spot_img
Home Blog Page 5952

ସ୍ତ୍ରୀ ସହ ଝଗଡ଼ାରୁ ଜାଳିଦେଲା ଘର, ଜୀଅନ୍ତା ଜଳିଗରେ ୪ ଶିଶୁ ସହ ୬ ଜଣ

ବେଙ୍ଗଳୁରୁ: ମଦ ନିଶା ମଣିଷକୁ କେଉଁ ସ୍ତରକୁ ବି ନେଇ ଯାଇପାରେ । ଜୀବନର ସବୁକିଛିକୁ ଓଜାଡ଼ି ଦେଇପାରେ ଏହି ନିଶା । ଏମିତି ଏକ ଘଟଣା ଦେଖିବାକୁ ମିଳିଛି କର୍ଣ୍ଣାଟକରେ । ମଦ ପିଇ ସ୍ତ୍ରୀ ସହ ଝଗଡ଼ା କରିଥିଲେ ସ୍ୱାମୀ । ଫଳରେ ଛୁଆଙ୍କୁ ନେଇ ସ୍ତ୍ରୀ ବାପଘରକୁ ପଳାଇଥିଲା । ଆଉ ମଦ ନିଶାରେ ସ୍ୱାମୀ ସ୍ତ୍ରୀ ସହ ୬ ଜଣଙ୍କୁ ଜାଳି ଦେଇଛି । କୋଡାଗୁ ଜିଲ୍ଲାର ପୋନ୍ନମ୍ପେଟ୍ ଥାନା ମୁଗଟାଗେରି ଗାଁରେ ଘଟିଛି ଏହି ବିଭତ୍ସ କାଣ୍ଡ ।

Inebriated man sets house on fire over dispute with wife; 6 including 4 kids charred to death

ପୋଲିସ ସୂଚନା ଅନୁସାରେ, ଶ୍ରମିକ ଶ୍ରେଣୀର ୫୦ ବର୍ଷୀଅ ୟେରାଭରା ବୋଜା ପ୍ରତିଦିନ ମଦ ପିଇ ସ୍ତ୍ରୀ ବେବି ସହ ଝଗଡ଼ା କରିଥାଏ । ଏମିତି ଝଗଡ଼ା ପାଇଁ ପ୍ରାୟ ସପ୍ତାହକ ତଳେ ବେବି ସ୍ୱାମୀଙ୍କୁ ଛାଡ଼ି ସେହି ଗାଁରେ ରହୁଥିବା ତାଙ୍କ ଭାଇଙ୍କ ଘରକୁ ପିଲାଛୁଆଙ୍କୁ ନେଇ ପଳାଇଥିଲେ । ସ୍ତ୍ରୀ ପଳାଇବା ପରେ ଶନିବାର ମଦ୍ୟପ ବୋଜା ରାତି ପ୍ରାୟ ୨ଟା ବେଳେ ଶ୍ୱଶୁର ଘରକୁ ଯାଇଥିଲା ।

Inebriated man sets house on fire over dispute with wife; 6 including 4 kids charred to death

ଘର ଉପରକୁ ଚଢ଼ିବା ସହ ଟାଇଲର କିଛି ଖଣ୍ଡ କାଢ଼ି ସ୍ତ୍ରୀ ଶୋଇଥିବା ଘରେ ପେଟ୍ରୋଲ୍ ଢ଼ାଳି ନିଆଁ ଲଗାଇ ଦେଇଥିଲା । ଆଉ ଏହି ନିଆଁରେ ୪ ଛୁଆଙ୍କ ସହ ୬ ଜଣଙ୍କ ମୃତ୍ୟୁ ହୋଇଛି । ଅନ୍ୟ ୪ ଜଣ ମେଡିକାଲ୍ ବେଡରେ ମୃତ୍ୟୁ ସହ ସଂଘର୍ଷ କରୁଛନ୍ତି । ବୋଜାର ସ୍ତ୍ରୀ ବେବି, ବୋଜାର ମାଉସୀ ଏରଭା ସହ ୪ ଛୁଆ ଜୀବନ୍ତ ଦଗ୍ଧ ହୋଇ ଯାଇଛନ୍ତି । ଗୁରୁତରଙ୍କୁ ମୟସୁରୁ ଏବଂ ମାଡିକେରି ମେଡିକାଲରେ ଭର୍ତ୍ତି କରାଯାଇଛି । ବୋଜାକୁ ଗିରଫ କରିବା ପାଇଁ ପୋଲିସ ଉଦ୍ୟମ କରୁଛି ।

ଶ୍ରୀମନ୍ଦିର ହେଲା ସାନିଟାଇଜ୍‌, ଏଣିକି ସବୁ ରବିବାର ବନ୍ଦ ରହିବ ଦର୍ଶନ..

ପୁରୀ: କୋଭିଡ୍‌ ସଂକ୍ରମଣକୁ ଦୃଷ୍ଟିରେ ରଖି ଆଜି ପୁରୀ ଶ୍ରୀମନ୍ଦିର ବନ୍ଦ ରହିଛି । ଆଜିଠାରୁ ପ୍ରତି ରବିବାର ଶ୍ରୀମନ୍ଦିରକୁ ସାନିଟାଇଜ୍ କରାଇବା ପାଇଁ ଏହି ପଦକ୍ଷେପ ନିଆଯାଇଛି । ଏହାକୁ ଭକ୍ତ ଓ ସେବାୟତମାନେ ସ୍ୱାଗତ କରିଥିବା ବେଳେ ରବିବାର ବଦଳରେ ଅନ୍ୟ ଦିନ ବନ୍ଦ କରିବା ପାଇଁ କିଛି ମତ ଦେଇଛନ୍ତି । ରବିବାର ଛୁଟିଦିନ ଥିବାରୁ ଅଧିକ ଭକ୍ତ ଆସିବାର ସୁବିଧା ରହିଛି । ତେଣୁ ଏନେଇ ପୂନର୍ବିଚାର କରିବାକୁ ପରାମର୍ଶ ଦେଇଛନ୍ତି କିଛି ଭକ୍ତ ଓ ସେବାୟତ ।

