spot_img
Home Blog Page 5872

ଆଜି ରାଜ୍ୟରେ ୬ ହଜାର ୫୯୯ କରୋନା ଆକ୍ରାନ୍ତ ଚିହ୍ନଟ

ଭୁବନେଶ୍ୱର: ଓଡ଼ିଶାରେ ପୁଣି ୬ ହଜାର ଉପରକୁ ଡେଇଁଛି କରୋନା ସଂକ୍ରମଣ । ଆଜି ରାଜ୍ୟରେ ମୋଟ ୬ ହଜାର ୫୯୯ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ତନ୍ମଧ୍ୟରୁ ଖୋର୍ଦ୍ଧାରେ ସର୍ବାଧିକ ୯୫୮ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ଏନେଇ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ସୂଚନା ମିଳିଛି । କ୍ବାରେଣ୍ଟାଇନରୁ ୩ ହଜାର ୮୨୭ ଥିବା ବେଳେ ଲୋକାଲ କେସ୍ ୨ ହଜାର ୭୭୨ ରହିଛି । ଖୋର୍ଦ୍ଧାରୁ ସର୍ବାଧିକ ୯୫୮ ଆକ୍ରାନ୍ତ ଚିହ୍ନଟ ହୋଇଥିବା ବେଳେ, ନୂଆପଡ଼ାରେ ୫୫୧, କଳାହଣ୍ଡିରୁ ୫୧୮, କଟକରୁ ୪୮୮ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଷ୍ଟେଟପୁଲରୁ ୨୦୧ ଆକ୍ରାନ୍ତ ଚିହ୍ନଟ ହୋଇଛନ୍ତି।

ତେବେ ଝାରସୁଗୁଡ଼ାରୁ ୪୩୬, ସୁନ୍ଦରଗଡ଼ରୁ ୪୩୪, ଗଞ୍ଜାମରୁ ୩୨୩, ଯାଜପୁରରୁ ୨୩୭, ସମ୍ବଲପୁରରୁ ୨୨୬, ନବରଙ୍ଗପୁରରୁ ୨୨୧, ବରଗଡ଼ରୁ ୨୦୩ ସହ ଷ୍ଟେଟପୁଲରୁ ୨୦୧ ସଂକ୍ରମିତ ଅଛନ୍ତି । ସେହିପରି ଅନୁଗୁଳରୁ ୧୮୭, ମୟୂରଭଞ୍ଜରୁ ୧୮୦, କେନ୍ଦୁଝରରୁ ୧୬୬, ପୁରୀରୁ ୧୪୫, ବାଲେଶ୍ବରରୁ ୧୩୭, ସୋନପୁରରୁ ୧୨୯, ରାୟଗଡ଼ାରୁ ୧୧୭, ବଲାଙ୍ଗୀରରୁ ୯୮, ଜଗତସିଂହପୁରରୁ ୯୩, ନୟାଗଡ଼ରୁ ୯୧, ଭଦ୍ରକରୁ ୮୭, ଗଜପତିରୁ ୮୧, ବୌଦ୍ଧରୁ ୭୦, କୋରାପୁଟରୁ ୬୯, କେନ୍ଦ୍ରାପଡ଼ା ଓ ଦେବଗଡ଼ରୁ ୩୮ ଜଣ ଲେଖାଏଁ, କନ୍ଧମାଳରୁ ୩୫, ମାଲକାନଗିରିରୁ ୨୨ ଓ ଢେଙ୍କାନାଳରୁ ୨୦ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।

Triple Mutant Coronavirus B1618 Reported In India

ସେହିପରି ସୁନ୍ଦରଗଡ଼, ଝାରସୁଗୁଡା, ସମ୍ବଲପୁର, ଅନୁଗୁଳ, ବରଗଡ଼, ବଲାଙ୍ଗୀର, ନୂଆପଡା, କଳାହାଣ୍ଡି, ନବରଙ୍ଗପୁର, ମୟୂରଭଞ୍ଜ, ଯାଜପୁର, କଟକ, ଖୋର୍ଦ୍ଧା, ପୁରୀ ଓ ଗଞ୍ଜାମରେ ସଂକ୍ରମଣ ବଢୁଥିବାରୁ ଏସବୁ ଜିଲ୍ଲା ରେଡଜୋନରେ ରହିଛି ।

