ଭୁବନେଶ୍ୱର: ଉଦଯାପିତ ହେଲା ‘ ସ୍ପୋର୍ଟ୍ସ ଆଇଟି ୨୦୨୦’ । ଉଦଯାପନି ଉତ୍ସବରେ ଯୋଗଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ  । ଇନ୍‌ଭେଷ୍ଟର ମାନେ ଓଡ଼ିଶାର କ୍ରୀଡ଼ା କ୍ଷେତ୍ରରେ  କିପରି ଇନ୍‌ଭେଷ୍ଟ କରିବେ ସେନେଇ ଅନୁଷ୍ଠିତ ହୋଇଛି ‘ସ୍ପୋର୍ଟ୍ସ ଆଇଟି ୨୦୨୦’  ।

ଏହି କାର୍ଯ୍ୟକ୍ରମରେ ସ୍ପୋର୍ଟ୍ସ ଇନ୍‌ଭେଷ୍ଟର ମାନଙ୍କୁ ସମ୍ବର୍ଦ୍ଧିତ କରିଛନ୍ତି ମୁଖ୍ୟମନ୍ତ୍ରୀ ।  ସ୍ପୋର୍ଟ୍ସ ହେକାଥନ ବିଜେତା ଟିମ୍‌କୁ ମଧ୍ୟ ପୁରଷ୍କୃତ କରିଛନ୍ତି ମୁଖ୍ୟମନ୍ତ୍ରୀ । ଏହି ପୁରଷ୍କାରରେ ରହିଛି ପ୍ୟାରିସ ଟିକେଟ୍‌ ।

ହେକାଥନ ପ୍ରତିଯୋଗିତାରେ ବିଜେତା ହୋଇଥିବା ଶ୍ରେଷ୍ଠ ଦଳ ଟିମ୍‌ ଇମ୍ପ୍ୟାକ୍ଟର୍ସକୁ ପ୍ୟାରିସ୍‌ ଟିକେଟ୍‌ ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ । ଆସନ୍ତା ସେପ୍ଟେମ୍ବରରେ ପ୍ୟାରିସ୍‌ରେ ହେବାକୁଥିବା ସବୁଠାରୁ ବଡ଼ ସ୍ପୋର୍ଟ୍ସ ଆଇଟି କାର୍ଯ୍ୟକ୍ରମରେ ଭାଗ ନେବ ଏହିଦଳ ।

ସେପଟେ ରାଜ୍ୟ ସରକାର କ୍ରୀଡା କ୍ଷେତ୍ରରେ ଅଧିକ ନିଯୁକ୍ତି ସୁଯୋଗ ପାଇଁ  ସ୍ପୋର୍ଟ୍ସ ଏଣ୍ଟରପ୍ରିନରସିପ୍‌କୁ ଅଧିକ ଗୁରୁତ୍ୱ ଦେଇଛନ୍ତି । ଏହି ଉତ୍ସବରେ କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା ଓ ଶିଳ୍ପମନ୍ତ୍ରୀ  ଦିବ୍ୟ ଶଙ୍କର ମିଶ୍ର ଓ ୫-ଟି ସଚିବ ଭି.କେ ପାଣ୍ଡିଆନ୍‌ ଉପସ୍ଥିତ ରହିଥିଲେ ।

ନୟାଗଡ଼: ଦଶପଲ୍ଲା ଉପ କାରାଗାରରେ ବିଚାରଧୀନ କଏଦୀର ମୃତ୍ୟୁ ହୋଇଛି । ମୃତ କଏଦୀ ହେଉଛନ୍ତି କୃଷ୍ଣ  ଚନ୍ଦ୍ର ପାତ୍ର । ସେ ତାଙ୍କ ମା ବାପା ଙ୍କୁ  ମାଡ଼ ମାରିଥିବା ମାମଲାରେ ୫ମାସ ହେବ ତାଙ୍କ ସ୍ତ୍ରୀଙ୍କ ସହ ଦଶପଲ୍ଲା ଉପ କାରାଗାର ରେ ଥିଲେ ।

