ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ଷ୍ଟାର ଓ୍ବିକେଟକିପର ବ୍ୟାଟ୍ସମ୍ୟାନ ଋଷଭ ପନ୍ତ ଏବେ ଦମଦାର ଫର୍ମରେ ରହିଛନ୍ତି । ଇଂଲଣ୍ଡ ବିପକ୍ଷ ଟେଷ୍ଟରେ ଭଲ ପ୍ରଦର୍ଶନ ଜାରି ରଖିଛନ୍ତି । ତେବେ କିଛିଦିନ ତଳେ କପିଲ ଶର୍ମାଙ୍କ ଶୋରେ ଯୋଗ ଦେଇଥିଲେ । ଏହି ଶୋ’ରେ ଟିମ ଇଣ୍ଡିଆର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର, ଋଷଭ ପନ୍ତ, ଚହଲ ଏବଂ ଅଭିଶେକ ଶର୍ମା ଏହି ଶୋ’କୁ ଆସିଥିଲେ । ତେବେ ଏହି ସମୟରେ ପନ୍ତ ଦୁର୍ଘଟଣା ପରେ କେତେ କଷ୍ଟ କରି ପୁଣି ଦଳକୁ ଫେରିଲେ ସେ ସମ୍ପର୍କରେ କହିଥିଲେ । ସେ କହିଥିଲେ କି, ଦୁର୍ଘଟଣା ପରେ ମୋତେ ଏତେ ଔଷଧ ଖାଇବାକୁ ପଡ଼ୁଥିଲା କି, ମୁଁ ଆଉ କଣ ଖାଇବି ଭୁଲି ଯାଇଥିଲି । ଏହାସହ ସେ କହୁଥିବାବେଳେ ଭାବପ୍ରବଣ ହୋଇଥିବା ଦେଖିବାକୁ ମିଳିଥିଲେ । ତେବେ ଏହି ଶୋ’ରେ ଯୋଗ ଦେଇଥିବା ବାକି ଅତିଥୀମାନେ ମଧ୍ୟ ନିଜର ମନର ଅନେକ ଗୁପ୍ତକଥା କହିଥିବା ଦେଖିବାକୁ ମିଳିଥିଲା ।
ହୀରାକୁଦରୁ ଛଡ଼ାଗଲା ଚଳିତ ବର୍ଷର ପ୍ରଥମ ବନ୍ୟାଜଳ
ସମ୍ବଲପୁର: ଖୋଲିଲା ହୀରାକୁଦ ଗେଟ୍। ଜଳଭଣ୍ଡାରରୁ ଛଡ଼ାଗଲା ବର୍ଷର ପ୍ରଥମ ବନ୍ୟାଜଳ। ପୂଜାର୍ଚ୍ଚନା ପରେ ପ୍ରଥମେ ୭ ନମ୍ବର ଗେଟ୍ ଖୋଲାଯାଇଛି। ପର୍ଯ୍ୟାୟକ୍ରମେ ୧୨ଟି ଗେଟ୍ ଖୋଲାଯିବ। ବର୍ତ୍ତମାନ ହୀରାକୁଦ ଜଳଭଣ୍ଡାରର ଜଳସ୍ତର ୬୦୯.୬ ଫୁଟ୍ ରହିଛି । ଜଳଭଣ୍ଡାରକୁ ପ୍ରତି ସେକେଣ୍ଡରେ ୧ଲକ୍ଷ ୨୨ ହଜାର ୯୦୬ କ୍ୟୁସେକ ଜଳ ପ୍ରବେଶ କରୁଥିବା ବେଳେ, ୨ ଲକ୍ଷ କ୍ୟୁସେକ ଜଳ ନିଷ୍କାସିତ ହେଉଛି । ବନ୍ୟାଜଳ ବୃଦ୍ଧି ପାଉଥିବାରୁ ହୀରାକୁଦରୁ ପାଣି ଛାଡ଼ିବାକୁ ନିଷ୍ପତ୍ତି ହୋଇଛି । ଏଥିପାଇଁ ତଳିଆ ଅଞ୍ଚଳର ଲୋକଙ୍କୁ ସତର୍କ କରାଯାଇଛି । ମହାନଦୀକୁ ନଯିବା ପାଇଁ ଆଲର୍ଟ କରାଯାଇଛି। ଅନ୍ୟପଟେ ବର୍ଷର ପ୍ରଥମ ବନ୍ୟାଜଳ ଖୋଲି ଥିବାରୁ ପର୍ଯ୍ୟଟକଙ୍କ ଭିଡ଼ ବଢ଼ିବାରେ ଲାଗିଛି। ସେହିପରି ମହାନଦୀ ତଟବର୍ତ୍ତୀ ୧୩ଟି ଜିଲ୍ଲାର ଜିଲ୍ଲାପାଳ ଓ ଏସପିଙ୍କୁ ମଧ୍ୟ ସତର୍କ କରାଯାଇଛି।
ନିଜର ପ୍ରେମ ସମ୍ପର୍କକୁ ନେଇ ଏମିତି କହିଲେ କପିଲ୍ ଶର୍ମା
