ମୟୂରଭଞ୍ଜ: ମୟୂରଭଞ୍ଜ ଜିଲ୍ଲାରେ ହାତୀ ଉପଦ୍ରବ କମିବାରେ ନାଁ ଧରୁନି। କେଉଁଠି ହାତୀପଲ ଘରଦ୍ୱାର ଭାଙ୍ଗି ଦେଲେଣି ତା ଆଉ କେଉଁଠି ମଣିଷଙ୍କୁ ମାରି ଦେଉଛନ୍ତି। ତେବେ ଜୈନିକ ବୃଦ୍ଧାଙ୍କୁ ହାତୀ ଆକ୍ରମଣ କରିବା ଯୋଗୁଁ ତାଙ୍କର ମୃତ୍ୟୁ ହୋଇଛି। ଘଟଣାଟି ଘଟିଛି ବାଙ୍ଗିରିପୋଷି ରେଞ୍ଜ ଅନ୍ତର୍ଗତ ଗୋଶାଣିପାଳ ଗ୍ରାମରେ।

ସୂଚନା ଅନୁସାରେ କତରା ନଦୀକୁ ବୁଧବାର ସକାଳେ ଶୌଚ ହେବାକୁ ଯାଇଥିବାବେଳେ ୬୫ ବର୍ଷୀୟ ସ୍ନେହଲତା ସେଠୀ ହାତୀ ପଲ ହାବୁଡ଼ରେ ପଡ଼ିଯାଇଥିଲେ। ଫଳରେ ଦନ୍ତା ଘଟଣା ସ୍ଥଳରେ ତାଙ୍କୁ ଦଳି ମାରି ଦେଇଥିଲେ। ଗ୍ରାମରେ ମୃତକଙ୍କ ପରିବାରକୁ କ୍ଷତିପୂରଣ ସହ ହାତୀ ଉପଦ୍ରବକୁ ରୋକିବା ପାଇଁ ଉତ୍ତେଜନା ଦେଖାଦେଇଛି। ତେବେ ଘଟଣା ସ୍ଥଳରେ ବାଙ୍ଗିରିପୋଷି ରେଞ୍ଜର ଶ୍ରୀ ତପନ ଦାସ ପହଞ୍ଚି ମୃତକଙ୍କ ପରିବାରଙ୍କୁ ୪୦୦୦୦ ଟଙ୍କାର ଚେକ୍ ପ୍ରଦାନ କରିବା ସହିତ ବାକି କ୍ଷତି ପୂରଣ ଦେବାର ପ୍ରତିଶୃତି ଦେଇଛନ୍ତି।

ମୃତ ମହିଳାଙ୍କ ଶବ ବ୍ୟବଚ୍ଛେଦ ପାଇଁ ପିଆରଏମ୍ ମେଡିକାଲ କଲେଜ ଓ ହସ୍ପିଟାଲକୁ ଅଣାଯାଇଥିବା ଜଣାପଡିଛି। ସେପଟେ ମୟୂରଭଞ୍ଜ ଜିଲ୍ଲାର ବିଭିନ୍ନ ସ୍ଥାନରେ ହାତୀ ଉପଦ୍ରବ ଦିନକୁ ଦିନ ବଢ଼ିବାରେ ଲାଗିଥିବା ବେଳେ ବନବିଭାଗ କର୍ମଚାରୀ ମାନେ ଏହାକୁ ପ୍ରତିରୋଧ କରିବାରେ ବିଫଳ ହେଉଥିବା ଗ୍ରାମବାସୀ ମାନେ ଅଭିଯୋଗ କରିଛନ୍ତି ।

