ନନ୍ଦିଘୋଷ ବ୍ୟୁରୋ: ପୁଣି ପାତ୍ରପଡା ଓଭରବ୍ରିଜ ଉପରେ ଦୁର୍ଘଟଣା । ବାଇକ ଆରୋହୀଙ୍କୁ ପିଟିଲା ଟ୍ରକ। ବାଇକ ଆରୋହୀ ଗୁରୁତର । ଟ୍ରକ୍ ଛାଡି ଘଟଣାସ୍ଥଳରୁ ଚମ୍ପଟ ମାରିଲା ଡ୍ରାଇଭର । ଗତକାଲି ରାତି ପ୍ରାୟ ସାଢ଼େ ୧୧ଟା ସମୟରେ ଘଟିଛି ଦୁର୍ଘଟଣା। ବାଇକ ଆରୋହୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଛି ପୋଲିସ । ଠିକ ସେହି ସ୍ଥାନରେ ଗତ ଶନିବାର ରାତିରେ ଘଟିଥିଲା ମର୍ମନ୍ତୁଦ ସଡକ ଦୁର୍ଘଟଣା । ଚାଲିଯାଇଥିଲା ମା’ ଓ ୮ ବର୍ଷୟା କୁନି ଝିଅର ଜୀବନ । ସେପଟେ ଗାଡିଟିକୁ ଜବତ କରି ଅଧିକ ତଦନ୍ତ କରୁଛି ପୋଲିସ ।
ପୂର୍ବତନ ଭାରତୀୟ କ୍ରିକେଟର ସୁରେଶ ରାଇନାଙ୍କୁ ଇଡି ନୋଟିସ୍, ଆଜି ହେବେ ହାଜର
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ପୂର୍ବତନ କ୍ରିକେଟର ସୁରେଶ ରାଇନାଙ୍କୁ ଇଡିର ନୋଟିସ । ଏକ ବେଟିଂ ଆପ୍ ମାମଲାରେ ସମନ ଜାରି କରିଛି । ଆଜି ଇଡିରେ ହାଜର ହେବାକୁ ନୋଟିସ କରାଯାଇଛି । କେନ୍ଦ୍ର ତଦନ୍ତକାରୀ ସଂସ୍ଥା ବେଟିଂ ଆପ୍ 1xBet ମାମଲାରେ ତାଙ୍କର ବୟାନ ରେକର୍ଡ କରିବ। ବେଆଇନ ବେଟିଂ ଆପ୍ ସହ ତାଙ୍କର ସମ୍ପୃକ୍ତି ଅଭିଯୋଗରେ ED ପକ୍ଷରୁ ତାଙ୍କୁ ନୋଟିସ୍ କରାଯାଇଛି । ବେଆଇନ 1X ବେଟିଂ ଆପ୍ ର ବ୍ରାଣ୍ଡ୍ ଆମ୍ବାସାଡାର୍ ଅଛନ୍ତି ରାଇନା । ସେପଟେ ଚର୍ଚ୍ଚିତ ଖେଳାଳି ରାଇନାଙ୍କ ବିରୋଧରେ ଏପରି ନୋଟିସକୁ ନେଇ ପ୍ରଶ୍ନ ଉଠାଇଛନ୍ତି କ୍ରିକେଟ ପ୍ରେମୀ । ରାଇନାଙ୍କ ସମେତ ଅନେକ ଚର୍ଚ୍ଚିତ ଅଭିନେତା ଓ ଷ୍ଟାର୍ ଖେଳାଳି ମଧ୍ୟ ଏହି ବେଟିଂ ଆପ୍ ମାମଲା ଜଡ଼ିତ ଥିବା ED ଜାଣିବାକୁ ପାଇଛି ।
ଦୀର୍ଘ ୪ ବର୍ଷ ପରେ ଭାରତ ଏବଂ ଚୀନ୍ ମଧ୍ୟରେ ଆରମ୍ଭ ହେବ ବିମାନ ସେବା
ନନ୍ଦିଘୋଷ ବ୍ୟୁରୋ: ଭାରତ-ଚୀନ୍ ମଧ୍ୟରେ ପୁଣି ଆରମ୍ଭ ହେବ ବିମାନ ସେବା। ଦୀର୍ଘ ୪ ବର୍ଷ ପରେ ଭାରତ ଏବଂ ଚୀନ୍ ମଧ୍ୟରେ ସିଧାସଳଖ ବିମାନ ଉଡ଼ାଣ ଆରମ୍ଭ ହେବ। ପ୍ରଧାନମନ୍ତ୍ରୀ ମୋଦିଙ୍କ ଚୀନ ଗସ୍ତ ପୂର୍ବରୁ ଏହି ବଡ଼ ନିଷ୍ପତ୍ତି ନେଇଛନ୍ତି ସରକାର। ବିମାନ ସେବା ଆରମ୍ଭ ହେବା ପରେ ଉଭୟ ଦେଶର ଲକ୍ଷ ଲକ୍ଷ ଛାତ୍ର, ବ୍ୟବସାୟୀ ଏବଂ ପର୍ଯ୍ୟଟକ ଉପକୃତ ହେବେ। ଭାରତ-ଚୀନ ମଧ୍ୟରେ ସିଧା ବିମାନ ଉଡ଼ାଣ ଆସନ୍ତା ମାସରୁ ପୁଣି ଥରେ ଆରମ୍ଭ ହୋଇପାରେ।୨୦୨୦ ପ୍ରାରମ୍ଭରେ ଭାରତ ଏବଂ ଚୀନ୍ ମଧ୍ୟରେ ସମସ୍ତ ସିଧାସଳଖ ବାଣିଜ୍ୟିକ ବିମାନ ସେବା ବନ୍ଦ କରିଦିଆଯାଇଥିଲା। ଏହାର କିଛି ମାସ ପରେ ୨୦୨୦ ଜୁନ୍ ମାସରେ ଲଦାଖର ଗଲୱାନ୍ ଉପତ୍ୟକାରେ ଦୁଇ ଦେଶର ସେନା ମଧ୍ୟରେ ହିଂସାତ୍ମକ ସଂଘର୍ଷ ହୋଇଥିଲା। ଯେଉଁଥିରେ ୨୦ ଜଣ ଭାରତୀୟ ସୈନିକ ସହିଦ ହୋଇଥିଲେ। ଏହି ଘଟଣା ପରେ ଦୁଇ ଦେଶ ମଧ୍ୟରେ ସମ୍ପର୍କ ଦୂରେଇବାରେ ଲାଗିଥିଲା।
ବିମାନ ଚଳାଚଳ ବନ୍ଦ କରାଯାଇଥିଲା। ସିଧାସଳଖ ବିମାନର ଅଭାବ ଯୋଗୁଁ ଚୀନ ଯାଉଥିବା ଲୋକଙ୍କୁ ହଂକଂ, ସିଙ୍ଗାପୁର କିମ୍ବା ବ୍ୟାଙ୍କକ ଭଳି ସହର ଦେଇ ଯିବାକୁ ପଡ଼ୁଥିଲା। ଏହି ପରିବହନ ଯୋଗୁଁ ୬ରୁ ୭ ଘଣ୍ଟାର ଯାତ୍ରାକୁ ୧୫ରୁ ୨୦ ଘଣ୍ଟା ଲାଗୁଥିଲା। ସିଧାସଳଖ ବିମାନ ତୁଳନାରେ ପରିବହନ ବିମାନର ଟିକେଟ୍ ମଧ୍ୟ ବହୁତ ମହଙ୍ଗା ଥିଲା। ବର୍ତ୍ତମାନ ସିଧାସଳଖ ବିମାନ ପ୍ରଚଳନ ସହିତ, ଯାତ୍ରୀମାନଙ୍କର ବହୁତ ସମୟ ଏବଂ ଟଙ୍କା ସଞ୍ଚୟ ହେବ।ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଗଷ୍ଟ ୨୮ରେ ଚୀନର ତିଆନଜିନ୍ ସହରରେ ଅନୁଷ୍ଠିତ ହେବାକୁ ଥିବା ସାଂଘାଇ ସହଯୋଗ ସଂଗଠନ SCO ଶିଖର ସମ୍ମିଳନୀରେ ଯୋଗ ଦେବାକୁ ଯାଉଛନ୍ତି।
ଏହି ଶିଖର ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ମୋଦି ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ସିଧାସଳଖ ଦ୍ୱିପାକ୍ଷିକ ଆଲୋଚନା ହୋଇପାରେ ବୋଲି ଅନୁମାନ କରାଯାଉଛି। ଏହି ଗୁରୁତ୍ୱପୂର୍ଣ୍ଣ ବୈଠକ ପୂର୍ବରୁ ବିମାନ ସେବା ପୁନଃ ଆରମ୍ଭ କରିବା ଦୁଇ ଦେଶର ସମ୍ପର୍କକୁ ଆହୁରି ନିକଟତର କରିଛି।
ବିହାର ସ୍ଵତନ୍ତ୍ର ଭୋଟର ତାଲିକା ସଂଶୋଧନ SIR ପ୍ରସଙ୍ଗରେ ସୁପ୍ରିମକୋର୍ଟରେ ଆଜି ଆସିପାରେ ରାୟ
ନନ୍ଦିଘୋଷ ବ୍ୟୁରୋ: ବିହାର ସ୍ଵତନ୍ତ୍ର ଭୋଟର ତାଲିକା ସଂଶୋଧନ SIR ପ୍ରସଙ୍ଗରେ ସୁପ୍ରିମକୋର୍ଟରେ ଆଜି ଆସିପାରେ ରାୟ। ଗତକାଲି ଶୁଣାଣି କରିଥିଲେ ସର୍ବୋଚ୍ଚ ନ୍ୟାୟାଳୟ। ଭୋଟ ତାଲିକା ସଂଶୋଧନ SIR ପ୍ରସଙ୍ଗ ନେଇ ସୁପ୍ରିମକୋର୍ଟଙ୍କ ଦ୍ଵାରସ୍ଥ ହୋଇଛନ୍ତି ଏକାଧିକ ଆବେଦନକାରୀ। ଆବେଦନକାରୀଙ୍କ ଅଭିଯୋଗକୁ ନେଇ ସୁପ୍ରିମକୋର୍ଟ କହିଛନ୍ତି, ଆଧାର କାର୍ଡ ନାଗରିକତାର ପ୍ରମାଣ ନୁହେଁ। ଆବେଦନକାରୀ ପକ୍ଷ ଓକିଲଙ୍କ ଯୁକ୍ତି ହେଉଛି, ୨୦୦୩ ମସିହାରେ ବିହାରରେ SIR ଦ୍ଵାରା ଭୋଟର ତାଲିକା ସଂଶୋଧନ ହୋଇଥିଲା। ସେହି ସଂଶୋଧନ ଆଧାରରେ ପରବର୍ତ୍ତୀ ସମୟରେ ସମ୍ପୃକ୍ତ ଭୋଟର ତାଲିକାରେ ପଞ୍ଜିକୃତ ହୋଇ ପରବର୍ତ୍ତୀ ନିର୍ବାଚନରେ ଭୋଟ ଦାନ କରିଆସୁଛନ୍ତି। ତେବେ ସଂଶୋଧିତ ତାଲିକାରୁ ପ୍ରାରମ୍ଭିକ ପର୍ଯ୍ୟାୟରେ ବାଦ ପଡିଛନ୍ତି ୬୫ ଲକ୍ଷ ଭୋଟର।
ଏହାକୁ ନେଇ ସୁପ୍ରିମକୋର୍ଟଙ୍କ ଦ୍ଵାରସ୍ଥ ହୋଇଛନ୍ତି ବିଭିନ୍ନ ସଂଗଠନ। ଆବେଦନକାରୀଙ୍କ ଏହି ଯୁକ୍ତିକୁ କୋର୍ଟ ଏକ ପ୍ରକାର ସହମତ ହୋଇଥିବା ନେଇ ସଙ୍କେତ ଦେଇଛନ୍ତି। ଏବେ ସେହି ମାନଙ୍କୁ ପୁଣିଥରେ ସଂଶୋଧନ ତାଲିକାରେ ଆଣିବାର କଣ ଆବଶ୍ୟକତା ରହିଛି ବୋଲି କୋର୍ଟ ପ୍ରଶ୍ନ କରିଛନ୍ତି। ତେବେ ଉଭୟ ନିର୍ବାଚନ କମିଶନଙ୍କ ଓକିଲ ଓ ଆବେଦନକାରୀଙ୍କ ପକ୍ଷରୁ ଆଇନଜୀବୀ ବିଭିନ୍ନ ସାମ୍ବିଧାନିକ ଯୁକ୍ତି ଉପସ୍ଥାପନ କରିଛନ୍ତି । ଏହାକୁ ନେଇ ଆଜି ଆସିପାରେ ଚୂଡାନ୍ତ ରାୟ। ଯଦି SIRକୁ ଆବେଦନକାରୀ ପକ୍ଷ ଅବୈଧ ପ୍ରମାଣ କରିଦିଅନ୍ତି ତେବେ ଏହି ପ୍ରକ୍ରିୟା ଉପରେ ରୋକ ଲଗାଇବାକୁ କହିଛନ୍ତି ସୁପ୍ରିମକୋର୍ଟ। ଜଷ୍ଟିସ ସୂର୍ଯ୍ୟକାନ୍ତ ଓ ଜଷ୍ଟିସ ଜୟମାଲ୍ୟା ବାଗଚିଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରୁଛନ୍ତି।…
କଂଗ୍ରେସକୁ ତୃଣମୂଳ ସ୍ତରରୁ ସଂଜୀବନୀ ଦେବାକୁ ଭକ୍ତଙ୍କ ପ୍ରୟାସ