ନନ୍ଦିଘୋଷ ବ୍ୟୁରୋ: ଆଜିକାଲି ଦ ଗ୍ରେଟ୍ ଇଣ୍ଡିଆ କପିଲ ଶର୍ମା ଶୋ’ ବେଶ ଚର୍ଚ୍ଚାରେ ରହିଛି । ନୂଆ ସିଜିନରେ ବେଶ ମଜା ହେଉଥିବା ମଧ୍ୟ ଦେଖିବାକୁ ମିଳିଛି । ତେବେ କପିଲ ଶର୍ମାଙ୍କ ଶୋ’ରେ ଯୋଗ ଦେଇଥିଲେ ଟିମ ଇଣ୍ଡିଆର ସ୍ପିନର ଚହଲ । ତେବେ ସେ ନିଜର ପ୍ରେମ ସମ୍ପର୍କକୁ ନେଇ ଏହି ଶୋ’ରେ ମୁହଁ ଖୋଲିଛନ୍ତି । ଟିମ ଇଣ୍ଡିଆର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର, ଋଷଭ ପନ୍ତ, ଚହଲ ଏବଂ ଅଭିଶେକ ଶର୍ମା ଏହି ଶୋ’କୁ ଆସିଥିଲେ । ଯେଉଁଥିରେ ତାଙ୍କ ଆର ଜେ ମହଭାସଙ୍କୁ ପ୍ରଶ୍ନ କରାଯାଇଥିବାବେଳେ ଚହଲ କିଛି କହି ନଥିଲେ । ଲାଜ କରିବା ସହ ଚହଲ କିଛି ଏଭଳି କଥା କହି ଦେଇଥିଲେ । ତଥାପି ତାଙ୍କୁ ନେଇ କୃଷ୍ଣା ମଜା କରୁଥିବା ଦେଖିବାକୁ ମିଳିଛି । ଯାହାର ଏକ ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ସେପଟେ କହି ରଖୁଛୁ କି, ଧନଶ୍ରୀଙ୍କ ସହ ଚହଲଙ୍କ ଛାଡ଼ପତ୍ର ହେବା ପରେ ଆରଜେ ମହଭାସଙ୍କ ସହ ଚହଲଙ୍କ ନାମ ଯୋଡ଼ା ଯାଇଛି । ଆଇପିଏଲ ସମୟରେ ଏକଥାକୁ ନେଇ ଅଧିକ ଚର୍ଚ୍ଚ ହୋଇଥିବାବେଳେ ଚହଲ ଏହାକୁ ନେଇ କୌଣସି ପ୍ରତିକ୍ରିୟା ରଖିନାହାନ୍ତି । କପିଲ ଶର୍ମାଙ୍କ ନୂଆ ସିଜିନର ତୃତୀୟ ଏପିସୋଡ ଭାରତୀୟ ଟିମର ସଦସ୍ୟମାନେ ଯୋଗ ଦେଇଥିବାବେଳେ ଏହାକୁ ନେଇ ବେଶ ମଜା କରାଯାଇଥିବା ଦେଖିବାକୁ ମିଳିଥିଲା ।
ଏଥର ବ୍ରିକ୍ସ ସମ୍ମିଳନୀରେ ଦେଖାଯିବେ ନାହିଁ ପୁଟିନ, ଜିନପିଙ୍ଗ, ଭାରତର କ୍ଷତି ନା ଲାଭ ଜାଣନ୍ତୁ
ନନ୍ଦିଘୋଷ ବ୍ୟୁରୋ: ରବିବାର ଠାରୁ ବ୍ରାଜିଲର ରିଓ ଡି ଜେନେରିଓରେ ବ୍ରିକ୍ସ ଶିଖର ସମ୍ମିଳନୀ ଆରମ୍ଭ ହେଉଛି। ଏଥର ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି । ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଏହି ବୈଠକରେ ଯୋଗ ଦେଉନାହାଁନ୍ତି। ଦଶ ବର୍ଷରୁ ଅଧିକ ସମୟ ଧରି ଶାସନରେ ଏହା ପ୍ରଥମ ଥର ଯେ ସି ବ୍ରିକ୍ସର ବାର୍ଷିକ ବୈଠକରୁ ଦୂରେଇ ଅଛନ୍ତି।
