ନନ୍ଦିଘୋଷ ବ୍ୟୁରୋ ; ପହଲଗାଓଁ ଆତଙ୍କୀ ଆକ୍ରମଣ ଘଟଣା ପରେ ଭାରତ ଓ ପାକିସ୍ତାନ ମଧ୍ୟରେ ବଢୁଛି ଉତ୍ତେଜନା। ଗୋଳାବାରୁଦ କାରଖାନା କର୍ମଚାରୀଙ୍କ ଛୁଟି ବାତିଲ। ଜରୁରୀ ଆବଶ୍ୟକତା ଥିଲେ ମିଳିପାରିବ ଛୁଟି। ସୀମାରେ ଉତ୍ତେଜନା ମଧ୍ୟରେ ସେନାକୁ ଗୋଳାବାରୁଦ ଯୋଗାଣ କରୁଥିବା ଗୋଳାବାରୁଦ କାରଖାନାର ଛୁଟି ବାତିଲ କରାଯାଇଛି। ସମସ୍ତ କର୍ମଚାରୀଙ୍କୁ ଏହି ଗୁରୁତ୍ୱପୂର୍ଣ୍ଣ ସମୟରେ ଜାତୀୟ ଆବଶ୍ୟକତା ଅନୁଯାୟୀ ନିରବଚ୍ଛିନ୍ନ ଭାବରେ ଡ୍ୟୁଟିରେ ଯୋଗଦେବାକୁ ନିର୍ଦ୍ଦେଶ ଦିଆଯାଇଛି। ମହାରାଷ୍ଟ୍ରର ଚନ୍ଦ୍ରପୁର, ମଧ୍ୟପ୍ରଦେଶର ଜବଲପୁର କର୍ମଚାରୀଙ୍କ ଛୁଟି ବାତିଲ ହୋଇଛି। ଏହି ପଦକ୍ଷେପ ଏପରି ଏକ ସମୟରେ ନିଆଯାଇଛି, ଯେତେବେଳେ ସାରା ଦେଶରେ ପ୍ରତିରକ୍ଷା ପ୍ରସ୍ତୁତି ବୃଦ୍ଧି ପାଇଛି।
ଚଳନ୍ତା ଗାଡ଼ିରେ ସିଲିଣ୍ଡର ବିସ୍ଫୋରଣ, ପୋଡି ପାଉଁଶ ହେଲା ଡ୍ରାଇଭର
ଜାମସେଦପୁର : ଝାଡ଼ଖଣ୍ଡର ଜାମସେଦପୁରର କଡମା ଥାନା ଅଞ୍ଚଳରେ ଅଘଟଣ । ଏକ କାରରେ ଅଗ୍ନିକାଣ୍ଡ ଘଟିଥିଲା । ଏହି ଘଟଣା ପରେ ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା। ସୂଚନା ମିଳିବା ମାତ୍ରେ ବହୁ ସଂଖ୍ୟକ ଲୋକ ଘଟଣାସ୍ଥଳରେ ପହଞ୍ଚିଥିଲେ। ଏହି ଘଟଣାରେ କାରଟି ସମ୍ପୂର୍ଣ୍ଣ ଜଳି ପାଉଁଶ ହୋଇଗଲା। ଚଳନ୍ତା କାରରେ ଘରୋଇ ସିଲିଣ୍ଡର ବିସ୍ଫୋରଣ ଯୋଗୁଁ କାରରେ ବସିଥିବା ଡ୍ରାଇଭର ଜୀବନ୍ତ ଦଗ୍ଧ ହୋଇଗଲେ।
ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି। ମୃତ ଯୁବକଙ୍କୁ ବିଜୟା ହେରିଟେଜର ବାସିନ୍ଦା ସୁନୀଲ ଅଗ୍ରୱାଲ ବୋଲି ପରିଚୟ ମିଳିଛି । ସ୍ଥାନୀୟ ଲୋକଙ୍କ କହିବା ଅନୁଯାୟୀ, ନିଆଁ ଏତେ ଭୟଙ୍କର ଥିଲା ଯେ କାର ଚଳାଉଥିବା ଯୁବକ ଜଣକ କାରରୁ ବାହାରି ପାରିଲେ ନାହିଁ। ଫଳରେ ଜୀବନ୍ତ ଦଗ୍ଧ ହୋଇଗଲେ । ଏହି ଘଟଣା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି ।