ନନ୍ଦିଘୋଷ ବ୍ୟୁରୋ: ପ୍ରଥମ ଥର ଲାଗି ନୂଆ ଢାଞ୍ଚାରେ କଂଗ୍ରେସ ତୃଣମୂଳ ସଂଗଠନକୁ ମଜଭୁତ କରିବାକୁ ଅଣ୍ଟା ଭିଡିଛି । ଜିଲ୍ଲା ମୁଖିଆ ଚୟନ ପୂର୍ବରୁ ବ୍ଲକ, ଏନଏସି, ମ୍ୟୁନିସିପାଲିଟି ସଭାପତି ଚୟନ କରିବାକୁ ପିସିସି ନିର୍ଦ୍ଦେଶ ଦେଇଛି । ଅଗଷ୍ଟ ୨୦ ସୁଦ୍ଧା ବ୍ଲକ ସଭାପତି ପାଇଁ ଜିଲ୍ଲା ସଂଯୋଜକମାନେ ବିଭିନ୍ନ ବର୍ଗର ୫ଟି ନାମ ଚୂଡାନ୍ତ କରି ଦେବାକୁ ଚିଠିରେ ନିର୍ଦ୍ଦେଶ ଦିଆଯାଇଛି । ମଧ୍ୟବର୍ତ୍ତୀକାଳୀନ ସଭାପତିମାନେ ଜିଲ୍ଲା ସଂଯୋଜକ ଭାବରେ ନାମିତ କରାଯିବା ପରେ ସଭାପତି ଚୟନ ପୂର୍ବରୁ କିପରି ବ୍ଳକ ସଭାପତି ଚୟନ କରାଯିବ ତାହାକୁ ନେଇ କଂଗ୍ରେସ ଅନ୍ଦର ମହଲରେ ନାନା ଚର୍ଚ୍ଚା ଆରମ୍ଭ ହୋଇଯାଇଛି ।
ମାହୋଲ ଅଛି ସଂଗଠନ ନାହିଁ । ତୃଣମୂଳସ୍ତରରେ ସଂଗଠନକୁ ସୁଦୃଢ କରିବାକୁ ଫୋକସ କରିଛି କଂଗ୍ରେସ । ପ୍ରଥମଥର ଲାଗି ପ୍ରଥମେ ଜିଲ୍ଲା ସଭାପତି ବଦଳରେ ପ୍ରଥମେ ବ୍ଲକ, ଏନଏସି, ମ୍ୟୁନିସିପାଲିଟି ସଭାପତି ଚୟନ କରିବାକୁ ଅଣ୍ଟା ଭିଡିଛି ପିସିସି । ଏନେଇ ଜିଲ୍ଲା ସଂଯୋଜକମାନଙ୍କୁ ଗୁରୁ ଦାୟିତ୍ବ ଦେଇଛି ପିସିସି । ଅଗଷ୍ଟ ୨୦ ତାରିଖ ସୁଦ୍ଧା ବ୍ଲକ ଓ ନଗର କଂଗ୍ରେସ ସଭାପତି ପଦ ପାଇଁ ସାଧାରଣ ବର୍ଗ, ଅନୁସୂଚିତ ଜାତି ଓ ଜନଜାତି, ମହିଳା ଓ ପଛୁଆ ବର୍ଗରୁ ମୋଟ ୫ ଜଣ ନାଁ ଚୂଡାନ୍ତ କରି ପିସିସିକୁ ୨୫ ଅଗଷ୍ଟ ସୁଦ୍ଧା ଦେବାକୁ ନିର୍ଦ୍ଦେଶ ଦିଆଯାଇଛି । ସେହିପରି ସୁପାରିସ କି ଲବି ନୁହେଁ । ଜିଲ୍ଲାସ୍ତରରୁ ଏଆଇସିସିର ଟିମ ଚୟନ କରିବେ ଜିଲ୍ଲା କଂଗ୍ରେସ ସଭାପତି । ପଡୋଶୀ ରାଜ୍ୟର କ୍ୟାବିନେଟ ଓ ପିସିସି ସ୍ତରର ଜଣେ ଜଣେ ନେତା ଜିଲ୍ଲା ଗସ୍ତରେ ଜିଲ୍ଲା ସଭାପତି ଚୟନ କରିବେ । ୨ ମାସ ମଧ୍ୟରେ ସାଂଗଠନିକ ନିର୍ବାଚନ ପ୍ରକ୍ରିୟା ଶେଷ କରାଯିବ ବୋଲି ପିସିସି ସଭାପତି ଭକ୍ତ ଚରଣ ଦାସ କହିଛନ୍ତି । ତେବେ ଜିଲ୍ଲା ସଭାପତି ଚୟନ ପୂର୍ବରୁ କାହିଁକି ପ୍ରଥମେ ବ୍ଲକ ସଭାପତି ଚୟନ କରାଯିବ ସେ ନେଇ ଭିନ୍ନ ଯୁକ୍ତି ବାଢିଛନ୍ତି ପିସିସି ସଭାପତି ।
ପିସିସିର ୩୫ଟି ସାଂଗଠନିକ ଜିଲ୍ଲା ସଭାପତି ଚୟନ କରିବା ଏଆଇସିସି ଓଡିଶାରେ ନୂଆ ଫର୍ମୁଲା ଆପଣାଇଛି । ନିର୍ବାଚନ ନୁହେଁ, ସିଲେକ୍ସନ ବେସିସରେ କମିଟି ଗଠନ କରାଯିବ । ସଂଗଠନ ସୂର୍ୟନ ନାମରେ ଅଭିଯାନ ଆରମ୍ଭ କରାଯିବ । ତେଣୁ ଅଧିକାଶ ଜିଲ୍ଲା ସଂଯୋଜକ ହିଁ ଜିଲ୍ଲା ସଭାପତି ହେବା ନିଶ୍ଚିତ ବୋଲି ବରିଷ୍ଠ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି । କଂଗ୍ରେସ କାର୍ଯ୍ୟକ୍ରମ ପରେ କାର୍ଯ୍ୟକ୍ରମ ହାତକୁ ନେଇ ଚାଲିଥିବା ବେଳେ ତୃଣମୂଳସ୍ତରରେ କଂଗ୍ରେସ ସଂଗଠନ ଦୁର୍ବଳ ବୋଲି ରାଜନୈତିକ ସମୀକ୍ଷକ କେ. ରବି କହିଛନ୍ତି ।
ଦାୟିତ୍ବର ୭ ମାସ ପରେ ବି ପିସିସି ସଭାପତି ଭକ୍ତ ଚରଣ ଦାସ କଂଗ୍ରେସ ସଂଗଠନକୁ ନୂଆରୂପ ଦେଇପାରିନାହାନ୍ତି । ୨୦୨୪ ନିର୍ବାଚନ ପରେ ପ୍ରଥମ ଥର ଲାଗି ଏଆଇସିସି ଓଡିଶାକୁ ଫୋକସ କରିଥିବାରୁ ରାଜ୍ୟ କଂଗ୍ରେସକୁ ଘାରିଛି ସଂଗଠନ ଚିନ୍ତା ।
ତଳକୁ ତଳକୁ ଯାଉଛି ରାଜ୍ୟ ଏମଏସଏମଇ, ଉଠିବାରେ ସହଯୋଗ କରୁନାହାନ୍ତି ବଡ଼ ଶିଳ୍ପ ସଂସ୍ଥା