ଜିନପିଙ୍ଗଙ୍କ ଅନୁପସ୍ଥିତି ଏପରି ଏକ ସମୟରେ ଆସିଛି ଯେତେବେଳେ ୨୦୨୪ ପରେ ୧୦ ସଦସ୍ୟ ବିଶିଷ୍ଟ ଏକ ଗୋଷ୍ଠୀ, ବ୍ରିକ୍ସ ଆମେରିକା ସହିତ ବୃଦ୍ଧି ପାଉଥିବା ବାଣିଜ୍ୟ ଉତ୍ତେଜନା ଏବଂ ବିଶ୍ୱ ଆର୍ଥିକ ଅନିଶ୍ଚିତତାର ସମ୍ମୁଖୀନ ହେଉଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଅନେକ ଦେଶ ଉପରେ ଲାଗୁ କରାଯାଇଥିବା ଶୁଳ୍କ ୯ ଜୁଲାଇରେ ଶେଷ ହେଉଛି, ଯାହା ଏହି ଦେଶଗୁଡ଼ିକ ଉପରେ ଏକ ସାଧାରଣ ରଣନୀତି ପ୍ରସ୍ତୁତ କରିବା ପାଇଁ ଚାପ ସୃଷ୍ଟି କରୁଛି। ଏଥର ସି ଜିନପିଙ୍ଗଙ୍କ ବଦଳରେ ଚୀନର ପ୍ରଧାନମନ୍ତ୍ରୀ ଲି କ୍ୱିଆଙ୍ଗ ବ୍ରିକ୍ସରେ ଚୀନର ପ୍ରତିନିଧିତ୍ୱ କରୁଛନ୍ତି।
୨୦୦୯ ମସିହାରେ ବ୍ରାଜିଲ, ରୁଷ, ଭାରତ ଏବଂ ଚୀନର ଏକ ଆର୍ଥିକ ସହଯୋଗ ଗୋଷ୍ଠୀ ଭାବରେ ବ୍ରିକ୍ସ ଆରମ୍ଭ ହୋଇଥିଲା, ଯାହାର ଗୋଟିଏ ବର୍ଷ ପରେ ଦକ୍ଷିଣ ଆଫ୍ରିକା ଏଥିରେ ଯୋଗ ଦେଇଥିଲା। ୨୦୨୪ ମସିହାରେ ଏଥିରେ ମିଶର, ୟୁଏଇ, ଇଥିଓପିଆ, ଇଣ୍ଡୋନେସିଆ ଏବଂ ଇରାନ ମଧ୍ୟ ସାମିଲ ହୋଇଥିଲେ। ବର୍ତ୍ତମାନ ଏହି ଗୋଷ୍ଠୀ ବିଶ୍ୱ ଶକ୍ତି ସନ୍ତୁଳନରେ ପରିବର୍ତ୍ତନ ଆଣିବାକୁ ଚେଷ୍ଟା କରୁଛି, ବିଶେଷକରି ପାଶ୍ଚାତ୍ୟ ଦେଶଗୁଡ଼ିକର ପ୍ରଭାବକୁ ସନ୍ତୁଳିତ କରିବା ପାଇଁ ଏହା କାମ କରୁଛି।
ଭାରତ ଏଥର ବ୍ରିକ୍ସ ଶିଖର ସମ୍ମିଳନୀର କେନ୍ଦ୍ରବିନ୍ଦୁ ହେବାକୁ ଯାଉଛି। ଚୀନ୍ ଏବଂ ରୁଷର ନେତାଙ୍କ ଅନୁପସ୍ଥିତିରେ, ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମୁଖ୍ୟ ଭୂମିକା ପାଇବାର ସମ୍ଭାବନା ରହିଛି। ମୋଦି ବ୍ରାଜିଲ ରାଷ୍ଟ୍ରପତି ଲୁଇଜ୍ ଇନାସିୟ ଲୁଲା ଡା ସିଲଭାଙ୍କ ସହିତ ମଧ୍ୟ ଦ୍ୱିପାକ୍ଷିକ ବୈଠକ କରିବେ। ଦକ୍ଷିଣ ଆଫ୍ରିକାର ରାଷ୍ଟ୍ରପତି ସିରିଲ୍ ରାମାଫୋସା ମଧ୍ୟ ସମ୍ମିଳନୀରେ ଉପସ୍ଥିତ ରହିବେ। ପ୍ରଧାନମନ୍ତ୍ରୀ ମୋଦୀଙ୍କ ସମ୍ମାନାର୍ଥେ ବ୍ରାଜିଲ ଏକ ରାଜ୍ୟ ଗସ୍ତର ମଧ୍ୟ ଆୟୋଜନ କରିଛି, ଯାହା ୮-୯ ଜୁଲାଇରେ ବ୍ରାସିଲିଆରେ ହେବ।
ପଥରରେ ଛେଚି ଗାନ୍ଧିମୂର୍ତ୍ତି ଭାଙ୍ଗିଦେଲେ ଦୁର୍ବୃତ୍ତ
ନବରଙ୍ଗପୁର: ନବରଙ୍ଗପୁର ଗାନ୍ଧିମୂର୍ତ୍ତି ଭାଙ୍ଗିଦେଲେ ଦୁର୍ବୃତ୍ତ। ଗାନ୍ଧୀ ନଗର ଠାରେ ଥିବା ଗାନ୍ଧୀ ମୂର୍ତ୍ତିକୁ ଭାଙ୍ଗି ଦେଇଛନ୍ତି। ପ୍ରତିମୂର୍ତ୍ତିକୁ ପଥର ଛେଚି ଭାଙ୍ଗି ଦେଇଛନ୍ତି। ୧୭ ନମ୍ବର ୱାର୍ଡ ଗାନ୍ଧୀ ନଗର ଅଞ୍ଚଳର ଏ ଘଟଣା। ଜଣେ ଯୁବକ ନିଶାଶକ୍ତ ଅବସ୍ଥାରେ ଗୋଟିଏ ପରେ ଗୋଟିଏ ପଥର ମାରି ଗାନ୍ଧୀଙ୍କ ପ୍ରତିମୂର୍ତ୍ତି ଭାଙ୍ଗି ଦେଇଥିଲା। ପାଖରେ ଥିବା ଅନ୍ୟ ଲୋକ ବାରଣ କରିବାକୁ ତାଙ୍କୁ ପଥର ଧରି ଗୋଡ଼ାଇଥିଲା। ପୋଲିସ ପହଂଚି ଯୁବକଙ୍କୁ କାବୁ କରି ଥାନାରେ ଅଟକ ରଖିଥିବା ଜଣାପଡିଛି। ଗାନ୍ଧିନଗର ଅଞ୍ଚଳରେ ନିୟମିତ ପୋଲିସ ପାଟ୍ରୋଲିଂ କରାଯିବା ସହ ଦୁର୍ବୃତ୍ତକୁ କଠୋର ଦଣ୍ଡ ଦେବାକୁ ସାଧାରଣରେ ଦାବି ହୋଇଛି। ତୁରନ୍ତ ନୂତନ ପ୍ରତିମୂର୍ତ୍ତି ସ୍ଥାପନ ନ କରାଯିବା ପର୍ଯ୍ୟନ୍ତ ଅନ୍ନ ଜଳ ସ୍ପର୍ଶ କରିବି ନାହିଁ ବୋଲି କହି ପ୍ରତିମୂର୍ତ୍ତି ତଳେ ଅନଶନରେ ବସିଥିଲେ ଶହୀଦ ସ୍ମୃତି ସସଂଦ ସଭାପତି ମନୋରଞ୍ଜନ ତ୍ରିପାଠୀ। ଘଟଣାକୁ ବିଭିନ୍ନ ମହଲରେ ତୀବ୍ର ନିନ୍ଦା କରାଯାଇଛି।…
ଆଜି ହୀରାକୁଦରୁ ଛଡ଼ାଯିବ ଏ ବର୍ଷର ପ୍ରଥମ ବନ୍ୟା ଜଳ
ସମ୍ବଲପୁର: ଆଜି ହୀରାକୁଦରୁ ଛଡ଼ାଯିବ ଏ ବର୍ଷର ପ୍ରଥମ ବନ୍ୟା ଜଳ। ସକାଳ ୧୦ଟା ପରେ ଯେ କୌଣସି ସମୟରେ ପାଣି ଛଡ଼ାଯିବ। ଏଥିପାଇଁ ପ୍ରସ୍ତୁତି ଶେଷ ହୋଇଛି। ଉପରମୁଣ୍ଡରେ ବର୍ଷା ଲାଗି ରହିଛି। ତେଣୁ ବଢୁଛି ହୀରାକୁଦ ଜଳଭଣ୍ଡାରର ଜଳସ୍ତର। ଶେଷ ଖବର ସୁଦ୍ଧା ଜଳସ୍ତର ୬୦୮.୦୬ ଫୁଟ୍ ଥିବା ବେଳେ ପ୍ରତି ସେକେଣ୍ଡରେ ଜଳ ଭଣ୍ଡାର ଭିତରକୁ ପ୍ରବେଶ କରୁଛି ୧ ଲକ୍ଷ ୪୦ ହଜାର ୨୨୯ ଘନଫୁଟ ପାଣି। ବିଭିନ୍ନ କେନାଲ ଦେଇ ନିଷ୍କାସିତ ହେଉଛି ୩୭ ହଜାର ୩୬୫ ଘନଫୁଟ ବନ୍ୟା ଜଳ। ପାଣି ବୃଦ୍ଧି ପାଉଥିବାରୁ ହୀରାକୁଦରୁ ପାଣି ଛାଡ଼ିବାକୁ ନିଷ୍ପତ୍ତି ହୋଇଛି। ଏଥିପାଇଁ ତଳି ଅଞ୍ଚଳର ଲୋକଙ୍କୁ ସତର୍କ କରାଯାଇଛି। ମହାନଦୀକୁ ନ ଯିବା ପାଇଁ ଆଲର୍ଟ କରାଯାଇଛି।
ଆଜି ମହଣ ମହଣ ସୁନାରେ ଝଲସିବେ ଶ୍ରୀଜିଉ
ନନ୍ଦିଘୋଷ ବ୍ୟୁରୋ: ଆଜି ସୁନାବେଶ । ମହଣ ମହଣ ସୁନାରେ ଝଲସିବେ ଶ୍ରୀଜିଉ । ରଥ ଉପରେ ଅନୁଷ୍ଠିତ ହେବ ଚତୁର୍ଦ୍ଧା ବିଗ୍ରହଙ୍କ ସୁନାବେଶ । ମହାବାହୁଙ୍କ ଦୁର୍ଲଭ ବେଶ ଦର୍ଶନ କରି କୃତାର୍ଥ ହେବେ ଭକ୍ତ । ରଥ ଉପରେ ଏହି ବେଶ ଦର୍ଶନ କରିବାକୁ ଶ୍ରୀକ୍ଷେତ୍ରରେ ଲକ୍ଷାଧିକ ଭକ୍ତଙ୍କ ଭିଡକୁ ନଜରରେ ରଖି ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଏଥିସହ ଶ୍ରୀଜଗନ୍ନାଥ ମନ୍ଦିର ଓ ବଡଦାଣ୍ଡ ଅଞ୍ଚଳକୁ ନୋ ଫ୍ଲାଇଙ୍ଗ ଜୋନ ଭାବେ ପୋଲିସ ପକ୍ଷରୁ ଘୋଷଣା କରାଯାଇଛି । ଆସନ୍ତା ୮ ତାରିଖ ପର୍ଯ୍ଯନ୍ତ ଏହି କଟକଣା ବଳବତ୍ତର ରହିବ ।
