ରାୟଗଡ଼ା ଜିଲ୍ଲା ପଦ୍ମପୁର ଥାନା ଅନ୍ତର୍ଗତ ଦୁର୍ଗମ ଇଲାକାରେ ବେଆଇନ ଭାବେ ହେଉଥିବା ଗଞ୍ଜେଇ ଚାଷ ଉପରେ ଚଢାଉ । ବ୍ୟାପକ ପରିମାଣର ଗଞ୍ଜେଇ ଗଛ ନଷ୍ଟ କରିଛି ପୁଲିସ । ପୋଲିସ, ଅବକାରୀ ଓ ବନ ବିଭାଗ ମିଳିତ ଭାବେ ଚଢାଉ କରି କେନ୍ଦୁଗୁଡା ଡେମ ସାଇଟ ଅଞ୍ଚଳରେ ହୋଇଥିବା ଗଞ୍ଜେଇ ଚାଷକୁ ନଷ୍ଟ କରାଯାଇଛି ।
ଏହି ଅଭିଯାନରେ ଡେମ ସାଇଟ ଅଞ୍ଚଳର ୩୦ ଏକର ଜମିରେ ଲାଗିଥିବା ୪୮,୦୦୦ ହଜାର ଗଛକୁ କାଟି ପୋଡ଼ି ନଷ୍ଟ କରାଯାଇଛି । ନଷ୍ଟ ହୋଇଥିବା ଗଞ୍ଜେଇ ଗଛର ଆନୁମାନିକ ମୂଲ୍ୟ ୫ଲକ୍ଷ ୭୬ହଜାର ହେବ ବୋଲି ସୂଚନା ମିଳିଛି ।
ସୁନ୍ଦରଗଡ଼: ବିଭିନ୍ନ ସ୍ଥାନରେ ହାତୀ ଉପଦ୍ରବ । ହାତୀ ଆକ୍ରମଣରେ ଚାଲିଗଲା ଦୁଇ ଜୀବନ । ଅଟୋରେ ଘରକୁ ଫେରୁଥିବା ବେଳେ ହାତୀ ପଲ୍ଲଙ୍କ ହାବୁଡ଼ରେ ପଡିଲେ ଯାତ୍ରୀ । ଏଭଳି ଘଟଣା ଦେଖିବାକୁ ମିଳିଛି ସୁନ୍ଦରଗଡ଼ ଜିଲ୍ଲା ହାତୀବାରୀ ଥାନା ଅନ୍ତର୍ଗତ ଗୋଟିଟାଙ୍ଗର ଗାଁରେ । ଯାହାକୁ ନେଇ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଜଙ୍ଗଲ ରାସ୍ତାରେ ଅଟୋରେ ୪ ଜଣ ଆସୁଥିବା ବେଳେ ହଠାତ୍ ହାତୀପଲ୍ଲ ହାଵୁଡରେ ପଡିଥିଲେ ।
ତିନି ଜଣ ଯାତ୍ରୀ ବର୍ତ୍ତି ଯାଇଥିବା ବେଳେ ଜଣେ ହାତୀପଲ୍ଲଙ୍କ ହାବୁଡ଼ରେ ପଡ଼ିଯାଇଥିଲେ । ଯାହାକୁ ନେଇ ଜଣଙ୍କର ମୃତ୍ୟୁ ହୋଇଛି । ସେପଟେ ଘଟଣା ସ୍ଥଳରେ ବନ ବିଭାଗ ଓ ହାତୀବାରୀ ଥାନା ପୋଲିସ ପକ୍ଷରୁ ଘଟଣାର ତଦନ୍ତ ଆରମ୍ଭ ହୋଇଛି । ଅନ୍ୟପକ୍ଷରେ ମୃତକଙ୍କ ପରିବାରକୁ ଆର୍ଥିକ ସହାୟତା ପ୍ରଦାନ କରିବା ସହ ହାତୀ ଉପଦ୍ରବ ରୋକିବା ପାଇଁ ପଦକ୍ଷେପ ନେବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି।
ସେହିଭଳି କୁତ୍ରା ଥାନା ଅନ୍ତର୍ଗତ ସିଆଳଯୋର ଗ୍ରାମରେ ହାତୀ ଆକ୍ରମଣରେ ଜଣେ ଯୁବକଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଗତ ରାତିରେ ହାତୀ ଘଉଡାଉଥିବାବେଳେ ହାତୀଟି ଜଣେ ଯୁବକଙ୍କୁ ଦଳିଦେଇଥିଲା । ଅଭିଯୋଗ ପରେ ବନ ବିଭାଗ ଓ ପୋଲିସ ପକ୍ଷରୁ ତଦନ୍ତ ଆରମ୍ଭ।
