ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିଲେ ବିଜେଡି ଟିମ୍। ରାଷ୍ଟ୍ରପତିଙ୍କୁ ଭେଟିଲେ ବିଜେଡିର ୩ ଜଣିଆ ଟିମ୍। ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକଙ୍କ ନେତୃତ୍ବରେ ଭେଟିଛନ୍ତି ଟିମ୍। ରାଜ୍ୟରେ ମହିଳାଙ୍କ ପ୍ରତି ବଢୁଥିବା ନିର୍ଯାତନା ଘଟଣାକୁ ନେଇ ବିଜେଡି ଟିମ ରାଷ୍ଟ୍ରପତିଙ୍କ ନିକଟରେ ଫେରାଦ ହୋଇଛନ୍ତି। ଏଥିସହ ଫକୀର ମୋହନ କଲେଜ ଛାତ୍ରୀଙ୍କ ଆତ୍ମାହୁତି ଘଟଣାରେ ରାଜ୍ୟ ସରକାରଙ୍କ ନିଷ୍କ୍ରିୟତାର ପ୍ରମାଣ ଦେଇଛନ୍ତି। ରାଜ୍ୟର ଆଇନଶୃଙ୍ଖଳା ପରିସ୍ଥିତିକୁ ନେଇ ରାଷ୍ଟ୍ରପତିଙ୍କ ହସ୍ତକ୍ଷେପ ଲୋଡିଛନ୍ତି ବିଜେଡି ଟିମ୍।
କମୁନି ହଇଜାର ଭୟାବହତା: ବିପର୍ଯ୍ୟସ୍ତ ସ୍ବାସ୍ଥ୍ୟସେବା ସାଙ୍ଗକୁ ରିପୋର୍ଟ ବଢ଼ାଇଲା ଚିନ୍ତା
ଭୁବନେଶ୍ବର: କମୁନି ହଇଜାର ଭୟାବହତା । କଲେରାରେ ଲୋକଙ୍କ ଜୀବନ ଗଲା । କଣାସକୁ ପୁଣି କଡ଼ ଲେଉଟେଇଲା ହଇଜା । ରାଜ୍ୟର ବିପର୍ଯ୍ୟସ୍ତ ସ୍ବାସ୍ଥ୍ୟ ବ୍ୟବସ୍ଥାକୁ ଆହୁରି ଅଡ଼ୁଆ ସାଜିଛି ଜୁଲାଇ ପ୍ରଥମ ସପ୍ତାହର ରିପୋର୍ଟ । ଜୁଲାଇ ଏକରୁ ୭ ଭିତରେ ରାଜ୍ୟରେ ବିଭିନ୍ନ ଜିଲ୍ଲାରେ ଭିନ୍ନ ଭିନ୍ନ ରୋଗ କାୟାବିସ୍ତାର କଲାଣି । ଏହି ୭ ଦିନରେ ୬ ଚିକେନ ପକ୍ସ, ୫୦୭ ଡେଙ୍ଗୁ, ଗୋଟିଏ ଡିପଥେରିଆ, ୮ଟି ଲେପ୍ଟୋସ୍ପାଇରାସିସ୍, ୬ ମିଳିମିଳା, ଦୁଇ ମେନିଙ୍ଗିଟାଇସ୍ ଓ ୮୯୦ ଟାଇଫଏଡ୍ ରୋଗୀ ଚିହ୍ନଟ ହୋଇଛନ୍ତି । ସେପଟେ ବର୍ଷା ସହ ମଶା ବଂଶ ବୃଦ୍ଧି ବି ହେଲାଣି । ୬୨୦୦ ମ୍ୟାଲେରିଆ ରୋଗୀ ଥିବା ବି ରିପୋର୍ଟ ହୋଇଛି । ବିଲକୁ ବିପଦ ଆହୁରି ବଢିଲାଣି । କାରଣ ୭ ଦିନରେ ୯୦ ଜଣ ସ୍କ୍ରବ ଟାଇଫସ୍ ରୋଗୀ ବି ଚିହ୍ନଟ ହୋଇଛନ୍ତି । ବାକି ୭୪ ଜଣ ଅଚିହ୍ନା ରୋଗରେ ପୀଡ଼ିତ ଥିବାରୁ ସେମାନଙ୍କ କାରଣ ଖୋଜୁଛି ସ୍ବାସ୍ଥ୍ୟ ବିଭାଗ । ୭ ଦିନରେ ବିପଦ ଟଳିବା ବଦଳରେ ବଢୁଛି । ଏହା ସମୟରେ ଡାଇରିଆ ରୋଗୀଙ୍କ ସଂଖ୍ୟା ୧୧ ହଜାର ୧୮୦ରେ ପହଞ୍ଚିଥିଲା । ଏଥିପାଇଁ କଟକ, ପୁରୀ ଓ ମୟୂରଭଞ୍ଜ ଜିଲ୍ଲାକୁ ଆଲର୍ଟରେ ରଖାଯାଇଛି । ଯାଜପୁରରେ ବି ସଂଖ୍ୟା କମୁନି ।