ନନ୍ଦିଘୋଷ ବ୍ୟୁରୋ: ରାଜ୍ୟର ଏମଏସଏମଇ କ୍ଷେତ୍ରକୁ ବଡ଼ ଶିଳ୍ପ ସଂସ୍ଥାମାନେ ସହଯୋଗ କରୁନାହାନ୍ତି । ଖୋଲା ମଞ୍ଚରେ ଏଭଳି ବଡ଼ ଅଭିଯୋଗ ଆଣିଛନ୍ତି ଏମଏସଏମଇ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ । ଖାଲି ଅଭିଯୋଗ ନୁହେଁ, ଶିଳ୍ପ ମନ୍ତ୍ରୀଙ୍କୁ ଏ ପ୍ରସଙ୍ଗରେ ତୁରନ୍ତ ତଦାରଖ କରିବାକୁ କହିଛନ୍ତି ଗୋକୁଳାନନ୍ଦ । ରାଜ୍ୟର ଶିଳ୍ପ ଗୁଡିକ କାହିଁକି ରାଜ୍ୟର ଏମଏସଏମଇ ସାମଗ୍ରୀ କିଣୁ ନାହାଁନ୍ତି ବୋଲି ଶିଳ୍ପ ମନ୍ତ୍ରୀ ପ୍ରଶ୍ନ କରନ୍ତୁ ବୋଲି ଦାବି କରିଛନ୍ତି ଏମଏସଏମଇ ମନ୍ତ୍ରୀ । ସେପଟେ ଶିଳ୍ପ ମନ୍ତ୍ରୀ ମଧ୍ୟ ଏହା ଉପରେ ଉତ୍ତର ରଖିଥିବା ବେଳେ କ୍ଷୁଦ୍ର ମଧ୍ୟମ ଶିଳ୍ପ ସଂଘ ମଧ୍ୟ ଓଡ଼ିଶାରେ ଚାଲିଥିବା ଏହି ଅସହଯୋଗ କଥା ଉଠାଇଛନ୍ତି ।
ଓଡ଼ିଶାରେ ଅଣୁ, କ୍ଷୁଦ୍ର ଓ ମଧ୍ୟମ ଶିଳ୍ପକୁ ସହଯୋଗ ମିଳୁନାହିଁ । ଯାହାକୁ ନେଇ ଖୋଲା ମଞ୍ଚରେ ଶିଳ୍ପ ମନ୍ତ୍ରୀଙ୍କୁ ପ୍ରଶ୍ନ କରିଛନ୍ତି ଏମଏସଏମଇ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ । ଓଡିଶା ଆସେମ୍ବଲି ଅଫ ସ୍ମଲ ଆଣ୍ଡ ମିଡିୟମ ଏଣ୍ଟରପ୍ରାଇଜେସ-ଓସମୀର ୪୦ତମ ପ୍ରତିଷ୍ଠା ଦିବସ କାର୍ଯ୍ୟକ୍ରମରେ ଯୋଗ ଦେଇ ମଞ୍ଚ ଉପରେ ଶିଳ୍ପ ମନ୍ତ୍ରୀ ସମ୍ପଦ ସ୍ବାଇଁଙ୍କୁ ଏମଏସଏମଇ ମନ୍ତ୍ରୀ ଏଭଳି ପ୍ରଶ୍ନ କରିଛନ୍ତି । ଶିଳ୍ପ ବିଭାଗର ବଡ଼ ଭାଇର ଭୂମିକା ରହିଛି । ରାଜ୍ୟର ଏମଏସଏମଇକୁ ପ୍ରୋତ୍ସାହନ ଦେବାର ଆବଶ୍ୟକତା ରହିଛି । କିନ୍ତୁ ବଡ଼ ଶିଳ୍ପ ଦେଉଛନ୍ତି କ’ଣ ବୋଲି ପ୍ରଶ୍ନ କରିଛନ୍ତି ଏମଏସଏମଇ ମନ୍ତ୍ରୀ । ରାଜ୍ୟରେ ବଡ଼ ଶିଳ୍ପ ଓଡ଼ିଶାର ଏମଏସଏମଇରୁ କିଛି କିଣୁ ନାହାଁନ୍ତି ବୋଲି ବଡ଼ ଅଭିଯୋଗ ଆଣିଛନ୍ତି । ଏପରିକି ସେମାନଙ୍କର ଜିଏସଟି ଚେକ କରନ୍ତୁ ବୋଲି ଶିଳ୍ପ ମନ୍ତ୍ରୀଙ୍କୁ ପରାମର୍ଶ ଦେଇଛନ୍ତି । ଓଡିଶାରୁ କେତେ ସାମଗ୍ରୀ ଆଣୁଛ ଓ ବାହାରୁ କେତେ ଆଣୁଛ ଓ କାହିଁକି ଆଣୁଛ ବୋଲି ଶିଳ୍ପ ମନ୍ତ୍ରୀଙ୍କୁ ପ୍ରଶ୍ନ କରନ୍ତୁ ବୋଲି କହିଛନ୍ତି ଗୋକୁଳାନନ୍ଦ ମଲ୍ଲିକ ।
ଓଡିଶା ଆସେମ୍ବଲି ଅଫ ସ୍ମଲ ଆଣ୍ଡ ମିଡିୟମ ଏଣ୍ଟରପ୍ରାଇଜ-ଓସମୀ ମଧ୍ୟ ସମାନ ଅଭିଯୋଗ ଆଣିଛି । ରାଜ୍ୟରେ ଏମଏସଏମଇ କ୍ଷେତ୍ରକୁ ବଡ଼ ଶିଳ୍ପ ସହଯୋଗ କରୁନାହାନ୍ତି ବୋଲି କହିଛି ଓସମୀ । ସରକାର ଯଦି ରାଜ୍ୟର ଏମଏସଏମଇ ସାମଗ୍ରୀ କିଣନ୍ତେ ରାଜ୍ୟର ଏମଏସଏମଇ କ୍ଷେତ୍ର ବହୁ ସମୃଦ୍ଧି ହୁଅନ୍ତା । ବଡ଼ ଶିଳ୍ପ ଛୋଟ ଶିଳ୍ପକୁ ସହଯୋଗ କରିବା ଦରକାର । ଯାହା ଫଳରେ ରାଜ୍ୟର ସାମଗ୍ରିକ ପ୍ରଗତି ହୋଇପାରିବ ବୋଲି କହିଛି ସଂଘ । ସେପଟେ ଏମଏସଏମଇ ମନ୍ତ୍ରୀଙ୍କ ଖୋଲା ମଞ୍ଚରେ ଆହ୍ୱାନର ଉତ୍ତର ରଖିଛନ୍ତି ଶିଳ୍ପ ମନ୍ତ୍ରୀ ସମ୍ପଦ ସ୍ୱାଇଁ । ଏକ୍ଷେତ୍ରରେ ଶିଳ୍ପ ବିଭାଗ କାମ କରୁଛି ଓ ଏମଏସଏମଇ ବଢ଼ିବା ପାଇଁ ଗୁରୁତ୍ୱ ଦିଆଯାଉଛି ବୋଲି କହିଛନ୍ତି ଶିଳ୍ପ ମନ୍ତ୍ରୀ ।
ଟିମ୍ ଇଣ୍ଡିଆରେ କେମିତି ଡେବ୍ୟୁ କରିବେ ଅଭିମନ୍ୟୁ ଇଶ୍ବରନ୍, ଗାଙ୍ଗୁଲି କହିଲେ ଫର୍ମୁଲା..