ଭୁବନେଶ୍ୱର : ରାଜ୍ୟର ୪ଟି ଜିଲ୍ଲାପରିଷଦ ଜୋନରେ ହୋଇଥିବା ନିର୍ବାଚନରେ ବିଜେଡି ପୁଣିଥରେ ବାଜିମାତ୍ କରିଛି । କୋରାପୁଟ ପଟାଙ୍ଗି ଜିଲ୍ଲା ପରିଷଦ ଜୋନରେ ବିଜେଡି ପ୍ରାର୍ଥୀ ୨,୭୩୮ ଖଣ୍ଡ ଭୋଟରେ ବିଜୟୀ ହୋଇଛନ୍ତି । ସେହିପରି ଗଞ୍ଜାମର ଛତ୍ରପୁର ଜିଲ୍ଲା ପରିଷଦ ଜୋନରେ ହୋଇଥିବା ନିର୍ବାଚନରେ ବିଜେଡି ବିପୁଳ ଭୋଟରେ ବିଜୟୀ ହୋଇଛି । ଦଳୀୟ ପ୍ରାର୍ଥୀ ୮,୭୭୨ ଖଣ୍ଡ ଭୋଟରେ ବିଜୟୀ ହୋଇଛନ୍ତି ।
ସେହିପରି ଯାଜପୁର ଜିଲ୍ଲାର ଦାନଗଦିର ୮ ନମ୍ବର ଜୋନରେ ବିଜେଡି ପ୍ରାର୍ଥୀ ୨୬୨୨ ଭୋଟରେ ବିଜୟଲାଭ କରିଛନ୍ତି । ଦଶମନ୍ତପୁର ଜିଲ୍ଲା ପରିଷଦ ଜୋନରେ ଦଳୀୟ ପ୍ରାର୍ଥୀ ୪୪୪୧ ଖଣ୍ଡ ଭୋଟ୍ ବ୍ୟବଧାନରେ ବିଜୟୀ ହୋଇଛନ୍ତି । ୪ରୁ ୪ଟି ଆସନରେ ଦଳ ବିଜୟଲାଭ କରିଛି ।
ମୁମ୍ୱାଇ : ମହାରାଷ୍ଟ୍ରର ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ଶିବସେନା ମୁଖ୍ୟ ଉଦ୍ଧବ ଠାକରେ। ମୁମ୍ବାଇର ଶିବାଜୀ ପାର୍କରେ ଶପଥ ଗ୍ରହଣ ସମାରୋହ ପାଇଁ ବିଶାଳ ଆୟୋଜନ କରାଯାଇଥିଲା । ଏଥିରେ ରାଜ୍ୟପାଳ ଭଗତ ସିଂହ କୋଶଓ୍ୱାରୀ ଉଦ୍ଧବଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ ।
ଠାକରେ ପରିବାରର ପ୍ରଥମ ବ୍ୟକ୍ତିଭାବେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହୋଇଛନ୍ତି ଉଦ୍ଧବ ଠାକରେ । ଏନସିପି, କଂଗ୍ରେସର ନେତା ମଧ୍ୟ ମନ୍ତ୍ରୀଭାବେ ଆଜି ଶପଥ ନେଇଛନ୍ତି ।
ଶିବସେନାର ଏକନାଥ ସିନ୍ଦେ ଓ ସୁଭାଷ ଦେଶାଇ, ଏନସିପିର ଜୟନ୍ତ ପାଟିଲ ଓ ଛଗନ ଭୁଜବଳ, କଂଗ୍ରେସର ବାଲାସାହେବ ଥୋରାଟ୍ ଓ ନିତିନ୍ ରାଉତ୍ ପ୍ରମୁଖ ଉଦ୍ଧବ ଠାକରେଙ୍କ ମନ୍ତ୍ରୀମଣ୍ଡଳର ନୂଆ ମନ୍ତ୍ରୀଭାବେ ଶପଥ ନେଇଛନ୍ତି ।