ଭୁବନେଶ୍ୱର: ମୋଟର ସାଇକେଲ୍‌ ଚଲାଇପାରିବେନି ସ୍କୁଲରେ ପଢ଼ୁଥିବା ଛାତ୍ରଛାତ୍ରୀ । କୌଣସି ବି ପରିସ୍ଥିତିରେ ୧୮ ବର୍ଷରୁ କମ୍ ପିଲାମାନେ ଗାଡ଼ି ଚଳାଇବେ ନାହିଁ । ଯଦି କୌଣସି ଛାତ୍ରଛାତ୍ରୀ ଗାଡ଼ି ଚଳାଇବା ସମୟରେ ଧରାପଡ଼ନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ । ଆଉ ଯଦି ଛାତ୍ର କିମ୍ୱା ଛାତ୍ରୀ ବିଦ୍ୟାଳୟକୁ ବାଇକ୍‌ ଆଣି ଆସୁଥିବେ ତେବେ ସ୍କଲୁ କର୍ତ୍ତୃପକ୍ଷ ତାଙ୍କୁ ବାରଣ କରିବେ । ଏକାଧିକ ଥର ସଚେତନ କରିବା ପରେ ଯଦି ଛାତ୍ରଛାତ୍ରୀ ନ ମାନନ୍ତି ତେବେ ଏନେଇ ନିକଟସ୍ଥ ଆରଟିଓଙ୍କ ଦୃଷ୍ଟି ଆକର୍ଷଣ କରିବାକୁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ସମସ୍ତ ଉଚ୍ଚ ମାଧ୍ୟମିକ ବିଦ୍ୟାଳୟଗୁଡ଼ିକୁ ନିର୍ଦ୍ଦେଶ ଦିଆଯାଇଛି । ସରକାରୀ ସମେତ ଘରୋଇ ବିଦ୍ୟାଳୟଗୁଡ଼ିକ ନିୟମ ପାଳନ କରିବାକୁ କୁହାଯାଇଛି । ପିଲାଙ୍କୁ ସଚେତନ କରିବା ସହ ଅଭିଭାବକ-ଶିକ୍ଷକ ବୈଠକରେ ଏନେଇ ଅଭିଭାବକମାନଙ୍କୁ ଅବଗତ କରାଇବେ । ସ୍କୁଲ ବସ୍‌ ନୀତି ଯେପରି ଠିକ୍‌ ଭାବେ ପାଳନ କରାଯିବ ସେଦିଗରେ ଧ୍ୟାନ ଦେବେ । ୩ ଚକିଆ ଯାନ ତଥା ଅଟୋରେ ଯାଉଥିବା ଛାତ୍ରଛାତ୍ରୀ ବହୁ ସମୟରେ ଦୁର୍ଘଟଣାର ଶିକାର ହୁଅନ୍ତି । ତେଣୁ ରାଜ୍ୟ ସଡ଼କ ସୁରକ୍ଷା ପରିଷଦର ନିୟମ ଅନୁଯାୟୀ ଯେପରି ଅଧିକ ଛାତ୍ରଛାତ୍ରୀ ଗାଡ଼ିରେ ନ ଯାଅନ୍ତି ତାହାକୁ ସୁନିଶ୍ଚିତ କରିବା ଦିଗରେ ଅଧ୍ୟକ୍ଷମାନେ ଗୁରୁତ୍ୱ ଦେବାକୁ ନିର୍ଦ୍ଦେଶ ଦିଆଯାଇଛି ।

ସ୍ୱତନ୍ତ୍ର ସ୍କ୍ୱାଡ୍‌ ପକ୍ଷରୁ ସ୍କୁଲ୍‌ ବସ୍‌ଗୁଡ଼ିକ ଉପରେ ଚଢ଼ାଉ କରାଯାଇ ଯାଞ୍ଚ ହେବ । ରାଜ୍ୟର ୧୪୬ଟି ସ୍କୁଲ୍‌ ବସ୍‌ର ଫିଟ୍‌ନେସ୍‌ ସାର୍ଟିଫିକେଟ୍‌ ନାହିଁ । ତେଣୁ କମିଟିର ନିଷ୍ପତ୍ତି ଅନୁଯାୟୀ ଉକ୍ତ ବସ୍‌ଗୁଡ଼ିକର ପଞ୍ଜିକରଣ ପ୍ରମାଣପତ୍ର ବାତିଲ୍‌ କରିବାକୁ ଆରଟିଓମାନଙ୍କୁ କୁହାଯାଇଛି । ବସ୍‌ ହେଉ କି ୩ ଚକିଆ ଯାନ ସବୁଗାଡ଼ିର ଉଭୟ ପାର୍ଶ୍ୱରେ କେତେ ଛାତ୍ରଛାତ୍ରୀ ନେଉଥିବା ଧରାପଡ଼ିଛନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ।

