ଇଡେନ୍ ଇତିହାସର ଗୋଲାପୀ ଫର୍ଦ୍ଦ, ଜାଣନ୍ତୁ କାହାର କେତେ ରେକର୍ଡ..
ପ୍ରଥମ ଦିବାରାତ୍ର ଟେଷ୍ଟ ଆୟୋଜନ କରି ଇତିହାସ ରଚିଲା ଇଡେନ ଗାଡେର୍ନ । ଆଉ ଏବେ ଖେଳାଳିମାନେ ନିଜ ନାଁରେ ଇତିହାସର ଗୋଲାପୀ ଫର୍ଦ୍ଦ ଯୋଡ଼ିଛନ୍ତି । ବାଂଲାଦେଶ ବିପକ୍ଷ ପ୍ରଥମ ଟେଷ୍ଟରେ ନିଜର ପ୍ରାଧାନ୍ୟ ବିସ୍ତାର କରିଛି ଟିମ୍ ଇଣ୍ଡିଆ । ମ୍ୟାଚର ଦ୍ୱିତୀୟ ଦିନରେ ଚାଲନ୍ତୁ ନଜର ପକାଇବା ଖେଳାଳିଙ୍କ ରେକର୍ଡ ଉପରେ ।
ବାଂଲାଦେଶକୁ ପ୍ରଥମ ଇନିଂସରେ ୧୦୬ ରନ୍ରେ ଅଲଆଉଟ କରିଛି ଟିମ୍ ଇଣ୍ଡିଆ । ତେବେ ପ୍ରଥମ ଭାରତୀୟ ଭାବେ ଗୋଲାପୀ ବଲ୍ରେ ୱିକେଟ ନେବାର ସୌଭାଗ୍ୟ ପାଇଛନ୍ତି ଈଶାନ୍ତ ଶର୍ମା । ୨୦୦୭ ପରଠୁ ଟେଷ୍ଟରେ ଦ୍ୱିତୀୟ ଥର ପାଇଁ ସେ ଭାରତରେ ପାଇଛନ୍ତି ୫ ୱିକେଟର ସଫଳତା । ସେହିଭଳି ପିଙ୍କ୍ ବଲରେ ପ୍ରଥମ ଭାରତୀୟ ବ୍ୟାଟ୍ସମ୍ୟାନ ଭାବେ ଛକା ମାରିବାର ରେକର୍ଡ ଯାଇଛି ରୋହିତ ଶର୍ମାଙ୍କ ନାଁରେ ।
ଦିବାରାତ୍ର ଟେଷ୍ଟରେ ପ୍ରଥମ ଅର୍ଦ୍ଧଶତକ ଚେତେଶ୍ୱର ପୂଜାରା ହାସଲ କରିଥିବା ବେଳେ ଗୋଲାପୀ ଶତକ ହାସଲ କରିଛନ୍ତି କ୍ୟାପଟେନ୍ କୋହଲି । ଖାଲି ସେତିକି ନୁହେଁ, ଟେଷ୍ଟରେ ୨୦ତମ ଶତକ ମାରି ସେ ରିକି ପଣ୍ଟିଂଙ୍କ ୧୯ଟି ଟେଷ୍ଟ ଶତକ ରେକର୍ଡକୁ ଭାଙ୍ଗିଛନ୍ତି ବିରାଟ । ୮୪ ମ୍ୟାଚରେ ୧୪୧ ଇନିଂସ ଖେଳି ବିରାଟ ମୋଟ ୨୭ଟି ଟେଷ୍ଟ ଶତକ ହାସଲ କରିଛନ୍ତି । ସଚିନ, ଦ୍ରାବିଡ ଓ ଗାଭାସ୍କରଙ୍କ ପରେ ସେ ହେଉଛନ୍ତି ଚତୁର୍ଥ ଭାରତୀୟ ତାରକା ।
ଶରଦଙ୍କ ଦମ୍ଭୋକ୍ତି: କହିଲେ, ଆମେ ସରକାର ଗଢ଼ିବୁ
