spot_img

Latest Posts

ଅଭିନେତା ହେବାକୁ ନଥିଲା ଇଚ୍ଛା, ଭାଗ୍ୟ ବନାଇଦେଲା ଷ୍ଟାର!

ନନ୍ଦିଘୋଷ ବ୍ୟୁରୋ: ବଲିଉଡ଼ର ଚକଲେଟ୍ ବୟ ଆଦିତ୍ୟ ରୟ କପୁର। ନିଜ ଅଭିନୟ ଓ ଷ୍ଟାଇଲ୍‌ରେ ଲକ୍ଷ ଲକ୍ଷ ଫିମେଲ ଫ୍ୟାନ୍ସଙ୍କ ହୃଦୟରେ ରାଜ କରୁଛନ୍ତି ଏହି ଅଭିନେତା । ହେଲେ କ’ଣ ଆପଣ ଜାଣନ୍ତି, ଆଦିତ୍ୟ କେବେ ହିରୋ ହେବାକୁ ସ୍ୱପ୍ନ ଦେଖିନଥିଲେ। ହେଲେ ମା’ଙ୍କ ଗୋଟିଏ ନିଷ୍ପତ୍ତି ବଦଳାଇ ଦେଇଥିଲା ଆଦିତ୍ୟଙ୍କ ଜୀବନର ମୋଡ଼ । ଆଉ ‘ଆଶିକୀ-୨’ ଦେଇଥିଲା ନୂଆ ପରିଚୟ। ଆଜି ଅର୍ଥାତ୍ ନଭେମ୍ବର ୧୬ରେ ନିଜର ୪୧ତମ ଜନ୍ମଦିନ ପାଳନ କରୁଛନ୍ତି ଆଦିତ୍ୟ। ତାଙ୍କ ଜନ୍ମଦିନରେ ଆସନ୍ତୁ ଜାଣିବା ତାଙ୍କ ଜୀବନର କିଛି ଅଜଣା କଥା…..

୧୯୮୫ ମସିହା ନଭେମ୍ବର ୧୬ ତାରିଖରେ ମୁମ୍ବାଇରେ ଜନ୍ମ ନେଇଥିଲେ ଆଦିତ୍ୟ ରୟ କପୁର। ବାପା କୁମୁଦ ରୟ କପୁର ଓ ମା’ ସଲୋମି ଆରୋନ୍। ଫିଲ୍ମ ଇଣ୍ଡଷ୍ଟ୍ରି ସହ ଜଡ଼ିତ ପରିବାରରେ ଜନ୍ମ ହୋଇଥିଲେ ମଧ୍ୟ ଅଭିନୟ ପ୍ରତି ତାଙ୍କର ବିଶେଷ ଆଗ୍ରହ ନଥିଲା। ବଡ଼ ଭାଇ ସିଦ୍ଧାର୍ଥ ରୟ କପୁର ବଲିଉଡ଼ର ଜଣେ ଜଣାଶୁଣା ଫିଲ୍ମ ପ୍ରଯୋଜକ ହୋଇଥିବା ବେଳେ ଭାଇ କୁନାଲ ରୟ କପୁର ମଧ୍ୟ ଜଣେ ଅଭିନେତା। ହେଲେ ଆଦିତ୍ୟଙ୍କ ମନ ଥିଲା କ୍ରିକେଟ୍ ପଡ଼ିଆରେ। ଅଭିନେତା ନୁହେଁ, ଜଣେ କ୍ରିକେଟ୍ ର ହେବାର ସ୍ୱପ୍ନ ଦେଖୁଥିଲେ ସେ। ୨୦୨୪ରେ କରୀନା କପୁର ଖାନଙ୍କ ଚାଟ୍ ଶୋ ‘What Women Want’ରେ ଏହି କଥା ଖୁଲାସା କରିଥିଲେ ଆଦିତ୍ୟ। ସେ କହିଥିଲେ, ଲାଇମଲାଇଟ୍ ଦୁନିଆକୁ ଆସିବାକୁ ତାଙ୍କର ଆଦୌ ଇଚ୍ଛା ନଥିଲା। କ୍ରିକେଟ୍ ହିଁ ଥିଲା ତାଙ୍କର ପ୍ରଥମ ପସନ୍ଦ। କେବଳ ସେତିକି ନୁହେଁ, ୨୦୨୧ରେ ‘Cosmopolitan India’କୁ ଦେଇଥିବା ଏକ ସାକ୍ଷାତକାରରେ କ୍ରିକେଟ୍‌କୁ ନେଇ ମଜାଳିଆ ଅନ୍ଦାଜରେ ସେ କହିଥିଲେ, ସେ ଭଲ କ୍ରିକେଟ୍ ଖେଳନ୍ତି ବୋଲି ଯେଉଁ ପ୍ରଚାର ହୋଇଥିଲା, ତାହା ସେ ନିଜେ ହିଁ କରିଥିଲେ।