ପୁରୀ: ପବିତ୍ର ବଡ଼ ଦିନ ଅବସରରେ ସମଗ୍ର ବିଶ୍ୱବାସୀଙ୍କୁ ଶୁଭେଚ୍ଛା ଜଣାଇଛନ୍ତି ପ୍ରଖ୍ୟାତ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ । ପୁରୀ ବେଳାଭୂମିରେ ନିର୍ମାଣ କରିଛନ୍ତି ନିଆାରା ବାଲୁକା କଳା । ସୁଦର୍ଶନ ଓ ତାଙ୍କ ଅନୁଷ୍ଠାନର ଛାତ୍ରଛାତ୍ରୀମାନେ ଏହି ବାଲୁକା କଳା ପ୍ରସ୍ତୁତ କରିଛନ୍ତି । ପୂର୍ବର କେବଳ ବାଲି ଗଦା କରାଯାଇ ବାଲୁକା କଳା ପ୍ରସ୍ତୁତ କରାଯାଇଥିଲା । ଏଥର କେବଳ ବାଲି ଉପରେ ଏହାକୁ କରାଯାଇଛି । ଯେଉଁଥିରେ । ସବୁଜ ବାର୍ତ୍ତା ଦେବା ପାଇଁ ସାନ୍ତାକ୍ଳଜ୍‌ ଏକ ଚାରା ଉପହାର ଦେଉଥିବା ଦୃଶ୍ୟ ଦେଖିବାକୁ ମିଳିଛି । ଏଥିସହିତ ପର୍ଯ୍ୟଟକମାନେ ବାଲି ଉପରେ ନିର୍ମିତ ସାନ୍ତାକ୍ଳଜ୍‌ ସହିତ ହାତ ମିଳାଇ ପାରିବେ । ତେବେ ଏହି ବାଲୁକା କଳା ବିଶ୍ୱର ସର୍ବବୃହତ 3D ସ୍ୟାଣ୍ଡ୍‌ ଆର୍ଟ ମାନ୍ୟତା ପାଇବ ବୋଲି ସୁଦର୍ଶନ ମତ ରଖିଛନ୍ତି । ୨୫ଶହ ବର୍ଗଫୁଟ ଅଞ୍ଚଳର ଏହି ବାଲୁକା କଳା ପ୍ରସ୍ତୁତ କରାଯାଇଛି ।

ଭୁବନେଶ୍ୱର: ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥ ସହ ଲିଙ୍ଗରାଜ ମନ୍ଦିରର ପ୍ରଜ୍ଞାପନ ମେଢ଼ ପ୍ରଦର୍ଶିତ ହେବ ।  ଆସନ୍ତା ଜାନୁଆରୀ ୨୬ ଦିଲ୍ଲୀରେ ହେବାକୁ ଥିବା ଜାତୀୟ ସ୍ତରୀୟ ପରେଡ୍‌ ସମାରୋହରେ ସ୍ଥାନ ପାଇବ ଏହି ପ୍ରଜ୍ଞାପନ ମେଢ଼ । ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥ ଓ ମନ୍ଦିରର ଏକ ମଡେଲ ଏଥିରେ ସ୍ଥାନ ପାଇବ । ଏହାଦ୍ୱାରା ଉତ୍କଳୀୟ ସଂସ୍କୃତି ଓ ଏଠାକାର ପରମ୍ପରା ବିଶ୍ୱସ୍ତରରେ ପରିଚିତ ହୋଇପାରିବ । ଏହି ପ୍ରଜ୍ଞାପନ ମେଢ଼ର ପରିକଳ୍ପନା ବିଶିଷ୍ଟ ଚିତ୍ରଶିଳ୍ପୀ ଗଜେନ୍ଦ୍ର ପ୍ରସାଦ ସାହୁ କରିଥିବାବେଳେ ଏହାକୁ ରୂପରେଖ ଦେଇଛନ୍ତି ଛତ୍ରପତି ବିଶ୍ୱାଳ ଏବଂ ତପନ ମହାରଣା ସେଥିରେ ଯେଉଁ ଓଡ଼ିଶୀ ଗୀତ ସଂଯୋଜନା କରାଯାଇଛି ତାହାକୁ ଗୁରୁ ଧନେଶ୍ୱର ସ୍ୱାଇଁ ଓ ଅଜୟ ଚୌଧୁରୀ ନିର୍ଦ୍ଦେଶନା ଦେଇଥିବା ବେଳେ ଗଜେନ୍ଦ୍ର ପ୍ରସାଦ ସାହୁ କଣ୍ଠଦାନ କରିଛନ୍ତି ।

