ଭଦ୍ରକ : ଆତଙ୍କବାଦର ପେଣ୍ଠସ୍ଥଳୀ ପାକିସ୍ତାନକୁ ତୁର୍କୀର ଖୋଲା ସମର୍ଥନକୁ ନେଇ ସାରା ଭାରତରେ ବଏକଟ ତୁର୍କୀ ଟ୍ରେଣ୍ଡ କରୁଥିବା ବେଳେ ଏହାର ପ୍ରଭାବ ଭଦ୍ରକରେ ମଧ୍ୟ ଦେଖିବାକୁ ମିଳିଛି । ବିଶେଷ କରି ଭଦ୍ରକ ସହରର ଫଳ ଓ ଡ୍ରାଇଫୁଡ ମାର୍କେଟରେ ବଏକଟ ତୁର୍କୀର ପ୍ରଭାବ ଦେଖିବାକୁ ମିଳିଛି । ସହରରେ ଥିବା ଫଳ ବ୍ୟବସାୟୀମାନେ ତୁର୍କୀରୁ ଆମଦାନୀ ଫଳ ଉପରେ ରୋକ ଲଗାଇଛନ୍ତି । ତୁର୍କୀର ଭୂମିକମ୍ପ ସମୟରେ ଭାରତ ଯେଉଁଭଳି ସାହାଯ୍ୟ କରିଥିଲା ତାହା ସାରା ବିଶ୍ୱକୁ ଜଣାଅଛି । ମାତ୍ର ସେ ସବୁକୁ ଭୁଲି ଭାରତ ପାକିସ୍ତାନ ଯୁଦ୍ଧରେ ପାକିସ୍ତାନକୁ ଖୋଲା ସମର୍ଥନ ଜଣାଇଛି ତୁର୍କୀ । ଯାହାକୁ ଭଦ୍ରକର ବ୍ୟବସାୟୀମାନେ ବିରୋଧ କରିବା ସହିତ ତୁର୍କୀରୁ ଆମଦାନୀ ସେଓ ଓ କେତେକ ଡ୍ରାଇଫୁଡ ଉପରେ ରୋକ ଲଗାଇଛନ୍ତି । କେବଳ ବ୍ୟବସାୟୀ ନୁହଁନ୍ତି ଗ୍ରାହକ ମାନଙ୍କ ମଧ୍ୟରେ ମଧ୍ୟ ତୁର୍କୀ ବିରୋଧ ଆଭାସ ଦେଖିବାକୁ ମିଳିଛି । ବର୍ତ୍ତମାନର ପରିସ୍ଥିତିରେ ସମସ୍ତ ତୁର୍କୀ ସାମଗ୍ରୀ ବଏକଟ କରିବାକୁ ଗ୍ରାହକଙ୍କ ମଧ୍ୟରେ ଆକ୍ରୋଶ ଦେଖିବାକୁ ମିଳିଛି।
ଜଙ୍ଗଲରେ ଯୁବକଙ୍କୁ ହତ୍ୟା ଘଟଣାର ପର୍ଦ୍ଦାଫାସ କଲା ପୋଲିସ
ତାଳଚେର : ଗତ ମେ’ ୫ ତାରିଖରେ ତାଳଚେର ଥାନା ଅନ୍ତର୍ଗତ ଶିବରାମପୁର ରାସ୍ତା ନିକଟ ଜଙ୍ଗଲରେ ଯୁବକଙ୍କୁ ହତ୍ୟା ଘଟଣାର ପର୍ଦ୍ଦାଫାସ କରିଛି ତାଳଚେର ପୋଲିସ । ପ୍ରେମ ବ୍ୟାପାର ସହ ପୂର୍ବ ଶତ୍ରୁତାକୁ କେନ୍ଦ୍ର କରି ଯୁବକଙ୍କୁ ଅପହରଣ ପରେ ହତ୍ୟା କରିଥିଲା । ଅପହରଣ କରି ରଖିଥିବା ଜଙ୍ଗଲ ଓ ହତ୍ୟାକାଣ୍ଡ ସ୍ଥାନରେ ପୋଲିସ ଓ ଡଗ ସ୍ୱାର୍ଡ ସହ ଅଭିଯୁକ୍ତକୁ ନେଇ ସିନ ରିକ୍ରିଏସନ କରିଛି ପୋଲିସ । ହତ୍ୟା ପରେ ଦୁର୍ଘଟଣାର ରୂପ ଦେଇଥିଲେ ହତ୍ୟାକାରୀ । ଏହି ଘଟଣାର ମୁଖ୍ୟ ଅଭିଯୁକ୍ତ ଆନନ୍ଦ ନାୟକଙ୍କୁ ପୋଲିସ ଗିରଫ କରିଥିବା ବେଳେ ଘଟଣାରେ ଆଉ କିଛି ଅଭିଯୁକ୍ତ ସମ୍ପୃକ୍ତ ଥିବା ପୋଲିସ ଜାଣିବାକୁ ପାଇଛି । ତାଳଚେର ଦେଉଳବେଡ଼ା ଅଞ୍ଚଳର ବିଶ୍ୱଜିତ ନାଏକ ଘରୁ ନିଖୋଜ ହୋଇଥିବା ବେଳେ ୯ ଦିନ ପରେ ବିଶ୍ୱଜିତଙ୍କର ଗଳିତ ମୃତଦେହ ସହ ଘଟଣାସ୍ଥଳରୁ ତାର ସ୍କୁଟିକୁ ପୋଲିସ ଉଦ୍ଧାର କରିଥିଲା । ଘଟଣାର ଅଧିକ ତଦନ୍ତ ଜାରି ରଖିଛି ତାଳଚେର ପୋଲିସ ।
