spot_img
Home Blog Page 5884

ବିଜୟର ଚୌକା ମାରିବାକୁ ଆଜି ମଇଦାନକୁ ଓହ୍ଲାଇବେ କ୍ୟାପଟେନ କୋହଲି, ଅଟକାଇ ପାରିବେ କି ସଞ୍ଜୁ ସ୍ୟାମସନ ?

0

ମୁମ୍ବାଇ: ଆଇପିଏଲ ସିଜିନ ୧୪ର ୧୬ ନମ୍ବର ମ୍ୟାଚରେ ଗୁରୁବାର ମୁମ୍ବାଇରେ ରୟାଲ ଚାଲେଞ୍ଜର୍ସ ବାଙ୍ଗାଲୁରୁ ଏବଂ ରାଜସ୍ଥାନ ରୟାଲ୍ସ ମଧ୍ୟରେ ମ୍ୟାଚ ହେବାକୁ ଯାଉଛି । ତିନୋଟି ମ୍ୟାଚରେ ବିଜୟ ସହ ଆତ୍ମବିଶ୍ୱାସରେ ଭରପୂର ବାଙ୍ଗାଲୁରୁ ଟିମ ନିଜ ବିଜୟ ଅଭିଯାନକୁ ଆଗରୁ ବଢ଼ାଇବା ପାଇଁ ଆଜି ମଇଦାନକୁ ଓହ୍ଲାଇବେ । ମୁମ୍ବାଇର ୱାଙ୍ଖେଡେ ଷ୍ଟାଡିୟମରେ ଆସି ଏହି ମ୍ୟାଚ ଅନୁଷ୍ଠିତ ହେବାକୁ ଯାଉଛି । ଉଭୟ ଟିମ ଚଳିତ ସିଜିନରେ ନିଜ ଅଭିଯାନ ବିପରିତ ଅନ୍ଦାଜରେ ଆରମ୍ଭ କରିଥିଲେ । ଆରସିବି ଲଗାତାର ତିନୋଟି ମ୍ୟାଚରେ ବିଜୟ ହାସଲ କରିଥିବା ବେଳେ ରାଜସ୍ଥାନ ରୟାଲ୍ସ ତିନୋଟି ମ୍ୟାଚ ମଧ୍ୟରେ କେବଳ ଗୋଟିଏ ମ୍ୟାଚରେ ବିଜୟ ହାସଲ କରିପାରିଛି ।

RCB Vs RR: କଣ କହୁଛି ଅଙ୍କ ?

ଆଇପିଏଲ ରେକର୍ଡ କଥା କହିବାକୁ ଗଲେ RCB ଏବଂ RR ମଧ୍ୟରେ (୨୦୦୮-୨୦୨୦) ୨୨ଟି ମ୍ୟାଚ ଖେଳାଯାଇଛି । ଉଭୟ ଟିମ ୧୦-୧୦ଟି ମ୍ୟାଚରେ ବିଜୟ ହାସଲ କରିଛନ୍ତି । ରାଜସ୍ଥାନ ରୟାଲ୍ସ ଲଗାତାର ଭଲ ପ୍ରଦର୍ଶନ କରିବାରେ ବିଫଳ ହୋଇଛି । ଅଧିନାୟକ ସଞ୍ଜୁ ସାମସନ ପଞ୍ଜାବ କିଙ୍ଗସଙ୍କ ବିପରିତ ମ୍ୟାଚରେ ଶାନଦାର ଶତକ କରି ମ୍ୟାଚକୁ ବିଜୟର ପାଦ ଦେଶରେ ପହଞ୍ଚାଇଥିଲେ କିନ୍ତୁ ବିଜୟ ହାସଲ କରିବାରେ ବିଫଳ ହୋଇଥିଲେ । ଦିଲ୍ଲୀ କ୍ୟାପିଟାଲ ବିପକ୍ଷରେ ଦକ୍ଷିଣ ଆଫ୍ରିକାର ଡେବିଡ ମିଲର ଏବଂ କ୍ରିସ ମୋରିସଙ୍କ ଯୋଗୁଁ ଟିମ ବିଜୟ ହାସଲ କରିବାରେ ସଫଳ ହୋଇଥିଲା ।

ବିଜୟ ପାଇଁ ରାଜସ୍ଥାନ ରୟାଲ୍ସକୁ କଣ କରିବା ଉଚିତ  ?

ଚେନ୍ନାଇ ସୁପର କିଙ୍ଗସ୍ ବିପକ୍ଷରେ ଟ୍ୟାଟସ ମ୍ୟାନ ଜୋଶ୍ ବଟଲର ଖବ ଭଲ ପ୍ରଦର୍ଶନ କରିଥିଲେ କିନ୍ତୁ ତାଙ୍କୁ ଅନ୍ୟ ବ୍ୟାଟସମ୍ୟାନଙ୍କ ସମର୍ଥନ ମିଳିପାରି ନଥିଲା । ରାଜସ୍ଥାନକୁ ଯଦି ବିଜୟ ଦରକାର ତେବେ ଟିମକୁ ଏକଜୁଟ ହୋଇ ଭଲ ପ୍ରଦର୍ଶନ କରିବାକୁ ପଡ଼ିବ ।

RCB ପାଖରେ ଅଛନ୍ତି ‘ହିରୋ’ ଗ୍ଲେନ ମ୍ୟାକ୍ସୱେଲ:

ଆରସିବି ପାଇଁ  ଅନୁଭବି ଏବି ଡେଭିଲିୟର୍ସ  ଏବଂ ଚଳିତ ସିଜିନରେ ଟିମ ସହ ଯୋଡ଼ି ହୋଇଥିବା ଗ୍ଲେନ ମ୍ୟାକ୍ସୱେଲ ଶାନଦାର ପ୍ରଦର୍ଶନ କରିଛନ୍ତି । ଡେଭିଲିୟର୍ସ ପ୍ରତି ସିଜିନରେ ନିଜର ଶାନଦାର ଖେଳ ଜାରି ରଖିଛନ୍ତି । ଅନ୍ୟପଟେ ମ୍ୟାକ୍ସୱେଲଙ୍କ ଟିମରେ ସାମିଲ ହେବା ଟିମକୁ ଆହୁର ମଜଭୁତ କରିବ ।