ଚଳିତ ବର୍ଷ ୧୬ଟି ରାଜ୍ୟ ସହ ୫ଟି ମନ୍ତ୍ରାଳୟର ପ୍ରଜ୍ଞାପନ ମେଢ଼ ପ୍ରଦର୍ଶନ ପାଇଁ କେନ୍ଦ୍ର ପ୍ରତିରକ୍ଷା ମନ୍ତ୍ରାଳୟ ଅନୁମତି ଦେଇଛନ୍ତି । ଏହି ପ୍ରଜ୍ଞାପନ ମେଢ଼ ଚୟନ ପାଇଁ ୫ଟି ପର୍ଯ୍ୟାୟରେ ଚୟନ କମିଟି ଦ୍ୱାରା ଯାଞ୍ଚ ହେବା ପରେ ପ୍ରଥମେ 2D ଡିଜାଇନ୍ ଏବଂ 3D ମଡେଲ୍‌ ପ୍ରଦର୍ଶିତ ହେବା ପରେ କେନ୍ଦ୍ର ସରକାରଙ୍କ ଦ୍ୱାରା ନିୟୋଜିତ ୧୬ ଜଣିଆ କମିଟି ଏହି ମେଢ଼କୁ ଚୟନ କରିଥିଲେ । ୨୦୦୯,୨୦୧୬ ଓ ୨୦୧୭ ପରେ ପୁଣି ୪ର୍ଥ ଥର ପାଇଁ ଗଜେନ୍ଦ୍ର ସାହୁଙ୍କୁ ପ୍ରଜ୍ଞାପନ ମେଢ଼ ପ୍ରସ୍ତୁତ କରିବାକୁ ସୁଯୋଗ ମିଳିଥିବାରୁ ସେ ଖୁବ୍ ଉତ୍ସାହିତ ଅଛନ୍ତି ।

ଢେଙ୍କାନାଳ: ଭୁବନେଶ୍ୱର ପରେ ଢେଙ୍କାନାଳ ଜିଲ୍ଲା କଙ୍କଡାହାଡ଼ ବ୍ଲକ ବିରାଶାଳରେ ଗଢି ଉଠିଛି ରାଜ୍ୟର ଦ୍ୱିତୀୟ ମୁଖ୍ୟ ବିମାନ ପ୍ରଶିକ୍ଷଣ କେନ୍ଦ୍ର । ଆଜି ତାହା କାଯ୍ୟକ୍ଷମ ହୋଇଛି । ଉଡାଣ ଭରିଲା ଭାରତର ୪ ଲାଟେଷ୍ଟ ମଡେଲର ଏୟାରକ୍ରାଫ୍ଟ । ଆଉ ପ୍ରଶିକ୍ଷଣ ନେଲେ ଦେଶର କୋଣ ଅନୁକୋଣରୁ ଆସିଥିବା ଛାତ୍ରଛାତ୍ରୀ । ଅନୁକୂଳ ପରିବେଶ ଓ ଜଳବାୟୁ ସାଙ୍ଗକୁ ଫ୍ରି-ଏୟାର ଟ୍ରାଫିକର ମଜା ଉଠାଇଲେ ଟ୍ରେନି ପାଇଲଟ ।

୫୭ ଏକର ଜାଗା ପରିମିତ ଅଞ୍ଚଳରେ ରହିଛି ୧୨ ଶହ ମିଟରର ରନୱେ ।  ପ୍ରାୟ ୯ କୋଟିରୁ ଉଦ୍ଧ୍ୱ ଟଙ୍କା ବ୍ୟୟରେ ନିର୍ମାଣ ହୋଇଛି ଏହି ସୁଦୀର୍ଘ ରନୱେ । ଗଭରମେଣ୍ଟ ଏଭିଏସନ ଟ୍ରେନିଂ ଇନଷ୍ଟିଚ୍ୟୁଟ ବା ‘ଗତି’ ପାଇଁ ରାଜ୍ୟ ସରକାରଙ୍କ ସହଯୋଗ ଅତୁଳନୀୟ । ୧୯୪୬ ରୁ ୧୯୭୧ ମସିହା ପର୍ଯ୍ୟନ୍ତ ଏହି ଏୟାର ଫିଲଡ଼ ଫ୍ଲାଇଙ୍ଗ ବ୍ଳକ ଅଧିନରେ ରହିଥିଲା । ପ୍ରାକ୍ତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ୧୯୭୨ ମସିହାରେ ଏହି ଏୟାର ଫିଲଡ଼ରେ ପ୍ରଥମ ଥର ପାଇଁ ବିମାନ ଯୋଗେ ଅବତରଣ କରିଥିଲେ । ତେବେ ତାଙ୍କର ସ୍ୱପ୍ନ ଥିଲା ଏହାକୁ ଏକ ବିମାନବନ୍ଦରରେ ପରିଣତ କରିବା । ଯାହା ଓଡ଼ିଶାର ପ୍ରାକ୍ତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ସହଯୋଗରେ ସଫଳର ଶୀର୍ଷରେ ପହଞ୍ଚି ପାରିଛି ।