ସପ୍ତାହରେ ଥରେ ଶ୍ରୀମନ୍ଦିର ପରିସର ହେବ ସାନିଟାଇଜ୍ । ରାଜ୍ୟରେ କରୋନା ସଂକ୍ରମଣ ବୃଦ୍ଧି ପାଉଥିବାରୁ ଶ୍ରୀମନ୍ଦିରରେ ଲାଗୁ ହେଲା ଏଭଳି କଟକଣା । କୋଭିଡର ଦ୍ୱିତୀୟ ଲହରକୁ ନଜରରେ ରଖି ଏଣିକି ପ୍ରତି ରବିବାର ଦର୍ଶନ ବନ୍ଦ ରହିବ । ଏହାସହ ଶ୍ରୀମନ୍ଦିର ପରିସରକୁ ସମ୍ପୂର୍ଣ୍ଣ ସାନିଟାଇଜ୍‌ କରାଯିବ । ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ନିଷ୍ପତ୍ତ ନିଆଯାଇଛି । ତେବେ ମହାପ୍ରଭୁଙ୍କ ନୀତିକାନ୍ତି ଯେପରି କ୍ଷୁର୍ଣ୍ଣ ନହୁଏ ସେଥିପାଇଁ ସବୁ ବ୍ୟବସ୍ଥା କରାଯାଇଛି ।

ଅନ୍ୟପକ୍ଷରେ ମନ୍ଦିର ବନ୍ଦକୁ ନେଇ ସେବାୟତ ଓ ଭକ୍ତଙ୍କ ମଧ୍ୟରେ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳିଛି । ରବିବାର ଛୁଟିଦିନ ଥିବାରୁ ଅଧିକ ଭକ୍ତ ଶ୍ରୀମନ୍ଦିର ଆସିଥାନ୍ତି । ତେଣୁ ରବିବାର ବଦଳରେ ଅନ୍ୟଦିନ ବନ୍ଦ ପାଇଁ ନିଷ୍ପତ୍ତି ନେବାକୁ କିଛି ଭକ୍ତ ଓ ସେବାୟତ ପରାମର୍ଶ ଦେଇଛନ୍ତି । ଏଥିପାଇଁ ନିଷ୍ପତିର ପୂନର୍ବିଚାର କରିବାକୁ ସେମାନେ ଅନୁରେଧ କରିଛନ୍ତି ।

 କୋଭିଡ ଯୋଗୁଁ ଗତବର୍ଷ ଶ୍ରୀମନ୍ଦିର ସମ୍ପୂର୍ଣ ବନ୍ଦ ରଖାଯାଇଥିଲା । ପରେ ସ୍ୱତନ୍ତ୍ର SOP ମାଧ୍ୟମରେ ଦର୍ଶନ ବ୍ୟବସ୍ଥା ଜାରି ରଖାଯାଇଥିବା ବେଳେ ପୁନର୍ବାର SOP ରେ ସାମାନ୍ୟ କଟକଣା ଲାଗୁକରାଯାଇଛି ।

ଓଭରହେଡ୍‌ ଟାଙ୍କି ଅଛି ସତ ହେଲେ କାମରେ ଆସୁନି, ପାଣି ପାଇଁ ମାଇଲିଏ ବାଟ ଚାଲୁଛନ୍ତି ମହିଳା

ଗଞ୍ଜାମ: କଲବଲ କଲାଣି ତାତି । ଡହ ଡହ ଖରାରେ ଅସ୍ତବ୍ୟସ୍ତ ଜନଜୀବନ । ଗ୍ରାଷ୍ମ ଆରମ୍ଭରୁ ଗାଁରେ ପାଣି ସମସ୍ୟା । ପାନୀୟ ଜଳ ପାଇଁ ଡହଳ ବିକଳ ହେଉଛନ୍ତି ଲୋକେ । ପରିତ୍ୟକ୍ତ କୂଅ ଶୋଷ ମେଣ୍ଟାଉଥିବା ବେଳେ ପାଣି ପାଇଁ ମାଇଲମାଇଲ ବାଟ ଚାଲୁଛନ୍ତି ଗାଁର ମହିଳା । ଓଭରହେଡ୍ ଟାଙ୍କି ନିର୍ମାଣ ହୋଇଥିଲେ ମଧ୍ୟ ରକ୍ଷଣାବେକ୍ଷଣ ହେଉନଥିବାରୁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ । ଖରା ଆରମ୍ଭରୁ ଉତ୍କଟ ଜଳ ସମସ୍ୟା ଯୋଗୁଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ଗଞ୍ଜାମ ଜିଲ୍ଲା ବଳରାମପୁରବାସୀ ।

ଗାଁରେ ଓଭରହେଡ୍ ଟାଙ୍କି ଥାଇ ମଧ୍ୟ ତାହା କାମରେ ଲାଗୁନି । ସରକାର ଗାଁରେ ଲୋକଙ୍କୁ ସବୁ ସୁବିଧା ଯୋଗାଇବା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ କିଛି ମୁନାଫାଖୋର ଅଧିକାରୀଙ୍କ ଅବହେଳା ଯୋଗୁଁ ଏବେ ବି ସରକାରଙ୍କ ସବୁ ଯୋଜନା ସମାଜର ଶେଷ ପାହାଚ ପର୍ଯ୍ୟନ୍ତ ପହଞ୍ଚି ପାରୁ ନାହାନ୍ତି । ତେବେ ଗାଁରେ ଥିବା ଓଭରହେଡ୍‌ ଟଙ୍କି ଥାଇ ମଧ୍ୟ, ଏହାର ରକ୍ଷଣା ବେକ୍ଷଣ କରାଯାଉ ନଥିବାରୁ ଗାଁର ମହିଳାମାନେ ମାଇଲ ମାଇଲ ବାଟ ଚାଲୁଛନ୍ତି ପିଇବା ପାଣି ମୁନ୍ଦାଏ ଆଣିବା ପାଇଁ । ଆଉ ପରିତ୍ୟକ୍ତ କୂଅର ପାଣିକୁ ବ୍ୟବହାର କରି ରୋଗାଗ୍ରସ୍ତ ହୋଉଥିବା ଅଭିଯୋଗ କରିଛନ୍ତି ସେହି ଗାଁର ଲୋକମାନେ ।

