ଯାଜପୁର: ଯାଜପୁର ଜିଲ୍ଲା ଧର୍ମଶାଳା ଥାନା ବାରବାଟୀ ପରିବା ହାଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ଭାରସାମ୍ୟ ହରାଇ ରାସ୍ତା କଡ଼ରେ ଥିବା ପରିବା ବଜାର ଉପରେ ମାଡ଼ିଗଲା ଟ୍ରକ । ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ୩ ଜଣ ଗୁରୁତର ଆହତ ହୋଇଛନ୍ତି । ଆହତଙ୍କୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଛି ।

ସୂଚନା ଅନୁଯାୟୀ, ଆଜି ସକାଳୁ ବାରବାଟି ପରିବା ହାଟରେ ବ୍ୟବସାୟୀ ମାନେ ପରିବା ବିକ୍ରି ପାଇଁ ବସିଥିଲେ । ସେହି ସମୟରେ ଏକ ଟ୍ରକ ଆଉ ଏକ ଟ୍ରକ୍ କୁ ଓଭରଟେକ୍ କରିବା ସମୟରେ ଭାରଶ୍ୟାମ ହରାଇ ହାଟ ଆଡକୁ ମାଡ଼ି ଯାଇଥିଲା । ଫଳରେ ଘଟଣାସ୍ଥଳରେ ଜଣେ ପରିବା ବ୍ୟବସାୟୀ ଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ୩ ଜଣ ଗୁରୁତର ଆହତ ହୋଇଥିବା ଜଣାପଡ଼ିଛି । ତେବେ ଦୁର୍ଘଟଣା ଘଟାଇଥିବା ଟ୍ରକ୍ ର ଡ୍ରାଇଭର୍ ସେଠାରୁ ଫେରାର ହୋଇଯାଇଥିବା ସୂଚନା ମିଳିଛି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ଦୁର୍ଘଟଣା ଘଟାଇଥିବା ଟ୍ରକ୍ କୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି।

ସାଲେପୁର: ଦେଶଦ୍ରୋହ ମାମଲାରେ ଜଣେ ଗିରଫ । ଗିରଫ କଲା ଉତ୍ତରପ୍ରଦେଶ ବାଗପତ ଜିଲ୍ଲା ସିଂହବାଲି ଥାନା ପୋଲିସ । ଗିରଫ ଅଭିଯୁକ୍ତ ଜଣକ କଟକ ସାଲେପୁର ଥାନା କୁଶମ୍ବୀ ଗାଁରେ ରହୁଥିଲେ । ତେବେ ଅଭିଯୁକ୍ତ ଜଣକ ହେଉଛି ସୟଦ ହସନ ଅହମ୍ମଦ । ୟୁପି ପୋଲିସ ଆଜି ସକାଳୁ ସୟଦ ହସନର ମେଡିକାଲ ଯାଞ୍ଚ କରି କଟକ ସିଜିଏମ କୋର୍ଟରେ ହାଜର କରାଇଛି ।

ସୂଚନା ଅନୁଯାୟୀ, ଫେସବୁକରୁ ଫୋନ ନମ୍ବର ସଂଗ୍ରହ କରି ଉତ୍ତର ପ୍ରଦେଶ ଜିଲ୍ଲାର ହିନ୍ଦୁ ବାହିନୀର ଅଧକ୍ଷ କୂଳଦୀପ ପାଞ୍ଚାଲଙ୍କୁ ଫୋନରେ  ଜୀବନରୁ ମାରିଦେବାକୁ ଧମକ ଦେବା ସହ ଭାରତ ମାତା ପ୍ରତି ଆପତ୍ତି ଜନକ ଶବ୍ଦ ପୋଷ୍ଟ କରିବା ଏବଂ ପ୍ରଧାନମନ୍ତ୍ରୀ ଓ ଉତ୍ତର ପ୍ରଦେଶର ମୂଖ୍ୟମନ୍ତ୍ରୀ ଯୋଗୀ ଅଦିତ୍ୟନାଥ ବିରୁଦ୍ଧରେ ଆପତ୍ତି ଜନକ ମନ୍ତବ୍ୟ ବାରମ୍ବାର ଦେବା ନେଇ ଉତ୍ତର ପ୍ରଦେଶ ପୋଲିସ ପାଖରେ ଅଭିଯୋଗ ହୋଇଥିଲେ । ହିନ୍ଦୁ ବହାନି ଅଧକ୍ଷ କୂଳଦୀପ ପାଞ୍ଚାଲ ଅଭିଯୋଗ କରିଥିଲେ । ଏହାକୁ ଆଧାର କରି ଉତ୍ତର ପ୍ରଦେଶ ପୋଲିସ ତାର ତଦନ୍ତ ଆରମ୍ଭ କରିଥିଲା । ଫୋନ କଲ ଟ୍ରେସିଂ କରି ସଂପୃକ୍ତ ଯୁବକକୁ  ସାଲେପୁର ଥାନା ସାହାଯ୍ୟରେ କୁସମ୍ଭି ଗାଁରୁ ଗିରଫ କରିଥିଲା ।  ଏନେଇ ଉତ୍ତର ପ୍ରଦେଶ ବାଗପଦ ଜିଲ୍ଲା ପୋଲିସର  ଥାନା କେଶ ନଂ ୨୦୧/୨୦ ରେ କେଶ ରୁଜ ହେବାସହ ଆଇପିସି ର ୧୨୪ ଏ, ୫୦୭, ୧୫୩ଏ ଓ ୫୦୪ ଦଫା ରେ ମାମଲା ରୁଜ କରିଛି ।