୧୯୭୪ ମସିହାରେ ଓଡିଶା ସରକାର ଏହାକୁ ଟେକ- ଅପ କରିଥିଲା । ‘ଗତି’ର ଏହି  ବିମାନ ପ୍ରଶିକ୍ଷଣ କେନ୍ଦ୍ର ରାଜ୍ୟ ତଥା ରାଜ୍ୟ ବାହାରର ଛାତ୍ରଛାତ୍ରୀ ମାନଙ୍କ ପାଇଁ ପାଇଲଟ ପ୍ରଶିକ୍ଷଣ ନେବାର ଏକ ପ୍ରେରଣା ଯୋଗାଇ ପାରିଛି । ପ୍ରଥମ ବ୍ୟାଚରେ ୧୫ ଜଣ ଛାତ୍ର ଛାତ୍ରୀ ପ୍ରଶିକ୍ଷଣ ନେଇଥିବା ବେଳେ ଦ୍ୱିତୀୟ ବ୍ୟାଚରେ ୨୧ ଜଣ ଛାତ୍ରଛାତ୍ରୀ ୪ଦିନ ବ୍ୟାପି ପ୍ରଶିକ୍ଷଣ ନେଉଛନ୍ତି । ବିରାଶାଳର ପରିବେଶ ଓ ଜଳବାୟୁ ଭୁବନେଶ୍ୱର ଅପେକ୍ଷା ଭଲଥିବା କହିଛନ୍ତି ଟ୍ରେନି ପାଇଲଟ ।

ରାଜ୍ୟରେ ‘ଗତି’ର ଭୁବନେଶ୍ୱର ,ବିରାଶାଳ ଓ ବଲାଙ୍ଗୀର ଠାରେ ପାଇଲଟ ପ୍ରଶିକ୍ଷଣ କେନ୍ଦ୍ର ରହିଅଛି । ତେବେ ବିରାଶାଳ ଠାରେ ଥିବା ପୃଥିବୀର ଲାଟେଷ୍ଟ ୪ଟି ଏୟାରକ୍ରାଫ୍ଟ VT-IAT ,VT-TED ,VT-EUW ,VT-ANF ପାଇଲଟ ପ୍ରଶିକ୍ଷଣ ପାଇଁ ଛାତ୍ରଛାତ୍ରୀ ମାନଙ୍କୁ ଉଡାଣ ଭରିବା କାର୍ଯ୍ୟରେ ବ୍ୟବହାର କରାଯାଉଛି । ତେବେ ଗତିର ୬ଟି ଏୟାରକ୍ରାଫ୍ଟ ଭୁବନେଶ୍ୱର ଓ ବିରାଶାଳରେ ପ୍ରଶିକ୍ଷଣ ପାଇଁ ବ୍ୟବହାର କରାଯାଉଛି । ସେସନା-୧୫୨ର ଦୁଇଟି, ସେସନା-୧୭୨ପି ର ଗୋଟିଏ ,ସେସନା-୧୭୨ଆର ଗ୍ଲାସ କୋକପିଟର ଗୋଟିଏ ,ସେସନା-୧୭୨ ଏସ ଏବଂ ସେସନା-ଭି ,ପିଏ ୩୪ ଫୁଲ ଗ୍ଲାସ ମଲ୍ଟି ଇଞ୍ଜିନ ଏୟାର କ୍ରାଫ୍ଟ ରହିଛି । ଏହି ଏୟାର କ୍ରାଫ୍ଟ ଗୁଡିକ ପ୍ରାୟ ୫ ରୁ ୮ ଘଣ୍ଟା ଉଡ଼ାଣ ଭରିବା କାର୍ଯ୍ୟରେ ନିୟୋଜିତ କରାଯାଉଛି ।ଏହି ଏୟାର କ୍ରାଫ୍ଟ ଘଣ୍ଟା ପ୍ରତି ପର ଲିଟର ୧୮ ରୁ ୨୦ କିଲୋମିଟର ଯାଉଥିବା ଗତିର ଅଧିକାରୀ ସୂଚନା ଦେଇଛନ୍ତି ।