ଗତକାଲି ଦିନରେ ତାଙ୍କର ପେଟରେ ଯନ୍ତ୍ରଣା ହେବାରୁ ତାଙ୍କୁ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଆଣିଥିଲେ । ସେଠାରୁ ଭଲ ହେବା ପରେ  ଜେଲ୍‌କୁ ନିଆଯାଇଥିଲେ । ଭୋରୁ ଅଧିକ ପେଟ ମାରିବାରୁ ତାଙ୍କୁ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

କରଞ୍ଜିଆ: ଚଳନ୍ତା ଟ୍ରକ୍‌ରେ ଲାଗିଲା ନିଆଁ । ଜଶୀପୁର ଥାନା ୪୯ ନମ୍ବର ଜାତୀୟ ରାଜପଥ ନିକଟ କୁଇତାରେ ଜଳିଲା ଟ୍ରକ୍‌ । ଚାଲୁଥିବା ଅବସ୍ଥାରେ ହିଁ ଟ୍ରକ୍‌ରେ ନିଆଁ ଲାଗିଥିଲା ।

ଟ୍ରକ୍‌ ପଛରେ ଆସୁଥିବା ଟ୍ରଲର ଚାଳକ ନିଆଁ ଲାଗିଥିବା ସମ୍ପର୍କରେ ସୂଚନା ଦେଇଥିଲେ । ନିଆଁ ଲାଗିଥିବା ଜାଣି ଗାଡ଼ିକୁ ରାସ୍ତା କଡ଼ରେ ଛିଡ଼ା କରିଥିଲା ଟ୍ରକ୍‌ ଡ୍ରାଇଭର ।

ଖବର ପାଇ ଅଗ୍ନିଶମ ବିଭାଗ ଆସି ନିଆଁକୁ ଆୟତ୍ତ କରିଛି । ଟ୍ରକ୍‌ରେ ଲୁହାପଥର ବୋଝେଇ ରହିଥିଲା । ଘଟଣାରେ କେହି ମଧ୍ୟ ଆହତ ହୋଇନାହାନ୍ତି ।

ବାଲିଗୁଡ଼ା: କନ୍ଧମାଳରେ ପୁଣି ଜନନୀ ଯନ୍ତ୍ରଣା । ଗାଁ କୁ ରାସ୍ତା ନଥିବାରୁ ପାଖାପାଖି ସାତ କିଲୋମିଟର ଟୋକେଇରେ ବୁହାହେଲେ ପ୍ରସୂତି ମହିଳା । କନ୍ଧମାଳ ଜିଲ୍ଲା ତୁମୁଡ଼ିବନ୍ଧ ବ୍ଳକ ଅନ୍ତର୍ଗତ କରୁକୁଡୁପା  ପଞ୍ଚାୟତର  ଶାନ୍ଦେବଣ୍ଡାଙ୍ଗି ଗାଁରେ ଘଟିଛି ଏଭଳି ଘଟଣା ।

ସୂଚନା ଅନୁଯାୟୀ, ସେହି ଗାଁର ଆଶିଷ ଦିଗାଲଙ୍କ ସ୍ତ୍ରୀ ରଜନୀ ଦିଗାଲଙ୍କୁ ଜନନୀ ଯନ୍ତ୍ରଣା ହୋଇଥିଲା । ଏନେଇ ଗାଁ ଲୋକେ ଆମ୍ବୁଲାନ୍ସକୁ ଫୋନ୍‌ କରିଥିଲେ  । କିନ୍ତୁ ରାସ୍ତା ଖରାପ ଯୋଗୁଁ ଆମ୍ବୁଲାନ୍ସ ଆସିପାରିନଥିଲା ।  ସମ୍ପର୍କୀୟ ଟୋକେଇରେ ବୋହି ଜଙ୍ଗଲ ରାସ୍ତା ଦେଇ ଶାନ୍ଦେବଣ୍ଡାଙ୍ଗୀ ରୁ ସିନ୍ଦୀପଙ୍କାଲ ଗ୍ରାମ ପର୍ଯ୍ୟନ୍ତ ବୋହି ଆଣିଥିଲେ ।