ବିଜୟଠାରୁ ୭ ଓ୍ବିକେଟ୍ ଦୂରରେ ଭାରତ, ଭାଙ୍ଗିବ ଏହି ରେକର୍ଡ
ନନ୍ଦିଘୋଷ ବ୍ୟୁରୋ: ଇଂଲଣ୍ଡରେ କମାଲ କରୁଛି ଭାରତ । ଗିଲ ବାହିନୀ ଦ୍ବିତୀୟ ଟେଷ୍ଟରେ ଦମଦାର ପ୍ରଦର୍ଶନ ଜାରି ରଖିଛି । ଇଂଲଣ୍ଡକୁ ଜିତିବା ପାଇଁ ଶେଷ ଦିନରେ ୫୩୬ ରନ ଆବଶ୍ୟକ ହେଉଥିବାବେଳେ ଭାରତକୁ ଜିତିବା ପାଇଁ ଆଉ ୭ ଓ୍ବିକେଟ ଆବଶ୍ୟକ ରହିଛି । ବର୍ମିଂହାମ୍ର ଏଜବାଷ୍ଟନ୍ରେ ଶନିବାର ସକାଳେ ଭାରତ ଦ୍ବିତୀୟ ପାଳିକୁ ପୁନଃ ଆରମ୍ଭ କରିବା ପରେ ପ୍ରଥମ ଘଣ୍ଟାକ ଖେଳରେ କଠୋର ପରୀକ୍ଷାର ସମ୍ମୁଖୀନ ହୋଇଥିଲା। ମେଘୁଆ ପାଗରୁ ଫାଇଦା ଉଠାଇ ଇଂଲିସ୍ ବୋଲର ବି ଚାପ ଜାରି ରଖିଥିଲେ। କେଏଲ୍ ରାହୁଲ୍ ଅସୀମ ଧୈର୍ଯ୍ୟ ଦେଖାଇ ଅର୍ଦ୍ଧଶତକ ହାସଲ କରିଥିଲେ। କରୁଣ ନାୟାର କିନ୍ତୁ ଏକାଧିକ ବାଉଁସରକୁ ମୁଣ୍ଡ ଓ ଦେହରେ ସହିବା ପରେ ବି ୨୬ ରନ୍ରୁ ଆଗକୁ ବଢ଼ିପାରିନଥିଲେ।
ଏହି ସମୟରେ କିନ୍ତୁ ଅଧିନାୟକ ଶୁବମନ ଗିଲ୍ (୧୬୧ ରନ୍, ୧୬୧ ବଲ୍, ୧୩ ଚୌକା, ୮ ଛକା) ଏବଂ ଉପଅଧିନାୟକ ଋଷଭ ପନ୍ତ୍ (୬୫ ରନ୍, ୫୮ ବଲ୍, ୮ ଚୌକା, ୩ ଛକ) ୧୧୦ ରନ୍ର ଦ୍ରୁତ ଭାଗୀଦାରି କରି ଇଂଲଣ୍ଡ ବୋଲରଙ୍କୁ ସୁଯୋଗ ଦେଇନଥିଲେ। ପନ୍ତ୍ଙ୍କୁ ପୁଣି ସୋଏବ ବଶିର ବଶିଭୁତ କରିଦେଇଥିଲେ। କିନ୍ତୁ ପ୍ରଥମ ପାଳି ଭଳି ରବୀନ୍ଦ୍ର ଜାଡ଼େଜା (୬୯* ରନ୍, ୧୧୮ ବଲ୍, ୫ ଚୌକା, ୧ ଛକା)ଙ୍କୁ ସାଥୀ କରି ଗିଲ୍ ପୁଣି ଏକ ଶତକୀୟ ଭାଗୀଦାରି (୧୭୫ ରନ୍) କରିବାରୁ ଇଂଲଣ୍ଡକୁ ଭାରତ ମ୍ୟାଚ୍ରୁ ଆପାତତଃ ସମ୍ପୂର୍ଣ୍ଣ ବିଦାୟ ରାସ୍ତା ଦେଖାଇଦେଇଛି। ଭାରତ ନିଜ ଦ୍ବିତୀୟ ପାଳିକୁ ୪୨୭/୬ରେ ଘୋଷଣା କରିବାରୁ ଘରୋଇ ଦଳ ସମ୍ମୁଖରେ ଅସମ୍ଭବ ବିଜୟ ଲକ୍ଷ୍ୟ ରହିଛି। ବାଜବଲ୍ ଷ୍ଟାଇଲ୍ରେ ଖେଳୁଥିବା ଏହି ଦଳ ଏବେ ଅଗ୍ନିପରୀକ୍ଷାରେ ପଡ଼ିଛି।
ପୁରୀ ଅନ୍ତର୍ଜାତୀୟ ବିମାନ ବନ୍ଦର ପାଇଁ ପରିବେଶ ମଞ୍ଜୁରୀ କେନ୍ଦ୍ର ସ୍ଥଗିତ ରଖିବାକୁ ନେଇ ତେଜିଲା ବିବାଦ