ପାକ୍ ଗୁପ୍ତଚର ନେଟୱାର୍କର ପର୍ଦ୍ଦାଫାସ, ଦୁଇ ସନ୍ଦିଗ୍ଧ ଗିରଫ
ଅମୃତସର : ପଞ୍ଜାବରେ ପାକ୍ ଗୁପ୍ତଚର ନେଟୱାର୍କର ପର୍ଦ୍ଦାଫାସ ହୋଇଛି । ଅମୃତସର ରୁରାଲ ପୋଲିସ ପାକିସ୍ତାନ ପାଇଁ ଗୁପ୍ତଚର କରୁଥିବା ଦୁଇ ଜଣଙ୍କୁ ଗିରଫ କରିଛି। ପଲକ ଶେର ଏବଂ ସୂରଜ ମସିହ ନାମକ ଏହି ଦୁଇ ସନ୍ଦିଗ୍ଧକୁ ଗିରଫ କରାଯାଇଛି । ଏହି ଦୁଇ ଜଣ ପାକିସ୍ତାନ ଗୁଇନ୍ଦା ସଂସ୍ଥା ସହ ଲିଙ୍କରେ ରହିବା ସହ ଅମୃତସର ସେନା କ୍ୟାଣ୍ଟ ଓ ଅମୃତସର ଏୟାରବେସ ସହିତ ଜଡିତ ସୂଚନା ପାକିସ୍ତାନକୁ ଦେଉଥିଲେ। ଅମୃତସର ଜେଲରେ ବନ୍ଦୀ ଥିବା ହରପ୍ରୀତ ସିଂହ ଓରଫ ହାପି ମାଧ୍ୟମରେ ପାକିସ୍ତାନର ଗୁଇନ୍ଦା ସଂସ୍ଥାଗୁଡ଼ିକ ଏହି ଲୋକଙ୍କ ସହିତ ଯୋଗାଯୋଗ କରିଥିଲେ।
ଭାରତର ପଦକ୍ଷେପ ଦେଖି ଛାନିଆ ହେଲାଣି ପାକିସ୍ତାନ, କାଲି ବସିବ ପାକ୍ ସଂସଦର ସ୍ଵତନ୍ତ୍ର ଅଧିବେଶନ
ନନ୍ଦିଘୋଷ ବ୍ୟୁରୋ : ଭାରତ ପାକିସ୍ତାନକୁ ଉଚିତ୍ ଶିକ୍ଷା ଦେବାକୁ ପ୍ରତିଶ୍ରୁତି ଦେଇଛି। ଏହି କାରଣରୁ ପାକିସ୍ତାନ ଆଜିକାଲି ଭୟରେ ବଞ୍ଚୁଛି। ଭାରତ ସୀମାନ୍ତ ନିୟନ୍ତ୍ରଣ ରେଖାରେ ପାକିସ୍ତାନୀ ସେନା ପୁଣି ଥରେ ଗୁଳିମାଡ଼ କରିଛି। ପହଲଗାମକୁ ନେଇ ଉତ୍ତେଜନା ମଧ୍ୟରେ, ପାକିସ୍ତାନ ସେନା ଦ୍ୱାରା ଲଗାତାର ଅସ୍ତ୍ରବିରତି ଉଲ୍ଲଂଘନ କରାଯାଉଛି। ଅନ୍ୟପକ୍ଷରେ, ଭାରତୀୟ ସେନା ମଧ୍ୟ ଏହାର ଉଚିତ ଜବାବ ଦେଇଛନ୍ତି। ଭାରତର ପଦକ୍ଷେପ ଦେଖି ଡରିଗଲାଣି ପାକିସ୍ତାନ। ସଂସଦର ସ୍ବତନ୍ତ୍ର ଅଧିବେଶନ ଡାକିଲେ ପାକିସ୍ତାନ ରାଷ୍ଟ୍ରପତି। ଆସନ୍ତାକାଲି ବସିବ ପାକିସ୍ତାନ ସଂସଦର ସ୍ବତନ୍ତ୍ର ଅଧିବେଶନ। ଏନେଇ ରାତି ଅଧିଆ ନୋଟିସ ଜାରି କରିଛନ୍ତି ପାକିସ୍ତାନ ରାଷ୍ଟ୍ରପତି ଆସିଫ ଅଲ୍ଲି ଜର୍ଦ୍ଦାରୀ। ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନାକୁ ଦେଖି ସ୍ଵତନ୍ତ୍ର ଅଧିବେଶନ ଡକାଯାଇଛି।
