ଟେକ୍ସାସ: କରୋନା ସଂକ୍ରମଣକୁ ନେଇ ସାରା ବିଶ୍ୱ ଏକ ପ୍ରକାର ଲକ୍‌ଡାଉନ୍‌ ହୋଇ ଯାଇଛି କହିଲେ ଚଳେ। ଚୀନାରୁ ଆରମ୍ଭ ହୋଇଥିବା କରୋନା ଭାଇରସ ସଂକ୍ରମଣ ଏବେ ୨ ଶହରୁ ଊର୍ଦ୍ଧ୍ୱ ଦେଶକୁ ବ୍ୟାପି ସାରିଲାଣି। ଏବେ ଏଥିରେ ବିଶେଷ କ୍ଷତିଗ୍ରସ୍ତ ହୋଇଛି ବିଶ୍ୱର ବିକାଶଶୀଳ ଦେଶ ଆମେରିକା। ପ୍ରତିଦିନ ଏଠାରେ ହଜାର ହଜାର ସଂଖ୍ୟାରେ କରୋନା ସଂକ୍ରମିତଙ୍କ ମୃତ୍ୟୁ ହେଉଥିବା ବେଳେ ହଜାର ହଜାର ନୂଆ ରୋଗୀଙ୍କୁ ଚିହ୍ନଟ କରାଯାଉଛି। ନ୍ୟୁୟର୍କ ଏହାର କେନ୍ଦ୍ରସ୍ଥଳ ହୋଇଥିବା ବେଳେ ଦେଶର ଅନ୍ୟ ଅଞ୍ଚଳରେ ମଧ୍ୟ ଲୋକେ ଆବଶ୍ୟକ ନ ଥିଲେ ଘରୁ ବାହାରୁ ନାହାନ୍ତି।

ଏମିତିକି ବିବାହ ପାଇଁ ପୂର୍ବରୁ ତାରିଖ ସ୍ଥିର ହୋଇଥିଲେ ମଧ୍ୟ ଲୋକେ ଏହାକୁ ଘୁଞ୍ଚାଇ ଦେଉଛନ୍ତି। ହେଲେ ଟେକ୍ସାସର ଅଷ୍ଟିନ ସହରରେ ଦେଖିବାକୁ ମିଳିଛି ଏକ ବ୍ୟତିକ୍ରମ। ଏଠାରେ ପୂର୍ବ ନିର୍ଦ୍ଧାରିତ ତାରିଖ ଅନୁଯାୟୀ ଏକ କପୁଲ ବିବାହ କରିଛନ୍ତି। ଅବଶ୍ୟ ଏମାନେ ଅନ୍‌ଲାଇନରେ ବିବାହ କରିଥିବା ବେଳେ ଅନ୍‌ଲାଇନରେ ମଧ୍ୟ ପାଖାପାଖି ୨ଶହ ଅତିଥି ଏହି ବିବାହରେ ଯୋଗ ଦେଇଥିବା ଜଣାପଡିଛି।

ଇଥନ ପୋଲାକ ଓ କ୍ୟାଥଲିନ ଦିଲଓ୍ବର୍ଥ ଏହି ବରକନ୍ୟା ମାର୍ଚ୍ଚ ୨୮ରେ ବିବାହ କରିଥିବା ଜଣାପଡିଛି। ତେବେ ଲକ୍‌ଡାଉନ ପାଇଁ ଏମାନେ ବିବାହ ଘୁଞ୍ଚାଇବାକୁ ଚାହୁଁ ନ ଥିବା ବେଳେ ସେମାନେ ତାଙ୍କର ସମସ୍ତ ଅତିଥିଙ୍କୁ ଇମେଲ ଯୋଗେ ପୂର୍ବରୁ ଏକଥା ଜଣାଇ ଦେଇଥିଲେ।