ନନ୍ଦିଘୋଷ ବ୍ୟୁରୋ: ଯୁବ କ୍ରିକେଟର ଅଭିମନ୍ୟୁ ଇଶ୍ବରନଙ୍କ ପିତା ବାରମ୍ବାର କହୁଛନ୍ତି କି, ତାଙ୍କ ପୁଅ ଭଲ ପ୍ରଦର୍ଶନ କରି ଆସୁଛନ୍ତି କିନ୍ତୁ ତାଙ୍କୁ ଟିମ ଇଣ୍ଡିଆରେ ସ୍ଥାନ ମିଳୁନାହିଁ । ଯାହାର ଉତ୍ତର ରଖିଛନ୍ତି ପୂର୍ବତନ ବିସିସିଆଇ ଅଧ୍ୟକ୍ଷ ତଥା ଟିମ ଇଣ୍ଡିଆର ପୂର୍ବତନ ଅଧିନାୟକ ଗୌତମ ଗମ୍ଭୀର । ଏକ ଜାତୀୟ ଗଣମାଧ୍ୟମ ସହ ଇଣ୍ଟରଭିୟ୍ୟୁ ସମୟରେ ସେ କହିଛନ୍ତି କି, ଅଭିମନ୍ୟୁ ଜଣେ ଭଲ ଖେଳାଳି । ଲିଷ୍ଟ ଏ ଭଲ ପ୍ରଦର୍ଶନ ଜାରି ରଖିଛନ୍ତି । ଏଯାବତ ସେ ଟିମ ଇଣ୍ଡିଆରେ ଡେବ୍ୟୁ କରିନାହାନ୍ତି । ଯଦି ସେ ଦଳରେ ସ୍ଥାନ ପାଇବାକୁ ଚାହାନ୍ତି ତାହେଲେ ତିନି ନମ୍ବରରେ ବ୍ୟାଟିଂ କରିବେ । ଟେଷ୍ଟରେ ସେ ତିନି ନମ୍ବରରେ ବ୍ୟାଟିଂ କରିପାରିବେ । ପନ୍ଥ, ଜାଡେଜା, ଜୟସ୍ବାଲ ଏବଂ ରାହୁଲ ଭଲ ପ୍ରଦର୍ଶନ କରୁଛନ୍ତି । ଏଣୁ ତିନି ନମ୍ବର ସ୍ଥାନରେ ସେ ଖେଳିବାର ସୁଯୋଗ ପାଇପାରିବେ । ସେପଟେ ଅଭିମନ୍ୟୁଙ୍କ ବାପା କହିଛନ୍ତି କି, ଗମ୍ଭୀର ମୋ ପୁଅକୁ ଆଶ୍ବାସନା ଦେଇଛନ୍ତି କି, ମୋ ପୁଅକୁ ଟିମ ଇଣ୍ଡିଆରେ ସ୍ଥାନ ମିଳିବ । କିନ୍ତୁ ଏଯାବତ ଡେବ୍ୟୁ କରିପାରିନି ।
ସେପଟେ ଆମେ ଯଦି ଅଭିମନ୍ୟୁ ଇଶ୍ବରନଙ୍କ କଥା କହିବା ତାହେଲେ ସେ ୧୦୩ ପ୍ରଥମ ଶ୍ରେଣୀ କ୍ରିକେଟ ଖେଳିଛନ୍ତି । ଯେଉଁଥିରେ ୪୮.୭୦ ହାରରେ ୭୮୪୧ ରନ କରିଛନ୍ତି । ଯେଉଁଥିରେ ୨୭ ଶତକ ଏବଂ ୩୧ ଅର୍ଦ୍ଧଶତକ ରହିଛି । ତାଙ୍କର ସର୍ବାଧିକ ସ୍କୋର ରହିଛି ୨୩୩ ରନ । ଲିଷ୍ଟ ଏ ମଧ୍ୟ ଦମଦାର ପ୍ରଦର୍ଶନ କରିଛନ୍ତି ଅଭିମନ୍ୟୁ । ୮୯ ମ୍ୟାଚ୍ରେ ୪୭.୦୩ ହାରରେ ୩୮୫୭ ରନ୍ କରିଛନ୍ତି। ତାଙ୍କ ନାମରେ ୯ ଶତକ ଏବଂ ୨୩ ଅର୍ଦ୍ଧଶତକ ରହିଛି। ତାଙ୍କର ସର୍ବୋତ୍ତମ ସ୍କୋର ୧୪୯ ରନ୍।
ଜଣାପଡ଼ିଲା ଇସ୍ରାଏଲ ପାଖରେ କାହିଁକି ଅସହାୟ ହୋଇଗଲା ଇରାନ, ଘରେ ବସିଥିଲେ ୨୧ ହଜାର ଗୁପ୍ତଚର
ନନ୍ଦିଘୋଷ ବ୍ୟୁରୋ: ଜୁନରେ ଇସ୍ରାଏଲ ଓ ଇରାନ ମଧ୍ୟରେ ହୋଇଥିବା ୧୨ ଦିନିଆ ଯୁଦ୍ଧରେ ଇରାନ ଭିତରେ ପଶି ଇସ୍ରାଏଲ ବହୁତ କ୍ଷତି କରିଥିଲା । ଇରାନର ବରିଷ୍ଠ ଅଧିକାରୀଙ୍କୁ ସେମାନଙ୍କ ସୁରକ୍ଷିତ ସ୍ଥାନରେ ହିଁ ହତ୍ୟା କରିଥିଲା ଇସ୍ରାଏଲ । ଯାହାକୁ ନେଇ ସାରା ବିଶ୍ବରେ ଇସ୍ରାଏଲର ଗୁଇନ୍ଦା ସଂସ୍ଥା ମୋସାଦର ପ୍ରଶଂସା କରାଯାଉଛି । ମୋସାଦ ଇରାନ ଭିତରେ ଇରାନୀ ଅଧିକାରୀ ଓ ନେତାଙ୍କୁ ହତ୍ୟା କରିବା ପାଇଁ ଗୁପ୍ତ ଜାଲ ବିଛାଇ ଥିଲା ।
ମଙ୍ଗଳବାର ଇରାନ ପୋଲିସ ପକ୍ଷରୁ କୁହାଯାଇଛି, ଇସ୍ରାଏଲ ସହ ଯୁଦ୍ଧ ବେଳେ ୨୧ ହଜାର ସନ୍ଦିଗ୍ଧ ଲୋକଙ୍କୁ ଗିରଫ କରାଯାଇଛି । ସାଧାରଣ ଲୋକଙ୍କ ସୂଚନା ଆଧାରରେ ଏହି ଗିରଫଦାରୀ କରାଯାଇଥିବା ପୋଲିସ ପକ୍ଷରୁ କୁହାଯାଇଛି । ତେବେ ଇରାନ ନ୍ୟାୟପାଳିକା ଗିରଫଦାରୀକୁ ନେଇ ଭିନ୍ନ ମତ ରଖିଛି । ପ୍ରାୟ ଦୁଇ ହଜାର ଲୋକଙ୍କୁ ଗିରଫ କରାଯାଇଥିବା ନ୍ୟାୟପାଳିକା ସୂଚନା ଦେଇଛନ୍ତି ।