ନନ୍ଦିଘୋଷ ବ୍ୟୁରୋ: ପୁରୀ ଅନ୍ତର୍ଜାତୀୟ ବିମାନ ବନ୍ଦର ପାଇଁ କେନ୍ଦ୍ର ସରକାର ପରିବେଶ ମଂଜୁରୀକୁ ସ୍ଥଗିତ ରଖିବା ପରେ ଅନିଶ୍ଚିତତାରେ ଏହି ଏୟାରପୋର୍ଟ । ବିମାନ ବନ୍ଦର ହେବ କି ନାହିଁ, ତାକୁ ନେଇ ସନ୍ଦେହ ଦେଖା ଗଲାଣି । ଏହା ପରେ ବିଜେପି ସରକାରକୁ କଡ଼ା ସମାଲୋଚନା କରିଛି ବିଜେଡି । ଏପରିକି ପୁରୀରେ ବିମାନବନ୍ଦର ନକଲେ, ଶ୍ରୀଜଗନ୍ନାଥ ସଂସ୍କୃତିର ଉନ୍ନତି ନ କଲେ, ସରକାରଙ୍କ ପତନ ହେବ ବୋଲି ଚେତାଇ ଦିଆଯାଇଛି ଦଳ । ପ୍ରସଙ୍ଗରେ କଂଗ୍ରେସ ମଧ୍ୟ କଡ଼ା ଭର୍ତ୍ସନା କରିଛି ।
ପୁରୀ ବିମାନ ବନ୍ଦର ନିର୍ମାଣ ପାଇଁ ଦରକାର ହେଉଥିବା ମଂଜୁରୀ ସ୍ଥଗିତ ହେବା ପରେ ତେଜିଲା ରାଜନୀତି । କେନ୍ଦ୍ର କାହିଁକି ବାଧକ ସାଜିଛି ବୋଲି ପ୍ରଶ୍ନ ଉଠାଇଛନ୍ତି ବିରୋଧୀ । ବିଜେଡି ବିଧାୟକ ଦିବ୍ୟଶଙ୍କର ମିଶ୍ରଙ୍କ କହିଛନ୍ତି, ପୁରୀରେ ବିମାନବନ୍ଦର ହେବା ଅତ୍ୟନ୍ତ ଜରୁରୀ । ପୁରୀରେ ଅନ୍ତର୍ଜାତୀୟ ବିମାନବନ୍ଦର ହେଲେ ସାରା ବିଶ୍ୱରୁ ଲୋକେ ସିଧା ପୁରୀରେ ପହଂଚିବେ । ଓଡି଼ଶା ସଂପର୍କରେ ସାରା ବିଶ୍ଵର ଲୋକେ ସହଜରେ ଜାଣିବେ । ପୁରୀ ଏୟାରପୋର୍ଟ ନିର୍ମାଣରେ ଯାହା ଅସୁବିଧା ଆସୁ, ସେ ଜଙ୍ଗଲ ଜମି ହେଉ କି ଆଉ କେଉଁ ଅସୁବିଧା ହେଉ ପୁରୀରେ ବିମାନ ବନ୍ଦର ନିର୍ମାଣ ପାଇଁ କେନ୍ଦ୍ରକୁ ବାଧ୍ୟ କରିବୁ । ପୁରୀରେ ବିମାନ ବନ୍ଦର ହେଲେ ଅସୁବିଧା ହେବ ବୋଲି ଯେଉଁମାନେ ଭାବୁଛନ୍ତି, ସେମାନେ ଜାଣି ରଖନ୍ତୁ, ଅନେକ ଅନ୍ତର୍ଜାତୀୟ ବିମାନ ବନ୍ଦର ସମୁଦ୍ର କୂଳରେ ହୋଇଛି, ଆଉ କିଛି ସମୁଦ୍ର ଭିତରେ ନିର୍ମିତ ହୋଇଛି । କେନ୍ଦ୍ର ଯଦି ପୁରୀରେ ବିମାନବନ୍ଦର ନ କରିବ, ଶ୍ରୀଜଗନ୍ନାଥ ସଂସ୍କୃତିର ଉନ୍ନତି ନ କରିବ, ତେବେ ଏହି ସରକାରର ପତନ ହେବ ବୋଲି ଚେତାଇ ଦେଇଛନ୍ତି ଦିବ୍ୟଶଙ୍କର ।
ସେପଟେ ପିସିସି ସଭାପତି କହିଛନ୍ତି, ବିଜେପିର ଡବଲ ଇଞ୍ଜିନ ସରକାର ଓଡ଼ିଶାକୁ ଡବଲ ଧୋକା । ସବୁ କ୍ଷେତ୍ରରେ ଓଡ଼ିଶାକୁ ଲୁଟିଛନ୍ତି । ସେପଟେ ସରକାରୀ ଦଳ ଉପ ମୁଖ୍ୟ ସଚେତକ ଗୋବିନ୍ଦ ଦାସ କହିଛନ୍ତି ପୁରୀରେ ଏୟାରପୋର୍ଟ ହେବ । କେନ୍ଦ୍ର ସରକାରଙ୍କ ନିକଟରେ ନିଶ୍ଚିତ ଭାବରେ ଦାବି ରଖିବୁ । ଯାହା ବାଧକ ଅଛି ତାକୁ ଦୂର କରିବା ପାଇଁ କେନ୍ଦ୍ର ସହିତ ଆଲୋଚନା କରିବେ ରାଜ୍ୟ ସରକାର ।
ପୁରୀ ବିମାନ ବନ୍ଦର ପାଇଁ ଜଙ୍ଗଲ ଜମି ଦରକାର ହେଉଥିବା ବେଳେ ଏ ସଂପର୍କିତ ମଞ୍ଜୁରୀକୁ ସ୍ଥଗିତ ରଖିଛି କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରାଳୟ । ଅଲିଭ୍ ରିଡଲେ କଇଁଛ, ପ୍ରବାସୀ ପକ୍ଷୀମାନଙ୍କ ସୁରକ୍ଷା ନେଇ ଚିନ୍ତା ପ୍ରକାଶ କରାଯାଇଛି ।