ତେବେ ସବୁଠାରୁ ବଡ଼ କଥା ହେଲା, ବଳରାମପୁରରେ ଜଳ ସମସ୍ୟା ଆଜିର କି କାଲିର ନୁହେଁ । ବର୍ଷ ବର୍ଷ ଧରି ଗାଁରେ ଏଭଳି ସମସ୍ୟା ଲାଗି ରହିଛି । ପଞ୍ଚାୟତ ଠାରୁ ବ୍ଲକ୍‌ ପର୍ଯ୍ୟନ୍ତ ସବୁଠି ଲୋକେ ଗୁହାରୀ କରିଥିଲେ ମଧ୍ୟ କୌଣସି ସୁଫଳ ମିଳିନଥିବା ଅଭିଯୋଗ କରିଛନ୍ତି ଗ୍ରାମବାସୀ । ଏନେଇ ଆସିକା ଗ୍ରାମ୍ୟ ଜଳ ଯୋଗାଣ ଅଧିକାରୀ ଜାଣିବା ପରେ ଶୀଘ୍ର ସମାଧାନ ହେବ ବୋଲି ପ୍ରତିଶ୍ରୁତି ଦେଇଛନ୍ତି । ତେବେ ବଳରାମପୁରରେ ଅନେକ ଦିନ ହେଲା ଏହି ଜଳ ସମସ୍ୟା ଲାଗି ରହିଥିବା ବେଳେ ଦେଖିବାକୁ ବାକି ରହିଲା କେବେ ହେଉଛି ଏହି ସମସ୍ୟାର ସମାଧାନ ।

ମଧ୍ୟାହ୍ନ ଭୋଜନ ଚାଉଳ ହଡ଼ପ, ବସ୍ତାରେ ୫୦ ବଦଳରେ ରହୁଛି ୪୦ କିଲୋଗ୍ରାମ !

ମଧ୍ୟାହ୍ନ ଭୋଜନ ଚାଉଳ ହଡ଼ପ ଅଭିଯୋଗ । ବଣ୍ଟନ ସମୟରେ ହେଉଛି ବାଟମାରଣା । ୫୦ କିଲୋ ବସ୍ତାରେ ୪୦ରୁ ୪୫ କିଲୋ ଚାଉଳ । ଓଜନ ମାପ ପରେ ସାମ୍ନାକୁ ଆସିଲା ସତ । ବିଦ୍ୟାଳୟରେ ମଧ୍ୟାହ୍ନ ଭୋଜନ ପାଇଁ ଆସୁଥିବା ଚାଉଳକୁ କରାଯାଉଛି ହଡ଼ପ । ୫୦ କିଲୋ ବଦଳରେ କେଉଁ ବସ୍ତାରେ ୪୦ କିଲୋ ତ କେଉଁ ବସ୍ତାରେ ୪୫ କିଲୋ ରହିଥିବା ଦେଖିବାକୁ ମିଳିଛି ।

ଏଭଳି ଦୁର୍ନୀତିର ପୁଳା ପୁଳା ଅଭିଯୋଗ ଆସିଛି ଭଦ୍ରକ ଜିଲ୍ଲା ବାସୁଦେବପୁର ବ୍ଲକରୁ । ସ୍କୁଲ ଛାତ୍ରଛାତ୍ରୀଙ୍କ ପାଇଁ ଆସୁଥିବା ମଧ୍ୟାହ୍ନ ଭୋଜନ ଚାଉଳକୁ ଅତି ଚତୁରତାର ସହ ବାଟମାରଣା କରାଯାଉଥିବା ଦେଖିବାକୁ ମିଳିଛି । ରାତିର ଅନ୍ଧାରରେ କୁନି କୁନି ପିଲାଙ୍କ ଖାଦ୍ୟକୁ ଟ୍ରକରୁ ହଡ଼ପ କରାଯାଉଛି । ପ୍ରତି ବସ୍ତାରେ ୫୦ କିଲୋ ଚାଉଳ ବଦଳରେ ୪୦ରୁ ୪୫ କିଲୋ ରହିଛି । ଯାହାକୁ ନେଇ ସ୍କୁଲ ଶିକ୍ଷକ ପ୍ରତିବାଦ କରିବାରୁ ନାଲିଆଖି ଦେଖାଇଛି ଟ୍ରକ୍ ଡ୍ରାଇଭର ।

ଶୁକ୍ରବାର ସନ୍ଧ୍ୟା ସମୟରେ OD-01AB-1351 ମିନି ଟ୍ରକ, ବାସୁବେଦପୁର ବ୍ଲକର ମଙ୍ଗଳାପଦା ପ୍ରାଥମିକ ବିଦ୍ୟାଳୟ ଓ ଜଗନ୍ନାଥପୁର ହାଇସ୍କୁଲରେ ମଧ୍ୟାହ୍ନ ଭୋଜନ ଚାଉଳ ବଣ୍ଟନ କରିବାକୁ ଆସିଥିଲା । ମାତ୍ର ବଣ୍ଟନ ସମୟରେ ସ୍କୁଲ କର୍ତ୍ତୃପକ୍ଷ ବସ୍ତା ଓଜନ କରିବାରୁ ପ୍ରତ୍ୟେକ ବସ୍ତାରେ ୩ରୁ ୫ କିଲୋ କମ୍ ଚାଉଳଥିବା ଜଣାପଡିଛି । ଏନେଇ ବାରାପୁର କ୍ଲଷ୍ଟର ସିଆରସିସିଙ୍କୁ ପଚାରିବାରୁ ଚାଉଳ କମ୍ ଆସୁଥିବା ସ୍ୱୀକାର କରିଛନ୍ତି ।

