କଟକ: ତୁଟୁ ନାହିଁ କଟକ ଦୁର୍ଗା ପୂଜା ମୂର୍ତ୍ତିର ଉଚ୍ଚତା ବିବାଦ । ମୂର୍ତ୍ତିର ଉଚ୍ଚତାକୁ ନେଇ ରିପୋର୍ଟ ଦେଇଛନ୍ତି ପୋଲିସ କମିଶନର । କିଛି ପୂଜା କମିଟି କୋର୍ଟଙ୍କ ନିର୍ଦ୍ଦେଶକୁ ଅମାନ୍ୟ କରିଛନ୍ତି ବୋଲି ରିପୋର୍ଟରେ ଉଲ୍ଲେଖ କରାଯାଇଛି । ଡିସିପିଙ୍କ ଅନୁମତି ପାଇଁ ଆବେଦନ କରିଥିବା ସମସ୍ତ ମଣ୍ଡପରେ ମୂର୍ତ୍ତି ନିର୍ମାଣ ଅସମ୍ପୂର୍ଣ୍ଣ ରହିଛି । ସେପଟେ ମୂର୍ତ୍ତି ନିର୍ମାଣ ଓ ପରମ୍ପରା ସମ୍ପର୍କରେ ଭୁଲ ତଥ୍ୟ ପ୍ରଦାନ କରିଛନ୍ତି ୬ଟି କମିଟି । ସହରରେ ଥିବା ୧୬୨ ମଣ୍ଡପ ମଧ୍ୟରୁ ୧୪୨ଟି ମଣ୍ଡପରେ ମୂର୍ତ୍ତି ନିର୍ମାଣ ହୋଇନାହିଁ । ୯ଟି ମଣ୍ଡପ ମୂର୍ତ୍ତି ନିର୍ମାଣ କରିଛନ୍ତି । ସେମାନଙ୍କ ମଧ୍ୟରୁ ୭ ଟି ମଣ୍ଡପ ୫ ଫୁଟ ଓ ୨ ଟି ୮ଫୁଟ ଉଚ୍ଚତା ମୂର୍ତ୍ତି କରିଛନ୍ତି । ପୂଜା ମଣ୍ଡପକୁ ଅନୁମତି ପ୍ରଦାନ କରିବା ପାଇଁ ଆବେଦନ କରିଥିବା ରିପୋର୍ଟକୁ ପୋଲିସ କମିସନର ଗ୍ରହଣ କରିନାହାନ୍ତି । ସରକାରଙ୍କ ଗାଇଡ ଲାଇନ ଅନୁସାରେ ମୂର୍ତ୍ତି ୪ ଫୁଟ କରିବା ପାଇଁ ରିପୋର୍ଟରେ ଉଲ୍ଲେଖ କରାଯ଼ାଇଛି ।

ଭିଡ଼ ନ ଜମାଇ ମଣ୍ଡପରେ ହୋଇପାରିବ ଦୁର୍ଗା ପୂଜା: ଜିଲ୍ଲାପାଳ

ଭୁବନେଶ୍ୱର: କଂଗ୍ରେସ ବିଧାୟକ ସୁରେଶ ରାଉତରାୟ ଆଗାମୀ ବିଧାନସଭା ଅଧିବେଶନ ବର୍ଜନ କରିବେ । ଏନେଇ ସେ ବାଚସ୍ପତିଙ୍କୁ ଚିଠି ଲେଖିଛନ୍ତି । ତାଙ୍କ କହିବା କଥା, ୬୦ବର୍ଷରୁ ଅଧିକ ବୟସର ବିଧାୟକଙ୍କ ପାଇଁ କଟକଣା ଲାଗୁ ହୋଇଥିବାରୁ ସେ ବର୍ଜନ କରିବେ । ଏପଟେ ବିଧାନସଭା ପାଇଁ ବିରୋଧୀ ଓ ଶାସକ ସଜବାଜ ହେଉଛନ୍ତି, ସେପଟେ ବିଧାନସଭାର ନିଷ୍ପତ୍ତି ନବୁଝି ବାଚସ୍ପତିଙ୍କୁ ଚିଠି ଲେଖିଛନ୍ତି ସୁରେଶ ରାଉତରାୟ ।