ଆଉ ଅତିଥିମାନେ ମଧ୍ୟ ଠିକ୍‌ ବିବାହ ଉତ୍ସବରେ ଯୋଗ ଦେବା ଭଳି ସଜେଇ ହୋଇ ଏହି ଅନ୍‌ଲାଇନ ବିବାହରେ ଯୋଗ ଦେଇ କରୋନା ସମୟରେ ପାଳନ କରାଯାଉଥିବା ଲକ୍‌ଡାଉନ ନିୟମକୁ ମାନିଥିଲେ।

ଚୀନକୁ ଟାର୍ଗେଟ କରିଛି ଆମେରିକା । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଚୀନକୁ ଇସାରାରେ ଧମକ । କରୋନା ସମ୍ବନ୍ଧରେ WHO ଏବଂ ଆନ୍ତର୍ଜାତୀୟ ସମ୍ପ୍ରଦାୟକୁ ଭୁଲ ତଥ୍ୟ ଦେଇଥିବାରୁ ଏହାର ପରିଣାମ ଭୋଗିବାକୁ ପଡ଼ିବ ବୋଲି ଟ୍ରମ୍ପ ଚେତାବନି ଦେଇଛନ୍ତି ।  ଚାଇନାର ଉହାନରୁ ଏହି ଭାଇରସ ସାରା ବିଶ୍ୱରେ ବ୍ୟାପିବାରେ ଲାଗିଛି । ଏଥିରେ ବର୍ତ୍ତମାନ ପର୍ଯ୍ୟନ୍ତ ଦୁନିଆରେ ୧,୧୯,୬୬୬ ଜଣଙ୍କର ମୃତ୍ୟୁ ଘଟିଛି ଏବଂ ପ୍ରାୟ ୨୦ ଲକ୍ଷ ଲୋକ ସଂକ୍ରମିତ ହୋଇଛନ୍ତି ।

ତେବେ ସୋମବାର ହ୍ୱାଇଟ୍‌ ହାଉସରେ ଏକ ସାମ୍ବାଦିକ ସମ୍ମିଳନୀରେ ଜଣେ ସାମ୍ବାଦିକ ଟ୍ରମ୍ପଙ୍କୁ ବାରମ୍ବାର ଗୋଟିଏ ପ୍ରଶ୍ନ ପଚାରିଥିଲେ । ଯଦି ଚୀନ ଏହି ଭାଇରସ ପାଇଁ ଦାୟୀ ତେବେ ଏପର୍ଯ୍ୟନ୍ତ ଚୀନ ଉପରେ କୌଣସି ଖରାପ ପ୍ରଭାବ ପଡୁନି କାହିଁକି ? ଏହାର ଉତ୍ତରରେ ଟ୍ରମ୍ପ କହିଥିଲେ ଯେ,  ଆପଣ କିପରି ଜାଣିଲେ ଚୀନ ଉପରେ ଏହାର ଖରାପ ପ୍ରଭାବ ପଡ଼ିନାହିଁ ବୋଲି ? ଚୀନ ଉପରେ କଣ ପ୍ରଭାବ ପଡ଼ିବ ତାହା ମୁଁ ଆପଣଙ୍କୁ କହିବି ନାହିଁ, ଆପଣ ନିଜେ ଏହା ଜାଣିପାରିବେ ବୋଲି ଟ୍ରମ୍ପ କହିଥିଲେ । ସେପଟେ ସିନେଟର ଷ୍ଟିଭ ଡେନସ୍ ଟ୍ରମ୍ପଙ୍କୁ ଏକ ଚିଠି ଲେଖି ଆମେରିକା ସରକାରଙ୍କୁ ଚୀନ୍‌ର ଚିକିତ୍ସା ଯୋଗାଣ ତଥା ଯନ୍ତ୍ରପାତି ଉପରେ ନିର୍ଭରଶୀଳତାକୁ ବନ୍ଦ କରିବାକୁ ଅନୁରୋଧ କରିଛନ୍ତି । ଚୀନ୍ ଉପରେ ନିର୍ଭରଶୀଳତା ହ୍ରାସ କରିବାକୁ ସୋମବାର ରିପବ୍ଲିକାନ୍ ପାର୍ଟିର ଚାରିଜଣ ସାଂସଦ ମଧ୍ୟ ଏକ ବିଲ୍ ଆଗତ କରିଛନ୍ତି।

