ଝାରସୁଗୁଡ଼ାରୁ ମୁମ୍ବାଇ ଓ ବାଙ୍ଗାଲୁରୁକୁ ସିଧାସଳଖ ବିମାନସେବା ଆରମ୍ଭ
ଭୁବନେଶ୍ୱର: ଝାରସୁଗୁଡ଼ାରୁ ଖୁବ ଶୀଘ୍ର ମୁମ୍ବାଇ ଓ ବାଙ୍ଗାଲୁରୁକୁ ସିଧାସଳଖ ବିମାନସେବା ଆରମ୍ଭ ହେବାକୁ ଯାଉଛି । ଏହା ଆସନ୍ତା ଅକ୍ଟୋବର ୨୫ ରୁ ଆରମ୍ଭ ହେବାକୁ ଯାଉଛି । ଏନେଇ ସୂଚନା ଦେଇଛନ୍ତି ବିମାନବନ୍ଦର ନିର୍ଦେଶକ । ବହୁଦିନ ପରେ ଝାରସୁଗୁଡ଼ାବାସୀଙ୍କ ସ୍ୱପ୍ନ ସାକାର ହେବାକୁ ଯାଉଛି । ମୁମ୍ବାଇ ଓ ବାଙ୍ଗାଲୁରୁକୁ ବିମାନସେବା ଆରମ୍ଭ ହେବା ନେଇ ଗ୍ରୀନ ସିଗନାଲ ଦେଇଛି ଝାରସୁଗୁଡା ବିମାନ ବନ୍ଦର କର୍ତ୍ତୃ ପକ୍ଷ ।
ଅକ୍ଟୋବର ୨୫ରୁ ଆରମ୍ଭ ହେବାକୁ ଯାଉଛି ଆଉ ଦୁଇଟି ସହର କୁ ବିମାନସେବା । ବହୁ ଦିନରୁ ଦାବି ହୋଇ ଆସୁଥିବା ଝାରସୁଗୁଡ଼ାରୁ ମୁମ୍ବାଇ ଏବଂ ବାଙ୍ଗାଲୁରୁକୁ ବିମାନସେବା ଲାଗି ପଥ ପ୍ରଶସ୍ତ ହୋଇଛି । ଆସନ୍ତା ୱିଂଟର ସିଡ୍ୟୁଲ ଅର୍ଥାତ ଅକ୍ଟୋବର ୨୫ରୁ ଝାରସୁଗୁଡ଼ାରୁ ଏହି ବହୁ ପ୍ରତୀକ୍ଷିତ ବିମାନସେବା ଆରମ୍ଭ ହେବାର ସମ୍ଭାବନା ରହିଛି । ସ୍ପାଇସଜେଟ୍ ପକ୍ଷରୁ ବିମାନସେବା ଆରମ୍ଭ କରିବାକୁ ସ୍ଲଟ୍ ଏଲୋକେସନ ପାଇଁ କରାଯାଇଥିବା ଆବେଦନ ଉପରେ ଝାରସୁଗୁଡ଼ା ବିମାନବନ୍ଦର କର୍ତୃପକ୍ଷ ସବୁଜ ସଂକେତ ଦେଇ ସାରିଥିବା ବିମାନବନ୍ଦରର ନିର୍ଦ୍ଦେଶକ କିଶୋର ସେନାପତି କହିଛନ୍ତି । ଏ ଦିଗରେ ଆବଶ୍ୟକ ହେଉଥିବା ଅନ୍ୟାନ୍ୟ ଅନୁମତି ହାସଲ ପରେ ବିମାନସେବା ଆରମ୍ଭ ହୋଇ ପାରିବ ବୋଲି ସେ କହିଛନ୍ତି ।
ଝାରସୁଗୁଡ଼ା ସ୍ଥିତ ବୀର ସୁରେନ୍ଦ୍ର ସାଏ ବିମାନବନ୍ଦର ଗତ ୨୦୧୮ ସେପ୍ଟେମ୍ବର ୨୨ ତାରିଖ ଦିନ ଉଦଘାଟିତ ହେବା ସହ ବିମାନସେବା ଆରମ୍ଭ ହେବା ପରଠାରୁ ମୁମ୍ବାଇ ଏବଂ ବାଙ୍ଗାଲୁରୁକୁ ବିମାନ ଚଳାଚଳ ଆରମ୍ଭ କରିବାକୁ ଦାବି ହୋଇ ଆସିଛି । ଅବଶ୍ୟ ବିଧିବଦ୍ଧ ଭାବେ ସ୍ପାଇସଜେଟ୍ ପକ୍ଷରୁ ୨୦୧୯ ମାର୍ଚ୍ଚ ୩୧ ତାରିଖ ଠାରୁ ହିଁ ବିମାନସେବା ଦିଲ୍ଲୀ, କୋଲକାତା, ହାଇଦ୍ରାବାଦ ଆଦି ସହରକୁ ଆରମ୍ଭ ହୋଇଥିଲା । ପରବର୍ତ୍ତୀ ସମୟରେ ଏଲାୟନ୍ସ ଏୟାରର ବିମାନସେବା ଭୁବନେଶ୍ୱର, ରାୟପୁର, କୋଲକାତା ଆଦିକୁ ଆରମ୍ଭ ହୋଇଥିଲା ।ଲକଡାଉନ ସମୟରେ କିଛି ସମୟ ଧରି ବିମାନସେବା ବନ୍ଦ ରହିବା ପରେ ପୁଣିଥରେ କଟକଣା ଭିତରେ ବିମାନସେବା ଆରମ୍ଭ ହୋଇଛି । ଆଗକୁ ବାଙ୍ଗାଲୁରୁ ଏବଂ ମୁମ୍ବାଇକୁ ବିମାନସେବା ଆରମ୍ଭ ହେଲେ ଏହା ପଶ୍ଚିମ ଓଡ଼ିଶା ସହ ଭାରତର ପ୍ରମୁଖ ସହରକୁ ଏୟାର କନେକ୍ଟିଭିଟି ହୋଇ ପାରିବ । ଉଚ୍ଚ ଓ ବୈଷୟିକ ଶିକ୍ଷା, ସ୍ୱାସ୍ଥ୍ୟ ଆଦି ପାଇଁ ମୁମ୍ବାଇ, ବାଙ୍ଗାଲୁରୁ ଉପରେ ନିର୍ଭର କରିଥାନ୍ତି । ଏହି ଦୁଇ ସହର ଝାରସୁଗୁଡ଼ା ସହ ଯୋଡ଼ି ହେଲେ ଛାତ୍ରଛାତ୍ରୀ ଏବଂ ରୋଗୀଙ୍କ ପାଇଁ ବଡ଼ ସୁବିଧା ହୋଇ ପାରିବ ।