ଜୁଲାଇ ଆରମ୍ଭରୁ ହିଁ ଘର ଘରେ ଥଣ୍ଡା ଜ୍ବର କାଶ କମିବାର ନାଁ ନେଉନି । ପିଲାମାନଙ୍କ ଭିତରେ ବର୍ଷା ଦିନିଆ ରୋଗ ଦାନା ବାନ୍ଧିଛି । ୪୮୧୭ ଜଣ ୫ ବର୍ଷରୁ କମ୍ ପିଲାଙ୍କୁ ୭ ଦିନରୁ କମ୍ ଦିନ ଧରି ଜ୍ବର ଥିବାବେଳେ ୩୦ ହଜାର ୮୫୫ ଜଣଙ୍କୁ ୭ ଦିନ ହେବ ଜ୍ବର ଛାଡ଼ିନି । ସେହପରି ଗତ ଦୁଇ ସପ୍ତାହରୁ ୧୩୧୪ ପିଲାଙ୍କୁ କାଶ ସହ ଜ୍ବର ଲାଗି ରହିଥିବାବେଳେ ୨୬୪୭ ଜଣଙ୍କ କାଶ ବନ୍ଦ ହେଉନି । ୧୫୮୪ ଜଣ ପିଲାଙ୍କ ଝାଡ଼ା ଲାଗି ରହିଥିଲା । ଦିନେ ଦୁଇ ଦିନ ଭିତରେ ଜୁଲାଇ ଦ୍ବିତୀୟ ସପ୍ତାହର ସ୍ବାସ୍ଥ୍ୟ ରିପୋର୍ଟ ଆସିପାରେ । ବର୍ଷା ବଢିବା ସହ ସଂକ୍ରମଣ ବଢୁଛି । ହେଲେ କୋଭିଡ ପରେ ପ୍ରତିଷେଧକ ଶକ୍ତି କମି ଯାଇଥିବାରୁ, ଲୋକଙ୍କ ଭିତରେ ଆଶଂକା ବଢିବାରେ ଲାଗିଛି ।
ଗାଁରୁ ସହର ଝାଡ଼ାବାନ୍ତି ବ୍ୟାପିବା ପରେ ଏବେ ଶିକ୍ଷାନୁଷ୍ଠାନ ବି ଏଥିରୁ ବାଦ ପଡିନି
ଭୁବନେଶ୍ବର: ରାଜ୍ୟରେ ମାଡି ଚାଲିଛି ଝାଡ଼ାବାନ୍ତି। ଗାଁରୁ ସହର ବ୍ୟାପିବା ପରେ ଏବେ ଶିକ୍ଷାନୁଷ୍ଠାନ ବି ଏଥିରୁ ବାଦ ପଡିନି। ଯାହାକୁ ନେଇ ସରକାରଙ୍କୁ ସିଧାସଳଖ ଟାର୍ଗେଟ କରିଛନ୍ତି ବିରୋଧୀ। ପଞ୍ଚଦଶ ଅର୍ଥ କମିଶନ ଅର୍ଥ ଦେଲା, ଜଳ ଜୀବନ ମିଶନରେ ଅର୍ଥ ଆସିଲା। ତେଣୁ ସବୁ ପରିବାର ଟ୍ୟାପ ଜଳ ପାଇବା କଥା।କିନ୍ତୁ ବର୍ଷେରୁ ଅଧିକ ସମୟ ସରକାରଙ୍କୁ ବିତିଲା ହେଲେ ଲୋକେ ବିଶୁଦ୍ଧ ପାଣି ଟିକିଏ ପାଇଲେନି। ଜଳ ଜୀବନ ମିଶନ କରୁଛି କଣ ବୋଲି ପ୍ରଶ୍ନ କରିଛନ୍ତି। ରାଜ୍ୟ ସରକାର ଏଥିଲାଗି ଯୋଜନା କରିବା ଦରକାର। କଣାସ ପ୍ରସଙ୍ଗରୁ କିଛି ଶିଖିଲେନି ସରକାର। ସଚେତନତା କି ଜଳ ଯୋଗାଣ ଦୃଷ୍ଟିରୁ କେଉଁଥିରେ ବି ସଫଳ ହେଲେନି। ଯାହା ଫଳରେ ଲୋକେ ମଲେ। ଯେତେ ଲୋକଙ୍କ ମୃତ୍ୟୁ ହେବ ସେଥିଲାଗି ସରକାର ଦାୟୀ ରହିବେ। ଏତେ ସବୁ ପରେ ବି ସରକାରଙ୍କ ନିଦ ଭାଙ୍ଗୁନି ବୋଲି ଅଭିଯୋଗ ହୋଇଛି ।
ସେପଟେ କେବଳ ଦୂଷିତ ଜଳ ନୁହେଁ ଖାଦ୍ୟ ଯୋଗୁଁ ମଧ୍ୟ ରାଜ୍ୟରେ ହଇଜା ବ୍ୟାପୁଛି। ଅର୍ଥ ଲାଳସାରେ ସରକାର ମନଇଚ୍ଛା ଫୁଡ଼ ଲାଇସେନ୍ସ ଦେଉଛନ୍ତି। ଏଥିପାଇଁ ସରକାର ହିଁ ଦାୟୀ ବୋଲି ଅଭିଯୋଗ ଆଣିଛି ବ୍ୟବସାୟୀ ମହାସଂଘ। ଯେଉଁ ଅଧିକାରୀ ଲାଇସେନ୍ସ ଦେଉଛନ୍ତି ସେମାନେ କରୁଛନ୍ତି କଣ ବୋଲି ପ୍ରଶ୍ନ କରିଛି ମହାସଂଘ। କେବଳ ସରକାର ଟଙ୍କା ଆଦାୟରେ ମାତିଛନ୍ତି। ଖାଦ୍ୟପେୟର ମାନ ଯାଞ୍ଚ ହେଉନି। ସବୁକ୍ଷେତ୍ରରେ ରାଜ୍ୟର ଛାତ୍ରଛାତ୍ରୀ ଓ ସାଧାରଣ ଜନତା ଅସୁରକ୍ଷିତ ଥିବା ଅଭିଯୋଗ ଆଣିଛି ନାଗରିକ ସୁରକ୍ଷା ମଞ୍ଚ। କେତେବେଳେ ଯୌନ ଶୋଷଣ ତ ଆଉ କେତେବେଳେ ଦୁଷ୍କର୍ମ ଭଳି ଘଟଣା ଘଟୁଛି। ସରକାର ଉପରେ ଭରସା ନକରି ନିଜ ସୁରକ୍ଷା ନିଜେ ନିଅ ବୋଲି କହିଛି ମଞ୍ଚ। ସରକାରକୁ ଯେତେ ଶୀଘ୍ର ସମ୍ଭବ କ୍ଷମତାରୁ କାଢ଼ିବା ଆବଶ୍ୟକ । ହଇଜା ଶବ୍ଦ ଅନେକ ଦଶନ୍ଧୀ ଧରି ଲୋପ ପାଇଥିବାବେଳେ ଏବେ ରାଜ୍ୟବ୍ୟାପି ସବୁଆଡେ ହଇଜା ବ୍ୟାପିବା ସହ ଲୋକଙ୍କ ଜୀବନ ନେବା ସମସ୍ତଙ୍କୁ ଚିନ୍ତାରେ ପକାଇଛି ।
ବାଲେଶ୍ବର ଛାତ୍ରୀ ଆତ୍ମାହୁତି ଉଦ୍ୟମ ଘଟଣା: ଛାତ୍ରୀଙ୍କ ଆଶୁ ଆରୋଗ୍ୟ କାମନା କରି ଦୀପଦାନ କଲା ବିଜେଡି
ଭୁବନେଶ୍ବର: ଛାତ୍ରୀ ଆତ୍ମାହୁତି ଉଦ୍ୟମ ଘଟଣା । ଛାତ୍ରୀଙ୍କ ଆଶୁ ଆରଗ୍ୟ କାମନା କରି ଦୀପଦାନ କଲା ବିଜେଡି । କାର୍ଯ୍ୟକ୍ରମରେ ବିଜେଡି ବହୁ ବରିଷ୍ଠ ନେତା ସାମିଲ ହୋଇଛନ୍ତି । ରାମ ମନ୍ଦିରରେ ଦୀପଦାନ କରିଛନ୍ତି ବିଜେଡି ନେତା ।
ବିଜେପି ସରକାରରେ ବଢିଛି ନାରୀ ନିର୍ଯାତନା: ଅସୁରକ୍ଷିତ ଜନତା, ବଢୁଛି ଜନ ଅସନ୍ତୋଷ
ଭୁବନେଶ୍ବର: ତେର ମାସରେ ବିଜେପି ସରକାର । ବଢିଛି ନାରୀ ନିର୍ଯାତନା, ଅସୁରକ୍ଷିତ ଜନତା । ନ୍ୟାୟରୁ ବଂଚିତ ଚାଷୀ, ଦଳିତ, ଆଦିବାସୀ ଓ ପଛୁଆ ବର୍ଗ । ବଢୁଛି ଜନ ଅସନ୍ତୋଷ ରାସ୍ତାରେ ବିରୋଧୀଙ୍କ ଗର୍ଜନ । ଏମିତି କୋଉ ଦିନ ନାହିଁ ଯେଉଁଦିନ ନାରୀ ନିର୍ଯାତନାର ଖବର ପଦାକୁ ଆସିନାହିଁ । ଗତ ୧୩ ମାସ ମଧ୍ୟରେ ଶାନ୍ତିପ୍ରିୟ ଓଡିଶାରେ ଅଶାନ୍ତିର ବାତାବରଣ । ଆଇନ ଶୃଙ୍ଖଳା ବିପର୍ଯ୍ୟସ୍ତ । ଅସୁରକ୍ଷିତ ଶିଶୁ ଓ ମହିଳା । ଶାସନ ବ୍ୟବସ୍ଥା ଢିଲା ଯୋଗୁଁ ରାଜ୍ୟରେ ବଢିବଢି ଚାଲିଛି ଅରାଜକତା । ବିଜେପି ସରକାର ଆସିବା ପରେ ରାଜ୍ୟପାଳଙ୍କ ପୁଅ ସରକାରୀ ଅଧିକାରୀଙ୍କୁ ମାଡ ମାରିବା ଠାରୁ ଆରମ୍ଭ କରି ବାଲେଶ୍ବର ଏଫଏମ କଲେଜ ଛାତ୍ରୀ ନ୍ୟାୟ ପାଇଁ ଦେହରେ ନିଆଁ ଲଗାଇ ଆତ୍ମାହୁତି ଦେବା ଘଟଣା ଓଡିଶା ଶାସନ ବ୍ୟବସ୍ଥା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି ।