ଆମେରିକାରେ ଲକ୍‌ଡାଉନ ବହୁତ ଶୀଘ୍ର ଖୋଲିବ ବୋଲି ଟ୍ରମ୍ପ କହିଛନ୍ତି । କରୋନା ଭାଇରସ୍ ପାଇଁ ଆମେରିକାରେ ୩୦ ଏପ୍ରିଲ ପର୍ଯ୍ୟନ୍ତ ଲକ୍‌ଡାଉନ ଜାରି କରାଯାଇଛି । କରୋନା ଭାଇରସ ଠାରୁ ବଞ୍ଚିାବା ପାଇଁ ସାମାଜିକ ଦୂରତା ସୃଷ୍ଟି କରିବାକୁ କିଛି ନିର୍ଦ୍ଦେଶାବଳୀ ଜାରି କରାଯାଇଛି । ଦେଶର ୯୫% ରୁ ଅଧିକ ଲୋକ ଏହି ମାରାତ୍ମକ କରୋନା ଦ୍ୱାରା ପ୍ରଭାବିତ ହୋଇଛନ୍ତି । ଟ୍ରମ୍ପ କହିଛନ୍ତି, “ମୁଁ ମୋର ଦଳ ଏବଂ ବରିଷ୍ଠ ବିଶେଷଜ୍ଞ ମାନଙ୍କ ସହିତ ଆଲୋଚନା କରୁଛି ଏବଂ ଦେଶ ଖୋଲିବା ପାଇଁ ଯୋଜନା ସଂପୂର୍ଣ୍ଣ କରିବାକୁ ଆମେ ଅତି ନିକଟତର ।

ସେ କହିଛନ୍ତି ଯେ ମୋର ପ୍ରଶାସନର ଯୋଜନା ଏବଂ ନିର୍ଦ୍ଦେଶାବଳୀ ଆମେରିକାର ଲୋକଙ୍କୁ ସାଧାରଣ ଜୀବନ ଆରମ୍ଭ କରିବାକୁ ଆତ୍ମବିଶ୍ୱାସ ଦେବ । ରାଷ୍ଟ୍ରପତି କହିଛନ୍ତି ଯେ ଏହା ଆମର ଆବଶ୍ୟକ । ଆମେ ଆମ ଦେଶକୁ ଖୋଲିବାକୁ ଚାହୁଁଛୁ, ଆମେ ପୁଣି ସାଧାରଣ ଜୀବନଯାପନ କରିବାକୁ ଚାହୁଁଛୁ ।  ଆମ ଦେଶ ଖୋଲିବାକୁ ଯାଉଛି ଏବଂ ଏହା ସଫଳତାର ସହ ଖୋଲିବ। ସେପଟେ ମଙ୍ଗଳବାର ଦିନ ଅତି କମରେ୧୩୩୪ଜଣ ସଂକ୍ରମିତ ହୋଇଥିବା ଲୋକଙ୍କର ଜୀବନ ଯାଇଥିଲା ।  ଏବଂ ୨୪,୮୯୫ଟି ନୂଆ କରୋନା ପଜିଟିଭ ସାମ୍ନାକୁ ଆସିଥିଲା । ବର୍ତ୍ତମାନ ପର୍ଯ୍ୟନ୍ତ ଆମେରିକାରେ ୫.୮ ଲକ୍ଷ ଲୋକ ସଂକ୍ରମିତ ହୋଇଥିବା ଜଣାପଡିଛି ।