ରାଜ୍ୟପାଳ ଓ ରାଷ୍ଟ୍ରପତିଙ୍କ ପାଇଁ ସମୟସୀମା ସ୍ଥିର କରିବା ପ୍ରସଙ୍ଗ, ସୁପ୍ରିମକୋର୍ଟଙ୍କୁ ୧୪ଟି ପ୍ରଶ୍ନ ପଚାରିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ
ନୂଆଦିଲ୍ଲୀ : ରାଷ୍ଟ୍ରପତି ଓ ରାଜ୍ୟପାଳଙ୍କ କ୍ଷମତା ନେଇ ବିତର୍କର ଅବସାନ ଘଟି ନଥିବାବେଳେ ରାଷ୍ଟ୍ରପତି ଏନେଇ ଉଠାଇଛନ୍ତି ୧୪ ପ୍ରଶ୍ନ। ଜଷ୍ଟିସ ବି.ଆର. ଗବାଇ ସିଜେଆଇ ଭାବେ ଦାୟିତ୍ବ ନେବା ପରେ ଏବେ ଏସବୁ ପ୍ରଶ୍ନ ନେଇ ତାଙ୍କର ଭୂମିକା କ’ଣ ରହିବ ତାହା ଉପରେ ସମସ୍ତଙ୍କ ନଜର ରହିଛି। ବିଭିନ୍ନ ବିଲକୁ ସ୍ବୀକୃତି ପ୍ରସଙ୍ଗରେ ରାଷ୍ଟ୍ରପତି ଓ ରାଜ୍ୟପାଳଙ୍କ ଟାଇମଲାଇନ ସୁପ୍ରିମକୋର୍ଟ ନିର୍ଦ୍ଧାରଣ କରିବା ପ୍ରସଙ୍ଗରେ ସୃଷ୍ଟି ହୋଇଥିଲା ବିବାଦ। ପ୍ରଧାନବିଚାରପତି ଭାବେ ଜଷ୍ଟିସ ଗବାଇ ଦାୟିତ୍ବ ନେବାର ଦିନକ ପୂର୍ବରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୁପ୍ରିମକୋର୍ଟଙ୍କ ପ୍ରସଙ୍ଗରେ ଉଠାଇଥିଲେ ୧୪ଟି ପ୍ରଶ୍ନ। ସେଗୁଡିକ ହେଲା- ସମ୍ବିଧାନର ଧାରା ୨୦୦ ଅନୁସାରେ ଏକ ବିଲ ରାଜ୍ୟପାଳଙ୍କ ନିକଟକୁ ଯିବା ପରେ ତାଙ୍କ ନିକଟରେ କଣ ରହିଛି ସାମ୍ବିଧାନିକ ବିକଳ୍ପ। ବିଲକୁ ମଞ୍ଜୁରୀ କ୍ଷେତ୍ରରେ ଜଣେ ରାଜ୍ୟପାଳ ମନ୍ତ୍ରିମଣ୍ଡଳର ପରାମର୍ଶକୁ ମାନିବା ବାଧ୍ୟତାମୂଳକ କି? ଧାରା ୨୦୦ ଅନୁସାରେ ରାଜ୍ୟପାଳଙ୍କୁ ପ୍ରଦତ୍ତ ସାମ୍ବିଧାନିକ କ୍ଷମତା ଯଥାର୍ଥ କି। ଜଣେ ରାଜ୍ୟପାଳଙ୍କ କାର୍ଯ୍ୟଧାରାର ବିଚାର ବିଭାଗୀୟ ସମୀକ୍ଷା ନ ହେବା ଲାଗି ସମ୍ବିଧାନର ଧାରା ୩୬୧ ଅନୁସାରେ ରହିଥିବା ବ୍ୟବସ୍ଥା ଯଥାର୍ଥ କି। ସମୟ ସୀମା ନେଇ ସାମ୍ବିଧାନିକ ବ୍ୟବସ୍ଥା ନଥିବାବେଳେ ସମୟ ସୀମା ନିର୍ଦ୍ଧାରଣ ବ୍ୟବସ୍ଥା ଲାଗୁ କରାଯାଇପାରିବ କି। ସମ୍ବିଧାନର ଧାରା ୨୦୧ ଅନୁସାରେ ରାଷ୍ଟ୍ରପତିଙ୍କୁ ପ୍ରଦତ୍ତ ସାମ୍ବିଧାନିକ ଅଧିକାର ଯଥାର୍ଥ କି। ବିଚାର ବିଭାଗୀୟ ନିର୍ଦ୍ଦେଶ ଜରିଆରେ ସମୟସୀମା ନିର୍ଦ୍ଧାରଣ କରାଯାଇପାରିବ କି ଇତ୍ୟାଦି। ଗତ ମାସରେ ଉପରାଷ୍ଟ୍ରପତି ଜଗଦୀପ ଧନଖଡ ସୁପ୍ରିମକୋର୍ଟଙ୍କ କ୍ଷମତା ଉପରେ ପ୍ରଶ୍ନ ଉଠାଇଥିବାବେଳେ କିଛି ରାଜନେତା ବି ସୁପ୍ରିମକୋର୍ଟଙ୍କ କ୍ଷମତା ନେଇ ପ୍ରଶ୍ନ ଉଠାଇଥିଲେ। ତାମିଲନାଡୁ ସରକାର ବିନା ରାଜ୍ୟପାଳଙ୍କ ସମ୍ମତିରେ ୧୦ଟି ବିଲ୍ ଗୃହୀତ କରିବା ପରେ ଆରମ୍ଭ ହୋଇଥିଲା ବିତର୍କର ଝଡ। ଗତ ଏପ୍ରିଲ ୧୨ରେ ବିଲ୍ ପ୍ରସଙ୍ଗରେ ସୁପ୍ରିମକୋର୍ଟ କହିଥିଲେ- ରାଜ୍ୟପାଳ ପଠାଇଥିବା ବିଲ୍ ଉପର ରାଷ୍ଟ୍ରପତି ୩ ମାସ ମଧ୍ୟରେ ନିଜର ନିଷ୍ପତ୍ତି ନେବେ। ଏହା ସହ ଖଣ୍ଡପୀଠ କହିଥିଲେ- ଧାରା ୨୦୧ ଅନୁସାରେ ରାଷ୍ଟ୍ରପତିଙ୍କ କ୍ଷମତା ବିଚାର ବିଭାଗୀୟ ସମୀକ୍ଷା ପରିସରଭୁକ୍ତ।