ଏପରି ସ୍ଥିତିରେ ମହାମହିମ ରାଷ୍ଟ୍ରପତିଙ୍କ ହସ୍ତକ୍ଷେପ ଦାବି କରିଛି ବିଜେଡି । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ଅଭିଯୋଗ କରିଛନ୍ତି ମୁଖ୍ୟମନ୍ତ୍ରୀଙ୍କ କଥା କେହି ଶୁଣୁନାହାନ୍ତି । ଦିନକୁ ୧୫ଜଣ ମହିଳା ବଳାତ୍କାରର ଶିକାର ହେଉଛନ୍ତି । ବାଲେଶ୍ବର ପୀଡି଼ତା ସମସ୍ତଙ୍କୁ ଗୁହାରୀ କରିବା ପରେ ବି ନ୍ୟାୟ ମିଳିଲାନି । ସରକାରରେ ଶାସନ ବ୍ୟବସ୍ଥା କେତେ ଫଳପ୍ରଦ ତାହା ଏହି କେସରୁ ଜଣାପଡିଯାଇଛି । ବଡ ଠାକୁର ପଡିଯିବା ସହ ବିଭିନ୍ନ ଘଟଣାରେ ସରକାର ତଦନ୍ତ ରିପୋର୍ଟ କୁଆଡେ ଗଲା ବୋଲି ପ୍ରମିଳା ପ୍ରଶ୍ନ କରିଛନ୍ତି । ସେହିପରି ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି ଯେ ଓଡିଶାରେ ସରକାର ଅଛି ବୋଲି କେହି ଅନୁଭବ କରିପାରୁନାହାନ୍ତି ।
ବିଜେପି ସରକାର ଗଠନରେ ରାଜ୍ୟପାଳ ପୁଅ ଏଏସଓଙ୍କୁ ମାଡ ମାରିବା, ମାଣ୍ଡିପଙ୍କା ଗାଁରେ ଖାଦ୍ୟ ନପାଇ ଲୋକେ ଆମ୍ବ ଟାକୁଆ ଖାଇବା, ଧରାକୋଟରେ ଦଳିତଙ୍କ ବ୍ୟକ୍ତିଙ୍କୁ ନର୍ଦ୍ଦମା ପାଣି ପିଆଇ ରାସ୍ତାରେ ଆଣ୍ଠେଇ ଚଲାଇବା, ରାୟଗଡାରେ ପ୍ରେମୀ ଯୁଗଳଙ୍କୁ ବିଲରେ ହଳ କରାଇବା, ବିଏମସି ଅଫିସରେ ପଶି ସରକାରୀ ଅଧିକାରୀଙ୍କୁ ମାଡ ମାରିବା, ବିରୋଧୀ ନେତ୍ରୀଙ୍କୁ ବିଜେପି ବିଧାୟକ ଦେହଜୀବୀ କହିବା ପରି ବହୁ ପ୍ରସଙ୍ଗ ଓଡିଶାକୁ ଭାରତବର୍ଷରେ ଲଜ୍ଜିତ କରିଛି । ଏ ସବୁ ପ୍ରସଙ୍ଗରେ ବିଜେଡି ସରକାରଙ୍କୁ ଘେରିଛି । ନବୀନଙ୍କ ଶାସନରେ ଲୋକେ ଶାନ୍ତିରେ ଥିଲେ ।
ବିଜେପି ଯଦି ଶାସନ ବ୍ୟବସ୍ଥା ସମ୍ଭାଳି ପାରୁନି ଓ ଲୋକଙ୍କ ନ୍ୟାୟ ଦେଇପାରୁନି ତେବେ ଗାଦି ଛାଡନ୍ତୁ ବୋଲି କହିଛନ୍ତି ବିଜେଡି ବିଧାୟକ ପ୍ରଦୀପ ଦିଶାରୀ । ସେପଟେ ନବ ନିର୍ମାଣ କୃଷକ ସଂଘ ମଧ୍ୟ ୧୩ ମାସରେ ବିଜେପି ସରକାର ବର୍ଷ ଏକ ଉପଲବ୍ଧି ଅନେକ ପ୍ରଚାରକୁ କଟାକ୍ଷ କରିଛି । ବିଜେପିର ଉପଲବ୍ଧି କଣ ତାହା ଲୋକେ ଦେଖୁଛନ୍ତି ବୋଲି ନବ ନିର୍ମାଣ କୃଷକ ସଂଘ କହିଛି । ରାଜନୈତିକ ସମୀକ୍ଷକ କହିଛନ୍ତି ୧୩ମାସରେ ଅଧାଗଢା ସରକାର ରହିଛି । ମନ୍ତ୍ରିମଣ୍ଡଳରେ ୬ ମନ୍ତ୍ରୀପଦ ଖାଲିପଡିଥିବା ବେଳେ ଏଯାଏ ନିଗମ ବଣ୍ଟନ ବି କରିପାରୁନାହାନ୍ତି ସରକାର । ଦିଲ୍ଲୀରୁ ଫେରିବା ଦିନ ରାଜ୍ୟ ବିଜେପି ସଭାପତି ମନମୋହନ ସାମଲ କହିଥିଲେ ଠିକ ସମୟରେ ମନ୍ତ୍ରିମଣ୍ଡଳ ଓ ନିଗମ କଥା ଆଲୋଚନା କରାଯାଇ ନିଷ୍ପତ୍ତି ନିଆଯିବ । ୧୩ମାସ ପରେ ବିଜେପି ସରକାର ଲୋକଙ୍କ ଆଶା ଆକାଂକ୍ଷା ପୂରଣ କରିବାରେ ବିଫଳ ହୋଇଛି । ବଦଳରେ ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି ଦେବା ସହ ଚାଷୀ ଓ ଗରିବଗୁରୁବାଙ୍କ ପ୍ରତି ସରକାର ଆଖି ବୁଜିଦେଇଥିବା ଅଭିଯୋଗ କରିଛନ୍ତି ବିରୋଧୀ ।
