ପୁରୀ: ଆଜି ଆଷାଢ଼ ମାସ କୃଷ୍ଣ ଚତୁର୍ଦଶୀ ତିଥି। ଶ୍ରୀନଅରକୁ ଖଡ଼ି ପ୍ରସାଦ ବିଜେ ନୀତି ଅନୁଷ୍ଠିତ ହେବ। ପରମ୍ପରା ଅନୁସାରେ ଦତ୍ତମହାପାତ୍ର ଓ ଦଇତାପତି ସେବକମାନେ ଶ୍ରୀନଅରକୁ ଖଡି ପ୍ରସାଦ ବିଜେ କରାଇବେ। ରୂପା ଥାଳିରେ ମହାପ୍ରଭୁଙ୍କ ଲାଗି ଫୁଲ, ତୁଳସୀ ଓ ତିନି ରୂପା ପିଙ୍ଗଣରେ ଖଡି ପ୍ରସାଦ ବିଜେ କରାଇବେ। ଶ୍ରୀନଅରରେ ଖଡି ପ୍ରସାଦ ବିଜେ ନୀତି ପରେ ରାଜଗୁରୁଙ୍କ ହସ୍ତରୁ ଶାଢି ନେଇ ପାଟ୍ଟଶାଣୀ ସେବକ ତଳୁଚ୍ଛ, ଦେଉଳକରଣ, ବେହେରା ଖୁଣ୍ଟିଆ, ପତିମହାପାତ୍ର ଓ ତିନି ବାଡର ଦଇତାପତିଙ୍କୁ ଶାଢି ବାନ୍ଧିବେ। ସ୍ନାନବେଦିରେ ୧୦୮ ଗରା ଅଧିବାସ ଜଳରେ ସ୍ନାନ ପରେ ଜ୍ୱରରେ ପଡ଼ି ମହାପ୍ରଭୁ ଶ୍ରୀମନ୍ଦିର ଅଣସର ପିଣ୍ଡିରେ ଅବସ୍ଥାନ କରୁଥିଲେ। ଦଇତାପତିମାନେ ଅଣସର ଘରେ ନାନାଦି ଗୁପ୍ତନୀତି ସଂପାଦନ କରିବା ପରେ ଅସୁସ୍ଥ ମହାପ୍ରଭୁ ଏହା ଭିତରେ ସୁସ୍ଥ ହୋଇଛନ୍ତି। ମହାପ୍ରଭୁଙ୍କଠାରେ ଫୁଲୁରି ତେଲ, ଓଷ ଲାଗି, ଦଶମୂଳ ଲାଗି, ସର୍ବାଙ୍ଗ ଚନ୍ଦନ, ରାଜପ୍ରସାଦ ବିଜେ ପରେ ଅସୁସ୍ଥ ମହାପ୍ରଭୁଙ୍କ ଶ୍ରୀଅଙ୍ଗ ବଜ୍ର, ସଶକ୍ତ ଓ ସୁଶୋଭିତ ପାଇଁ ଶ୍ରୀମନ୍ଦିରକୁ ଖଳି ବିଜେ କରାଯାଇଥିଲା। ତିନି ଠାକୁରଙ୍କ ମୁଖ୍ୟ ଶୁଦ୍ଧ ସୁଆର ସେବକମାନେ ଖଳି ପ୍ରସାଦକୁ ନିଜ ନିଜ ଘରେ ପ୍ରସ୍ତୁତ କରି ଶ୍ରୀମନ୍ଦିରକୁ ବିଜେ କରିବା ପରେ ଏହାକୁ ମହାପ୍ରଭୁଙ୍କୁ ବିଳମ୍ବିତ ରାତିରେ ଲାଗି କରାଯାଇଥିଲା। ପରମ୍ପରା ମୁତାବକ ରାଜନଅରକୁ ରାଜପ୍ରସାଦ ବିଜେ ନୀତି ସଂପନ୍ନ ପରେ ଆଜି ଖଡ଼ିପ୍ରସାଦ ବିଜେ କରାଯିବ।
ନୂଆଦିଲ୍ଲୀରେ ଅଦିନିଆ ରଥଯାତ୍ରାକୁ ନେଇ ତେଜିଲା ବିବାଦ, ଦୃଢ଼ କାର୍ଯ୍ୟାନୁଷ୍ଠାନ ଦାବି
ନନ୍ଦିଘୋଷ ବ୍ୟୁରୋ: କୋଟି କୋଟି ଶ୍ରୀଜଗନ୍ନାଥ ପ୍ରେମୀଙ୍କ ଭାବାବେଗକୁ କୁଠାର ଘାତ କରିଛି ନୂଆଦିଲ୍ଲୀ କମଳାନଗରରେ ଆୟୋଜିତ ଅଦିନିଆ ରଥଯାତ୍ରା । ଏପରି ରଥଯାତ୍ରାର ଆୟୋଜନ କରୁଥିବା ଅନୁଷ୍ଠାନ ଉପରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି । ଶ୍ରୀମନ୍ଦିର ରୀତିନୀତିକୁ ଉଲ୍ଲଂଘନ କରି ମନଇଚ୍ଛା ରଥଯାତ୍ରା କରାଯିବା ଘଟଣା ଓଡ଼ିଆ ଅସ୍ମିତାକୁ କୁଠାରଘାତ କରିଛି । ଡବଲ ଇଞ୍ଜିନ ସରକାରରେ ଏପରି ଭୁଲକୁ ନେଇ କ୍ଷୋଭ ପ୍ରକାଶ କରିଛନ୍ତି ପୁରୀର ଜନପ୍ରତିନିଧି । ଅନ୍ୟପଟେ ମହାପ୍ରଭୁଙ୍କୁ ନେଇ ଏଭଳି ଧର୍ମ ବିରୋଧୀ ଖେଳ ଖେଳାଯିବା ଆଦୌ ଗ୍ରହଣୀୟ ନୁହେଁ ବୋଲି ମତ ରଖିଛନ୍ତି ସେବାୟତ ।
ରବିବାର ସନ୍ଧ୍ୟାରେ ଗଜପତି ମହାରାଜା ବିଭିନ୍ନ ସମୟରେ ହେଉଥିବା ଅଦିନିଆ ରଥଯାତ୍ରା ନେଇ ପ୍ରତିକ୍ରିୟା ରଖିଥିବା ବେଳେ ସେହିଦିନ ନୂଆଦିଲ୍ଲୀରେ ଅଦିନରେ ରଥଯାତ୍ରା ଆୟୋଜନ ହୋଇଥିଲା । ଏଭଳି ଏକ ସାଂଘାତିକ ଘଟଣାକୁ ନେଇ ବିବାଦ ସୃଷ୍ଟି ହୋଇଥିବା ବେଳେ, ଐତିହ୍ୟ କ୍ଷେତ୍ର ପୁରୀରେ ସେବାୟତଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଦିଲ୍ଲୀର କମଳାନଗରରେ ଗତକାଲି ଅଦିନରେ ରଥଯାତ୍ରା ହୋଇଥିଲା । ଶ୍ରୀମନ୍ଦିରରେ ମହାପ୍ରଭୁ ଏବେ ଅଣସର ଘରୁ ବାହାରି ନଥିବା ବେଳେ ଦିଲ୍ଲୀରେ ଅସମୟରେ କିଭଳି ରଥଯାତ୍ରାର ଆୟୋଜନ କରାଗଲା ତାକୁ ନେଇ ଉଦବେଗ ପ୍ରକାଶ କରିଛନ୍ତି ସେବାୟତ ଓ ଶ୍ରୀଜଗନ୍ନାଥ ପ୍ରେମୀ । ଆସନ୍ତା ୨୭ ତାରିଖରେ ମହାପ୍ରଭୁଙ୍କ ରଥଯାତ୍ରା ଥିବା ବେଳେ ଏହାର ଯଥେଷ୍ଟ ପୂର୍ବରୁ ରଥଯାତ୍ରା ପାଳନ କରିବା ଏକ ଅପସଂସ୍କୃତି ବୋଲି କହିଛନ୍ତି ସେବାୟତ ଓ ସଂସ୍କୃତି ବିଶେଷଜ୍ଞ । ଏଭଳି ରଥଯାତ୍ରା ଆୟୋଜନକାରୀଙ୍କ ବିରୋଧରେ ତୁରନ୍ତ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଶ୍ବାବସୁ ସେବକ ଦାବି କରିଛନ୍ତି ।
ହିନ୍ଦୁ ଧର୍ମରେ ମହାପ୍ରଭୁଙ୍କୁ ନେଇ ଅସମ୍ମାନ ଗ୍ରହଣୀୟ ନୁହେଁ । ବିଜେପି ସରକାର ହିନ୍ଦୁ ଓ ଶ୍ରୀଜଗନ୍ନାଥ ସଂସ୍କୃତିକୁ ନେଇ ରାଜନୀତି କରୁଥିବା ଅଭିଯୋଗ ହୋଇଛି । ଶାସ୍ତ୍ରୀୟ ମତ ଅନୁସାରେ, ରଥଯାତ୍ରା ସମୟ ଅନୁସାରେ ନହେଲେ ଦେଶ ଓ ରାଜ୍ୟ ଉପରେ ବିପଦ ଆସିବାର ସମ୍ଭାବନାକୁ ଏଡାଇ ଦିଆଯାଇ ନପାରେ ବୋଲି ଚେତାଇ ଦେଇଛନ୍ତି ସଂସ୍କୃତି ବିଶେଷଜ୍ଞ । ଅଦିନିଆ ରଥଯାତ୍ରା ଧାର୍ମିକ ବ୍ୟବସ୍ଥା ଓ ଭାବନା ଉପରେ ଆଞ୍ଚ ଆଣିଥିବା ବେଳେ, ଏହା କେବେ ବି କ୍ଷମଣୀୟ ନୁହେଁ । ଏଥିସହ ଓଡ଼ିଆ ଅସ୍ମିତାକୁ ନେଇ ଡିଣ୍ଡିମ ପିଟୁଥିବା ବିଜେପି ରାଜ୍ୟର ଅସ୍ମିତାକୁ ମାଟିରେ ମିଶାଇ ଦେଇଛି ବୋଲି ଅଭିଯୋଗ କରିଛନ୍ତି ପୁରୀ ଜନପ୍ରତିନିଧି ।
ପୂର୍ବରୁ ମଧ୍ୟ ଦେଶ ବିଦେଶରେ ଅଦିନିଆ ରଥଯାତ୍ରାକୁ ନେଇ ଆପତ୍ତି ଉଠାଇଥିଲେ ଶ୍ରୀଜଗନ୍ନାଥ ପ୍ରେମୀ । ଖୋଦ ଗଜପତି ମହାରାଜ ମଧ୍ୟ ଏନେଇ ଉଦବେଗ ପ୍ରକାଶ କରିଛନ୍ତି । ହେଲେ ଏବେ ବି କିଛି ଅନୁଷ୍ଠାନ ଅଦିନରେ ରଥଯାତ୍ରାର ଆୟୋଜନ କରୁଛନ୍ତି ।
କଣାସ ହଇଜା ମୃତ୍ୟୁରୁ ଚେତିଲାନି ସରକାର, ଏବେ ସ୍ଥିତି ନିୟନ୍ତ୍ରଣ ବାହାରକୁ ଯାଉଛି
ନନ୍ଦିଘୋଷ ବ୍ୟୁରୋ: ରାଜ୍ୟରେ ଅଣାୟତ ହଇଜା । ଗୋଟିଏ ପରେ ଗୋଟିଏ ଜିଲ୍ଲାକୁ ଡେଉଁଛି ଝାଡାବାନ୍ତି ରୋଗ । ଆକ୍ରାନ୍ତଙ୍କ ସଂଖ୍ୟା ବି ବଢ଼ିଚାଲିଛି । ଯାହାକୁ ନେଇ ବର୍ଷିଛନ୍ତି ବିଭିନ୍ନ ରାଜନୈତିକ ଦଳ ଓ ସଂଗଠନ । ଚଳିତବର୍ଷ ଜାନୁଆରୀ ମାସରେ କଣାସରେ ହଇଜା ମୃତ୍ୟୁ ସରକାରଙ୍କ ପାଇଁ ସତର୍କ ଥିଲା । କିନ୍ତୁ ସରକାର କୌଣସି ପଦକ୍ଷେପ ନ ନେବାରୁ ଆଜି ଏଭଳି ସ୍ଥିତି ସୃଷ୍ଟି ହୋଇଥିବା କୁହାଯାଇଛି । ସେପଟେ ଆଜିର ଦିନରେ ଓଡ଼ିଶାରେ ହଇଜା ଜନିତ ମୃତ୍ୟୁକୁ ନେଇ ବିଭିନ୍ନ ମହଲରେ ସରକାରଙ୍କ ବିରୋଧରେ ଅସନ୍ତୋଷ ବଢ଼ିବାରେ ଲାଗିଛି । ସେପଟେ ମନ୍ତ୍ରୀଙ୍କ କହିବା କଥା ସରକାର ଡାଇରିଆ ସ୍ଥିତିକୁ ଗୁରୁତର ସହ ନେଉଛନ୍ତି ।
୫ ମାସ ତଳେ କଣାସରେ ହଇଜା ହେଲା । ୭ ଜଣ ମରିଥିବା ନେଇ ଅଭିଯୋଗ ହୋଇଛି । ଦୂଷିତ ପାଣି ଯୋଗୁଁ ହଇଜା ହୋଇଥିଲା । ସରକାରଙ୍କ ଅବହେଳା ନେଇ ମାମଲା ରାଜ୍ୟମାନବାଧୀକାର କମିଶନରେ ବିଚାରାଧୀନ ଅଛି । ହେଲେ ଏ ସରକାର ଟିକିଏ ବି ଚେତିଲେନି । ଏବେ ଯାଜପୁରଠୁ ଆରମ୍ଭ କରି ୧୫ ଜିଲ୍ଲା ବ୍ୟାପିଲାଣି ଝାଡ଼ାବାନ୍ତି ଓ ହଇଜା ସଂକ୍ରମଣ । ଖୋଦ ଯାଜପୁରରେ ହଇଜାରେ ୫ ଜଣଙ୍କ ଜୀବନ ଯାଇଥିବା ସ୍ବାସ୍ଥ୍ୟ ବିଭାଗ ପୁଷ୍ଟି କରିଛି । ବେସରକାରୀ ଭାବେ ଦୁଇଅଙ୍କ ଛୁଇଁଛି ମୃତକଙ୍କ ସଂଖ୍ୟା । ଦିନକୁ ଦିନ ଆକ୍ରାନ୍ତଙ୍କ ସଂଖ୍ୟା ବଢୁଥିବାରୁ ରାଜ୍ୟରେ ବଢୁଛି ଜନ ଅସନ୍ତୋଷ । ଉତ୍ତର ଓଡ଼ିଶାରେ ବନ୍ୟାସ୍ଥିତି ସୁଧୁରିଥିବା ବେଳେ ଡାଇରିଆ ସଂକ୍ରମଣ ଆଶଙ୍କା ଆହୁରି ବଢାଇ ଦେଇଛି । ଖୋଦ କେନ୍ଦୁଝର ଆନନ୍ଦପୁର ଉପଖଣ୍ଡ ଅଞ୍ଚଳରେ ସ୍ଥିତି ଦିନକୁ ଦିନ ବୃଦ୍ଧି ପାଇଲାଣି । ଏବେ ସୁଦ୍ଧା ୩୫୦ରୁ ଅଧିକ ଆକ୍ରାନ୍ତ ହୋଇଥିବା ବେଳେ ୩୫ ଜଣ ବିଭିନ୍ନ ହସ୍ପିଟାଲରେ ଭର୍ତ୍ତି ହୋଇଛନ୍ତି । ହଇଜା ଓ ଝାଡ଼ାବାନ୍ତି ଜିଲ୍ଲା ପରେ ଜିଲ୍ଲା ଡେଉଁଛି । ଅଥଚ ରାଜ୍ୟ ସରକାର ବାସ୍ତବତା ଲୁଚାଉଥିବା ଅଭିଯୋଗ ହୋଇଛି । କଣାସ ହଇଜାର କାରଣ ଥିଲା ଦୂଷିତ ପାଣି । ଏବେ ବି ସମାନ କାରଣ ଯୋଗୁଁ ଲୋକେ ସଂକ୍ରମିତ ହୋଇଛନ୍ତି । ଆଜି ଯାଜପୁର ଅତିରିକ୍ତ ଜିଲ୍ଲାପାଳ, ବଡ଼ଚଣା ବିଡ଼ିଓ ଓ ଅନ୍ୟ ପ୍ରଶାସନିକ ଅଧିକାରୀ ପହଞ୍ଚି ସ୍ଥିତି ପରଖିଛନ୍ତି ।
ଗତ ଜାନୁଆରୀ ୨ ତାରିଖରେ ପୁରୀ ଜିଲ୍ଲା କଣାସରେ ହଇଜାରେ ଆକ୍ରାନ୍ତ ହେଲେ ଲୋକେ । ୪୦୦ରୁ ଅଧିକ ଲୋକ ଆକ୍ରାନ୍ତ ହେଲେ । ୭ ଜଣଙ୍କ ମୁଣ୍ଡ ନେଲା ହଇଜା । ସେତେବେଳେ ପାନୀୟ ଜଳର ସ୍ବଚ୍ଛତା ଉପରେ ସରକାର ଗୁରୁତ୍ବ ଦେଇଥିଲେ ଏଭଳି ଦୁଃସ୍ଥିତି ଭୋଗିବାକୁ ପଡି ନ ଥାଆନ୍ତା ବୋଲି କହିଛନ୍ତି ପୂର୍ବତନ ବିଧାୟକ ରମାରଞ୍ଜନ ବଳିୟାର ସିଂ । କଂଗ୍ରେସ ଅଭିଯୋଗ କରିଛି, ବିଜେପି ସରକାରଙ୍କ ବର୍ଷେ ଭିତରେ ଏକାଧିକ ଝାଡ଼ାବାନ୍ତି ଘଟଣା ଘଟିଲାଣି । କଣାସ ଘଟଣାକୁ ଗୁରୁତ୍ବ ଦେଇଥିଲେ ଆଜି ଏଭଳି ହଇଜା ସ୍ଥିତି ଦେଖିବାକୁ ମିଳି ନଥାନ୍ତା । ସଂକ୍ରମଣ ରୋକିବାକୁ ସରକାର କଡ଼ା ପଦକ୍ଷେପ ନ ନେଲେ ଆଗକୁ ଆନ୍ଦୋଳନ କରାଯିବା ।
ଆଗକୁ ରଥଯାତ୍ରା ଥିବାରୁ ହଇଜାକୁ ନେଇ ଚିନ୍ତା ବଢିଛି । ଲକ୍ଷଲକ୍ଷ ଲୋକଙ୍କ ସମାଗମ ପୁରୀରେ ହେବାକୁ ଥିବାରୁ ଏହାକୁ ନିୟନ୍ତ୍ରଣ କରିବା ମୁଖ୍ୟ ଚ୍ୟାଲେଞ୍ଜ ହୋଇପାରେ ।
ରାଜ୍ୟରେ ଅସୁରକ୍ଷିତ ମହିଳା: ବିଜେଡିର ରଣହୁଙ୍କାର, ୨୫ରେ କଲେଜ କ୍ୟାମ୍ପସରେ ପ୍ରତିବାଦ
ନନ୍ଦିଘୋଷ ବ୍ୟୁରୋ: ରାଜ୍ୟରେ ଅସୁରକ୍ଷିତ ମହିଳା । ବଢ଼ିଚାଲିଛି ଦୁଷ୍କର୍ମ ସାଙ୍ଗକୁ ଅତ୍ୟାଚାର । ପ୍ରତିବାଦରେ ଆସନ୍ତା ୨୫ ତାରିଖରେ ରାଜ୍ୟର ସବୁ କଲେଜ ଓ ବିଶ୍ୱବିଦ୍ୟାଳୟରେ ବିଜେଡି କରିବ ପ୍ରତିବାଦ । ଛାତ୍ରଛାତ୍ରୀମାନେ ଶ୍ରେଣୀ ବର୍ଜନ କରିବା ସହ କଳାବ୍ୟାଜ୍ ପିନ୍ଧି ପିକେଟିଂ କରିବେ । ପ୍ରତିବାଦ ସଭାରେ ସାମିଲ ହେବାକୁ ଆହ୍ବାନ ଦେଇଛି ବିଜେଡି । ଓଡ଼ିଶାରେ ମହିଳାମାନେ ଅସୁରକ୍ଷିତ ନେଇ ସାରା ବିଶ୍ବରେ ନିନ୍ଦିତ ହେଲାଣି ଓଡ଼ିଶା । ଏହାକୁ ନେଇ ବିଜେପି ସରକାରକୁ ସମାଲୋଚନା କରିଛନ୍ତି ଉଭୟ କଂଗ୍ରେସ ଓ ବିଜେଡି ।
ଓଡ଼ିଶାରେ ବର୍ଷକ ଭିତରେ ହେଲାଣି ୩ ହଜାରରୁ ଅଧିକ ଦୁଷ୍କର୍ମ ମାମଲା । ଗୋପାଳପୁରରେ ଛାତ୍ରୀଙ୍କୁ ଗଣଦୁଷ୍କର୍ମ ସାରା ବିଶ୍ବରେ ଓଡ଼ିଶାର ଛବିକୁ ମଳିନ କରିଛି । ରାଜ୍ୟରେ ବଢୁଥିବା ଦୁଷ୍କର୍ମକୁ ନେଇ ପ୍ରତିବାଦ କରିବ ବିଜେଡି । ଆସନ୍ତା ୨୫ ତାରିଖରେ ସମସ୍ତ କଲେଜ ଓ ବିଶ୍ବବିଦ୍ୟାଳୟରେ ପ୍ରତିବାଦ କରିବ ବିଜେଡି । ଛାତ୍ରଛାତ୍ରୀମାନେ ଶ୍ରେଣୀ ବର୍ଜନ କରିବା ସହ କଳାବ୍ୟାଜ୍ ପିନ୍ଧି ପିକେଟିଂ କରିବେ । ନାରୀଙ୍କ ସୁରକ୍ଷା ପାଇଁ ଛାତ୍ରଛ୍ରାତ୍ରୀମାନେ ପ୍ରତିବାଦ ଆନ୍ଦୋଳନରେ ସାମିଲ ହେବାକୁ ଦଳ ଆହ୍ବାନ କରିଛି । ରାଜ୍ୟରେ ମହିଳା ଅସୁରକ୍ଷିତ ଥିବା ନେଇ ସରକାରଙ୍କୁ ଟାର୍ଗେଟ କରିଛି ବିଜେଡି । ଅଞ୍ଜନା ମିଶ୍ର ଘଟଣାରୁ ବଳି ଯାଇଛି ଗୋପାଳପୁର ଛାତ୍ରୀ ଗଣଦୁଷ୍କର୍ମ ଘଟଣା । ଯାହା ବିଶ୍ବ ମାନଚିତ୍ରରେ ଓଡ଼ିଶାକୁ ନିନ୍ଦିତ କରିଛି । ପ୍ରତିଦିନ ୧୫ରୁ ଅଧିକ ମହିଳା ଦୁଷ୍କର୍ମ ଓ ନିର୍ଯାତନାର ଶିକାର ହେଉଛନ୍ତି । ବିଜେପି ସରକାରକୁ ଆସିବ ଦିନଠାରୁ ଅସୁରକ୍ଷିତ ହୋଇପଡ଼ିଛନ୍ତି ମହିଳା । ଏହା ବିରୋଧରେ କଲେଜ ଓ ବିଶ୍ବବିଦ୍ୟାଳୟ କ୍ୟାମ୍ପସରେ ପ୍ରତିବାଦ କରିବ ବିଜେଡି ।
ସେପଟେ କଂଗ୍ରେସ ମଧ୍ୟ ରାଜ୍ୟରେ ବଢି ଚାଲିଥିବା ନାରୀ ନିର୍ଯାତନାକୁ ନେଇ ସରକାରଙ୍କ ଉପରେ ବର୍ଷିଛି । ପିସିସି ସଭାପତି ଭକ୍ତ ଚରଣ ଦାସ କହିଛନ୍ତି, ଡବଲ ଇଞ୍ଜିନ ସରକାରରେ ନିଜକୁ ସୁରକ୍ଷିତ ମଣୁନାହାନ୍ତି ମହିଳା । ଶିଶୁ ନିଖୋଜ ୨୦ ହଜାର ଟପିଥିବା ବେଳେ, ବର୍ଷକ ଭିତରେ ୭୦ ଜଣ ମହିଳା ଗଣଦୁଷ୍କର୍ମର ଶିକାର ହୋଇଛନ୍ତି । ନାରୀ ନିର୍ଯାତନା ଘଟଣା ସାରା ବିଶ୍ୱ ଜାଣୁଛି, କିନ୍ତୁ ଜାଣିପାରୁନାହାନ୍ତି ଓଡ଼ିଶା ସରକାର । ବିଜେଡି ବିଧାୟକ ଗୌତମ ବୃଦ୍ଧ ଦାସ କହିଛନ୍ତି, ନବୀନ ପଟ୍ଟନାୟକଙ୍କ ସମୟରେ ବିଶ୍ବରେ ସୁନାମ ଆଣିଥିଲା ଓଡ଼ିଶା । ହେଲେ ବିଜେପି ସରକାରରେ ହେଉଛି ବଦନାମ । ପ୍ରତିକ୍ରିୟା ଦେଇ ବିଜେପି କହିଛି, ସଜାଗ ଅଛନ୍ତି ସରକାର ।
ଗୋପାଳପୁର ଗଣଦୁଷ୍କର୍ମ: ଅଭିଯୁକ୍ତଙ୍କ ମୋବାଇଲରେ ଦୁଷ୍କର୍ମ ବେଳର ଭିଡିଓ
ନନ୍ଦିଘୋଷ ବ୍ୟୁରୋ: ଗୋପାଳପୁର ଗଣଦୁଷ୍କର୍ମ ମାମଲାର ଆଉ ଖସିପାରିବେନି ଅଭିଯୁକ୍ତ । ସମସ୍ତଙ୍କ ବିରୋଧରେ ମିଳିଛି ଡିଜିଟାଲ ଏଭିଡେନ୍ସ । ଅଭିଯୁକ୍ତଙ୍କ ମୋବାଇଲରୁ ମିଳିଛି ଦୁଷ୍କର୍ମ ବେଳର ଭିଡିଓ । ଅଭିଯୁକ୍ତଙ୍କ କାରନାମା CCTVରେ ବି କଏଦ । ଅଭିଯୁକ୍ତଙ୍କ ବିରୋଧରେ ମିଳିଛି ଗୁରୁତ୍ୱପୂର୍ଣ୍ଣ ଡିଜିଟାଲ ପ୍ରମାଣ । ଅଭିଯୁକ୍ତଙ୍କ ମୋବାଇଲ ଜବତ କରାଯାଇ SFSLକୁ ପଠାଯାଇଛି । ଆବଶ୍ୟକ ସ୍ଥଳେ ଅଭିଯୁକ୍ତଙ୍କୁ ରିମାଣ୍ଡରେ ନିଆଯିବ ବୋଲି କହିଛନ୍ତି କ୍ରାଇମବ୍ରାଞ୍ଚ ଡିଜି । ସେପଟେ ୨ ସପ୍ତାହ ଭିତରେ ଜବାବ ଦେବାକୁ ମୁଖ୍ୟ ଶାସନ ସଚିବ ଓ ପୋଲିସ ମହାନିର୍ଦ୍ଦେଶକଙ୍କୁ ନିର୍ଦ୍ଦେଶ ଦେଇଛନ୍ତି ଜାତୀୟ ମାନବାଧିକାର କମିଶନ ।
ଗୋପାଳପୁର ଗ୍ୟାଙ୍ଗରେପ୍ ଘଟଣାରେ ମିଳିଛି ଷ୍ଟ୍ରଙ୍ଗ ପ୍ରମାଣ । ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବାରେ ହେବ ଯଥେଷ୍ଟ । ଅଭିଯୁକ୍ତଙ୍କ ମୋବାଇଲରୁ ମିଳିଛି ଗଣଦୁଷ୍କର୍ମ ବେଳର ଭିଡ଼ିଓ । ଘଟଣା ପୂର୍ବ ଏବଂ ପରର ସିସିଟିଭି ଭିଜୁଆଲ କ୍ରାଇମ୍ ଏଗେନଷ୍ଟ ଓମେନ୍ ଓ୍ବିଙ୍ଗ ହାତରେ ଲାଗିଛି ବୋଲି କହିଛନ୍ତି କ୍ରାଇମବ୍ରାଞ୍ଚ ଡିଜି । ଆବଶ୍ୟକ ସ୍ଥଳେ ୧୦ ଅଭିଯୁକ୍ତଙ୍କୁ ରିମାଣ୍ଡରେ ନିଆଯିବ । ଦୁଷ୍କର୍ମକାରୀଙ୍କ ମୋବାଇଲ ଜବତ ପରେ ଏଭିଡେନ୍ସର ଖୋଳତାଡ଼ ପାଇଁ SFSLକୁ ପଠାଯାଇଛି । ଅଭିଯୁକ୍ତମାନେ ଦେଢ଼ ଘଣ୍ଟା ଧରି କ୍ରାଇମସିନରେ ଥିଲେ । ଅଭିଯୁକ୍ତଙ୍କ DNA କଲେକ୍ସନ ସରିଛି । ଡାଇରେକ୍ଟ ଓ ସରକମଷ୍ଟେନସିଆଲ ଏଭିଡେନ୍ସ ମିଳିଛି । ସେମାନଙ୍କୁ ୪୫ ଦିନ ଭିତରେ ଅଭିଯୁକ୍ତଙ୍କୁ ରିମାଣ୍ଡରେ ଆଣିପାରିବୁ ବୋଲି କହିଛନ୍ତି କ୍ରାଇମବ୍ରାଞ୍ଚ ଡିଜି ।
