ନୂଆପଡ଼ା: ବନ ବିଭାଗକୁ ବଡ଼ ସଫଳତା । ନୂଆପଡ଼ ବନ ବିଭାଗ ବାଘ ମୁଣ୍ଡ ସହ ଛାଲ ଜବତ କରିଛି । ନୂଆପଡ଼ା ରେଞ୍ଜ ଟିପାଝର ଗାଁରୁ ଜବତ ହୋଇଛି ବାଘର କଟା ମୁଣ୍ଡ ଓ ଛାଲ । ଗତକାଲି ସନ୍ଧ୍ୟାରେ ବନ ବିଭାଗର ଟିମ୍ ବିଶେଷ ସୂତ୍ରରୁ ଖବର ପାଇ ରେଡ୍ କରିଥିଲା ।
ଚଢ଼ାଉ ବେଳେ ବନ ବିଭାଗ ଟିମ୍ ବାଘର କଟା ମୁଣ୍ଡ ସହ ବାଘ ଛାଲ ଜବତ କରିଛି । ଏଥିସହ ୨୦ କେଜି ବାରହା ମାଂସ, ବଜ୍ରକାପ୍ତା କାତି ଜବତ ହୋଇଛି । ଶିକାରରେ ବ୍ୟବହୃତ ଧନୁଶର ଓ କଟୁରୀ ଜବତ କରିଛି ବନ ବିଭାଗ । ଘଟଣାରେ ୩ ଜଣ ଯୁବକଙ୍କୁ ଅଟକ ରଖି ବନ ବିଭାଗ ପଚରାଉଚରା କରୁଛି ।
ପୁରୀ: ବରିଷ୍ଠ ଦଇତାପତି ତଥା ପ୍ରଭୁ ଜଗନ୍ନାଥଙ୍କ ସେବାୟତ ପ୍ରେମାନନ୍ଦ ଦାସ ମହାପାତ୍ରଙ୍କର ପରଲୋକ ହୋଇଛି । ସେ ଦୀର୍ଘଦିନ ହେବ ହୃଦଘାତ ସମସ୍ୟାରେ ପୀଡ଼ିତ ଥିଲେ । ନିଶ୍ୱାସ ପ୍ରଶ୍ୱାସରେ କଷ୍ଟ ଅନୁଭବ କରିବା ପରେ ତାଙ୍କୁ ଆଜି ଭୋରରୁ ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା । ମାତ୍ର କ୍ରମାଗତ ଭାବେ ତାଙ୍କ ସ୍ୱାସ୍ଥ୍ୟାବସ୍ଥାରେ ଅବନତି ଘଟିଥିଲା ।
ସ୍ୱାସ୍ଥ୍ୟ ସମସ୍ୟା ବଢିବା ସହ ତାଙ୍କର ମୃତ୍ୟୁ ଘଟିଛି । ଉଲ୍ଲେଖଯୋଗ୍ୟ ଯେ ସେ ଜଣେ ବରିଷ୍ଠ ଦଇତାପତି ଭାବେ କାର୍ଯ୍ୟରତ ଥିଲେ । ପୁରୀ ସହରରେ ଜଣେ ସମାଜସେବୀ ଭାବେ ମଧ୍ୟ ତାଙ୍କର ଯଥେଷ୍ଟ ଖ୍ୟାତି ରହିଥିଲା । ଏବେ ତାଙ୍କ ବିୟୋଗରେ ଦଇତାପତି କୁଳରେ ଶୋକର ଛାୟା ଖେଳିଯାଇଛି ।
ଆବୁଧାବି: ଆରମ୍ଭ ହୋଇଛି ଆଇପିଏଲ୍ । ଫଟାଫଟ କ୍ରିକେଟରେ ହାରଜିତର ଲଢ଼େଇ । ଶନିବାର ଖେଳା ଯାଇଥିବା ଉଦଘାଟନୀ ମ୍ୟାଚରେ ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସକୁ ହରାଇଛି ଚେନ୍ନାଇ ସୁପର କିଙ୍ଗ୍ସ । ମୁମ୍ବାଇକୁ ଚେନ୍ନାଇ ୫ ୱିକଟରେ ପରାସ୍ତ କରିଛି । ରୋହିତଙ୍କ ଟିମ୍ ପୂର୍ବ ଭଳି ହାରିବାରୁ ଆରମ୍ଭ କରିଛି ଅଭିଯାନ । ଆଇପିଏଲ୍ ଇତିହାସରେ ଲଗାତାର ଅଷ୍ଟମଥର ପାଇଁ ମୁମ୍ବାଇ ପ୍ରଥମ ମ୍ୟାଚରେ ହିଁ ହାରିଛି ।