ବୋଲବମ ଧ୍ବନିରେ କମ୍ପିଲା ଶୈବପୀଠ: ଶ୍ରାବଣର ପ୍ରଥମ ସୋମବାର ଦିନ ଜଳଲାଗି କଲେ କାଉଡ଼ିଆ
ବୋଲବମ ଧ୍ବନିରେ କମ୍ପିଲା ଶୈବପୀଠ । ଶ୍ରାବଣର ପ୍ରଥମ ସୋମବାର ଦିନ ଜଳଲାଗି କଲେ କାଉଡ଼ିଆ । ଏଥିପାଇଁ ଶିବମୟ ହୋଇଛି ଶ୍ରୀକ୍ଷେତ୍ର । ଶ୍ରୀଜଗନ୍ନାଥଙ୍କ ଭଣ୍ଡାର ରକ୍ଷକ ପୁରୀର ବାବା ଲୋକନାଥଙ୍କ ପୀଠର ଜଳଲାଗି କରିଛନ୍ତି ହଜାର ହଚାର କାଉଡ଼ିଆ । ମାନସିକ ରଖି ଦୂର ଦୂରାନ୍ତରୁ ଛୁଟି ଆସିଥିଲେ କାଉଡ଼ିଆ । କାନ୍ଧରେ ବାହୁଙ୍ଗୀ ଧରି ରାତିରୁ ମନ୍ଦିର ପରିସରରେ ଲଗାଇଥିଲେ ଲମ୍ବା ଧାଡ଼ି । ବର୍ଷସାରା ଯିଏ ଜଳରେ ବୁଡି ରହିଥାନ୍ତି, ସେହି ଲୋକନାଥ ବାବାଙ୍କ ପୀଠରେ ଜଳଲାଗି କରି ଆନନ୍ଦିତ ହୋଇଛନ୍ତି ଶ୍ରଦ୍ଧାଳୁ ।
ଜଳଲାଗି ପାଇଁ ରବିବାର ଅପରାହ୍ନରୁ ଆରମ୍ଭ ହୋଇଥିଲା ଟିକେଟ ବିକ୍ରି । ରାତି ୧୨ଟା ୧୫ ରୁ ମଙ୍ଗଳ ଆଳତି ସରିବା ପରେ ମଇଲମ ଅବକାଶ ହୋଇ ରାତି ୧୨ଟା ୩୦ରୁ ଆରମ୍ଭ ହୋଇଥିଲା ଜଳଲାଗି । ମନ୍ଦିର ପରିସର ଟିକେଟ କାଉଣ୍ଟରରୁ ୩0 ଟଙ୍କାର ଟିକେଟ ନେଇ ଧାଡ଼ିବାନ୍ଧି ଯାଇଥିଲେ କାଉଡ଼ିଆ । ବ୍ୟାରିକେଡରେ ଯାଇ ରୋଷଘର ପଛପାର୍ଶ୍ଵ ପଟୁ ମନ୍ଦିର ପ୍ରବେଶ କରିବା ସହ ଲକ୍ଷ୍ମୀ ଦ୍ୱାର ନିକଟରେ ଜଳଲାଗି କରି ଫେରିଥିଲେ । ସୁରକ୍ଷା ବ୍ୟବସ୍ଥା ସହ ପ୍ରାୟ ୨ ହଜାର କାଉଡ଼ିଆଙ୍କ ପାଇଁ ଅସ୍ଥାୟୀ ସେଡ, ପାନୀୟ ଜଳ ଆଦି ବ୍ୟବସ୍ଥା କରିଥିଲା ପ୍ରଶାସନ । ଆସନ୍ତା ସୋମବାରରେ ଆହୁରି ଭିଡ଼ ହେବା ସମ୍ଭବାନ ଥିବାରୁ ପ୍ରଶାସନ ପକ୍ଷରୁ ସ୍ବତନ୍ତ୍ର ବ୍ୟବସ୍ଥା କରାଯାଇଛି ।
ଚାଷୀଙ୍କୁ ଘାରିଛି ସାର ଚିନ୍ତା: ସରକାରୀ କେନ୍ଦ୍ରରେ ମିଳୁନି ସାର