ବିଏମ୍‌ସିରେ ବଢ଼ିଲା RRT ବା ରାପିଡ଼ ରେସପନ୍ସ ଟିମ୍ ସଂଖ୍ୟା

ଭୁବନେଶ୍ୱର: ଭୁବନେଶ୍ୱର ମହାନଗର ନିଗମରେ ବଢ଼ିଲା RRT ବା ରାପିଡ଼ ରେସପନ୍ସ ଟିମ୍ ସଂଖ୍ୟା। ବିଏମସିର ୬୭ଟି ଓ୍ୱାର୍ଡ ପାଇଁ ୩୯ ଟିମ ରହିଛନ୍ତି। ପୂର୍ବରୁ ପ୍ରତି ଜୋନରେ ୮ଟି ଲେଖାଏଁ ହିସାବରେ ମୋଟ ୨୪ଟି RRT ଥିଲା। ଏବେ ପ୍ରତି ଜୋନ ପାଇଁ ୧୩ଟି ଲେଖାଏଁ ଟିମ ନିୟୋଜିତ ହୋଇଛନ୍ତି। ପ୍ରତି ଟିମରେ ଅଛନ୍ତି ଜଣେ ଡାକ୍ତର ଓ କୋଭିଡ ସଚେତକ ଓ ଜଣେ ଏଏନମ ରହିଛନ୍ତି। ଘର ଘର ବୁଲି ଲୋକଙ୍କ ସ୍ୱାସ୍ଥ୍ୟ ଅବସ୍ଥା ବୁଝିବା, ତଥ୍ୟ ସଂଗ୍ରହ ଓ ଔଷଧ ବାଣ୍ଟିବା କାର୍ଯ୍ୟରେ ଟିମ୍‌ ନିୟୋଜିତ ହୋଇଛନ୍ତି। ପ୍ରତି ଯୋନରେ ଗୋଟିଏ ସ୍ୱତନ୍ତ୍ର ସେଣ୍ଟ୍ରାଲ ଟିମ ମଧ୍ୟ କାର୍ଯ୍ୟ କରୁଛି। ସୋସିଆଲ ମିଡିଆ ଓ ହ୍ୱାଟସାପ୍ ଗ୍ରୁପ ଜରିଆରେ ସ୍ଥିତିକୁ ନିୟନ୍ତ୍ରଣ କରୁଛି ଟିମ୍। କଣ୍ଟାକ୍ଟ ଟ୍ରେସିଂ ଟିମ୍ ସଂଖ୍ୟା ବୃଦ୍ଧି କରାଯାଇଛି। ସ୍ୱତନ୍ତ୍ର କୋଭିଡ ଆମ୍ବୁଲାନ୍ସ ସଂଖ୍ୟା ୧୮ରୁ ୨୮କୁ ବୃଦ୍ଧି କରାଯାଇଛି। ଭୁବନେଶ୍ୱରରେ ୫ହଜାର ଶଯ୍ୟା ବ୍ୟବସ୍ଥା କରିବାକୁ ଟାର୍ଗେଟ ରଖିଛି ବିଏମସି। ଆବଶ୍ୟକତା ଅନୁଯାୟୀ ହସ୍ପିଟାଲ ସହିତ ଶଯ୍ୟା ସଂଖ୍ୟା ଓ ଅକ୍ସିଜେନ ବୃଦ୍ଧିକୁ ଗୁରୁତ୍ୱ ଦେଉଛି ବିଏମସି।

ଦିଲ୍ଲୀକୁ ଅମ୍ଲଜାନ ଯୋଗାଇ ଦେବ ଓଡ଼ିଶା, ନବୀନଙ୍କୁ ଧନ୍ୟବାଦ କହିଲେ କେଜ୍ରିୱାଲ

ନୂଆଦିଲ୍ଲୀ: କୋଭିଡ୍-୧୯ ମହାମାରୀର ଦ୍ୱିତୀୟ ପର୍ଯ୍ୟାୟ ଆକ୍ରମଣରେ ବେହାଲ ଦିଲ୍ଲୀକୁ ସହାୟତାର ହାତ ବଢାଇଛି ଓଡ଼ିଶା। ଦିଲ୍ଲୀରେ ଅମ୍ଲଜାନ ଅଭାବ କାରଣରୁ ହସ୍ପିଟାଲରେ ରୋଗୀଙ୍କ ଅବସ୍ଥା ସାଂଘାତିକ ହୋଇଛି। ଏହାରି ଭିତରେ ଓଡ଼ିଶା ଦିଲ୍ଲୀକୁ ଅମ୍ଲଜାନ ଯୋଗାଇ ଦେବା ବୋଲି ଘୋଷଣା କରିଛି। ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସହ ଫୋନ ଯୋଗେ କଥା ହୋଇଥିଲେ।

ଅରବିନ୍ଦ ନିଜେ ଟ୍ୱିଟ୍ କରି ଏହି ସୂଚନା ଦେଇଛନ୍ତି। ଅରବିନ୍ଦ ଟ୍ୱିଟରେ ଲେଖିଛନ୍ତି ଯେ, କିଛି ସମୟ ପୂର୍ବରୁ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଫୋନ୍ କଲ ମୁଁ ଗ୍ରହଣ କରିଥିଲି। ଦିଲ୍ଲୀକୁ ଆବଶ୍ୟକ ଅମ୍ଲଜାନ ଯୋଗାଇ ଦେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭରସା ଦେଇଛନ୍ତି। ଏଥିପାଇଁ ସେ ଜଣେ ଅଧିକାରୀଙ୍କୁ ବିଶେଷ ଭାବେ ନିଯୁକ୍ତ କରିଛନ୍ତି। ଧନ୍ୟବାଦ ସାର। ଦିଲ୍ଲୀ ଆପଣଙ୍କ ପାଖରେ ଋଣି।

