ୪୫ ଏକର ଜମିରେ ୧୫୦ ଜଣ ଚାଷୀଙ୍କୁ ଆଳୁ ଚାଷ ପାଇଁ ବିହନ ପ୍ରଦାନ କରାଯାଇଥିଲା । ହେଲେ ଚାଷୀ ଶଙ୍କର୍ଷଣ ଭିନ୍ନ ଢଙ୍ଗରେ ଅଳ୍ପ ଖର୍ଚ୍ଚ କରି ଅଧିକ ଲାଭବାନ ହୋଇପାରିଛନ୍ତି ବୋଲି କହିଛନ୍ତି ଉଦ୍ୟାନ ବିଭାଗ ଅଧିକାରୀ ।

ବଲାଙ୍ଗୀର: ବଲାଙ୍ଗୀରରେ ବିଗିଡିଗଲାଣି ଆଇନଶୃଙ୍ଖଳା । ପାଲଟିଛି କ୍ରାଇମ ହଟସ୍ପଟ । କଥା କଥାରେ ଗଡୁଛି ମୁଣ୍ଡ । ପ୍ରତିଦିନ ଘଟୁଛି ଛୋଟ ବଡ ଅପରାଧ । ପୋଲିସକୁ ଚକମା ଦେଇ ଗୋଟିଏ ପରେ ଗୋଟିଏ ଅପରାଧ ଘଟାଇଚାଲିଛନ୍ତି ଅପରାଧୀ । ଗତ ମାସେ ମଧ୍ଯରେ ଗଡିଲାଣି ୧୦ରୁ ଅଧିକ ମୁଣ୍ଡ । କେବଳ ସପ୍ତାହେ ମଧ୍ୟରେ ଯାଇଛି ୫ ଜୀବନ । ମୁରିବାହାଲ ଥାନା ଅଞ୍ଚଳରେ ୪ ଜଣଙ୍କ ସନ୍ଦେହଜନକ ମୃତଦେହ ପୋଲିସ ଜବତ କରିଥିବା ବେଳେ ଅନରକିଲିଂ ଅଭିଯୋଗ ହୋଇଥିଲା I

ଗତ ୧୧ ତାରିଖରେ ସରଗାର୍ଡ ଗାଁରେ ମଦ କାରବାରକୁ କେନ୍ଦ୍ରକରି ଅରୁଣ ସାଏ ପଟେଲକୁ ଗାଁ ଦାଣ୍ଡରେ ମଦ ବେପାରୀ ବାପପୁଅ ଗୋଡାଇ ଗୋଡାଇ ହତ୍ୟା କରିଥିଲେ । ୧୨ ତାରିଖରେ ଚିମିନିଭାଟି ପଡାରେ ସୁଧ କାରବାର ଓ ଟଙ୍କା ନେଣଦେଣକୁ କେନ୍ଦ୍ରକରି ବିଚ ରାସ୍ତାରେ ମାରଣାସ୍ତ୍ର ଓ ଠେଙ୍ଗାରେ ଗୋଡାଇ ଗୋଡାଇ ଟ୍ରକ୍ ଡ୍ରାଇଭର ରାମ ଦାଶଙ୍କୁ ବୀଭତ୍ସ ହତ୍ୟା । ୧୩ରେ ମଧ୍ୟ ଜମି କାରବାରକୁ ନେଇ ମନୋଜ ନାଏକଙ୍କୁ କରାଯାଇଥିଲା ହତ୍ଯା । ୨୨ ତାରିଖରେ ମଧ୍ୟ ଘଟିଥିଲା ଆଉ ଏକ ହତ୍ୟାକାଣ୍ଡ । ଏସବୁ ଘଟଣା ପୋଲିସର କାର୍ଯ୍ୟଦକ୍ଷତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି । ଅନ୍ୟପଟେ ପୋଲିସ ଓ ଅପରାଧିଙ୍କ ଭିତରେ ମଧୁଚନ୍ଦ୍ରିକା କାରଣରୁ ଅପରାଧିଙ୍କୁ ଅପରାଧ ଘଟାଇବାକୁ ଖୋରାକ ଯୋଗାଉଛି ବୋଲି କହିଛନ୍ତି ବଲାଙ୍ଗୀର ବାସୀ ।

ଜିଲ୍ଲାରେ ଅପରାଧିକ କାର୍ଯ୍ୟକଳାପ ଅଣାୟତ୍ତ ହୋଇଥିବା ବେଳେ ରାଜ୍ୟ ସରକାର କ୍ରାଇମ୍ କଣ୍ଟ୍ରୋଲ କରିବାରେ ଫେଲ ମାରିଥିବା ଅଭିଯୋଗ ଆଣିଛନ୍ତି ବଲାଙ୍ଗୀର ବିଧାୟକ । ବେଳ ଥାଉଥାଉ ଅପରାଧି ଗ୍ୟାଙ୍ଗକୁ ସାବାଡ ନକଲେ ଆଗକୁ ବଲାଙ୍ଗୀର ଜିଲ୍ଲାରେ ଅପରାଧ ଭୟଙ୍କର ରୂପ ଧାରଣ କରିବାର ସମ୍ଭାବନା ରହିଛି । ଅନ୍ୟପଟେ ବଲାଙ୍ଗୀର ଏସ୍ପି କହିଛନ୍ତି, ସମସ୍ତ ଘଟଣାରେ ପୋଲିସ ସଫଳତା ସହ ଅପରାଧିକୁ ଗିରଫ କରି କୋର୍ଟଚାଲାଣ କରିଛି ।