ଯେତେବେଳେ ତାଙ୍କ ମାଆ ତାଙ୍କୁ ଚ୍ୟାନେଲ (V) ପାଇଁ ଅଡିସନ୍ ଦେବାକୁ କହିଥିଲେ ସେତେବେଳେ ଆଦିତ୍ୟଙ୍କ ଜୀବନ ନୂଆ ମୋଡ଼ ନେଇଥିଲା। ଏକ ସାକ୍ଷାତକାରରେ, ସେ କହିଥିଲେ ଅଡିସନ୍ ପାଇଁ ସେ ଟ୍ରେନ୍ ରେ ଯିବାକୁ ଚାହୁଁ ନଥିଲେ। ମାଆଙ୍କ ପ୍ରେତ୍ସାହନରେ ସେ ଅଡ଼ିସନ୍ ଦେଇ ସେଥିରେ ସିଲେକ୍ଟ ମଧ୍ୟ ହୋଇଥିଲେ।  ସେ ପ୍ରାୟ ଚାରି ବର୍ଷ ଧରି ଏକ ଶୋ’ରେ ହୋଷ୍ଟ ଭାବେ କାମ କରିଥିଲେ । ୨୦୦୯ରେ, ‘ଲଣ୍ଡନ ଡ୍ରିମ୍ସ’ରୁ ବଲିଉଡରେ ଡେବ୍ୟୁ କରିଥିବା ଆଦିତ୍ୟ । ୨୦୧୩ରେ ରିଲିଜ ହୋଇଥିବା ମୋହିତ ସୁରିଙ୍କ ଫିଲ୍ମ ‘ଆଶିକୀ-୨’ ତାଙ୍କ ଭାଗ୍ୟ ବଦଳାଇ ଦେଇଥିଲା। ଶ୍ରଦ୍ଧା କପୁରଙ୍କ ସହ ତାଙ୍କ ଯୋଡି ବେଶ ଚର୍ଚ୍ଚା ସାଉଁଟି ଥିଲା । ଫିଲ୍ମରେ ରାହୁଲ ଜୟକର ଭୂମିକା ତାଙ୍କୁ ଘରେ ଘରେ ପରିଚିତ କରିଥିଲା।

କ୍ରିକେଟ୍ ପଡ଼ିଆରେ କ୍ୟାରିୟର ଗଢ଼ିବାର ସ୍ୱପ୍ନ ଦେଖୁଥିବା ଆଦିତ୍ୟ ଆଜି ବଲିଉଡ୍‌ର ଜଣେ ଚର୍ଚ୍ଚିତ ଚେହେରା। ଆଉ ‘ଆଶିକୀ-୨’ରୁ ମିଳିଥିବା ସଫଳତା ତାଙ୍କୁ ଦେଇଥିଲା ଭିନ୍ନ ଏକ ପରିଚୟ। ଆଦିତ୍ୟ ରୟ କପୁରଙ୍କୁ ଜନ୍ମଦିନର ଅନେକ ଅନେକ ଶୁଭେଚ୍ଛା।

Latest Posts

Don't Miss