ଲଜ୍ଜା ଘଟଣାକୁ ଗୁରୁତର ସହ ନେଇଛନ୍ତି NHRC । ନିଜ ଆଡୁ ମାମଲା ରୁଜୁ କରିଛନ୍ତି । ୨ ସପ୍ତାହ ଭିତରେ ଜବାବ ଦେବାକୁ ମୁଖ୍ୟ ଶାସନ ସଚିବ ଓ ପୋଲିସ ମହାନିର୍ଦ୍ଦେଶକଙ୍କୁ ନିର୍ଦ୍ଦେଶ ଦେଇଛନ୍ତି ଜାତୀୟ ମାନବାଧିକାର କମିଶନ । ତଦନ୍ତର ଷ୍ଟାଟସ ରିପୋର୍ଟ, ପୀଡ଼ିତାଙ୍କ ସ୍ଵାସ୍ଥ୍ୟବସ୍ଥା, କିଛି କ୍ଷତିପୂରଣ ଦିଆଯାଇଛି କି ନାହିଁ ? ଏହାସହ କାଉନସେଲିଂ କରାଯାଇଛି କି ନାହିଁ ? ସେସବୁର ସବିଶେଷ ରିପୋର୍ଟ କମିଶନଙ୍କୁ ସରକାର ଦେବାକୁ ବାଧ୍ୟ ବୋଲି କହିଛନ୍ତି ମାନବାଧିକାର କର୍ମୀ ।
ଗତ ୧୫ ତାରିଖରେ ସନ୍ଧ୍ୟାରେ ଗୋପାଳପୁର ବିଚରେ ଜଣେ ଛାତ୍ରୀଙ୍କୁ ଗଣଦୁଷ୍କର୍ମ କରାଯାଇଥିବା ଅଭିଯୋଗ ହୋଇଥିଲା । ନିଜ ସାଙ୍ଗ ସହିତ ସେ ବିଚକୁ ବୁଲିବାକୁ ଯାଇଥିବା ବେଳେ ଗଣଦୁଷ୍କର୍ମ ଶିକାର ହୋଇଥିଲେ । ଗତ ଶୁକ୍ରବାର ବ୍ରହ୍ମପୁର ଜେଲରେ ୬ ଅଭିଯୁକ୍ତଙ୍କ ହୋଇଥିଲା ଟିଆଇ ପ୍ୟାରେଡ ।
ପୁଟିନଙ୍କୁ ଖାମେନେଇଙ୍କ ଚିଠି: କହିଲେ- ଖାଲି ନିନ୍ଦା କଲେ ଚଳିବନି କିଛି ତ ସାହାଯ୍ୟ କର…
ନନ୍ଦିଘୋଷ ବ୍ୟୁରୋ: ଦିନକୁ ଦିନ ଉଗ୍ର ହେବାରେ ଲାଗିଛି ଇସ୍ରାଏଲ ଓ ଇରାନ ଯୁଦ୍ଧ । ଆଉ ଇରାନର ପରମାଣୁ ଘାଟିକୁ ଆକ୍ରମଣ କରି ଆମେରିକା ଏହି ନିଆଁରେ ଘିଅ ଢାଳିବା କାମ କରିଛି । ଇରାନର ପରମାଣୁ ଘାଟି ଉପରେ ଆକ୍ରମଣ ପରେ ବିଶ୍ବର ପାଓ୍ବାର ହାଉସ ଏବେ ଦୁଇ ଫାଳ ହେବାରେ ଲାଗିଛି । ଗୋଟିଏ ପଟେ ଇସ୍ରାଏଲ ସହ ଆମେରିକା ଛିଡ଼ା ହୋଇଥିବା ବେଳେ ଅନ୍ୟପକ୍ଷେ ଇରାନ ସପକ୍ଷରେ ବାହାରିଛନ୍ତି ଦୁଇ ସୁପର ପାଓ୍ବର ଋଷ ଓ ଚୀନ । ଏମିତି ସ୍ଥିତିରେ ଯେ କୌଣସି ସମୟରେ ତୃତୀୟ ବିଶ୍ବଯୁଦ୍ଧ ଆରମ୍ଭ ହେବାର ଆଶଙ୍କା ଭିତରେ ରହିଛି ସାରା ବିଶ୍ବ । ଆମେରିକାର ଆକ୍ରମଣକୁ ଋଷ ନିନ୍ଦା କରିଥିବା ବେଳେ ଏଥିରେ ଇରାନର ସୁପ୍ରିମ ଲିଡର ଆୟାତୁଲ୍ଲା ଅଲ୍ଲୀ ଖାମେନେଇ ଖୁସି ନୁହଁନ୍ତି । ପୁଟିନଙ୍କୁ ଚିଠି ଲେଖି କହିଛନ୍ତି, ଖାଲି ନିନ୍ଦା କଲେ ଚଳିବନି କିଛି ସାହାଯ୍ୟ କର ।
ସୂଚନାଯୋଗ୍ୟ, ଯୁଦ୍ଧ ଭିତରେ ଇରାନ ବିଦେଶ ମନ୍ତ୍ରୀ ଅବ୍ବାସ ଅରାଧଚି ମସ୍କୋରେ ଋଷ ରାଷ୍ଟ୍ରପତି ବ୍ଲାଦିମିର ପୁଟିନଙ୍କୁ ସାକ୍ଷାତ କରିଛନ୍ତି । ଏହି ସମୟରେ ଅରାଧଚି, ପୁଟିନଙ୍କ ଉଦ୍ଦେଶ୍ୟରେ ଖାମେନେଇ ପଠାଇ ଥିବା ଚିଠି ଦେଇଛନ୍ତି । ଅରାଧଚି ସାହାଯ୍ୟ ମାଗିବାକୁ ଋଷରେ ପହଞ୍ଚିଛନ୍ତି ।
ଆମେରିକା ଓ ଇସ୍ରାଏଲ ଖାମେନେଇଙ୍କୁ ହତ୍ୟା ଓ ଇରାନରେ କ୍ଷମତା ପରିବର୍ତ୍ତନ ଲକ୍ଷ୍ୟରେ ରହିଛନ୍ତି । ପୁଟନଙ୍କୁ ଏହି ଭୟ ସତାଉଛିଳ ଯଦି ଏମିତି ହୁଏ ତେବେ ମଧ୍ୟପ୍ରାଚ୍ୟରେ ସ୍ଥିତି ଆହୁରି ସଙ୍ଗୀନ ହୋଇଯିବ । ଏମିତି ସ୍ଥିତିରେ ଇସ୍ରାଏଲ ଆକ୍ରମଣକୁ ପୁଟିନ ନିନ୍ଦା କରିଛନ୍ତି । ହେଲେ, ଇରାନର ପରମାଣୁ ଘାଟି ଉପରେ ଆମେରିକାର ଆକ୍ରମଣକୁ ନେଇ କୌଣସି ବୟାନ ଦେଇନାହାନ୍ତି । ତେବେ ଗତ ସପ୍ତାହରେ ସେ ଶାନ୍ତି ପାଇଁ ଅପିଲ କରିବା ସହ ପରମାଣୁ କାର୍ଯ୍ୟକ୍ରମକୁ ନେଇ ମସ୍କୋ ମଧ୍ୟସ୍ଥତା କରିବାକୁ କହିଥିଲେ ।