ୟୁଏଇରେ ଆବୁଧାବି ମୈଦାରେ ରୋହିତ ପୁଣି ଦୋହରାଇଛନ୍ତି ପୁରୁଣା ଇତିହାସ । ରୋହିତଙ୍କ ଟିମ୍ ଆଇପିଏଲର ପ୍ରଥମ ମ୍ୟାଚ୍ ହାରିବା ୨୦୧୩ରୁ ଜାରି ରହିଛି । ୨୦୧୩ରେ ମୁମ୍ବାଇ ଇଣ୍ଡିଆନ୍ସ ପ୍ରଥମ ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବେଙ୍ଗଳୁରୁ ଠାରୁ ହାରିଥିଲା । ୨୦୧୪ ଓ ୨୦୧୫ରେ କୋଲକାତା ନାଇଟ୍ ରାଇଡର୍ସରୁ ପରାଜୟର ମୁହଁ ଦେଖିଥିଲା ମୁମ୍ବାଇ । ୨୦୧୬ ଓ ୨୦୧୭ରେ ପୁନେ ଠାରୁ ମୁମ୍ବାଇ ମ୍ୟାଚ୍ ହାରିଥିଲା । ୨୦୧୮ରେ ଧୋନିଙ୍କ ଚେନ୍ନାଇ ରୋହିତଙ୍କ ମୁମ୍ବାଇକୁ ହରାଇଥିଲା । ୨୦୧୯ରେ ସନରାଇଜର୍ସ ହାଇଦ୍ରାବାଦ ଠାରୁ ହାରିଥିଲା ମୁମ୍ବାଇ ଇଣ୍ଡିଆନ୍ସ । ଏବେ ପୁଣି ଥରେ ଚେନ୍ନାଇ ଠାରୁ ହାରିଛି ରୋହିତଙ୍କ ଟିମ୍ । ପ୍ରଥମ ମ୍ୟାଚରେ ହାରିବା ପରେ ବି ମୁମ୍ବାଇ ଇଣ୍ଡିଆନ୍ସ କେବେ ନିରାଶ ହୋଇନି ।
ହାରରୁ ଆରମ୍ଭ କେତେ ଲକି ?
ରୋହିତଙ୍କ ଟିମ୍ ଯଦିଓ ଆଇପିଏଲର ପ୍ରଥମ ମ୍ୟାଚ୍ ହାରିବାରୁ ଆରମ୍ଭ କରୁଛି । ତଥାପି ୮ ବର୍ଷ ମଧ୍ୟରେ ମୁମ୍ବାଇ ଇଣ୍ଡିଆନ୍ସ ୪ଥର ଚାମ୍ପିଅନ୍ ହୋଇଛି । କଣ ରୋହିତଙ୍କ ମୁମ୍ବାଇ ଇଣ୍ଡିଆନ୍ସ ପାଇଁ ଏହି ପରାଜୟ ଲକି ସାବ୍ୟସ୍ତ ହେବ । ଏମିତି ଆଇପିଏଲ ଇତିହାସକୁ ଦେଖିଲେ ଅନେକ ଟିମ୍ ଆରମ୍ଭରୁ ଖରାପ ପ୍ରଦର୍ଶନ କରି ଶେଷରେ ବିଜୟୀ ହୋଇଛନ୍ତି । ଏମିତିରେ ରୋହିତଙ୍କ ଟିମରେ ଜଣଙ୍କ ଠାରୁ ଜଣେ ଚାମ୍ପିଆନ୍ ଖେଳାଳି ରହିଛନ୍ତି । ଯେଉଁମାନେ କି ଚାମ୍ପିଆନ୍ ହେବାର ଦମ୍ ରଖନ୍ତି ।
ଫେରିଲା ଚେନ୍ନାଇ
ଅନ୍ୟପଟେ ଧୋନିଙ୍କ ଚେନ୍ନାଇ ସୁପର କିଙ୍ଗ୍ସ, ମୁମ୍ବାଇ ଠାରୁ ଲଗାତାର ହାରିବା ଧାରାରେ ବ୍ରେକ୍ ଲଗାଇଛି । ମୁମ୍ବାଇ ବିପକ୍ଷରେ ଚେନ୍ନାଇ ଲଗାତାର ପାଞ୍ଚଟି ମ୍ୟାଚ ହାରିବା ପରେ ବିଜୟ ଲାଭ କରିଛି । ଆଇପିଏଲରେ ଏବେ ରୋହିତଙ୍କ ଟିମ୍ ଆସନ୍ତା ବୁଧବାର କୋଲକାତା ନାଇଟ୍ ରାଇଡର୍ସ ସହ ଖେଳିବ ।