ଓବିସି, ଏସଇବିସିଙ୍କୁ ସଂରକ୍ଷଣ ପ୍ରସଙ୍ଗ, କ୍ୟାବିନେଟର ନିଷ୍ପତ୍ତିକୁ ଶ୍ରୀକାନ୍ତଙ୍କ ସମାଲୋଚନା
ଭୁବନେଶ୍ବର ; ଓବିସି, ଏସଇବିସିଙ୍କ ପାଇଁ କ୍ୟାବିନେଟ୍ ବୈଠକରେ ନିଆଯାଇଥିବା ନିଷ୍ପତ୍ତିକୁ ଘୋର ନିନ୍ଦା କରିଛନ୍ତି କଂଗ୍ରେସର ବରିଷ୍ଠ ନେତା ତଥା ପୂର୍ବତନ ପିସିସି ସଭାପତି ଶ୍ରୀକାନ୍ତ ଜେନା । ଏହି ନିଷ୍ପତ୍ତି ନିଷ୍ଠୁର ଓ ଏକ ପରିହାସ ବୋଲି ସେ କହିଛନ୍ତି । ଏହା କେବଳ ଉଚ୍ଚଶିକ୍ଷା ବିଭାଗରେ ଦିଆଯାଇଛି । ମେଡିକାଲ୍, ଇଞ୍ଜିନିୟର ଓ ଅନ୍ୟାନ୍ୟ ବୃତ୍ତିଗତ ଶିକ୍ଷାନୁଷ୍ଠାନରେ ଏହାକୁ ଲାଗୁ କରିବାକୁ ଦାବି କରାଯାଇଥିଲା । ତେଣୁ ଚଳିତ ଶିକ୍ଷା ବର୍ଷ ଆରମ୍ଭ ପୂର୍ବରୁ ଏହି ନିଷ୍ପତ୍ତି ବଦଳାଯାଉ । କେବଳ ଉଚ୍ଚଶିକ୍ଷା ବିଭାଗରେ ନୁହେଁ ମେଡିକାଲ, ଇଞ୍ଜିନିୟରିଂ ଓ ବୃତ୍ତିଗତ ଶିକ୍ଷାରେ ୨୭% ଓବିସି ଛାତ୍ରଛାତ୍ରୀଙ୍କ ପାଇଁ ସଂରକ୍ଷଣ କରାଯାଉ। ସେହିପରି ନିଯୁକ୍ତି କ୍ଷେତ୍ରରେ ମଧ୍ୟ ୨୭% ସଂରକ୍ଷଣ କରାଯାଉ ବୋଲି ଦାବି କରିଛନ୍ତି ଶ୍ରୀକାନ୍ତ । ଗତକାଲି ସାମାଜିକ ଓ ଅର୍ଥନୈତିକ ପଛୁଆ ବର୍ଗର ଛାତ୍ରଛାତ୍ରୀଙ୍କ ପାଇଁ ନାମଲେଖାରେ ୧୧.୨୫ ପ୍ରତିଶତ ସଂରକ୍ଷଣ ଦେବାକୁ ରାଜ୍ୟ କ୍ୟାବିନେଟ ନିଷ୍ପତ୍ତି ନେଇଛି । ଏହି ସଂରକ୍ଷଣ ନୀତି ଚଳିତ ଶିକ୍ଷା ବର୍ଷରୁ ରାଜ୍ୟର ସବୁ ସରକାରୀ ବିଶ୍ବବିଦ୍ୟାଳୟ, ସରକାରୀ ଓ ଅନୁଦାନପ୍ରାପ୍ତ ଉଚ୍ଚ ଶିକ୍ଷାନୁଷ୍ଠାନରେ ଲାଗୁ କରାଯିବ । ଏହା ସହିତ ଉଚ୍ଚଶିକ୍ଷାରେ ଅନୁସୂଚିତ ଜନଜାତି ବର୍ଗର ଛାତ୍ରଛାତ୍ରୀଙ୍କ ଲାଗି ୨୨.୫ ପ୍ରତିଶତ, ଅନୁସୂଚିତ ଜାତି ବର୍ଗର ଛାତ୍ରଛାତ୍ରୀଙ୍କ ପାଇଁ ୧୬.୨୫ ପ୍ରତିଶତ, ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ଲାଗି ୫ ପ୍ରତିଶତ ଓ ପୂର୍ବତନ ସେନାନୀଙ୍କ ପରିବାର ସଦସ୍ୟଙ୍କ ଲାଗି ୧ ପ୍ରତିଶତ ସଂରକ୍ଷଣ ପୂର୍ବ ପରି ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ କହିଥିଲେ ।
ବିଜେପି ମନ୍ତ୍ରୀ ବିଜୟ ଶାହଙ୍କ ଉପରେ ବର୍ଷିଲେ ସୁପ୍ରିମକୋର୍ଟ