ସୂଚନାଯୋଗ୍ୟ ଯେ, ଦେଶର ବିଭିନ୍ନ ସ୍ଥାନରେ ଅମ୍ଲଜାନ ଅଭାବ ଦେଖା ଦେଇଥିବା ବେଳେ ଓଡ଼ିଶା ସରକାରଙ୍କ ଆଗୁଆ ପଦକ୍ଷେପ କାରଣରୁ ରାଜ୍ୟରେ ଯଥେଷ୍ଟ ପରିମାଣର ଅମ୍ଲଜାନ ମହଜୁଦ ରହିଛି। ଦିଲ୍ଲୀ ହାଇକୋର୍ଟ ମଧ୍ୟ ଓଡ଼ିଶା ସରକାରଙ୍କ ପଦକ୍ଷେପକୁ ପ୍ରଂଶସା କରିଛନ୍ତି।

ଜେଏସ୍‌ପିଏଲ ଅନୁଗୁଳରେ ୫ଶହ ଟନ୍ ତରଳ ଅମ୍ଳଜାନ ଷ୍ଟକ୍ ଉପଲବ୍ଧ, ଆବଶ୍ୟକତା ଅନୁଯାୟୀ ମେଡିକାଲକୁ ଦେବ ଅମ୍ଳଜାନ

ଭୁବନେଶ୍ୱର: କରୋନା ସଂକ୍ରମଣ ବୃଦ୍ଧି କାରଣରୁ ଦେଶରେ ଏବେ ଅମ୍ଳଜାନର ଘୋର ଅଭାବ ଦେଖା ଦେଲାଣି। ଦେଶର ବିଭିନ୍ନ ସ୍ଥାନରେ ଅମ୍ଳଜାନ ଅଭାବରୁ ଲୋକଙ୍କର ମୃତ୍ୟୁ ହେଉଛି। ଏଭଳି ପରିସ୍ଥିତି ଯେମିତି ଓଡ଼ିଶାରେ ଆଗକୁ ନହୁଏ ସେଥିପାଇଁ ଆଗେଇ ଆସିଛି ଇସ୍ପାତ କମ୍ପାନୀ ଜିନ୍ଦଲ ଷ୍ଟିଲ। କୋଭିଡ-19 ରୋଗୀମାନଙ୍କ ଚିକିତ୍ସା ନିମନ୍ତେ ଜରୁରୀ ଆବଶ୍ୟକତାକୁ ଦୃଷ୍ଟିରେ ରଖି ଇସ୍ପାତ ନିର୍ମାତା ଜିନ୍ଦଲ ଷ୍ଟିଲ ଏହାର ଅନୁଗୁଳ ଷ୍ଟିଲ କାରଖାନାରେ ୫ଶହ ଟନରୁ ଅଧିକ ତରଳ ଅମ୍ଳଜାନ ଷ୍ଟକ ଉପଲବ୍ଧ ଅଛି ବୋଲି ଏକ ଟ୍ଵିଟର ପୋଷ୍ଟରେ ଘୋଷଣା କରିଛି।

“ଆମେ ବ୍ୟବହାରକାରୀଙ୍କ ଟ୍ୟାଙ୍କର୍ ପଠାଇବାକୁ ଅପେକ୍ଷା କରିଛୁ ବୋଲି ସେ ଟୁଇଟରେ କହିଛନ୍ତି। ପ୍ରଥମେ ଆସିଥିବା ସେବା ଭିତ୍ତିରେ କିମ୍ବା ଇସ୍ପାତ ମନ୍ତ୍ରଣାଳୟ ଦ୍ଵାରା ସ୍ଥିର କରାଯାଇଥିବା ପ୍ରାଥମିକତା ଅନୁଯାୟୀ ଆମେ ମେଡିକାଲକୁ ଅକ୍ସିଜେନ ଯୋଗାଇଦେବୁ” ବୋଲି ଏହି ଟ୍ଵିଟର ପୋଷ୍ଟରେ କମ୍ପାନୀ ଘୋଷଣା କରିଛି।

ଜେଏସପିଏଲର ଚେୟାରମ୍ୟାନ୍ ନବୀନ ଜିନ୍ଦଲ ଏହାର ଓଡ଼ିଶା ଏବଂ ଛତିଶଗଡ ୟୁନିଟରୁ ମେଡିକାଲ ଅକ୍ସିଜେନ ଯୋଗାଇବାକୁ ଘୋଷଣା କରିଥିଲେ। ଜିନ୍ଦଲ କକହିଥିଲେଯେ ବିପର୍ଯ୍ୟୟ ଏବଂ ଜରୁରୀକାଳୀନ ପରିସ୍ଥିତିରେ ଜେଏସପିଏଲ ଦେଶ ତଥା ଦେଶବାସୀଙ୍କ ସହ ସର୍ବଦା ଛିଡ଼ା ହୋଇଛି ଏବଂ ଏହି ମହାମାରୀ ସମୟରେ ଏହା ଜାରି ରଖିବ। ଗତ ବର୍ଷ ଜେଏସପିଏଲ୍ କୋଭିଡ-19 ସମୟରେ ଓଡ଼ିଶାରେ ୭୨୫ ଟନ୍ ମେଡିକାଲ ଅମ୍ଳଜାନ ଯୋଗାଇ ଦେଇଥିଲା।

କରୋନା ସ୍ଥିତିକୁ ନେଇ କେନ୍ଦ୍ରକୁ ସୁପ୍ରିମକୋର୍ଟଙ୍କ ପ୍ରଶ୍ନ, କଣ ରହିଛି ଜାତୀୟ ପ୍ଲାନ୍ ?

ନୂଆଦିଲ୍ଲୀ: ଦିନକୁ ଦିନ ଦେଶରେ କରୋନା ଜନିତ ସଂକଟ ଗମ୍ଭୀର ହେବାରେ ଲାଗିଛି । ଦେଶର ବିଭିନ୍ନ ସ୍ଥାନରେ ଅମ୍ଲଜାନ ସଂକଟ ସୃଷ୍ଟି ହେଲାଣି । ଏହାରି ଭିତରେ ସୁପ୍ରିମକୋର୍ଟ ମାମଲାରେ ହସ୍ତକ୍ଷେପ କରିଛନ୍ତି । ନିଜ ତରଫରୁ ମାମଲାକୁ ବିଚାର ପାଇଁ ଗ୍ରହଣ କରି ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି । ଜାତୀୟସ୍ତରରେ କରୋନା ମୁକାବିଲା ପାଇଁ କେନ୍ଦ୍ର ସରକାରଙ୍କ କ’ଣ ପ୍ଲାନ୍ ରହିଛି ବୋଲି ସୁପ୍ରିମକୋର୍ଟ କେନ୍ଦ୍ରକୁ ପଚାରିଛନ୍ତି ।