ପାକିସ୍ତାନର ଜାତୀୟ ପରିଷଦର ଅଧିବେଶନ ୫ ମଇରେ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି। ଏହି ଅଧିବେଶନରେ ଭାରତର କାର୍ଯ୍ୟକୁ ନିନ୍ଦା କରି ଏକ ମିଳିତ ପ୍ରସ୍ତାବ ମଧ୍ୟ ଆଗତ ହୋଇପାରେ। ଅନ୍ୟପଟେ ଭାରତର କାର୍ଯ୍ୟାନୁଷ୍ଠାନରେ ପାକିସ୍ତାନ ଭୟଭୀତ, ସେଥିପାଇଁ ଅନେକ ହୋଟେଲ ଏବଂ ହଜାର ହଜାର ମଦ୍ରାସା ବନ୍ଦ କରିଦିଆଯାଇଛି।
ସୈନିକ ସ୍କୁଲ ସ୍ଥାନାନ୍ତରଣକୁ ବିରୋଧ କରି ଜନ ପ୍ରତିବାଦ
ଭୁବନେଶ୍ବର : ସୈନିକ ସ୍କୁଲ ବଞ୍ଚାଓ, ଅଳିଆ ଗଦା ହଟାଓ। ଓଡ଼ିଆ ଅସ୍ମିତାର ଅନନ୍ୟ ପରିଚୟ ସୈନିକ ସ୍କୁଲ ସ୍ଥାନାନ୍ତରଣକୁ ବିରୋଧ କରି ଜନ ପ୍ରତିବାଦ କରାଯାଉଛି। ଓଡ଼ିଶା ଅଭିଭାବକ ମହାସଂଘ, ସୈନିକ ସ୍କୁଲ ଅଭିଭାବକ ସଂଘ, ଭିଏସଏସ ନଗର ସାଂସ୍କୃତିକ ପରିଷଦ, ଗାଡ଼କଣ ଗ୍ରାମ୍ୟ କମିଟି, ଧୀରକୁଟି ସାହି କମିଟି, ଲକ୍ଷ୍ମୀ ବିହାର କମିଟି, ଗଜପତି ନଗର କମିଟି, ରଙ୍ଗମାଟିଆ ଗ୍ରାମ୍ୟ କମିଟି ଓ ରେଳ କଲୋନୀ ନୋଡାଲ ସ୍କୁଲ ଅଭିଭାବକ ସଙ୍ଘର ମିଳିତ ଆନୁକୂଲ୍ୟ ଜନପ୍ରତିବାଦ କରିଛନ୍ତି।
ପାକିସ୍ତାନର ଅବସ୍ଥା ଖରାପ, ମାତ୍ର ୪ ଦିନ ମଧ୍ୟରେ ଆଣ୍ଠୁମାଡ଼ି ପଡ଼ିବ!
ନନ୍ଦିଘୋଷ ବ୍ୟୁରୋ ; ଜମ୍ମୁ-କାଶ୍ମୀରର ପହଲଗାଓଁରେ ଆତଙ୍କବାଦୀ ଆକ୍ରମଣ ପରଠାରୁ ପାକିସ୍ତାନର ଅବସ୍ଥା ଖରାପ ରହିଛି । କାରଣ ପାକିସ୍ତାନ ବର୍ତ୍ତମାନ ଗୋଳାବାରୁଦର ଅଭାବର ସମ୍ମୁଖୀନ ହେଉଛି। ଯୁଦ୍ଧ କଥା କହୁଥିବା ପାକିସ୍ତାନ ପାଖରେ ମାତ୍ର ୯୬ ଘଣ୍ଟାର ଗୁଳି ବାକି ଅଛି। ଏପରି ପରିସ୍ଥିତିରେ, ଯଦି ଭାରତ ସହିତ ଯୁଦ୍ଧ ହୁଏ, ତେବେ ପାକିସ୍ତାନ କେବଳ ୪ ଦିନ ପାଇଁ ଭାରତ ବିରୁଦ୍ଧରେ ଠିଆ ହୋଇପାରିବ।