https://www.facebook.com/NandighoshaTV/videos/1047678255690250
ନୂଆଦିଲ୍ଲୀ: ଦେଶରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ି ବଢ଼ି ଚାଲିଛି । ଦେଶରେ ଆକ୍ରାନ୍ତଙ୍କ ସଂଖ୍ୟା ୫୩ ଲକ୍ଷ ପାର୍ କରିଛି । ଅନ୍ୟପଟେ କରୋନା ମୃତ୍ୟୁସଂଖ୍ୟା ୮୫ ହଜାର ଟପିଛି । କରୋନାର ବିଗୁଡ଼ୁଥିବା ସ୍ଥିତିକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମୀକ୍ଷା କରିବେ । ମୋଦି ପୁଣି ଥରେ ୭ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ବୈଠକରେ ଆଲୋଚନା କରିବେ ବୋଲି ଜଣାପଡ଼ିଛି । ଭିଡିଓ କନଫରେନ୍ସିଂ ମାଧ୍ୟମରେ ଏହି ବୈଠକ ସେପ୍ଟେମ୍ବର ୨୩ ତାରିଖରେ ହେବ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କରୋନା ବିଗୁଡ଼ୁଥିବା ସ୍ଥିତିକୁ ନେଇ ଉତ୍ତର ପ୍ରଦେଶ, ଆନ୍ଧ୍ର ପ୍ରଦେଶ ଓ ମହାରାଷ୍ଟ୍ର ସମେତ ୭ଟି ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ । ଏଥିରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସହ କଥାହେବେ ପ୍ରଧାନମନ୍ତ୍ରୀ । ଏହା ପୂର୍ବରୁ ପିଏମ୍ ସଂକ୍ରମଣକୁ ନେଇ ମଧ୍ୟ ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା କରି ସାରିଛନ୍ତି ।
ଜୁନ୍ ୧୬ ଓ ୧୭ରେ ଦେଶରେ କରୋନା ସଂକ୍ରମଣକୁ ନେଇ ମୋଦି ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା କରିଥିଲେ । ଜୁନ୍ ୧୬ରେ ପଞ୍ଜାବ, ଆସାମ, କେରଳ, ଉତ୍ତରାଖଣ୍ଡ, ଝାଡ଼ଖଣ୍ଡ, ଛତିଶଗଡ଼, ତ୍ରିପୁରା, ହିମାଚଳ ପ୍ରଦେଶ, ଚଣ୍ଡିଗଡ଼, ଗୋଆ, ମଣିପୁର, ନାଗାଲାଣ୍ଡ, ଲଦାଖ, ପୁଡୁଚେରୀ, ଅରୁଣାଚଳ ପ୍ରଦେଶ, ମେଘାଳୟ, ମିଜୋରାମ, ଆଣ୍ଡାମନ ଓ ନିକୋବର ଭଳି ରାଜ୍ୟ ସହ ଆଲୋଚନା କରିଥିଲେ ପ୍ରଧାନମନ୍ତ୍ରୀ ।