ବନ୍ୟା ପାଣିରେ ଉବୁଟୁବ ଅଧା ଓଡ଼ିଶା, ଉଦ୍ଧାର ହେଉଛନ୍ତି ଫସି ରହିଥିବା ବ୍ୟକ୍ତି
ଭୁବନେଶ୍ୱର: ରାଜ୍ୟରେ କିଛି ଦିନର ଲଗାଣ ବର୍ଷା ପାଇଁ ଏବେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଅଧା ଓଡ଼ିଶା ବନ୍ୟା ପାଣିରରେ ଉବୁଟୁବୁ ହେଉଛି । ବନ୍ୟାର ପ୍ରଭାବରେ ବିଭିନ୍ନ ସ୍ଥାନରେ ଲୋକେ ଫସି ରହିଛନ୍ତି । ତେବେ ଭଦ୍ରକରେ ଦୁଇଦିନ ଧରି ଗଛ ଉପରେ ଥିବା ବ୍ୟକ୍ତିଙ୍କୁ ଉଦ୍ଧାର କରିଛି ଅଗ୍ନିଶମ ବାହିନୀ । ଉଦ୍ଧାର ହୋଇଥିବା ବ୍ୟକ୍ତି ଜଣକ ହେଲେ ଅର୍ଜୁନପୁର ଗ୍ରାମର ପରୀକ୍ଷିତ ରାଉତ । ଶୁକ୍ରବାର ବ୍ୟକ୍ତି ଜଣକ ରାସ୍ତାରେ ଯାଉଥିବା ବେଳେ ଅର୍ଜୁନପୁର ନିକଟରେ ଭାସିଯାଇଥିଲେ । କିଛି ସମୟ ପାଇଁ ନଦୀରେ ଭାସି ଯାଉଥିବା ବେଳେ ଜୀବନ ବିକଳରେ ଗୋଟିଏ ଗଛକୁ ଧରି ନେଇଥିଲେ ।
ପରେ ଗଛ ଉପରକୁ ଉଠିଯାଇଥିଲେ ବ୍ୟକ୍ତି ଜଣକ । ଖବର ପ୍ରସାରିତ ହେବା ପରେ ଉଦ୍ଧାର ପାଇଁ ପ୍ରଶାସନ ପକ୍ଷରୁ ତତ୍ପରତା ଦେଖାଯାଇଥିଲା । ରାତିରେ ଉଦ୍ଧାର ବାଧାପ୍ରାପ୍ତ ହେବାପରେ ପରୀକ୍ଷିତ ରାତି ସାରା କିଛି ନ ଖାଇ ନ ପିଇ ଗଛ ଉପରେ ରହିଯାଇଥିଲେ । ଆଜି ଅଗ୍ନିଶମ ବିଭାଗର ଏକ ଟିମ ପହଞ୍ଚି ଗଛରୁ ତାଙ୍କୁ ଉଦ୍ଧାର କରି ସୁରକ୍ଷିତ ଭାବେ ଘରେ ଛାଡିଛନ୍ତି ।
ସେପଟେ ଘର ବାହାରକୁ ଆସିଥିବାବେଳେ ବନ୍ୟା ପାଣିରେ ଖାଲୁଆ ରାସ୍ତାରେ ଭାସିଗଲେ । କୌଣସି କାମ ପାଇଁ ଘର ସାମ୍ନା ରାସ୍ତାକୁ ଆସିଥିଲେ । ରାସ୍ତାଟି ଖାଲୁଆ ହୋଇଥିବାରୁ ସେ ବନ୍ୟା ସୁଅରେ ଭାସି ଯାଇଥିଲେ । ଯାହାଫଳରେ ତାଙ୍କର ମୃତ୍ୟୁ ହୋଇଥିଲା । ଏନଡିଆରଏଫ ଟିମ୍ ତାଙ୍କ ମୃତ ଦେହ ଉଦ୍ଧାର କରିଛି । ଭଦ୍ରକ ଜିଲ୍ଲା ଭଣ୍ଡାରିପୋଖରୀ ରହଣିଆ ଗାଁରେ ଏଭଳି ଘଟଣା ଘଟିଛି । ମୃତକ ହେଲେ ହରିହର ସାମଲ । ଖାଲି ସେତିକି ନୁହେଁ ବନ୍ୟା ପ୍ରପକୋରୁ ଉଦ୍ଧାର ହେଲେ ମାଆ ଓ ନବଜାତକ । ଜଳବନ୍ଦୀରେ ନବଜାତକର ପରିବାର ଫସିଥିବା ବେଳେ ସେମାନଙ୍କୁ ଉଦ୍ଧାର କରିଛି ଅଗ୍ନିଶମ ବାହିନୀ । ଯାଜପୁର ବରୀ ଅଞ୍ଚଳର ଏ ସମ୍ବେଦନଶୀଳ ଦୃଶ୍ୟ ।
ଅନ୍ୟପଟେ ଅନୁଗୁଳରେ ବନ୍ୟା ଘେରରେ ଫଶି ରହିଥିବା ୧୦ ଶ୍ରମିକଙ୍କ ମଧ୍ୟରୁ ୫ ଜଣଙ୍କୁ ଉଦ୍ଧାର କରାଯାଇଛି । ଅଗ୍ନିଶମ ବିଭାଗ ୫ଜଣଙ୍କୁ ସୁରକ୍ଷିତ ଉଦ୍ଧାର କରିଛନ୍ତି । ଆଠମଲ୍ଲିକରେ ଲିଫ୍ଟ ଇରିଗେସନ କାମରେ ଯାଇଥିଲେ ଶ୍ରମିକ । ଏହି ସମୟରେ ହିରାକୁଦ ଜଳଭଣ୍ଡାରରୁ ଜଳ ନିଷ୍କାସନ ପାଇଁ ଗେଟ ଖୋଲାଯାଇଥିଲା ବେଳେ ମହାନଦୀରେ ବନ୍ୟାସ୍ଥିତି ସୃଷ୍ଟି ହୋଇଥିଲା । ଫଳ ଶ୍ରମିକ ମାନେ ସେଠାରେ ଫଶିଯାଇଥିଲେ ।
ଆଜି ଦ୍ରୋଣାଚାର୍ଯ୍ୟ ସମ୍ମାନ ପାଇଥାନ୍ତେ, କାଲି ଦୁନିଆ ଛାଡି ଚାଲିଗଲେ
ନୂଆଦିଲ୍ଲୀ: ଆଥଲେଟିକ୍ସ କୋଚ୍ ପୁରୁଷୋତ୍ତମ ରାୟଙ୍କର ଗତ ଶୁକ୍ରବାରକୁ ମୃତ୍ୟୁ ହୋଇଛି । ଆଜି ତାଙ୍କୁ କ୍ରୀଡ଼ା ଦିବସରେ ଭର୍ଚୁଆଲ ଆଓ୍ୱାର୍ଡ଼ ସମାରୋହରେ ଦ୍ରୋଣାଚାର୍ଯ୍ୟ ପୁରସ୍କାର ମିଳିଥାନ୍ତା । କିନ୍ତୁ ବିଧିର ବିଧାନ ସବୁ କିଛି ବଦଳାଇ ଦେଇଛି । ଜୀବନର ଏତେ ବଡ଼ ସମ୍ମାନ ପାଇବା ପୂର୍ବରୁ ହୃଦଘାତରେ ସେ ସବୁଦିନ ପାଇଁ ଆଖି ବୁଜି ଦେଇଛନ୍ତି ।
ଉତ୍ତମ ଆଥଲେଟ ଗଢିବାରେ ପୁରୁଷୋତ୍ତମ ରାୟଙ୍କର ଯଥେଷ୍ଟ ଯୋଗଦାନ ରହିଛି । ଏମାନଙ୍କ ମଧ୍ୟରେ ଏମ.କେ.ଆଶଆ,ଇବି ରାୟଲା, ରୋସା କୁଟ୍ଟୀ, ଅଶ୍ୱିନ ନଚପ୍ପା,ମୁରଲୀ କୁଟ୍ଟନ ଏବଂ ଜିଜି ପରମିଲାଙ୍କ ଭଳି ଖେଳାଳୀ ସାମିଲ ଅଛନ୍ତି, ଯେଉଁମାନେ ଖେଳରେ ଉତ୍ତମ ପ୍ରଦର୍ଶନ କରି ଦେଶକୁ ଗୌରବାନ୍ୱିତ କରିଛନ୍ତି ।
ଚଳିତ ଥର ଖେଳ ମନ୍ତ୍ରାଳୟ ନୂଆ ନିୟମ ପ୍ରଣୟନ କରିଥିଲେ । ଯେଉଁଥିରେ କୌଣସି ଖେଳାଳୀ ବା କୋଚ୍ ନିଜକୁ ନିଜେ ପୁରସ୍କାର ପାଇଁ ନମିନେଟ କରିପାରିବେ । ଏହାଦ୍ୱାରା ସେ ମନ୍ତ୍ରାଳୟ ନଜରକୁ ଆସିଲେ । ଯାହାପରେ ତାଙ୍କୁ ଦ୍ରୋଣାଚାର୍ଯ୍ୟ ପୁରସ୍କାର ପାଇଁ ଚୟନ କରାଗଲା । ରାୟ ହେଉଛନ୍ତି ବାଙ୍ଗାଲୁରୁର ଜଣେ ପ୍ରସିଦ୍ଧ କୋଚ୍ । ତେବେ କୌଣସି ସମସ୍ୟା ପାଇଁ ସେ ଏହି ପୁରସ୍କାରରୁ ବଞ୍ଚିତ ଥିଲେ । ମୃତ୍ୟୁ ପୂର୍ବରୁ ପୁରସ୍କାର ପାଇବାକୁ ନେଇ ରାୟ ଖୁବ ଖୁସି ଥିଲେ ।
ସୂଚନାଯୋଗ୍ୟ ରାୟ ୧୯୮୭ର ବିଶ୍ୱ ଆଥଲେଟିକ୍ସ ଚାମ୍ପିଅନସିପ,୧୯୮୮ର ଏସିୟାନ ଟ୍ରାକ ଆଣ୍ଡ ଫିଲଡ ଚାମ୍ପିଅନସିପ ସହିତ କେତେକ ଟୂର୍ଣ୍ଣାମେଣ୍ଟ ପାଇଁ ଭାରତୀୟ ଟିମକୁ ସେ କୋଚିଂ ଦେଇଛନ୍ତି ।
ବନ୍ଧନ ବ୍ୟାଙ୍କ ମହିଳା କର୍ମଚାରୀଙ୍କଠାରୁ ଲୁଟ୍ ଘଟଣାର ପର୍ଦ୍ଦାଫାସ୍, ଧରାପଡ଼ିଲା ଦୁର୍ଦ୍ଦାନ୍ତ ଅପରାଧୀ ପାଟୁ ଖାଁ
