ନନ୍ଦିଘୋଷ ବ୍ୟୁରୋ: ସୁନ୍ଦରଗଡ଼ ବିଧାୟକ ଯୋଗେଶ ସିଂଙ୍କ ଅଟକକୁ ବିଜେଡିର ନିନ୍ଦା । ସୁନ୍ଦରଗଡ଼ ଜିଲ୍ଲା ପ୍ରଶାସନର ପଦକ୍ଷେପକୁ ପ୍ରେସମିଟରେ ନିନ୍ଦା କଲା ବିଜେଡି । ଗଣତାନ୍ତ୍ରିକ ଆନ୍ଦୋଳନକୁ ଚପାଇ ଦେବା ଲାଗି ଉଦ୍ୟମ ହେଉଥିବା କଲା ଅଭିଯୋଗ ।
ସୂଚନାଯୋଗ୍ୟ, ହେମଗିରି କୋଇଲା ସାଇଡିଂ ନିକଟରେ ବିଧାୟକ ଯୋଗେଶ ସିଂଙ୍କ ନେତୃତ୍ବରେ ଆନ୍ଦୋଳନ ଚାଲିଥିଲା । ବେଆଇନ ରେଲୱେ ସାଇଡିଂ ଚାଲିଥିବା ଅଭିଯୋଗରେ ଆନ୍ଦୋଳନ ଚାଲିଥିଲା । ଏହି ସମୟରେ ବିଧାୟକଙ୍କ ସମେତ ଦେଢ ଶହ ଆନ୍ଦୋଳନକାରୀଙ୍କୁ ଉଠାଇ ନେଲା ପୋଲିସ ।
ନନ୍ଦିଘୋଷ ବ୍ୟୁରୋ: କଟକରେ ବଡ଼ ଅଘଟଣ । ବ୍ରିଜ କାମ ଚାଲିଥିବାବେଳେ ଅଘଟଣ । ବ୍ରିଜର ସ୍ଲାବରେ ଚାପି ହୋଇ ୩ ଶ୍ରମିକଙ୍କ ମୃତ୍ୟୁ । ଦୁଇ ଜଣ ଗୁରୁତର । ଖାନନଗରସ୍ଥିତ କାଠଯୋଡ଼ିରେ ଚାଲିଥିଲା କାମ ।
ମିଳିଥିବା ସୂଚନା ଅନୁସାରେ, ନୂଆ ବ୍ରିଜ କାମ ଚାଲିଥିବା ସମୟରେ ଅଘଟଣ ଘଟିଛି । ବିମ୍ ଉଠାଇବା ବେଳେ କ୍ରେନ୍ ଭାଙ୍ଗି ଶ୍ରମିକଙ୍କ ଉପରେ ପଡିଥିଲା । ମୃତକମାନେ ହେଲେ ସୌମ୍ୟରଞ୍ଜନ ମଲ୍ଲିକ, ଶିବଶଙ୍କର ପଟ୍ଟନାୟକ ଏବଂ ସୁବାସ ଚନ୍ଦ୍ର ଭକ୍ତ । ବାଲେଶ୍ଵରର ସୌମ୍ୟରଞ୍ଜନ ସାଇଟ୍ ଇଂଜିନିୟର ଥିଲେ । ତେବେ ଘଟଣା ଘଟିବା ପରେ ଠିକା ସଂସ୍ଥାର କର୍ମଚାରୀ ଘଟଣାସ୍ଥଳ ଛାଡ଼ି ଫେରାର ହୋଇଯାଇଛି । ସ୍ଥାନୀୟ ବାସିନ୍ଦା ପହଞ୍ଚି ମୃତାହତଙ୍କୁ ଉଦ୍ଧାର କରିଥିଲେ ।
ନନ୍ଦିଘୋଷ ବ୍ୟୁରୋ: ହପଲଗାଓଁ ଆତଙ୍କବାଦୀ ଆକ୍ରମଣକୁ ନେଇ ବୟାନବାଜି ଜାରି ରହିଛି । ପୂର୍ବତନ ମୁଖ୍ୟମନ୍ତ୍ରୀ ତଥା ଜମ୍ମୁ ଓ କାଶ୍ମୀର ନ୍ୟାଶନାଲ କନଫରେନ୍ସ ଅଧ୍ୟକ୍ଷ ଫାରୁକ ଅବଦୁଲ୍ଲା ଆକ୍ରମଣକୁ ନିନ୍ଦା କରିବା ସହ ଲୋକଙ୍କୁ ଆତଙ୍କବାଦ ବିରୋଧରେ ଏକାଠି ହେବାକୁ ଆହ୍ବାନ ଦେଇଛନ୍ତି । ଆକ୍ରମଣରେ ସମ୍ପୃକ୍ତି ବ୍ୟକ୍ତି ମାନବିକତାର ଶତ୍ରୁ । ସେମାନେ ନର୍କରେ ସଢ଼ିବେ । ଏହାସହ ସିନ୍ଧୁ ଜଳ ଚୁକ୍ତିକୁ ନେଇ ମଧ୍ୟ ଫଶରୁକ ଟଇପ୍ପଣୀ ଦେଇଛନ୍ତି । ସିନ୍ଧୁ ଚୁକ୍ତିର ସଂଶୋଧନ ହେବାର ଆବଶ୍ୟକତା ଥିଲା ।
