ଭୁବନେଶ୍ୱର: ୧୦୪ କୋଭିଡ-19 ହେଲ୍ପଲାଇନ କଲ୍‌ ସେଣ୍ଟରକୁ ଫେକ୍‌ କଲ ନେଇ ୩୮ ଜଣଙ୍କ ବିରୋଧରେ ଭୁବନେଶ୍ୱର ସହିଦନଗର ଥାନାରେ ଏତଲା ଦିଆଯାଇଛି । ଜୁରୁରୀକାଳୀନ ସେବାରେ ବାଧା ଓ ଫେକ୍‌ କଲ ନେଇ ଥାନାରେ ଅଭିଯୋଗ କରିଛି ଜିଗିତ୍ସା ହେଲଥ କେୟାର ସଂସ୍ଥା ।

ବିନା କାରଣରେ ୧୦୪ ନମ୍ବରକୁ କଲ୍‌ କରି କଲ୍‌ ସେଣ୍ଟର କର୍ମଚାରୀଙ୍କୁ କିଛି ଅସାମାଜିକ ବ୍ୟକ୍ତି ହଇରାଣ କରୁଛନ୍ତି । ବିଭିନ୍ନ ସମୟରେ କୋଭିଡ -19 ହେଲ୍ପଲାଇନ୍‌କୁ କଲ କରି ମହିଳା କର୍ମଚାରୀଙ୍କୁ ପ୍ରେମ ନିବେଦନ କରୁଥିବା ଅଭିଯୋଗ ହୋଇଛି ।

ସେହିପରି ଡାଲି ଛୁଙ୍କ ଦେଲାବେଳେ ଛିଙ୍କ ହେଇଗଲା, କଣ କରିବି ଭଳି ଅଯଥା ପ୍ରଶ୍ନ କରି ଲାଇନ୍‌ ବିଜି ରଖୁଛନ୍ତି । ଫଳରେ ଅସଲ ଲୋକ ସେବା ପାଇବାରୁ ବଞ୍ଚିତ ହେଉଥିବା ଅଭିଯୋଗ ହୋଇଛି । ବାରମ୍ବାର ଏଭଳି କଲ ଆସିବାରୁ ସଂପୃକ୍ତ ପରିଚାଳନା ସଂସ୍ଥା ସହିଦନଗର ଥାନାରେ ଅଭିଯୋଗ କରିବା ସହ ରାଜ୍ୟ ସରକାରଙ୍କୁ ଅବଗତ କରିଛନ୍ତି ।

ଏବେ ୩୮ ଜଣ କେବେ ଧରା ପଡୁଛନ୍ତି ତାହା ଦେଖିବାକୁ ବାକି ରହିଲା । କାରଣ କରୋନା ଭଳି ବିଶ୍ୱ ମହାମାରୀ କାଳରେ ସରକାରଙ୍କ ଲୋକଙ୍କ ସୁରକ୍ଷା ପାଇଁ କରିଥିବା କଲ ସେଣ୍ଟରଙ୍କୁ ଏଭଳି କଲ କରି ହଇରାଣ କରିବା ନିଶ୍ଚିତ ଭାବେ ଦଣ୍ଡନୀୟ ଅପରାଧ ।

ଭୁବନେଶ୍ୱର: କୋଭିଡ୍‌ ହସ୍‌ପିଟାଲ ସ୍ଥିତି ଅନୁଧ୍ୟାନ ପାଇଁ ୩ ଜିଲ୍ଲା ଗସ୍ତରେ 5-T ସଚିବ ଭି.କେ. ପାଣ୍ଡିଆନ । ସେ କୋରାପୁଟ, ମାଲକାନଗିରି ଓ ନବରଙ୍ଗପୁର ଜିଲ୍ଲା ଗସ୍ତରେ ଅଛନ୍ତି । ତାଙ୍କ ସହିତ ଅଛନ୍ତି ଉନ୍ନୟନ କମିଶନର ସୁରେଶ ମହାପାତ୍ର । ଦୁଇ ଅଧିକାରୀ ପ୍ରଥମେ ଜୟପୁର ଯାଇ କୋଭିଡ ହସ୍ପିଟାଲ ପରିଦର୍ଶନ କରିଥିଲେ।

ବେଡ୍‌ ବ୍ୟବସ୍ଥା, ଭେଣ୍ଟିଲେଟର, ଆଇସିୟୁର ସମସ୍ତ କକ୍ଷ ବୁଲି ଦେଖିବା ସହ ମେଡିକାଲ ଅଧିକାରୀ ଓ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିଥିଲେ। ଏହାପରେ ମାଲକାନଗିରିରେ କୋଭିଡ୍‌ ହସ୍‌ପିଟାଲ ସ୍ଥିତି ସମୀକ୍ଷା କରିଛନ୍ତି। ପରେ ନବରଙ୍ଗପୁରେ କୋଭିଡ୍‌ ହସପିଟାଲ ବୁଲି ଦେଖିଥିଲେ ।