ନୂଆଦିଲ୍ଲୀ: କରୋନା ଏବଂ ଲକଡାଉନ୍ ସମୟରେ ଯେତେବେଳେ ଦେଶରେ ଯାତ୍ରୀବାହୀ ବିମାନ ଚାଲୁ ନାହିଁ, ସେହି ସମୟରେ ଭାରତୀୟ ଏୟାରଲାଇନ୍ସ ଏହି ଯୁଦ୍ଧ କାଳୀନ ପରିସ୍ଥିତିରେ ନିଜର ଯୋଗଦାନ ଦେଇଛି । ଭାରତୀୟ ଏୟାରଲାଇନ୍ସ ଲକଡାଉନ୍ ପରେ ୬୨୬ ଉଡ଼ାଣ ଦ୍ୱାରା ଦେଶ ବିଦେଶର ୭ ଲକ୍ଷ କିଲୋମିଟର ପର୍ଯ୍ୟନ୍ତ ଯାତ୍ରା କରି ୪୩୦୦ ଟନ କୋର୍ଗୋ ବିତରଣ କରିଛି । ଏଥିରେ ଔଷଧ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଜିନିଷ ଅନ୍ତର୍ଭୁକ୍ତ ରହିଛି । କାର୍ଗୋ ବିମାନ ଚଳାଚଳ କରୁଥିବା ଏୟାରଲାଇନ୍ସ ମଧ୍ୟରେ ଏୟାର ଇଣ୍ଡିଆ, ସ୍ପାଇସଜେଟ, ଇଣ୍ଡିଗୋ, ଗୋଏୟାର୍, ଏୟାର ଏସିଆ ଏବଂ ବ୍ଲୁ ଡାର୍ଟ ଅନ୍ତର୍ଭୁକ୍ତ।

ଏହି ବିମାନଗୁଡ଼ିକ ଦ୍ୱାରା ମାସ୍କ, ଗ୍ଲୋଭସ୍ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଜିନିଷ ପରିବହନ କରାଯାଇଥିଲା | ଏଥିମଧ୍ୟରେ ସରକାରଙ୍କ ଦ୍ୱାର ପଠାଯାଉଥିବା ମାଗଣା ଔଷଧ ମଧ୍ୟ ଅନ୍ତର୍ଭୁକ୍ତ ଥିଲା। ଏହିପରି ୨୧୪ ଟି କାର୍ଗୋ ବିମାନ ମାଧ୍ୟମରେ ଦେଶର ଦୁର୍ଗମ ଅଞ୍ଚଳକୁ ଔଷଧ ଯୋଗାଇ ଦିଆଯାଉଥିଲା। ଏୟାର ଇଣ୍ଡିଆ ଏବଂ ଏହାର ସହାୟକ କମ୍ପାନୀ ଆଲାଇନ୍ସ ଏୟାର ଏହିପରି ୧୨୮ ଟି ବିମାନ ଚଳାଚଳ କରିଥିଲା ​​ଏବଂ ଲାଇଫଲାଇନ ଫ୍ଲାଇଟ୍ ସ୍କିମ୍ ଅଧୀନରେ ୨ ଲକ୍ଷ କିଲୋମିଟର ଅତିକ୍ରମ କରିଥିଲା।

ଘରୋଇ ଏୟାରଲାଇନ୍ସ ସ୍ପାଇସଜେଟ୍ ୨୮୬ ଟି ବିମାନ ଚଳାଚଳ କରି ୪ ଲକ୍ଷ କିଲୋମିଟର ଅତିକ୍ରମ କରିଛି, ଯେଉଁଥିରେ ୮୭ ଟି ଆନ୍ତର୍ଜାତୀୟ ବିମାନ ଅଛି | ସେହିଭଳି ଇଣ୍ଡିଗୋ ପ୍ରାୟ ୨୨ ହଜାର କିଲୋମିଟର ଅତିକ୍ରମ କରି ୨୫ କାର୍ଗୋ ବିମାନ ଚଳାଚଳ କରିଥିଲା ​​ଏବଂ ୨୧.୭୭ ଟନ୍ ମାଲ ପରିବହନ କରିଥିଲା ​​| ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଲାଇଫଲାଇନ ବିମାନ ଅଧୀନରେ ୨୧୪ ଟି ସ୍ୱତନ୍ତ୍ର ବିମାନ ଚଳାଚଳ କରିଥିଲା।