ଅବ୍ବାସ ଅରାଧଚି ଯେଉଁ ଚିଠି ନେଇ ଋଷରେ ପହଞ୍ଚିଛନ୍ତି, ସେଥିରେ ଖାମେନେଇ ଋଷକୁ ସାହାଯ୍ୟ ମାଗିଛନ୍ତି । କାରଣ, ଋଷ କରୁଥିବା ସମର୍ଥନକୁ ଇରାନ ପସନ୍ଦ କରୁନାହିଁ । ଇରାନ ଚାହୁଁଛି, ଇସ୍ରାଏଲ ଓ ଆମେରିକା ବିରୋଧରେ ସିଧାସଳଖ ଋଷ ତା’ ସପକ୍ଷରେ ବାହାରୁ ।
ଅଦିନିଆ ରଥଯାତ୍ରା: ଦିଲ୍ଲୀ ମୁଖ୍ୟମନ୍ତ୍ରୀ ସାମିଲ ହେବାକୁ ନେଇ ତେଜିଲା ବିବାଦ
ନନ୍ଦିଘୋଷ ବ୍ୟୁରୋ: ଜଗନ୍ନାଥ ସଂସ୍କୃତି ବିଶ୍ୱରେ ପରିଚିତ । ପଶ୍ଚିମବଙ୍ଗରେ ଧାମକୁ ନେଇ ତୁମ୍ବି ତୋଫାନ କଲା ରାଜ୍ୟ ବିଜେପି । କିନ୍ତୁ ଦିଲ୍ଲୀରେ ଅଦିନିଆ ରଥଯାତ୍ରାକୁ ନେଇ ଓଡ଼ିଶା ସରକାର ମୁହଁ ଖୋଲି ନାହାନ୍ତି । ଅଣସର ଘରେ ମହାପ୍ରଭୁ ଥିବା ବେଳେ ଦିଲ୍ଲୀରେ ଅଦିନିଆ ରଥଯାତ୍ରା କରାଯାଇଛି । ଏପରିକି ଏହି ଅଦିନିଆ ରଥଯାତ୍ରାରେ ଦିଲ୍ଲୀ ମୁଖ୍ୟମନ୍ତ୍ରୀ ଯୋଗ ଦେବା ମଧ୍ୟ ଲଜ୍ଜା, ଦୁଃଖ ଓ ପରିତାପର ବିଷୟ । ବିଜେପିର ଏହା ଦୋମୁହାଁ ନୀତି ବୋଲି କହି କଡ଼ା ଭାଷାରେ ସମାଲୋଚନା କରିଛନ୍ତି ବିଜେଡ଼ି ବିଧାୟକ ଗୌତମବୁଦ୍ଧ ଦାସ ।
ସେପଟେ ଘଟଣାକୁ ନେଇ ମୁଖ୍ୟମନ୍ତ୍ରୀ ପ୍ରଧାନମନ୍ତ୍ରୀଙ୍କୁ ଚିଠି ଲେଖନ୍ତୁ ଓ ଦିଲ୍ଲୀ ମୁଖ୍ୟମନ୍ତ୍ରୀଙ୍କଠାରୁ ଉତ୍ତର ମାଗନ୍ତୁ ବୋଲି ଦାବି କରିଛନ୍ତି କଂଗ୍ରେସ ବିଧାୟକ ଅଶୋକ ଦାସ । ଏଭଳି ଅଦିନିଆ ରଥଯାତ୍ରାକୁ ବିଜେପି ବିଧାୟକ ଅଗସ୍ତି ବେହେରା ମଧ୍ୟ ନିନ୍ଦା କରିଛନ୍ତି । ସେପଟେ ଯେଉଁଠି ବି ଅଦିନିଆ ରଥଯାତ୍ରା ହେଉଛି ସରକାର ତା’ ଉପରେ ନଜର ରଖିଛନ୍ତି । ଦିଲ୍ଲୀରେ ଯେଉଁ ଘଟଣା ଘଟିଛି ଆଗରୁ ହେଉ ନଥିଲା । ଘଟଣାକୁ ନେଇ ଦିଲ୍ଲୀ ସରକାରଙ୍କୁ ନିନ୍ଦା କରାଯାଇଛି । ବିଶ୍ଵ ସାରା ନିତିକାନ୍ତୀରେ କେମିତି ରଥଯାତ୍ରା ଶ୍ରୀମନ୍ଦିର ପ୍ରଶାସନ ନିୟମ ଅନୁଯାୟୀ ହେବ ତାକୁ ଧ୍ୟାନ ଦିଆଯାଉଛି ବୋଲି କହିଛନ୍ତି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ।
୧୭ ବର୍ଷ ପରେ ୫୦ ଶତକ କରି ନପାରିବାର ଦୁଃଖ ବଖାଣିଲେ ସୌରଭ ଗାଙ୍ଗୁଲି
ନନ୍ଦିଘୋଷ ବ୍ୟୁରୋ: ଦିନ ଥିଲା ଭାରତୀୟ କ୍ରିକେଟ୍ ଦଳରେ ସୌରବ ଗାଙ୍ଗୁଲିଙ୍କ ରାଜ ଚାଲୁଥିଲା । ନିଜ ସମୟରେ ବୋଲରଙ୍କ ପାଇଁ କାଳ ସାଜି କ୍ରିଜକୁ ଓହ୍ଲାଉଥିବା ଗାଙ୍ଗୁଲି ଅନ୍ତରାଷ୍ଟ୍ରିୟ କ୍ରିକେଟରେ ୩୮ ଶତକ ହାସଲ କରିଛନ୍ତି । ହେଲେ ତାଙ୍କୁ ଏହି ସଂଖ୍ୟା ପସନ୍ଦ ନୁହେଁ । ସେ ଚାହିଁଥିଲେ ୫୦ରୁ ଅଧିକ ଶତକ ହାସଲ କରିପାରିଥାନ୍ତି । ଆଉ ଏପରି କରି ପାରି ନଥିବାରୁ ଦୁଃଖ ପ୍ରକାଶ କରିଛନ୍ତି । କ୍ରିକେଟରୁ ଅବସର ନେବାର ୧୭ ବର୍ଷ ପରେ ଗାଙ୍ଗୁଲି ଏଥିପାଇଁ ଦୁଃଖ ପ୍ରକାଶ କରିବା ସହ ସାରା ଜୀବନ ଏହା ମୋ ପାଇଁ ଅବଶୋଷ ହୋଇ ରହିଯିବ ବୋଲି କହିଛନ୍ତି ।