ସୁରଙ୍କ ଅବୁଝା ଚିଠି  । ବିଧାନସଭା ବର୍ଜନ କରିବାକୁ ଚେତାବନୀ । ନିଷ୍ପତ୍ତି ନଜାଣି  ଉଠାଇଲେ ପ୍ରଶ୍ନ । ବାଚସ୍ପତି କହିଲେ ବିଧାୟକଙ୍କ ଉପରେ କଟକଣା ନାହିଁ  । କଂଗ୍ରେସ ବିଧାୟକ ସୁରେଶ କୁମାର ରାଉତରାୟ । ଜଟଣୀର ବିଧାୟକ । ବିଧାନସଭାରେ ବଡ଼ପାଟି କରୁଥିବା ଏହି ବିଧାୟକ ଏବେ ଅବୁଝା । କରୋନା ପାଇଁ ୬୦ବର୍ଷରୁ ଅଧିକ ବୟସର ବିଧାୟକଙ୍କ ପାଇଁ କଟକଣା ଲାଗୁ ହୋଇଥିବାରୁ ସୁର ଅସନ୍ତୋଷ ପ୍ରକାଶ କରିଛନ୍ତି । ସେପଟେ ସୁରଙ୍କ ଚିଠି ପାଇ ବାଚସ୍ପତି ସୂର୍ଯ୍ୟନାରାୟଣ ପାତ୍ର କହିଛନ୍ତି, ୬୦ବର୍ଷରୁ ଅଧିକ ବୟସର ବିଧାୟକ  ଯଦି ଚାହିଁବେ ତେବେ ଭିଡିଓ କନଫରେନ୍‌ସିଂ ଜରିଆରେ ବିଧାନସଭା ଅଧିବେଶନରେ ସାମିଲ ହୋଇପାରିବ । ହେଲେ ଏକଥା ଠିକ୍ ଭାବେ ବୁଝି ନାହାନ୍ତି ସୁର ରାଉତରାୟ ।

ସେପଟେ ଆସନ୍ତା ୨୯ତାରିଖରେ ବିଧାନସଭା ଅଧିବେଶନ ପୂର୍ବରୁ ୨୮ରେ  ବିଜେପି ବିଧାୟକ ଦଳ ବୈଠକ ବସିବ । ଦଳ କେଉଁ କେଉଁ ପ୍ରସଙ୍ଗ ଉଠାଇବ, ସେନେଇ ଆଲୋଚନା କରାଯିବ । ସେହିପରି ୨୬ କିମ୍ବା ୨୭ ତାରିଖରେ କଂଗ୍ରେସ ବିଧାୟକ ଦଳ ବୈଠକ ବସିବ ବୋଲି ବିଧାୟକ ତାରାପ୍ରସାଦ ବାହିନୀପତି କହିଛନ୍ତି । ନିୟମ ଅନୁସାରେ ବିଧାନସଭା ଚାଲିବ ବୋଲି ଶାସକ ବିଜେଡି କହିଛି  । ଆସନ୍ତା ୨୬ ତାରିଖରେ ସବୁ ବିଧାୟକଙ୍କର କରୋନା ଟେଷ୍ଟ କରାଯିବ । ଅଧିବେଶନ ପୂର୍ବରୁ ସର୍ବଦଳୀୟ ବୈଠକ ପାଇଁ ବିରୋଧୀ ଦାବି କରିଛନ୍ତି ।

ଭୁବନେଶ୍ୱର: ରାଜ୍ୟରେ କରୋନା ମୁକାବିଲାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲା ଅସ୍ଥାୟୀ ସ୍ୱାସ୍ଥ୍ୟକେନ୍ଦ୍ର – ଟିଏମ୍‌ସି। ପ୍ରାରମ୍ଭିକ ପର୍ଯ୍ୟାୟରେ ଟିମ୍‌ସି ହିଁ କରୋନା ସଂକ୍ରମଣକୁ ଦେଇଥିଲା ଚେକ୍ । କୋଭିଡ କେୟାର ହୋମ ବି କରୋନା ମୁକାବିଲାରେ ନେଇଥିଲା ବଳିଷ୍ଠ ଭୂମିକା । ଏବେ କିନ୍ତୁ ଆଉ ନାହାନ୍ତି ପ୍ରବାସୀ, ଫଳରେ ଖାଲି ପଡୁଛି ଅସ୍ଥାୟୀ ସ୍ୱାସ୍ଥ୍ୟକେନ୍ଦ୍ର । ଏଥିପାଇଁ ବ୍ୟବହାର ହେଉନଥିବା ଟିଏମ୍‌ସିକୁ ବନ୍ଦ କରିବା ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି ।