ବାସୁଦେବପୁର ବ୍ଲକର ୨୯୫ ବିଦ୍ୟାଳୟର ୨୯ ହଜାର ୯୫୪ ଜଣ ଛାତ୍ରଛାତ୍ରୀଙ୍କୁ ମଧ୍ୟାହ୍ନ ଭୋଜନ ଦିଆଯାଉଛି । ମାତ୍ର ଏହି ମଧ୍ୟାହ୍ନ ଭୋଜନ ଚାଉଳ ବାଟମାରଣା ସମସ୍ତଙ୍କୁ ଚକିତ୍ କରିଛି । ତେବେ ଏହି ଦୁର୍ନୀତିରେ କେବଳ ଡ୍ରାଇଭର ଲିପ୍ତ ରହିଛି ନା ଯୋଗାଣ ଏଜେଣ୍ଟଙ୍କ ସମ୍ପୃକ୍ତି ରହିଛି ତାହା ତଦନ୍ତ କଲେ ସାମ୍ନାକୁ ଆସିବ । ତେଣୁ ଏହାର ଏକ ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ସ୍ଥାନୀୟ ବାସିନ୍ଦା ।

ଛତିଶଗଡ଼ ପରେ ଆନ୍ଧ୍ରର ବେଆଇନ୍‌ ବ୍ୟାରେଜ୍‌ ନିର୍ମାଣ, ଏବେଠୁ ଦେଖା ଦେଲାଣି ଜଳ କଷ୍ଟ

ଗଜପତି: ଆନ୍ଧ୍ରର ଦାଦାଗିରି । ଶୁଖିଗଲା ଚିରସ୍ରୋତା ମହେନ୍ଦ୍ର ତନୟା । ଗଜପତି ଜିଲ୍ଲାରେ ଦେଖାଦେଇଛି ଜଳକଷ୍ଟ । ପାନୀୟଜଳ ସମସ୍ୟା ଉତ୍କଟ ରୂପ ଧାରଣ କରିଥିବା ବେଳେ ଚାଷ କାର୍ଯ୍ୟ ମଧ୍ୟ ପ୍ରଭାବିତ ହୋଇଛି । ଯାହାକୁ ନେଇ ଚିନ୍ତାରେ ଜିଲ୍ଲାବାସୀ ଓ ଯୋଗାଣ ବିଭାଗ । ମହେନ୍ଦ୍ର ତନୟା ନଦୀର ଉପରମୁଣ୍ଡରେ ଆନ୍ଧ୍ରର ବ୍ୟାରେଜ ନିର୍ମାଣ ଓ କେନାଲ ଯୋଗେ ଜଳ ଶୋଷଣ ଯୋଗୁ ଏଭଳି ଅବସ୍ଥା ସୃଷ୍ଟି ହୋଇଛି ।

ଗୋଟିଏ ପଟେ ଛତିଶଗଡ଼ ପାଇଁ ଓଡ଼ିଶାର ଜୀବନରେଖା ମହାନଦୀ ଶୁଖିଲା ପଡ଼ିଥିବା ବେଳେ ଆନ୍ଧ୍ର ଯୋଗୁଁ ମହେନ୍ଦ୍ର ତନୟା ଶୁଖି ଯାଇଛି । ନଦୀର ଉପର ମୁଣ୍ଡରେ ଆନ୍ଧ୍ର ବେଆଇନ ଭାବେ ବ୍ୟାରେଜ ଓ କେନାଲ ନିର୍ମାଣ କରି ପାଣି ଶୋଷୁଛି । ମହେନ୍ଦ୍ର ତନୟା ତଳମୁଣ୍ଡରେ ଜଳଧାରା ସମ୍ପୂର୍ଣ୍ଣ ବନ୍ଦ ହୋଇଯାଇଥିବା ବେଳେ ପାରଳାଖେମୁଣ୍ଡି ଓ ଏହାର ଆଖପାଖ ଅଞ୍ଚଳରେ ଜଳ ସମସ୍ୟା ଦେଖାଦେଇଛି । ଚାଷ କାମ ମଧ୍ୟ ପ୍ରଭାବିତ ହୋଇଛି ।

ପ୍ରଥମେ ବିସ୍ତାରବାଦ ନୀତି ଧରି ଜମି ଜବରଦଖଲ, ଏବେ ଓଡ଼ିଶା ଜଳ ଉପରେ ନଜର ପକାଇଛି ପଡୋଶୀ ରାଜ୍ୟ । ବେଆଇନ ବ୍ୟାରେଜ ନିର୍ମାଣ ଯୋଗୁ ଶୁଖିଯାଇଛି ମହେନ୍ଦ୍ର ତନୟା । ଯାହାକୁ ନଜରରେ ରଖି ଜିଲ୍ଲା ଜନସ୍ୱାସ୍ଥ୍ୟ ବିଭାଗ ତତ୍ପର ହେବା ସହିତ ସହରର ସମସ୍ତ ନଳକୂଅ ମରାମତି କାର୍ଯ୍ୟ ତ୍ୱରାନ୍ୱିତ କରିଛି । ଗ୍ରୀଷ୍ମଋତୁ ଯୋଗୁଁ ଏହା ଉପରେ ରାଜ୍ୟ ସରକାର ପଦକ୍ଷେପ ନେବାକୁ ନିବେଦନ କରିଛନ୍ତି ଗଜପତି ଜିଲ୍ଲାବାସୀ ।

ହିଡମାର ଚକ୍ରବ୍ୟୁହରେ କେମିତି ଫଶିଲେ ଯବାନ ?