ରାଉରକେଲା/ବାଲିଗୁଡ଼ା: ୨ଟି ଦୁର୍ଘଟଣାରେ ୪ ଜଣଙ୍କ ମୃତ୍ୟୁ ହୋଇଛି । ସୁନ୍ଦରଗଡ଼ ଓ କନ୍ଧମାଳ ଜିଲ୍ଲାରେ ଘଟିଥିବା ଅଲଗା ଅଲଗା ଦୁର୍ଘଟଣାରେ ୪ ଜଣ ବାଇକ୍ ଆରୋହୀଙ୍କ ମୃତ୍ୟୁ ହୋଇଛି । ରାଉରକେଲା ଚାଡରି ହରିହରପୁର ନିକଟରେ ଦୁର୍ଘଟଣା ଘଟିଛି ।
ଦୁର୍ଘଟଣାରେ ୨ ଜଣ ବାଇକ ଆରୋହୀଙ୍କ ମୃତ୍ୟୁ ହୋଇଛି । ମୃତକଙ୍କ ପରିଚୟ ଜଣାପଡ଼ିନାହିଁ । ଅଜଣା ଗାଡ଼ି ଧକ୍କାରେ ମୃତ୍ୟୁ ହୋଇଥିବା ବେଳେ କୁଆଁରମୁଣ୍ଡା ଫାଣ୍ଡି ପୋଲିସ ତଦନ୍ତ କରୁଛି । ଅନ୍ୟପଟେ କନ୍ଧମାଳ ଜିଲ୍ଲା ଦାରିଙ୍ଗିବାଡ଼ି ଥାନା କିରିକୁଟୀ ନିକଟ ଡଙ୍ଗେରୀ ଛକରେ ଦୁର୍ଘଟଣା ହୋଇଛି ।
ଶନିବାର ରାତିରେ ବାଇକକୁ ସ୍କର୍ପିଓ ଧକ୍କା ଦେଇଥିଲା । ଏଥିରେ ବାଇକରେ ଥିବା ୨ ଜଣଙ୍କ ଘଟଣାସ୍ଥଳରୁ ମୃତ୍ୟୁ ହୋଇଛି । ଦୁର୍ଘଟଣା ପରେ ଆମ୍ବୁଲାନ୍ସ ମୃତଦେହ ନନେବାରୁ ଉତ୍ତେଜନା ପ୍ରକାଶ ପାଇଛି । ଉତ୍ତ୍ୟକ୍ତ ଲୋକ କ୍ଷତିପୂରଣ ଦାବି କରି ରାସ୍ତାରୋକ କରିଛନ୍ତି । ଗତକାଲି ରାତିରୁ ସେଠାରେ ମୃତଦେହ ପଡ଼ି ରହିଥିଲା । ପ୍ରଶାସନର ବୁଝାସୁଝା ପରେ ରାସ୍ତାରୋକ ହଟିଛି ।
ଭୁବନେଶ୍ୱର: ଆଜିଠୁ ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷାର ସମ୍ଭାବନା ରହିଛି । ବଙ୍ଗୋପସାଗରର ଉତ୍ତର-ପୂର୍ବ ଉପକୂଳରେ ଆସନ୍ତା ୪ ଦିନ ପର୍ଯ୍ୟନ୍ତ ରାଜ୍ୟରେ ବର୍ଷା ହେବ । ପାଣିପାଗ ବିଭାଗ ୭ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଦେଇଛି । ମୟୁରଭଂଜ,ବାଲେଶ୍ୱର, ଯାଜପୁର, ଭଦ୍ରକ କେନ୍ଦ୍ରାପଡ଼ା, ମାଲକାନଗିରି ଓ କୋରାପୁଟ ପାଇଁ ଅରେଂଜ ୱାର୍ଣ୍ଣିଂ ଜାରି କରାଯାଇଛି ।
