ନୂଆଦିଲ୍ଲୀ: କରୋନା ସ୍ଥିତି ଦିନକୁ ଦିନ ବିଗିଡି ଚାଲିଛି । ତେବେ ମହିଳାଙ୍କ ତୁଳନାରେ ପୁରୁଷମାନେ ଅଧିକ କୋଭିଡ -୧୯ ର ଶିକାର ହେଉଛନ୍ତି ବୋଲି କୁହାଯାଉଛି । ଏକ ପ୍ରି-ପ୍ରିଣ୍ଟ୍ ଦ୍ୱାରା ଜଣା ପଡିଛି ଯେ, ମହିଳା ଏବଂ ପୁରୁଷମାନଙ୍କ ମଧ୍ୟରେ କରୋନାଭାଇରସ୍ ଭିନ୍ନ ଭିନ୍ନ ପ୍ରଭାବ ପକାଏ । ୟୁନିଭରସିଟି ଅଫ ଟେକ୍ସାସ୍, ହ୍ୟୁଷ୍ଟନ୍ ମେଥୋଡିଷ୍ଟ ରିସର୍ଚ୍ଚ ଇନଷ୍ଟିଚ୍ୟୁଟ୍ ଏବଂ ଟେନେସୀ ବିଶ୍ୱବିଦ୍ୟାଳୟ ସ୍ୱାସ୍ଥ୍ୟ ବିଜ୍ଞାନ କେନ୍ଦ୍ରର ଅନୁସନ୍ଧାନ ଅନୁସାରେ ବିଭିନ୍ନ କାରଣ ଏଥିପାଇଁ ଦାୟୀ ହୋଇପାରେ। ଯେମିତିକି ଉଭୟ ଲିଙ୍ଗର ଜେନେଟିକ୍ ଗଠନ ଏବଂ ସଂକ୍ରମଣ ବଢାଇବାର ଅଭ୍ୟାସ ।
WHOର ୧୯ ଏପ୍ରିଲର ସାପ୍ତାହିକ ରିପୋର୍ଟ ଅନୁସାରେ, ୟୁରୋପରେ କୋଭିଡ -୧୯ରେ ମୋଟ୍ ୬୩ ପ୍ରତିଶତ ପୁରୁଷଙ୍କର ମୃତ୍ୟୁ ହୋଇଛି । କୋଭିଡ-୧୯ ମନିଟରିଂ ଗ୍ରୁପ୍ ଦ୍ୱାରା ପ୍ରସ୍ତୁତ ଅନ୍ୟ ଏକ ରିପୋର୍ଟ ଅନୁସାରେ, ମାର୍ଚ୍ଚରେ ଇଟାଲୀରେ କରୋନାଭାଇରସ୍ ଯୋଗୁଁ ପ୍ରାୟ ୨୯.୧ ପ୍ରତିଶତ ମହିଳାଙ୍କର ମୃତ୍ୟୁ ହୋଇଥିଲା ।
ୟୁନିଭରସିଟି ଅଫ ଟେକ୍ସାସ୍, ହ୍ୟୁଷ୍ଟନ୍ ମେଥୋଡିଷ୍ଟ ରିସର୍ଚ୍ଚ ଇନଷ୍ଟିଚ୍ୟୁଟ୍ ଏବଂ ଟେନେସୀ ବିଶ୍ୱବିଦ୍ୟାଳୟ ସ୍ୱାସ୍ଥ୍ୟ ବିଜ୍ଞାନ କେନ୍ଦ୍ରର ଅନୁସନ୍ଧାନ ଅନୁସାରେ ମହାମାରୀ SARS ଓ MERS ର କୋଭିଡ୍ -୧୯ର ଡାଟା ସହ ତୁଳନା କରାଯାଇଛି । ଫଳରେ ଏହା ଦ୍ୱାରା ଜଣାପଡିଛି ଯେ, ଏହି ତିନୋଟି ରୋଗରେ ପୁରୁଷଙ୍କ ମୃତ୍ୟୁ ହାର ଅଧିକ ରହିଛି ।
ସୂଚନାଯୋଗ୍ୟ ଯେ, SARS ରୋଗରେ ୨୧.୯ ପ୍ରତିଶତ ପୁରୁଷମାନଙ୍କର ଏବଂ ୧୩.୨ ପ୍ରତିଶତ ମହିଳାମାନଙ୍କର ମୃତ୍ୟୁ ହୋଇଥିଲା। ସେହିଭଳି, MERS ରୋଗରେ ୨୧.୨ ପ୍ରତିଶତ ପୁରୁଷମାନଙ୍କ ତୁଳନାରେ ମହିଳାଙ୍କର ୧୫.୨ ପ୍ରତିଶତ ମୃତ୍ୟୁ ହୋଇଥିଲା। ବର୍ତ୍ତମାନର କୋଭିଡ୍-୧୯ର ମୃତ୍ୟୁ ହାର ପୁରୁଷ-ମହିଳାଙ୍କ ଆଧାରରେ ରିପୋର୍ଟ ଆସିନାହିଁ । କିନ୍ତୁ ଆମେରିକାର ଅନୁସନ୍ଧାନ ଅନୁସାରେ MERS, SARS-CoV ଏବଂ SARS-CoV2 (Covid-19) ରୋଗରେ ମହିଳାଙ୍କ ତୁଳନାରେ ପୁରୁଷଙ୍କର ଅଧିକ ମୃତ୍ୟୁ ହୋଇଛି ।
ଅନୁସନ୍ଧାନ ଅନୁସାରେ, ପୁରୁଷ ଏବଂ ମହିଳାଙ୍କ ମଧ୍ୟରେ କରୋନାଭାଇରସ୍ ପ୍ରତିରୋଧକ ରେସପନ୍ସ ଭିନ୍ନ ହୋଇପାରେ । ଅଧିକ ଧୂମ୍ରପାନ ଅଭ୍ୟାସ ଏବଂ ପୁରୁଷମାନଙ୍କ ହୃଦ୍ରୋଗ ଜଡିତ ସମସ୍ୟା ଏହି ସବୁ ରୋଗରେ ସଂକ୍ରମିତ ହେବାର ଏକ ଗୁରୁତ୍ୱପୂର୍ଣ୍ଣ କାରଣ ଥିଲା । ସାଉଦି ଆରବର ଲୋକଙ୍କ ମଧ୍ୟରେ MERS ରୋଗ ନେଇ ଅନୁସନ୍ଧାନରୁ ଜଣା ପଡିଛି ଯେ, ବିଭିନ୍ନ ପ୍ରକାରର ଲୋକଙ୍କ ସଂସ୍ପର୍ଶରେ ଆସିବା ଯୋଗୁଁ ସେଠାରେ ଅଧିକ ପୁରୁଷଙ୍କ ମୃତ୍ୟୁ ହୋଇଛି । ରିସର୍ଚ୍ଚ ଅନୁସାରେ ଆଉ ଏକ ବଡ କାରଣ ହେଉଛି ହାତ ନଧୋଇବା ଅଭ୍ୟାସ । ୨୦୦୩ ମସିହାର ଏକ ଅନୁସନ୍ଧାନରୁ ଜଣା ପଡିଥିଲା ଯେ, ପୁରୁଷମାନଙ୍କଠାରୁ ମହିଳାମାନେ ଅଧିକ ହାତ ଧୁଅନ୍ତି ।