ଜଣେ ଟ୍ରେନି ପାଇଲଟ ପାଇଁ ପ୍ରାୟ ୨ଶହ ଘଣ୍ଟାର ଯେଉଁ କୋର୍ସ ରହିଛି  ତାହା ବିରାଶାଳ ଭଳି ଏୟାର ଟ୍ରାଫିକ ଫ୍ରି ସ୍ଥାନରେ ଛାତ୍ରଛାତ୍ରୀ ମାନେ ଶୀଘ୍ର ପୂରଣ କରି ପାରିବା ସହ ସହଜରେ ଉଡାଣ ପ୍ରଶିକ୍ଷଣ ନେଇ ପାରିବେ ବୋଲି ଜଣାପଡିଛି । ଏହି ପାଇଲଟ ପ୍ରଶିକ୍ଷଣ କେନ୍ଦ୍ରରେ ସେଫ୍ଟି ବ୍ୟବସ୍ଥାକୁ ଆଖି ଆଗରେ ରଖି ପୋଲିସ ପ୍ରଶାସନ ,ଅଗ୍ନିଶମ ବିଭାଗ ଓ ଆମ୍ବୁଲାନ୍ସ ସେବାର ବ୍ୟବସ୍ଥା କରାଯାଇଥିବା ଦେଖିବାକୁ ମିଳିଛି । ଭୁବନେଶ୍ୱର ଅପେକ୍ଷା ଏହି ସ୍ଥାନ ଟ୍ରେନି ପାଇଲଟ ମାନଙ୍କ ପାଇଁ ବେଶ ଉପଯୋଗୀ ଥିବା କହିଛନ୍ତି ଏହାର ଚିଫ୍ ଫ୍ଲାଇଟ ଇନଷ୍ଟ୍ରକ୍ଟର କ୍ୟାପଟେନ ଏସ କେ ଝା ।

ଦେଶରେ ଏଭିଏସନ କ୍ଷେତ୍ରରେ କେନ୍ଦ୍ର ସରକାରଙ୍କ ଉଡାଣ ବ୍ୟବସ୍ଥା ଏବଂ ରାଜ୍ୟ ସରକାରଙ୍କ ଟ୍ରେନି ପାଇଲଟ ପାଇଁ ଗତିର ଯେଉଁ ପ୍ରୟାସ ତାହା ଅବିଶ୍ୱସନୀୟ । ସାରା ବିଶ୍ୱରେ ଏୟାରକ୍ରାଫ୍ଟରେ ଶତକଡ଼ା ୨୦ ଭାଗ ଗ୍ରୋଥ୍ ହୋଇଥିବା ବେଳେ ଭାରତରେ ଶତକଡ଼ା ୪୦ ଭାଗ ଗ୍ରୋଥ୍ ହୋଇଥିବା ଗତି ତରଫରୁ ସୂଚନା ମିଳିଛି । ତେବେ ୟଙ୍ଗ୍ ଜେନେରେସନ ପାଇଁ ଉଡାଣ କ୍ଷେତ୍ରରେ ଏହା ଏକ ଯୁଗାନ୍ତକାରୀ ପଦକ୍ଷେପ ।

ଭୁବନେଶ୍ୱର: ଉଭୟ BSE ଓ CHSE ବୋର୍ଡକୁ ନେଇ ଶିକ୍ଷାମନ୍ତ୍ରୀଙ୍କ ବୈଠକ ।  ଲୋକସେବା ଭବନରେ ମନ୍ତ୍ରୀଙ୍କ ପ୍ରକୋଷ୍ଠରେ ବସିଥିଲା ଗୁରୁତ୍ୱପୂର୍ଣ ବୈଠକ । ପରୀକ୍ଷା କିଭଳି ନିର୍ଭୁଲ ଭାବେ ହେବ ସେ ନେଇ ବୈଠକରେ ଆଲୋଚନା ହୋଇଥିଲା । ଯୁକ୍ତ ଦୁଇ ପରୀକ୍ଷା ନେଇ ଅସନ୍ତା ୨୭ ତାରିଖରେ ପରୀକ୍ଷା ତାରିଖ ନିର୍ଦ୍ଧାରଣ ହେବ ।