ସଲିସିଟର ଜେନରାଲ ତୁଷାର ମେହଟା ଗୁରୁବାର ଦିନ ସର୍ବୋଚ୍ଚ ଅଦାଲତଙ୍କୁ କହିଥିଲେ ଯେ, ଦେଶ ଏବେ ଅମ୍ଲଜାନ ଆବଶ୍ୟକ କରୁଛି । ସୁପ୍ରିମକୋର୍ଟ ଅମ୍ଲଜାନ ଯୋଗାଣ ଓ ଆବଶ୍ୟକ ଔଷଧ ପ୍ରସଙ୍ଗକୁ ନିଜ ତରଫରୁ ବିଚାରକୁ ନେଇ କେନ୍ଦ୍ରକୁ ଏହି ନୋଟିସ ଜାରି କରିଛନ୍ତି । ପ୍ରଧାନ ବିଚାରପତି ଏସଏ ବୋବଡେ କହିଛନ୍ତି ଯେ, ଅଦଲାତ ଶୁକ୍ରବାର ଦିନ ମାମଲାର ଶୁଣାଣି କରିବେ । ପ୍ରଧାନ ବିଚାରପତିଙ୍କୁ ନେଇ ଗଠିତ ତିନି ଜଣିଆ ଖଣ୍ଡପୀଠ ସଲିସିଟର ଜେନରାଲଙ୍କ କୋଭିଡ୍ ଉପରେ ରାଷ୍ଟ୍ରୀୟ ଯୋଜନା ବନାଇ ଅଦାଲତଙ୍କ ସମ୍ମୁଖରେ ରଖିବାକୁ କହିଛନ୍ତି ।

ଏହି ପ୍ରସଙ୍ଗ ଉପରେ ଜାତୀୟ ନୀତି ଚାହାନ୍ତି ସୁପ୍ରିମକୋର୍ଟ୍

କୋଭିଡ୍-୧୯କୁ ନେଇ ଅଲଗା ଅଲଗା ୬ଟି ହାଇକୋର୍ଟଙ୍କ ଶୁଣାଣି ଭ୍ରମ ସୃଷ୍ଟି କରିପାରେ ବୋଲି ସୁପ୍ରିମକୋର୍ଟ କହିଛନ୍ତି । ତେଣୁ ସୁପ୍ରିମକୋର୍ଟ ଅମ୍ଲଜାନ, ଆବଶ୍ୟକ ଔଷଧ ଓ ଟିକାକରଣ ଭଳି ପ୍ରସଙ୍ଗ ଉପରେ ଜାତୀୟ ନୀତି ଚାହାନ୍ତି । କୋର୍ଟ ଏହି ମାମଲାରେ ବରିଷ୍ଠ ଓକିଲ ହରିଶ ସାଲଭେଙ୍କୁ ଅଦାଲତ ମିତ୍ର ଭାବେ ନିଯୁକ୍ତ କରିଛନ୍ତି । ଏହା ସହ କୋଭିଡ୍ ମହାମାରୀ ମଧ୍ୟରେ ଲକଡାଉନ୍ ପାଇଁ ହାଇକୋର୍ଟଙ୍କ ପାଖରେ ଆଦେଶ ଦେବାର ନ୍ୟାୟିକ କ୍ଷମତା ରହିଛି କି ନାହିଁ ତାହାର ମଧ୍ୟ ସୁପ୍ରିମକୋର୍ଟ ସମୀକ୍ଷା କରିବେ । ସୂଚନାଯୋଗ୍ୟ ଯେ, ନିକଟରେ ଆହ୍ଲାବାଦ ହାଇକୋର୍ଟ ଉତ୍ତର ପ୍ରଦେଶର ୫ ସହରରେ ଲକାଡାଉନ୍ ଲଗାଇବାକୁ ଆଦେଶ ଦେଇଥିଲେ । ଯାହାକୁ ବିରୋଧ କରି ଉତ୍ତର ପ୍ରଦେଶ ସରକାର ସୁପ୍ରିମକୋର୍ଟକୁ ଯାଇଥିଲେ । ସୁପ୍ରିମକୋର୍ଟ ହାଇକୋର୍ଟଙ୍କ ରାୟ ଉପରେ ରହିତାଦେଶ ଲଗାଇଥିଲେ ।

ସୂଚନାଯୋଗ୍ୟ ଯେ,ଭାରତରେ କରୋନାର ଦ୍ୱିତୀୟ ପର୍ଯ୍ୟାୟରେ ଅଧିକରୁ ଅଧିକ ଲୋକ ସଂକ୍ରମିତ ହେଉଛନ୍ତି । ଗୋଟିଏ ଦିନରେ ସଂକ୍ରମିତଙ୍କ ସଂଖ୍ୟା ୩ ଲକ୍ଷ ପାର କରିଲାଣି । ଦେଶର ଅନେକ ସହରରେ ଅକ୍ସିଜେନ୍ ଅଭାବ କାରଣରୁ ଲୋକଙ୍କ ଜୀବନ ମଧ୍ୟ ଯାଉଛି ।

ଖୋଲିଲା ଝରାଫୁଲ ମୃତ୍ୟୁର ରହସ୍ୟ, ଦେଇଥିବା ୩୦ହଜାର ଟଙ୍କା ଫେରସ୍ତ ମାଗିବାରୁ ଝରାଫୁଲକୁ ମଦ ଦେଇ ହତ୍ୟା କରିଥିଲା ରାକେଶ