ଉଲ୍ଲେଖନୀୟ କଥା ହେଉଛି, ମାର୍ଚ୍ଚ ୨୪ ରେ, ପ୍ରଧାନମନ୍ତ୍ରୀ ମୋଦୀ ଦେଶବ୍ୟାପୀ ୨୧ ଦିନର ଲକଡାଇନ ଘୋଷଣା କରିଥିଲେ, ଯାହା ମାର୍ଚ୍ଚ ୨୫ ରୁ ଏପ୍ରିଲ ୧୪ ପର୍ଯ୍ୟନ୍ତ ବଳବତ୍ତର ରହିଛି। ଏହି ସମୟ ମଧ୍ୟରେ ବିମାନ, ଟ୍ରେନ୍, ବସ୍, ସମସ୍ତ ପ୍ରକାର ପରିବହନ ବନ୍ଦ ରହିଥିଲା। ବର୍ତ୍ତମାନ ଆଜି ଅର୍ଥାତ୍ ୧୪ ଏପ୍ରିଲରେ ପ୍ରଧାନମନ୍ତ୍ରୀ ମୋଦୀ ଏହାକୁ ମେ ୩ ପର୍ଯ୍ୟନ୍ତ ବୃଦ୍ଧି କରିବାକୁ ଘୋଷଣା କରିଛନ୍ତି।

ଏହାଦ୍ୱାର ବିମାନ ସେବା ଗୁଡ଼ିକୁ ବହୁ କ୍ଷତି ସହିବାକୁ ପଡ଼ୁଛି । କିନ୍ତୁ ଦେଶରେ କରୋନା ବୃଦ୍ଧି ହେତୁ ସରକାରଙ୍କ ପାଖରେ ଅନ୍ୟ କୌଣସି ଉପାୟ ନାହିଁ। ସଂପୂର୍ଣ୍ଣ ଲକଡାଉନ୍ ସତ୍ତ୍ୱେ ଦେଶରେ କରୋନା ଭାଇରସ୍ ଏହାର ବ୍ୟାପକ ପ୍ରଭାବ ଦେଖାଉଛି | ଏପର୍ଯ୍ୟନ୍ତ କରୋନା ସଂକ୍ରମିତଙ୍କ ସଂଖ୍ୟା ୧୦,୩୬୩ ରେ ପହଞ୍ଚିଛି ଏବଂ ୩୩୯ ଜଣ ଲୋକ ଏଥିରେ ପ୍ରାଣ ହରାଇଛନ୍ତି।

ନୂଆଦିଲ୍ଲୀ: ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତା ୩ ତାରିଖ ପର୍ଯ୍ୟନ୍ତ ଲକଡାଉନ୍ ବୃଦ୍ଧି କରିବାକୁ ଘୋଷଣା କରିଛନ୍ତି । କିନ୍ତୁ ଏବେ ବି କେଉଁସବୁ ସେକ୍ଟରକୁ କୋହଳ କରାଯିବ ସେନେଇ କୌଣସି ସୂଚନା ଦେଇ ନାହାଁନ୍ତି । ବାସ୍ତବରେ ଦେଶକୁ ସମ୍ବୋଧିତ କରିବାବେଳେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, କେନ୍ଦ୍ର ସରକାର ଏବଂ ରାଜ୍ୟ ସରକାର ମିଳିତ ଭାବେ ଚାଷୀଙ୍କ ସମସ୍ୟାକୁ କମ୍ କରିବାକୁ ଉଦ୍ୟମ କରୁଛନ୍ତି । ତେବେ କେଉଁ ବିଭାଗକୁ କୋହଳ କରାଯିବ ସେନେଇ ଆସନ୍ତାକାଲି ସରକାରଙ୍କ ଦ୍ୱାରା ନିର୍ଦ୍ଦେଶାବଳୀ ପ୍ରକାଶ ପାଇବ।