ଭୁବନେଶ୍ୱର: ବହୁ ଚର୍ଚ୍ଚିତ ବରମୁଣ୍ଡା ବନ୍ଧନ ବ୍ୟାଙ୍କ ମହିଳା କର୍ମଚାରୀଙ୍କ ଠାରୁ ଟଙ୍କା ଲୁଟ୍ ଘଟଣାର ପର୍ଦ୍ଦାଫାସ । ଘଟଣାରେ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି ସ୍ପେଶାଲ ସ୍କ୍ୱାର୍ଡ । ଅଭିଯୁକ୍ତମାନଙ୍କଠାରୁ ପିସ୍ତଲ, ୭୦ ହଜାର ଟଙ୍କା ଓ କାର ମଧ୍ୟ ଜବତ କରାଯାଇଛି । ଅଭିଯୁକ୍ତମାନେ ବାଲିଅନ୍ତା ଏବଂ ଧଉଳି ଲୁଟ ମାମଲାରେ ମଧ୍ୟ ସମ୍ପୃକ୍ତ ଥିବା ପୋଲିସ ସୂଚନା ଦେଇଛି । ଏହି ଲୁଟେରା ଗ୍ୟାଙ୍ଗର ମୁଖ୍ୟ ହେଉଛି ପାଟୁ ଖାଁ । ପୋଲିସ ପାଟୁ ଖାଁ ଏବଂ ତାର ତିନି ସହଯୋଗୀଙ୍କୁ ଗିରଫ କରିଛି ।
ଗତ ଅଗଷ୍ଟ ୫ ତାରିଖ ଦିନ ଖଣ୍ଡଗିରି ଥାନା ଅଧିନ ବରମୁଣ୍ଡା ଗାଁ ଭିତରେ ବନ୍ଧନ ବ୍ୟାଙ୍କର ଜଣେ ମହିଳା କର୍ମଚାରୀଙ୍କଠାରୁ ଦୁର୍ବୃତ୍ତମାନେ ଟଙ୍କା ଭର୍ତ୍ତି ବ୍ୟାଗ୍ ଝାମ୍ପି ନେଇଥିଲେ । ମହିଳା କର୍ମଚାରୀ ଜଣକ ବ୍ୟାଙ୍କ ଟଙ୍କା କଲେକ୍ସନ କରି ଫେରୁଥିବା ବେଳେ ଏଭଳି ଘଟଣା ଘଟିଥିଲା । ଏକ ବାଇକ୍ରେ ଆସି ଦୁର୍ବୃତ୍ତମାନେ ଟଙ୍କା ଝାମ୍ପି ନେବା ପରେ ଆଖି ପିଛୁଳାକେ ଉଭାନ୍ ହୋଇଯାଇଥିଲେ । ସେହି ସମୟରେ ତାଙ୍କର ଏକ ବନ୍ଧୁକ ମଧ୍ୟ ଖସିପଡ଼ିଥିଲା ।
ପରେ ଥାନାରେ ମହିଳାଙ୍କ ଅଭିଯୋଗ ପରେ ପୋଲିସ ବନ୍ଧୁକକୁ ଜବତ କରିବା ସହ ସ୍ଥାନୀୟ ଅଞ୍ଚଳରେ ଥିବା ବିଭିନ୍ନ ସିସିଟିଭି ଫୁଟେଜକୁ ଆଧାର କରି ତଦନ୍ତ ଆରମ୍ଭ କରିଥିଲା ।
ସୂଚାନାଯୋଗ୍ୟ ସେହେନାଜ ଖାଁ ଓରଫ ପାଟୁ ଖାଁକୁ ପୋଲିସ ଦୀର୍ଘ ଦିନ ହେବ ଖୋଜୁଥିଲା । ପୂର୍ବରୁ ପାଟୁ ଖାଁ ପୋଲିସ ଏନ୍କାଉଣ୍ଟରର ଶିକାର ହୋଇସାରିଛି । ଗତ ୨୦୧୫/୧୬ ଏବଂ ୨୦୧୯ରେ ପୋଲିସ ପାଟୁ ଖାଁକୁ ଏନକାଉଣ୍ଟର କରିଥିଲା । ତେବେ ଦୁଇ ଥର ଯାକ ପୋଲିସକୁ ଚକ୍ମାଦେଇ ସେ ଫେରାର ହୋଇଯାଇଥିଲା । ଥରେ କ୍ୟାପିଟାଲ ହସ୍ପିଟାଲର ବାଥ୍ରୁମ୍ ଝରକା ଭାଙ୍ଗି ଫେରାର ହୋଇଥିବା ବେଳେ ଆଉ ଥରେ ଏସ୍ସିବି ମେଡିକାଲରୁ ଫେରାର ହୋଇଥିଲା । ଏଥିପାଇଁ ଅନେକ ପୋଲିସ କର୍ମଚାରୀଙ୍କୁ ଦାୟିତ୍ୱରେ ଅବହେଳା ଯୋଗୁଁ ସସପେଣ୍ଡ ମଧ୍ୟ କରାଯାଇଥିଲା ।
JEE ଓ NEET ପରୀକ୍ଷା: ଦେଶର ପ୍ରଥମ ରାଜ୍ୟ ଯିଏ ପରୀକ୍ଷାର୍ଥୀଙ୍କୁ ଦେଉଛି ମାଗଣା ସୁବିଧା