ସେ କହିଛନ୍ତି, ବହୁତ ଦିନ ଆଗରୁ ସିନ୍ଧୁ ଚୁକ୍ତିରେ ସଂଶୋଧନ କରାଯିବାର ଆବଶ୍ୟକତା ଥିଲା । ଆମେ ଆମ ନଦୀର ପାଣିରୁ ବଞ୍ଜିତ ହେଉଛୁ । ନଦୀ ଉପରେ ହାଇଡ୍ରୋ ପାଓ୍ବର ପ୍ରୋଜେକ୍ଟ କରି ବିଦ୍ୟୁତ ଉତ୍ପାଦନ କରି ପାରନ୍ତୁ । ହେଲେ ପାକିସ୍ତାନର ଅନୁମତି ବିନା ଏହା ହୋଇ ପାରିବନି । ଚେନାବ ନଦୀର ପାଣି ବି ଜମ୍ମୁବାସୀଙ୍କୁ ମିଳୁନି ।
ଆଗକୁ ସେ କହିଛନ୍ତି, ଭାରତ ମହାତ୍ମା ଗାନ୍ଧୀଙ୍କ ଦେଶ । ଆମେ ଅବଶ୍ୟ ପାକିସ୍ତାନକୁ ପାଣିକୁ ନେଇ ଧମକ ଦେଇଛୁ । ହେଲେ ଆମେ ଏତେ ନୁଷ୍ଠୁର ନୁହେଁ ଯେ, ପାଣି ବିନା ସେମାନଙ୍କୁ ମରିବାକୁ ଛାଡ଼ିଦେବୁ । ସିନ୍ଧୁ ଚୁକ୍ତି ହେବା ବେଳେ ଜମ୍ମୁ ଓ କାଶ୍ମୀରର ଲୋକଙ୍କୁ ଭରସାକୁ ନିଆଯାଇ ନଥିଲା, ଯାହାର ପରିଣାମ ଆଜି ବି ଭୋଗିବାକୁ ପଡୁଛି ।
ଆତଙ୍କବାଦୀ ଆକ୍ରମଣରେ ମୃତ୍ୟୁବରଣ କରିଥିବା ରାଇଡ ଅପରେଟର ଆଦିଲ ହୁସେନଙ୍କ ଘରକୁ ଯାଇ ତାଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହ ପରିବାର ଲୋକଙ୍କୁ ସମବେଦନା ଜଣାଇଛନ୍ତି । ଆତଙ୍କବାଦୀ ଆକ୍ରମଣରେ ମୃତକମାନେ ପର୍ଯ୍ୟଟକ ହୋଇଥିବା ବେଳେ ଏକମାତ୍ର ସ୍ଥାନୀୟ ଲୋକ ଆଦିଲ ଥିଲେ । ଏହି ଅବସରରେ ସେ ଆଦିଲଙ୍କୁ ସହିଦ ବୋଲି କହିଥିଲେ । ଆଦିଲ ଆତଙ୍କବାଦୀଙ୍କୁ ନଡରି ସେମାନଙ୍କ ମୁକାବିଲା କରିଥିଲେ । ଏହା ହିଁ ହେଉଛି ପ୍ରକୃତ ମାନବିକତା ଓ କାଶ୍ମୀରୟତ ବୋଲି ଫଶରୁକ କହିଛନ୍ତି ।
ତେବେ ପାକିସ୍ତାନ ବିରୋଧରେ ଭାରତର ଆକ୍ସନକୁ ନେଇ ଫାରୁକ ଅବଦୁଲ୍ଲା କିଛଇ କହିବାକୁ ମନା କରି ଦେଇଥିଲେ । ଏହା ପ୍ରଧାନମନ୍ତ୍ରୀଙ୍କ ଅଧିକାର । ଏହା ଉପରେ ମୁଁ କିଛି କହିପାରିବିନି ବୋଲି କହିବା ସହ ପାକିସ୍ତାନକୁ କଟୁ ଭାଷାରେ ସମାଲୋଚନା କରିଥିଲେ । ବିଲାଓ୍ବଲ ଭୁଟ୍ଟଙ୍କ ଭାରତକୁ ଧମକକୁ ନେଇ କହିଥିଲେ, ଏମାନଙ୍କ ବୟନାବାଜିରେ କାଶ୍ମୀର ସମସ୍ୟାର ସମାଧାନ ହେବନାହିଁ । ସେମାନଙ୍କ ବୟାନକୁ ଧ୍ୟାନ ଦେଲେ କାଶ୍ମୀର ଆଗକୁ ବଢ଼ି ପାରିବନି ।