ଚାଷୀଙ୍କୁ ଘାରିଛି ସାର ଚିନ୍ତା । ସରକାରୀ କେନ୍ଦ୍ରରେ ମିଳୁନି ସାର । ତଳି ପକାଇ ଚାହିଁ ବସିଛନ୍ତି ଚାଷୀକୂଳ । ମାତିଛନ୍ତି ସାର କରବଜାରୀ । ଜିଲ୍ଲା କୃଷି ଅଧିକାରୀଙ୍କୁ ଘେରିଲେ ଚାଷୀ । ଚଳିତ ବର୍ଷ ବର୍ଷା ଭଲ ହୋଇଥିବାରୁ ଚାଷୀ ମୁହଁରେ ହସ ଫୁଟିଛି । କାହାର ତଳି ସଂଗ୍ରହ ଚାଲିଥିବାବେଳେ କିଏ ବିଲରେ ତଳି ରୋଇବା ଆରମ୍ଭ କଲେଣି । ହେଲେ ସାର ନ ମିଳିବାରୁ ପଡିଛି ଚଡ଼କ । ପ୍ରତିବାଦରେ ସମ୍ବଲପୁର ଜିଲ୍ଲା କୃଷି ଅଧିକାରୀଙ୍କୁ ଘେରାଉ କରିଥିଲେ ଚାଷୀ । ବାହାର ଦୋକାନରେ ସାର ମିଳୁଥିବାବେଳେ ସରକାରୀ କେନ୍ଦ୍ରକୁ କାହିଁକି ଆସିନି ବୋଲି ପ୍ରଶ୍ନ କରିଛନ୍ତି । ଅଧିକ ଲାଭ ପାଇବା ଆଶାରେ ସାର ବାଟମାରଣ କରାଯାଉଥିବା ଅଭିଯୋଗ କରିଛି ଚାଷୀ ସଂଗଠନ ।
ଜିଲ୍ଲାରେ ୨୪ହଜାର ମେଟ୍ରିକ ଟନ ୟୁରିଆ ସାର ଆବଶ୍ୟକ ରହିଥିବାବେଳେ ଏ ପର୍ଯ୍ୟନ୍ତ କେବଳ ୧୧ ହଜାର ମେଟ୍ରିକ ଟନ ଆସିଛି । ସେପଟେ ଜିଲ୍ଲାରେ DAP ସାର ୧୧ ହଜାର ମେଟ୍ରିକ ଟନ ଆବଶ୍ୟକ ରହିଥିବାବେଳେ ଆସିଛି ମାତ୍ର ୩୫୮୨ ମେଟ୍ରିକ ଟନ । ସାର ମିଳୁ ନଥିବାରୁ ଚାଲିଛି କଳାବଜାରୀ । ଚାଷୀଙ୍କ ଆବଶ୍ଯକତାକୁ ଦେଖି ଚଢା ଦରରେ ବିକ୍ରି କରୁଛନ୍ତି ଦୋକାନୀ । ସେପଟେ କିପରି ଚାଷୀ ସାର ପାଇ ପାରିବେ ସେନେଇ ଦୃଷ୍ଟି ଦେବାକୁ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି ଜିଲ୍ଲା ମୁଖ୍ୟ କୃଷି ଅଧିକାରୀ ।
ଲଗାଣ ବର୍ଷାରେ ଉବୁଟୁବୁ ରାଉରକେଲା: ରାସ୍ତା ଉପରେ ୩ ଫୁଟ ପାଣି
ଲଗାଣ ବର୍ଷାରେ ଉବୁଟୁବୁ ରାଉରକେଲା । ପାଣି ଘେରରେ ସହରର ତଳିଆ ଅଞ୍ଚଳବାସୀ । ରାସ୍ତା ଉପରେ ୩ ଫୁଟ ପାଣି, ବିତୁଛି ଜଳବନ୍ଦୀ ଜୀବନ । ସହରର ବେଦବ୍ୟାସ ଛକ ଠାରୁ ବେଦବ୍ୟାସ ମନ୍ଦିର ରାସ୍ତାରେ ଗୋଟିଏ ବଡ ଗଛ ଉପୁଡି ପଡି ଗୋଟିଏ ପଟ ରାସ୍ତା ଅବରୋଧ ହୋଇ ଗାଡି ଚଳାଚଳ ବ୍ୟାହତ ହୋଇଛି। ଏହାସହ ରାଉରକେଲା ସହରର ଉଦିତନଗର ସାରନା ଛକଠାରୁ ଦେଓଗାଁ ରାସ୍ତାରେ ଦୁଇ ଫୁଟର ବର୍ଷା ଜଳ ଜମି ରହିଥିବାରୁ ରାସ୍ତାରେ ଗାଡି ଚଳାଚଳ ବ୍ୟାହତ ହୋଇଛି । ବିଭିନ୍ନ ସ୍ଥାନରେ ଡ୍ରେନ ଜାମ ରହିଥିବାରୁ ବର୍ଷାଜଳ ନିଷ୍କାସନ ହୋଇ ନପାର ନିଥିବା ଲୋକେ ଅଭିଯୋଗ କରିଛନ୍ତି ।