ଭୁବନେଶ୍ୱର: କରୋନା କାଳରେ JEE ଓ NEET ପରୀକ୍ଷା ଆୟୋଜନ ହେଉଛି । ପରୀକ୍ଷାର୍ଥୀ କେମିତି ପରୀକ୍ଷା ଦେବେ, କେମିତି ପରୀକ୍ଷା କେନ୍ଦ୍ରରେ ପହଂଚିବେ ଓ କେଉଁଠି ରହିବେ । ଏହି ଚିନ୍ତା ସମସ୍ତଙ୍କୁ ଘାରିଥିଲା । ଏହାରି ଭିତରେ ରାଜ୍ୟ ସରକାର ଆଗକୁ ଆସିଲେ । ପରୀକ୍ଷାର୍ଥୀଙ୍କ ମାଗଣା ଯାତାୟତ ଓ ରହଣି ପାଇଁ ଶୁକ୍ରବାର ସରକାର ଘୋଷଣା କରିଛନ୍ତି । ପରୀକ୍ଷାର୍ଥୀଙ୍କୁ ସବୁ ସୁବିଧା ମାଗଣାରେ ଯୋଗାଇ ଦେବାକୁ ମୁଖ୍ୟମନ୍ତ୍ରୀ ଆଦେଶ ଦେବା ପରେ ପ୍ରଶାସନ ତୃଣମୂଳ ସ୍ତରରେ କାମ ଆରମ୍ଭ କରିଛି । ମୁଖ୍ୟମନ୍ତ୍ରୀ ନବୀନ ପଟନାୟକଙ୍କ ଏହି ସମୟୋଚିତ ପଦକ୍ଷେପକୁ ସବୁ ମହଲରେ ପ୍ରଶଂସା କରାଯାଉଛି ।
ପ୍ରଫେସର ଜୟନ୍ତ କୁମାର ମହାପାତ୍ର ଏକ ଟ୍ୱିଟ୍ କରି ମୁଖ୍ୟମନ୍ତ୍ରୀଙ୍କ ପଦକ୍ଷେପକୁ ପ୍ରଶଂସା କରିବା ସହ ଏଥିପାଇଁ ପୁରା ଓଡ଼ିଶା ତାଙ୍କୁ ଧନ୍ୟବାଦ ଜଣାଉ ବୋଲି କହିଛନ୍ତି । ସେ ଲେଖିଛନ୍ତି ଯେ, ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ । ଓଡ଼ିଶାର ସମସ୍ତ JEE ଓ NEET ପରୀକ୍ଷାର୍ଥୀ ଏବଂ ଅଭିଭାବକମାନେ ମୁଖ୍ୟମନ୍ତ୍ରୀଙ୍କ ପଦକ୍ଷେପକୁ ସ୍ୱାଗତ କରିବା ସହ ତାଙ୍କୁ ଧନ୍ୟବାଦ ଦେବା ଆବଶ୍ୟକ । ମୁଖ୍ୟମନ୍ତ୍ରୀ ଏକ ବଳିଷ୍ଠ ପଦକ୍ଷେପ ନେଇଛନ୍ତି । ମୁଖ୍ୟମନ୍ତ୍ରୀଙ୍କ ଏଭଳି ପଦକ୍ଷେପ ଅନ୍ୟ ରାଜ୍ୟ ପାଇଁ ଏକ ଉଦାହାରଣ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶାର ସମସ୍ତ JEE ଓ NEET ପରୀକ୍ଷାର୍ଥୀଙ୍କ ପାଇଁ ବାଟ ଖର୍ଚ୍ଚ ଦେବାକୁ ଘୋଷଣା କରିଛନ୍ତି । ଏମିତିକି ସେମାନଙ୍କ ଅନ୍ୟାନ୍ୟ ବ୍ୟବସ୍ଥା ମଧ୍ୟ କରାଯିବ ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଜେଇଇ ମେନ୍ ଓ ନିଟ ପରୀକ୍ଷାର୍ଥୀ ମାଗଣାରେ ପରୀକ୍ଷା କେନ୍ଦ୍ରକୁ ଯିବା ପାଇଁ ସରକାର ସମସ୍ତ ବ୍ୟବସ୍ଥା କରିଛନ୍ତି । ଯେଉଁ ପରୀକ୍ଷାର୍ଥୀଙ୍କ ଯାତାୟତ ଓ ରହିବା ସମସ୍ୟା ଥିବ ସେମାନେ ଏହି ସୁବିଧା ପାଇପାରିବେ । ଏକ ସାମ୍ବାଦିକ ସମ୍ମିଳନୀରେ ଶୁକ୍ରବାର ଏହି ସୂଚନା ଦେଇଥିଲେ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ । ପ୍ରତି ଜିଲ୍ଲାର ଗୋଟିଏ ଲେଖାଏଁ ଆଇଟିଆଇ କଲେଜକୁ ସରକାର ନୋଡାଲ ସେଣ୍ଟର୍ କରିଛନ୍ତି । ଏହି ନୋଡାଲ ସେଣ୍ଟରକୁ ଫୋନ୍ କରି ପରୀକ୍ଷାର୍ଥୀ ମାନେ ପ୍ରଥମେ ପଞ୍ଜିକରଣ କରିବେ । ସେହି ନୋଡାଲ ସେଣ୍ଟରରୁ ପରୀକ୍ଷାର୍ଥୀଙ୍କୁ ପରୀକ୍ଷା ହେବାକୁ ଥିବା ୭ ସହରର ୨୬ଟି ସେଣ୍ଟର୍କୁ ନିଆଯିବ । ସେଠାରେ ସେମାନେ ପରୀକ୍ଷା ଦେବା ସହ ଯେଉଁ ମାନଙ୍କର ରହିବା ସୁବିଧା ନଥିବ ସେମାନଙ୍କୁ ଆଇଟିଆଇ, ପଲିଟେକନିକ୍ ଓ ଘରୋଇ ଇଞ୍ଜିନିୟରିଂ କଲେଜର ହଷ୍ଟେଲରେ ରଖିବା ବ୍ୟବସ୍ଥା କରାଯିବ ।