ନନ୍ଦିଘୋଷ ବ୍ୟୁରୋ : ଆର୍ମି ଅଫିସର କର୍ଣ୍ଣେଲ ସୋଫିଆ କ୍ୟୁରେସିଙ୍କ ସମ୍ପର୍କରେ ଅରୁଚିକର ଟିପ୍ପଣୀ ପ୍ରସଙ୍ଗ। ମଧ୍ୟପ୍ରଦେଶ ବିଜେପି ମନ୍ତ୍ରୀ କୁନୱାର ବିଜୟ ଶାହଙ୍କ ଉପରେ ବର୍ଷିଛନ୍ତି ସୁପ୍ରିମକୋର୍ଟ। ଏହାସହ ଏଫଆଇଆର ରୁଜୁ ଲାଗି ମଧ୍ୟପ୍ରଦେଶ ହାଇକୋର୍ଟଙ୍କ ନିଷ୍ପତ୍ତିରେ ହସ୍ତକ୍ଷେପ କରିବେ ନାହିଁ ବୋଲି କହିଛନ୍ତି ସୁପ୍ରିମକୋର୍ଟ। ସିଜେଆଇ ଜଷ୍ଟିସ ବି.ଆର.ଗବାଇଙ୍କ ନେତୃତ୍ବରେ ଗଠିତ ଖଣ୍ଡପୀଠ କହିଛନ୍ତି- ସାମ୍ବିଧାନିକ ପଦବିରେ ଥିବା ଜଣେ ବ୍ୟକ୍ତି ଦାୟିତ୍ବସମ୍ପନ୍ନ ହେବା ଉଚିତ। ଏହି ବିବୃତି ଜଣେ ମନ୍ତ୍ରୀଙ୍କ କ୍ଷେତ୍ରରେ ଉପଯୁକ୍ତ ନୁହେଁ। ଆସନ୍ତା କାଲି ଏହି ମାମଲାର ଶୁଣାଣି ହେବ।
କର୍ଣ୍ଣେଲ ସୋଫିଆ କ୍ୟୁରେସିଙ୍କ ବିରୋଧରେ ଆଦିବାସୀ ବ୍ୟାପାର ମନ୍ତ୍ରୀ କୁନୱାର ବିଜୟ ଦେଇଥିଲେ ବୟାନ। ଅପରେସନ ସିନ୍ଦୂର ସମ୍ପର୍କରେ ପ୍ରେସ ବ୍ରିଫିଂ ସୋଫିଆ କରିଥିବାବେଳେ ତାଙ୍କୁ ଟାର୍ଗେଟ କରିଥିଲେ ମନ୍ତ୍ରୀ। ଏହି ପ୍ରସଙ୍ଗରେ ମଧ୍ୟପ୍ରଦେଶ ହାଇକୋର୍ଟ ନିଜ ଆଡୁ କରିଥିଲେ ମାମଲା ରୁଜୁ। କର୍ଣ୍ଣେଲ ସୋଫିଆ ଜଣେ ଆତଙ୍କୀଙ୍କ ଭଉଣୀ ବୋଲି କହିଥିଲେ ବିଜୟ। ରାମକୁଣ୍ଡ ଗ୍ରାମରେ ଆୟୋଜିତ ଏକ ସଭାରେ ବିଜୟ ଏହି ବିବାଦୀୟ ବୟାନ ଦେଇଥିଲେ। ବିଜୟଙ୍କ ଏହି ବୟାନକୁ ବିଭିନ୍ନ ଦଳ ପକ୍ଷରୁ ସମାଲୋଚନା କରାଯାଇଥିଲା। ସେ ଏହି ବୟାନ ନେଇ କ୍ଷମା ପ୍ରାର୍ଥନା କରିଥିଲେ।
ମହିଳା ଡ୍ୟାନ୍ସରଙ୍କ ସହ ନେତାଙ୍କ ଭିଡିଓ ହେଲା ଭାଇରାଲ
ନନ୍ଦିଘୋଷ ବ୍ୟୁରୋ : ସୋସିଆଲ ମିଡିଆରେ ଭାଇରାଲ ହେଉଥିବା ଏକ ଭିଡିଓକୁ ନେଇ ଉତ୍ତରପ୍ରଦେଶରେ ଚର୍ଚ୍ଚା ଜୋର ଧରିଛି । ଭିଡିଓରେ ଦେଖାଯାଉଥିବା ଜଣେ ବିଜେପି ନେତା ଅର୍କ୍ରେଷ୍ଠା ଗର୍ଲ ସହ ଅଶ୍ଳୀଳ କାର୍ଯ୍ୟ କରୁଥିବାର ନଜର ଆସିଛନ୍ତି । ଭାଇରଲ ଭିଡିଓକୁ ନେଇ ବିଜେପି ନେତା ଜଣଙ୍କ ତାଙ୍କୁ ବଦନାମ କରିବାକୁ ଷଡଯନ୍ତ୍ର କରାଯାଉଥିବା କହିଛନ୍ତି । ଏଥିପାଇଁ ସେ ନିଜ ଦଳର ନେତାଙ୍କୁ ଦାୟୀ କରିଛନ୍ତି । ବିରୋଧୀ ଦଳ ମଧ୍ୟ ଶାସକ ଦଳକୁ ଟାର୍ଗେଟ କରିଛନ୍ତି ।
ସମାଜବାଦୀ ପାର୍ଟି ନେତା ଏବଂ ଏସପି ରାଜ୍ୟ ଉପସଭାପତି ପଙ୍କଜ ରାଜଭରଙ୍କ ଦ୍ୱାରା ସୋସିଆଲ ମିଡିଆରେ ସେୟାର କରାଯାଇଥିବା ଏହି ଭିଡିଓରେ, ଉତ୍ତର ପ୍ରଦେଶର ବାଲିଆ ଜିଲ୍ଲାର ରାସରା ଆସନରୁ ପୂର୍ବତନ ବିଜେପି ବିଧାନସଭା ପ୍ରାର୍ଥୀ ବବର ସିଂହ ରଘୁବଂଶୀ ଜଣେ ମହିଳାଙ୍କ ସହ ଆପତ୍ତିଜନକ ଅବସ୍ଥାରେ ଦେଖାଯାଇଛନ୍ତି। ଭିଡିଓରୁ ଜଣାପଡୁଛି ଏହା ସାର୍ବଜନିନ କାର୍ଯ୍ୟକ୍ରମ ଥିଲା । ଏହି ସମୟରେ ଅନେକ ଲୋକ ଉପସ୍ଥିତ ଥିଲେ ।