ସେପଟେ କୋରାପୁଟ ଜିଲ୍ଲାରେ ମୋଟ୍‌ ୩୫୩ ନମୁନାରୁ ୧୬୮ଟିର ରିପୋର୍ଟ ନେଗେଟିଭ୍‌ ଆସିଥିବା ଜିଲ୍ଲାପାଳ ମଧୁସୂଦନ ମିଶ୍ର କହିଛନ୍ତି ।

ଜିଲ୍ଲାକୁ ପ୍ରାଥମିକ ଭାବେ ୮ ହଜାର ଲୋକ ଫେରିବା ନେଇ ଆକଳନ କରାଯାଇଛି। ସ୍ୱାବ ଟେଷ୍ଟିଂ ପାଇଁ ଚେନ୍ନାଇରୁ ଏକ ଟେକ୍ନିକାଲ ଟିମ୍‌ ଆସୁଥିବା ଜିଲ୍ଲାପାଳ କହିଛନ୍ତି।

ଭୁବନେଶ୍ୱର: କେଉଁଠି କୋହଳ ତ କେଉଁଠି କଟକଣା ଜାରି ରହିଛି । ଗତ ୩-୪ ଦିନ ମଧ୍ୟରେ ରାଜ୍ୟରେ କରୋନା ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି । ବାଲେଶ୍ୱର ଓ ଭଦ୍ରକରୁ ଅଧିକ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥିପାଇଁ ପ୍ରଶାସନ ୨ଟି ଜିଲ୍ଲାର କିଛି ଅଞ୍ଚଳକୁ କଣ୍ଟେନମେଣ୍ଟ ଜୋନ୍ ଘୋଷଣା କରିଛି ।ତେବେ ରାଜଧାନୀ ଭୁବନେଶ୍ୱର କିନ୍ତୁ କଣ୍ଟେନମେଣ୍ଟ ଜୋନ୍ ମୁକ୍ତ ହୋଇଛି । ସତ୍ୟନଗର, ବମିଖାଲ ଓ ସୂର୍ଯ୍ୟନଗରରୁ କଣ୍ଟେନମେଣ୍ଟ୍ ହଟିଲା । ନୂଆ ପଜିଟିଭ କେସ୍‌ ନଆସିବାରୁ ୩ଟି ଯାକ ଅଞ୍ଚଳରୁ କଣ୍ଟେନମେଣ୍ଟ ହଟାଯାଇଛି । ହେଲେ ଆସନ୍ତା ୭ ଦିନ ଯାଏ ଜାରି ରହିବ ଆକ୍ଟି ସର୍ଭିଲେନ୍ସ ।

ପୂର୍ବରୁ ଯଦୁପୁର ଏବଂ ସୁନ୍ଦରପଦା ଅଞ୍ଚଳରୁ କଣ୍ଟେନମେଣ୍ଟ ଜୋନ ହଟାଯାଇଥିଲା । ପ୍ରେସ୍‌ବିଜ୍ଞପ୍ତିରେ ଏନେଇ ବିଏମସି କମିଶନର ପ୍ରେମଚନ୍ଦ୍ର ଚୌଧରୀ ସୂଚନା ଦେଇଛନ୍ତି । ଗତ ଏପ୍ରିଲ ୧ ତାରିଖରେ ସୂର୍ଯ୍ୟନଗରରୁ ଚିହ୍ନଟ ପ୍ରଦୀପ୍ତ ଦଳବେହେରାଙ୍କ ଟ୍ରାଭେଲ ହିଷ୍ଟ୍ରି ନମିଳିବାରୁ, ୨ ତାରିଖରେ ଅଞ୍ଚଳକୁ ବିଏମସି ସିଲ କରିଥିଲା । ୧୪ ତାରିଖରେ କଣ୍ଟେନମେଣ୍ଟ ଜୋନରୁ କିଛି ଅଞ୍ଚଳକୁ ବାଦ ଦେଇ ପୁନଃ କଣ୍ଟେନମେଣ୍ଟ ଜୋନ ଘୋଷଣା କରାଯାଇଥିଲା । ତେବେ ସୂର୍ଯ୍ୟନଗର ପଜିଟିଭଙ୍କ ଲିଙ୍କ ରେ ମୋଟ ୮ ଆକ୍ରାନ୍ତ ଚିହ୍ନଟ ହୋଇଥିବା ବେଳେ, ୫ ଜଣ ସୁସ୍ଥ ହୋଇଛନ୍ତି । ଅନ୍ୟପଟେ ଏପ୍ରିଲ ୩ ତାରିଖରେ ବମିଖାଲ ଏବଂ ୭ ଏପ୍ରିଲରେ ସତ୍ୟନଗରକୁ ସିଲ କରାଯାଇଥିଲା ।