ଜୟପୁର: ରାଜସ୍ଥାନର କରୌଲିରେ ପୋଡ଼ି ମାରି ଦିଆଯାଇଥିବା ପୁଜାରୀଙ୍କ ଅନ୍ତିମ ସଂସ୍କାର କରିବା ପାଇଁ ମନା କରିଦେଇଛନ୍ତି ସମ୍ପର୍କୀୟ ଓ ପରିବାର ଲୋକ । ସେମାନଙ୍କ ଦାବି ପୁରଣ ନହେବା ଯାଏଁ ପୁଜାରୀ ବାବୁଲାଲଙ୍କ ଅନ୍ତିମ ସଂସ୍କାର କରାଯିବ ନାହିଁ ବୋଲି କହିଛନ୍ତି । ତେବେ ପୁଜାରୀଙ୍କୁ ପୋଡ଼ି ମାରିବା ଘଟଣାରେ ସମ୍ପୃକ୍ତ ସମସ୍ତ ଅଭିଯୁକ୍ତଙ୍କୁ ଗିରଫ କରିସାରିଛି ପୋଲିସ ।
ଏହାରି ମଧ୍ୟରେ ସ୍ଥାନୀୟ ପ୍ରଶାସନ ପକ୍ଷରୁ ପୁଜାରୀ ବାବୁଲାଲଙ୍କ ଅନ୍ତିମ ସଂସ୍କାର କରିବା ପାଇଁ ଅନୁରାେଧ କରାଯାଇଥିଲା । ହେଲେ ଏଥିରେ ରାଜି ହୋଇନଥିଲେ ପରିବାର ଲୋକ । କରୌଲି ଏସ୍ଡିଜେଏମ୍ ଓମ୍ ପ୍ରକାଶ ମିଣା କହିଛନ୍ତି, ପରିବାର ପକ୍ଷରୁ ଚତୁର୍ଥ ଦାବି ରଖାଯାଇଛି । ସିନିଅର ଅଫିସ୍ରଙ୍କ ଦ୍ୱାରା ସରକାରଙ୍କ ନିକଟରେ ପରିବାର ଲୋକଙ୍କ ଦାବି ରଖିବାକୁ ଚେଷ୍ଟା କରାଯାଉଛି । ହେଲେ ଏହାରି ଭିତରେ ଦୁଇ ଦିନ ହେଲା ପୁଜାରୀଙ୍କ ମୃତଦେହ ପଡ଼ି ରହିଛି ତେଣୁ ପରିବାର ଲୋକ ଶୀଘ୍ର ସତ୍କାର କରିଦିଅନ୍ତୁ ।
ନ୍ୟୁଜ୍ ଏଜେନ୍ସି ANI ଅନୁଯାୟୀ ପୁରୋହିତଙ୍କ ସମ୍ପର୍କୀୟ ଲଲିତ କହିଛନ୍ତି ଯେ, ଆମର ଦାବି ପୂରଣ ନହେବା ପର୍ଯ୍ୟନ୍ତ ଆମେ ଶବଦାହ କରିବୁ ନାହିଁ । ମୃତକଙ୍କ ପରିବାରକୁ ୫୦ ଲକ୍ଷ ଟଙ୍କା କ୍ଷତିପୂରଣ ଏବଂ ସରକାରୀ ଚାକିରି ଦେବାକୁ ଆମେ ଦାବି କରୁଛୁ । ସମସ୍ତ ଅଭିଯୁକ୍ତଙ୍କୁ ଗିରଫ କରାଯିବା ଉଚିତ ଏବଂ ଅଭିଯୁକ୍ତଙ୍କୁ ସମର୍ଥନ କରୁଥିବା ପୋଲିସ୍ ବିରୋଧରେ ମଧ୍ୟ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ ।
ସୂଚନାଯୋଗ୍ୟ, ରାଜସ୍ଥାନର କରୌଲିରେ ଜମି ବିବାଦକୁ ନେଇ ଦୁଇଦିନ ତଳେ ଜଣେ ମନ୍ଦିର ପୂଜକଙ୍କୁ ହତ୍ୟା କରାଯାଇଥିଲା । ଜମି ପାଇଁ ତାଙ୍କ ଉପରେ ପେଟ୍ରୋଲ ଢ଼ାଳି ଜିଅନ୍ତା ଜାଳିଦେଇଥିଲେ ଦୁର୍ବୃତ୍ତ । ଗୁରୁତର ଅବସ୍ଥାରେ ପୂଜାରୀଙ୍କୁ ଜୟପୁରର ଏକ ମେଡିକାଲରେ ଭର୍ତ୍ତି କରାଯାଇଥିଲା । ଯେଉଁଠି ଗୁରୁବାର ରାତିରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । ଏହି ହତ୍ୟାକାଣ୍ଡରେ ସମ୍ପୃକ୍ତ ମୁଖ୍ୟ ଅଭିଯୁକ୍ତ କୈଳାସ ମୀଣାଙ୍କୁ କରୌଲି ପୋଲିସ ଗିରଫ କରିସାରିଛି ।