ପରୀକ୍ଷାର୍ଥୀ ଏବଂ ତାଙ୍କ ସାଙ୍ଗରେ ଯାଉଥିବା ସମ୍ପର୍କୀୟଙ୍କୁ ଯାତାୟତ ଓ ରହିବା ଲାଗି କୌଣସି ଦେୟ ଦେବାକୁ ପଡ଼ିବନି । ରାଜ୍ୟର ପ୍ରାୟ ୩୭ ହଜାର ଛାତ୍ରଛାତ୍ରୀ ଜେଇଇ ମେନ୍ ଓ ନିଟ୍ ପରୀକ୍ଷା ଦେଉଛନ୍ତି । ଏହି ସୁବିଧା ପାଇବା ଲାଗି ୩୧ ଅଗଷ୍ଟ ସୁଦ୍ଧା ପରୀକ୍ଷାର୍ଥୀ ନିଜ ତଥ୍ୟ ଦେଇ ପଞ୍ଜିକରଣ କରିପାରିବେ ବୋଲି ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି।
Sushant Singh Rajput Case: ରିୟାଙ୍କ ପାଇଁ କେତେ ଟଙ୍କା ଖର୍ଚ୍ଚ କରିଛନ୍ତି ସୁଶାନ୍ତ, ସାମ୍ନାକୁ ଆସିଲା ସତ
ମୁମ୍ବାଇ: ସୁଶାନ୍ତ ସିଂ ରାଜପୂତଙ୍କ ମୃତ୍ୟୁ ମାମଲାକୁ ନେଇ ପ୍ରତିଦିନ ନୂଆ ନୂଆ କଥାର ଖୁଲାସା ହେଉଛି । ନିକଟରେ ସେହିଭଳି ଏକ ଖବର ସାମ୍ନାକୁ ଆସିଛି । ଗଣମାଧ୍ୟମକୁ ଦେଇଥିବା ସାକ୍ଷାତକାରରେ ରିୟା ବାରମ୍ବାର କହୁଛନ୍ତି କି ସୁଶାନ୍ତଙ୍କ ଟଙ୍କାରେ ସେ ବଞ୍ଚୁ ନଥିଲେ । କିନ୍ତୁ ସୁଶାନ୍ତଙ୍କ ବ୍ୟାଙ୍କ ଆକାଉଣ୍ଟରୁ କିଛି ଏଭଳି ଖବର ମିଳିଛି, ଯାହା ରିୟାଙ୍କୁ ଭୁଲ ପ୍ରମାଣିତ କରୁଛି ।
ଗଣମାଧ୍ୟମର ସୂଚନା ଅନୁସାରେ ସୁଶାନ୍ତଙ୍କ ବ୍ୟାଙ୍କ ଆକାଉଣ୍ଟରୁ ହୋଇଥିବା ଟ୍ରାଞ୍ଜାକ୍ସନରୁ ଜଣା ପଡୁଛି ଯେ, ଗତ ୧୦ ମାସରେ ୪ କୋଟି ୫୦ ଲକ୍ଷରୁ ଅଧିକ ଖର୍ଚ୍ଚ ହୋଇଛି । ଏହି ଟଙ୍କା ଯାତ୍ରା, ଆରାମ ଦାୟକ ଜୀବନ ବିତାଇବା, ଦାନ ଏବଂ ଆଧ୍ୟାତ୍ମିକ କାର୍ଯ୍ୟ ପାଇଁ ଖର୍ଚ୍ଚ କରାଯାଇଛି । ଯାହା ସମସ୍ତଙ୍କ ଧ୍ୟାନ ଆକର୍ଷଣ କରିଛି ତାହା ହେଉଛି ଏହି ଖର୍ଚ୍ଚ ମଧ୍ୟରୁ ଅଧିକ ଟଙ୍କା ରିୟା ଏବଂ ତାଙ୍କ ଭାଇ ସୌଭିକ ଚକ୍ରବର୍ତ୍ତୀଙ୍କ ପାଇଁ ଖର୍ଚ୍ଚ କରାଯାଇଛି । ରିୟା ଏବଂ ସୌଭିକଙ୍କ ପାଇଁ ଏକାଧିକ ସମୟରେ ଟଙ୍କା ଖର୍ଚ୍ଚ କରାଯାଇଛି । ଏଥିପାଇଁ ଭ୍ରମଣରେ କେବଳ ୪୨ ଲକ୍ଷ, ମହାରାଷ୍ଟ୍ରର ଏକ ଫାର୍ମହାଉସରେ ୩୩ ଲକ୍ଷ ଏବଂ ବ୍ୟକ୍ତିଗତ ଭାବରେ ୧.୧ କୋଟି ଟଙ୍କା ଖର୍ଚ୍ଚ କରାଯାଇଛି । ତେବେ ଏହି ସମସ୍ତ ଖର୍ଚ୍ଚ ମଧ୍ୟରେ ରିୟା ଏବଂ ସୌଭିକଙ୍କ ଖର୍ଚ୍ଚ ମଧ୍ୟ ସାମିଲ ରହିଛି ।
ହଲିଉଡ ଅଭିନେତା ଚାଡଓ୍ୱିକ ବୋସମ୍ୟାନଙ୍କ ମୃତ୍ୟୁ