ମହାରାଷ୍ଟ୍ରରେ ଏନ୍ସିପି ନେତା ଅଜିତ୍ ପାଓ୍ୱାରଙ୍କ ସମର୍ଥନରେ ସରକାର ଗଢ଼ିଛି ବିଜେପି । କିନ୍ତୁ ଏବେ ବି ଚାଲିଛି ଛକାପଞ୍ଝା । ବିଜେପି ପାଖରେ ଆବଶ୍ୟକ ସଂଖ୍ୟା ନାହିଁ ଓ ସେମାନେ ବିଧାନସଭାରେ ସଂଖ୍ୟା ଗରିଷ୍ଠତାର ପ୍ରମାଣ ଦେଇପାରିବେନି ବୋଲି କହିଛନ୍ତି ଏନ୍ସିପି ଓ ଶିବସେନା । ଆମ ପାଖରେ ୧୭୦ ସଂଖ୍ୟା ରହିଛି, ଆମେ ହିଁ ମହାରାଷ୍ଟ୍ରରେ ସରକାର ଗଢ଼ିବୁ ବୋଲି ପ୍ରେସ୍ମିଟ୍ରେ ଦମ୍ଭୋକ୍ତି ଦେଖାଇଛନ୍ତି ଶରଦ ପାଓ୍ୱାର । ଏଥିସହ ଅଜିତଙ୍କ ନିଷ୍ପତ୍ତି ବ୍ୟକ୍ତିଗତ ବୋଲି କହିଛନ୍ତି ଏନ୍ସିପି ନେତା ଶରଦ ପାଓ୍ୱାର ।
ଅପରପକ୍ଷରେ ବିଜେପିକୁ କଟୁ ସମାଲୋଚନା କରିଛନ୍ତି ଶିବସେନା ମୁଖ୍ୟ ଉଦ୍ଧବ ଠାକ୍ରେ । ଏନସିପି କି ଶିବସେନାର ଏଭଳି ବିଚାରଧାରା ନୁହେଁ । ସାରାଦେଶରେ ଗଣତନ୍ତ୍ରକୁ ନେଇ ଏକ ଖେଳ ଚାଲିଛି । ଯାହା ଦେଶବାସୀଙ୍କୁ ବେଶ୍ ଭଲଭାବେ ଜଣାପଡ଼ିଗଲାଣି । ବିଜେପିର ଏଭଳି ଷଡ଼ଯନ୍ତ୍ର ସରକାର କେବେ ସଫଳ ହେବ ନାହିଁ ବୋଲି କହିଛନ୍ତି ଉଦ୍ଧବ । ଅପରପକ୍ଷରେ ଅଜିତ୍ ପାଓ୍ୱାରଙ୍କୁ ବିଶ୍ୱାସଘାତକ ବୋଲି କହିଛନ୍ତି ବିଜେପି ନେତା ସଞ୍ଜୟ ରାଉତ । ନିଜ ଫାଇଦା ପାଇଁ ଅଜିତ୍ ଏନସିପିକୁ ଧୋକା ଦେଇ ବିଜେପିରେ ମିଶିଗଲେ । କିନ୍ତୁ ତାଙ୍କ ସହିତ ଯାଇଥିବା ୮ ବିଧାୟକ ମଧ୍ୟରୁ ୫ ବିଧାୟକ ଫେରିଆସିଥିବା କହିଛନ୍ତି ସଞ୍ଜୟ ।
ଅପରପକ୍ଷରେ ଶିବସେନା- ଏନ୍ସିପି-କଂଗ୍ରେସ ଏବେ ବି ଏକଜୁଟ ଅଛନ୍ତି । ସରକାର ଗଠନ ନେଇ ଆମ ତରଫରୁ କୌଣସି ବିଳମ୍ବ ହୋଇନଥିବା ପ୍ରେସମିଟ୍ରେ କହିଛନ୍ତି କଂଗ୍ରେସ ନେତା ଅହମ୍ମଦ ପଟେଲ ।
ପିଶାଚୀର ହେଲେ ଦୟାମୟା ଥିବ, କିନ୍ତୁ ଏ ମହିଳାଙ୍କର ନାହିଁ…
ନିର୍ଦ୍ଦୟ, ନୃଶଂସ, ବର୍ବର… ଯେତେ ଯାହା କହିଲେ ବି କମ୍ ପଡ଼ିବ । କ’ଣ ସତରେ ଜଣେ ନାରୀ ଏତେ ନିର୍ଦ୍ଦୟ ହୋଇପାରେ, ଏମିତି ଶାସ୍ତି ଦେଇପାରେ । ଏ ଭିଡିଓ ଦେଖନ୍ତୁ, ଆପଣଙ୍କର ଯଦି ସାମାନ୍ୟତମ ମାନବିକତା ଥିବ ତେବେ ଆପଣଙ୍କ ହୃଦୟ ଫାଟିପଡ଼ିବ । ଭିଡିଓରେ ଜଣେ ମାଆ ନିଜ କୁନି ଝିଅକୁ ନିର୍ଧୁମ ମାରୁଛନ୍ତି । ମହିଳା ଜଣକ ଛୁଆଟିର ତଣ୍ଟି ଚିପିବା ସହ ନାବାଳିକାର ଚୁଟିକୁ ଟାଣି ପିଠିରେ ଚାପୁଡ଼ା ପରେ ଚାପୁଡ଼ା ଥୋଉଛନ୍ତି ।
https://www.facebook.com/nandighoshatv/videos/3135531123130422/
ସେତିକିରେ ବି ଏ ମହିଳାଙ୍କ ମନ ପୂରୁନି । ଚଟାଣରେ ତଳେ ପକାଇ ଝିଅଟିକୁ ମାରି ଚାଲିଛନ୍ତି । ରାଗ ଜର୍ଜରିତ ମହିଳା ଜଣଙ୍କ ବେଳକୁ ବେଳ ଆହୁରି ହିଂସ୍ର ହୋଇ ଉଠୁଛନ୍ତି , ବିଧା ପରେ ବିଧା ଥୋଇ ଚାଲିଛନ୍ତି । କଇଁ କଇଁ କାନ୍ଦୁଥିବା ଝିଅଟି ମହିଳାଙ୍କ ଚାପୁଡ଼ା ମାଡ଼ରେ ତଳେ ପଡ଼ିଯାଉଛି । ତାପରେ ମହିଳା ଜଣଙ୍କ ଚପଲରେ ପୁଣି ନାବାଳିକାକୁ ମାଡ଼ ମାରୁଛନ୍ତି । ଝିଅଟି ଯେତେ ବିକଳ ହୋଇ ଚିତ୍କାର କଲେ ବି ମହିଳାଙ୍କ ହୃଦୟ ତରଳୁନି।
ସୋସିଆଲ ମିଡିଆ ଓ ମୋବାଇଲରୁ ମୋବାଇଲକୁ ଘୁରି ବୁଲିଥିବା ଏହି ଭିଡିଓଟି ଜମ୍ମୁ କଶ୍ମୀର କଠୁଆର । ସତରେ ମାଆ କଣ ଏମିତି ନିର୍ଦ୍ଦୟ ହୋଇପାରେ ।
ଯଦି ମହିଳା ଜଣଙ୍କ ଯଦି ଝିଅଟିର ମାଆ ହୋଇଥିବେ ତେବେ, ଭଗବାନ ତାଙ୍କୁ ମାତୃତ୍ୱ ଦେଇ ଭୁଲ୍ କରିଛନ୍ତି । ଏମିତି ମହିଳାଙ୍କ କୋଳରେ ଛୁଆ ଦେବା ଆଦୌ ଉଚିତ୍ ନଥିଲା । ଏ ମାଆ ସାଧାରଣ ନାରୀ ନୁହେଁ… ରାକ୍ଷସୀ ପ୍ରକୃତିଧାରୀ… ।
ଟ୍ରେନ ଧକ୍କାରେ ମାଆ-ଝିଅ ମୃତ
ଯାଜପୁର: ଟ୍ରେନ୍ରେ କଟି ମା’-ଝିଅଙ୍କ ମୃତ୍ୟୁ । ଯାଜପୁର ରୋଡ୍ ରେଳ ଷ୍ଟେସନ ନିକଟରେ ଏହି ଦୁର୍ଘଟଣା ଘଟିଛି । ମା’-ଝିଅଙ୍କୁ ହାୱଡ଼ା-ପୁରୀ ପାସେଞ୍ଜର ଟ୍ରେନ୍ ଧକ୍କା ଦେଇଥିଲା । ମୃତ ମା’-ଝିଅ ହେଲେ ଯାଜପୁର ଜିଲ୍ଲା କୋରାଇ ଥାନା ଚାନ୍ଦମା ଗାଁର କାଠି ରଣା ଓ ଗୁରୁବାରୀ ରଣା । କେଉଁ ପରିସ୍ଥିତିରେ ଟ୍ରେନ୍ ସେମାନଙ୍କୁ ଧକ୍କା ଦେଲା ତାହା ଜଣାପଡ଼ିନାହିଁ ।