ନବୀନଙ୍କ ନିଷ୍ପତ୍ତିକୁ ସବୁଠୁ ପ୍ରଶଂସା, ଶ୍ରୀମୟୀ ଦେଲେ ୧ଲକ୍ଷ ଟଙ୍କା

ଭୁବନେଶ୍ୱର: ରାଜ୍ୟବାସୀଙ୍କୁ ମାଗଣା ଟିକା ଘୋଷଣା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଛୁଟୁଛି ଶୁଭେଛାର ସୁଅ । ଏଭଳି ସ୍ଥିତିରେ ରାଜ୍ୟବାସୀଙ୍କ ସାଥିରେ ଛିଡା ହୋଇ ନବୀନ ପୁନର୍ବାର ନିଜକୁ ପ୍ରମାଣିତ କରିଛନ୍ତି । ରାଜ୍ୟର ୧୮ବର୍ଷ ବୟସରୁ ଊର୍ଦ୍ଧ୍ବ ସମସ୍ତ ବ୍ୟକ୍ତିଙ୍କୁ ମାଗଣାରେ କୋଭିଡ୍ ଟିକା ପ୍ରଦାନ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଐତିହାସିକ ଘୋଷଣା କରିଛନ୍ତି। କରୋନା ମହାମାରୀରୁ ରାଜ୍ୟବାସୀଙ୍କୁ ସୁରକ୍ଷିତ ରଖିବା ପାଇଁ ମାନ୍ୟବର ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତି ବାସ୍ତବରେ ସ୍ବାଗତଯୋଗ୍ୟ ଓ ବର୍ତ୍ତମାନ ସମୟର ସବୁଠୁ ବଡ଼ ଆବଶ୍ୟକତା ବୋଲି ବିଜେଡି ମୁଖପାତ୍ର ତଥା ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର କହିଛନ୍ତି। ସେହିପରି ଓଟିଡିସି ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ୧ଲକ୍ଷ ଟଙ୍କା ସହାୟତା ଦେଲେ ଓଟିଡିସି ଅଧ୍ୟକ୍ଷା ।

ପଞ୍ଚାୟତିରାଜ ଓ ପାନୀୟଜଳ ଏବଂ ଗୃହ ଓ ନଗର ଉନ୍ନୟନ ଓ ଆଇନ୍‍ ମନ୍ତ୍ରୀ ପ୍ରତାପ ଜେନା ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଓ କୃତଜ୍ଞତା ଜଣାଇଛନ୍ତି । କୋଭିଡ ମହାମାରୀ ସମୟରେ ମୁଖ୍ୟମନ୍ତ୍ରୀ ରାଜ୍ୟବାସୀଙ୍କ ପାଇଁ ନେଇଥିବା ଏହି ବଡ ନିଷ୍ପତ୍ତି ଯୋଗୁଁ ପ୍ରାୟ ୨କୋଟି ଓଡିଶାବାସୀ ଉପକୃତ ହେବେ ବୋଲି କହିଛନ୍ତି ପ୍ରତାପ ଜେନା ।

ଗଣମାଧ୍ୟମ ଉପଦେଷ୍ଟା ତଥା ବିଜେଡ଼ି ସାଧାରଣ ସମ୍ପାଦକ ମାନସ ମଙ୍ଗରାଜ ମଧ୍ୟ ଟ୍ୱିଟ କରି ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କରିଛନ୍ତି । ଓଡିଶାବାସୀଙ୍କ ସହ ସବୁ ସମୟରେ ମୁଖ୍ୟମନ୍ତ୍ରୀ ଠିଆ ହୋଇଛନ୍ତି । ୧୮ ରୁ ୪୫ ବର୍ଷ ବୟସର ସମସ୍ତ ବ୍ୟକ୍ତିଙ୍କୁ ମାଗଣାରେ ଟିକା ବଣ୍ଟନ ମୁଖ୍ୟମନ୍ତ୍ରୀଙ୍କ ଏକ ଯୁଗାନ୍ତକାରୀ ପଦକ୍ଷେପ ବୋଲି କହିଛନ୍ତି ମାନସ ମଙ୍ଗରାଜ । ସେହିପରି ରାଜ୍ୟସଭା ସାଂସଦ ଅମର ପଟ୍ଟନାୟକ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି । ନିଜେ ମଧ୍ୟ ୨୫୦ ଲୋକଙ୍କ ଟିକାକରଣ ଦାୟିତ୍ୱ ନେବେ ବୋଲି ନିଷ୍ପତି ନେଇଛନ୍ତି ଅମପ ପଟ୍ଟନାୟକ ।