ପରେ ଏକ ଅଟୋ ସାହାଯ୍ୟରେ ତୁମୁଡିବନ୍ଧ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ ପ୍ରସୂତିଙ୍କୁ । ସେଠାରେ ମହିଳା ଜଣକ ଏକ ପୁତ୍ର ସନ୍ତାନକୁ ଜନ୍ମ ଦେଇଥିବାବେଳେ ଉଭୟ ସୁସ୍ଥ ଅବସ୍ଥାରେ ଘରକୁ ଫେରିଥିବା ଜଣାପଡିଛି ।

ସୂଚନା ପ୍ରକାରେ ସାନ୍ଦେ ବଣ୍ଡାଙ୍ଗୀ,ଗୁଗୁଡ଼ି ସୁଗା,ପୁନ୍ଦେଡି ୩ଟି ଗ୍ରାମକୁ ରାସ୍ତାନାହିଁ । ଫଳରେ ଗାଁ କୁ ଗାଡ଼ି ମୋଟର ଯାଇପାରେନାହିଁ ।  ଗ୍ରାମବାସୀ ଏହିପରି ବାରମ୍ବାର ରୋଗୀଙ୍କୁ କୁର୍ତ୍ତମଗଡ଼ ପର୍ଯ୍ୟନ୍ତ ଆଣିବାପାଇଁ ଏଭଳି ସମସ୍ୟାର ସାମ୍ନା କରନ୍ତି ।

ଚିଲିକା/ବ୍ରହ୍ମଗିରି: ଆଜିଠୁ ଚିଲିକାରେ ଆରମ୍ଭ ହୋଇଛି ଡଲ୍‌ଫିନ୍‌ ଗଣନା । ୧୮ଟି ଟିମ୍‌ ଥିବା ୧୩୩ ସଦସ୍ୟ ଏହି ଗଣନା କରୁଛନ୍ତି । କେନ୍ଦ୍ରୀୟ ଚିଲିକାରେ ୧୦ଟି ଟିମ୍‌ ଏବଂ ବାହ୍ୟ ଚିଲିକାରେ ୮ଟି ଟିମ୍‌ ଗଣନା କାମରେ ନିୟୋଜିତ ହୋଇଛନ୍ତି । ଜିପିଏସ୍‌ ଓ ବାଇନାକୁଲାର ସାହାଯ୍ୟରେ ଡଲ୍‌ଫିନ୍‌ଙ୍କୁ ଟ୍ରାକ କରାଯାଉଛି ।

ଗତବର୍ଷ ଡଲ୍‌ଫିନ୍‌ଙ୍କ ସଂଖ୍ୟା କମିଥିବା ବେଳେ ଏଥରର ଗଣନା ଉପରେ ସମସ୍ତଙ୍କ ନଜର ରହିଛି । ସକାଳ ୬ଟାରୁ ଆରମ୍ଭ ହୋଇଛି ଗଣନା ।  ସେପଟେ ଭିତରକନିକାରେ ବି ଆରମ୍ଭ ହୋଇଛି ଡଲ୍‌ଫିନ୍‌ ଗଣନା । ରାଜନଗର, କନିକା, ମହାକାଳପଡ଼ା, ଗହୀରମଥା ଓ କୁଜଙ୍ଗ ପରି ୫ଟି ରେଞ୍ଜରେ ଗଣନା କାମ ଆରମ୍ଭ ହୋଇଛି ।

ମୋଟ ୯ଟି ଟିମ୍‌ ଗଣନା କାମରେ ନିୟୋଜିତ ହୋଇଛନ୍ତି । ପ୍ରତି ଟିମ୍‌ରେ ରହିଛନ୍ତି ୪ରୁ ୫ ଜଣ ସଦସ୍ୟ । ଡଲଫିନ୍‌ ବିଶେଷଜ୍ଞ ମମତାଜ ଖାନ୍‌ ଓ ଶିବଚରଣ ପରିଡ଼ାଙ୍କ ନେତୃତ୍ୱରେ ସକାଳ ୬ଟାରୁ ଆରମ୍ଭ ହୋଇଛି ଗଣନା ।