ସେମାନେ ଆତ୍ମହତ୍ୟା କରିଥିବା ଷ୍ଟେସନ ମ୍ୟାନେଜରଙ୍କୁ ଟ୍ରେନ୍ ଡ୍ରାଇଭର ଜଣାଇଛନ୍ତି । ରେଳବାଇ ପୋଲିସ ମୃତଦେହ ଉଦ୍ଧାର କରିବା ସହିତ ତଦନ୍ତ ଆରମ୍ଭ କରିଛି । ମୃତ ଓ କାଠି ରଣା ଓ ତାଙ୍କ ଝିଅ ଗୁରୁବାରୀ ଅତ୍ୟନ୍ତ ଗରିବ । ଝିଅ ଗୁରୁବାରୀ ଏକ ସ୍କୁଲରେ କାମ କରି ପରିବାର ଚଳାନ୍ତି । କୈାଣସି କାମ ପାଇଁ ଅହମ୍ମଦ ନଗର ଅଞ୍ଚଳକୁ ଯାଇଥିବା ବେଳେ ଅଘଟଣ ଘଟିଛି ।
ଶିଶୁପାଳ ପାଲଟିଲା ଶିବସେନା, ପରିବାରକୁ ଛାଡ଼ି ‘ପାଓ୍ୱାର’କୁ ଆପଣାଇଲେ ଅଜିତ୍
ମହାରାଷ୍ଟ୍ର: ଶିବସେନାକୁ ଲାଗିଲା ଶକ୍ତ ଝଟ୍କା । ମରିଚିକା ପାଲଟିଲା ମହାରାଷ୍ଟ୍ର ମୁଖିଆ ହେବା ସ୍ୱପ୍ନ । ରାତା ରାତି ବଦଳିଗଲା ରାଜନୀତିକ ସମୀକରଣ । ସମ୍ପୂର୍ଣ୍ଣ ଅପ୍ରତ୍ୟାଶିତଭାବେ ମୁଖ୍ୟମନ୍ତ୍ରୀ ପଦ ପାଇଁ ଶପଥ ଗ୍ରହଣ କଲେ ଦେବେନ୍ଦ୍ର ଫଡ଼ନବିସ୍ । ଆଉ ଏନ୍ସିପିର ଅଜିତ ପାଓ୍ୱାରଙ୍କୁ ଉପମୁଖ୍ୟମନ୍ତ୍ରୀ ଭାବେ ଶପଥ ପାଠ କରାଇଲେ ରାଜ୍ୟପାଳ । ଏଥିସହ ଶିବସେନାର କିଙ୍ଗ ମେକରରୁ କିଙ୍ଗ ହେବାର ସ୍ୱପ୍ନ ଚୁରମାର ହୋଇଛି ।
ସରିଯାଇଥିଲା ପ୍ରସ୍ତୁତି ବାକି ଥିଲା ଔପଚାରିକତା । ରାତି ପାହିଲେ ରାଜ୍ୟପାଳଙ୍କୁ ଭେଟି ସରକାର ଗଠନ ନେଇ ଦାବି ଜଣାଇଥାନ୍ତେ ଶିବସେନା-ଏନ୍ସିପି ଓ କଂଗ୍ରେସ ମେଣ୍ଟ । ହେଲେ ରାତା ରାତି ବଦଳିଗଲା ରାଜନୀତିର ସମୀକରଣ । ସମ୍ପୂର୍ଣ୍ଣ ଅପ୍ରତ୍ୟାଶିତଭାବେ ମୁଖ୍ୟମନ୍ତ୍ରୀଭାବେ ଶପଥ ଗ୍ରହଣ କଲେ ଦେବେନ୍ଦ୍ର ଫଡ଼ନବିସ୍ । ଆଉ ତାଙ୍କ ସାଥିରେ ଉପ ମୁଖ୍ୟମନ୍ତ୍ରୀ ପଦ ପାଇଁ ଶପଥ ନେଲେ ଏନ୍ସିପି ନେତା ଅଜିତ୍ ପାଓ୍ୱାର ।
ତେବେ ଦିନକ ପୂର୍ବରୁ ଶିବସେନା-ଏନସିପି-କଂଗ୍ରେସ ମିଶି ସରକାର ଗଠନ କରିବେ ବୋଲି ନିଷ୍ପତ୍ତି ହୋଇଥିଲା । ହେଲେ ହଠାତ୍ ଶିବସେନା ଓ କଂଗ୍ରେସର ହାତ ଛାଡ଼ି ଅଜିତ୍ଙ୍କ ବିଜେପିକୁ ସମର୍ଥନ କରିବା ନେଇ ସୃଷ୍ଟି ହୋଇଛି ପ୍ରଶ୍ନବାଚୀ । ତେବେ ଅଜିତ୍ଙ୍କ ଏଭଳି ନିଷ୍ପତ୍ତିକୁ ତାଙ୍କର ବ୍ୟକ୍ତିଗତ ନିଷ୍ପତ୍ତି ବୋଲି କହିଛନ୍ତି ଏନ୍ସିପି ମୁଖ୍ୟ ଶରଦ ପାଓ୍ୱାର । ଅପରପକ୍ଷରେ ଅଜିତ ପାଓ୍ୱାର ବିଶ୍ୱାସଘାତ କରିଥିବା କହିଛି ଶିବସେନା ।
