ଯାଜପୁର: ଯାଜପୁର ଜିଲ୍ଲା ବରୀ ବ୍ଲକ୍‌ରେ କରୋନା ମୁକାବିଲା କାମରେ ନିୟୋଜିତ ଜଣେ ନୋଡାଲ ଅଫିସରଙ୍କୁ  ମାଡ ମାରିଥିବା ଅଭିଯୋଗ । ଏହାର ପ୍ରତିବାଦରେ ପିଇଓ ଏବଂ ଜିଆର୍‌ଏସ୍‌ମାନେ କାର୍ଯ୍ୟବନ୍ଦ ପାଇଁ ଚେତାବନୀ ଦେଇଛନ୍ତି । ଯାଜପୁର ଜିଲ୍ଲା ବରୀ ବ୍ଲକ୍‌ କାଳିଆମାଟି ପଞ୍ଚାୟତରେ କରୋନା ମୁକାବିଲା ପାଇଁ ନୋଡାଲ ଅଫିସର ଦାୟିତ୍ୱରେ ଥିବା ପ୍ରସନ୍ନଜିତ୍‌ ବରାଳ ପଞ୍ଚାୟତ ଅଫିସ୍‌କୁ ଯିବାବେଳେ କାଇପଡ଼ା ବ୍ୟାଙ୍କ ଛକରେ ତାଙ୍କୁ ଜଣେ ପୋଲିସ କର୍ମଚାରୀ ଅଟକାଇଥିଲେ ।

ପ୍ରସନ୍ନଜିତ ପରିଚୟପତ୍ର ଦେଖାଇଥିଲେ ବି କିଛି ଶୁଣି ନଥିଲେ ପୋଲିସ କର୍ମଚାରୀ । ପ୍ରସନ୍ନଜିତଙ୍କୁ ପୋଲିସ ମାଡ଼ ମାରିବା ସହ ଅସଭ୍ୟ ଭାଷାରେ ଗାଳି ଦେଇଥିବା ଅଭିଯୋଗ ହୋଇଛି । କାଳିମାଟିଆ ସରପଞ୍ଚ ପହଞ୍ଚି ପ୍ରସନ୍ନଜିତଙ୍କୁ ଉଦ୍ଧାର କରିଥିଲେ ।

ଘଟଣା ସମ୍ପର୍କରେ ବ୍ଲକ୍‌ କର୍ମଚାରୀମାନେ ବରୀ ବିଡିଓଙ୍କୁ ଲିଖିତ ଭାବେ ଜଣାଇବା ସହିତ କାର୍ଯ୍ୟାନୁଷ୍ଠାନ ନହେଲେ କାର୍ଯ୍ୟବନ୍ଦ ଚେତାବନୀ ଦେଇଛନ୍ତି । ବରୀ ବିଡିଓ ଏନେଇ ଥାନାରେ ଅଭିଯୋଗ କରିଛନ୍ତି । ତେବେ ଏନେଇ ପୋଲିସ୍‌ କର୍ମଚାରୀ ଙ୍କ ପ୍ରତିକ୍ରିୟା ମିଳିନାହିଁ ।

କଟକ: ଲକ୍‌ଡାଉନ୍‌ ଖୋଲିବା ପରେ ଓକିଲଙ୍କୁ ମିଳିବନି ଗ୍ରୀଷ୍ମ ଛୁଟି ! ସୂଚନାଅନୁଯାୟୀ କଟକ-ହାଇକୋର୍ଟର ଗ୍ରୀଷ୍ମକାଳୀନ  ଛୁଟି ବାତିଲ କରିବାକୁ ପ୍ରସ୍ତାବ ଦିଆଯାଇଛି । ଆସନ୍ତା ମେ’ ୩ରେ ଲକ୍‌ ଡାଉନ ଅବଧି ଶେଷ ହେବା ପରେ ଯଦି ସରକାର ପୁଣି ଏହାର ଅବଧି ନବଢ଼ାନ୍ତି ତେବେ ହାଇକୋର୍ଟ ଓକିଲଙ୍କୁ ଆଉ ଗ୍ରୀଷ୍ମ ଛୁଟି ଦିଆଯିବ ନାହିଁ । ଏନେଇ କୌଣସି ସଠିକ୍‌ ନିଷ୍ପତ୍ତି ହୋଇନଥିଲେ ମଧ୍ୟ ଏଭଳି ପ୍ରସ୍ତାବ ଦିଆଯାଇଥିବା ସୂଚନା ମିଳିଛି ।

ଆଡଭୋକେଟ ଜେନେରାଲ ଓ ହାଇକୋର୍ଟ ବାର ଆସୋସିଏସନର ପରାମର୍ଶ ପରେ ଗ୍ରୀଷ୍ମ ଛୁଟି ନେଇ ନିଷ୍ପତ୍ତି ନିଆଯିବ ବୋଲି ଜଣାପଡ଼ିଛି ।

ଗଞ୍ଜାମ: ମାଟି ଅତଡ଼ା ଖସି ଚାଲିଜଲା ୩ ଜଣଙ୍କର ଜୀବନ । କାମ କରୁଥିବା ବେଳେ ଖସିଥିଲା ମାଟି ଅତଡ଼ା । ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଭାଟକୁମରଡା ଗାଁ ନିକଟ ପଥର ଖଣିରେ ଘଟିଛି ଏଭଳି ଘଟଣା ।

ସୂଚନା ଅନୁଯାୟୀ, ଶ୍ରମିକ ମାନେ ସବୁଦିନ ଭଳି ଆଜି ମଧ୍ୟ କାମକୁ ଯାଇଥିଲେ ।  କିନ୍ତୁ ଆଜି ବୋଧେ ତାଙ୍କର ଭାଗ୍ୟର ନିୟତିରେ କିଛି ଅଲଗା ଲେଖାଥିଲା । ପଥର ଖଣିରେ ଜଗି ବସିଥିଲା କାଳ ।  କାମ କଲା ବେଳେ କାଳ ତାର ଇଚ୍ଛାକୁ ପୁରଣ କରିଥିଲା । ଅପରାହ୍ନରେ ପଥର ଖଣିରେ କାମ କରୁଥିବା ସମୟରେ ହଠାତ୍‌ ଉପରୁ ମାଟି ଓ ପଥର ଅତଡ଼ା ଖସିଥିଲା । ଯେଉଁଥିରେ ୩ ଜଣ ଶ୍ରମିକ ଚାପି ହୋଇଯାଇଥିଲେ । ଘଟଣା ସ୍ଥଳରେ ହିଁ ସେମାନଙ୍କର ମୃତ୍ୟୁ ହୋଇଥିଲା । ମୃତ ଶ୍ରମିକଙ୍କ ମଧ୍ୟରେ ଦୁଇ ଜଣ ମହିଳା ଓ ଜଣେ ପୁରୁଷ ଅଛନ୍ତି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।