ନନ୍ଦିଘୋଷ ବ୍ୟୁରୋ: ବଲାଙ୍ଗୀର ପାଟଣାଗଡ଼ର ବହୁ ଚର୍ଚ୍ଚିତ ପାର୍ସଲ ବୋମା ବିସ୍ଫୋରଣ ଘଟଣା । ଜିତେନ୍ ପଟେଲ ନାମକ ଜଣେ ବ୍ୟକ୍ତି କୋର୍ଟରେ ହାଜର ହୋଇ ପୁଞ୍ଜିଲାଲ ସପକ୍ଷରେ ସାକ୍ଷୀ ପ୍ରଦାନ କରିଛନ୍ତି । ଆସନ୍ତା ୫ ତାରିଖରେ କୋର୍ଟରେ ସାକ୍ଷ୍ୟ ଗ୍ରହଣ ଶେଷ ନେଇ କ୍ଲୋଜ଼ର ନୋଟିସ ପ୍ରକାଶ ପାଇଛି । ଆସନ୍ତା ୯ ତାରିଖରେ ପ୍ରତିପକ୍ଷ ଓକିଲ ନିଜ ପକ୍ଷ ରଖିବେ । ଦୁଇରୁ ତିନି ଦିନ ଧରି ପକ୍ଷ ଶୁଣିବା ପରେ ଚଳିତମାସ ଶେଷ ସୁଦ୍ଧା ପାଟଣାଗଡ଼ ଏଡିଜେ ମାମଲାର ରାୟ ପ୍ରକାଶ କରିବେ ବୋଲି ପୁଞ୍ଜିଲାଲର ଓକିଲ ସୂଚନା ଦେଇଛନ୍ତି ।
ଆସନ୍ତା ୬ ତାରିଖରେ କିଛି ସରକାରୀ ଦସ୍ତାବିଜ୍ କୋର୍ଟରେ ଦାଖଲ କରାଯିବ ବୋଲି ପୁଞ୍ଜିଲାଲର ଓକିଲ କହିଛନ୍ତି । ଆସନ୍ତା ଜୁନ ୧୭ ସୁଦ୍ଧା ମାମଲର ଶୁଣାଣି କରିବା ପାଇଁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ରହିଥିବାବେଳେ ଚଳିତ ମାସ ଶେଷ ସୁଦ୍ଧା ରାୟ ପ୍ରକାଶ ପାଇପାରେ । ପାର୍ସଲ ବୋମା ମାମଲାରେ ନିଜକୁ ନିର୍ଦ୍ଦୋଷ ବୋଲି କହିବା ସହ କର୍ମକ୍ଷେତ୍ରରେ ମଧ୍ୟ କାହା ସହ ତାଙ୍କର ଶତ୍ରୁତା ନଥିଲା ବୋଲି ବିଚାରପତିଙ୍କୁ କହିଥିଲେ ପୁଞ୍ଜିଲାଲ । ଜାଣିଶୁଣି ତାଙ୍କୁ ଏଥିରେ ଫସା ଯାଇଥିବା ସେ କହିଛନ୍ତି । ଏନେଇ ଅଭିଯୁକ୍ତ ପୁଞ୍ଜିଲାଲ ପକ୍ଷରୁ ସମସ୍ତ ସାକ୍ଷ୍ୟ ପ୍ରଦାନ ସରିଛି । ପୁଞ୍ଜିଲାଲଙ୍କ ଓକିଲ ପକ୍ଷ ରଖିବା ପରେ ଖୁବଶୀଘ୍ର ରାୟ ପ୍ରକାଶ ପାଇବ ।
ଗତ ୨୦୧୮ ଫେବୃଆରୀ ୨୩ ତାରିଖରେ ପାଟଣାଗଡ଼ର ସଂଯୁକ୍ତା ସାହୁ ଏବଂ ରବୀନ୍ଦ୍ର ସାହୁଙ୍କ ପୁଅ ବାହାଘରକୁ ଉପହାରରେ ପାର୍ସଲ ବୋମା ଆସିଥିଲା । ଉପହାର ଖୋଲିବା ବେଳେ ବୋମା ବିସ୍ଫୋରଣ ଘଟିଥିଲା । ନବ ବିବାହିତ ସୌମ୍ୟଶେଖର ଓ ତାଙ୍କ ସମ୍ପର୍କୀୟ ଜେଜେମାଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା । ନବ ବିବାହିତା ରିମାରାଣୀ ସାହୁ ଅଳ୍ପକେ ମୃତ୍ୟୁ ମୁଖରୁ ବଞ୍ଚିଯାଇଥିଲେ । କ୍ରାଇମବ୍ରାଞ୍ଚ ଘଟଣାର ତଦନ୍ତ କରି ପୁଞ୍ଜିଲାଲକୁ ପାଟଣାଗଡ଼ରୁ ଗିରଫ କରିଥିଲା ।