ଭାଇରାଲ ଭିଡିଓରେ, ଜଣେ ମହିଳା ବବନ ସିଂହ ରଘୁବଂଶୀଙ୍କ କୋଳରେ ବସିଥିବାର ଦେଖାଯାଉଛି, ଯେଉଁ ସମୟରେ ସେ ତାଙ୍କୁ ସ୍ପର୍ଶ କରିବା ସହ ଚୁମ୍ବନ ମଧ୍ୟ ଦେଉଛନ୍ତି। ସେଠାରେ ଉପସ୍ଥିତ ଲୋକମାନେ ମଧ୍ୟ ସେମାନଙ୍କୁ ଦେଖୁଛନ୍ତି। ବବନ ସିଂହ ତାଙ୍କ ଅଞ୍ଚଳର ଜଣେ ଧନୀ ବ୍ୟକ୍ତି ଓ ସେ ରାସରା ଚିନି କଳର ଅଧ୍ୟକ୍ଷ ମଧ୍ୟ।
ଭିଡିଓକୁ ନେଇ ବିରୋଧୀ ନେତାମାନଙ୍କ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ପଙ୍କଜ ରାଜଭର ସୋସିଆଲ ମିଡିଆ ପ୍ଲାଟଫର୍ମରେ ଭିଡିଓ କ୍ଲିପ୍ ପୋଷ୍ଟ କରି ବିଜେପି ନେତାଙ୍କ ଉପରେ ଅଭିଯୋଗ ଆଣିଛନ୍ତି । ସେ କହିଛନ୍ତି, ଖୋଲାଖୋଲି ଭାବରେ ଜଣେ ମହିଳାଙ୍କୁ ସେ ତାଙ୍କ ଉପରେ ବସାଇ ନାଚାଉଛନ୍ତି। ବିଜେପି ନେତାଙ୍କ ଚରିତ୍ର ଦେଖନ୍ତୁ। ଯେଉଁମାନେ ଦିନରାତି ନୀତି ଓ ସଂସ୍କୃତି ଉପରେ ବକ୍ତୃତା ଦିଅନ୍ତି, ବାସ୍ତବରେ ଏହା ସେମାନଙ୍କର ପ୍ରକୃତ ଚେହେରା। ସମାଜ ଏପରି କପଟୀ ଓ ଦୁଇମୁଖୀ ଲୋକଙ୍କ ଠାରୁ ସତର୍କ ରହିବା ଉଚିତ।
କଂଗ୍ରେସ ନେତା ସୁରେନ୍ଦ୍ର ରାଜପୁତ ମଧ୍ୟ ଏହି ଘଟଣାକୁ ନିନ୍ଦା କରିଛନ୍ତି ଓ ଏହାକୁ ଅତ୍ୟନ୍ତ ଲଜ୍ଜାଜନକ ବୋଲି କହିଛନ୍ତି। ସେ ଏହି କାର୍ଯ୍ୟକୁ ମହିଳାଙ୍କ ସମ୍ମାନ ଉପରେ ବିଜେପିର ସାର୍ବଜନୀନ ଦୃଷ୍ଟିକୋଣଠାରୁ ଭିନ୍ନ ବୋଲି ବର୍ଣ୍ଣନା କରିଥିଲେ। କିନ୍ତୁ ପରେ ସେ ଏହି ପୋଷ୍ଟକୁ ଡିଲିଟ କରିଦେଇଥିଲେ।
ଅନ୍ୟପକ୍ଷରେ, ଭିଡିଓଟି ଭାଇରାଲ ହେବା ପରେ, ୧୯୯୩ ମସିହାର ୟୁପି ବିଧାନସଭା ନିର୍ବାଚନ ଲଢ଼ିଥିବା ଓ ବର୍ତ୍ତମାନ ରାସରା ଚିନି କଳର ଅଧ୍ୟକ୍ଷ ଥିବା ବବନ ସିଂହ ଗଣମାଧ୍ୟମକୁ କହିଛନ୍ତି, ଭାଇରାଲ ଭିଡିଓଟି ବିହାରର ଏକ ବିବାହ ଉତ୍ସବ ସମୟରେ ରେକର୍ଡ କରାଯାଇଥିଲା। ସେ ୨୦୨୨ ମସିହାରେ ମଧ୍ୟ ବିଧାନସଭା ନିର୍ବାଚନ ଲଢ଼ିଥିଲେ।
ସେ ଏହା ମଧ୍ୟ ଅଭିଯୋଗ କରିଛନ୍ତି ଯେ ସ୍ଥାନୀୟ ବିଧାୟକ କେତକି ସିଂହ ଓ ତାଙ୍କ ସ୍ୱାମୀ ତାଙ୍କୁ ବଦନାମ କରିବା ପାଇଁ ଭିଡିଓଟି ଭାଇରାଲ କରିଛନ୍ତି। ସେ ହିଁ ଏହି ଭିଡିଓଟି ତିଆରି କରିଛନ୍ତି। କେତକି ସିଂହ ବିଜେପିର ଜଣେ ବିଧାୟକ। ସେ ଏହା ମଧ୍ୟ କହିଛନ୍ତି ଯେ ଜିଲ୍ଲା ସଭାପତି ନିର୍ବାଚନକୁ ନେଇ ବିବାଦ ରହିଛି। ବବନ ସିଂହ ନିଜର ପକ୍ଷ ରଖି କହିଥିଲେ ଯେ ତାଙ୍କର ବୟସ ୭୦ ବର୍ଷ ଓ ସେ ଏପରି କାମ କରିବାକୁ ଅକ୍ଷମ। ସେ ଏହି ଭିଡିଓକୁ ନକଲି ବୋଲି କହିଛନ୍ତି। ସେ କହିଛନ୍ତି ଯେ ଏପରି ଭିଡିଓ କିଏ ତିଆରି କରିଛି ସେ ଜାଣିନାହାଁନ୍ତି।