ପୋଲିସ ପ୍ରବକ୍ତା ସଇଦ ମୋଣ୍ଟାଜେରଲାମାହଦି ସରକାରୀ ଗଣମାଧ୍ୟମକୁ କହିଛନ୍ତି, ଏହି ଗିରଫଦାରୀ ରାଷ୍ଟ୍ରୀୟ ଆପତ୍ତିକାଳୀନ ଲାଇନ୍ ୧୧୦ରେ ହୋଇଥିବା ୭୮୫୦ ରିପୋର୍ଟ ଆଧାରରେ କରାଯାଇଛି । ୧୨ ଦିନର ଯୁଦ୍ଧରେ ସାଧାରଣ ଲୋକଙ୍କ କଲରେ ୪୧ ପ୍ରତିଶତ ବୃଦ୍ଧି ଘଟିଥିବା ବେଳେ ୨୧ ଜଣ ସନ୍ଦିଗ୍ଧଙ୍କୁ ଗିରଫ କରାଯାଇଛି ।
ମୋସାଦ ଏଜେଣ୍ଟଙ୍କୁ ଧରିବାକୁ ୪୦ ହଜାର ପୋଲିସ ମୁତୟନ
ମୋଣ୍ଟାଜେରଲାମାହଦି କହିଛନ୍ତି, ଯୁଦ୍ଧ ସମୟରେ ପୂରା ଦେଶରେ ହଜାରେରୁ ଅଧିକ ଚେକପୋଷ୍ଟ ନିର୍ମାଣ କରାଯାଇଥିଲା । ରାସ୍ତା ଘଟ ଉପରେ ୨୪ ଘଣ୍ଟା ନଜର ରଖାବାକୁ ୪୦ ହଜାରରୁ ଅଧିକ ପୋଲିସ କର୍ମୀଙ୍କୁ ନିୟୋଜିତ କରାଯାଇଥିଲା । ସେ କହିଛନ୍ତି, ବେଆଇନ ଭାବେ ଇରାନରେ ପଶିଥିବା ୨୭୭୪ ଜଣ ବିଦେଶୀଙ୍କୁ ଗିରଫ କରାଯାଇଛି । ଫୋନ ଯାଞ୍ଚ ପରେ ୩୦ଟି ବିଶେଷ ସୁରକ୍ଷା ମାମଲା ରୁଜୁ କରାଯାଇଥିବା ବେଳେ ଗୁପ୍ତଚରୀ ସନ୍ଦେହରେ ୨୬୧ ଲୋକ ଓ ବେଆଇନ ଫିଲ୍ମିଂ ପାଇଁ ୧୭୨ ଜଣଙ୍କୁ ଗିରଫ କରାଯାଇଛି ।
ବିଗ୍ ବସରେ ଠକାମୀ, ଏମିତି କହିଲେ ପ୍ରିୟଙ୍କା…
ନନ୍ଦିଘୋଷ ବ୍ୟୁରୋ : ସଲମାନ ଖାନଙ୍କ ଦ୍ବାରା ହୋଷ୍ଟ କରାଯାଉଥିବା ବିଗବସ୍ ସାରା ଭାରତରେ ବେଶ ପ୍ରସିଦ୍ଧ । ଏହି ଶୋ’ର ଡିମାଣ୍ଡ କେବଳ ଭାରତ ନୁହେଁ ସାରା ବିଶ୍ବରେ ମଧ୍ୟ ରହିଛି । ତେବେ ଏହି ଶୋ’ରେ ସ୍ମାମ୍ ହେଉଥିବା ଭଳି ଅଭିଯୋଗ ଆସିଛି । ଅଭିନୀତ ଗୁପ୍ତା ନାମକ ଜଣେ ଯୁବକ ଆଣିଛନ୍ତି ଅଭିଯୋଗ । ସେ ପ୍ରିୟଙ୍କା ବାନାର୍ଜୀଙ୍କ ନାମରେ ଅଭିଯୋଗ ଆଣିଥିବାବେଳେ ଏହାର ଉତ୍ତର ରଖିଛନ୍ତି ପ୍ରିୟଙ୍କା । ଅନିଭନୀତ ଅଭିଯୋଗ ଆଣିଛନ୍ତି କି, ମୋତେ ଏହି ଶୋ’ରେ ନେବା ପାଇଁ ମିଛ ପ୍ରତିଶୃତି ଦିଆଯାଇଛି । ପ୍ରିୟଙ୍କା କହିଛନ୍ତି କି, କେବଳ ଲାଇମଲାଇଟକୁ ଆସିବା ପାଇଁ ଏଭଳି କରୁଛନ୍ତି ।
ପ୍ରିୟଙ୍କା କହିଛନ୍ତି କି, ମୁଁ ଭୋପାଳରେ ଡକ୍ଟର ଅଭିନୀତ ଗୁପ୍ତାଙ୍କୁ ଭେଟିଥିଲି। ମୁଁ ପର୍ସୋନା ମିସେସ୍ ଇଣ୍ଡିଆ ନାମକ ଏକ ବିୟୁଟି କଣ୍ଟେଷ୍ଟରେ ଯୋଗ ଦେଇଥିଲି । ଯେତେବେଳେ ମୁଁ ଏହି ପ୍ରତିଯୋଗିତା ପାଇଁ ଭୋପାଳ ଯାଇଥିଲି, ମୁଁ ଅଭିନୀତଙ୍କୁ ଭେଟିଥିଲି। ମୋର ତାଙ୍କ ସହିତ ଭଲ ବନ୍ଧୁତା ଥିଲା। ସେ ପ୍ରସିଦ୍ଧ ହେବାକୁ ଚାହୁଁଥିଲେ। ଆମେ ତାଙ୍କୁ ଆମ କମ୍ପାନୀ ‘ପର୍ସୋନା ମିସେସ୍ ଇଣ୍ଡିଆ’ର ଜୁରି ସଦସ୍ୟ ଭାବରେ ମୁମ୍ବାଇକୁ ଡାକିଥିଲୁ। ତାଙ୍କୁ ନିଜର ପିଆର କରିବାକୁ ପଡିଲା, ତେଣୁ ଆମେ ତାଙ୍କୁ ପ୍ରଚାର ପାଇଁ ପ୍ରତିଶ୍ରୁତି ଦେଇଥିଲୁ ଯାହାଦ୍ୱାରା ସେ ଗଣମାଧ୍ୟମରେ ପ୍ରସିଦ୍ଧ ହୋଇପାରିବେ। ଆମେ ତାଙ୍କର ସମସ୍ତ ଖର୍ଚ୍ଚ ବହନ କଲୁ ଏବଂ ସେ କିଛି ଅଡିସନ୍ ମଧ୍ୟ ନେଲୁ। ବଦଳରେ, ମୁଁ କିମ୍ବା ମୋ ଦଳର କେହି ତାଙ୍କଠାରୁ କୌଣସି ଟଙ୍କା ନେଇ ନ ଥିଲୁ।