ନନ୍ଦିଘୋଷ ବ୍ୟୁରୋ: ପାତାଳରେ ବି ଲୁଚିଲେ ଖୋଜି ଖୋଜି ମାରିବୁ । ପହଲଗାଓଁ ନରସଂହାର ପରେ ଆତଙ୍କବାଦୀ ଓ ସେମାନଙ୍କ କଥାକଥିତ ଆକ୍କାଙ୍କ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଇଛନ୍ତି ଏପରି ହୁଙ୍କାର । ଯାହାକୁ ନେଇ ଆତଙ୍କାବଦୀ ଓ ସେମାନଙ୍କ ସମର୍ଥକଙ୍କ ମନରେ କୋକୁଆ ଭୟ । ଭାରତଠାରୁ ଦୂରରେ ରହିବାକୁ ଖୋଜୁଛନ୍ତି ସୁରକ୍ଷିତ ସ୍ଥାନ । ହେଲେ ଭାରତର ଆଖି ଏହି ନରସଂହାରକାରୀଙ୍କ ଉପରେ ନିାନ୍ତର ରହିଛି, ଏକଥା ସେମାନଙ୍କୁ ଜଣାନାହିଁ । ଏହି କ୍ରମରେ ଜେନ୍ନାଇରୁ ଶ୍ରୀଲଙ୍କା ଯାଇଥିବା ଏକ ବିମାନକୁ ଶ୍ରୀଲଙ୍କାରେ ଯାଞ୍ଚ କରାଯାଇଛି ।
ମିଳିଥିବା ସୂଚନା ଅନୁସାରେ, ଚେନ୍ନାଇରୁ ଶ୍ରୀଲଙ୍କା ଏୟାରଲାଇନ୍ସର ବିମାନ UL 122 ଶ୍ରୀଲଙ୍କା ଯାଇଥିଲା । ଏହି ବିମାନରେ ପହଲଗାଓଁ ଆତଙ୍କବାଦୀ ଭାରତ ଛାଡ଼ି ଶ୍ରୀଲଙ୍କା ଚାଲି ଯାଇଥିବା ଗୁଇନ୍ଦା ସୂଚନା ମିଳିଥିଲା । ଆଉ ସୂଚନା ମିଳିବା ପରେ ଆରମ୍ଭ ହୋଇଯାଇଥିଲା ଆକ୍ସନ । ବିମାନଟି ଶ୍ରୀଲଙ୍କାର ବନ୍ଦରନାଇକେ ଆନ୍ତର୍ଜାତିକ ବିମାନ ବନ୍ଦରରେ ପହଞ୍ଚିବା ପରେ ଆରମ୍ଭ ହୋଇଯାଇଥିଲା ଯାଞ୍ଚ । ସମ୍ପୂର୍ଣ୍ଣ ବିମାନକୁ ଯାଞ୍ଚ କରାଯାଇଛି । ପ୍ରତିଟି ଯାତ୍ରୀଙ୍କ ଯାଞ୍ଚ ହୋଇଛି । ବିମାନଟି ଭାରତରୁ କଲମ୍ବୋ ଯାଇଥିଲା ।
ଭାରତର ଏହି ଆକ୍ସନ, ଆତଙ୍କବାଦୀ ଏବଂ ସେମାନଙ୍କ ଆକ୍କାଙ୍କ ମନରେ ଭୟ ଖେଳାଇ ଦେଇଛି । ନରସଂହାର ପରେ ଘାଟି ଅଞ୍ଚଳରେ ଲୁଚିଥିବା ଆତଙ୍କବାଦୀ ଭାରତ ଛାଡିବାକୁ ଯୋଜନା କରୁଥିବା ବେଳେ ଅନ୍ୟ ଦେଶରେ ଭାରତର ଏପରି ଯାଞ୍ଚ ସେମାନଙ୍କ ମନରେ ଛନକା ଭରି ଦେଇଛି ।
ନନ୍ଦିଘୋଷ ବ୍ୟୁରୋ: ପୁଣି ବିବାଦରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ପେପା ଫ୍ରାନ୍ସିସଙ୍କ ନିଧନକୁ ଦିନ କେଇଟା ବିତିନି ଟ୍ରମ୍ପ ସୋସିଆଲ ମିଡ଼ିଆରେ ଏକ ପୋଷ୍ଠ କରିଛନ୍ତି । ଯେଉଁଥିରେ ସେ ପେପା ବେଶରେ ଦେଖିବାକୁ ମିଳୁଛି । ଏହା ଏକ AI ଜେନେରେଟେଡ ଫଟୋ । କେବଳ ଟ୍ରମ୍ପ ଏହାକୁ ପୋଷ୍ଟ କରି ନାହାନ୍ତି, ହ୍ବାଇଟ୍ ହାଉସର ସରକାରୀ ହ୍ୟାଣ୍ଡଲରୁ ମଧ୍ୟ ଏହି ଫଟୋ ପୋଷ୍ଟ ହୋଇଛି ।