ପରିବେଶ ମନ୍ତ୍ରାଳୟର ଜଙ୍ଗଲ ପରାମର୍ଶଦାତା କମିଟି (FAC) ପୁରୀର ପ୍ରସ୍ତାବିତ ଅନ୍ତର୍ଜାତୀୟ ବିମାନବନ୍ଦର ପାଇଁ ମଞ୍ଜୁରୀକୁ ସ୍ଥଗିତ ରଖିଛି । ଅଲିଭ୍ ରିଡଲେ କଇଁଛ, ଇରାବତୀ ଡଲଫିନ୍, ପ୍ରବାସୀ ପକ୍ଷୀଙ୍କ ପ୍ରତି ସମ୍ଭାବ୍ୟ କ୍ଷତି, ଉପକୂଳକୁ ବାତ୍ୟାରୁ ସୁରକ୍ଷା ଦେଉଥିବା ୧୩ ହଜାର ଗଛ କାଟିବାକୁ ପଡ଼ିବ । ବଡ଼ ପ୍ରକଳ୍ପ ପାଇଁ ଜଙ୍ଗଲ ଜମି ଖୋଜୁଥିବା ପ୍ରସ୍ତାବଗୁଡ଼ିକର ଯାଞ୍ଚ କରୁଥିବା FAC, ଓଡ଼ିଶା ସରକାରଙ୍କୁ ସତର୍କତାମୂଳକ ପଦକ୍ଷେପ ଗ୍ରହଣ କରିବାକୁ ଏବଂ ଏହି ମାମଲାକୁ ଡବ୍ଲ୍ୟୁଆଇଆଇକୁ ପଠାଇବାକୁ ଅନୁରୋଧ କରିଛନ୍ତି ।
ଅବସରର ଦୁଇଦିନ ପରେ ପୁନଃ ନିଯୁକ୍ତି: ବିରୋଧୀରେ ଥିବା ବେଳେ ଗୋଟିଏ କଥା, ସରକାରକୁ ଆସି ବଦଳି ଗଲା ସ୍ବର
ନନ୍ଦିଘୋଷ ବ୍ୟୁରୋ: ସରକାରଙ୍କ କଥା ଓ କାମରେ ଅନେକ ଫରକ । ବିରୋଧି ଦଳରେ ଥିବା ବେଳେ ଅବସର ନିଯୁକ୍ତିକୁ ବିରୋଧ କରୁଥିଲେ । କ୍ଷମତାକୁ ଆସିବା ପରେ ଏହା ନୀତିରେ ପରିଣତ ହୋଇଗଲାଣି । ଏପରିକି ଅବସର ପରେ ନିଯୁକ୍ତିକୁ ନେଇ ସରକାର କରିଥିବା ଗାଇଡ଼ଲାଇନ ମଧ୍ୟ ପାଳନ ହେଉନାହିଁ । ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ପଦରେ ଅବସର ନେବାର ଦୁଇଦିନ ପରେ ପୁନଃ-ନିଯୁକ୍ତିକୁ ନେଇ ନୂଆ ବିବାଦ ଆରମ୍ଭ ହୋଇଛି । ଏହି ପ୍ରସଙ୍ଗରେ ସରକାରଙ୍କୁ ଘେରିଛି ଇଞ୍ଜିନିୟରିଂ ସେବା ସଂଘ । ସର୍ବୋଚ୍ଚ ଯନ୍ତ୍ରୀ ପାହ୍ୟା ଅଧିକାରୀ ଥିବା ବେଳେ କେଉଁ କାରଣରୁ ଏବଂ କାହା ସ୍ବାର୍ଥରେ ଏଭଳି ନିଯୁକ୍ତି ହୋଇଛି ତାକୁ ନେଇ ପ୍ରଶ୍ନ ଉଠିଛି ।
ଅବସରପ୍ରାପ୍ତ ଅଧିକାରୀଙ୍କୁ ପୁଣି ଥରେ ନିଯୁକ୍ତି ଦେଉଛନ୍ତି ସରକାର । ଖୋଦ ସରକାରୀ ବିଭାଗ ମାନୁନି ସରକାରଙ୍କ ନିୟମ । ଯାହା ବିରୋଧରେ ଦୁର୍ନୀତି ଅଭିଯୋଗ ଅଛି । ଯିଏ ଭିଜିଲାନ୍ସ ସ୍କାନରରେ । ସେଭଳିଆ ଅଧିକାରୀକୁ କିପରି ଅବସର ପରେ ଦିଆଗଲା ପୁନଃ-ନିଯୁକ୍ତି ? ଏ ନେଇ ଉଠିଛି ପ୍ରଶ୍ନ । ଏଭଳି ଅବସ୍ଥା ଦେଖିବାକୁ ମିଳିଛି ଖୋଦ ମୁଖ୍ୟମନ୍ତ୍ରୀଙ୍କ ଅଧୀନରେ ଥିବା ଜଳ ସମ୍ପଦ ବିଭାଗରେ । ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଚନ୍ଦ୍ରଶେଖର ପାଢ଼ୀଙ୍କ ପୁନଃ-ନିଯୁକ୍ତିକୁ ନେଇ ଆରମ୍ଭ ହୋଇଛି ନୂଆ ବିବାଦ । ମୁଖ୍ୟମନ୍ତ୍ରୀଙ୍କୁ ଖୋଲି ଚିଠି ଲେଖି ଅଭିଯୋଗ କରିଛି ଇଞ୍ଜିନିୟରିଂ ସେବା ସଂଘ । ଜୁନ୍ ୩୦ ତାରିଖରେ ସର୍ବୋଚ୍ଚ ଯନ୍ତ୍ରୀ ପଦରୁ ଅବସର ନେଲେ ଚନ୍ଦ୍ରଶେଖର ପାଢ଼ୀ । ନିୟମିତ ପଦବୀରେ ପୁନଃ ନିଯୁକ୍ତି ପାଇଁ କଟକଣା ଥିବା ସତ୍ତ୍ବେ ଅବସର ପରେ ଗତ ୩ ତାରିଖରେ ପାଢୀଙ୍କୁ ୬ ମାସ ପାଇଁ ମିଳିଛି ଓଏସଡି ସହିତ ଇଆଇସି ଦାୟିତ୍ବ । ଏଭଳି ଥଇଥାନ ଦ୍ବାରା ଗତ ସେପ୍ଟେମ୍ବରରେ ଅବସରପ୍ରାପ୍ତଙ୍କୁ ପୁନଃ ନିଯୁକ୍ତି ନେଇ ସରକାର ନିଜେ କରିଥିବ ନିୟମର ଉଲଂଘନ ହୋଇଥିବା ଅଭିଯୋଗ ହୋଇଛି । ନିଜ କାର୍ଯ୍ୟକାଳ ମଧ୍ୟରେ କିଛି ଆଖିଦୃଶିଆ କାମ କରିନାହାନ୍ତି ଇଆଇସି ଚନ୍ଦ୍ର ଶେଖର ପାଢ଼ୀ । ଓଲଟି ଅନେକ ଦୁର୍ନୀତି ଅଭିଯୋଗରେ ଛନ୍ଦି ହୋଇଛନ୍ତି । ଅବସର ପରେ ଅଧିକାରୀଙ୍କୁ ନିଯୁକ୍ତ କରି ଯୋଗ୍ୟ ଅଧିକାରୀଙ୍କୁ ବଞ୍ଚିତ କରାଯାଇଛି । ଏହା ଭୁଲ୍ ପରମ୍ପରା ବୋଲି ଇଞ୍ଜିନିୟରିଂ ସଂଘ ଅଭିଯୋଗ କରିଛି ।
ବିରୋଧୀ ଦଳରେ ଥିବା ବେଳେ ଅବସର ପୁନଃ-ନିଯୁକ୍ତିକୁ ଜୋରଦାର ବିରୋଧ କରୁଥିଲା ବିଜେପି । ଏବେ ସରକାରକୁ ଆସିବା ପରେ ନୀତିରେ ପରିଣତ କରି ସାରିଲେଣି ସରକାର । ଅବସରପ୍ରାପ୍ତ ଅଧିକାରୀଙ୍କୁ ନିଯୁକ୍ତ ପାଇଁ ସରକାର ଗତ ସେପ୍ଟେମ୍ବର ମାସରେ ବିସ୍ତୃତ ଗାଇଡ଼ଲାଇନ କରିଥିଲେ । ଯେଉଁଥିରେ ଅବସରଙ୍କୁ ଥଇଥାନର ଆବଶ୍ୟକତା, ଯୋଗ୍ୟତା, ମାନଦଣ୍ଡ ବାବଦରେ କୁହାଯିବା ସହ ସ୍ବଚ୍ଛ ଟ୍ରାକ ରେକର୍ଡ଼ ଉପରେ ଗୁରୁତ୍ବ ଦିଆଯାଇଥିଲା । ହେଲେ ଚନ୍ଦ୍ରଶେଖର ପାଢୀଙ୍କ ନିଯୁକ୍ତିରେ ଗାଇଡ଼ଲାଇନ ପାଳନ ହୋଇ ନଥିବା ଅଭିଯୋଗ ହୋଇଛି । ଯାହା ବିରୋଧରେ ଦୁର୍ନୀତି ଅଭିଯୋଗ ଅଛି ତାକୁ କିପରି ଆଉଟ ଷ୍ଟାଣ୍ଡିଂ ରିମାର୍କ ଦେଇ ପୁନଃ ନିଯୁକ୍ତି ଦିଆଗଲା । ତାକୁ ନେଇ ପ୍ରଶ୍ନ ଉଠାଇଛନ୍ତି ବିଶେଷଜ୍ଞ ।
ସରକାରଙ୍କ ନିୟମ ଗୋଟେ ପଟେ । କାର୍ଯ୍ୟକାରିତା ଆଉ ଗୋଟେ ଦିଗରେ । ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ପଦରେ ଅବସରଙ୍କୁ ନିଯୁକ୍ତି ବାଧ୍ୟବାଧକତା ନା ସ୍ବାର୍ଥ ସାଧନ ? ଯାହାକୁ ନେଇ ଏବେ ସବୁ ମହଲରେ ଚର୍ଚ୍ଚା ।