ଗାଙ୍ଗୁଲି ୩୧୧ ଦିନିକିଆ ଓ ୧୧୩ ଟେଷ୍ଟ ମ୍ୟାଚ୍ ଖେଳିଛନ୍ତି । ସେ ତାଙ୍କ କ୍ୟାରିୟରରେ ୧୮ ହଜାର ୫୭୫ ରନ୍ କରିଛନ୍ତି । ଯେଉଁଥିରେ ୩୮ଟି ଶତକୀୟ ପାରି ରହିଛି । ଏକ ସାକ୍ଷାତକାରରେ ଗାଙ୍ଗୁଲି କହିଛନ୍ତି, ‘ମୁଁ ବହୁତ ଥର ଶତକ ଲଗାଇବାରୁ ବଞ୍ଚିତ ହୋଇଛି । ମୋତେ ଆହୁରି ଅଧିକ ରନ୍ ବନାଇବାର ଥିଲା । ମୁଁ ଏକାଧିକ ଥର ୯୦ ଓ ୮୦ ରନରୁ ଅଧିକ କରିଛି ।’ ଗାଙ୍ଗୁଲିଙ୍କ କ୍ୟାରିୟରକୁ ଯଦି ଦେଖାଯାଏ ତେବେ ଜାଣିବା ସେ ୩୦ ଥର ୮୦ରୁ ଅଧିକ ରନ୍ କରି ଆଉଟ୍ ହୋଇଛନ୍ତି । ଯଦି ସେ ଏହାକୁ ଶତକରେ ପରିଣତ କରିପାରିଥାନ୍ତେ ତେବେ ତାଙ୍କ ଶତକ ସଂଖ୍ୟା ଆହୁରି ଅଧିକ ହୋଇଥାନ୍ତି । ସୂଚନାଯୋଗ୍ୟ, ଗାଙ୍ଗୁଲି ୨୦୦୮ରେ ଶେଷ ଇନ୍ତରନ୍ୟାସନାଲ ମ୍ୟାଚ୍ ଖେଳିଥିଲେ ।
ସେ ଯେତେବେଳେ ଏକା ଥାନ୍ତି, ସେତେବେଳେ ପୁରୁଣା ଦିନର ନିଜ ଖେଳକୁ ଦେଖିଥାନ୍ତି । ସେ ନିଜେ ଏହା କହିଛନ୍ତି । ସେ ଆଡୁରି କହିଛନ୍ତି, ମୁଁ ମୋ ଖେଳ ଦେଖିବା ବେଳେ ଭାବେ ମୁଁ ଆହୁରି ଅଧିକ ଶତକ ଲଗାଇ ପାରିଥାନ୍ତି । ସେ କହିଛନ୍ତି, ଯେତେବେଳେ ମୋ ସ୍ତ୍ରୀ ଘରେ ନଥାନ୍ତି ମୁଁ ୟୁଟ୍ୟୁବରେ ନିଜର ଖେଳ ଦେଖିଥାଏ । ଆଉ ଯେତେବେଳେ ମୁଁ ୭୦ରୁ ଅଧିକ ରନ୍ କରି ଆଉଟ୍ ହୋଇଯିବା ଦେଖେ, ନିଜକୁ କହିଥାଏ ମୁଁ ଶତକ ମାରି ପାରିଥାନ୍ତି । ହେଲେ ଏହାକୁ ଆଉ ବଦଳାଇ ହେବନି ।
ସୂଚନାଯୋଗ୍ୟ, ଗାଙ୍ଗୁଲି ଦିନିକିଆରେ ୭୨ ଓ ଟେଷ୍ଟରେ ୩୫ ଥର ଅର୍ଦ୍ଧ ଶତକ କରିଥିଲେ ବି ଏହାକୁ ଶତକରେ ପରିଣତ କରିପାରି ନଥିଲେ ।
ଉପ-ନିର୍ବାଚନରେ କିଏ କେଉଁଠି ଜିତିଲା ?
ନନ୍ଦିଘୋଷ ବ୍ୟୁରୋ: ପଞ୍ଜାବ, ପଶ୍ଚିମବଙ୍ଗ, ଗୁଜରାଟ ଏବଂ କେରଳର ପାଞ୍ଚଟି ବିଧାନସଭା ଆସନରେ ଉପନିର୍ବାଚନ ପାଇଁ ଆଜି ଭୋଟ ଗଣତି ଚାଲିଛି। ଲୁଧିଆନାରେ ସକାଳ 8ଟାରେ ଗଣତି ଆରମ୍ଭ ହୋଇଛି। ପହଲଗାମରେ ଆତଙ୍କବାଦୀ ଆକ୍ରମଣ ପରେ ଏହି ପାଞ୍ଚଟି ଆସନରେ ଅନୁଷ୍ଠିତ ନିର୍ବାଚନ ହେଉଛି ପ୍ରଥମ ନିର୍ବାଚନ। ଲୁଧିଆନା ପଶ୍ଚିମରେ ବିଜେପି ଏବଂ ଆପ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେଉଛି।
ଗୁଜୁରାଟରେ ଦମ ଦେଖାଇଲା ଆପ୍ । ବିସନଗର ଆସନରେ ଆପ ନେତା ଗୋପାଲ ଇଟାଲିଆ ବିଜୟୀ । ବିଜେପି ଗଡ଼ ଗୁଜରାଟରେ 2022 ନିର୍ବାଚନରେ ଜିତିଥିବା ବିସାବାଦର ଆସନକୁ ଆପ ବଜାୟ ରଖିଛି। ଆପ ଏହି ଆସନରୁ ପୂର୍ବତନ ରାଜ୍ୟ ସଭାପତି ଗୋପାଳ ଇଟାଲିଆଙ୍କୁ ପ୍ରାର୍ଥୀ କରିଥିଲା। ବିଜେପି ପ୍ରାର୍ଥୀ କିରୀଟ ପଟେଲଙ୍କୁ ୧୭୫୮୧ ଭୋଟରେ ପରାସ୍ତ କରିଛନ୍ତି ଗୋପାଲ । ୨୦୦୭ ମସିହାରୁ ବିଜେପି ଏହି ଆସନରେ ବିଜୟ ପାଇଁ ଆଗ୍ରହୀ ଥିଲା। ଏହି ନିର୍ବାଚନରେ ମୋଟ ୧୬ ଜଣ ପ୍ରାର୍ଥୀ ନିର୍ବାଚନ ମଇଦାନରେ ଥିଲେ ।
ସେପଟେ କେରଳର ନୀଳାମ୍ବୁର ଆସନରେ ବାଜି ମାରିନେଇଛି କଂଗ୍ରେସ । ପିନାରାଇ ବିଜୟନଙ୍କ ନେତୃତ୍ୱାଧୀନ ଏଲଡିଏଫ ସରକାରଙ୍କୁ ଝଟକା ଦେଇ ଏହି ବିଧାନସଭା ଉପନିର୍ବାଚନରେ କଂଗ୍ରେସ ବିଜୟୀ ହୋଇଛି । କଂଗ୍ରେସ ନେତୃତ୍ୱାଧୀନ ୟୁଡିଏଫ୍ ପ୍ରାର୍ଥୀ ଆର୍ଯ୍ୟଦାନ ସୌକଥ ୭୭,୦୦୦ରୁ ଅଧିକ ଭୋଟ ପାଇଛନ୍ତି । ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ସିପିଆଇଏମର ଏମ ସ୍ୱରାଜଙ୍କୁ ୧୧,୦୦୦ରୁ ଅଧିକ ଭୋଟରେ ପରାସ୍ତ କରିଛନ୍ତି ଆର୍ଯ୍ୟଦାନ ସୌକଥ ।
ପୁଣି ରିଲିଜ୍ ହେବେ ‘ଶୋଲେ’,ଏଥର ଗବ୍ବରକୁ ମାରିବ ଠାକୁର
ନନ୍ଦିଘୋଷ ବ୍ୟୁରୋ: ଭାରତୀୟ ସିନେମାର ସବୁଠାରୁ ଲୋକପ୍ରିୟ, ବ୍ଲକବଷ୍ଟର ଓ କଲ୍ଟ ଫିଲ୍ମ ‘ଶୋଲେ’ର ୫୦ ବର୍ଷ ପୂରଣ ହେବାକୁ ଯାଉଛି। ଏହି ଫିଲ୍ମ ୧୯୭୫ ମସିହା ଅଗଷ୍ଟ ୧୫ରେ ରିଲିଜ ହୋଇଥିଲା। ଧର୍ମେନ୍ଦ୍ର, ଅମିତାଭ ବଚ୍ଚନ, ଜୟା ବଚ୍ଚନ, ହେମା ମାଳିନୀ, ସଞ୍ଜୀବ କୁମାର ଓ ଅମଜଦ ଖାନ ଅଭିନୀତ ‘ଶୋଲେ’ର ୫୦ ବର୍ଷ ପୂରଣ ଅବସରରେ ଏହାକୁ ପୁନର୍ବାର ରିଲିଜ କରାଯାଉଛି। ବିଶେଷ କଥା ହେଉଛି, ଫିଲ୍ମଟିକୁ ଅନକଟ ସଂସ୍କରଣ ସହ ରିଲିଜ କରାଯିବ। ଶୋଲେକୁ ରମେଶ ସିପ୍ପୀ ନିର୍ଦ୍ଦେଶନା ଦେଇଥିଲେ। ଏବେ ୨୭ ଜୁନରେ ଏହାର ପ୍ରିମିୟର ଇଟାଲୀର ବୋଲୋଗ୍ନାରେ ହେବ।
ଭାରତର ଏହି କଲ୍ଟ ଫିଲ୍ମକୁ ଇଟାଲୀର ‘ଇଲ ସିନେମା ରିଟ୍ରୋଭେଟୋ ଫେଷ୍ଟିଭାଲ’ରେ ପ୍ରଦର୍ଶିତ କରାଯିବ। ଏହାର ବିଶେଷ ସ୍କ୍ରିନିଂ ପିୟାଜା ମାଜିଓରେ ହେବ। ଏହି ସ୍ଥାନ କ୍ଲାସିକ ଫିଲ୍ମର ସ୍କ୍ରିନିଂ ପାଇଁ ପ୍ରସିଦ୍ଧ। ଏହି ଅନକଟ ସଂସ୍କରଣର କ୍ସାଇମାକ୍ସରେ ଗବ୍ବର ସିଂକୁ ଠାକୁର ମାରୁଥିବାର ଦୃଶ୍ୟ ରହିଛି। ଏହି ଦୃଶ୍ୟଟିକୁ ସିବିଏଫସିର ନିର୍ଦ୍ଦେଶ ଅନୁସାରେ ମୂଳ ଥିଏଟର ରିଲିଜରୁ ହଟାଇ ଦିଆଯାଇଥିଲା। ଏଥିରେ ପୂର୍ବରୁ କେବେ ନ ଦେଖାଯାଇଥିବା ଦୃଶ୍ୟଗୁଡ଼ିକ ମଧ୍ୟ ଅନକଟ୍ ଭର୍ସନରେ ସାମିଲ ଅଛି, ଯାହାକୁ ସିବିଏଫସିର କହିବା ଅନୁସାରେ କିମ୍ବା ନିର୍ମାତାମାନେ ନିଜ ଇଚ୍ଛାରେ ଏଡିଟିଂ ସମୟରେ ହଟାଇ ଦେଇଥିଲେ।
ଫିଲ୍ମ ହେରିଟେଜ ଫାଉଣ୍ଡେସନ ଓ ସିପ୍ପୀ ଫିଲ୍ମସ ପ୍ରାଇଭେଟ ଲିମିଟେଡ ମଧ୍ୟରେ ଏକ ଯୌଥ ପ୍ରୋଜେକ୍ଟ ରୂପେ ଏହି ଅନକଟ ସଂସ୍କରଣକୁ ରିଲିଜ କରିବାର ଉଦ୍ଦେଶ୍ୟ ହେଉଛି ଫିଲ୍ମକୁ ମୁଳ ରୂପରେ ଦେଖାଇବା, ଯେପରି ‘ଶୋଲେ’ ପ୍ରଥମେ ନିର୍ମାଣ କରାଯାଇଥିଲା। ଅମିତାଭ ଫିଲ୍ମଟି ପୁନର୍ବାର ରିଲିଜ ହେବା ଉପରେ ଖୁସି ପ୍ରକାଶ କରିଛନ୍ତି। ଅନ୍ୟପକ୍ଷେ, ଧର୍ମେନ୍ଦ୍ର ଏହି ଫିଲ୍ମକୁ ବିଶ୍ୱର ଅଷ୍ଟମ ଆଶ୍ଚର୍ଯ୍ୟ ବୋଲି ଅଭିହିତ କରିଛନ୍ତି।
ଅମିତାଭ ବଚ୍ଚନ କହିଛନ୍ତି, “ସେହି ସମୟରେ ମୋତେ ଆଦୌ ଆଭାସ ନଥିଲା ଯେ ଏହା ଭାରତୀୟ ସିନେମା ପାଇଁ ଏକ ମାଇଲଖୁଣ୍ଟ ହେବ। ଏହାକୁ ଫ୍ଲପ୍ ଘୋଷଣା କରାଯିବାରୁ ଆରମ୍ଭ କରି ବକ୍ସ ଅଫିସରେ ରେକର୍ଡ୍ ତୋଡ ରନ ପର୍ଯ୍ୟନ୍ତର ନାଟକୀୟ ପରିବର୍ତ୍ତନ ଆମ ସମସ୍ତଙ୍କ ପାଇଁ ଏକ ଭାବନାତ୍ମକ ରୋଲରକୋଷ୍ଟର ଥିଲା… ମୁଁ ଆଶା କରୁଛି ଯେ ୫୦ ବର୍ଷ ପରେ ମଧ୍ୟ, ଏହି ଫିଲ୍ମ ବିଶ୍ୱଭରର ନୂଆ ଦର୍ଶକଙ୍କ କଳ୍ପନାଶକ୍ତିକୁ ଆକର୍ଷଣ କରିବ।”
ଧର୍ମେନ୍ଦ୍ର ଶୋଲେକୁ ବିଶ୍ୱର ଅଷ୍ଟମ ଆଶ୍ଚର୍ଯ୍ୟ ବୋଲି କହିଛନ୍ତି। ସେ କହିଛନ୍ତି, “ଫିଲ୍ମଟି ଅନକଟ ସଂସ୍କରଣ ସହ ରିଲିଜ ହେଉଥିବା ଶୁଣି ମୋତେ ବହୁତ ଖୁସି ଲାଗୁଛି ଏବଂ ମୋର ବିଶ୍ୱାସ ଯେ ଏହା ୫୦ ବର୍ଷ ପୂର୍ବ ପରି ସଫଳତା ପାଇବ। କେହି ସଲିମ-ଜାବେଦଙ୍କ ସଂଳାପ ଓ ରମେଶ ସିପ୍ପୀଙ୍କ ନିର୍ଦ୍ଦେଶନାକୁ ଭୁଲି ପାରିବେ କି? ଭାରତୀୟ ସିନେମାର ଇତିହାସରେ ଅନେକ ଦୃଶ୍ୟ ସ୍ଥାନ ପାଇଛି ଏବଂ ପ୍ରତ୍ୟେକ ଚରିତ୍ର ଷ୍ଟାର ହୋଇଛନ୍ତି । କିନ୍ତୁ ଆସଲ ନାୟକ ଥିଲା ମୁଦ୍ରା… ମୋର ପ୍ରିୟ ଦୃଶ୍ୟ ଟାଙ୍କି ଦୃଶ୍ୟ, ମନ୍ଦିର ଦୃଶ୍ୟ ଓ ଆହୁରି ଅନେକ ଦୃଶ୍ୟ ଥିଲା, କିନ୍ତୁ ସବୁଠାରୁ ଶକ୍ତିଶାଳୀ ଦୃଶ୍ୟ ମୋ ପାଇଁ ଜୟର ମୃତ୍ୟୁ ଦୃଶ୍ୟ, ଯାହା ଏବେ ମଧ୍ୟ ମୋ ମନରେ ରହିଛି।”