ନନ୍ଦିଘୋଷ ବ୍ୟୁରୋ: ଭୋଗରାଇରୁ ପଶ୍ଚିମବଙ୍ଗକୁ ପ୍ରତିଦିନ ଚୋରା ବାଲି ଚାଲାଣ ହେଉଛି । ଶହ ଶହ ଟ୍ରକ୍ ବାଲିକୁ ବେଆଇନ ଭାବେ ପଶ୍ଚିମବଙ୍ଗ ବାଲି ମାଫିଆ ନେଉଥିବା ବେଳେ ଖଣି ବିଭାଗ ଓ ପୋଲିସ ଚୁପ୍ କାହିଁକି ବୋଲି ପ୍ରଶ୍ନ କରିଛନ୍ତି ଭୋଗରାଇ ବିଜେଡି ବିଧାୟକ ଗୌତ୍ତମ ବୁଦ୍ଧ ଦାସ । ଏନେଇ ବର୍ଡରରେ ବାଲି ମାଫିଆଙ୍କ ଦ୍ଵାରା କିଛି ଲୋକ ଆହତ ହୋଇଥିବା ଜଣାଯାଇଛି । ସରକାରୀ ସ୍ତରରେ ବାଲି ଖାଦାନକୁ ନିଲାମ ଦିଆଯାଉନାହିଁ । ଯାହା ଫଳରେ ଶହ ଶହ ଟ୍ରକ୍ ବାଲି ଚୋରା ଚାଲାଣ ହେଉଛି । କିଛି ଦିନ ପୂର୍ବରୁ ବାଲେଶ୍ୱର ସାଂସଦ ପ୍ରତାପ ଷଡ଼ଙ୍ଗୀ ସୁବର୍ଣ୍ଣରେଖାରୁ ବାଲି ଚାଲାଣ ହେଉଥିବା ନେଇ ଖୋଦ୍ ପ୍ରକାଶ କରିଥିଲେ । ଦିନକୁ ଦିନ ଖୁଲମ୍ ଖୁଲା ବାଲି ଚାଲାଣ ହେଉଛି । ଏଥିରେ ଶାସକ ଦଳର ସ୍ଥାନୀୟ ନେତାଙ୍କ ପ୍ରଚ୍ଛନ୍ନ ହାତ ରହିଥିବା ଅଭିଯୋଗ ହୋଇଛି। ବାଲି ଚୋରା ଚାଲାଣ ରୋକିବା ପାଇଁ ପ୍ରଶାସନ ଓ ପୋଲିସ ଶକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଭୋଗରାଇରୁ ପଶ୍ଚିମବଙ୍ଗ ପର୍ଯ୍ୟନ୍ତ ଯାଇଥିବା ୩ଟି ରାସ୍ତାରେ ତନଖି ଫାଟକ କରାଯାଉ ବୋଲି ଦାବି କରିଛନ୍ତି ବିଧାୟକ ।
ମହିଳାଙ୍କ ସନ୍ଦେହ ଜନକ ମୃତ୍ୟୁ, ପୋଲିସର ତଦନ୍ତ ଜାରି
ନନ୍ଦିଘୋଷ ବ୍ୟୁରୋ: କଲମପୁର ଥାନା ମା’ ଲଙ୍କେଶ୍ୱରୀ ମନ୍ଦିର ନିକଟରେ ଜଣେ ବିବାହିତା ମହିଳାଙ୍କ ସନ୍ଦେହ ଜନକ ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ। ମୃତ ମହିଳା ଜଣକ ହେଲେ ଦୀପାଞ୍ଜଳି ନିମୁନିଆ। ଏହା ଆତ୍ମହତ୍ୟା ନୁହେଁ, ବରଂ ହତ୍ୟା କରାଯାଇଥିବା ନେଇ ଝିଅର ବାପଘର ପକ୍ଷରୁ ଥାନାରେ ଲିଖିତ ଅଭିଯୋଗ ହୋଇଛି। ସୂଚନା ଅନୁସାରେ, ପ୍ରାୟ ୪ ବର୍ଷ ତଳେ ବକ୍ସି ତୁଳସୀପାଲି ଗ୍ରାମର ଦୀପାଞ୍ଜଳିଙ୍କ ବିବାହ କଲମପୁର ଲଙ୍କେଶ୍ୱରୀ ମନ୍ଦିର ନିକଟସ୍ଥ ଅଲେଖ ନିମୁନିଆଙ୍କ ସହ ହୋଇଥିଲା। ଆଜି ସକାଳ ପ୍ରାୟ ୭ଟା ସମୟରେ ଦୀପାଞ୍ଜଳି ଆତ୍ମହତ୍ୟା କରିଥିବା ନେଇ ଝିଅର ଦାଦା ଧର୍ମରାଜ ପୂଜାରୀ ଓ ମା’ ପଙ୍କଜିନୀ ପୂଜାରୀ ଖବର ପାଇଥିଲେ। ଖବର ପାଇ ବାପଘର ଲୋକେ ଘଟଣାସ୍ଥଳରେ ପହଞ୍ଚିବା ବେଳକୁ ଘର ଭିତରେ କପଡ଼ାରେ ଦୀପାଞ୍ଜଳିଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲେ। ଏହା ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ଦାବି କରି ପରିବାର ଲୋକେ କଲମପୁର ପୋଲିସ ନିକଟରେ ଅଭିଯୋଗ କରିଛନ୍ତି। ଖବର ପାଇ କଲମପୁର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ଘଟଣାର ତଦନ୍ତ ଜାରି ରଖିଛି।
ସୋର ପୂର୍ବତନ ସବ୍ଜେଲରଙ୍କ ଭିଡିଓ ଭାଇରାଲ
ନନ୍ଦିଘୋଷ ବ୍ୟୁରୋ: ବାଲେଶ୍ୱର ଜିଲ୍ଲା ସୋର ଉପକାରାଗାରର ଜଣେ ପୂର୍ବତନ ସବ୍ଜେଲରଙ୍କ ଭିଡିଓ ସାମାଜିକ ଗଣମାଧ୍ୟମରେ ପ୍ରଘଟ ହେବା ପରେ ଏହାକୁ ନେଇ ଚର୍ଚ୍ଚା ଜୋର ଧରିଛି। ସମ୍ପୃକ୍ତ ସବ୍ଜେଲର ଜଳେଶ୍ୱର ଜେଲକୁ ବଦଳି ହେବାର କିଛି ମାସ ପରେ ଏହି ଭିଡିଓ ପ୍ରଘଟ ହୋଇଥିବା ଜଣାପଡ଼ିଛି। ପ୍ରଘଟ ଭିଡିଓରେ ଜଣେ ବ୍ୟକ୍ତି ନିଶାସକ୍ତ ଅବସ୍ଥାରେ ଟେବୁଲ ଉପରେ ଶୋଇଥିବା ଏବଂ ଚେୟାରରେ ମଳତ୍ୟାଗ କରିଥିବା ଦୃଶ୍ୟ ରହିଛି। ନିକଟରେ ଜଣେ କର୍ମଚାରୀ ଛିଡ଼ା ହୋଇଥିବା ମଧ୍ୟ ଦେଖାଯାଉଛି। ଭିଡିଓଟି କିଏ ଏବଂ କେବେ ସୁଟିଂ କରିଥିଲେ, ସେ ସମ୍ପର୍କରେ ସ୍ପଷ୍ଟ ତଥ୍ୟ ମିଳିନାହିଁ । ଏହାର ପାରିପାର୍ଶିକ ଦୃଶ୍ୟ ସୋର ଉପକାରାଗାର କାର୍ଯ୍ୟାଳୟ ସହ ସମ୍ପୃକ୍ତ ବୋଲି ଦାବି ହେଉଛି। ତେବେ ଭିଡିଓରେ ଥିବା ବ୍ୟକ୍ତି ପୂର୍ବତନ ସବ୍ଜେଲର ବୋଲି ଜଣାପଡିଛି । ସମ୍ପୃକ୍ତ ଅଧିକାରୀଙ୍କ ବଦଳି ପରେ ଏହି ଭିଡିଓ ପ୍ରଘଟ ହେବା ଘଟଣାକୁ ନେଇ ବିଭିନ୍ନ ଆଲୋଚନା ହେଉଛି। ଭିଡିଓଟି କେବେ ଓ କେଉଁ ପରିସ୍ଥିତିରେ ସୁଟିଂ ହୋଇଥିଲା ଏବଂ କିଏ ଏହାକୁ ସାମାଜିକ ଗଣମାଧ୍ୟମରେ ପ୍ରଘଟ କରିଛି, ତାହା ତଦନ୍ତ ପରେ ସ୍ପଷ୍ଟ ହେବ। ଏହି ଭିଡିଓକୁ ନେଇ ପୂର୍ବତନ ଜେଲରକୁ ପଚାରିବାରୁ ସେ ଏହାକୁ ଖଣ୍ଡନ କରିଛନ୍ତି। ଏହି ଭିଡିଓ ତାଙ୍କର ନୁହେଁ, ବରଂ ଏହି ଭିଡିଓକୁ ଏଡିଟ କରାଯାଇଛି ବୋଲି ସେ କହିଛନ୍ତି।
ଦକ୍ଷିଣରେ ଶକ୍ତିଶାଳୀ ହେଲା ଇଣ୍ଡି ମେଣ୍ଟ, ବିଜୟଙ୍କ TVK ସାମିଲ
ନନ୍ଦିଘୋଷ ବ୍ୟୁରୋ: ଦକ୍ଷିଣରେ ବଢ଼ିଲା ଇଣ୍ଡି ମେଣ୍ଟର ଶକ୍ତି। ଇଣ୍ଡି ମେଣ୍ଟରେ ସାମିଲ ହେଲା ତାମିଲଗା ଭେଟ୍ଟରି କାଝାଗମ ବା ଟିଭିକେ । ଅଭିନେତା ତଥା ରାଜନେତା ବିଜୟ ନେତୃତ୍ବାଧୀନ ଟିଭିକେ ଇଣ୍ଡି ମେଣ୍ଟରେ ସାମିଲ ହେବା ପରେ ଏହାର ପ୍ରଭାବ ଜାତୀୟ ରାଜନୀତି ଉପରେ ପଡ଼ିଛି। ଇଣ୍ଡି ମେଣ୍ଟରେ ଟିଭିକେର ସାମିଲ ହେବା ଘଟଣାକୁ ଐତିହାସିକ କହିଛି ରାଜ୍ୟ କଂଗ୍ରେସ। ଚେନ୍ନାଇ ସ୍ଥିତ ତାମିଲନାଡୁ କଂଗ୍ରେସ କମିଟି ଅଫିସରେ ବସିଥିବା ବୈଠକରେ ଟିଭିକେ, ସିପିଏମ, ସିପିଆଇ, ଭିସିକେ, ଏମଡିଏମକେ ଓ ଆଇୟୁଏମଏଲ ସାମିଲ ହୋଇଥିଲେ। ସିଇସି ଜ୍ଞାନେଶ କୁମାରଙ୍କ ଇସ୍ତଫା ଦାବି ନେଇ ସାରା ଦେଶରେ ଚାଲିଥିବା ଆନ୍ଦୋଳନ ପରିପ୍ରେକ୍ଷୀରେ ଇଣ୍ଡି ମେଣ୍ଟରେ ଟିଭିକେ ସାମିଲ ହେବା ଘଟଣା ଏହି ଆନ୍ଦୋଳନକୁ ଅଧିକ ଶକ୍ତିଶାଳୀ କରିବ। ଅନୁଷ୍ଠିତ ବୈଠକରେ ଟିଭିକେ ପକ୍ଷରୁ ସାମିଲ ହୋଇଥିଲେ ଅଧବ ଅର୍ଜୁନ ଓ ମାରିଆ ଉଇଲସନ। ଆସନ୍ତା ଅକ୍ଟୋବର ୧୩, ୧୪ ଓ ୧୫ରେ ଚେନ୍ନାଇରେ ସିଇସି ପ୍ରସଙ୍ଗରେ ଆନ୍ଦୋଳନ କରାଯିବ ଏବଂ ଏଥିରେ ସମସ୍ତ ୭ଟି ଯାକ ଦଳ ସାମିଲ ହେବେ ।
ସୋସିଆଲ ମିଡିଆ ଇନଫ୍ଲୁଏନ୍ସରଙ୍କ ହତ୍ୟା ପଛରେ ଗ୍ୟାଙ୍ଗଷ୍ଟର !
ନନ୍ଦିଘୋଷ ବ୍ୟୁରୋ: ପଞ୍ଜାବୀ ସୋସିଆଲ ମିଡିଆ ଇନଫ୍ଲୁଏନ୍ସର ଏବଂ ମେକଅପ୍ ଆର୍ଟିଷ୍ଟ ମ୍ୟାଡ ସନ୍ଧୁଙ୍କ ହତ୍ୟା ମାମଲାରେ ଆସିଛି ନୂଆ ମୋଡ । ତାଙ୍କର ହତ୍ୟା ପାଇଁ ଗ୍ୟାଙ୍ଗଷ୍ଟାର ଗୋଲ୍ଡି ଢିଲୋନ୍ ନିଜକୁ ଦାୟୀ କରିଛି । କେବଳ ଗୋଲ୍ଡି ଢିଲୋନ୍ ନୁହେଁ ବରଂ ଜଗତର ତରନ ତାରନ୍ ଏକ ଭାଇରାଲ ପୋଷ୍ଟରେ ହତ୍ୟାକାଣ୍ଡରେ ସେମାନଙ୍କ ସମ୍ପୃକ୍ତି ଥିବା ନେଇ ସ୍ବୀକାର କରିଛନ୍ତି । ଗୋଲ୍ଡି ଢିଲୋନଙ୍କ ନାମରେ ଏକ ଭାଇରାଲ ପୋଷ୍ଟରେ ଲେଖାଯାଇଛି ଯେ,”ରଞ୍ଜିତ ଆଭେନ୍ୟୁରେ ମ୍ୟାଡ ସନ୍ଧୁଙ୍କ ହତ୍ୟା ପାଇଁ ଜଗ୍ୟା ତରନତାରନ ଏବଂ ମୁଁ ଦାୟୀ । ସେ ଆମର ନୂତନ ପିଢିକୁ ନଷ୍ଟ କରୁଥିଲେ । “ ଏହାସହ ଏହି ଭାଇରାଲ ପୋଷ୍ଟରେ ସେମାନଙ୍କୁ ଚେତାବନୀ ଦିଆଯାଇଛି, ଯେଉଁମାନେ ତାଙ୍କୁ ସମର୍ଥନ କରୁଥିଲେ । ସ୍କୁଲରେ ମୁଖ୍ୟ ଅତିଥି ଭାବରେ ନିମନ୍ତ୍ରଣ କରୁଥିଲେ । ସେମାନେ ବି ପ୍ରସ୍ତୁତ ରୁହନ୍ତୁ । ଏହା ସେମାନଙ୍କୁ ଲାଷ୍ଟ ଓ୍ବାର୍ଣ୍ଣିଂ । ଏଭଳି କାମ କରୁଥିବା ଲୋକ ପଞ୍ଜାବ ବାହାରେ ରହିବା ଉଚିତ ବୋଲି ପୋଷ୍ଟରେ ସ୍ପଷ୍ଟ ଭାବେ ଲେଖାଯାଇଥିଲା । ଶନିବାର ଅମୃତସରରେ ଦୁଇଜଣ ଅଜ୍ଞାତ ବ୍ୟକ୍ତି ଏକ ମୋଟରସାଇକେଲରେ ଆସି ମ୍ୟାଡ୍ ସନ୍ଧୁଙ୍କ ହତ୍ୟା କରିଥିଲେ । ପୋଲିସର ସୁଚନା ଅନୁଯାୟୀ, ଶନିବାର ସନ୍ଧ୍ୟାରେ ସନ୍ଧୁ ତାଙ୍କ କାର ନେବା ପାଇଁ ଏକ ଦୋକାନକୁ ଯାଇଥିଲେ, ଯେଉଁଠାରେ ସେ ତାଙ୍କ କାର ଧୋଇବାକୁ ଦେଇଥିଲେ । ଆଉ ସେହି ସମୟରେ ହଠାତ ତାଙ୍କ ଉପରେ ଆକ୍ରମଣ ହୋଇଥିଲା । ସେପଟେ ଏଡିସିପି କହିଛନ୍ତି ଯେ,ପୋଲିସକୁ କିଛି ସୁରାକ ମିଳିଛି । ଯାହକୁ ନେଇ ବିଭିନ୍ନ ଦିଗରୁ ପୋଲିସ ତଦନ୍ତ କରୁଛି । ଆଉ ଖୁବ୍ ଶୀଘ୍ର ଅଭିଯୁକ୍ତଙ୍କୁ ଧରାଯିବ । ଜଣେ ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ, ପ୍ରାୟ ଦୁଇରୁ ତିନି ରାଉଣ୍ଡ ଗୁଳି ଚାଳନା କରାଯାଇଥିଲା ଏବଂ ସୋସିଆଲ ମିଡିଆ ଇନଫ୍ଲୁଏନ୍ସରଙ୍କୁ ଅତି ନିକଟରୁ ଗୁଳି କରାଯାଇଥିଲା । ଫଳରେ ଘଟଣାସ୍ଥଳରେ ହିଁ ସେ ରକ୍ତାକ୍ତ ଅବସ୍ଥାରେ ରାସ୍ତାରେ ପଡି ରହିଥିଲେ । ପରେ କିଛି ଲୋକ ଆସି ତାଙ୍କୁ ଉଦ୍ଧାର କରିଥିଲେ ।
ସୁଚନା ମୁତାବକ, ସନ୍ଧୁ ପୋଡକାଷ୍ଟ ଏବଂ ଡିଜିଟାଲ ପ୍ଲାଟଫର୍ମରେ ମେକଅପ୍ କଳା ଏବଂ ଲିଙ୍ଗଗତ ସମସ୍ୟା ବିଷୟରେ ଆଲୋଚନା କରୁଥିଲେ । ତାଙ୍କ ପ୍ରକୃତ ନାମ ଥିଲା ମଧୁସୂଦନ । ଇନଷ୍ଟାଗ୍ରାମରେ ତାଙ୍କର ୨୨୬,୦୦୦ ଫଲୋଅର୍ସ ଥିଲେ । ଏହାସହ ସେ ପଞ୍ଜାବି ଫିଲ୍ମ “ଓୟେ ଭୋଲେ ଓୟେ” ରେ ଅଭିନୟ ମଧ୍ୟ କରିଥିଲେ । ହେଲେ ତାଙ୍କ କଣ୍ଟେଣ୍ଟ ଏବଂ ଫ୍ୟାଶନକୁ ନେଇ ସୋସିଆଲ ମିଡିଆରେ ତାଙ୍କୁ ସମାଲୋଚନାର ଶିକାର ହେବାକୁ ପଡିଥିଲା । କିଛି ମାସ ପୂର୍ବରୁ ଜଣେ ନିହାଙ୍ଗ ଶିଖ ତାଙ୍କର ସୋସିଆଲ ମିଡିଆ କଣ୍ଟେଣ୍ଟ ଏବଂ ପୋଷାକୁ ନେଇ ଆପତ୍ତି ଉଠାଇଥିଲେ ଏବଂ କହିଥିଲେ ଯେ, ତାଙ୍କ ଭିଡିଓ ଯୁବପିଢିଙ୍କ ଉପରେ ନକରାତ୍ମକ ପ୍ରଭାବ ପକାଉଛି । ଏପରିକି ସନ୍ଧୁକୁ ଏଥିପାଇଁ ଧମକ ମଧ୍ୟ ଦିଆଯାଉଥିଲା, ଯାହା ବିଷୟରେ ଅନେକ ଥର ସେ ତାଙ୍କ ସୋସିଆଲ ମିଡିଆରେ ଆଲୋଚନା କରିଥିଲେ । ତେବେ ସତରେ ଏହି ଘଟଣା ପଛରେ ଲିଙ୍ଗଗତ କାରଣ ରହିଛି ନା ଅନ୍ୟ କିଛି କାରଣ ରହିଛି, ତାହାର ଅସଲ ସତ ସମସ୍ତଙ୍କ ସାମ୍ନାକୁ ଆଣିବାକୁ ପୋଲିସ ତଦନ୍ତକୁ ଜୋରଦାର କରିଛି ।
ଓଡିଶା ଟ୍ରାଭେଲ ବଜାରର ଶୁଭାରମ୍ଭ, ଝଟକିବ ଟୁରିଜିମ
ଓଡିଶା ଟ୍ରାଭେଲ ବଜାରର ଶୁଭାରମ୍ଭ, ଝଟକିବ ଟୁରିଜିମ
ନନ୍ଦିଘୋଷ ବ୍ୟୁରୋ: ପର୍ଯ୍ୟଟନର ବିକାଶ ପାଇଁ ସରକାରଙ୍କ ନୂଆ ମନ୍ତ୍ର ‘ଥିଙ୍କ ଇଣ୍ଡିଆ, ଥିଙ୍କ ଓଡିଶା’ । ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଦ୍ୱାରା ‘ଓଡ଼ିଶା ଟ୍ରାଭେଲ ବଜାରର ସପ୍ତମ ସଂସ୍କରଣ ଆରମ୍ଭ । ଓଡ଼ିଶାର ପର୍ଯ୍ୟଟନ କ୍ଷେତ୍ରରେ ବ୍ୟାପକ ନିବେଶ କରିବାକୁ ଜାତୀୟ ଓ ଅନ୍ତର୍ଜାତୀୟ ନିବେଶକ, ହସ୍ପିଟାଲିଟି ବ୍ରାଣ୍ଡ ଓ ଟୁରିଜିମ୍ ପାର୍ଟନରଙ୍କୁ ମୁଖ୍ୟମନ୍ତ୍ରୀ ଦେଲେ ଆହ୍ବାନ । ପର୍ଯ୍ୟଟନର ପ୍ରଚାର ପାଇଁ ନୂତନ ‘ଓଡ଼ିଶା ଟୁରିଜିମ୍ ପୋର୍ଟାଲ୍’ ଓ ‘ଇନଭେଷ୍ଟମେଣ୍ଟ ଇନ୍ସେଣ୍ଟିଭ୍ ୱେବ୍ ଆପ୍ଲିକେଶନ୍’ର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ । ଏହି ଅବସରରେ ପର୍ଯ୍ୟଟନ ସହ କ୍ରୀଡାକୁ ଗୁରୁତ୍ବ ଦେବା ଜରୁରୀ ବୋଲି କହିଛନ୍ତି କ୍ରିକେଟ ଲିଜେଣ୍ଡ କପିଳ ଦେବ ।