ବିଶ୍ୱାସ ଘାତକତା କରିଛନ୍ତି ଅଜିତ୍ ପାଓ୍ୱାର : ଶିବସେନା
ମୁମ୍ୱାଇ : ମହାରାଷ୍ଟ୍ରରେ ବିଜେପି ଓ ଏନସିପି ସରକାର ଗଠନ ପରେ ବିଭିନ୍ନ ଆଡୁ ପ୍ରତିକ୍ରିୟା ଆସୁଛି । ମହାରାଷ୍ଟ୍ରରେ ସବୁ ରାଜନୀତିକ ଦଳ ନିଜ ନିଜର ପ୍ରତିକ୍ରିୟା ପ୍ରକାଶ କରିଛନ୍ତି । ବିଜେପିର ନେତା ଓ ରାଜ୍ୟ ସଭାପତି ଶିବସେନାକୁ ସମାଲୋଚନା କରୁଥିବା ବେଳେ, କଂଗ୍ରେସକୁ ମଧ୍ୟ ସମାଲୋଚନା କରୁଛନ୍ତି ଶିବସେନା ନେତା ।
ଏନସିପିର ନେତା ଅଜିତ୍ ପାଓ୍ୱାର ମହାରାଷ୍ଟ୍ରର ଜନସାଧାରଣଙ୍କୁ ପଛରୁ ଛୁରା ମାରିଛନ୍ତି ବୋଲି ଶିବସେନା ମୁଖପାତ୍ର ସଂଜୟ ରାଓ୍ୱତ କହିଛନ୍ତି । ଗତକାଲିର ବୈଠକରେ ଆଜିତ ପାଓ୍ୱାର ଉପସ୍ଥିତ ଥିଲେ । ରାତିରେ ଷଡ଼ଯନ୍ତ୍ର କରି ଶରଦଙ୍କୁ କିଛି ନଜଣାଇ ଅଜିତ୍ ଏଭଳି କରିଛନ୍ତି ବୋଲି ଶିବସେନା କହିଛି । ରାଜ୍ୟପାଳ ମଧ୍ୟ ଏଥିରେ ସାମିଲ ଥିବା ସଂଜୟ ଆରୋପ ଲଗାଇଛନ୍ତି ।
ସେହିପରି ଏନସିପି ନେତ୍ରୀ ସୁପ୍ରିୟା ସୁଲେ କହିଛନ୍ତି ଯେ, ପରିବାର ଓ ପାର୍ଟି ଅଲଗା ହୋଇଗଲା । ଏ ନିଷ୍ପତ୍ତି ଅଜିତଙ୍କର ଥିଲା ବୋଲି ଶରଦ ପାଓ୍ୱାର କହିଛନ୍ତି । କିଏ ସତ କହୁଛି ଏବଂ କିଏ ମିଛ ତାହା କଳନା କରିବା ମୁସ୍କିଲ । ବିଜେପିକୁ ସମର୍ଥନ କରିବା ଅଜିତ ପାଓ୍ୱାରଙ୍କ ବ୍ୟକ୍ତିଗତ ନିଷ୍ପତ୍ତି । ଏହା ପାର୍ଟିର ନୁହେଁ ବୋଲି ଶରଦ ପାଓ୍ୱାର ମତ ଦେଇଛନ୍ତି ।
ସେପଟେ ବିଜେପି ନେତା ଚନ୍ଦ୍ରକାନ୍ତ ପାଟିଲ୍ କହିଛନ୍ତି ଯେ, ଶିବସେନା ଏଥିରୁ ଶିକ୍ଷାଲାଭ କରିବା ଉଚିତ୍ । ସଂଜୟ ରାଓ୍ୱତ ମୁଁହ ବନ୍ଦ କରି ରହିବା ଉଚିତ୍ । ଆଜି ଶିବସେନାର ଏଭଳି ଅବସ୍ଥା ପାଇଁ ସଂଜୟ ହିଁ ଦାୟୀ ବୋଲି କହିଛନ୍ତି ସଂଜୟ ।