ଗୋଟିଏ ପଟେ, ପାକିସ୍ତାନର ନେତାମାନେ ଭାରତକୁ ଯୁଦ୍ଧ ପାଇଁ ଧମକ ଦେଉଛନ୍ତି। ଅନ୍ୟପକ୍ଷରେ, ପାକିସ୍ତାନର ସାମରିକ ପ୍ରସ୍ତୁତି ଉପରେ ଗମ୍ଭୀର ପ୍ରଶ୍ନ ଉଠାଯାଉଛି। କାରଣ ପାକିସ୍ତାନ ତା’ର ତୋପରେ ଗୋଳାବାରୁଦର ଘୋର ଅଭାବର ସମ୍ମୁଖୀନ ହେଉଛି। ଏକ ରିପୋର୍ଟ ଅନୁଯାୟୀ, ପାକିସ୍ତାନ ସେନା କେବଳ ୪ ଦିନ ପାଇଁ ଯୁଦ୍ଧ ଲଢ଼ିବାର କ୍ଷମତା ରଖିଛି। ଏହା ପରେ, ତାଙ୍କ ସେନା ଗୋଳାବାରୁଦର ଅଭାବ ଯୋଗୁଁ ପୂର୍ବ ପରି ଆତ୍ମସମର୍ପଣ କରିବେ।
ପାକିସ୍ତାନର ୪ ଦିନ ପାଇଁ ଯୁଦ୍ଧ କରିବାର କ୍ଷମତା ଅଛି। ପାକିସ୍ତାନୀ ସେନା ଗୁଳିଗୋଳାର ଅଭାବର ସମ୍ମୁଖୀନ ହେଉଛି। ପରିସ୍ଥିତି ଏପରି ହୋଇଯାଇଛି ଯେ ପାକିସ୍ତାନୀ ସେନା ପାଖରେ ଟ୍ୟାଙ୍କ ପୂରଣ କରିବା ପାଇଁ ମଧ୍ୟ ଇନ୍ଧନ ନାହିଁ। M109 ହାୱିଜର୍ସ, BM-21 ମଲ୍ଟିପଲ୍ ରକେଟ୍ ଲଞ୍ଚର୍ ପାଇଁ କୌଣସି ଗୁଳି ଉପଲବ୍ଧ ନାହିଁ । ନୂତନ ବନ୍ଧୁକ SH-15 ପାଇଁ କୌଣସି ଗୁଳି ବଳକା ନାହିଁ । ବନ୍ଧୁକ ଓ ରକେଟ୍ ଲଞ୍ଚର୍ କେବଳ ଶୋ’ ପିସ୍ ହୋଇଗଲାଣି।
ପାକିସ୍ତାନର ଦାରିଦ୍ର୍ୟ ବିଶ୍ୱଠାରୁ ଲୁଚି ରହିନାହିଁ। ସମୟ ସମୟରେ ପାକିସ୍ତାନ ସାହାଯ୍ୟ ପାଇଁ ନିବେଦନ କରୁଥିବା ଦେଖାଯାଉଛି। ଏହି ସମୟରେ ମଧ୍ୟ ତାଙ୍କ ଅବସ୍ଥା ସଙ୍କଟାପନ୍ନ ରହିଛି। ଭାରତକୁ ବିରୋଧ କରୁଥିବା ପାକିସ୍ତାନର ଆର୍ଥିକ ଅବସ୍ଥା ବହୁତ ଖରାପ। ସେମାନଙ୍କର ବୈଦେଶିକ ମୁଦ୍ରା ଭଣ୍ଡାର ଶେଷ ହେବାକୁ ବସିଲାଣି। ସେନାକୁ ତେଲ ଓ ରାସନ ମଧ୍ୟ କମାଇବାକୁ ପଡ଼ିଛି। ଆର୍ଥିକ ଅବସ୍ଥା ଖରାପ ହେବାରୁ, ପାକିସ୍ତାନୀ ସେନା ଅନେକ ଯୁଦ୍ଧ ଅଭ୍ୟାସ ବନ୍ଦ କରିଦେଇଛି। ପେଟ୍ରୋଲ ଏବଂ ଡିଜେଲ ଅଭାବରୁ ସାମରିକ ଯାନଗୁଡ଼ିକ ନିଷ୍କ୍ରିୟ ପଡ଼ିରହିଛି।
ପରମାଣୁ ଅସ୍ତ୍ରରେ ଜବାବ ଦେବାକୁ ପାକିସ୍ତାନର ଚେତାବନୀ