ଚୀନ ସହ ଆମେରିକା ସମ୍ପର୍କ ଖରାପ ନକରିବାର ୫ଟି କାରଣ, ଟ୍ରମ୍ପ ବଢ଼ାଇଲେ ଟାରିଫ ଡେଡଲାଇନ୍
ନନ୍ଦିଘୋଷ ବ୍ୟୁରୋ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଚୀନ ଉପରେ ଏକ୍ସଟ୍ରା ଟାରିଫ ଲଗାଇବା ନିଷ୍ପତ୍ତିକୁ ୯୦ ଦିନ ପାଇଁ ଘୁଞ୍ଚାଇ ଦେଇଛନ୍ତି । ସୋସିଆଲ ମିଡିଆରେ ଟ୍ରମ୍ପ ପୋଷ୍ଟ କରି କହିଛନ୍ତି, ଆମେରିକା ଚୀନ ଟାରିଫକୁ ୯ ନଭେମ୍ବର ପର୍ଯ୍ୟନ୍ତ ବଢ଼ାଇ ଦିଆଯାଇଛି । ବର୍ତ୍ତମାନ ଆମେରିକା ଚୀନ ଉପରେ ୩୦ ପ୍ରତିଶତ ଟାରିଫ ଲଗାଇଛି । ଏପ୍ରିଲରେ ଆମେରିକା ଚୀନ ଉପରେ ୨୪୫ ପ୍ରତିଶତ ଟାରିଫ ଲଗାଇବାକୁ ଧମକ ଦେଇଥିଲା । ଏହାର ଜବାବରେ ଚୀନ ଆମେରିକା ଉପରେ ୧୨୫ ପ୍ରତିଶତ ଟାରିଫ ଲଗାଇବାକୁ କହିଥିଲା ।
ଟାରିଫକୁ ନେଇ ଦୁଇ ଦେଶ ମୁହାଁମୁହିଁ ସ୍ଥିତିରେ ଥିବା ବେଳେ ହଠାତ ଟ୍ରମ୍ପଙ୍କ ଚୀନ ଉପରେ ଏତେ ଦୟା କାହିଁକି ଦେଖାଇଲେ । ତେବେ ବିଶେଷଜ୍ଞଙ୍କ ମତରେ ଟ୍ରମ୍ପଙ୍କ ୟୂ-ଟର୍ଣ୍ଣ ଏମିତି ନୁହେଁ । ଆମେରିକା ଯେତେ ଧମକ ଦେଲେ ବି ଆମେରିକା କେତେ ପରିମାଣରେ ଚୀନ ଉପରେ ନିର୍ଭରଶୀଳ ତାହା ତଥ୍ୟ କହୁଛି । ଏମିତି ସ୍ଥିତିରେ ବେପାରରେ ଚୀନ ସହ ପଙ୍ଗା ନେବା ଆମେରିକା ପାଇଁ ମହଙ୍ଗା ପଡ଼ିପାରେ । ଏହାସହ ଆମେରିକୀୟ କମ୍ପାନୀଙ୍କ ବିରୋଧ ମଧ୍ୟ ଏକ କାରଣ ବୋଲି କୁହାଯାଉଛି ।
ଆମଦାନୀ ରିପୋର୍ଟ ଅନୁସାରେ ଆମେରିକା ଅଧିକାଂଶ ଦ୍ରବ୍ୟ ତିନୋଟି ଦେଶରୁ ମଗାଇଥାଏ । ପ୍ରଥମରେ ମେକ୍ସିକୋ, ଦ୍ବିତୀୟରେ ଚୀନ ଓ ତୃତୀୟରେ କାନାଡା ରହିଛି । ଏମିତି ନୁହେଁ ଯେ, ଉତ୍ପାଦନରେ ଆମେରିକା ବହୁତ ପଛରେ ଅଛି । ହେଲେ ଚୀନକୁ ବେପାର ସହଯୋଗୀ କରି ବେପାର କରିବାକୁ ଆମେରିକା ବାଧ୍ୟ । ଏମିତି ହେବା ପଛରେ ରହିଛି ୫ଟି ବଡ଼ କାରଣ । ଆସନ୍ତୁ ଜାଣିବା ଏହି ସବୁ କାରଣ ସମ୍ପର୍କରେ ଯେଉଁଥି ପାଇଁ ଆମେରିକା ଚୀନ ସହ ଟାରିଫ ଓ୍ବାରରୁ ବଞ୍ଚିବାକୁ ଚାହୁଁଛି ।
ଶସ୍ତା ଜିନିଷ ଚୀନର ଶକ୍ତି
ଚୀନରେ ଶ୍ରମ ଶସ୍ତା । ଜନସଂଖ୍ୟ ଅଧିକ । ଅର୍ଥାତ, କମ୍ପାନୀମାନଙ୍କୁ କମ ଦରମାରେ କାମ କରିବାକୁ ଲୋକ ମିଳୁଛନ୍ତି । ଫଳରେ ଉତ୍ପାଦନରେ କମ ଖର୍ଚ୍ଚ ହୋଇତାଏ । ଏହା ହିଁ ଚୀନର ସବୁଠାରୁ ବଡ଼ ଶକ୍ତି । ଯାହାର ଲାଭ ଚୀନ ସବୁ ବେଳେ ଉଠାଇ ଥାଏ ଓ ସାରା ବିଶ୍ବରେ ଚୀନ ସାମଗ୍ରୀର ମୂଲ୍ୟ ଅନ୍ୟ ଦେଶମାନଙ୍କ ତୁଳନାରେ ଶସ୍ତା ହୋଇଥାଏ ।
ଉତ୍ପାଦନ ଅଧିକ ଓ ଦୃଢ଼ ସପ୍ଲାଇ ଚେନ୍