ପାଣି ଜମି ରହିଥିବାରୁ ବିଶ୍ବକର୍ମା ବିହାର ଅଞ୍ଚଳରେ ୩୦ ଅଧିକ ଘର ଜଳବନ୍ଦୀ ଅବସ୍ଥାରେ ରହିଛି । ସ୍ଥିତିକୁ ଦେଖି ଆରଏମସି, ରାଉରକେଲା ଇସ୍ପାତ କାରଖାନା ଓ ଅଗ୍ନିଶମ ବାହିନୀ ଜଳ ନିଷ୍କାସନ ସହ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ବର୍ଷା ଯୋଗୁଁ ରାସ୍ତାରେ ଗୋଟିଏ କାର ଫସି ରହିଥିଲା । ଅଗ୍ନିଶମ ବିଭାଗର ଉଦ୍ୟମ ପରେ କାରଟିକୁ ଉଦ୍ଧାର କରାଯାଇଛି । ରାଉରକେଲା ବିଧାୟକ ବିଭିନ୍ନ ସ୍ଥାନ ଗସ୍ତ କରି ସ୍ଥିତି ଅନୁଧ୍ୟାନ କରି ତୁରନ୍ତ ପାଣି ନିଷ୍କାସନ ବ୍ୟବସ୍ଥା କରିବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ବର୍ଷା ଆସିବା ପୂର୍ବରୁ ଡ୍ରେନେଜ ବ୍ୟବସ୍ଥା ହୋଇ ନଥିବାରୁ ଏପରି ସ୍ଥିତି ଉପୁଜିଥିବା ଲୋକେ ଅଭିଯୋଗ କରିଛନ୍ତି ।
କଙ୍ଗାରୁ କୋର୍ଟରେ ପ୍ରେମୀଯୁଗଳଙ୍କୁ ବଳଦ ଦଣ୍ଡ: ପ୍ରଶାସନ ପକ୍ଷରୁ ତଦନ୍ତ ଜାରି
କଙ୍ଗାରୁ କୋର୍ଟରେ ପ୍ରେମୀଯୁଗଳଙ୍କୁ ବଳଦ ଦଣ୍ଡ । ପ୍ରଶାସନ ପକ୍ଷରୁ ତଦନ୍ତ ଜାରି । ଯୁବକ-ଯୁବତୀଙ୍କ ସହ ସରପଞ୍ଚ ଓ ଗ୍ରାମବାସୀଙ୍କୁ ପଚରାଉଚରା । ଉପ ଜିଲ୍ଲାପାଳଙ୍କ ସହ ତଦନ୍ତ ଆରମ୍ଭ କଲେ ୪ ଜଣିଆ ଟିମ୍ । ଭୁଲ ଥିଲା ଦୁହେଁ ଦୁହେଁ ଦୁହିଙ୍କୁ ଭଲ ପାଇ ବିବାହ କରିଥିଲେ । ହେଲେ ପରିବାର ଲୋକେ ସ୍ବୀକୃତି ଦେବାକୁ କହି ଗ୍ରାମସଭାରେ ହାଜର କରି ବଳଦ କରି ଗାଁରେ ହଳ ବୁଲାଇଲେ । ଆଦିବାସୀ ପରମ୍ପରାର ଦ୍ବାହି ଦେଇ ସର୍ବ ସମ୍ମୁଖରେ କାନ୍ଧରେ ପକାଇଲେ ଜୁହାଳି । ଗୋଟିଏ ବଂଶରେ ଗୋଟିଏ ଜାତିରେ ବିବାହ କରିଥିବାରୁ ଧରଣୀ ପେନୁ ରାଗିବ କହି ଗାଁ ଦାଣ୍ଡରେ ଦେଲେ ପଶୁତୁଲ୍ୟ ଦଣ୍ଡ । ନାରାୟପାଟଣା ବ୍ଲକ ବୋରିଗି ପଞ୍ଚାୟତ ପେଦାଇଟିକି ଗାଁର ଏହି ଘଟଣା ପଦାକୁ ଆସିବା ପରେ ଏବେ ଆରମ୍ଭ ହୋଇଛି ତଦନ୍ତ । ନାରାୟଣ ପାଟଣା ପୋଲିସ ଗାଁକୁ ଯାଇ ତଦନ୍ତ କରୁଛି । ଥାନାରେ ସରପଞ୍ଚ ସମେତ ଗାଁ ମୁଖିଆଙ୍କୁ ଡାକି ପଚରାଉଚରା କରିଛି ପୋଲିସ୍ । ତେବେ ଘଟଣା ପରେ ଯୁବକ ଜଣକ ତାଙ୍କ ପ୍ରେମିକାକୁ ଧରି ନିଜ ଘରକୁ ଫେରିଛନ୍ତି ।
ଖାଲି ଇଟିକି ନୁହେଁ ରାୟଗଡ଼ା କଲ୍ୟାଣସିଂହପୁରର କଞ୍ଜାମଯୋଡ଼ି ଗାଁରେ ମଧ୍ୟ ଏପରି ଘଟଣା ରାଜ୍ୟରେ ଆଲୋଡ଼ନ ସୃଷ୍ଟି କରିଛି । ଏପରି ବର୍ବରତା ଓ କୁସ୍ଚିତ କାର୍ଯ୍ୟ ସଭ୍ୟ ସମାଜରେ ଗ୍ରହଣୀୟ ନୁହେଁ ବୋଲି ଦର୍ଶାଇ ବିଭିନ୍ନ ସାମାଜିକ କର୍ମୀ ମାନବଧିକାର ଆୟୋଗ ନିକଟରେ ଫେରାଦ ହୋଇଛନ୍ତି । ପିଉସୀ ଓ ପୁତୁରାଙ୍କ ପ୍ରେମ ସଂପର୍କକୁ ବିରୋଧ କରି ଗତ ୯ ତାରିଖରେ କଞ୍ଜାମଯୋଡି ଗ୍ରାମବାସୀ ଉଭୟଙ୍କ ବେକରେ ଲଙ୍ଗଳ ପକାଇ ଜମିରେ ଚାଷ କରାଇଥିଲେ । ଘଟଣା ପରେ ଉପଜିଲ୍ଲାପାଳ ରମେଶ ଚନ୍ଦ୍ର ଜେନାଙ୍କ ସମେତ କଲ୍ୟାଣସିଂହପୁର ବିଡିଓ, ତହସିଲଦାର, ସିଡିପିଓ ଓ ସମାଜ ମଙ୍ଗଳ ଅଧିକାରୀ ପହଞ୍ଚି ତଦନ୍ତ କରୁଛନ୍ତି । ସେପଟେ ଏନେଇ ମାମଲା ହେବା ସହ ତଦନ୍ତ ଚାଲିଛି । ଲୋକଙ୍କୁ ସଚେତନ କରିବାକୁ ପଦକ୍ଷେପ ନିଆଯିବ ବୋଲି କହିଛନ୍ତି ଜିଲ୍ଲାପାଳ । ସଚେତନତା ଅଭାବରୁ ପରମ୍ପରା ନାଁରେ ଖୋଲାଖୋଲି ଭାବେ ମାନବାଧିକାର କ୍ଷୁର୍ଣ୍ଣ କରାଯାଉଛି । ଆଇନ କାନୁନ ପ୍ରତି ଭରସା ତୁଟିବାରେ ଲାଗୁଛି । ଏନେଇ ବ୍ୟାପକ ସଚେତନତାର ଆବଶ୍ୟକତା ଥିବା କହିଛନ୍ତି ବୁଦ୍ଧିଜୀବୀ ।
ଚିନ୍ତା ବଢାଇଲା ରେଭେନ୍ସା ଝାଡ଼ାବାନ୍ତି: କେଉଁ ପରିସ୍ଥିତିରେ ଆକ୍ରାନ୍ତ ହେଲେ ଛାତ୍ର ?
ଚିନ୍ତା ବଢାଇଲା ରେଭେନ୍ସା ଝାଡ଼ାବାନ୍ତି । କେଉଁ ପରିସ୍ଥିତିରେ ଆକ୍ରାନ୍ତ ହେଲେ ଛାତ୍ର ? ଖାଦ୍ୟ ନା ପାଣିରେ ଥିଲା ସମସ୍ୟା ? ସଂକ୍ରମଣ ପରେ ଚେତିଲା ସ୍ବାସ୍ଥ୍ୟ ବିଭାଗ । ହଷ୍ଟେଲରେ ପହଞ୍ଚି ସ୍ଥିତି ଅନୁଧ୍ୟାନ କଲେ ଜନସ୍ବାସ୍ଥ୍ୟ ଅଧିକାରୀ । ନ୍ୟୁ ପିଜି ଓ ଧର୍ମପଦ ହଷ୍ଟେଲର ୮୫ ଜଣ ଛାତ୍ର ଝାଡ଼ାବାନ୍ତିରେ ଆକ୍ରାନ୍ତ ହୋଇଥିଲେ । ୪୪ ଜଣଙ୍କୁ ଏସସିବି ମେଡିକାଲରେ ଭର୍ତ୍ତି କରାଯାଇଥିବାବେଳେ ୧୯ ଜଣ ସୁସ୍ଥ ହୋଇ ଫେରିଛନ୍ତି । ଉଭୟ ହଷ୍ଟେଲରେ ସ୍ବାସ୍ଥ୍ୟ ବିଭାଗ ଓ ଜିଲ୍ଲା ଜନସ୍ବାସ୍ଥ୍ୟ ଅଧିକାରୀ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ପାଣିର ରିପୋର୍ଟ ଆସି ନଥିବାବେଳେ ରୋଷେଇ ଘର, ହଷ୍ଟେଲ ବାରଣ୍ଡା ବିଶୋଧନ କରାଯାଇଛି । ନୂଆ ଭେଣ୍ଡରକୁ ଏସଓପି ମାନି ଖାଦ୍ୟ ଯୋଗାଇ ଦେବାକୁ ତାଗିଦ କରାଯାଇଛି ।
ବାସି ଓ ଖରାପ ମାଛ ତରକାରୀ ଖାଇ ଛାତ୍ର ଆକ୍ରାନ୍ତ ହୋଇଥିବା ପ୍ରାଥମିକ ସମୀକ୍ଷାରୁ ଜଣା ପଡ଼ିଛି । ଛାତ୍ରଙ୍କ ସ୍ବାସ୍ଥ୍ୟ ଉପରେ ନଜର ରଖିବାକୁ ଜଣେ ଡାକ୍ତର ଓ ଜଣେ ଫାର୍ମାସିଷ୍ଟଙ୍କୁ ଦାୟିତ୍ବ ଦିଆଯାଇଛି । ଗତ ଶନିବାର ଖାଇବା ପରେ ହଠାତ ଛାତ୍ରମାନଙ୍କୁ ଝାଡ଼ାବାନ୍ତି ହୋଇଥିଲା । ତୁରନ୍ତ ସେମାନଙ୍କୁ ଆମ୍ବୁଲାନ୍ସ ଯୋଗେ ଏସସିବି ପଠାଯାଇଥିଲା । ସେପଟେ ରାଜ୍ୟର ପ୍ରମୁଖ ବିଶ୍ବବିଦ୍ୟାଳୟରେ ଏପରି ଅବହେଳା ଏବେ ଅଭିଭାବକଙ୍କୁ ଚିନ୍ତାରେ ପକାଇଛି ।