ବଢୁଛି ସୁସ୍ଥତା, କମୁଛି ସଂକ୍ରମଣ । ପ୍ରବାସୀ ଆସିବା କମିଲାଣି  । ଏବେ ପ୍ରାୟ ସବୁ ଟିଏମ୍‌ସି ଖାଁ ଖାଁ । ଏକଥା ଆମେ କହୁନୁ । ଏ ଚିତ୍ର ବଖାଣୁଛି ସ୍ଥିତି । ଭାତହାଣ୍ଡିରୁ ଗୋଟିଏ ଚିପିଲା ଭଳି ଗୋଟିଏ ଜିଲ୍ଲାର ସ୍ଥିତି ଉପରେ ଟିକେ ନଜର ପକାଇବା । ଏ ହେଉଛି ବାଲେଶ୍ବର ଜିଲ୍ଲା ଅସ୍ଥାୟୀ ସ୍ୱାସ୍ଥ୍ୟ କେନ୍ଦ୍ର ବା ଟିଏମସି । ଜିଲ୍ଲାର ୧୨ଟି ବ୍ଲକ ଓ ୪ଟି ପୌର ପରିଷଦରେ ମୋଟ ୧୦୧୭ଟି ଟିଏମସି ଖୋଲିଥିଲା । ଏବେ ବହାନାଗା, ବସ୍ତା, ବାଲିଆପାଳ, ଭୋଗରାଇ, ଖଇରା, ନୀଳଗିରି, ରେମୁଣା, ସିମୁଳିଆ ଓ ସୋର ବ୍ଲକ୍‌ର ୧୨୧୫ଟି ଟିଏମସିରେ ଜଣେ ହେଲେ ନାହାନ୍ତି ।

ଜିଲ୍ଲାକୁ ବିଭିନ୍ନ ଟିଏମ୍‌ସିରୁ ସୁସ୍ଥ ହୋଇ ଘରକୁ ଫେରିଛନ୍ତି ୭୧ ହଜାର ୧୨୦ ଜଣ । ଏବେ ପ୍ରବାସୀ ଆସିବା ବନ୍ଦ ହୋଇଥିବା ବେଳେ ଅଳ୍ପ ଲକ୍ଷଣ ଓ ଲକ୍ଷଣହୀନ ଲୋକ ହୋମ୍‌ କ୍ୱାରେଣ୍ଟାଇନ୍‌ରେ ରହିବାକୁ ପସନ୍ଦ କରୁଛନ୍ତି । କେବଳ ବାଲେଶ୍ୱର ନୁହେଁ, ଶିଳ୍ପନଗରୀ ରାଉରକେଲା ଓ ଗଞ୍ଜାମ ଜିଲ୍ଲାରେ ମଧ୍ୟ ଚିତ୍ର ସମାନ । ଗଞ୍ଜାମରେ ସଂକ୍ରମଣ ନିୟନ୍ତ୍ରଣକୁ ଆସିଥିବାରୁ ଅକାମୀ ହୋଇଗଲାଣି ଏହି ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର । ରାଉରକେଲାରେ ମଧ୍ୟ ୧୫ଟି କୋଭିଡ କେୟାର ହୋମ ମଧ୍ୟରୁ ୧୪ଟି ଓ ୬ଟି ଯାକ ଟିଏମ୍‌ସିକୁ ବନ୍ଦ କରାଯାଇଛି । ଗୋଟେପଟେ ପ୍ରବାସୀ ଆସିବା କମିଛି, ଅନ୍ୟପଟେ ବାହାରୁ ଆସୁଥିବା ଲୋକଙ୍କୁ ହୋମ୍‌ ଆଇସୋଲେସନ ଅନୁମତି ମିଳିଛି ।

କୋଭିଡ ସଂକ୍ରମଣର ପ୍ରାଥମିକ ପର୍ଯ୍ୟାୟରେ ସରକାର ୬ ଲକ୍ଷ ୩୬ ହଜାର ୬୯ ଶଯ୍ୟା ବିଶିଷ୍ଟ ୧୩ ହଜାର ୯୯୨ ଟିଏମ୍‌ସି ଏବଂ ୬୭ ହଜାର ୮୮୮ ଶଯ୍ୟାବିଶିଷ୍ଟ ୬, ୭୯୮ଟି କୋଭିଡ୍‌ କେୟାର ହୋମ୍‌ ପ୍ରତିଷ୍ଠା କରିଥିଲେ ।