ବାସ୍ତବରେ ଦେଶରେ ୨ୟ ଥରର ଲକଡାଉନରେ ଅନେକ ବିଭାଗ କୋହଳ ହେବ ବୋଲି ଆଶା କରାଯାଉଥିଲା, କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଅଭିଭାଷଣରେ ଏନେଇ କୌଣସି ଘୋଷଣା କରିନାହାଁନ୍ତି । ତେବେ ଆସନ୍ତାକାଲି ସରକାର ଏକ ଗାଇଡଲାଇନ ପ୍ରକାଶ କରିବେ ବୋଲି ସେ କହିଛନ୍ତି । ଏଥିରୁ ସ୍ପଷ୍ଟ ଯେ କେଉଁ ସେକ୍ଟରକୁ ରିହାତି ମିଳିବ ତାକୁ ନେଇ  ଆଶା ଏପର୍ଯ୍ୟନ୍ତ ମଧ୍ୟ ରହିଛି । ଆସନ୍ତାକାଲି କେଉଁ ସେକ୍ଟରରେ ଏବଂ ସରକାର କେତେ କୋହଳ କରିବେ ତାହା ଗାଇଡଲାଇନରେ ପ୍ରକାଶ ପାଇବ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମ୍ବୋଧନ ପରେ କେନ୍ଦ୍ର ମନ୍ତ୍ରୀ ପ୍ରକାଶ ଜାବଡେକର କହିଛନ୍ତି, ଯେ ପ୍ରଧାନମନ୍ତ୍ରୀଙ୍କ ଦ୍ୱାରା ଘୋଷଣା କରାଯାଇଥିବା ନିର୍ଦ୍ଦେଶାବଳୀ ଖୁବ ଶୀଘ୍ର ପ୍ରକାଶ ପାଇବ। ସେ କହିଛନ୍ତି ଯେ ଏହା ପ୍ରଧାନମନ୍ତ୍ରୀଙ୍କ ଭାଷଣ  ଦୂରଦୃଷ୍ଟି ସମ୍ପନ୍ନ ଏବଂ ସମ୍ବେଦନଶୀଳ ଥିଲା । ଏହା ଭାରତର ଲୋକଙ୍କ ସହ ଏକ ସଂଳାପ ଥିଲା । ସେ ସାତୋଟି ପ୍ରସଙ୍ଗରେ ଲୋକଙ୍କ ସମର୍ଥନ ଲୋଡିଥିଲେ ।

ନୂଆଦିଲ୍ଲୀ: କରୋନା ଭାଇରସ ମହାମାରୀ ମଧ୍ୟରେ ଭାରତରେ ଲକଡାଉନ ଅବଧି ବୃଦ୍ଧି ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଘୋଷଣାକୁ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ସ୍ୱାଗତ କରିଛି। WHO ର ଆଞ୍ଚଳିକ ନିର୍ଦ୍ଦେଶକ ଡକ୍ଟର ପୁନମ୍ ଖେତ୍ରପାଲ ସିଂ କହିଛନ୍ତି, “ବିଶ୍ୱ ସ୍ୱାସ୍ଥ୍ୟ ସଂଗଠନ COVID-19 ରୋକିବା ପାଇଁ ଭାରତ ଦ୍ୱାରା ନିଆଯାଇଥିବା ପଦକ୍ଷେପକୁ ପ୍ରଶଂସା କରୁଛି। ଏହି ୬ ସପ୍ତାହର ଲକଡାଉନ ସମୟରେ କରୋନା ଭାଇରସ୍ ରୋଗୀଙ୍କୁ ପୃଥକ କରିବା, ସେମାନଙ୍କ ଚିହ୍ନଟ କରିବା, ଏବଂ ସାମାଜିକ ଦୂରତାକୁ ପ୍ରଭାବଶାଳୀ ଭାବରେ ଲାଗୁ କରିବା ଦିଗରେ ସହାୟକ ହେବ। ”

WHO କହିଛି ଯେ ଅନେକ ଚ୍ୟାଲେଞ୍ଜେସ୍ ସତ୍ତ୍ୱେ ମହାମାରୀ ମୁକାବିଲା ପାଇଁ ଭାରତ ଦୃତ ଗତିରେ ଏହାର ପ୍ରତିବଦ୍ଧତା ପ୍ରଦର୍ଶନ କରିଛି। ଏହି କଷ୍ଟଦାୟକ ସମୟରେ ପ୍ରଶାସନ ଏବଂ ଡାକ୍ତରୀ କର୍ମଚାରୀଙ୍କ ଯେତିକି ଦାୟିତ୍ୱ ରହିଛି ସେତିକି ସମାଜର ମଧ୍ୟ ରହିଛି । ସମସ୍ତଙ୍କ ପାଇଁ ପୂର୍ଣ୍ଣ ସାମର୍ଥ୍ୟରେ ସହଯୋଗ କରିବା ଏବଂ ଭାଇରସକୁ ଏକାଠି ପରାସ୍ତ କରିବାର ସମୟ ଆସିଛି।

ମଙ୍ଗଳବାର ଦେଶକୁ ସମ୍ବୋଧନ ଜଣାଇ ପ୍ରଧାନମନ୍ତ୍ରୀ କହିଛନ୍ତି ଯେ, କରୋନା ବିରୋଧରେ ଏହି ଯୁଦ୍ଧ ଜାରି ରଖିବାକୁ ହେଲେ ଆମକୁ ସଜାଗ ରହିବାକୁ ପଡିବ, ପରିସ୍ଥିତି ଉପରେ ତୀକ୍ଷ୍ଣ ନଜର ରଖିବାକୁ ହେବ ଏବଂ କଠୋର ପଦକ୍ଷେପ ନେବାକୁ ପଡ଼ିବ। ସେ କହିଛନ୍ତି ଯେ ନୂଆ ହଟସ୍ପଟ୍ ସୃଷ୍ଟି ଆମ ପାଇଁ ଏକ ନୂଆ ଚ୍ୟାଲେଞ୍ଜ ସୃଷ୍ଟି କରିବ। ଆଗାମୀ ଚ୍ୟାଲେଞ୍ଜ ବିଷୟରେ ସେ କହିଛନ୍ତି ଯେ ଆସନ୍ତା ସପ୍ତାହରେ କରୋନା ବିରୋଧରେ କଡା କାର୍ଯ୍ୟାନୁଷ୍ଠାନ ବୃଦ୍ଧି କରାଯିବ। ପ୍ରତ୍ୟେକ ରାଜ୍ୟ ପରୀକ୍ଷା କରାଯିବ, କେତେ ଲକଡାଉନ୍ ଅନୁସରଣ କରାଯାଇଛି, ଏହାର ମୂଲ୍ୟାଙ୍କନ କରାଯିବ। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଯେଉଁ ଅଞ୍ଚଳରେ ନୂତନ ହଟସ୍ପଟ୍ ହେବ ନାହିଁ ଅର୍ଥାତ ଯେଉଁ ଅଞ୍ଚଳରେ କରୋନା ଭାଇରସ ଆକ୍ରାନ୍ତଙ୍କ ସଂଖ୍ୟା କମ ରହିବ ସେଠାରେ ଏପ୍ରିଲ ୨୦ରୁ ଜରୁରୀ କାର୍ଯ୍ୟକଳାପ ପାଇଁ ଅନୁମତି ଦିଆଯିବ ।