ଯାଜପୁର: ରମାଦେବୀ ଛାତ୍ରୀ ଝରାଫୁଲ ନାୟକ ମୃତ୍ୟୁ ଘଟଣା। ଫେରାର ଅଭିଯୁକ୍ତ ଶକ୍ତି ଶେଖର ସ୍ୱାଇଁ ଗିରଫ ପରେ ଖୋଲିଲା ମୃତ୍ୟୁର ରହସ୍ୟ। ଏ ନେଇ ସୂଚନା ଦେଇଛନ୍ତି ଯାଜପୁର ଏସପି କହିଛନ୍ତି, ଟଙ୍କା ଦେଣନେଣକୁ ନେଇ ହତ୍ୟା କରିଥିବା କହିଛି ମୁଖ୍ୟ ଅଭିଯୁକ୍ତ ତଥା ପ୍ରେମିକ ରାକେଶ ସ୍ୱାଇଁ। ପାଖାପାଖି ୩୦ହଜାର ଟଙ୍କା ଝରାଫୁଲଠାରୁ ନେଇଥିଲା ରାକେଶ। ପରବର୍ତ୍ତି ସମୟରେ ଝରଫୁଲ ପଇସା ମାଗିବାରୁ ହତ୍ୟାକରିବାକୁ ଯୋଜନା କରିଥିଲା ରାକେଶ। ଝରାଫୁଲ ବାରମ୍ବାର ଟଙ୍କା ମାଗିବା ସହ ଘରେ କହିଦେବାକୁ ଧମକ ଦେଇଥିଲା। ଝରାଫୁଲର ଧମକ୍‌ରେ ଅତିଷ୍ଟ ହୋଇପଡ଼ିଥିଲା ରାକେଶ। ଧମକ ପରେ ପରାକେଶର ପ୍ରେମ ଷଡ଼ଯନ୍ତ୍ରରେ ପରିଥତ ହୋଇଥିଲା। ଏହାପରେ ଝରାଫୁଲକୁ ମାରିବା ପାଇଁ ରାକେଶ କରିଥିଲଶ ପ୍ଲାନ୍‌।

ପ୍ଲାନ୍‌ ମୁତାବକ ଜାନୁଆରୀ ୨୬ ତାରିଖ ରାତିରେ ଝରାଫୁଲକୁ ହୋଟେଲ ନେଇଥିଲା ରାକେଶ। ହୋଟେଲରେ ମଦ ପିଇବାକୁ ଦେବାପରେ ଶ୍ୱାସରୁଦ୍ଧ କରି ଝରାଫୁଲଙ୍କୁ ରାକେଶ ହତ୍ୟା କରିଥିଲା ବୋଲି କହିଛନ୍ତି ଯାଜପୁର ଏସପି। ଜାନୁଆରୀ ୨୭ ତାରିଖ ଦିନ ଯାଜପୁର ଜିଲ୍ଲା କୁଆଖିଆ ଥାନା ରାଜେନ୍ଦ୍ରପୁର ନିକଟ ରାସ୍ତା କଡ଼ରୁ ଝରାଫୁଲ ନାୟକଙ୍କ ମୃତଦେହ ମିଳିଥିଲା। ପରେ ଏକ ସିସିଟିଭି ଫୁଟେଜକୁ ଆଧାର କରି କୁଆଖିଆ ପୋଲିସ୍‌ ତଦନ୍ତ କରିଥିଲା।

ଏହାପରେ ଝରାଫୁଲଙ୍କ ବାପା କୁଆଖିଆ ଥାନାରେ ଲିଖିତ ଅଭିଯୋଗ କରିବା ସହ ରାକେଶ ସ୍ୱାଇଁ ନାମକ ଯୁବକର ସଂପୃକ୍ତି ନେଇ ସୂଚନା ଦେଇଥିଲେ। ପୋଲିସ ସେହି ଦିଗରେ ତଦନ୍ତ କରିଥିଲା। ମୁଖ୍ୟ ଅଭିଯୁକ୍ତ ରାକେଶ ସ୍ୱାଇଁକୁ ଭୁବନେଶ୍ୱରରୁ ଗିରଫ କରାଯାଇଥିଲା। ଯାଜପୁର ପୋଲିସ ତାକୁ ୩ ଦିନିଆ ରିମାଣ୍ଡରେ ନେଇ ପଚରାଉଚରା କରିବା ପରେ ଏବେ ସେ ଯାଜପୁର ସବ୍ ଜେଲରେ ରହିଛି।

କରୋନା ପାଇଁ ମରିଯାଉଛି ମାନବିକତା, ମୃତ୍ୟୁ ପରେ ମିଳିଲାନି ସାହିଭାଇଙ୍କ ସାହାଯ୍ୟ କି ହାତବଢ଼ାଇଲାନି ପ୍ରଶାସନ

ବରଗଡ଼: କରୋନା ବେଳର କରୁଣ କାହାଣୀ। ଗୋଟିଏ ପରେ ଗୋଟିଏ ହୃଦୟ ବିଦାରକ ଚିତ୍ର ଆଙ୍କି ଚାଲିଛି କରୋନା। କରୋନାକୁ ଭୟକରି ସମ୍ପର୍କ ଆଜି କ୍ଷଣିକ ସମୟରେ ବଦଳି ଯାଉଛି। ସାହାଯ୍ୟର ହାତ ହତାସ ହୋଇ ଅଧା ବାଟରେ ଅଟକି ଯାଉଛି। ମନ ଚାହୁଁଛି ମୃତ୍ୟୁର ଶେଷ ସମୟରେ ଯୋଗ ଦେବା ପାଇଁ, ହେଲେ ପଛରୁ ଟାଣି ଧରୁଛି କରୋନା ସଂକ୍ରମଣର ଭୟ। ଏମିତି ଏକ ଘଟଣା ଦେଖିବାକୁ ମିଳିଛି ବରଗଡ଼ ଜିଲ୍ଲାରେ। ଯେଉଁଠି ପ୍ରଶାସନବି ହାତ ଛାଡ଼ି ଦେଇଛି ସାହାଯ୍ୟର ଅଧା ରାସ୍ତାରେ। କରୋନା ପାଇଁ ଆଜି ଚାରି କାନ୍ଧ ମିଳିବା ସ୍ୱପ୍ନ ପୋଲଟିଛି।