ପୋପ ବେଶରେ ଏହି ଫଟୋ ଆସିବା ପରେ ସୋସିଆଲ ମିଡ଼ଆରେ ଟ୍ରମ୍ପଙ୍କୁ ଟ୍ରୋଲ କରାଯିବା ଆରମ୍ଭ ହୋଇଯାଇଛି । କାରଣ କିଛଇଦିନ ପୂର୍ବରୁ ଟ୍ରମ୍ପ ମଜାରେ କହିଥିଲେ, ମୁଁ ଅପରବର୍ତ୍ତି ପୋପ ହେବାକୁ ପସନ୍ଦ କରିବି । ଏପରି ବୟାନ ପରେ ପରେ ଟ୍ରମ୍ପ ପୋପ ବେଶରେ ନିଜକୁ ପୋଷ୍ଟ କରିଛନ୍ତି । ତେବେ ସୋସିଆଲ ମିଡ଼ିଆରେ ଟ୍ରମ୍ପଙ୍କୁ ପ୍ରବଳ ଟ୍ରୋଲ କରାଯାଉଛି । କିଛି ୟୁଜର୍ସ ଏହାକୁ ହାଲକାରେ ନେଇଥିଲେ ବି ଅଧିକାଂଶ ୟୁଜର୍ସ ନିଜର ଅସନ୍ତୋଷ ବ୍ୟକ୍ତ କରୁଛନ୍ତି । ଜଣେ ୟୁଜର୍ସ ଲେଖିଛନ୍ତି, ଏହା ଚର୍ଚ୍ଚ ଭଗବାନଙ୍କୁ ଅପମାନ । ଟ୍ରମ୍ପ ଜଣେ ସୈତାନ । ଆଉ ଜଣେ ୟୁଜର୍ସ ଲେଖିଛନ୍ତି, ଏହା ବହୂତ ଅପମାନଜନକ କଥା । ରିପବ୍ଲିକାନ ଏମିତି ବ୍ୟକ୍ତିଙ୍କୁ ଭୋଟ୍ ଦେଉଛନ୍ତି ?
ସୂଚନାଯୋଗ୍ୟ, ପୋପ ଫ୍ରାନ୍ସିସଙ୍କ ଦେହାନ୍ତ ୨୨ ଏପ୍ରିଲକୁ ୮୮ ବର୍ଷ ବୟସରେ ହୋଇଥିଲା । ୨୬ ଏକ୍ରିଲକୁ ସେଣ୍ଟ ପିଟର୍ସ ସ୍କୋୟାରରେ ତାଙ୍କ ଅନ୍ତିମ ସତ୍କାର କରାଯାଇଥିଲା । ଯେଉଁଥିରେ ଟ୍ରାମ୍ପ ମଧ୍ୟ ସାମିଲ ହୋଇଥିଲେ । ତେବେ ଟ୍ରମ୍ପଙ୍କ ଏମିତି ପୋଷ୍ଟ ପରେ କିଛି ଲୋକ ଟିପ୍ପଣୀ ଦେଇ ଲେଖିଛନ୍ତି, ‘କେମ୍ ଭାଟିକାନା ଗ୍ରେଟ୍ ଏଗେନ୍’ । ଯାହା ଟ୍ରମ୍ପ ନିର୍ବାଚନୀ ସ୍ଲୋଗାନ ମେକ ଆମେରିକା ଗ୍ରେଟ୍ ଏଗେନକୁ ଆଧାର କରି କୁହାଯାଉଛି ।
ନନ୍ଦିଘୋଷ ବ୍ୟୁରୋ: ପହଲଗାଓଁ ନରସଂହାର ପରେ ଭାରତ ଯୁଦ୍ଧ ପ୍ରସ୍ତୁତି ଦେଖି ପାକିସ୍ତାନ ଛାନିଆ । ନିଜଦେଶର ଲୋକଙ୍କୁ ଖାଇବାକୁ ଦୁଇ ବେଳା ଯୋଗାଇ ପାରୁ ନଥିବା ଭିକାରୀସ୍ତାନ ଭାରତ ସହ ଯୁଦ୍ଧ କରିବାକୁ ଲାଗିପଡ଼ିଛି ପ୍ରସ୍ତୁତିରେ । ସୀମାରେ ଅସ୍ତ୍ର ବିରତି ଉଲ୍ଲଂଘନ କରୁଛି ତ, ଆରବ ସାଗରରେ ଭାରତକୁ ଆଖି ଦେଖାଉଛି । ଧ୍ବଂସର ଦ୍ବାର ଦେଶରେ ଛିଡ଼ା ହୋଇଥିବା ପାକିସ୍ତାନ ଏବେ କ୍ଷପଣାସ୍ତ୍ର ପରୀକ୍ଷା କରିଛି । ଆଜି ପାକିସ୍ତାନ ପକ୍ଷରୁ ଅବଦାଲି ନାମକ ବାଲେଷ୍ଟିକ କ୍ଷେପଣାସ୍ତ୍ର ପରୀକ୍ଷା କରାଯାଇଛି । ଭୂପୃଷ୍ଠରୁ ଭୂପୃଷ୍ଠକୁ ଟାର୍ଗେଟ କରୁଥିବା ଏହି କ୍ଷେପଣାସ୍ତ୍ରର ଲକ୍ଷ୍ୟ ଭେଦ କ୍ଷମତା ୪୫୦ କିମି ରହିଥିବା ଜଣାପଡ଼ିଛି । ସୋନମିୟାନି ରେଞ୍ଜରେ ପାକିସ୍ତାନ ଏହି ପରୀକ୍ଷଣ କରିଛି । ଆର୍ମୀ ଷ୍ଟ୍ରେଟେଜିକ ଫୋର୍ସେଜ୍ କମାଣ୍ଡ (ASFC) ଆଧାରରେ ଅପରେସନାଲ ୟୁଜର୍ସ ଟ୍ରାଏଲର ଏହା ଏକ ଅଂଶ । ଯାହା ପାକିସ୍ତାନର ପରମାଣୁ କ୍ଷମତା ମିଜାଇଲ ସିଷ୍ଟମର ଦେଖାରଖା କରିଥାଏ ।
ପାକିସ୍ତାନୀ ମିଡ଼ିଆ ଅନୁସାରେ, ଏହି ମିଜାଇଲର ପରୀକ୍ଷଣ ମିଲିଟ୍ରି ଡ୍ରିଲ ‘ଏକ୍ସରସାଇଜ୍ ଇଣ୍ଡସ’ ଆଧାରରେ କରାଯାଇଛି । କ୍ଷେପଣାସ୍ତ୍ର ପରୀକ୍ଷଣ ବେଳେ ପାକିସ୍ତାନ ସେନାର ଷ୍ଟ୍ରେଟଜିକ ଫୋର୍ସ କମାଣ୍ଡ’ର କମାଣ୍ଡର ଲେଫ୍ଟନେଣ୍ଟ ଜେନେରାଲ ମହମ୍ମଦ ଶାହାବାଜ ଖାନ ଏବଂ ଷ୍ଟ୍ରେଟଜିକ ପ୍ଲାନ୍ସ ଡିଭିଜନର ଡିଜି ମେଜର ଜେନେରାଲ ଶହରୟାର ପରବେଜ ଉପସ୍ଥିତ ଥିଲେ ।
ପହଲଗାଓଁ ଆତଙ୍କବାଦୀ ଆକ୍ରମଣ ପରେ ଭାରତ ଗୋଟିଏ ପରେ ଗୋଟିଏ ଆର୍ଥୀକ ଓ କୁଟନୈତିକ କାର୍ଯ୍ୟାନୁଷ୍ଠାନ ନେବାରେ ଲାଗିଛି । ଏମିତି ସ୍ଥିତିରେ ପାକିସ୍ତାନ ଗୋଟିଏ ପରେ ଗୋଟିଏ ନୋଟମ୍ ଜାରି କରୁଛି । ଯାହା ମିଜାଇଲ ପରୀକ୍ଷଣର ସଙ୍କେତ ଦେଉଛି । ଏମିତି ସ୍ଥିତିରେ ପାକିସ୍ତାନ ନୋଟମ୍ ଜାରି କରି ଭାରତ ସହ ଶକ୍ତି ପ୍ରଦର୍ଶନ କରୁଥିବା ପ୍ରତିରକ୍ଷା ବିଶେଷଜ୍ଞ କହୁଛନ୍ତି ।
ନନ୍ଦିଘୋଷ ବ୍ୟୁରୋ: ସାରା ବିଶ୍ବରେ ଏବେ ଟିମ୍ ଫ୍ରିଡେଙ୍କୁ ନେଇ ଚର୍ଚ୍ଚା । ୨ ଶହରୁ ଅଧିକ ଥର ବିଷାକ୍ତ ସର୍ପ ଦଂଶନ ସତ୍ତ୍ବେ ସାଜିଛନ୍ତି ମରଣ ବିଜୟୀ । ତାଙ୍କୁ ନେଇ ମେଡିକାଲ ଜଗତ ବି ଆଶାବାଦୀ । ସର୍ପଦଂଶନ କ୍ଷେତ୍ରରେ ଚିକିତ୍ସା ଲାଗି ଟିମ୍ ଫ୍ରିଡେ ସହାୟକ ହେବେ ବୋଲି ଆଶା ପ୍ରକାଶ ପାଇଛି । ପୂର୍ବରୁ ସେ ବିଛା ଓ ସ୍ପାଇଡରର ବିଷକୁ ପିଇବାର ଅଭ୍ୟାସ କରିଥିଲେ । ପରେ ସେ ବିଷାକ୍ତ ସର୍ପ ଦଂଶନ ସହିବା ଲାଗି ନିଜକୁ ପ୍ରସ୍ତୁତ କରିଥିଲେ । ଆମେରିକା ଓ୍ବିସନସିନର ଟିମ୍ ଫ୍ରିଡେ ନିଜ ଘରେ ବହୁ ବିଷଧର ସାପଙ୍କୁ ବି ରଖିଥିଲେ । ପ୍ରଥମେ ସେ କମ୍ ପରିମାଣର ସାପ ବିଷ ଇଞ୍ଜେକସନ ଜରିଆରେ ନେବାର ଅଭ୍ୟାସ କରିଥିଲେ । ସିଧାସଳଖ ସର୍ପ ଦଂଶନକୁ ସହିବା ଲାଗି ସେ ନିଜକୁ ପ୍ରସ୍ତୁତି କରିଥିଲେ । ପ୍ରାୟ ଦୁଇ ଦଶନ୍ଧି ଧରି ସେ ବିଷ ଇଞ୍ଜେକସନ ନେବା ସହ ସାପ କାମୁଡାକୁ ଗ୍ରହଣ କରିଛନ୍ତି । ବହୁ ବିଷାକ୍ତ ସର୍ପ ଦଂଶନର ଚିହ୍ନ ବି ତାଙ୍କ ଦେହରେ ରହିଛି । ଏହି ସହଣୀୟ କ୍ଷମତା ସମ୍ପର୍କରେ ଗବେଷଣା କରିବା ଲାଗି ସେ ବହୁ ବୈଜ୍ଞାନିକଙ୍କୁ ସୂଚନା ଦେଇଛନ୍ତି । ଅତୀତରେ ଥରେ ଏକ ବିଷଧର ସାପ କାମୁଡିବାରୁ ସେ ତାଙ୍କର ଅଙ୍ଗୁଳିର କିଛି ଅଂଶ କାଟି ଫୋପାଡି ଦେଇଥିବା ସୂଚନା ମିଳିଛି । ସର୍ପାଘାତର ଚିକିତ୍ସା ଦିଗରେ କାମ କରୁଥିବା ସେଣ୍ଟିଭାକ୍ସ କମ୍ପାନୀରେ କାର୍ଯ୍ୟ କରୁଛନ୍ତି ଫ୍ରିଡେ । ଦୀର୍ଘ ବର୍ଷ ଧରି ବିଷାକ୍ତ ଇଞ୍ଜେକସନ ନେବା ପରେ ଶେଷରେ ୨୦୦୧ରେ ସିଧାସଳଖ ବିଷାକ୍ତ ସର୍ପ ଦଂଶନ ଲାଗି ନିଜକୁ ଅନୁମତି ଦେଇଥିଲେ । ନିଜର ପ୍ରଥମ ଅନୁଭୂତି ସମ୍ପର୍କରେ ସେ କହିଛନ୍ତି ସର୍ପ ଦଂଶନ ଏକ ମହୁମାଛି କାମୁଡିବା ପରି ଲାଗେ । ଥରେ ତାଙ୍କୁ ଦୁଇଟି ନାଗ ଦଂଶନ କରିଥିଲେ । ତେବେ ଚାରି ଦିନ ଆଇସିୟୁରେ ରହିବା ପରେ ସୁସ୍ଥ ହୋଇଥିଲେ । ତାଙ୍କୁ ବ୍ଲାକ ମାମ୍ବାସ, ତାଇପାନ, ନାଗ, ଚିତି ଓ ଅନ୍ୟାନ୍ୟ ବିଷାକ୍ତ ସାପ ଦଂଶନ କରିଥିବା ଜଣାପଡିଛି । ତାଙ୍କ ରକ୍ତକୁ ନେଇ ଗବେଷଣା ପରେ ସର୍ପ ବିଷନାଶକ ଔଷଧ ବାହାର କରିବାରେ ଅଧିକ ତଥ୍ୟ ମିଳିବ ବୋଲି କୁହାଯାଇଛି । ପ୍ରତିବର୍ଷ ବିଶ୍ବରେ ସର୍ପାଘାତ କାରଣରୁ ୧ ଲକ୍ଷ ୧୦ ହଜାରରୁ ଅଧିକ ଲୋକଙ୍କ ପ୍ରାଣହାନି ଘଟିଥାଏ ।
