ନନ୍ଦିଘୋଷ ବ୍ୟୁରୋ: ନିର୍ବାଚନରେ ହାରିବା ପରେ ବାଟକୁ ଆସିଲେ ଟ୍ରମ୍ପ । ଆମେରିକାରେ ମଧ୍ୟବର୍ତ୍ତୀକାଳୀନ ନିର୍ବାଚନରେ ପରାଜୟ ପରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦୁଇଟି ବଡ ଘୋଷଣା କରିଛନ୍ତି । ଇରାନ ଉପରେ ଆକ୍ରମଣ କରିବାକୁ ଏବେ କୌଣସି ଯୋଜନା ନଥିବା ସେ କହିଛନ୍ତି । ଏହାସହ ଦୁଇ ଦେଶ ମଧ୍ୟରେ ଶାନ୍ତି ଆଲୋଚନା ହେବ, ଯାହାର ତାରିଖ ଖୁବଶୀଘ୍ର ସ୍ଥିର କରାଯିବ । ଏହା ପୂର୍ବରୁ ଟ୍ରମ୍ପ ଇସ୍ରାଏଲକୁ ମିଳୁଥିବା ବାର୍ଷିକ ୪ ବିଲିୟନ ଡଲାର ସହାୟତା ସ୍ଥଗିତ ରଖିବାକୁ ଘୋଷଣା କରିଥିଲେ । ଫାଇନାନ୍ସିଆଲ୍ ଟାଇମ୍ସ ସହିତ କଥାବାର୍ତ୍ତା ସମୟରେ ଟ୍ରମ୍ପ ଏହି ଘୋଷଣା କରିଛନ୍ତି । ସାମ୍ବାଦିକଙ୍କୁ ଟ୍ରମ୍ପ କହିଛନ୍ତି, ‘‘ଆମେ ଇସ୍ରାଏଲ ପ୍ରଧାନମନ୍ତ୍ରୀଙ୍କୁ ଏ ବିଷୟରେ ଅବଗତ କରାଇଛୁ । ଆମେ ଇସ୍ରାଏଲକୁ ଆଉ କୌଣସି ଆର୍ଥିକ ସହାୟତା ପ୍ରଦାନ କରିବୁ ନାହିଁ । ହେଲେ ଆମେ ସେମାନଙ୍କୁ ଅସ୍ତ୍ରଶସ୍ତ୍ର ବିକ୍ରି ଜାରି ରଖିପାରୁ ।
ସୂଚନା ମୂତାବକ, ସୋମବାର ନଭେମ୍ବର ୨ ତାରିଖରେ ଆମେରିକା ଇରାନର କେଶମ ଦ୍ବୀପ ଉପରେ ଆକ୍ରମଣ କରିଥିଲା । ଏହି ଆକ୍ରମଣ ନିର୍ଦ୍ଧାରିତ ମଧ୍ୟବର୍ତ୍ତୀକାଳୀନ ନିର୍ବାଚନ ପୂର୍ବରୁ ହୋଇଥିଲା । ତଥାପି ଆମେରିକାକୁ ଏହାର କୌଣସି ଫାଇଦା ମିଳିଲା ନାହିଁ । ଟ୍ରମ୍ପଙ୍କ ଦଳ କଂଗ୍ରେସ ଏବଂ ସିନେଟ୍ ଉଭୟରେ ଏକ ବଡ ପରାଜୟ ବରଣ କରିଛି ।
ତେବେ ନିର୍ବାଚନ ହାରିବା ପରେ ଟ୍ରମ୍ପଙ୍କର ହଠାତ ଏଭଳି ଦୁଇ ବଡ ଘୋଷଣା ପଛର କାରଣ କଣ, ତାକୁ ନେଇ ଏବେ ପ୍ରଶ୍ନ ଉଠିଛି । ରିପୋର୍ଟ ମୁତାବକ, ପରାଜୟର ଏକ ପ୍ରମୁଖ କାରଣ ହେଉଛି ବୃଦ୍ଧି ପାଉଥିବା ମୁଦ୍ରାସ୍ପିତୀ । ଇରାନ ସହ ଯୁଦ୍ଧ ଯୋଗୁଁ ଆମେରିକାର ଲୋକମାନେ ବର୍ତ୍ତମାନ ମୁଦ୍ରାସ୍ପିତୀରେ ଜୁଝି ହେଉଛନ୍ତି । ଯାହାକୁ ଟ୍ରମ୍ପ ନିୟନ୍ତ୍ରଣ କରିବାରେ ଅସମର୍ଥ ହୋଇଛନ୍ତି । ଯଦି ଦେଖିବା କଂଗ୍ରେସରେ ଏବେ ଟ୍ରମ୍ପଙ୍କ ପାର୍ଟି ପାଖରେ ଆଉ ବହୁମତ ନାହିଁ । ତେଣୁ, ଏକ ନୂତନ ଯୁଦ୍ଧ ଆରମ୍ଭ କରିବା ତାଙ୍କ ପାଇଁ କଷ୍ଟକର ହେବ। ସେଥିପାଇଁ କଂଗ୍ରେସ ଟ୍ରମ୍ପଙ୍କ ନିଷ୍ପତ୍ତି ସମୀକ୍ଷା କରିପାରେ । ସେପଟେ ଇସ୍ରାଏଲର ରାଜନୈତିକ ପରିସ୍ଥିତି ବର୍ତ୍ତମାନ ଅନିଶ୍ଚିତ। ନିର୍ବାଚନରେ ବେଞ୍ଜାମିନ୍ ନେତାନ୍ୟାହୁଙ୍କ ଦଳ ସ୍ପଷ୍ଟ ବହୁମତ ହାସଲ କରିପାରି ନାହିଁ। ଗାଦି ଆଇଜେନକୋଟ ଗଠବନ୍ଧନ ମାଧ୍ୟମରେ ସରକାର ଗଠନ କରିପାରନ୍ତି। ତେଣୁ ଇସ୍ରାଏଲଠାରୁ ଟ୍ରମ୍ପଙ୍କ ଦୂରତା ପାଇଁ ଏହା ଏକ କାରଣ ହୋଇପାରେ ।