ଯୁକ୍ତ ଦୁଇରେ ୩ ଲକ୍ଷ ୫୨ ହଜାର ଛାତ୍ରଛାତ୍ରୀ ପରୀକ୍ଷା ଦେଉଥିବାବେଳେ ମ୍ୟାଟ୍ରିକରେ ୫ ଲକ୍ଷ ୪୭ ହଜାର ପରୀକ୍ଷାର୍ଥୀ ପରୀକ୍ଷା ଦେବେ । ମାଟ୍ରିକରେ ୨୭୬୭ଟି ସେଣ୍ଟରରେ ପରୀକ୍ଷା ହେବା ନେଇ ତାଲିକା ହୋଇଥିଲା । ତେବେ ଗତଥର ଖୋଲାଖୋଲି କପି ହୋଇଥିବା ୭ଟି ମାଟ୍ରିକ ପରୀକ୍ଷା କେନ୍ଦ୍ରକୁ ଏଥିରୁ ବାତିଲ କରାଯାଇଛି । ସେହିପରି ଯୁକ୍ତ ଦୁଇର ପାଞ୍ଚଟି ସେଣ୍ଟରକୁ ବାତିଲ କରାଯାଇଛି ।

ଚଳିତଥର ପ୍ରଥମ ଥର ପାଇଁ ଯୁକ୍ତ ଦୁଇ ପରୀକ୍ଷାକୁ ସିଧାସଳଖ ମନିଟର କରିବେ ଶିକ୍ଷା ବିଭାଗର ବରିଷ୍ଠ ଅଧିକାରୀ  । ପ୍ରତ୍ୟେକ ଜିଲ୍ଲା ପାଇଁ ଜଣେ ଅଧିକାରୀ ନିଯୁକ୍ତ ହେବେ । ମାଟ୍ରିକ ପରୀକ୍ଷାରେ ୩ ଶହ ନୋଡାଲ ସେଣ୍ଟର ସହ ୭ ଶହ ସେଣ୍ଟରରେ ସିସିଟିଭି ଲାଗିବା ନେଇ ନିଷ୍ପତି ହୋଇଛି । ଯେଉଁ ସ୍କୁଲରେ କପି ହେବା ନେଇ ପୂର୍ବ ବର୍ଷ ଗୁଡିକରେ ଅଭିଯୋଗ ହୋଇଥିଲା ସେଠି ସିସିଟିଭି ଲାଗିବ ।  ଆସନ୍ତାବର୍ଷ ଠାରୁ ବର୍ଷ ଆରମ୍ଭରୁ ସମସ୍ତ କାର୍ଯ୍ୟସୂଚୀ ସ୍ଥିର ହେବ । ବର୍ଷ ଆରମ୍ଭରୁ ପରୀକ୍ଷା ସ୍ଥିର ହେବ  ।

ଗୋପାଳପୁର: ସଂସ୍କୃତି, ପରମ୍ପରା, ଲୋକକଳା ଓ ପର୍ଯ୍ୟଟନର ବାର୍ତ୍ତା ବହନ କରୁଥିବା ବହୁ ପ୍ରତିକ୍ଷିତ ଗୋପାଳପୁର ବେଳାଭୂମି ମହୋତ୍ସବ ଆଜି ଉଦଘାଟିତ ହୋଇଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅପରାହ୍ନ ୪ଟା ବେଳେ ମହୋତ୍ସବକୁ ଆନୁଷ୍ଠାନିକ ଭାବେ ଉଦଘାଟନ କରିବା ସହ ଜାତୀୟ ସ୍ତରୀୟ ହର୍ବାଲ୍ ମେଳା, ପଲ୍ଲିଶ୍ରୀ ମେଳାକୁ ମଧ୍ୟ ଉଦଘାଟନ କରିଛନ୍ତି ।