ପୁଅ ପରେ ବାପାର ଜୀବନ ନେଲା ଭୂତାଣୁ। ଜୀବନ ଗଲା ପରେ ବି ଜୁଇ ପାଇଁ ମିଳିଲାନି ସାହି ଭାଇଙ୍କ ସହଯୋଗ। ପ୍ରଶାସନ ବି ହାତ ଟେକିଦେଲା ପରେ ସମାଜସେବୀଙ୍କ  ସହାୟତାରେ ହେଲା ଶେଷ କୃତ୍ୟ। ଏଭଳି ହୃଦୟବିଦାରକ ଘଟଣା ଘଟିଛି ବରଗଡ଼ ପଦ୍ମପୁର ଉପଖଣ୍ଡ ଘନାମାଲ ଗାଁରେ। ଗତ ପାଞ୍ଚ ଦିନ ତଳେ ସତ୍ୟାନନ୍ଦଙ୍କ ୩୬ ବର୍ଷର ପୁଅର କରୋନାରେ ମୃତ୍ୟୁ ହୋଇଥିଲା। ପରେ ବାପା ସତ୍ୟାନନ୍ଦଙ୍କର ମଧ୍ୟ କରୋନାରେ ଜୀବନ ଗଲା। ହେଲେ ଭୂତାଣୁଠୁ ଆହୁରି କଷ୍ଟ ଦେଲା ସାହି ଭାଇଙ୍କ ଅଛୁଆଁ ରୋଗ।

କରୋନା ଆକ୍ରନ୍ତ ଯୋଗୁ ଗାଁ ଲୋକ ପାଖ ମାଡ଼ି ନଥିବାବେଳେ ପ୍ରଶାସନ ମଧ୍ୟ ହାତ ଟେକିଦେଲା। ମୁଁ ହୋମ କ୍ୱାରେଣ୍ଟାଇନରେ ଅଛି ତେଣୁ  ବିଡିଓଙ୍କୁ ଅଭିଯୋଗ କରନ୍ତୁ ବୋଲି ଉପଜିଲ୍ଲାପାଳ କହିଲେ। ସେପଟେ ବିଡିଓ  ସ୍ଥଆନୀୟ ସରପଞ୍ଚ  ଓ  GPOଙ୍କୁ ଦାୟିତ୍ୱ ଦେଇ ହାତ ଟେକିଦେଲେ। ନାଁ ସରପଞ୍ଚ ଦୁଃଖ ବୁଝିଲେ ନା ଶବ ଶତ୍କାର ପାଇଁ  ପ୍ରୟାସ କଲେ। ଶେଷରେ ୨୪ଘଣ୍ଟା ଶବ ପଡିରହିବା ପରେ ଦୁଇ ସମାଜସେବୀ ସଙ୍ଗଠନ ବରଗଡ଼ ସିଡିଏମଓଙ୍କ ସହାୟତାରେ ବିଳମ୍ବିତ ରାତିରେ ଶେଷକୃତ୍ୟ ସମ୍ପର୍ନ୍ନ କରିଥିଲେ। ତେବେ ଏଭଳି ସମୟରେ ସଂକଟ ବେଳେ କରୋନା ସହିତ ଯୁଦ୍ଧ କରିବାବେଳେ ମରିଯାଉଥିବା ମାନବିକତା ଚିନ୍ତାରେ ପକାଇଛି।

ଦିବଙ୍ଗତ ପ୍ରାର୍ଥୀ ଅଜିତ ମଙ୍ଗରାଜଙ୍କ ପରିବାରରୁ କେହି ପ୍ରାର୍ଥୀ ହେବେ ନାହିଁ : ପ୍ରଦୀପ ମାଝୀ

ଭୁବନେଶ୍ୱର: ପିପିଲି ଉପନିର୍ବାଚନ କଂଗ୍ରେସ ପ୍ରାର୍ଥୀ ଘୋଷଣା ପ୍ରସଙ୍ଗ। ଦିବଙ୍ଗତ ପ୍ରାର୍ଥୀ ଅଜିତ ମଙ୍ଗରାଜଙ୍କ ପରିବାରରୁ କେହି ପ୍ରାର୍ଥୀ ହେବେ ନାହିଁ ବୋଲି କଂଗ୍ରେସ କହିଛି। ଆଜି ସନ୍ଧ୍ୟାରେ ନୂଆ ପ୍ରାର୍ଥୀ ନାଁ ଘୋଷଣା କରିବ କଂଗ୍ରେସ। ଅଜିତ ମଙ୍ଗରାଜ ପରିବାରରୁ କେହି ରାଜି ନହେବାରୁ ୨ରୁ ୩ଜଣ ଆଶାୟୀଙ୍କ ମଧ୍ୟରୁ ଜଣକୁ ପ୍ରାର୍ଥୀ କରିବ ଦଳ। ଏନେଇ କଂଗ୍ରେସ ନେତା ତଥା ପ୍ରାର୍ଥୀ ଚୟନ କମିଟିର ମୁଖ୍ୟ ପ୍ରଦୀପ ମାଝୀ ସୂଚନା ଦେଇଛନ୍ତି। ତେବେ ମେ ୧୩ରେ ନିର୍ବାଚନ ହେବ ବୋଲି ଘୋଷଣା ହେବା ପରେ କଂଗ୍ରେସ ତାର ପ୍ରାର୍ଥୀ ଖୋଜିବାରେ ଲାଗିପଡ଼ିଛି।

ଏନେଇ କଂଗ୍ରେସ ଭବନରେ ପ୍ରାର୍ଥୀ ଚୟନ ନେଇ ଗତ ମଙ୍ଗଳବାର ଏକ ସବ୍‌ କମିଟି ବୈଠକ ବସିଥିଲା। ଏହି ବୈଠକ ଅଧ୍ୟକ୍ଷ ପ୍ରଦୀପ ମାଝୀଙ୍କ ଅଧ୍ୟକ୍ଷତାରେ ବସିଥିଲା। ଅଜିତ ମଙ୍ଗରାଜଙ୍କ ଦେହାନ୍ତ ପରେ କଂଗ୍ରେସରୁ କିଏ ପ୍ରାର୍ଥୀ ହେବ ସେନେଇ ଚିନ୍ତା ବଢିଥିଲା ଦଳର। ବୈଠକରେ ବହୁ କଂଗ୍ରେସ ନେତା ଉପସ୍ଥିତ ଥିବା ବେଳେ ଆସନ୍ତା ୨ଦିନ ମଧ୍ୟରେ ପ୍ରାର୍ଥୀଙ୍କ ନାଁ ଘୋଷଣା କରାଯିବ ବୋଲି କମିଟି ଅଧ୍ୟକ୍ଷ ପ୍ରଦୀପ ମାଝୀ ସୂଚନା ଦେଇଥିଲେ। ତେବେ ପିପିଲି ପାଇଁ ଅଜିତ ମଙ୍ଗରାଜଙ୍କ ପରିବାରରୁ ଜଣଙ୍କୁ ପ୍ରାର୍ଥୀ କରିବାକୁ ଦଳ ଚାହୁଁଛି ବୋଲି ବୈଠକ ଅବସରରେ ପ୍ରଦୀପ ମାଝୀ କହିଥିଲେ। କିନ୍ତୁ ତାହା ଏବେ ସମ୍ଭବ ହୋଇପାରିଲା ନାହିଁ । ଦିବଙ୍ଗତ ପ୍ରାର୍ଥୀ ଅଜିତ ମଙ୍ଗରାଜଙ୍କ ପରିବାରରୁ କେହି ରାଜି ହେଲେନାହିଁ ବୋଲି ଏବେ କଂଗ୍ରେସ ଆଉ କାହାକୁ ପିପିଲି ପାଇଁ ପ୍ରାର୍ଥୀ କରିପାରେ  ।