ନୂଆଦିଲ୍ଲୀ: ଅଭିନେତା ଚାଡଓ୍ୱିକ ବୋସମ୍ୟାନଙ୍କ ମୃତ୍ୟୁ ହୋଇଛି । ସେ ଦିର୍ଘଦିନ ଧରି କ୍ୟାନସରରେ ପିଡିତ ଥିଲେ । ମୃତ୍ୟୁ ବେଳକୁ ତାଙ୍କୁ ୪୩ ବର୍ଷ ହୋଇଥିଲା । ହଲିଉଡର ବହୁ ଚର୍ଚ୍ଚିତ ଫିଲ୍ମ ବ୍ଲାକ ପାନ୍ଥରରେ ଲିଡ ରୋଲରେ ଚମତ୍କାର ଅଭିନୟ କରିଥିଲେ । ଯାହାପରେ ଦର୍ଶକଙ୍କ ପ୍ରଥମ ପସଙ୍ଗ ହୋଇ ଯାଇଥିଲେ ସେ । ଏଥିସହ ମାରବେଲ ସିନେମାଟିକ ୟୁନିଭର୍ସ ସହ ଅନେକ ଗୁଡିଏ ଫିଲ୍ମରେ ମଧ୍ୟ ସେ ନଜର ଆସିଛନ୍ତି । ଚାଡଓ୍ୱିକ ବୋସମ୍ୟାନଙ୍କ ପରଲୋକ ପରେ ହଲିଉଡରେ ଶୋକାକୁଳ ପରିବେଶ ସୃଷ୍ଟି ହୋଇଛି ।
ସୂଚନାଯୋଗ୍ୟ ଲସଏଞ୍ଜେଲେସରେ ତାଙ୍କ ବାସଗୃହରେ ତାଙ୍କର ମୃତ୍ୟୁ ହୋଇଛି । ତେବେ ବୋସମେନଙ୍କ ହଠାତ ଏମିତି ଦୁନିଆ ଛାଡ଼ି ଯିବାଟା ତାଙ୍କ ପ୍ରଶଂସକଙ୍କୁ ଶକ୍ତ ଝଟକା ଦେଇଛି ।
ବନ୍ୟା ସ୍ଥିତି ନେଇ SRC ଓ ଜଳ ସମ୍ପଦ ବିଭାଗର ସମୀକ୍ଷା ଶେଷ, ହୀରାକୁଦରୁ ୪୬ଟି ଗେଟ୍ ଦେଇ ପ୍ରାୟ ୭.୦୫ ଲକ୍ଷ କ୍ୟୁସେକ ଜଳ ନିଷ୍କାସନ ହେଉଛି
ଭୁବନେଶ୍ୱର: ରାଜ୍ୟରେ ବନ୍ୟା ସ୍ଥିତିର ସମୀକ୍ଷା କରିଛନ୍ତି SRC ଓ ଜଳ ସମ୍ପଦ ବିଭାଗ । ମହାନଦୀର ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ଏବେ ୪୬ଟି ଗେଟ୍ ଖୋଲାଯାଇଛି । ବାମ ପାର୍ଶ୍ୱରେ ୩୧ଟି ଗେଟ୍ ଖୋଲାଯାଇଥିବା ବେଳେ ଡ଼ାହାଣ ପାର୍ଶ୍ୱରେ ୧୫ଟି ଗେଟ୍ ଦେଇ ବନ୍ୟା ଜଳ ନିଷ୍କାସନ ହେଉଛି୧ । ଜଳଭଣ୍ଡାର ମଧ୍ୟକୁ ପ୍ରତି ସେକେଣ୍ଡରେ ୮ଲକ୍ଷ ୮୦ ହଜାର କ୍ୟୁସେକ ଜଳ ପ୍ରବେଶ କରୁଥିବା ବେଳେ, ୪୬ଟି ଗେଟ ଦେଇ ପ୍ରାୟ ୭ ଦଶମିକ ୫ ଲକ୍ଷ କ୍ୟୁସେକ ଜଳ ନିଷ୍କାସନ ହେଉଛି । ଯେଉଁଥି ପାଇଁ ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, ନୟାଗଡ଼ ଓ କେନ୍ଦ୍ରାପଡ଼ା ପ୍ରଭାବିତ ହେବ ବନ୍ୟାଜଳ । କଟକ ମୁଣ୍ଡଳୀରେ ଆସନ୍ତାକାଲି ଭୋରରେ ବନ୍ୟାପାଣି ପହଞ୍ଚିବ । ମୁଣ୍ଡଳୀରେ ପ୍ରାୟ ୧୦ ଦଶମିକ ୫ ଲକ୍ଷ କ୍ୟୁସେକ ଜଳ ପ୍ରବାହିତ ହେବ ।
ସେପଟେ ସୁବର୍ଣ୍ଣରେଖା ଓ ବୁଢ଼ାବଳଙ୍ଗ ନଦୀ ବିପଦ ସଂକେତ ତଳେ ଅଛି । ବୈତରଣୀ ନଦୀ ଆନନ୍ଦପୁରରେ ବିପଦ ସଙ୍କେତ ତଳେ ପ୍ରବାହିତ ହେଉଛି । ସେହିପରି ଆଖୁଆପଦା ଠାରେ ବିପଦ ସଙ୍କେତରେ ଅଛି ବୈତରଣୀ । ବ୍ରାହ୍ମଣୀର ଉପରମୁଣ୍ଡ ଝାଡ଼ଖଣ୍ଡ, ପାନପୋଷ, ବାରକୋଟରେ ପ୍ରବଳ ବର୍ଷା ହୋଇଛି । ତେବେ ରେଙ୍ଗାଳି