ପାଟଣା: ବାପା ଚାଲିଗଲା ପରେ ପୁଅର ଆକୁଳ ନିବେଦନ । ମୋ ବାପାକୁ ଟିକେ ନେଇଚାଲ…ଦୟାକର…ବାପାଙ୍କୁ ଟିକେ ମଶାଣିକୁ ନେଇ ଯିବାକୁ ସାହାଯ୍ୟ କର । ପୁଅର ଆକୁଳ ନିବେଦନ ପରେ ବି ଆସିଲେନି କେହି । ଶେଷରେ ନିଜେ ପିପିଇ କିଟ୍ ପିନ୍ଧି ବାପାଙ୍କ ଶବ ଉପରେ ଚାଦର ପକାଇଲା ପୁଅ ।
ଘଟଣାଟି ହେଉଛି ପାଟଣା ସହର ଚୌକ ଥାନା ଅଧିନରେ ଥିବା ହରମନ୍ଦିର ଗଳିର, ଏଠାରେ ଗୋଟିଏ ୫୦ ବର୍ଷିୟ କରୋନା ରୋଗୀଙ୍କୁ ନିଜ ଘରେ ହିଁ ଆଇସୋଲେସନ ରଖାଯଆଇଥିଲା । ତାଙ୍କର ମୃତ୍ୟୁ ୨୨ଜୁଲାଇ ସକାଳ ପ୍ରାୟ ୪ ସମୟରେ ହୋଇଯାଇଥିଲା । ମୃତ୍ୟୁ ପରେ ସଂକ୍ରମଣ ଯେମିତି ଆଉ ନ ବଢୁ ସେଥିପାଇଁ ପୂରା ପରିବାର ଘର ବାହାରକୁ ପଳାଇ ଆସିଥିଲା । ପରିବାର ଓ ସ୍ଥାନୀୟ ଲୋକଙ୍କ ସୂଚନା ପରେ ବହୁ କଷ୍ଟରେ ଏକ ଆମ୍ବୁଲାନ୍ସ ସେଠାରେ ଆସି ପହଞ୍ଚି ଥିଲା ।
ଏହାପରେ ମୃତକଙ୍କ ଦୁଇ ପୁଅ ନିଜେ ପିପିଇ କିଟ୍ ପିନ୍ଧି ମୃତ ବାପାଙ୍କୁ ଚାଦର ପକାଇ ଆମ୍ବୁଲାନ୍ସ ପର୍ଯ୍ୟନ୍ତ ନେଇ ଆସିଥିଲେ । ଦିନସରା ଅସ୍ତବ୍ୟସ୍ତ ହେବା ପରେ ବି ସ୍ୱାସ୍ଥ୍ୟ ବିଭାଗର କୌଣସି ବି କର୍ମଚାରୀ ସେଠାରେ ପହଞ୍ଚି ନଥିଲେ । ଏବଂ ମୃତ୍ୟୁର ୧୪ଘଣ୍ଟା ପରେ କେବଳ ଗୋଟିଏ ଡ୍ରାଇଭର ସହ ଆମ୍ବୁଲାନ୍ସକୁ ପଠାଇ ଦେଇଥିଲେ ।
ମୃତକଙ୍କ ପରିବାର କହିଛନ୍ତି ଯେ, କରୋନା ରିପୋର୍ଟ ପଜିଚିଭ୍ ଆସିବା ପରେ ଡାକ୍ତର ହୋମ କ୍ୱାରେଣ୍ଟାଇନରେ ରହିବା ପରାମର୍ଶ ଦେଲେ । ଗତକାଲି ରାତିରେ ସ୍ୱାସ୍ଥ୍ୟ ଅବସ୍ଥା ବିଗିଡ଼ିବାରୁ ତାଙ୍କର ମୃତ୍ୟୁ ହୋଇଯାଇଥିଲା । ଏହାପରେ ସ୍ୱାସ୍ଥ୍ୟ ବିଭାଗକୁ ସୂଚନା ଦିଆଯାଇଥିଲା । ତାଙ୍କ କହିବା କଥା ହେଉଛି ମୃତ୍ୟୁ ପରେ ପରିବାର ବାହାରକୁ ଚାଲି ଆସିଥିଲା ଏବଂ ବାରମ୍ବାର ଡିଏମ, ଏସପି, ସ୍ୱାସ୍ଥ୍ୟ ବିଭାଗକୁ ଫୋନ କରି ଶବ ଉଠାଇବାକୁ କହିଥିଲେ କିନ୍ତୁ କୌଣସି ବି ସାହାଯ୍ୟ ମିଳି ନଥିଲା । ପ୍ରାୟ ୧୪ଘଣ୍ଟା ପରେ ଗୋଟିଏ ଆମ୍ବୁଲାନ୍ସ ଆସିଥିଲା । ତେଣୁ ସେମାନେ ନିଜେ ପିପିଇ କିଟ୍ ପିନ୍ଧି ବାପାଙ୍କୁ ଚାଦର ଘୋରାଇ ମଶାଣି ନେଇଥିଲେ ।
