ନୂଆଦିଲ୍ଲୀ: ଭାରତୀୟ ବାୟୁସେନା ଆଜି ତାର ୮୮ ତମ ପ୍ରତିଷ୍ଠା ଦିବସ ପାଳନ କରୁଛି । ଗାଜିଆବାଦର ହିଣ୍ଡନ ଏୟାରବେସରେ ବାୟୁସେନା ନିଜର ଶକ୍ତି ପ୍ରଦର୍ଶନ କରିବ । ଚାଲିଛି ବାୟୁସୋନାର ପରେଡ କାର୍ଯ୍ୟକ୍ରମ । ବାୟୁସେନାର ମୁଖ୍ୟ ମାର୍ଶଲ ରାକେଶ କୁମାର ସିଂ ଭଦୋରିଆ ୮୮ ତମ ଭାରତୀୟ ବାୟୁସେନା ଦିବସ ପରେଡ କାର୍ଯ୍ୟକ୍ରମକୁ ତଦାରଖ କରୁଛନ୍ତି । ଏହି ସ୍ୱତନ୍ତ୍ର ଦିବସରେ ପ୍ରତିରକ୍ଷା ବିଭାଗର ମୁଖ୍ୟ ଜେନେରାଲ ବିପିନ ରାୱତ, ସେନା କର୍ମଚାରୀଙ୍କ ମୁଖ୍ୟ ଜେନେରାଲ ମନୋଜ ମୁକୁନ୍ଦ ନରଓ୍ୱଣେ ଏବଂ ଜଳ ସେନାର ମୁଖ୍ୟ ଆଡମିରାଲ କରମବିର ସିଂ ୮୮ ତମ ଭାରତୀୟ ବାୟୁସେନା ଦିବସ ଉତ୍ସବରେ ଯୋଗ ଦେଇଛନ୍ତି । ତେବେ ଏହି ସ୍ୱତନ୍ତ୍ର ଦିବସରେ ରାଫେଲକୁ ସାମିଲ କରାଯାଇଛି । ୧୯୩୨ ମସିହାରେ ସ୍ଥାପିତ ହୋଇଥିବା ଭାରତୀୟ ବାୟୁସେନା, ପାକିସ୍ତାନ ଏବଂ ଚୀନ୍ ବିରୋଧରେ ହୋଇଥିବା ଯୁଦ୍ଧଠାରୁ ଆରମ୍ଭ କରି ଏପର୍ଯ୍ୟନ୍ତ ନିଜର ଚମତ୍କାରିତାକୁ ପ୍ରମାଣ କରିଛି ।
୮ ଅକ୍ଟୋବର ୧୯୩୨ ରେ ପ୍ରତିଷ୍ଠା ହୋଇଥିଲା ବାୟୁସେନା, ସେବେଠାରୁ ଆଜି ପର୍ଯ୍ୟନ୍ତ ଏହି ଦିନକୁ ପ୍ରତିବର୍ଷ ବାୟୁସେନା ଭାବେ ପାଳନ କରାଯାଏ | ଭାରତୀୟ ବାୟୁସେନା ୧୯୩୩ ମସିହା ଏପ୍ରିଲ ୧ରେ ପ୍ରଥମ ଥର ପାଇଁ ନିଜର ସ୍ଥାପତ୍ୟକୁ ଜାହିର କରିଥିଲା । ବ୍ରିଟିଶ ସାମ୍ରାଜ୍ୟର ବାୟୁସେନାର ଏକକ ଭାବରେ ଭାରତୀୟ ବାୟୁସେନା ପ୍ରତିଷ୍ଠା କରାଯାଇଥିଲା । ଦ୍ୱିତୀୟ ବିଶ୍ୱଯୁଦ୍ଧ ସମୟରେ ‘ରୟାଲ୍’ ଶବ୍ଦକୁ ଭାରତୀୟ ବାୟୁସେନା ନାମରେ ଯୋଡା ଯାଇଥିଲା । କିନ୍ତୁ ସ୍ୱାଧୀନତାର ତିନି ବର୍ଷ ପରେ ୧୯୫୦ ମସିହାରେ ଏହାକୁ ହଟାଇ ଦିଆଯାଇଥିଲା । ସେବେଠାରୁ ଏହା ଭାରତୀୟ ବାୟୁସେନା ନାମରେ ନାମିତ ହୋଇଛି ।
୪ଟି ଯୁଦ୍ଧରେ ସାମିଲ ହୋଇଛି ଭାରତୀୟ ବାୟୁସେନା
ଦେଶରେ ସ୍ୱାଧୀନତା ପରଠାରୁ ଭାରତୀୟ ବାୟୁସେନା ୪ଟି ଯୁଦ୍ଧରେ ସାମିଲ ହୋଇସାରିଛି । ସେଥିମଧ୍ୟରୁ ତିନୋଟି ପାକିସ୍ତାନ ଏବଂ ଗୋଟିଏ ଚୀନ୍ ବିରୋଧରେ ରହିଛି । ଭାରତୀୟ ବାୟୁସେନାର ଅନ୍ୟାନ୍ୟ ପ୍ରମୁଖ କାର୍ଯ୍ୟରେ ଅପରେସନ୍ ବିଜୟ, ଅପରେସନ୍ ମେଘଦୁତ, ଅପରେସନ୍ କେକଟସ୍, ଅପରେସନ୍ ପୁମଲାଇ, ବାଲାକୋଟ ଏୟାର ଷ୍ଟ୍ରାଇକ୍ ଅନ୍ତର୍ଭୁକ୍ତ ଅଛି । ଏହା ବ୍ୟତୀତ ଜାତିସଂଘର ଶାନ୍ତି ରକ୍ଷା କାର୍ଯ୍ୟରେ ଭାରତୀୟ ବାୟୁସେନା ମଧ୍ୟ ସହଯୋଗ କରିଛି ।