ଜଳଭଣ୍ଡାରରୁ ଖୋଲିଥିବା ୪ ଗେଟ ମଧ୍ୟରୁ ଏବେ ୨ଟି ଗେଟ ବନ୍ଦ କରାଯାଇଛି । ତେବେ ସନ୍ଧ୍ୟା ପରେ ବ୍ରାହ୍ମଣୀରେ ବନ୍ୟା ପରିସ୍ଥିତି ସୁଧୁରିଯିବ ବୋଲି କହିଛି ଜଳସମ୍ପଦ ବିଭାଗ । ବୈତରଣୀ ପାଇଁ ଯାଜପୁର ଜିଲ୍ଲାର ବରୀ, ଦଶରଥପୁର ବ୍ଲକ, ବିଞ୍ଝାରପୁର ସମେତ ଭଦ୍ରକ ଜିଲ୍ଲା ଭଣ୍ଡାରିପୋଖରୀ, ଧାମନଗର ବ୍ଲକରେ ବନ୍ୟା ହୋଇଛି ।
ୟୁଏଇରୁ ଅଚାନକ ଭାରତ ଫେରିଲେ CSKର ସୁରେଶ ରୈନା, ଚଳିତ ସିଜନରୁ ବାହାର
ନୂଆଦିଲ୍ଲୀ: ଆଇପିଏଲ ଖେଳିବା ପାଇଁ ୟୁଏଇ ପହଞ୍ଚିଥିବା ଚେନ୍ନାଇ ସୁପର କିଙ୍ଗର ସୁରେଶ ରୈନା ପାରିବାରିକ ସମସ୍ୟା କାରଣରୁ ଦେଶକୁ ଫେରି ଆସିଛନ୍ତି । ସେ ପୂରା ସିଜନରୁ ଏବେ ବାହାର ହୋଇ ସାରିଛନ୍ତି । CSKର ସିଇଓ ବିଶ୍ୱନାଥନ ସୋସିଆଲ ମିଡିଆରେ ଏହି ସୂଚନା ଦେଇଛନ୍ତି । ଏହା ସହିତ ତାଙ୍କ ପୂରା ଟିମ୍ ସୁରେଶଙ୍କ ପରିବାରକୁ ସମର୍ଥନ ଦେଉଥିବା ମଧ୍ୟ ସେ ଲେଖିଛନ୍ତି । କେବଳ ସେତିକି ନୁହେଁ ନିଜର ବ୍ୟକ୍ତିଗତ କାରଣରୁ ସୁରେଶ ଭାରତ ଫେରି ଆସିଥିବା କଥା ମଧ୍ୟ ସେ ଟ୍ୱିଟରରେ ଜଣାଇଛନ୍ତି ।ସୂଚନାଯୋଗ୍ୟ ଯେ, ଚଳିତ ବର୍ଷ ମାର୍ଚ୍ଚ ମାସରେ ଦ୍ୱିତୀୟ ଥର ପାଇଁ ପିତା ହୋଇଥିଲେ ସୁରେଶ। ପ୍ରିୟଙ୍କା ଏକ ପୂତ୍ର ସନ୍ତାନକୁ ଜନ୍ମ ଦେଇଥିଲେ । ଉଭୟ ପୁଅର ନାମ ରଖିଛନ୍ତି ରିୟୋ ।
ସଙ୍ଗରୋଧରେ ଅଛନ୍ତି ଚେନ୍ନାଇ ସୁପର କିଙ୍ଗସ୍
CSKର ସଦସ୍ୟଙ୍କୁ ଦୁବାଇରେ ପହଞ୍ଚିବା ପରେ କରୋନା ହୋଇଥିଲା । ଯେଉଁ କାରଣରୁ ପୂରା ଦଳକୁ ସଙ୍ଗରୋଧରେ ରଖାଯାଇଛି । ଖବର ଅନୁସାରେ ଦଳର ୧୧ ଜଣ କରୋନା ଦ୍ୱାରା ସଂକ୍ରମିତ ହୋଇଛନ୍ତି । ଯେଉଁଥିରେ ଜଣେ ଭାରତୀୟ ଖେଳାଳୀ ମଧ୍ୟ ସାମିଲ ଅଛନ୍ତି । ସୂଚନାଯୋଗ୍ୟ ଚେନ୍ନାଇ ଟିମ୍ ଚେପୁକରେ ୫ ଦିନ କ୍ୟାମ୍ପ କରିବା ପରେ ୨୧ ଅଗଷ୍ଟକୁ ଦୁବାଇରେ ପହଞ୍ଚିଥିଲେ ଏବଂ ୬ ଦିନ ସଙ୍ଗରୋଧରେ ରହିଥିଲେ । ସୁରେଶ ରୈନା ମଧ୍ୟ ୟୁଏଇରେ ପହଞ୍ଚିଥିଲେ । ସେ ଚେନ୍ନାଇରେ ହୋଇଥିବା କ୍ୟାମ୍ପରେ ମଧ୍ୟ ଥିଲେ । ଗୋଟିଏ ପକ୍ଷରେ ପୂରା ଟିମ ହୋଟେଲରେ ଥିବା ସମୟରେ ରୈନା ଦେଶକୁ ଫେରି ଆସିଲେ । ସୂଚନାଯୋଗ୍ୟ ଯେ, ସୁରେଶ ରୈନା ଅଗଷ୍ଟ ୧୫ ତାରିଖ ଦିନ ମହେନ୍ଦ୍ର ସିଂହ ଧୋନି କ୍ରିକେଟରୁ ଅବସର ଘୋଷଣା ପରେ ରୈନା ମଧ୍ୟ ଇଂଷ୍ଟାଗ୍ରାମରେ ପୋଷ୍ଟ କରି ଅନ୍ତଃରାଷ୍ଟ୍ରୀୟ କ୍ରିକେଟରୁ ସନ୍ୟାସ ନେଇଥିବା କଥା ଜଣାଇଥିଲେ ।