ପାକିସ୍ତାନର କିରାନା ହିଲ୍ସରେ ଲିକ ହେଉଛି ପରମାଣୁ ରେଡିଏସନ ! ଜଣାପଡିଲା ସତ୍ୟ
ନନ୍ଦିଘୋଷ ବ୍ୟୁରୋ ; ପାକିସ୍ତାନର କୌଣସି ପରମାଣୁ ପ୍ରତିଷ୍ଠାନରୁ ରେଡିଲସନ ଲିକ ହୋଇ ନାହିଁ । ଆନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସି ପକ୍ଷରୁ ସ୍ପଷ୍ଟ କରାଯାଇଛି ଯେ ପରମାଣୁ ଲିକ୍ କଥାରେ କୌଣସି ସତ୍ୟତା ନାହିଁ। ଭାରତ ସହିତ ସାମରିକ ସଂଘର୍ଷ ବୃଦ୍ଧି ପାଇବା ପରେ ପାକିସ୍ତାନର କୌଣସି ପରମାଣୁ ପ୍ରତିଷ୍ଠାନରୁ କୌଣସି ବିକିରଣ ଲିକ୍ ହୋଇନାହିଁ ବୋଲି ବିଶ୍ୱ ପରମାଣୁ ପର୍ଯ୍ୟବେକ୍ଷକ IAEA କହିଛି।
ଭିଏନାସ୍ଥିତ ବିଶ୍ୱ ପରମାଣୁ ପର୍ଯ୍ୟବେକ୍ଷକଙ୍କୁ ଏକ ଗଣମାଧ୍ୟମ ପ୍ରଶ୍ନର ଉତ୍ତର ଭାରତୀୟ ବାୟୁସେନାର ପ୍ରଥମ ଉତ୍ତର ସହିତ ମେଳ ଖାଉଥିଲା। ପାକିସ୍ତାନର କିରାନା ହିଲ୍ସରେ ଭାରତ କୌଣସି ଟାର୍ଗେଟକୁ ଆକ୍ରମଣ କରିନାହିଁ, ଯେଉଁଠାରେ କିଛି ପରମାଣୁ ପ୍ରତିଷ୍ଠାନ ଅବସ୍ଥିତ ବୋଲି ରିପୋର୍ଟ କରାଯାଇଛି।
ଗଣମାଧ୍ୟମ ସହିତ କଥାବାର୍ତ୍ତା ସମୟରେ, IAEA ମୁଖପାତ୍ର କହିଛନ୍ତି ଯେ ଆପଣ ଯେଉଁ ରିପୋର୍ଟ ବିଷୟରେ କହୁଛନ୍ତି ତାହା ଆମେ ପୂର୍ବରୁ ଜାଣିଛୁ। ସେ କହିଛନ୍ତି ଯେ IAEA ପାଖରେ ଉପଲବ୍ଧ ସୂଚନା ଆଧାରରେ, ପାକିସ୍ତାନର କୌଣସି ପରମାଣୁ ପ୍ରତିଷ୍ଠାନରୁ କୌଣସି ବିକିରଣ ଲିକ୍ ହୋଇନାହିଁ। IAEA ୨୦୦୫ ମସିହାରେ IEC ପ୍ରତିଷ୍ଠା କରିଥିଲା। ଏହି କେନ୍ଦ୍ର ଦୁର୍ଘଟଣା, ଅବହେଳା କିମ୍ବା ଉଦ୍ଦେଶ୍ୟମୂଳକ କାରଣ ହେତୁ ଯେକୌଣସି ପରମାଣୁ କିମ୍ବା ବିକିରଣ ସମ୍ବନ୍ଧୀୟ ଘଟଣା କିମ୍ବା ଜରୁରୀକାଳୀନ ପରିସ୍ଥିତିରେ ବିଶ୍ୱର ଦେଶଗୁଡ଼ିକୁ ସହାୟତା ଓ ସମନ୍ୱୟ ପ୍ରଦାନ କରେ। ୧୩ ତାରିଖରେ ୱାଶିଂଟନ ଡିସିରେ ଆମେରିକାର ବୈଦେଶିକ ବିଭାଗର ଏକ ପ୍ରେସ ବ୍ରିଫିଂ ସମୟରେ, ପ୍ରମୁଖ ଉପ-ପ୍ରବକ୍ତା ଥମାସ ପିଗଟଙ୍କୁ ପଚରାଯାଇଥିଲା, ପାକିସ୍ତାନରେ ପରମାଣୁ ଲିକ୍ ରିପୋର୍ଟ ପରେ ଆମେରିକା ଇସଲାମାବାଦ କିମ୍ବା ପାକିସ୍ତାନକୁ କୌଣସି ଦଳ ପଠାଇଛି କି? ଏହା ଉପରେ ପିଗଟ୍ କହିଲେ ଯେ ଏହି ସମୟରେ ମୋର ଏ ବିଷୟରେ ପୂର୍ବରୁ କିଛି ପର୍ଯ୍ୟବେକ୍ଷଣ କରିବା ନାହିଁ। ଏହାର ଅର୍ଥ ସେ ଏହି ବିଷୟରେ କୌଣସି ସୂଚନା ଦେଇ ନାହାଁନ୍ତି। ଆମେରିକାରୁ କୌଣସି ସରକାରୀ ନିଶ୍ଚିତକରଣ କିମ୍ବା ସୂଚନା ନ ମିଳିବା ପରେ, IAEA ମଧ୍ୟ ସ୍ପଷ୍ଟ କରିଥିଲା ଯେ ପାକିସ୍ତାନର କୌଣସି ପରମାଣୁ ପ୍ରତିଷ୍ଠାନରୁ କୌଣସି ବିକିରଣ ଲିକ୍ ହୋଇନାହିଁ।
ପ୍ରେସ ବ୍ରିଫିଂରେ ଏକ ନିର୍ଦ୍ଦିଷ୍ଟ ପ୍ରଶ୍ନର ଉତ୍ତରରେ, ଏୟାର ମାର୍ଶାଲ ଭାରତୀ କହିଥିଲେ ଯେ କିରାନା ହିଲ୍ସରେ କିଛି ପରମାଣୁ ପ୍ରତିଷ୍ଠାନ ଅଛି ବୋଲି ଆମକୁ ଜଣାଇବା ପାଇଁ ଧନ୍ୟବାଦ। ଆମେ ଏହା ବିଷୟରେ ଜାଣି ନଥିଲୁ। ଆମେ କିରାନା ହିଲ୍ସ ଉପରେ ଆକ୍ରମଣ କରିନାହୁଁ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପରମାଣୁ ଯୁଦ୍ଧ ସମ୍ପର୍କରେ ଆକଳନ ବିଷୟରେ ପଚରାଯିବାରୁ, ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ସୋମବାର କହିଛନ୍ତି ଯେ ସାମରିକ କାର୍ଯ୍ୟାନୁଷ୍ଠାନ ସମ୍ପୂର୍ଣ୍ଣ ଭାବରେ ପାରମ୍ପରିକ କ୍ଷେତ୍ରରେ ଥିଲା। କିଛି ରିପୋର୍ଟ ଥିଲା ଯେ ପାକିସ୍ତାନର ନ୍ୟାସନାଲ କମାଣ୍ଡ ଅଥରିଟି ମେ ୧୦ ତାରିଖରେ ବୈଠକ କରିବେ। କିନ୍ତୁ ପରେ ସେ ଏହାକୁ ଅସ୍ୱୀକାର କରିଥିଲେ। ସେ କହିଛନ୍ତି ଯେ ପାକିସ୍ତାନର ବୈଦେଶିକ ମନ୍ତ୍ରୀ ନିଜେ ପରମାଣୁ ଦିଗକୁ ରେକର୍ଡରେ ଅସ୍ୱୀକାର କରିଛନ୍ତି।
ବିଜେପି ମନ୍ତ୍ରୀଙ୍କ ବିରୋଧରେ ପଞ୍ଜିକୃତ ହେଲା FIR, ସୁପ୍ରିମକୋର୍ଟ ଗଲେ ବିଜୟ
ନନ୍ଦିଘୋଷ ବ୍ୟୁରୋ : ବିଜେପି ମନ୍ତ୍ରୀ ବିଜୟ ଶାହଙ୍କ ପାଇଁ ଅଡୁଆ ବଢିବାରେ ଲାଗିଛି । କର୍ଣ୍ଣେଲ ସୋଫିଆ କ୍ୟୁରେସୀଙ୍କୁ ନେଇ ଆପତ୍ତିଜନକ ମନ୍ତବ୍ୟକୁ ନେଇ ହାଇକୋର୍ଟ ତାଙ୍କ ଉପରେ କାର୍ଯ୍ୟନୁଷ୍ଠାନ ନେଇଛନ୍ତି । ତାଙ୍କ ବିରୋଧରେ ଏଫଆଇଆର ମଧ୍ୟ ପଞ୍ଜିକୃତ କରାଯାଇଛି । ହାଇକୋର୍ଟଙ୍କ ଆଦେଶକୁ ଚ୍ୟାଲେଞ୍ଜ କରି ସେ ସୁପ୍ରିମକୋର୍ଟରେ ପହଞ୍ଚିଛନ୍ତି । ମଧ୍ୟପ୍ରଦେଶ ହାଇକୋର୍ଟଙ୍କ ଆଦେଶ ବିରୋଧରେ ସେ ସୁପ୍ରିମକୋର୍ଟରେ ଅପିଲ କରିଛନ୍ତି । ଏହା ସହିତ ଜଲଦି ଶୁଣାଣି କରିବାକୁ ସେ ନିବେଦନ କରିଛନ୍ତି ।
ତାଙ୍କ ବିରୋଧରେ ଏଫଆଇଆର ରୁଜୁ ଲାଗି ନିର୍ଦ୍ଦେଶ ଦେଇଥିଲେ ମଧ୍ୟପ୍ରଦେଶ ହାଇକୋର୍ଟ। ମନ୍ତ୍ରୀଙ୍କ ବିରୋଧରେ ବିଏନଏସର ୩ଟି ଅଲଗା ଅଲଗା ଧାରାରେ ଏଫଆଇଆର ପଞ୍ଜିକୃତ ହୋଇଛି ।
କର୍ଣ୍ଣେଲ ସୋଫିଆ କ୍ୟୁରେସିଙ୍କ ବିରୋଧରେ ଆଦିବାସୀ ବ୍ୟାପାର ମନ୍ତ୍ରୀ ବିଜୟ ଦେଇଥିଲେ ବୟାନ। ଅପରେସନ ସିନ୍ଦୂର ସମ୍ପର୍କରେ ପ୍ରେସ ବ୍ରିଫିଂ ସୋଫିଆ କରିଥିବାବେଳେ ତାଙ୍କୁ ଟାର୍ଗେଟ କରିଥିଲେ ମନ୍ତ୍ରୀ। ଏହି ପ୍ରସଙ୍ଗରେ ମଧ୍ୟପ୍ରଦେଶ ହାଇକୋର୍ଟ ନିଜ ଆଡୁ କରିଥିଲେ ମାମଲା ରୁଜୁ। କର୍ଣ୍ଣେଲ ସୋଫିଆ ଜଣେ ଆତଙ୍କୀଙ୍କ ଭଉଣୀ ବୋଲି କହିଥିଲେ ବିଜୟ । ରାମକୁଣ୍ଡ ଗ୍ରାମରେ ଆୟୋଜିତ ଏକ ସଭାରେ ବିଜୟ ଏହି ବିବାଦୀୟ ବୟାନ ଦେଇଥିଲେ। ବିଜୟଙ୍କ ଏହି ବୟାନକୁ ବିଭିନ୍ନ ଦଳ ପକ୍ଷରୁ ସମାଲୋଚନା କରାଯାଇଥିଲା। ସେ ଏହି ବୟାନ ନେଇ କ୍ଷମା ପ୍ରାର୍ଥନା କରିଥିଲେ।
ନନ୍ଦନକାନନରେ ଚିକିତ୍ସାଧୀନ ଅବସ୍ଥାରେ ସିଂହ ଆକାଶର ମୃତ୍ୟୁ
ମେଣ୍ଢାଶାଳ : ନନ୍ଦନକାନନରେ ଚିକିତ୍ସାଧୀନ ଅବସ୍ଥାରେ ସିଂହ ଆକାଶର ମୃତ୍ୟୁ l ବାର୍ଦ୍ଧକ୍ୟ ଜନିତ ରୋଗରେ ପୀଡ଼ିତ ଥିଲା । କିଛି ଦିନ ହେବ ସିଂହ ଆକାଶ ଖାଦ୍ୟ ଖାଉନଥିଲା କି ଛିଡ଼ା ହୋଇପାରୁନଥିଲା । ସେ କେବଳ ଶୋଇରହୁଥିଲା । ଗତ ବିଳମ୍ବିତ ରାତିରେ ତାର ମୃତ୍ୟୁ ଘଟିଛି l ବ୍ୟବଚ୍ଛେଦ ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି ନନ୍ଦନକାନନ କର୍ତ୍ତୃପକ୍ଷ କହିଛନ୍ତି l ୨୦୧୪ ମସିହାରେ ବେଙ୍ଗଲର ଚିଡିଆଖାନାରୁ ନନ୍ଦନକାନନକୁ ସିଂଘ ଆକାଶକୁ ଅଣାଯାଇଥିଲା l ସେ ସମୟରେ ସିଂଘକୁ ୪ ବର୍ଷ ହୋଇଥିଲା l ନନ୍ଦନକାନନରେ ସିଂହ ମାନଙ୍କ ସଂଖ୍ୟା ୨୬କୁ ହ୍ରାସ ପାଇଛି l
୧୦ ଟ୍ରିପରୁ ଅଧିକ ମୂଲ୍ୟବାନ କାଠ ଜବତ
ଘଟଗାଁ : କେନ୍ଦୁଝର ଜିଲ୍ଲା ଘଟଗାଁ ବ୍ଲକ ସାନ୍ତରାପୁରରୁ ବିପୁଳ କାଠ ଜବତ। ୧୦ ଟ୍ରିପରୁ ଅଧିକ ମୂଲ୍ୟବାନ କାଠ ଜବତ ହୋଇଛି। ଆଜି ଭୋର୍ ୫ଟାରୁ କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ସାନ୍ତରାପୁର ଗାଁରେ କେନ୍ଦୁଝର ଡିଏଫଓ ଙ୍କ ତତ୍ବାବଧାନରେ ସାନ୍ତରାପୁର ଗ୍ରାମରେ ଏକ ପ୍ଲାଟୁନ ପୋଲିସ୍ ଫୋର୍ସ ସହିତ ବନ ବିଭାଗ ଏକ ବଡ ଧରଣର ଚଢ଼ାଉ ଜାରି ରହିଛି । ତେବେ ଏହି ସାନ୍ତରାପୁର ଗ୍ରାମକୁ କେନ୍ଦୁଝର ଜିଲ୍ଲାର ଚୋରା କାଠ ମାଫିଆଙ୍କ ହବ କୁହାଯାଉଥିବା ବେଳେ ଅନେକ ବାର ବନ ବିଭାଗ ଚଢ଼ାଉ କରି ବିଫଳ ହେଉଥିଲା । କିନ୍ତୁ ଆଜି ବନ ବିଭାଗକୁ ବଡ ସଫଳତା ମିଳିଛି । ବର୍ତ୍ତମାନ ପର୍ଯ୍ୟନ୍ତ ୧୦ଟ୍ରିପ୍ ରୁ ଉର୍ଦ୍ଧ୍ବ ମୂଲ୍ୟବାନ କାଠ ଜବତ ହୋଇଥିବା ବେଳେ ଚଢ଼ାଉ ଜାରି ରହିଛି।