ଓଡିଶା-ଇଣ୍ଡିଆଜ ବେଷ୍ଟ କେପ୍ଟ ସିକ୍ରେଟ । ହେଲେ ଏବେ ସମୟ ବଦଳିଛି । ସରକାର ଓଡ଼ିଶାର କୌଣସି ପର୍ଯ୍ୟଟନ ସ୍ଥଳକୁ ଗୁପ୍ତ ରଖିବାକୁ ଚାହୁଁନାହାନ୍ତି । ବିସ୍ତୀର୍ଣ୍ଣ ବେଳାଭୂମି ଠାରୁ ଆରମ୍ଭ କରି ଘଞ୍ଚ ଜଙ୍ଗଲ, ଜଳପ୍ରପାତରୁ ଧାର୍ମିକ ସ୍ଥଳ, ବୁଦ୍ଧିଷ୍ଟ ହେରିଟେଜରୁ ଆଦିମ ଜନଜାତିମାନଙ୍କ ଜୀବନଯାପନ, ତାରକସି କାମରୁ ପଟ୍ଟଚିତ୍ର, ସବୁଠି ରହିଛି ଓଡିଶାର ଛାପ, ଓଡ଼ିଆ ବାସ୍ନା । ଏସବୁକୁ ଆଧାର କରି ଓଡ଼ିଶାକୁ ପର୍ଯ୍ୟଟକଙ୍କ ସ୍ୱର୍ଗ ଭାବେ ଗଢ଼ି ତୋଳିବାକୁ ମୁଖ୍ୟମନ୍ତ୍ରୀ କହିଛନ୍ତି । ସପ୍ତମ ଓଡିଶା ଟ୍ରାଭେଲ ବଜାରର ଶୁଭାରମ୍ଭ କରି ମୁଖ୍ୟମନ୍ତ୍ରୀ କହିଛନ୍ତି ‘ଅତିଥି ଦେବୋ ଭବଃ’ ମୂଳମନ୍ତ୍ରକୁ ଆପଣାଇ ଓଡ଼ିଶାକୁ ଆସୁଥିବା ପର୍ଯ୍ୟଟକମାନଙ୍କୁ ଦିଅନ୍ତୁ ସର୍ବୋତ୍ତମ ସମ୍ମାନ । ପର୍ଯ୍ୟଟକଙ୍କ ସୁରକ୍ଷା ପାଇଁ ୨୯ଟି ସ୍ଥଳୀରେ ଟୁରିଷ୍ଟ ପୋଲିସ ଓ ଓସ୍ୱାଲି ଜରିଆରେ ୧୦୦୦ ଲାଇଫ୍ ଗାର୍ଡ ନିଯୁକ୍ତ ହେବେ । ଅଧିକ ହୋଟେଲ ଓ ରିସର୍ଟ ପାଇଁ ୫,୫୦୦ ଏକର ପରିମିତ ବିଶାଳ ଲ୍ୟାଣ୍ଡ ବ୍ୟାଙ୍କ ମଞ୍ଜୁର ହୋଇଛି । ଭୁବନେଶ୍ୱରଠାରେ ‘ଓଡ଼ିଶା ଟ୍ରାଭେଲ ବଜାର’ ଆରମ୍ଭ ହୋଇଛି । ରାଜ୍ୟର ୨୯ଟି ପ୍ରମୁଖ ପର୍ଯ୍ୟଟନ ସ୍ଥଳୀରେ ‘ଟୁରିଷ୍ଟ ପୋଲିସ’ ବ୍ୟବସ୍ଥା ଆରମ୍ଭ କରାଯାଉଥିବାବେଳେ ସମୁଦ୍ରକୂଳ ଓ ଜଳକ୍ରୀଡ଼ା ସ୍ଥଳୀଗୁଡ଼ିକରେ ପର୍ଯ୍ୟଟକଙ୍କ ସୁରକ୍ଷାକୁ ସୁନିଶ୍ଚିତ କରିବା ପାଇଁ ଓସ୍ୱାଲି ମାଧ୍ୟମରେ ଏକ ହଜାର ପ୍ରଶିକ୍ଷିତ ଲାଇଫ୍ ଗାର୍ଡ ନିଯୁକ୍ତ କରାଯିବ । ଅଧିକ ଭିଡ଼ ପରିଲକ୍ଷିତ ହେଉଥିବା ସ୍ଥଳୀଗୁଡ଼ିକରେ ଡେଷ୍ଟିନେସନ୍ ମ୍ୟାନେଜର ମଧ୍ୟ ନିଯୁକ୍ତ ହେବେ । କିଛି ବର୍ଷ ହେଲାଣି ଓଡ଼ିଶାର ଚିତ୍ର ବଦଳିଛି । ବିକାଶର ଧାରା ଆଗକୁ ବଢୁଛି । ହେଲେ ପର୍ଯ୍ୟଟନ ସହ କ୍ରୀଡାକୁ ଗୁରୁତ୍ବ ଦେବା ଜରୁରୀ ବୋଲି କପିଳ ଦେବ କହିଛନ୍ତି ।
ମରୁଭୁମିକୁ ବାଦ୍ ଦେଲେ ଭୂପୃଷ୍ଠର ସମସ୍ତ ପ୍ରକାର ପ୍ରାକୃତିକ ବିଭବ ଓ ସୌନ୍ଦର୍ଯ୍ୟ ଓଡ଼ିଶା ମାଟିରେ ରହିଛି । ଶ୍ରୀଜଗନ୍ନାଥ ମନ୍ଦିର ଓ କୋଣାର୍କ ସୂର୍ଯ୍ୟମନ୍ଦିର ଭଳି ବିଶ୍ୱସ୍ତରୀୟ ଐତିହାସିକ ସ୍ମାରକ ସାଙ୍ଗକୁ ରାଜ୍ୟରେ ୫୭୫ କିଲୋମିଟର ଦୀର୍ଘ ପ୍ରାକୃତିକ ସମୁଦ୍ର ତଟ, ଭିତରକନିକାର ବିଶ୍ୱପ୍ରସିଦ୍ଧ ମ୍ୟାଙ୍ଗ୍ରୋଭ୍ ଜଙ୍ଗଲ, ଏସିଆର ସର୍ବବୃହତ ଲୁଣିଆ ପାଣି ହ୍ରଦ ଚିଲିକା ଓ ହୀରାକୁଦ ଜଳଭଣ୍ଡାର ରହିଛି । ବିକଶିତ୍ ଓଡ଼ିଶା ଭିଜନ୍ ୨୦୩୬-୨୦୪୭ ରୋଡମ୍ୟାପ୍ ଅନୁଯାୟୀ ପର୍ଯ୍ୟଟନ କ୍ଷେତ୍ରକୁ ସୁଦୃଢ଼ କରାଯାଉଛି । ରାଜ୍ୟର ସ୍ଥାନୀୟ କାରିଗର, ଗାଇଡ଼ ଓ ଟୁର୍ ଅପରେଟରମାନଙ୍କୁ ଅତ୍ୟାଧୁନିକ ଡିଜିଟାଲ୍ ଜ୍ଞାନକୌଶଳରେ ସଜ୍ଜିତ କରାଯାଉଛି । ଓଡ଼ିଶାର ମହାପ୍ରସାଦ, ଡାଲମା, ଚିଲିକାର ସି ଫୁଡ଼ ବିଦେଶୀମାନଙ୍କ ପ୍ରଥମ ପସନ୍ଦ ବୋଲି ବ୍ରାଣ୍ଡ ଆମ୍ବାସଡ଼ର କହିଛନ୍ତି । ଓଡିଶାକୁ ଫରେନ ଫୁଟଫଲ ୧୫ ପ୍ରତିଶତ ବଢିଛି ।
ସାରା ଦେଶରେ ଓଡିଶାକୁ ପର୍ଯ୍ୟଟନ କ୍ଷେତ୍ରରେ ଏକ ନମ୍ବର କରିବାକୁ ଉଦ୍ୟମ ହେଉଛି । ହେଲେ ଏଥିପାଇଁ ଆବଶ୍ୟକୀୟ ଭିତ୍ତିଭୂମି, ସୁବିଧା ସୁଯୋଗ, ସୁରକ୍ଷା ଦିଗ ପ୍ରତି ବି ଧ୍ୟାନ ଦିଆଯିବା ଜରୁରୀ ।