ବହୁତ ପରିମାଣରେ ଚୀନ ସାମଗ୍ରୀ ଉତ୍ପାଦନ କରିଥାଏ । ଏହାର ସବୁଠାରୁ ବଡ଼ ଶକ୍ତି ହେଲା ମାନବ ସମ୍ବଳ । ଯାହା ଚୀନ ପାଖରେ ପ୍ରଚୁର ପରିମାଣରେ ରହିଛି । ଚୀନରୁ ଆମେରିକାରେ ସାମଗ୍ରୀ ପହଞ୍ଚିବାକୁ ଅଧିକ ସମୟ ଲାଗୁଥାଇ ପାରେ । ହେଲେ ଉତ୍ପାଦନ କ୍ଷମତା ଓ ବନ୍ଦର ନେଟଓ୍ବର୍କ ବଡ଼ ଭୂମିକା ନିଭାଇଥାଏ । ଦୁଇ ଦେଶ ମଧ୍ୟରେ ସ୍ଥାୟୀ ବେପାର ମାର୍ଗ ଓ ଭିତ୍ତିଭୂମି ସୁଦୃଢ଼ । ଯାହା ଦୁଇ ଦେଶ ମଧ୍ୟରେ ପରସ୍ପର ପ୍ରତି ନିର୍ଭରତାକୁ ବଢ଼ାଇଥାଏ ।
ଆମେରିକୀୟ କମ୍ପାନୀଙ୍କ ନିବେଶ
ଓ୍ବାର୍ଲ୍ଡ ଇକୋନମିକ ଫୋରମ ଅନୁସାରେ, ଆମେରିକୀୟ କମ୍ପାନୀ ଚୀନରେ ପ୍ରଚୁର ପରିମାଣରେ ନିବେଶ କରିଛନ୍ତି । ହେଲେ ଦେଖା ଦେଇଥିବା ଟାରିଫ ଓ୍ବାର ଭିତରେ ଆମେରିକୀୟ କମ୍ପାନୀମାନେ ଆଲର୍ଟ ମୁଡ଼ରେ ଅଛନ୍ତି । ୟୂଏସ-ଚୀନ ବିଜେନସ କାଉନସିଲ ସର୍ବକ୍ଷଣ ୨୦୨୫ ତଥ୍ୟ ଅନୁସାରେ, ବର୍ତ୍ତମାନ ଟାରିଫ ଦ୍ବନ୍ଦ୍ବ ମଧ୍ୟରେ ୪୮ ପ୍ରତିଶତ ଆମେରିକୀୟ କମ୍ପାନୀ ଚୀନରେ ବେପାର କରିବାକୁ ଯୋଜନା କରୁଛନ୍ତି । ଯାହା ୨୦୨୪ରେ ନିବେଶ ପାଇଁ ଯୋଜନା କରିଥିବା ୮୦ ପ୍ରତିଶତଠାରୁ ବହୁତ କମ ।
୨୦୦୧ରୁ ବଢ଼ିଛି ଆମେରିକାର ନିର୍ଭରତା
୨୦୦୧ରେ WTO ସାମିଲ ହେବା ପରେ ଆମେରିକା ବଜାର ପାଇଁ ଚୀନ ଖୋଲିଯାଇଥିଲା । ଆମେରିକୀୟ କମ୍ପାନୀମାନେ ପ୍ରଚୁର ପରିମାଣରେ ଭିତ୍ତିଭୁମି ଚୀନକୁ ସିଫ୍ଟ କରିଥିଲେ । ଦୁଇ ଦେଶ ଭିତରେ ଆମେରିକୀୟ କମ୍ପାନୀମାନେ କାରଖାନା ସ୍ଥାପନ ସହ ଆସେମ୍ବ୍ଲିଂ ପ୍ଲାଣ୍ଟରେ ଅଧିକ ପରିମାଣରେ ନିବେଶ କରିଥିଲେ । ଯାହାଦ୍ବାରା ଚୀନ ଉପରେ ନିର୍ଭରତା ଆଡୁରି ବଢ଼ିଗଲା । ଏବେ ବି କିଛି ଆମେରିକୀୟ କମ୍ପାନୀ ଉତ୍ପାଦନର କିଛି ଅଂଶ ମେକ୍ସିକୋ ଓ ଚୀନରେ ଆଉଟ ସୋର୍ସ କରିବା କାମ କରୁଛନ୍ତି ।
ଆମେରିକୀୟ ନୀତି
ଚୀନ ନିଜ ବ୍ୟବସାୟକୁ ବ୍ୟବସ୍ଥିତ ରଖିଥାଏ । ଏଠାରେ କାରଖାନା, ପାର୍ଟ ସପ୍ଲାଏ ଓ ଲଜିଷ୍ଟିକ୍ସ ହବ ସବୁ ପାଖାପାଖି ଥାଏ । ହେଲେ ଆମେରିକାରେ ଏମିତି ହୋଇ ନଥାଏ । ଏଠାରେ କିଛି ବି ବ୍ୟବସ୍ଥିତ ନହୋଇ ଭିନ୍ନ ଭିନ୍ନ ସ୍ଥାନରେ ଥାଏ । ଆମେରିକା ନିଜ କାରଖାନା କ୍ଷମତାକୁ ହାଇ ଭେଲ୍ୟୁ ଓ ହାଇଟେକ ସେକ୍ଟର ପାଇଁ ବଢ଼ାଇ ରଖିଛି । ଏପଟେ କମ ମୂଲ୍ୟର ଦ୍ରବ୍ୟ ଚୀନ ଓ ମେକ୍ସିକୋରୁ ଆମଦାନୀ କରୁଛି ।
ଆମେରିକା, ଚୀନରୁ ଏମିତି ସାମଗ୍ରୀ ଆମଦାନୀ କରିଥାଏ ଯାହାର ମୂଲ୍ୟ କମ ଥିବା ବେଳେ ଡିମାଣ୍ଡ ଅଧିକ ରହିଥାଏ । ଯେମିତିକି ବୈଦ୍ୟୁତିକ ସରଞ୍ଜାମ, ଉପକରଣ, ଖେଳନା, ଗେମ୍ କନସୋଲ । ଏସବୁ ସେହି ସାମଗ୍ରୀ ଯାହା ଆମେରିକା ଚୀନରୁ ଅଧିକ ପରିମାଣରେ ଆମଦାନୀ କରିଥାଏ । ଏହାବାଦ ଫର୍ଣ୍ଣିଚର, ପ୍ଲାଷ୍ଟିକ ପରି ଏକାଧିକ କଞ୍ଜୁମର ସାମଗ୍ରୀ ମଗାଇଥାଏ ।