ଉଲ୍ଲେଖଯୋଗ୍ୟ, କଂଗ୍ରେସ ପ୍ରାର୍ଥୀ ଅଜିତ ମଙ୍ଗରାଜ କରୋନା ସଂକ୍ରମିତ ଚିହ୍ନଟ ହେବା ପରେ ଭୁବନେଶ୍ୱର ଏକ ଘରୋଇ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି ହୋଇଥିଲେ । କିନ୍ତୁ ବିଧିର ବିଧାନ କିଛି ଭିନ୍ନ ଥିଲା, ଚିକିତ୍ସାଧୀନ ଅବସ୍ଥାରେ ଏପ୍ରିଲ୍ ୧୪ରେ ତାଙ୍କର ମୃତ୍ୟୁ ଘଟିଥିଲା। ଆଉ ତାଙ୍କ ମୃତ୍ୟୁ ପରେ ଭାଙ୍ଗିପଡିଥିବା ପରିବାର ଉପରେ ଆଉ ଏକ ଦୁଃଖର ପାହାଡ ଭାଙ୍ଗି ପଡିଛି ଯେତେବେଳେ ସେହି କରୋନାରେ ଅଜିତଙ୍କ ମାଙ୍କର ମଧ୍ୟ ମୃତ୍ୟୁ ହୋଇଛି।

କରୋନା ବଢ଼ାଉଛି ଶକ୍ତି, ତିନୋଟି ଷ୍ଟ୍ରେନ୍ ମିଶି ହେଲେ ନୂଆ ଷ୍ଟ୍ରେନ୍ ଟ୍ରିପଲ ମ୍ୟୁଟାଣ୍ଟ

ନୂଆଦିଲ୍ଲୀ: ଦେଶରେ କରୋନାର ଟ୍ରିପଲ ମ୍ୟୁଟାଣ୍ଟକୁ ନେଇ ବଢ଼ିଲା ଟେନସନ। ପୂର୍ବ ତିନୋଟି ଷ୍ଟ୍ରେନ୍ ମିଳିତ ହୋଇ ଏକ ନୂତନ ଷ୍ଟ୍ରେନ୍ ବା ଟ୍ରିପଲ ମ୍ୟୁଟେସନ ସୃଷ୍ଟି ହୋଇଛି । ଯାହା ଡବଲ ମ୍ୟୁଟାଣ୍ଟ ତୁଳନାରେ ବହୁ ଅଧିକ କ୍ଷତିକାରକ । ପଶ୍ଚିମବଙ୍ଗରେ ଏହି ମ୍ୟୁଟେସନରେ ଆକ୍ରାନ୍ତଙ୍କ ସଂଖ୍ୟା ତୀବ୍ର ଗତିରେ ବଢ଼ିବାରେ ଲାଗିଲାଣି । ଯାହା ପଡୋଶୀ ରାଜ୍ୟ ଓଡ଼ିଶା ପାଇଁ ବିପଦଜ୍ଜନକସ୍ଥିତି ଉପୁଯାଇପାରେ ବୋଲି ସତର୍କ କରାଇଛନ୍ତି ବିଶେଷଜ୍ଞ। ପଶ୍ଚିମବଙ୍ଗରୁ ସୃଷ୍ଟି ହୋଇଥିବା ଏହି ସ୍ୱଦେଶୀ ଟ୍ରିପଲ ମ୍ୟୁଟେସନ ଆକ୍ରାନ୍ତଙ୍କ ଶରୀରରେ ଇମ୍ୟୁନୋ ସିଷ୍ଟମକୁ ଅତ୍ୟଧିକ ପ୍ରଭାବିତ କରୁଛି।

ଶରୀରରେ କରୋନା ଆଣ୍ଟିବଡ଼ି ରହିଥିଲେ ବି ଏହି ବେଙ୍ଗଲ ମ୍ୟୁଟେସନର ପ୍ରଭାବ ଅତି ମାରାତ୍ମକ ହେଉଛି ବୋଲି ବିଶେଷଜ୍ଞ କହିଛନ୍ତି। ଏହାଛଡ଼ା ଏହି ଷ୍ଟ୍ରେନ୍ ଅଧିକ ସଂକ୍ରାମକ। ଯାହା ଖୁବଶୀଘ୍ର ଜଣଙ୍କ ଶରୀରରୁ ଅନ୍ୟ ଜଣଙ୍କ ଶରୀରୁ ବ୍ୟାପିଥାଏ। ସବୁଠୁ ଚିନ୍ତାଜନକ କଥା ହେଉଛି, ଏହି ଷ୍ଟ୍ରେନରେ ଆକ୍ରାନ୍ତ ହେଲେ କରୋନା ଟିକାର ପ୍ରଭାବ ମଧ୍ୟ କାମ କରିବ ନାହିଁ। ଯାହା ଏବେ ବିଶେଷଜ୍ଞ ପାଇଁ ଚିନ୍ତା ବଢ଼ାଇ ଦେଇଛି। ଡବଲ ମ୍ୟୁଟାଣ୍ଟ ପାଇଁ ଦେଶରେ ହାହାକାର ସ୍ଥିତି ଉପୁଜିଥିବା ବେଳେ ନୂଆ ମ୍ୟୁଟାଣ୍ଟକୁ ପ୍ରତିହତ କରିବା ସହଜ ନୁହେଁ ବୋଲି ବିଶେଷଜ୍ଞ କହିଛନ୍ତି। ଅନ୍ୟପଟେ ଏହି ବେଙ୍ଗଲ ଷ୍ଟ୍ରେନ ଓଡ଼ିଶାକୁ ମଧ୍ୟ ବ୍ୟାପିବା ଆଶଙ୍କା ରହିଛି। ଯଦି ଏହି ମ୍ୟୁଟାଣ୍ଟ ଓଡ଼ିଶାକୁ ବ୍ୟାପେ ତାହେଲେ ଏହା ବହୁ କ୍ଷତି ଘଟାଇବ ବୋଲି ସତର୍କ କରାଇଛନ୍ତି CSIRର ଜେନମ ମ୍ୟୁଟେସନ ବିଶେଷଜ୍ଞ।