ଛତିଶଗଡ଼ର ନକ୍ସଲ ପ୍ରଭାବିତ ବିଜାପୁର ଓ ସୁକମା ସୀମାବର୍ତ୍ତୀ କ୍ଷେତ୍ରର ଜଙ୍ଗଲ ମଧ୍ୟରେ ନକ୍ସଲ ଓ ସୁରକ୍ଷାକର୍ମୀଙ୍କ ମଧ୍ୟରେ ହୋଇଥିବା ସଂଘର୍ଷରେ ୨୪ ଜଣ ଯବାନ ସହିଦ ହୋଇଛନ୍ତି। କୁହାଯାଉଛି ଯେ,କୁଖ୍ୟାତ ନକ୍ସଲ ହିଡମାକୁ ଧରିବାକୁ ୨ ହଜାର ଯବାନ ଜଙ୍ଗଲ ମଧ୍ୟକୁ ପ୍ରବେଶ କରିଥିଲେ । ସେମାନ ବିଭିନ୍ନ ରାସ୍ତା ଦେଇ ଜଙ୍ଗଲକୁ ଯାଇଥିଲେ। ସମ୍ଭବତଃ ନକ୍ସଲଙ୍କ ଗୁପ୍ତଚର ଏ ବାବଦରେ ଆଗରୁ ଖବର ପାଇ ସାରିଥିଲେ। ତେଣୁ ନକ୍ସଲ ନିଜ ରଣନୀତି ପ୍ରସ୍ତୁତ କରିଥିଲେ। ଏହି ରଣନୀତି ଅନୁସାରେ ଜଙ୍ଗଲ ମଧ୍ୟକୁ ପ୍ରବେଶ କାଳରେ ଯବାନଙ୍କ ଉପରେ କୌଣସି ପ୍ରକାରର ଆକ୍ରମଣ ହୋଇନଥିଲା । ନକ୍ସଲ ପୂର୍ବନିର୍ଧାରିତ ସ୍ଥାନରେ ଯବାନଙ୍କ ଉପରେ ଆକ୍ରମଣ କରିବାକୁ ଚାହୁଁଥିଲେ ତେଣୁ ସେମାନେ ଯବାନଙ୍କୁ ଜଙ୍ଗଲ ମଧ୍ୟକୁ ଯିବାକୁ ଦେଇଥିଲେ । ଏହାକୁ ସାଧାରଣ ଭାଷାରେ ଏମିତି କୁହାଯାଇପାରେ ଯେ, ସମୟ ଓ ସ୍ଥାନ ନକ୍ସଲ ନିର୍ଧାରିତ କରିଥିଲେ ।

ସୂଚନା ଅନୁସାରେ ସୁରକ୍ଷାବଳ ଗୋଟିଏ ଦଳରେ ସାମିଲ ନଥିଲେ । ସେମାନେ ବିଭିନ୍ନ ଟିମରେ ବିଭକ୍ତ ହୋଇ ଜଙ୍ଗଲ ମଧ୍ୟକୁ ଯାଇଥିଲେ । ହିଡମାର ବଟାଲିଅନ ଏହାର ଫାଇଦା ଉଠାଇ ଯବାନଙ୍କୁ ଏଭଳି ସ୍ଥାନରେ ଟାର୍ଗେଟ୍ କରିଥିଲା ଯାହାର ଆକାର ଇଂରାଜୀ ଅକ୍ଷର “U’ ଭଳି ଥିଲା । ଏବେ ଆସନ୍ତୁ ଜାଣିବା ଏହି ୟୁ ସେପ୍ ଆମ୍ବୁସ୍ କ’ଣ ?

ସୂଚନା ଅନୂସାରେ ହିଡମା ଓ ତା’ର ଦଳ ଆକ୍ରମଣ ପାଇଁ ଯେଉଁ ସ୍ଥାନକୁ ବାଛିଥିଲେ ତାହା ୟୁ ଆକାର ଭଳି ଥିଲ । ଏହି ସ୍ଥାନରେ ପହଂଚିବା ପରେ ଯବାନଙ୍କ ପକ୍ଷରେ ଆଗକୁ ବଢିବା ରାସ୍ତା ବନ୍ଦ ଥିଲା । ଯବାନଙ୍କୁ ଉକ୍ତ ସ୍ଥାନରେ ପହଂଚିବାକୁ ଦେବା ପରେ ତିନି ପଟୁ ଆରମ୍ଭ ହୋଇଥିଲା ଆକ୍ରମଣ । ପାହାଡ ଉପରେ ଥିବା ନକ୍ସଲ ସୁରକ୍ଷାକର୍ମୀଙ୍କ ଉପରକୁ ଆଖି ବୁଜା ଗୁଳିମାଡ କରିଥିଲେ । ନକ୍ସଲଙ୍କ ୟୁ ସେପ୍ ଜାଲରେ ପଡିଥିବା ଯବାନ ତଥାପି ମୁକାବିଲା କରିଥିଲେ । ସେମାନେ ପାଖରେ ଥିବା ଗାଁ ଆଡକୁ ଟାକ୍ଟିକାଲ ରିଟ୍ରେଟ୍ କରିଥିଲେ । କିନ୍ତୁ ନକ୍ସଲ ପିଛା କରି ଆକ୍ରମଣ ଜାରି ରଖିଥିଲେ ।
୪ ଟ୍ରାକ୍ଟରରେ ନିଜ ନିହତ ସାଥୀଙ୍କୁ ଲଦି ପଳାୟନ କରିଥିଲେ ନକ୍ସଲ
ନକ୍ସଲଙ୍କ ଆକ୍ରମଣରେ କେବଳ ଯବାନ ସହିଦ ହୋଇ ନାହାନ୍ତି । ପାଲଟା ଆକ୍ରମଣରେ ଅନେକ ନକ୍ସଲ ମଧ୍ୟ ନିହତ ହୋଇଛନ୍ତି । ପୋଲିସକୁ ମିଳିଥିବା ସୂଚନା ଅନୁସାରେ ନକ୍ସଲ ୪ଟି ଟ୍ରାକ୍ଟରରେ ନିଜ ନିହତ ସାଥିଙ୍କୁ ଲୋଡ୍ କରି ଘଟଣାସ୍ଥଳରୁ ଫେରାର ହୋଇଥିଲେ ।
ହିଡମାର ସୁରକ୍ଷାରେ ୮ଶହ ନକ୍ସଲ
ନକ୍ସଲ କମାଣ୍ଡର ହିଡମା ମୁଣ୍ଡ ଉପରେ ରହିଛି ୨୫ ଲକ୍ଷ ଟଙ୍କାର ପୁରସ୍କାର । ଏହି ଦାଗୀ ନକ୍ସଲର ସୁରକ୍ଷାରେ ୮ଶହ ନକ୍ସଲ କ୍ୟାଡର ନିୟୋଜିତ ଥିବା କୁହାଯାଉଛି । ଆନ୍ଧ୍ରପ୍ରଦେଶ, ଛତିଶଗଡ଼ ଓ ତେଲେଙ୍ଗାନାରେ ହିଡମାର ଆଡ୍ଡା ରହିଛି ।