ଏହି ଶପଥ ଗ୍ରହଣ ଉତ୍ସବରେ ଏମଏନଏସ୍ ମୁଖ୍ୟ ରାଜ ଠାକରେଙ୍କ ସହ କମଲନାଥ, ନୀତା ଅମ୍ବାନି ଓ ବହୁ ବିଶିଷ୍ଟ ବ୍ୟକ୍ତି ଯୋଗଦେଇଥିଲେ । ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସଙ୍କୁ ମଧ୍ୟ ଶପଥ ସମାରୋହରେ ଦେଖିବାକୁ ମିଳିଥିଲା ।
ଭବାନୀପାଟଣା : ଆଜି ଦିନିକିଆ କଳାହାଣ୍ଡି ଗସ୍ତରେ ଯାଇଥିଲେ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ । ଗସ୍ତ ସମୟରେ 5-ଟି କାର୍ଯ୍ୟକ୍ରମର ସମୀକ୍ଷା କରିଥିଲେ ମୁଖ୍ୟଶାସନ ସଚିବ। ଭବାନୀପାଟଣା ଆହାର କେନ୍ଦ୍ରରେ ଖାଇବା ସହ ମାନ ପରୀକ୍ଷା କରିଥିଲେ। କଳାହାଣ୍ଡି ଜିଲ୍ଲାପାଳ ଗଭାଳି ହର୍ଷଦ ପରାସର ଓ ଏସପି ବତୁଲା ଗଙ୍ଗାଧର ମଧ୍ୟ ଆହାର କେନ୍ଦ୍ରରେ ଭୋଜନ କରିଥିଲେ ।
ସୂଚନାଯୋଗ୍ୟ ଯେ ଗସ୍ତ ସମୟରେ ନେତା, ମନ୍ତ୍ରୀ ଓ ବଡ଼ ଅଧିକାରୀମାନଙ୍କୁ ଆହର କେନ୍ଦ୍ରରେ ଭୋଜନ କରିବା ସହ ଏହାର ଗୁଣବତ୍ତା ଯାଞ୍ଚ କରିବାକୁ ପରାମର୍ଶ ଦେଇଥିଲେ ମୁଖ୍ୟମନ୍ତ୍ରୀ । ଭବାନୀପାଟଣାରେ ମଧ୍ୟ ମେଡିକାଲ୍ ପରିଦର୍ଶନ କରିଥିଲେ ମୁଖ୍ୟଶାସନ ସଚିବ ।
ଭୁବନେଶ୍ୱର : ବିରୋଧୀ ଦଳର ବିରୋଧ ସତ୍ତ୍ୱେ ବିଧାନସଭାକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ରଖିଛନ୍ତି ବାଚସ୍ପତି । ଅବଧି ପୂର୍ବରୁ ଶେଷ ହୋଇଛି ବିଧାନସଭାର ଶୀତକାଳୀନ ଅଧିବେଶନ ।
୨୧ ଦିନ ପୂର୍ବରୁ ସରିଛି ଚଳିତ ଶୀତ ଅଧିବେଶନ । ଏଥିରେ ସର୍ବମୋଟ ୧୩ ଟି କାର୍ଯ୍ୟ ଦିବସ ରହିଥିଲା । ୧୩୨୬ ଟି ତାରକା ପ୍ରଶ୍ନ ଓ ୧୬୩୬ଟି ଅଣତାରକା ପ୍ରଶ୍ନ ରହିଥିଲା ଏଥର ବିଧାନସଭାରେ । ସେହିପରି ୧୩ଟି ମୁଲତବୀ ପ୍ରସ୍ତାବ ଆସିଥିବା ବେଳେ ୫ଟି ଉପରେ ଆଲୋଚନା ହୋଇଛି ।
ଚଳିତ ଶୀତ ଅଧିବେଶନରେ ସର୍ବମୋଟ ୫ଟି ବିଲ୍ ପାରିତ ହୋଇଛି । ନଭେମ୍ବର ୧୩ତାରିଖରୁ ଅଧିବେଶନ ଆରମ୍ଭ ହୋଇ ଡିସେମ୍ବର ୧୯ ପର୍ଯ୍ୟନ୍ତ ଗୃହ ଚାଲିବାକୁ ବିଜ୍ଞପ୍ତି ପ୍ରକାଶ ପାଇଥିଲା ।