ନନ୍ଦିଘୋଷ ବ୍ୟୁରୋ ; ଭାରତକୁ ପୁଣି ପାକିସ୍ତାନର ନାଲିଆଖି। ସିନ୍ଧୁ ନଦୀ ଜଳ ବନ୍ଦ କଲେ ସ୍ଥିତି ହେବ ଭୟାନକ। ପରମାଣୁ ଅସ୍ତ୍ରରେ ଜବାବ ଦେବାକୁ ଚେତାବନୀ ଦେଇଛି ପାକିସ୍ତାନ। ଋଷରେ ପାକିସ୍ତାନ ରାଷ୍ଟ୍ରଦୂତ ମହମ୍ମଦ ଖାଲିଦ ଜମାଲି ଭାରତକୁ ଏଭଳି ଧମକ ଦେଇଛନ୍ତି। ଏକ ସାକ୍ଷାତକାରରେ ଜମାଲି କହିଛନ୍ତି ଯେ, ଭାରତୀୟ ସେନା ଆକ୍ରମଣ କଲେ ଭୋଗିବାକୁ ପଡ଼ିବ ପରିଣାମ। ପାକିସ୍ତାନର କିଛି ଅଞ୍ଚଳରେ ଆକ୍ରମଣ କରିବାକୁ ଯୋଜନା କରୁଛି ଭାରତ। ଯଦି ଭାରତ ପାକିସ୍ତାନ ଉପରେ ଆକ୍ରମଣ କରେ, ତେବେ ଏହାର ଦୃଢ଼ ଜବାବ ଦିଆଯିବ ବୋଲି ଚେତାବନୀ ଦେଇ କହିଛନ୍ତି ଜମାଲି। ପହଲଗାଓଁରେ ଆତଙ୍କବାଦୀ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ପରିସ୍ଥିତି କ୍ରମାଗତ ଭାବରେ ଖରାପ ହେବାରେ ଲାଗିଛି। ସେହିପରି ଯଦି ଭାରତ ପାକିସ୍ତାନ ଉପରେ ଆକ୍ରମଣ କରେ କିମ୍ବା ସିନ୍ଧୁ ନଦୀର ଜଳ ଯୋଗାଣ ବନ୍ଦ କରେ, ତେବେ ପାକିସ୍ତାନ କେବଳ ପାରମ୍ପରିକ ନୁହେଁ ବରଂ ପରମାଣୁ ଅସ୍ତ୍ର ସହିତ ମଧ୍ୟ ଜବାବ ଦେବ। ଜମାଲ କହିଛନ୍ତି ଯେ, ପାକିସ୍ତାନ ପାରମ୍ପରିକ ଏବଂ ପରମାଣୁ ଅସ୍ତ୍ର ସମେତ ଯେକୌଣସି ଆକ୍ରମଣର ପୂର୍ଣ୍ଣ ବଳରେ ଜବାବ ଦେବ। ଭାରତ ସିନ୍ଧୁ ନଦୀର ନିମ୍ନଗାମୀ ଜଳକୁ ଯଦି ବନ୍ଦ କରେ କିମ୍ବା ଅନ୍ୟତ୍ର ଗତି କରାଏ, ତେବେ ଏହାକୁ ପାକିସ୍ତାନ ବିରୋଧରେ ଯୁଦ୍ଧ ବୋଲି ବିବେଚନା କରାଯିବ।
ପୁଣି ଅସ୍ତ୍ରବିରତି ଉଲ୍ଲଂଘନ କଲା ପାକିସ୍ତାନ
ନନ୍ଦିଘୋଷ ବ୍ୟୁରୋ ; ବାରମ୍ବାର ନିୟମ ଖିଲାପ କରିଚାଲିଛି ପାକିସ୍ତାନ। ଲଗାତର ୧୦ ଦିନ ହେଲାଣି ସୀମାରେ କରି ଚାଲିଛି ଗୁଳିମାଡ଼। ଏଲଓସିରେ ପୁଣି ଅସ୍ତ୍ରବିରତି ଉଲ୍ଲଂଘନ କଲା ପାକିସ୍ତାନ। ପାକିସ୍ତାନ ପୋଷ୍ଟରୁ ଜାରି ରହିଛି ଗୁଳି ବର୍ଷଣ। କୁପଓ୍ବାଡ଼ା, ବାରମୂଳା, ପୁଞ୍ଚ, ନୌସେରା, ଅଖନୁର ଅଞ୍ଚଳରେ ଗୁଳିମାଡ଼ ଜାରି ରଖିଛି ପାକିସ୍ତାନ। ଯାହାର ଦୃଢ଼ ଜବାବ ଦେଉଛନ୍ତି ଭାରତୀୟ ସେନା। ପାକିସ୍ତାନର ଏଭଳି କାର୍ଯ୍ୟକୁ ନିନ୍ଦା କରାଯାଉଥିବା ବେଳେ, ଭାରତୀୟ ଯବାନ ମଧ୍ୟ ସୀମାରେ ସର୍ଚ୍ଚ ଅପରେସନକୁ ଜୋରଦାର କରିଛନ୍ତି।