ଚିନ୍ତା ବଢ଼ାଇଛି ଖାଲି ପଦବୀ; ୧୭ ବିଶ୍ବବିଦ୍ୟାଳୟରେ ୧୪୩୫ ପଦ ଖାଲି
ଚିନ୍ତା ବଢ଼ାଇଛି ଖାଲି ପଦବୀ; ୧୭ ବିଶ୍ବବିଦ୍ୟାଳୟରେ ୧୪୩୫ ପଦ ଖାଲି
ନନ୍ଦିଘୋଷ ବ୍ୟୁରୋ: ଚିନ୍ତା ବଢାଇଲାଣି ବିଶ୍ବବିଦ୍ୟାଳୟ ଗୁଡ଼ିକରେ ଖାଲି ପଡ଼ିଥିବା ପ୍ରାଧ୍ୟାପକ, ସହକାରୀ ଓ ଆସେସିଏଟ ପ୍ରାଧ୍ୟାପକ ପଦ । ଯାହାକୁ ନେଇ ଶିକ୍ଷା ବ୍ୟବସ୍ଥା ପ୍ରଭାବିତ ହେବାରେ ଲାଗିଛି । ଏହାକୁ ତୁରନ୍ତ ପୂରଣ କରିବାକୁ ଆଜି କୁଳପତିମାନଙ୍କ ସମ୍ମିଳନୀ ଡକାଇଥିଲେ ରାଜ୍ୟପାଳ ତଥା କୁଳାଧିପତି ଡକ୍ଟର ହରି ବାବୁ କୁମ୍ଭମପାଟି । ନଭେମ୍ବର ସୁଦ୍ଧା ସାକ୍ଷାତକାର ପ୍ରକ୍ରିୟା ସାରି ନୂତନ ଶିକ୍ଷା ବର୍ଷରେ ଖାଲି ପଦ ପୂରଣ କରିବାକୁ କୁଳାଧିପତି ନିର୍ଦ୍ଦେଶ ଦେଇଛନ୍ତି । ସେପଟେ କୁଳପତିମାନେ ବି ଖାଲି ପଦବୀ ନେଇ ଉଦବେଗ ପ୍ରକାଶ କରିଛନ୍ତି ।
ଦୀର୍ଘ ଦିନରୁ ବିଶ୍ବବିଦ୍ୟାଳୟ ଗୁଡିକରେ ପ୍ରାଧ୍ୟାପକ, ସହକାରୀ ଓ ଆସୋସିଏଟ ପ୍ରାଧ୍ୟାପକ ପଦ ଖାଲି ରହିଛି । ଏହି ପଦବୀ ପୂରଣ ହୋଇ ପାରୁ ନଥିବାରୁ ଶିକ୍ଷାଦାନ, ପରୀକ୍ଷା ଓ ଫଳ ପ୍ରକାଶନ ବାଧାପ୍ରାପ୍ତ ହେଉଛି । ଏ ସବୁ ପଦବୀ ପୂରଣ ପାଇଁ ଆଜି ଉଚ୍ଚଶିକ୍ଷା ବିଭାଗ ଅଧୀନ ବିଶ୍ବବିଦ୍ୟାଳୟ କୁଳପତିମାନଙ୍କୁ ନେଇ ଲୋକଭବନରେ ହୋଇଥିବା ସମୀକ୍ଷା କରିଥିଲେ ରାଜ୍ୟପାଳ ତଥା କୁଳାଧିପତି ଡକ୍ଟର ହରି ବାବୁ କୁମ୍ଭମପାଟି । ରାଜ୍ୟର ୧୭ ବିଶ୍ବବିଦ୍ୟାଳୟରେ ଖାଲି ଥିବା ୧୪୩୫ ପଦବୀ ପୂରଣ ପାଇଁ ଆସନ୍ତା ନଭେମ୍ବର ସୁଦ୍ଧା ୫୭ ହଜାରରୁ ଅଧିକ ଆବେଦନର ଯାଞ୍ଚ କାର୍ଯ୍ୟ ସରିବ । ନଭେମ୍ବର ପ୍ରଥମ ସପ୍ତାହରୁ ସାକ୍ଷାତକାର ପ୍ରକ୍ରିୟା ଆରମ୍ଭ କରିବାକୁ କୁଳାଧିପତି ନିର୍ଦ୍ଦେଶ ଦେଇଛନ୍ତି । ତେବେ ଓଡ଼ିଶା ମୁକ୍ତ ବିଶ୍ବବିଦ୍ୟାଳୟରେ ସାକ୍ଷାତକାର ପ୍ରକ୍ରିୟା ଚାଲିଛି । ପୂର୍ବରୁ ଗୋଟେ ଦିନରେ ୧୪ ଜଣ ନିୟମିତ କୁଳପତିମାନଙ୍କୁ ନିଯୁକ୍ତି ଦେଇଥିଲେ ରାଜ୍ୟ ସରକାର । ଏଥିସହ କୁଳପତିମାନଙ୍କର ନିର୍ଦ୍ଦିଷ୍ଟ କାର୍ଯ୍ୟକାଳ ରଖିବାକୁ ମଧ୍ୟ ଗୁରୁତ୍ବ ଦେଇଛନ୍ତି କୁଳାଧିପତି । ରାଜ୍ୟପାଳ ହରିବାବୁ କୁମ୍ଭମପାଟିଙ୍କ ଅଧ୍ୟକ୍ଷତାରେ ହୋଇଥିବା ବୈଠକରେ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ସଚିବ ଅରବିନ୍ଦ ଅଗ୍ରୱାଲଙ୍କ ସମେତ ୧୭ଟି ବିଶ୍ଵବିଦ୍ୟାଳୟ କୁଳପତି ଓ କୁଳସଚିବ ସାମିଲ ହୋଇଥିଲେ ।
ଖାଲି ପଦବୀ ଉପରେ ନଜର ପକାଇଲେ ଓଡ଼ିଆ ବିଶ୍ବବିଦ୍ୟାଳୟ ଚିନ୍ତା ବଢାଇ ଦେଇଛି । ଓଡ଼ିଆ ଅସ୍ମିତାର ନାରା ଦେଇ ସରକାରକୁ ଆସିଥିବା ବିଜେପି ଏଯାଏଁ ଓଡ଼ିଆ ବିଶ୍ବବିଦ୍ୟାଳୟର ୨୧ଟି ଅନୁମୋଦିତ ପଦବୀ ପୂରଣ କରିବାରେ ସକ୍ଷମ ହୋଇ ନାହାନ୍ତି । ଫକୀର ମୋହନ ବିଶ୍ବବିଦ୍ୟାଳୟରେ ୧୫ ପ୍ରଫେସର, ୨୦ ଆସୋସିଏଟ୍ ପ୍ରଫେସର ଓ ୧୮ ଆସିଷ୍ଟାଣ୍ଟ ପ୍ରଫେସର ପଦବୀ ଖାଲି ପଡ଼ିଛି । ବ୍ରହ୍ମପୁର ବିଶ୍ବବିଦ୍ୟାଳୟରେ ୧୯ ପ୍ରଫେସର, ୩୯ ଆସୋସିଏଟ ପ୍ରଫେସର ଓ ୩୯ ଆସିଷ୍ଟାଣ୍ଟ ପ୍ରଫେସର ପଦବୀ ପୂରଣ ହେବା ଅପେକ୍ଷାରେ ଅଛି । ଗଙ୍ଗାଧର ମେହେର ବିଶ୍ବବିଦ୍ୟାଳୟରେ ୨୧ ପ୍ରଫେସର, ୨୫ ଆସୋସିଏଟ୍ ପ୍ରଫେସର ଓ ୩୩ ଆସିଷ୍ଟାଣ୍ଟ ପ୍ରଫେସର ପଦବୀ ଖାଲି ପଡ଼ିଛି । ଉତ୍କଳ ବିଶ୍ବବିଦ୍ୟାଳୟରେ ୩୯ ପ୍ରଫେସର, ୫୧ ଆସୋସିଏଟ୍ ପ୍ରଫେସର ଓ ୫୧ ଆସିଷ୍ଟାଣ୍ଟ ପ୍ରଫେସର ପଦବୀ ଏ ଯାଏଁ ପୂରଣ ହୋଇ ପାରିନି । ସମ୍ବଲପୁର ବିଶ୍ବବିଦ୍ୟାଳୟରେ ୨୦ ପ୍ରଫେସର, ୩୦ ଆସୋସିଏଟ୍ ପ୍ରଫେସର ଓ ୩୪ ଆସିଷ୍ଟାଣ୍ଟ ପ୍ରଫେସର ପଦବୀ ଖାଲି ପଡ଼ିଛି । ରମାଦେବୀ ଏକକ ମହିଳା ବିଶ୍ବବିଦ୍ୟାଳୟରେ ୧୧ ପ୍ରଫେସର, ୨୩ ଆସୋସିଏଟ ପ୍ରଫେସର ଓ ୪୭ ଆସିଷ୍ଟାଣ୍ଟ ପ୍ରଫେସର ପଦବୀ ପୂରଣ ହୋଇ ପାରିନି । ରେଭେନ୍ସା ବିଶ୍ବବିଦ୍ୟାଳୟରେ ୨୨ ପ୍ରଫେସର, ୫୫ ଆସୋସିଏଟ୍ ପ୍ରଫେସର ଓ ୫୦ ଆସିଷ୍ଟାଣ୍ଟ ପ୍ରଫେସର ପଦବୀ ଖାଲି ପଡ଼ିଛି । ମଧୁସୂଦନ ଆଇନ ବିଶ୍ବବିଦ୍ୟାଳୟରେ ୬ ପ୍ରଫେସର, ୧୨ ଆସୋସିଏଟ୍ ପ୍ରଫେସର ଓ ୩୨ ଆସିଷ୍ଟାଣ୍ଟ ପ୍ରଫେସର ପୂରଣ ହୋଇ ପାରିନି । ରାଜେନ୍ଦ୍ର ବିଶ୍ବବିଦ୍ୟାଳୟରେ ୧୮ ପ୍ରଫେସର, ୩୪ ଆସୋସିଏଟ୍ ପ୍ରଫେସର ଓ ୫୪ ଆସିଷ୍ଟାଣ୍ଟ ପ୍ରଫେସର ପଦବୀ ଖାଲି ପଡ଼ିଥିବା ନେଇ ଗତ ବିଧାନସଭା ମୌସୁମୀ ଅଧିବେଶନରେ ଉତ୍ତର ରଖିଥିଲେ ଉଚ୍ଚଶିକ୍ଷା ମନ୍ତ୍ରୀ । କୁଳାଧିପତିଙ୍କ ଏହି ସମୀକ୍ଷା ବୈଠକରେ ସମସ୍ତ ଅଂଶୀଦାର ମଧ୍ୟ ନିଯୁକ୍ତି ପ୍ରକ୍ରିୟା ନେଇ ନିଜ ମତାମତ ରଖିଥିଲେ ।
ବିଶ୍ବବିଦ୍ୟାଳୟ ପରି ୬୬ଟି ସରକାରୀ ଡିଗ୍ରୀ କଲେଜରେ ୨ ହଜାର ୪୫୩ ଅଧ୍ୟାପକଙ୍କ ମଧ୍ୟରୁ ୧ ହଜାର ୭୪୩ ଜଣ କାର୍ଯ୍ୟରତ ଅଛନ୍ତି । ଏବେ ବି ଏହି ସବୁ ସରକାରୀ ଡିଗ୍ରୀ କଲେଜରେ ୭୧୦ଟି ପଦବୀ ଖାଲି ପଡ଼ିଛି । ଅବସର, ପଦୋନ୍ନତି, ସ୍ଥାନାନ୍ତର ଓ ଅଧ୍ୟାପକ ପଦବୀ ସୃଷ୍ଟିରେ ବିଳମ୍ବ ଯୋଗୁଁ ସମୟ ସମୟରେ ଏହି ପଦବୀ ଖାଲି ପଡ଼ି ଚାଲିଛି । ସରକାରୀ ଡିଗ୍ରୀ କଲେଜ ଗୁଡ଼ିକରେ ୩୮୫ଟି ଖାଲି ଶିକ୍ଷକ ପଦବୀ ପୂରଣ ପାଇଁ ଓଡ଼ିଶା ଲୋକସେବା ଆୟୋଗ ମାଧ୍ୟମରେ ଚୟନ ପ୍ରକ୍ରିୟା ବର୍ତ୍ତମାନ ଜାରି ରହିଛି ।
SIR ବିବାଦ: ବିରୋଧୀଙ୍କ ପ୍ରଶ୍ନ କାହା ଚାପରେ ନିର୍ବାଚନ କମିଶନ ଚେପା
SIR ବିବାଦ: ବିରୋଧୀଙ୍କ ପ୍ରଶ୍ନ କାହା ଚାପରେ ନିର୍ବାଚନ କମିଶନ ଚେପା
ନନ୍ଦିଘୋଷ ବ୍ୟୁରୋ: ଏସଆଇଆର ପ୍ରକ୍ରିୟାକୁ ନେଇ ଯାହା ସଂନ୍ଦେହ କରାଯାଉଥିଲା, ତାହା ପ୍ରମାଣିତ ହେଲା । ଭୋଟ ଚୋରି କରାଯାଇଛି ସାରା ଦେଶରେ । ଗଣତନ୍ତ୍ର ଦେଶରେ ଚଞ୍ଚକତା କରି ଭୋଟ ତାଲିକାରୁ କୋଟି କୋଟି ଯୋଗ୍ୟ ଭୋଟରଙ୍କ ନାଁ କଟାଯାଇଥିବା ବେଳେ ସିଇସିଙ୍କ ଇସ୍ତଫା ଦାବି କରିଛନ୍ତି ବିରୋଧୀ । ଏହାରି ଭିତରେ ନିର୍ବାଚନ କମିଶନ ପୁଣି ଯୋଗ୍ୟ ଭୋଟରକୁ ଭୋଟର ତାଲିକାରେ ସାମିଲ କରିବା ନେଇ ଆରମ୍ଭ କରିଥିବା ପ୍ରକ୍ରିୟାକୁ ନେଇ ଉଠିଛି ପ୍ରଶ୍ନ। ବିଜେଡି ଓ କଂଗ୍ରେସ ଏନେଇ ସରକାରଙ୍କୁ ଘେରିଥିବା ବେଳେ ପଚାରିଛନ୍ତି କାହା ଚାପରେ ଚେପା ନିର୍ବାଚନ କମିଶନ ।
ଭୋଟ ପୂର୍ବରୁ କାଟିଲେ, ବିରୋଧ ପରେ ଯୋଡିବାକୁ ନିଷ୍ପତ୍ତି ନେଲେ । ଏସଆଇଆର ପ୍ରକ୍ରିୟାକୁ ନେଇ ବଡ଼ ବିବାଦ ସୃଷ୍ଟି ହେବା ପରେ ୟୁଟର୍ଣ୍ଣ ମାରିଛନ୍ତି ନିର୍ବାଚନ କମିଶନ । ଭୋଟର ତାଲିକାରୁ ବାଦ ପଡ଼ିଥିବା ଯୋଗ୍ୟ ଭୋଟରକୁ ପୁଣି ସାମିଲ କରିବାକୁ ପ୍ରକ୍ରିୟା ଆରମ୍ଭ କରୁଛନ୍ତି ନିର୍ବାଚନ କମିଶନ । ବିଏଲଓମାନେ ଘର ଘର ବୁଲି ଫର୍ମ ୬ ଜରିଆରେ ପଞ୍ଜିକରଣ କରିବେ । ନିର୍ବାଚନ କମିଶନ କାହା ଚାପରେ ଚେପା ହୋଇ ଏପରି ନିଷ୍ପତ୍ତି ନେଲେ ତାକୁ ନେଇ ଘେରିଛନ୍ତି ବିରୋଧୀ । ବିଜେଡି ବିଧାୟକ ଅରୁଣ ସାହୁ ଅଭିଯୋଗ କରିଛନ୍ତି, ଏସଆଇଆର୍ ନାଁରେ ଗଣତନ୍ତ୍ରକୁ ଧ୍ୱଂସ କରି ଦିଆଗଲା । ୧୩ କୋଟିରୁ ଅଧିକ ଭୋଟରଙ୍କୁ କାଟିଲେ । ଚାରିଆଡୁ ପ୍ରବଳ ବିରୋଧ ପରେ ଚାପରେ ଚେପା ହୋଇଛନ୍ତି ନିର୍ବାଚନ କମିଶନ । ଯଦି ସେ ଭୁଲ କରି ନଥିଲେ ଏପରି ନିଷ୍ପତ୍ତି ନେଲେ କାହିଁକି ? ନିର୍ବାଚନ କମିଶନ ଏବେ ପୂରା ଚାପରେ ଅଛନ୍ତି । ଏଥିରେ ଆଂଶିକ ଭାବରେ ଭାରତର ଜନସାଧାରଣ, ବିରୋଧୀ ଦଳ ଓ ଜେନ ଜିଙ୍କ ବିଜୟ ହୋଇଛି । ଅନ୍ୟପଟେ ନିର୍ବାଚନ କମିଶନ ଉପରେ ପ୍ରଶ୍ନ ଆସିଲେ ବିଜେପି ନେତା ନିର୍ବାଚନ କମିଶନଙ୍କୁ ସୁରକ୍ଷା ଦେବାକୁ ବାହାରି ଆସୁଛନ୍ତି । ଏହାକୁ ନେଇ ମିଲିଅନ ଡଲାର ପ୍ରଶ୍ନ ଉଠୁଛି ବୋଲି ବିଜେଡି କହିଛି ।
ଏସଆଇଆର ସମ୍ପର୍କରେ ପ୍ରଥମରୁ ସାଧାରଣ ଲୋକଙ୍କ ଭିତରେ ଅସନ୍ତୋଷ ରହିଛି । ଗଣତନ୍ତ୍ରିକ ଦେଶରେ କୋଟି କୋଟି ଭୋଟରଙ୍କୁ କଟାଗଲା । ଏହାକୁ ନେଇ ଅନେକ ଆନ୍ଦୋଳନ ହୋଇଛି । ମୂଖ୍ୟ ନିର୍ବାଚନ କମିଶନରଙ୍କ ବିରୋଧରେ ପ୍ରତିବାଦ ହେଲା । ଆଉ ଏବେ ମୁଖ୍ୟ ନିର୍ବାଚନ କମିଶନର୍ ୟୁଟର୍ଣ୍ଣ ନେଇଛନ୍ତି । ଏବେ ପ୍ରକ୍ରିୟାକୁ ସରଳ କରିବାକୁ ଚେଷ୍ଟା କରାଯାଇଛି । ଘରକୁ ଘର ଯାଇ କଟିଥିବା ଲୋକଙ୍କୁ ପୁଣି ଯୋଡିବାକୁ ପ୍ରକ୍ରିୟା ଆରମ୍ଭ କରିଛନ୍ତି । ଏଥିରୁ ପ୍ରମାଣିତ ହେଉଛି ବିରୋଧୀ ଯେଉଁ ଅଭିଯୋଗ ଆଣିଛନ୍ତି ତାହା ସତ । ବିଜେଡି ଓ ବିଜେଡି ସଭାପତି ନବୀନ ପଟ୍ଟନାୟକ ଯେଉଁ କଥା ବାରମ୍ବାର ଉଠାଇଛନ୍ତି ତାହା ସତ ପ୍ରମାଣିତ ହୋଇଛି ବୋଲି ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି । କଂଗ୍ରେସ କହିଛି, ବିଜେପି ଭୋଟ ଚୋରି କରି କ୍ଷମତା ହାସଲ କରିଛି । ନିର୍ବାଚନ କମିଶନକୁ ହାତବାରିସି କରି ନିର୍ବାଚନ ଜିତିଛି । ବିଜେପି କଥାରେ ଯୋଗ୍ୟ ଭୋଟରଙ୍କ ନାଁ ଭୋଟର ଲିଷ୍ଟରୁ କଟାଯାଇଛି ବୋଲି କଂଗ୍ରେସ ଅଭିଯୋଗ କରିଛି ।
ଏସଆଇଆର ଗଡ଼ବଡକୁ ନେଇ ସିଇସି ଜ୍ଞାନେଶ କୁମାର ଇସ୍ତଫା ଦାବି ସାରା ଦେଶରେ ଜୋର ଧରିଥିବା ବେଳେ ଭୋଟର ତାଲିକାରୁ ନାଁ କଟିଥିବା ଯୋଗ୍ୟ ଭୋଟକୁ ପୁଣି ଲିଷ୍ଟରେ ସାମିଲ କରିବା ନୂଆ ବିବାଦ ସୃଷ୍ଟି କରିଛି ।
ଏସୀୟ କ୍ରୀଡ଼ା ସ୍ବର୍ଣ୍ଣ ବିଜେତାଙ୍କୁ ହକି ଟିମକୁ ନବୀନ ପଟ୍ଟନାୟକଙ୍କ ଅଭିନନ୍ଦନ
ଏସୀୟ କ୍ରୀଡ଼ା ସ୍ବର୍ଣ୍ଣ ବିଜେତାଙ୍କୁ ହକି ଟିମକୁ ନବୀନ ପଟ୍ଟନାୟକଙ୍କ ଅଭିନନ୍ଦନ
ନନ୍ଦିଘୋଷ ବ୍ୟୁରୋ: ଏସୀୟ କ୍ରୀଡ଼ାରେ ସ୍ଵର୍ଣ୍ଣ ପଦକ ଜିତିଥିବା ହକି ଟିମକୁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜଣାଇଲେ ଅଭିନନ୍ଦନ । କହିଲେ, ପ୍ରତ୍ୟେକ ଭାରତୀୟଙ୍କ ପାଇଁ ଏହା ଗର୍ବର କଥା । ଲଗାତର ଦୁଇ ଥର ଏସୀୟ କ୍ରୀଡ଼ାରେ ପୁରୁଷ ହକି ଟିମ୍ ଚାମ୍ପିୟନ ହେବା ସହିତ ଲସଆଞ୍ଜେସ ଅଲିମ୍ପିକ୍ସ ପାଇଁ ମଧ୍ୟ ଯୋଗ୍ୟତା ଅର୍ଜନ କରିଛି । ଗୌରବର ଏହି ଜୟଯାତ୍ରାରେ ଓଡ଼ିଶାର ମଧ୍ୟ ବଡ଼ ଭୂମିକା ଅଛି ବୋଲି କହିଛନ୍ତି ନବୀନ । ଆଉ ଏକ ଗର୍ବର କଥା ହେଉଛି ଉଭୟ ପୁରୁଷ ଓ ମହିଳା ଟିମ୍ ଏଥର ଚାମ୍ପିଅନ ହୋଇଛନ୍ତି ।