ମହାରାଷ୍ଟ୍ରରେ ଲାଗୁ ହେଲା ଲକଡାଉନ୍ ଭଳି କଟକଣା; ହୋଟେଲ-ବାର୍ ବନ୍ଦ, ସୁଟିଂ ହେବନି ସିନେମା

ମୁମ୍ବାଇ: ରାଜ୍ୟରେ ବଢ଼ୁଥିବା କୋଭିଡ୍ ସଂକ୍ରମଣକୁ ଦେଖି ବଡ଼ ନିଷ୍ପତ୍ତି ନେଇଛି ଉଦ୍ଧବ କ୍ୟାବିନେଟ୍ । କୋଭିଡ୍ କଟକଣାକୁ କଡ଼ାକଡ଼ି ପାଳନ କରାଯିବ । ନୂଆ ନିର୍ଦ୍ଦେଶନାମା ସୋମବାର ରାତି ୮ଟାରୁ ଲାଗୁ ହେବ । ରାତି ୮ଟାରୁ ସକାଳ ୭ଟା ଯାଏ ମହାରାଷ୍ଟ୍ରରେ ଲାଗୁ ହେବ ରାତ୍ରୀକାଳୀନ କର୍ଫ୍ୟୁ । ଏହି ସମୟରେ କେବଳ ଜରୁରୀକାଳୀନ ସେବାକୁ ଅନୁମତି ଦିଆଯିବ ।

ହୋଟେଲ, ରେଷ୍ଟୁରାଣ୍ଟରେ ବସିକରି ଖାଇବା ଉପରେ ପ୍ରତିବନ୍ଧକ ଲଗାଯାଇଛି । କେବଳ ଖାଦ୍ୟ ପାର୍ସଲ ନେଇ ହେବ । ମହାରାଷ୍ଟ୍ରରେ ସମସ୍ତ ସିନେମା ହଲ୍, ପାର୍କ ବନ୍ଦ ରହିବ । ଏପରିକି ବଡ଼ ବଡ଼ ଫିଲ୍ମର ସୁଟିଂ ଉପରେ କଟକଣା ଜାରି କରାଯାଇଛି । କର୍ମଚାରୀଙ୍କୁ ଅଫିସ୍ ପରିବର୍ତ୍ତେ ଘରୁ କାମ କରିବାକୁ କୁହାଯାଇଛି । ଦିନ ସାରା ୧୪୪ ଧାରା ଲାଗୁ ରହିବ । ଲୋକ ଏକାଠି ହେବା ଉପରେ ପ୍ରତିବନ୍ଧକ ଲାଗୁ କରାଯାଇଛି । ରାଜ୍ୟରେ ଶନିବାର ଓ ରବିବାର ସମ୍ପୂର୍ଣ୍ଣ ଲକଡାଉନ୍ ଲାଗୁ ହେବ ।

ମୁମ୍ବାଇରେ ଶନିବାର କରୋନାର ୯ ହଜାର ୯୦ଟି ମାମଲା ଆସିଥିବା ବେଳେ ୨୭ ଜଣଙ୍କ ମୃତ୍ୟୁ ହୋଇଛି । ସକ୍ରିୟ ସଂକ୍ରମିତଙ୍କ ସଂଖ୍ୟା ୬୨ ହଜାର ୧୮୭କୁ ବୃଦ୍ଧି ପାଇଛି । ସେହିଭଳି ଏପ୍ରିଲ ୩ରେ ମହାରାଷ୍ଟ୍ରରେ ୪୯ ହଜାର ୪୪୭ଟି ନୂଆ ମାମଲା ଚିହ୍ନଟ ହୋଇଥିଲା । ଏବେ ରାଜ୍ୟରେ କରୋନାର ୪ ଲକ୍ଷ ୧ ହଜାର ୧୭୨ଟି ସକ୍ରିୟ ସଂକ୍ରମଣ ମାମଲା ରହିଛି ।

IPL ଟିମ୍ କୁ ପସନ୍ଦ ୱିକେଟକିପର-କ୍ୟାପ୍ଟେନ୍: ଏଥର ପନ୍ତ ଓ ସାମସନ୍ ଦେଖାଇବେ ଜଲୱା

0

ନୂଆଦିଲ୍ଲୀ: ବାଜିସାରିଛି କ୍ରିକେଟ ମହାକୁମ୍ଭର ବିଗୁଲ୍। ଆଉ ମାତ୍ର ଦିନ କେଇଟା ପରେ ଆରମ୍ଭ ହେବ କ୍ରିକେଟ ମହାମୁକାବିଲା ଆଇପିଏଲ୍ ୨୦୨୧। ସମସ୍ତ ୮ଟି ଦଳ ବାୟୋ ବବଲ ଭିତରେ ଚଲାଇଛନ୍ତି ପ୍ରସ୍ତୁତି।  ଦିଲ୍ଲୀକ୍ୟାପିଟାଲ୍ସର କ୍ୟାପ୍ଟେନ୍ ଶ୍ରେୟଶ ଅୟର ଅସୁସ୍ଥ ଥିବାରୁ ଦଳରୁ ନେଇଛନ୍ତି ବିଦାୟ। ଯାହା ପରେ ଦିଲ୍ଲୀ ଟିମକୁ ଲାଗିଛି ଜୋରଦାର ଝଟକା। ଏବେ ଯୁବ  ୱିକେଟକିପର-ବ୍ୟାଟ୍ସମ୍ୟାନ ଋଷଭ ପନ୍ତକୁ ଟିମରେ ଅଧିନାୟକ ଭାବେ ନିୟୋଜିତ କରିଛି ଦଳ। ଏଥର ମଇଦାନରେ ୱିକେଟକିପର-କ୍ୟାପ୍ଟେନ ଭାବେ ନଜର ଆସିବେବେ ପନ୍ତ। କେବଳ ପନ୍ତ ନୁହଁନ୍ତି ଏଥର ଆଇପିଏଲରେ ନଜର ଆସିବେ ୪ ୱିକେଟକିପର-କ୍ୟାପ୍ଟେନ୍ ।