ସେହିଭଳି ଜଗତସିଂହପୁର, କଟକ, ପୁରୀ, ଖୋର୍ଦ୍ଧା, କେନ୍ଦୁଝର, ସୁନ୍ଦରଗଡ଼, ସମ୍ବଲପୁର, ଅନୁଗୁଳ,ଦେବଗଡ଼ ଓ କଳାହାଣ୍ଡିରେ ପ୍ରବଳ ବର୍ଷା ହେବା ନେଇ ଆକଳନ କରାଯାଇଛି । ଏହି ୧୦ଟି ଜିଲ୍ଲାକୁ ୟୋଲୋ ଓ୍ୱାର୍ଣ୍ଣିଂ ଜାରି କରାଯାଇଛି । ତେବେ ରାଜ୍ୟ ପ୍ରାୟ ସମସ୍ତ ପ୍ରମୁଖ ନଦୀରେ ଜଳସ୍ତର କମ୍ ରହିଥିବା ହେତୁ ବନ୍ୟା ସମ୍ଭାବନା ନଥିବା ସୂଚନା ମିଳିଛି । ଅନ୍ୟପକ୍ଷରେ ଆସନ୍ତା ୪ ଦିନ ଯାଏଁ ବର୍ଷାର ପରିମାଣ ରାଜ୍ୟରେ ବଢିବାକୁ ଥିବା ହେତୁ ସମୁଦ୍ର ଭିତରକୁ ମତ୍ସଜୀବୀମାନଙ୍କୁ ନଯିବା ପାଇଁ କୁହାଯାଇଛି ।
ନୂଆଦିଲ୍ଲୀ: କେନ୍ଦ୍ର ସରକାର ଆଣିଥିବା କୃଷି ବିଲକୁ ନେଇ ଲଗାତାର ବିରୋଧ ବଢ଼ି ବଢ଼ି ଚାଲିଛି । ଲୋକସଭାରେ ସରକାର କୃଷି ବିଲକୁ ପାରିତ କରି ସାରିଛନ୍ତି । ଆଜି ଏହି ବିଲ୍ ରାଜ୍ୟସଭାରେ ଉପସ୍ଥାପିତ ହେବ । ତେବେ ଉଚ୍ଚ ସଦନରେ ବିଲକୁ ପାସ୍ କରିବା ପାଇଁ NDA ନେତୃତ୍ୱାଧୀନ ବିଜେପି ସରକାର ପାଖରେ ବହୁମତ ନାହିଁ । କଂଗ୍ରେସ ସମେତ ଅନ୍ୟ ବିରୋଧୀ ଦଳ ବିଲ୍ ବିପକ୍ଷରେ ଅଛନ୍ତି । ଏଭଳି ସ୍ଥିତିରେ ୟୁପିଏ ଅଂଶୀଦାର କିଛି ଦଳ ବିଲକୁ ସମର୍ଥନ କଲେ ରାଜ୍ୟସଭାରେ ବିଲ୍ ପାସ ହେବା ଟିକିଏ ମୁସ୍କିଲ୍ ହେବ ।
ଏମିତି ସ୍ଥିତିରେ କେନ୍ଦ୍ର ସରକାର ଏନଡିଏ ଓ ୟୁପିରେ ମିଶିନଥିବା ଦଳ ଉପରେ ନଜର ରଖିଛନ୍ତି । ତେବେ, ଏ କ୍ଷେତ୍ରରେ ଏଯାଏଁ କୌଣସି ଆଲୋଚନା ହୋଇଥିବା ଜଣାପଡ଼ୁନି । ତେଲଙ୍ଗାନାରେ ଶାସନ କରୁଥିବା ଟିଆରଏସ୍ ଏହି ବିଲକୁ ବିରୋଧ କରୁଛି । ପଞ୍ଜାବରେ ବିଲକୁ ବିରୋଧ କରି ଆସନ୍ତା ୨୫ ତାରିଖରେ ବନ୍ଦ ଡାକରା ଦିଆଯାଇଛି ।
ଏହି ବିଲ୍ ବିରୋଧରେ ସବୁଠୁ ଅଧିକ ବିରୋଧ ପଞ୍ଜାବରେ ଦେଖାଯାଉଛି । ସିରୋମଣି ଅକାଳୀ ଦଳ ଅଭିଯୋଗ କରିଛି ବିଲ୍ ନେଇ ସରକାର କଥା ଶୁଣୁନାହାଁନ୍ତି । ଏହା ବାଦ୍ ଅକାଳୀ ଦଳରୁ କୋଟେରୁ ସାଂସଦ ଥିବା ହରସିମରତ କୌର ବାଦଲ ବିଲକୁ ବିରୋଧ କରି କେନ୍ଦ୍ରମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି । ତେବେ, ଏନଡିଏରୁ ସମର୍ଥନ ପ୍ରତ୍ୟାହାର ନେଇ ଦଳ ଖୁବ୍ ଶୀଘ୍ର ନିଷ୍ପତ୍ତି ନେବ ବୋଲି କୁହାଯାଇଛି ।
