ଜାମ୍ମୁ କାଶ୍ମୀରରେ ପୁଣି ଏନକାଉଣ୍ଟର, ନିପାତ ହେଲେ ଆଉ ଦୁଇ ଆତଙ୍କୀ

କୁଲଗାମ: ଜାମ୍ମୁ କାଶ୍ମୀରରେ ପୁଣି ଏନକାଉଣ୍ଟର । ଚେତୁ ନାହାଁନ୍ତି ଆତଙ୍କବାଦୀ । ଜାମ୍ମୁ କାଶ୍ମୀର ପୁଣି ମୁହାଁମିହିଁ ହୋଇଛନ୍ତି ସୁରକ୍ଷାକର୍ମୀ ଓ ଆତଙ୍କବାଦୀ । କୁଲୁଗାମ ଜିଲ୍ଲା ଚିଙ୍ଗମ ଅଞ୍ଚଳରେ ସୁରକ୍ଷାବାହିନୀଙ୍କ ଗୁଳିରେ ୨ ଆତଙ୍କୀ ନିହତ ହୋଇଥିବା ସୂଚନା ମିଳିଛି । ଆହୁରି ୨ରୁ ୩ଆତଙ୍କୀ ଲୁଚିରହିଥିବା ବେଳେ ସୁରକ୍ଷାକର୍ମୀଙ୍କ ପକ୍ଷରୁ ସର୍ଚ୍ଚ ଅପରେସନ ଜାରି ରହିଛି ।

ସୂଚନା ଅନୁସାରେ ଶନିବାର ସକାଳୁ ସକାଳୁ ଚିଙ୍ଗମ ଅଞ୍ଚଳରେ ଆତଙ୍କୀ ଲୁଚିଥିବା ଗୁଇନ୍ଦା ସୂଚନା ମିଲିଥିଲା । ଖବର ପାଇ ସଙ୍ଗେସଙ୍ଗେ ପୋଲିସ ଓ ସୁରକ୍ଷା କର୍ମୀ ମିଳିତ ଭାବେ ପୂରା ଅଞ୍ଚଳକୁ ଘେରି ଥିଲେ । ତାପରେ ଆରମ୍ଭ ହୋଇଥିଲା କ୍ରସ ଫାୟାରିଂ । ସୁରକ୍ଷାକର୍ମୀ ଓ ଆତଙ୍କୀଙ୍କ ଗୁଳିବିନିମୟରେ ୨ ଆତଙ୍କୀ ନିପାତ ହୋଇଛନ୍ତି । ସେନାର ଜଣେ ଅଧିକରୀ କହିଛନ୍ତି ଯେ, ସର୍ଚ୍ଚ ଅପରେସନ ବେଳେ ଆତଙ୍କବାଦୀମାନେ ପ୍ରଥମେ ସୁରକ୍ଷା ବାହିନୀ ଉପରେ ଗୁଳି ଚଳାଇଥିଲେ ଏବଂ ପରେ ଉଭୟ ପକ୍ଷ ମଧ୍ୟରେ ଗୁଳି ବିନିମୟ ଆରମ୍ଭ ହୋଇଥିଲା। ଏହି ଏନକାଉଣ୍ଟରରେ ଦୁଇ ଜଣ ମାଓବାଦୀଙ୍କ ମୃତ୍ୟୁ ହୋଇଛି । ତେବେ ନିହତ ଆତଙ୍କବାଦୀଙ୍କ ସମ୍ପର୍କରେ ତଥ୍ୟ ନିଆଯାଉଛି ଏବଂ ଏହି ଆତଙ୍କବାଦୀମାନେ କେଉଁ ସଂଗଠନର ସେନେଇ ମଧ୍ୟ ତନାଘନା ଚାଲିଛି ।

ଆପଣଙ୍କୁ କହିରଖୁଛୁ ଯେ, ଏହା ପୂର୍ବରୁ ଗଲା ୭ତାରିଖରେ ଜମ୍ମୁ-କାଶ୍ମୀର ସୋପିଆଁରେ ମଧ୍ୟ ଏନକାଉଣ୍ଟର ହୋଇଥିଲା । ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିବା ଏହି ଏନକାଉଣ୍ଟରରେ ସୁରକ୍ଷାକର୍ମୀଙ୍କ ଗୁଳିରେ ୩ ଆତଙ୍କୀ ନିହତ ହୋଇଥିଲେ । ଏନେଇ ଜଣେ ସେନା ଅଧିକାରୀ କହିଥିଲେ ଯେ, ଆତଙ୍କବାଦୀଙ୍କ ଉପସ୍ଥିତି ନେଇ ଗୁଇନ୍ଦା ବିଭାଗର ସୂଚନା ପରେ ୬ ତାରିଖରୁ ହିଁ ଯୋଜନା କରାଯାଇଥିଲା ।