ମହେନ୍ଦ୍ର ସିଂ ଧୋନି: ଆଇପିଏଲ୍ ୨୦୨୧ରେ ଚେନ୍ନାଇ ସୁପର କିଙ୍ଗ୍ସ ପୁଣି ଥରେ ମହେନ୍ଦ୍ର ସିଂ ଧୋନିଙ୍କ ଅଧିନରେ ଖେଳିବ। ଧୋନି ତାଙ୍କ ଅଧିନାୟକତ୍ୱରେ ଦଳକୁ ୩ ଥର ଆଇପିଏଲ ଟାଇଟଲ ଜିତେଇଛନ୍ତି। ଏହା ବ୍ୟତୀତ ଚେନ୍ନାଇ ଦଳ ପାଞ୍ଚ ଥର ରନର୍ ଅପ୍ ବି ହୋଇଛି। ଧୋନି ନିଜ ଦମରେ ଦଳକୁ ଅନେକ ମ୍ୟାଚ୍ ଜିତାଇଛନ୍ତି । ଆଉ ଏସବୁ ବାଦ ୱିକେଟ୍ ପଛରେ ତାଙ୍କର ଚମତ୍କାରିତାର କୌଣସି ଯବାବ ନାହିଁ। ଧୋନିଙ୍କୁ ୬ଜି ସ୍ପିଡର ୱିକେଟ କିପିଂର କେହି ମୁକାବିଲା କରିପାରିବେ ନାହିଁ । ଧୋନି ୨୦୪ଟି ଆଇପିଏଲ୍ ମ୍ୟାଚରେ କରିଛନ୍ତି ୪ ହଜାର ୬୩୨ ରନ୍ । ଆଉ ଏଥିରେ ୨୩ଟି ଅର୍ଦ୍ଧ ଶତକ ବି ସାମିଲ ଅଛି । ଧୋନି ୱିକେଟ୍ ପଛରେ ବି ସେ ୧୪୮ଟି ୱିକେଟ ନେଇଛନ୍ତି । ଯେଉଁଥିରେ ରହିଛି ୧୦୯ଟି କ୍ୟାଚ୍ ଏବଂ ୩୯ଟି ଷ୍ଟମ୍ପିଂ।

IPL 2020 KL Rahul Mayank Agarwal Orange Cap Purple Cap

କେ.ଏଲ୍ ରାହୁଲ: ପଞ୍ଜାବ କିଙ୍ଗ୍ସର ଅଧିନାୟକ କେ.ଏଲ୍ ରାହୁଲଙ୍କ ଉପରେ ଦଳକୁ ପ୍ରଥମ ୱିନିଂ ଟାଇଟଲ ଜିତେଇବାର ରହିବ ଦାୟିତ୍ୱ। ରହିବ। ଆଉ ଏଥିପାଇଁ ତାଙ୍କୁ ବ୍ୟାଟିଂ ସହିତ ୱିକେଟ୍ ପଛରେ ମଧ୍ୟ ଭଲ ଖେଳ ପ୍ରଦର୍ଶନ କରିବାକୁ ପଡ଼ିବ। ରାହୁଲ ଆଇପିଏଲରେ ୮୧ଟି  ମ୍ୟାଚରେ୨ ହଜାର ୬୪୭ ରନ୍ ସଂଗ୍ରହ କରିଛନ୍ତି। ଏହା ମଧ୍ୟରେ ସେ ଦୁଇଟି ଶତକ ଓ ୨୧ଟି  ଅର୍ଦ୍ଧଶତକ ବି ମାରିଛନ୍ତି। ଏହା ବ୍ୟତୀତ ରାହୁଲ ୱିକେଟ୍ ପଛରେ ୩୭ ଟି ଶିକାର ବି କରିଛନ୍ତି।

ସଞ୍ଜୁ ସାମସନ: ରାଜସ୍ଥାନ ରୟାଲ୍ସସ ଏଥର ସଞ୍ଜୁ ସାମସନଙ୍କୁ ଦେଇଛି ଅଧିନାୟକତ୍ୱର ଦାୟିତ୍ୱ । ଯଦିଓ ରାଜସ୍ଥାନରେ ଜୋସ୍ ବଟଲର୍ ଏବଂ ବେନ୍ ଷ୍ଟୋକ୍ସଙ୍କ ପରି ନାମୀ ଦାମୀ ଖେଳାଳି ଉପସ୍ଥିତ ଅଛନ୍ତି, ଫ୍ରାଞ୍ଚାଇଜ୍ କିନ୍ତୁ ସଞ୍ଜୁ ସାମସନଙ୍କ ଉପରେ ଭରସା କରି ତାଙ୍କୁ ଦେଇଛି ଏହି ଗୁରୁ ଦାୟିତ୍ୱ। ୱିକେଟ୍ କିପର-ବ୍ୟାଟ୍ସମ୍ୟାନ୍ ସାମସନ୍ ପ୍ରଥମ ଥର ପାଇଁ ଆଇପିଏଲରେ ଅଧିନାୟକ ଭାବେ ନଜର ଆସିବେ। ଆଇପିଏଲରେ ସାମସନ୍ ୧୦୭ ଟି ମ୍ୟାଚରେ ୨ ହଜାର ୫୮୪ ରନ୍ କରିଛନ୍ତି, ଯେଉଁଥିରେ ଦୁଇଟି ଶତକ ଏବଂ ୧୩ ଟି ଅର୍ଦ୍ଧଶତକ ବି ସାମିଲ ଅଛି । ଏଥିସହିତ ୩୫ଟି ୱିକେଟ୍ ବି ନେଇଛି ସାମସନ୍।

