ମୁମ୍ବାଇ: ମହାମାରୀ କରୋନାକୁ ନେଇ ଦୁନିଆ ଆତଙ୍କ ଭିତରେ ରହିଛି । ଭ୍ୟାକ୍ସିନ୍ ପ୍ରସ୍ତୁତି ପାଇଁ ସମସ୍ତ ଗବେଷଣା ଜାରି ରହିଛି । ଅନ୍ୟପଟେ କରୋନା ରୋଗୀଙ୍କୁ ସୁସ୍ଥ କରିବାକୁ ଚିକିତ୍ସକ ଆପଣାଉଛନ୍ତି ବିଭିନ୍ନ ପନ୍ଥା । ଦିଲ୍ଲୀରୁ ଟ୍ରାଏଲ୍ ଭାବେ ଆରମ୍ଭ ହୋଇଥିବା ପ୍ଲାଜମା ଥେରାପିରେ ମୁମ୍ବାଇରେ ପ୍ରଥମ ମୃତ୍ୟୁ ହୋଇଛି । ବୁଧବାର ରାତିରେ ମୁମ୍ବାଇ ଲୀଳାବତି ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ କରୋନା ସଂକ୍ରମିତଙ୍କ ମୃତ୍ୟୁ ହୋଇଥିବା ଜଣାପଡ଼ିଛି ।
ମେଡିକାଲ ପକ୍ଷରୁ ମିଳିଥିବା ସୂଚନା ଅନୁଯାୟୀ, ସଂକ୍ରମିତ ଜଣଙ୍କୁ ବିଳମ୍ବରେ ଚିକିତ୍ସା ପାଇଁ ଅଣାଯାଇଥିଲା । ସେ ନିମୋନିଆ ସହ କରୋନାରେ ସଂକ୍ରମିତ ଥିଲେ । ୫୩ ବର୍ଷୀୟ ଆକ୍ରାନ୍ତଙ୍କୁ ଏପ୍ରିଲ୍ ୨୫ରେ ଲୀଳାବତି ହସ୍ପିଟାଲରେ ଭର୍ତ୍ତି କରାଯାଇଥିଲା । ଯାଞ୍ଚ ପରେ ଜଣାପଡ଼ିଥିଲା ତାଙ୍କ ଠାରେ କରୋନା ଭୂତାଣୁ ଅଛି । ICMR ଠାରୁ ପ୍ଲାଜମା ଥେରାପି ଟ୍ରାଏଲ୍ ପାଇଁ ଅନୁମତି ମିଳିବା ପରେ ଆକ୍ରାନ୍ତଙ୍କୁ ପ୍ଲାଜମା ଦିଆଯାଇଥିଲା ।
ହସ୍ପିଟାଲ ସିଇଓ ଡକ୍ଟର ବି. ରବିଶଙ୍କରଙ୍କ ସୂଚନା ମୁତାବକ ଆକ୍ରାନ୍ତଙ୍କୁ ୨୦୦ ଏମ୍ଏଲ୍ ପ୍ଲାଜମା ଦିଆଯାଇଥିଲା । ପରେ ବି ତାଙ୍କୁ ଆଉ ପ୍ଲାଜମା ଦିଆଯାଇଥାନ୍ତା । କିନ୍ତୁ, ତାଙ୍କ ସ୍ଥିତି ବିଗିଡ଼ିବା ଦେଖି ପ୍ଲାଜମା ଦେବା ବନ୍ଦ କରି ଦିଆଯାଇଥିଲା ।
ପ୍ଲାଜମା ଥେରାପି ପରେ ଆକ୍ରାନ୍ତଙ୍କ ମୃତ୍ୟୁ ପରେ ଏବେ ଏହାକୁ ନେଇ ଆଶଙ୍କା ସୃଷ୍ଟି ହୋଇଛି । ଡାକ୍ତରଙ୍କ କହିବା କଥା ପ୍ଲାଜମା ଥେରାପି ବର୍ତ୍ତମାନ ଯାଏଁ ଗ୍ରହଣୀୟ ଚିକିତ୍ସା ପଦ୍ଧତି ନୁହେଁ । ଏହାକୁ କେବଳ ପରୀକ୍ଷଣ ଭାବେ ନିଆଯିବା ଉଚିତ୍ ।
ପ୍ଲାଜମା ଥେରାପିକୁ ନେଇ କୌଣସି ପ୍ରମାଣ ନାହିଁ,ଏବେ କେବଳ ଟ୍ରାଏଲ ଚାଲିଛି : କେନ୍ଦ୍ର