ନନ୍ଦିଘୋଷ ବ୍ୟୁରୋ: ଆତଙ୍କବାଦୀଙ୍କ ବିରୋଧରେ ନିଆଯିବ କଠୋର କାର୍ଯ୍ୟାନୁଷ୍ଠାନ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ପୁଣି ଥରେ ଆତଙ୍କବାଦୀ ଓ ସେମାନଙ୍କୁ ସମର୍ଥନ କରୁଥିବା ରାଷ୍ଟ୍ରଙ୍କୁ ଏଭଳି ଚେତାବନୀ ଦେଇଛନ୍ତି । ଏଥିସହିତ ସୀମାପାର ଆତଙ୍କବାଦ ବିରୋଧରେ ଭାରତର ଲଢେଇକୁ ସମର୍ଥନ ଦେଇଥିବାରୁ ଆଙ୍ଗୋଲା ରାଷ୍ଟ୍ରପତିଙ୍କୁ ଧନ୍ୟବାଦ ଜଣାଇଛନ୍ତି ପ୍ରଧାନମନ୍ତ୍ରୀ । ଆଜି ଭାରତ ଓ ଆଙ୍ଗୋଲା ମଧ୍ୟରେ ବିଭିନ୍ନ ପ୍ରସଙ୍ଗରେ ଏମଓୟୁ ସ୍ବାକ୍ଷର କରାଯାଇଛି । ଏହି ଅବସରରେ ପ୍ରଧାନମନ୍ତ୍ରୀ ଆତଙ୍କବାଦୀଙ୍କୁ ପୁଣି ଥରେ ଚେତାବନୀ ଦେବା ସହ ସୀମାରେ ଅରାଜକତା ସୃଷ୍ଟିକାରୀ ଶକ୍ତିଙ୍କ ବିରୋଧରେ କଠୋରରୁ କଠୋରତମ କାର୍ଯ୍ୟାନୁଷ୍ଠାନ ନେବାକୁ ଚେତାବନୀ ଦେଇଛନ୍ତି ।
ନନ୍ଦିଘୋଷ ବ୍ୟୁରୋ: ପହଲଗାଓଁ ଏଫେକ୍ଟ। ପାକିସ୍ତାନ ସହ ସମସ୍ତ ବାଣିଜ୍ୟ କାରବାର ବନ୍ଦ କଲା ଭାରତ। ଆଜିଠାରୁ ବନ୍ଦ ରହିବ ସମସ୍ତ ବାଣିଜ୍ୟ ଓ ରପ୍ତାନୀ କାରବାର। ଉଭୟ ପ୍ରତ୍ୟକ୍ଷ ଓ ପରୋକ୍ଷ ରପ୍ତାନୀ, ଆମଦାନୀ ବନ୍ଦ କରିଛି ଭାରତ। ବାଣିଜ୍ୟ ମନ୍ତ୍ରାଳୟର ନିଷ୍ପତ୍ତି ପରେ ନିର୍ଦ୍ଦେଶନାମା ଜାରି କରିଛି ବାଣିଜ୍ୟ ମନ୍ତ୍ରାଳୟ ମହାନିର୍ଦ୍ଦେଶାଳୟ ବା DGFT। ଜାତୀୟ ସ୍ବାର୍ଥ ଓ ସୁରକ୍ଷାକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି। ଗଲା ୫ ବର୍ଷରେ ଭାରତର ରପ୍ତାନୀ ପରିମାଣ ଥିଲା ୧.୯୨ ବିଲିୟନ ଡଲାର। ପାକିସ୍ତାନରୁ ଆମଦାନୀ ପରିମାଣ ଥିଲା ୪୮୮ ନିୟୁତ ଡଲାର। ପାକିସ୍ତାନରୁ ବହୁ ସାମଗ୍ରୀ ଭାରତ ସିଧାସଳଖ ଭାବେ ଆମଦାନୀ କରୁଥିବାବେଳେ ତୃତୀୟ ରାଷ୍ଟ୍ର କିମ୍ବା ଅନ୍ୟ ମାଧ୍ଯମ ଦେଇ ପରୋକ୍ଷ ଭାବେ ଭାରତ ଆମଦାନୀ କରୁଛି। ଦୁଇ ଦେଶ ମଧ୍ଯରେ ଅଟ୍ଟାରୀ-ୱାଘା ବର୍ଡର ଦେଇ ବାଣିଜ୍ୟ କାରବାର ହୋଇଆସୁଥିଲା। ୨୦୨୩-୨୪ରେ ୩, ୮୮୬ କୋଟି ଟଙ୍କାର ବାଣିଜ୍ୟ ଦୁଇ ଦେଶ ମଧ୍ୟରେ ହୋଇଥିଲା।
ସେପଟେ ପାକିସ୍ତାନକୁ ପ୍ରଦାନ କରାଯାଉଥଇବା ଋଣ, ଅନୁଦାନ ଆଦି ସମ୍ପର୍କରେ ସମୀକ୍ଷା କରିବା ଲାଗି ବିଭିନ୍ନ ବିଶ୍ବସ୍ତରୀୟ ସଂସ୍ଥାକୁ ଭାରତ ଅନୁରୋଧ କରିବ ବୋଲି ସୂଚନା ମିଳିଛି। ପୂର୍ବରୁ ପାକିସ୍ତାନକୁ ଆଇଏମଏଫ ସହାୟତା ବନ୍ଦ କରିବା ଲାଗି ଦାବି କରିଥିଲେ କଂଗ୍ରେସ ନେତା ଜୟରାମ ରମେଶ।