ବହୁ ପ୍ରତିକ୍ଷିତ ଗୋପାଳପୁର ବେଳାଭୂମି ମହୋତ୍ସବକୁ ଆଜି ମୁଖ୍ୟମନ୍ତ୍ରୀ ନବୀନ ପଟନାୟକ ଉଦଘାଟନ କରିଛନ୍ତି । କଳା ଓ ସଂସ୍କୃତିରେ ଭରପୁର ଗଂଜାମ ଜିଲ୍ଲାକୁ ଆହୁରି ସମୃଦ୍ଧ କରିବାକୁ ସମସ୍ତ ପ୍ରକାର କାର୍ଯ୍ୟ ହାତକୁ ନେବାପାଇଁ ପ୍ରତିଶୃତି ଦେଇଛନ୍ତି । ପର୍ଯ୍ୟଟନ ଓ ବେଳାଭୂମିର ସର୍ବାଙ୍ଗୀନ ଉନ୍ନତି ପାଇଁ ସମସ୍ତ ସହାୟତା ଯୋଗାଇଦେବା ପାଇଁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଥିଲେ । ଜାତୀୟ ସ୍ତରୀୟ ହର୍ବାଲ ମେଳା ଆଉ ପଲ୍ଲୀଶ୍ରୀ ମେଳାକୁ ମୁଖ୍ୟମନ୍ତ୍ରୀ ଉଦ୍ଘାଟନ କରିବା ସହ ମହିଳା ସକ୍ତିକରଣର ମିଶନ ଶକ୍ତିର ମହିଳା ସ୍ୱୟଂ ସହାୟକ ଗୋଷ୍ଠୀର ବିଭିନ୍ନ ଷ୍ଟଲ୍ ଗୁଡିକ ବୁଲି ଦେଖିଥିଲେ। ଏଥିସହ ମୋ ଗେଲ୍ଲା ଝିଅ ଓ ନିର୍ଭୟା ଯୋଜନାରେ ଅନ୍ତର୍ଭୁକ୍ତ ବିଭିନ୍ନ ଶିଶୁମାନଙ୍କୁ ଉପହାର ଦେବା ସହ ମହିଳାଙ୍କୁ ପୁରଷ୍କୃତ କରିଥିଲେ।

ଗୋପାଳପୁର ବେଳାଭୂମିର ଆଜି ପ୍ରଥମ ଦିନରେ ଗଂଜାମର ବିଭିନ୍ନ ଲୋକକଳା ଓ ନୃତ୍ୟର ଆସର ଉପସ୍ଥିତ ଦର୍ଶକଙ୍କ ମନ ମୋହିଥିଲା । ବେଳାଭୂମି ମହୋତ୍ସବକୁ ଉପଭୋଗ କରିବା ପାଇଁ ଗଂଜାମ ଜିଲ୍ଲା ଓ ଜିଲ୍ଲା ବାହାରୁ ଲକ୍ଷ ଲକ୍ଷ ଲୋକଙ୍କ ଜନ ସମାଗମ ଦେଖିବାକୁ ମିଳିଛି । ଆଜିର ସଂଧ୍ୟାରେ ମୁଖ୍ୟ ଆକର୍ଷଣ ବଲିଉଡର ପ୍ରଖ୍ୟାତ ଗାୟକ ସୋନୁ ନିଗମ ଆସୁଛନ୍ତି ଦର୍ଶକଙ୍କ ମନୋରଂଜନ ପାଇଁ । ଏହି ଅବସରରେ ଜିଲ୍ଲାର ବିଭିନ୍ନ ଓଡ଼ିଶୀ ଓ ମଡର୍ଣ୍ଣ ଡ୍ୟାନ୍ସ ଏକାଡେମୀର କଳାକାରମାନଙ୍କ କଳା ଓ ନୃତ୍ୟ ପରିବେଷଣ କରିବାର ପ୍ରୟାସ ଜାରି ରଖିଛି ଜିଲ୍ଲା ପ୍ରଶାସନ ଓ ମହୋତ୍ସବ କମିଟିର ଆୟୋଜକ।

ଗଂଜାମ ଜିଲ୍ଲାର ସମସ୍ତ ମନ୍ତ୍ରୀ, ବିଧାୟକ ଓ ସାଂସଦ ମାନେ ଆଜିର ଏହି ଉଦ୍ଘାଟନ ମହୋତ୍ସବରେ ଯୋଗଦାନ ଦେଇଥିଲେ। ପ୍ରବଳ ଜନା ସମାଗମକୁ ଦୃଷ୍ଟିରେ ରଖି ପୋଲସ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ ଏବଂ ବେଳାଭୂମି ଠାରୁ ବ୍ରହ୍ମପୁର ବାଇପାସ୍ ପର୍ଯ୍ୟନ୍ତ ପ୍ରାୟ ୩୦ପ୍ଲାଟୁନ ଫୋର୍ସ ମୁତୟନ କରିବା ସହ ସିସି ଟିଭି କ୍ୟାମେରା ଦ୍ୱାରା ସମସ୍ତ ଗତିବିଧି ଉପରେ ନଜର ରଖାଯାଇଛି ।