ଋଷଭ ପନ୍ତ: ଦିଲ୍ଲୀକ୍ୟାପିଟାଲ୍ସର ଅଧିନାୟକ ଶ୍ରେୟସ ଆୟର ଆହତ ଥିବା ଯୋଗୁଁ ୱିକେଟ୍ କିପର ବ୍ୟାଟ୍ସମ୍ୟାନ୍ ଋଷଭ ପନ୍ତଙ୍କୁ ମିଳିଛି ଅଧିନାୟକତ୍ୱର ଦାୟିତ୍ୱ। ଏଥିସହିତ ପନ୍ତ ଆଇପିଏଲ ଇତିହାସରେ ପଞ୍ଚମ କନିଷ୍ଠ ଅଧିନାୟକ ହେବେ। ପନ୍ତ ୬୮ ଟି ଆଇପିଏଲ୍ ମ୍ୟାଚ୍ ରେ ୨ହଜାର ୭୯  ରନ୍ ସଂଗ୍ରହ କରିଛନ୍ତି । ଆଉ ଏଥିମଧ୍ୟରେ ରହିଛି ଗୋଟିଏ ଶତକ ଏବଂ ୧୨ଟି ଅର୍ଦ୍ଧଶତକ। ୱିକେଟ୍ ପଛରେ ପନ୍ତ ଏପର୍ଯ୍ୟନ୍ତ ୫୪ଟି ୱିକେଟ୍ ନେଇଛନ୍ତି, ଯେଉଁଥିରେ ରହିଛି ୪୩ ଟି କ୍ୟାଚ୍ ଏବଂ ୧୧ଟି ଷ୍ଟମ୍ପିଂ ରହିଛି।

ଛତିଶଗଡ଼ ସୀମାନ୍ତରେ ନକ୍ସଲ ହମ୍‌ଲା, ଟ୍ୱିଟ୍‌ କରି ନିନ୍ଦା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ

ଭୁବନେଶ୍ୱର: ଛତିଶଗଡ଼ ସୀମାନ୍ତ ଅଞ୍ଚଳ ବିଜାପୁରରେ ନକ୍ସଲ ଆକ୍ରମଣ ଘଟଣାକୁ ତୀବ୍ର ନିନ୍ଦା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେ ଏଭଳି ହିଂସା ଘଟଣାକୁ ନିନ୍ଦା କରିବା ସହ ୨୨ ସହିଦ ଯବାନଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି । ଏହାସହ ଶୋକ ସନ୍ତପ ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି । ଏହାସହ ଯେଉଁ ଯବାନମାନେ ଏହି ନକ୍ସଲଙ୍କ ଆକ୍ରମଣରେ ଗୁରୁତର ହୋଇଛନ୍ତି ସେମାନଙ୍କ ଆଶୁ ଆରୋଗ୍ୟ କାମନା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ସୂଚନାଯୋଗ୍ୟ, ଶନିବାର କମ୍ବିଂ ଅପରେସନ୍‌ ବେଳେ ଅଚାନକ ସୁରକ୍ଷାକର୍ମୀଙ୍କ ଉପରକୁ ଆଖିବୁଜା ଗୁଳି ଚାଳନା କରିଥିଲେ ନକ୍ସଲ । ଏହାର ପାଲଟା ଜବାବ ଦେବାକୁ ଚେଷ୍ଟା କରିଥିଲେ ସୁରକ୍ଷା କର୍ମୀ । ଏହି ଗୁଳିବିନିମୟରେ ୨୩ ଜଣ ଯବାନ ସହିଦ ହୋଇଛନ୍ତି । ଏବେ ବି ୨୦ରୁ ଉର୍ଦ୍ଧ୍ୱ ଯବାନ ନିଖୋଜ ଅଛନ୍ତି । ଏମିତିକି ଏହି ଯବାନ ମାନଙ୍କୁ ଉଦ୍ଧାର କରିବାକୁ ଯାଇଥିବା ବେଳେ ପୁଣି ଏକ ବିସ୍ଫୋରଣ ହୋଇଥିଲା । ଏଥିରେ ଆଉ ଜଣେ ଯବାନ ଗୁରୁତର ହୋଇଛନ୍ତି ।

ବିନା ଦର୍ଶକରେ ଖେଳାଯିବ IPLର ସମସ୍ତ ମ୍ୟାଚ୍: BCCI

ମୁମ୍ବାଇ: ଇଣ୍ଡିଆନ୍ ପ୍ରିମିୟର୍ ଲିଗ୍ (IPL)ର ୧୪ ତମ ସଂସ୍କରଣ ବିନା ଦର୍ଶକରେ ଖେଳାଯିବ । ଏନେଇ ବିସିସିଆଇ ଉପ ସଭାପତି ରାଜୀହ ଶୁକ୍ଳା ସୂଚନା ଦେଇଛନ୍ତି । ବଢ଼ୁଥିବା କୋଭିଡ୍ ସଂକ୍ରମଣକୁ ଦେଖି ବିସିସିଆଇ ଏଭଳି ନିଷ୍ପତ୍ତି ନେଇଛି । ଦେଶର ୬ଟି ଷ୍ଟାଡିୟମରେ ଆଇପିଏଲର ସମସ୍ତ ମ୍ୟାଚ୍ ଖେଳାଯିବ । ଆସନ୍ତା ୯ ତାରିଖରୁ ଆରମ୍ଭ ହେବ ଆଇପିଏଲ୍ ।

କରୋନା ସଂକ୍ରମଣକୁ ଦୃଷ୍ଟିରେ ରଖି ପ୍ରତି ଟିମରେ ଖେଳାଳିଙ୍କ ସଂଖ୍ୟା ଯଥେଷ୍ଟ ବୃଦ୍ଧି କରାଯାଇଛି । ସମସ୍ତ ଖେଳାଳିଙ୍କୁ ଟିକାକରଣ କରିବା ପାଇଁ ବିସିସିଆଇ ସ୍ୱାସ୍ଥ୍ୟ ମନ୍ତ୍ରଣାଳୟ ସହ ଆଲୋଚନା କରୁଥିବା ସୂଚନା ଦେଇଛନ୍ତି ରାଜୀବ ଶୁକ୍ଳା ।