ବିଜୁ ଛାତ୍ରଜନତା ଦଳର ସଭାପତି ଦେବୀ ରଞ୍ଜନ ତ୍ରିପାଠୀ ମୁଖ୍ୟମନ୍ତ୍ରୀଙ୍କ ଏହି ଐତିହାସିକ ନିଷ୍ପତ୍ତିକୁ ସ୍ଵାଗତ ଜଣାଇବା ସହ ବିଶେଷ କରି ଛାତ୍ର ଛାତ୍ରୀ ମାନଙ୍କ ସ୍ୱାର୍ଥକୁ ଦୃଷ୍ଟି ଦେଇ ଏଭଳି ସମାୟୋଚିତ ପଦକ୍ଷେପ ଗ୍ରହଣ କରିଥିବାରୁ ବିଜୁ ଛାତ୍ର ଜନତା ଦଳ ତରଫରୁ କୃତଜ୍ଞତା ଜ୍ଞାପନ କରିଛନ୍ତି। ସେହିପରି ପ୍ରଫେସର ଜୟନ୍ତ କୁମାର ମହାପାତ୍ରଙ୍କ ସମେତ ଦେଶର ଅନେକ ବ୍ୟକ୍ତି ବିଶେଷ ମୁଖ୍ୟମନ୍ତ୍ରୀଙ୍କ ଏହି ନିଷ୍ପତିକୁ ଶତ ପ୍ରଶଂସା କରିଛନ୍ତି ।

୨୫୦ ଲୋକଙ୍କ ଟିକାକରଣ ଖର୍ଚ୍ଚ ବହନ କରିବେ ସାଂସଦ ଅମର ପଟ୍ଟନାୟକ

ଭୁବନେଶ୍ୱର: ରାଜ୍ୟସଭା ସାଂସଦ ଅମର ପଟ୍ଟନାୟକ ବଢାଇଲେ ସହାୟତାର ହାତ । ମୁଖ୍ୟମନ୍ତ୍ରୀଙ୍କ ଘୋଷଣା ପରେ ଅମରଙ୍କ ନିଷ୍ପତି । ରାଜ୍ୟ ସରକାର ରାଜ୍ୟବାସୀଙ୍କୁ ମାଗଣାରେ ଟିକା ଦେବା ନେଇ ଘୋଷଣା କରିଥିଲା ବେଳେ ଅମର ପଟ୍ଟନାୟକ ୨୫୦ ଲୋକଙ୍କ ଟିକାକରଣ ଦାୟିତ୍ୱ ନେବେ ବୋଲି ଘୋଷଣା କରିଛନ୍ତି । ମୁଖ୍ୟମନ୍ତ୍ରୀଙ୍କ ଏଭଳି ନିଷ୍ପତିକୁ ସ୍ୱାଗତ କରିବା ସହ ପ୍ରଶଂସା ମଧ୍ୟ କରିଛନ୍ତି ଅମର ପଟ୍ଟନାୟକ ।

ଗତକାଲି ସାଂସଦ ଅମର ପଟ୍ଟନାୟକ ଦେଶର ୨୦ ଜଣ ଧନୀ ବ୍ୟକ୍ତିଙ୍କୁ ଅକ୍ସିଜେନ ମାଗଣାରେ ଦେବା ନେଇ ଅନୁରୋଧ କରିଥିଲେ । ଅମର କହିଥିଲେ ଆପଣ ଯଦି ନିଜ ମାଟି ମାଆର କିଛି ସେବା କରିବାକୁ ଚାହୁଁଛନ୍ତି, ତେବେ ଏହା ହିଁ ପ୍ରକୃଷ୍ଟ ସମୟ । ଅନେକ ଜୀବନ ଅକାରଣରେ ଚାଲିଯାଉଛି । ଅକ୍ସିଜେନ ବିନା ଶହ ଶହ ଲୋକଙ୍କ ମୃତ୍ୟୁ ଘଟିବା ଭଳି ଖବର ଆସୁଛି । ତେଣୁ ଏହି ସମୟରେ ସହାୟତାର ହାତ ବଢାଇବା ଆପଣ ମାନଙ୍କ ପାଇଁ ଜରୁରୀ ବୋଲି କହିଥିଲେ ସାଂସଦ ଅମର ପଟ୍ଟନାୟକ ।