କୃଷି ବିଲକୁ ବିରୋଧରେ ସେପ୍ଟେମ୍ବର ୨୫ରେ ପଞ୍ଜାବ ବନ୍ଦ ଡାକରା ଦିଆଯାଇଛି । ୩୧ଟି କୃଷକ ସଂଗଠନ ପକ୍ଷରୁ ଏହି ବନ୍ଦ ଡାକରା ଦିଆଯାଇଥିବା ବେଳେ ଶନିବାର ବୈଠକ ବସିଥିଲା ।
ଆବୁଧାବି: ଇଣ୍ଡିଆନ୍ ପ୍ରିମିୟର୍ ଲିଗ୍(ଆଇପିଏଲ୍)ର ୧୩ ତମ ସଂସ୍କରଣର ପ୍ରଥମ ମ୍ୟାଚ୍ରେ ବିଜୟୀ ହୋଇଛି ଚେନ୍ନାଇ ସୁପର କିଙ୍ଗସ୍ । ପ୍ରତିପକ୍ଷ ମୁମ୍ୱାଇ ଇଣ୍ଡିଆନ୍ସକୁ ୫ ଓ୍ୱିକେଟରେ ହରାଇ ବିଜୟୀ ହୋଇଛି ଚେନ୍ନାଇ । ପ୍ରଥମେ ଟସ୍ ଜିତି ମୁମ୍ୱାଇ ଟିମକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ କ୍ୟାପଟେନ୍ ଧୋନୀ । ନିର୍ଦ୍ଦାରିତ ଓଭରରେ ବ୍ୟାଟିଂ କରି ୧୬୨ ରନ୍ କରିବାକୁ ସକ୍ଷମ ହୋଇଥିଲା ମୁମ୍ୱାଇ । ତେବେ ୧୬୩ ରନ୍ର ବିଜୟ ଲକ୍ଷ ନେଇ ମଇଦାନକୁ ଓହ୍ଲାଇଥିବା ଚେନ୍ନାଇକୁ ପ୍ରାରମ୍ଭିକ ଝଟକା ଲାଗିଥିଲା । ଓ୍ୱାଟଶନ ଓ ମୂରଲୀ ବିଜୟ ଦୁଇ ଅଙ୍କ ଛୁଇଁ ନପାରି ପେଭିଲିୟନ୍ ଫେରିଯାଇଥିଲେ । କିନ୍ତୁ ଦଳର ଓପନିଂ ବ୍ୟାଟ୍ସମ୍ୟାନ୍ ଫେଫ୍ ଡୁପ୍ଳେସି ଗୋଟିଏ ପାଖରେ ପାରି ସମ୍ଭାଳିଥିଲେ । ଏବଂ ଅପରାଜେୟ ୫୮ ରନ୍ କରିଥିଲେ । ଯାହା ଚେନ୍ନାଇକୁ ବିଜୟୀ କରାଇବାରେ ସଫଳ କରିଥିଲେ । ଏଥିସହିତ ମଧ୍ୟ କ୍ରମ ବ୍ୟାଟ୍ସମ୍ୟାନ୍ ଅମ୍ୱାତି ରାୟଡୁ ମଧ୍ୟ ୭୧ ରନ୍ କରିଥିଲେ । ସେ ମ୍ୟାନ୍ ଅଫ୍ ଦି ମ୍ୟାଚ୍ ଭାବେ ବିବେଚିତ ହୋଇଛନ୍ତି ।
ଭୁବନେଶ୍ୱର: ରାଜଧାନୀ ଉପକଣ୍ଠ ତମାଣ୍ଡୋରେ ନବବଧୂକୁ ହତ୍ୟା ଅଭିଯୋଗ । ମୃତକ ହେଉଛନ୍ତି ବନ୍ଦନା ଜେନା । ଅବସରପ୍ରାପ୍ତ ପୋଲିସ କର୍ମଚାରୀ ବିଜୟ କୁମାର ଜେନା ଓ ତାଙ୍କ ପୁଅ ଯାମିନୀ ଜେନା ବନ୍ଦନାଙ୍କୁ ହତ୍ୟା କରିଥିବା ଝିଅ ଘର ଲୋକେ ଅଭିଯୋଗ ଆଣିଛନ୍ତି । କ୍ୟାପିଟାଲ ହସ୍ପିଟାଲକୁ ଶବ ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଆରମ୍ଭ କରିଛି ତମାଣ୍ଡୋ ପୋଲିସ । ସ୍ବାମୀ ଯାମିନୀ ଜେନାକୁ ଅଟକ ରଖିଛି ପୋଲିସ । ଯୌତୁକ ପାଇଁ ଦୀର୍ଘ ଦିନ ଧରି ବନ୍ଦନାଙ୍କୁ ନିର୍ଯାତନା ଦିଆଯାଉଥିବା ତାଙ୍କ ପରିବାର ଲୋକେ ଅଭିଯୋଗ ଆଣିଛନ୍ତି । ଶୁକ୍ରବାର ରାତିରେ ବନ୍ଦନା ଓ ତାଙ୍କ ସ୍ବାମୀଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା, ଏହାକୁ ନେଇ ଝିଅକୁ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ବନ୍ଦନାଙ୍କ ମାଆ ।
ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (RBI) ଦ୍ୱାରା ୬ ମାସ ପାଇଁ ଦିଆଯାଇଥିବା ଲୋନ୍ ମୋରାଟରିୟମର ଅବଧି ଶେଷ ହୋଇଛି । ୩୧ ଅଗଷ୍ଟ ଲୋନ ମୋରାଟରିୟମର ସୁବିଧା ଅବଧି ଶେଷ ହୋଇଥିବା ବେଳେ ଚଳିତ ମାସ ଠାରୁ ଋଣଧାରୀଙ୍କୁ ସେମାନଙ୍କ ଇଏମ୍ଆଇ ପଇଠ କରିବାକୁ ପଡ଼ୁଛି । ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ ଲୋନ୍ ମୋରାଟରିୟମ୍ର ଅବଧିରେ ସୁଧ ଉପରେ ସୁଧ ଲାଗୁ ହେଉଥିଲା । ତାହା ଉପରେ ଋଣଧାରୀଙ୍କୁ ଆଶ୍ୱସ୍ତି ମିଳିପାରେ । ପୂର୍ବ ସିଏସି ରାଜୀବ ମହର୍ଷିଙ୍କ ଅଧ୍ୟକ୍ଷତାରେ ଏମ ସମିତି ଗଠିତ ହୋଇଥିଲା ।
ଏହି କମିଟି ସେହି ମାମଲା ଉପରେ କିଛି ପରାମର୍ଶ ଦେଇପାରେ । ଏଥିସହିତ ରିହାତିର ବୋଝ ବ୍ୟାଙ୍କ ବାଲାନ୍ସସିଟ୍ କିମ୍ୱା ଜମାକରୀଙ୍କ ଉପରେ ପଡ଼ିବନାହିଁ । ସମିତି କିଛି ନିର୍ଦ୍ଧିଷ୍ଟ ଋଣଧାରୀଙ୍କ ଉପରେ ଲାଗୁ ହୋଇଥିବା ଚକ୍ରବର୍ତ୍ତୀ ସୁଧ ଉପରେ ରୋକ ଲଗାଇବା ସମ୍ପର୍କିତ ପରାମର୍ଶ ଦେଇପାରନ୍ତି । ଏଥିସହ ଏଥିରେ ଛୋଟ ଋଣଧାରୀ ମଧ୍ୟ ସାମିଲ ହୋଇପାରନ୍ତି । ଏହି ସବୁ ଦିଗ ଉପରେ ବିଚାର ଜାରି ରହିଛି ।