ନୂଆ ତ୍ରିପଲ୍ ମ୍ୟୁଣ୍ଟେଟ୍ କରୋନା ଭାଇରସରେ ନୂଆ ଜେନେଟିକ୍ ସେଟ୍ ଅଛି । ଏଥିରେ E484K ଭ୍ୟାରିଏଣ୍ଟର ଅଂଶ ରହିଛି । ନୂଆ ତ୍ରିପଲ୍ ମ୍ୟୁଣ୍ଟେଟ୍ ଶରୀରର ରୋଗ ପ୍ରତିଶେଧକ ଶକ୍ତି ନଷ୍ଟ କରୁଛି । ଏହାଛଡ଼ା ପୂର୍ବରୁ କରୋନା ସଂକ୍ରମିତ ହୋଇ ସୁସ୍ଥ ହୋଇଥିବା ଲୋକ ଦେହରେ ଥିବା ଆଣ୍ଟିବଡିକୁ ଏହା ନଷ୍ଟ କରି ଦେଉଥିବା ଜଣାପଡ଼ିଛି ।

ବୈଜ୍ଞାନିକଙ୍କ ଅନୁସାରେ, ପଶ୍ଚିମବଙ୍ଗରେ B.1.618 ଦ୍ରୁତଗତିରେ ବ୍ୟାପୁଛି । ପଶ୍ଚିମବଙ୍ଗରେ ଏହି ଭୂତାଣରୁ ସିକ୍ୱେନ୍ସ ମିଳିଛି । B.1.618 ଭ୍ୟାରିଏଣ୍ଟ ସହ ମେଳ ଖାଉଥିବା ଭାଇରସ୍ ଆମେରିକା, ସ୍ୱିଜରଲ୍ୟାଣ୍ଡ, ସିଙ୍ଗାପୁର ଓ ଫିନଲ୍ୟାଣ୍ଡରେ ମିଳିଛି । ଦୁନିଆରେ ଏହି ଭାରିଏଣ୍ଟରେ ସଂକ୍ରମିତଙ୍କ ମଧ୍ୟରୁ ଭାରତରେ ୬୨.୫ ପ୍ରତିଶତ ଲୋକ ଅଛନ୍ତି ।

ଝରାଫୁଲ ନାୟକ ମୃତ୍ୟୁ ଘଟଣା: ଗିରଫ ହେଲା ମୁଖ୍ୟ ଅଭିଯୁକ୍ତ ରାକେଶ ସ୍ୱାଇଁର ସହଯୋଗୀ ଶକ୍ତି ଶେଖର ସ୍ୱାଇଁ

ଭୁବନେଶ୍ୱର: ରମାଦେବୀ ଛାତ୍ରୀ ଝରାଫୁଲ ନାୟକ ମୃତ୍ୟୁ ଘଟଣା। ଫେରାର ଅଭିଯୁକ୍ତ ଶକ୍ତି ଶେଖର ସ୍ୱାଇଁକୁ ଗିରଫ କଲା ଯାଜପୁର ପୋଲିସ। ଶକ୍ତି ଶେଖର ହେଉଛି ଝରାଫୁଲର ପୁରୁଷ ବନ୍ଧୁ ତଥା ମୁଖ୍ୟ ଅଭିଯୁକ୍ତ ରାକେଶ ସ୍ୱାଇଁର ସହଯୋଗୀ। ଭୁବନେଶ୍ୱରର ଟଙ୍କପାଣି ସାଇମନ୍ଦିର ନିକଟରୁ ହେଲା ଗିରଫ। ଏ ନେଇ ସୂଚନା ଦେଇଛନ୍ତି ଯାଜପୁର ଏସପି। ଜାନୁଆରୀ ୨୭ ତାରିଖ ଦିନ ଯାଜପୁର ଜିଲ୍ଲା କୁଆଖିଆ ଥାନା

ରାଜେନ୍ଦ୍ରପୁର ନିକଟ ରାସ୍ତା କଡ଼ରୁ ଝରାଫୁଲ ନାୟକଙ୍କ ମୃତଦେହ ମିଳିଥିଲା। ପରେ ଏକ ସିସିଟିଭି ଫୁଟେଜକୁ ଆଧାର କରି କୁଆଖିଆ ପୋଲିସ୍‌ ତଦନ୍ତ କରିଥିଲା। ଏହାପରେ ଝରାଫୁଲଙ୍କ ବାପା କୁଆଖିଆ ଥାନାରେ ଲିଖିତ ଅଭିଯୋଗ କରିବା ସହ ରାକେଶ ସ୍ୱାଇଁ ନାମକ ଯୁବକର ସଂପୃକ୍ତି ନେଇ ସୂଚନା ଦେଇଥିଲେ। ପୋଲିସ ସେହି ଦିଗରେ ତଦନ୍ତ କରିଥିଲା। ମୁଖ୍ୟ ଅଭିଯୁକ୍ତ ରାକେଶ ସ୍ୱାଇଁକୁ ଭୁବନେଶ୍ୱରରୁ ଗିରଫ କରାଯାଇଥିଲା। ଯାଜପୁର ପୋଲିସ ତାକୁ ୩ ଦିନିଆ ରିମାଣ୍ଡରେ ନେଇ ପଚରାଉଚରା କରିବା ପରେ ଏବେ ସେ ଯାଜପୁର ସବ୍ ଜେଲରେ ରହିଛି।