ଆଜି ମେଡିକାଲ ପ୍ରବେଶିକା ପରୀକ୍ଷା NEET
ଭୁବନେଶ୍ବର : ଆଜି ମେଡିକାଲ ପ୍ରବେଶିକ ପରୀକ୍ଷା NEET। NEET ୨୦୨୫ ଆଜି ଅପରାହ୍ନ ୨ଟାରୁ ୫ଟା ପର୍ଯ୍ୟନ୍ତ ଅନୁଷ୍ଠିତ ହେବ। ଦେଶର ୫୪୫୩ ଓ ବିଦେଶର ୧୩ଟି କେନ୍ଦ୍ରରେ ହେବ ପରୀକ୍ଷା। ପାଖାପାଖି ୨୩ ଲକ୍ଷ ଛାତ୍ରଛାତ୍ରୀ ଏହି ପରୀକ୍ଷା ଦେବେ। NEET ପରୀକ୍ଷା ପାଇଁ ଆଉ ମାତ୍ର କିଛି ଘଣ୍ଟା ବାକି ଅଛି। ନ୍ୟାସନାଲ୍ ଟେଷ୍ଟିଂ ଏଜେନ୍ସି NTA ଦ୍ୱାରା ପରିଚାଳିତ, NEET ୨୦୨୫ ମାଧ୍ୟମରେ MBBS, BDS, BSc ନର୍ସିଂ ଏବଂ ଅନ୍ୟାନ୍ୟ ଡାକ୍ତରୀ ପାଠ୍ୟକ୍ରମରେ ନାମଲେଖାଇ ପାରିବେ ଛାତ୍ରଛାତ୍ରୀ। ପରୀକ୍ଷା ଲାଗି ବ୍ୟାପକ ବ୍ୟବସ୍ଥା କରାଯାଇଛି। ଗୋଟିଏ ପେପରରେ ଅନୁଷ୍ଠିତ ହେବ ଏହି ପରୀକ୍ଷା। ପୋଲିସ ସୁରକ୍ଷାରେ ପରୀକ୍ଷା କେନ୍ଦ୍ରରେ ପ୍ରଶ୍ନପତ୍ର ପହଞ୍ଚlଯାଉଛି। କଡ଼ା ସୁରକ୍ଷା ମଧ୍ୟରେ ଏହି ପରୀକ୍ଷା ଅନୁଷ୍ଠିତ ହେବ। ଗତ ବର୍ଷ ନିଟ୍ ପରୀକ୍ଷାରେ ବ୍ୟାପକ ଅବ୍ୟବସ୍ଥା ଯୋଗୁଁ ଏନଟିଏ ପକ୍ଷରୁ ସୁରକ୍ଷା ବ୍ୟବସ୍ଥା ଉପରେ ଗୁରୁତ୍ଵ ଦିଆଯାଇଛି।
ଶୌଚ ହେବା ପାଇଁ ଯାଇଥିବା ବେଳେ ଯୁବକଙ୍କୁ କଚାଡି ମାରିଲା ଦନ୍ତା
ସମ୍ବଲପୁର : ସମ୍ବଲପୁରର କୁନିଡୁମରୀ ପାଖରେ ଯୁବକଙ୍କୁ କଚାଡି ମାରିଲା ଦନ୍ତା । ଶୌଚ ହେବା ପାଇଁ ଯାଇଥିବା ବେଳେ ଯୁବକଙ୍କୁ ଦଳିଦେଲା ଦନ୍ତା । ମୃତ ଯୁବକ ଜଣଙ୍କ ହେଲେ ଯୁଯୁମୁରା ବ୍ଲକ ନୂଆଁ ବରଙ୍ଗାମାଲ ଧୋଲୋମୁଣ୍ଡାର ସନ୍ତୋଷ ବଢାଇ । ପୋଲିସ ଓ ବନ ବିଭାଗକୁ ଖବର ଦେବା ପରେ ମଧ୍ୟ କେହି ପହଂଚିନଥିବା ଜଣାପଡିଛି । ବାରମ୍ବାର ଏହି ଅଞ୍ଚଳରେ ହାତୀ ଉପଦ୍ରବ ବଢୁଥିବା ବେଳେ ବନ ବିଭାଗ କାହିଁକି ଚୁପ୍ ବୋଲି ପ୍ରଶ୍ନ ଉଠିଛି ।