କିଛି ବର୍ଷ ତଳେ ଯେତେବେଳେ ଜାତୀୟ ହକି ଟିମ୍ ପାଇଁ ପ୍ରାୟୋଜକ ମିଳୁ ନଥିଲେ ସେତେବେଳେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଗେଇ ଆସିଥିଲେ । ଓଡ଼ିଶା ସରକାର ସଙ୍କଟ ମୋଚନ ସାଜି ହକି ଟିମର ପ୍ରାୟୋଜକ ସାଜିଥିଲେ । ତେଣୁ ଆଜିର ସଫଳତାରେ ଓଡ଼ିଶାର ବିଶେଷ କରି ସେତେବେଳର ନବୀନ ସରକାରଙ୍କ ବଡ଼ ଭୂମିକା ରହିଛି ।
ଶ୍ରୀକ୍ଷେତ୍ରରେ ଆରମ୍ଭ ହେଲା ଶାରଦୀୟ ପାର୍ବଣର ଶୋଳପୂଜା
ଶ୍ରୀକ୍ଷେତ୍ରରେ ଆରମ୍ଭ ହେଲା ଶାରଦୀୟ ପାର୍ବଣର ଶୋଳପୂଜା
ନନ୍ଦିଘୋଷ ବ୍ୟୁରୋ: ଶ୍ରୀକ୍ଷେତ୍ରରେ ଆଜିଠାରୁ ଆରମ୍ଭ ହେଲା ଶାରଦୀୟ ପାର୍ବଣର ଶୋଳପୂଜା । ଗଜପତିଙ୍କ ଶ୍ରୀନହରରେ ରାଜଗୁରୁ ବ୍ରାହ୍ମଣମାନଙ୍କୁ ବରଣ କରି ଦୁର୍ଗାପୂଜାର ଶୁଭାରମ୍ଭ କରିଛନ୍ତି । ୧୬ ଦିନ ଧରି ଏହି ପୂଜା ଅନୁଷ୍ଠିତ ହେଉଥିବା ବେଳେ ରାଜଗୁରୁ ପୁରୋହିତଙ୍କୁ ଗଜପତି ମହାରାଜାଙ୍କ ଶ୍ରୀହସ୍ତ ଛୁଆଁ ଗୁଆ ନଡିଆ ପ୍ରଦାନ କରିଥିଲେ । ସେପଟେ ଶ୍ରୀମନ୍ଦିରରେ ଆଜି ମୂଳାଷ୍ଟମୀ ସହ ସହସ୍ର କୁମ୍ଭାଭିଷେକ ନୀତି ଅନୁଷ୍ଠିତ ହେଉଥିବା ବେଳେ ଦୁର୍ଗାମାଧବ ଉପାସନା ପାଳିତ ହେଉଛି ।
ଆଜି ମୂଳାଷ୍ଟମୀରୁ ଶାରଦୀୟ ଦୁର୍ଗାପୂଜା ପାଇଁ ଶ୍ରୀକ୍ଷେତ୍ରରେ ପାରମ୍ପରିକ ପ୍ରସ୍ତୁତି ଆରମ୍ଭ ହୋଇଛି । ଗଜପତିଙ୍କ ଶ୍ରୀନହରରୁ ଆରମ୍ଭ ହୋଇଛି ଷୋଳପୂଜାର ବିଧି । ଶ୍ରୀକ୍ଷେତ୍ରରେ ଥିବା ସମସ୍ତ ଶକ୍ତି ପୀଠ ଗୁଡ଼ିକରେ ଏହି ଷୋଳପୂଜା ପାଇଁ ଆଚାର୍ଯ୍ୟ ବରଣ କାର୍ଯ୍ୟ କରାଯାଇଛି । ଗଜପତିଙ୍କ ନିର୍ଦ୍ଦେଶ କ୍ରମେ ରାଜଗୁରୁ ଆଜି ଶ୍ରୋତୀୟ ବ୍ରାହ୍ମଣ , ମୁକ୍ତିମଣ୍ଡପ ବ୍ରାହ୍ମଣ ଓ ଶାସନ ବ୍ରାହ୍ମଣଙ୍କୁ ଡାକି ବରଣ କରିବା ସହ ବସ୍ତ୍ର ଦାନ କରି ବିଭିନ୍ନ ପୀଠରେ ନିଯୁକ୍ତି କରିଛନ୍ତି । ଏହି ଆଚାର୍ଯ୍ୟମାନେ ଆଜିଠାରୁ ଷୋଳପୂଜାର ବିଧି ଅନୁଯାୟୀ ପୁରୀରେ ଥିବା ଶକ୍ତିପୀଠ ଗୁଡ଼ିକରେ ଚଣ୍ତିପାଠ, ଦୁର୍ଗା ଆରାଧନା ପ୍ରଭୃତି କରିବେ । ଆଶ୍ବିନ ମାସ କୃଷ୍ଣପକ୍ଷ ଠାରୁ ଶୁକ୍ଳପକ୍ଷ ନବମୀ ପର୍ଯ୍ୟନ୍ତ ଏହି ପୂଜାର୍ଚ୍ଚନା କରାଯିବାର ପରମ୍ପରା ରହିଛି । ମାଆଙ୍କର ଏହି ପାର୍ବଣ ପୂଜାକୁ ନିଷ୍ଠାର ସହ ପାଳନ କରିବାକୁ ଗଜପତି ମହାରାଜା ନିବେଦନ କରିଛନ୍ତି ।
ଶ୍ରୋତୀୟ ବ୍ରାହ୍ମଣଙ୍କ ଦ୍ୱାରା ଶ୍ରୀକ୍ଷେତ୍ରର କ୍ଷେତ୍ରାଶ୍ୱରୀ ଭାବେ ମାଆ ବିମଳାଙ୍କ ପୀଠରେ ଷୋଡ଼ଶ ପୂଜାବିଧି ଆରମ୍ଭ ହୋଇଛି । ସେହିପରି ଶ୍ରୀମନ୍ଦିର ପରିସରରେ ଥିବା ଭୂବନେଶ୍ୱରୀ, ବାଟମଙ୍ଗଳା, ଉତ୍ତରାୟଣୀ ପୀଠ ସହ ଦକ୍ଷିଣ କାଳୀ, ଅଲାମଚଣ୍ତୀ ଓ ପଞ୍ଚମୁଖୀ ପୀଠରେ ମଧ୍ୟ ଶୋଳପୂଜା ଆରମ୍ଭ କରାଯାଇଛି । ସେପଟେ ଶ୍ରୀମନ୍ଦିରରେ ମହାପ୍ରଭୁଙ୍କ ସକାଳ ଧୂପ ବଢ଼ିବା ପରେ ଭଣ୍ଡାର ଘରୁ ମାଆ ଦୁର୍ଗାଙ୍କ ସ୍ବର୍ଣ୍ଣ ପ୍ରତିମା ରତ୍ନ ସିଂହାସନରେ ବିଜେ ହୋଇଥାଏ । ପରେ ମାଆ ସୁଭଦ୍ରାଙ୍କ ଆଜ୍ଞାମାଳ ଦୁର୍ଗାଙ୍କୁ ଲାଗି କରାଯିବା ପରେ ମାଜଣା ମଣ୍ଡପରେ ଠାକୁରାଣୀଙ୍କ ସହସ୍ର କୁମ୍ଭାଭିଷେକ ଅନୁଷ୍ଠିତ ହୋଇଥାଏ । ମାଆ ବିମଳାଙ୍କ ପୀଠରେ ତ୍ରିକାଳ ପୂଜା ଆରମ୍ଭ ହେବା ସହ ସପ୍ତମୀ, ଅଷ୍ଟମୀ, ନବମୀ ତଥା ଦଶହରାରେ ସ୍ୱତନ୍ତ୍ର ପୂଜା କରାଯିବାର ବିଧି ରହିଛି ।
ଶାରଦୀୟ ପୂଜା ପାଇଁ ଶ୍ରୀକ୍ଷେତ୍ରରେ ଏବେ ଠାରୁ ପୂଜାବିଧି ଆରମ୍ଭ ହୋଇଥିବା ବେଳେ ଶ୍ରୀମନ୍ଦିରରେ ବିଶେଷ କରି ଏହି ସମୟରେ ଦୁର୍ଗାମାଧବ ଉପାସନା ସହ ଗୁପ୍ତ ଗୁଣ୍ତିଚାର ବିଧି ମଧ୍ୟ ଆରମ୍ଭ କରାଯିବ ।