କେନ୍ଦ୍ର ସରକାରଙ୍କୁ ଟାର୍ଗେଟ କଲେ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ସ୍ୱାମୀ, କହିଲେ ଫେଲ୍ ମାରିଛି ସରକାରଙ୍କ କୋଭିଡ ପରିଚାଳନା

ନୂଆଦିଲ୍ଲୀ: କେନ୍ଦ୍ର ସରକାରଙ୍କୁ ଟାର୍ଗେଟ କଲେ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ସ୍ୱାମୀ ଡକ୍ଟର ପରାକାଲା ପ୍ରଭାକର । ଦେଶରେ କରୋନା ବିପର୍ଯ୍ୟୟ ସମୟରେ କେନ୍ଦ୍ର ସରକାର ପରିଚାଳନାରେ ସମ୍ପୂର୍ଣ୍ଣ ଫେଲ ମାରିଛନ୍ତି । ମୋଦି ସରକାରଙ୍କ ବିଫଳତା ଯୋଗୁଁ ପ୍ରବାସୀ ଶ୍ରମିକଙ୍କ ମନରେ ରାଗଭାବ ସୃଷ୍ଟି ହେବା ସହ ରୋଜଗାର ଛାଡି ସେମାନେ ନିଜ ଘର ମୁହାଁ ହେଉଛନ୍ତି । ଏଥିସହ ମୋଦି ସରକାରଙ୍କୁ ହୃଦୟହୀନ ସରକାର କହିଛନ୍ତି ପରାକାଲା ।

ଦେଶର ରାଜନେତାଙ୍କ ପାଇଁ ନିର୍ବାଚନ ଗୁରୁତ୍ୱପୂର୍ଣ୍ଣ ଥିବା ବେଳେ ଲୋକଙ୍କ ଜୀବନକୁ ଗୁରୁତ୍ୱ ଦିଆଯାଉ ନାହିଁ । ଏଥିସହ କୁମ୍ଭ ମେଳା ଆୟୋଜନକୁ ମଧ୍ୟ ଟାର୍ଗେଟ କରିଛନ୍ତି । କୁମ୍ଭ ମେଳା ଆୟୋଜନା ହେବା ସରକାରଙ୍କ ଭୁଲ ନିଷ୍ପତ୍ତି ବୋଲି କହିଛନ୍ତି । ଏଥିପାଇଁ ଦେଶରେ ସଂକ୍ରମଣ ଅଧିକ ହେଲା । ଟିକା ପରିଚାଳନା ଓ ଟିକାକରଣରେ ମଧ୍ୟ ସରକାରଙ୍କ ଯୋଜନା ଫେଲ ମାରିଛି । ଏଥିସହ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ଚିଠିକୁ ଅଣଦେଖା କରିବା ମୋଦି ସରକାରଙ୍କ ଅହକାଂରକୁ ଦର୍ଶାଉଛି ବୋଲି ପରାକାଲା କହିଛନ୍ତି ।

‘ମୁଁ ଚାହୁଁ ନାହିଁ ଲକଡାଉନ-ସଟଡାଉନ, ମାଗଣାରେ ରାଜ୍ୟବାସୀଙ୍କୁ ଦିଆଯିବ ଟିକା’

ଭୁବନେଶ୍ୱର: ରାଜ୍ୟରେ ଲକଡାଉନ, ସଟଡାଉନ ଲାଗୁ ହେଉ , ଏହା କଦାପି ମୁଁ ଚାହେଁ ନାହିଁ । ରାଜ୍ୟବାସୀଙ୍କ ଜୀବନ ମୋର ପ୍ରାଧାନ୍ୟ । ଆମେ ଯଦି ସମସ୍ତେ କଟକଣାକୁ ମାନିବା, ତେବେ କୋଣସି ଲକଡାଉନ କିମ୍ବା ସଟଡାଉନ ଆବଶ୍ୟକତା ନାହିଁ । ୧୮ ବର୍ଷରୁ ଅଧିକ ବୟସ୍କଙ୍କୁ କୋଭିଡ ଟିକା ମାଗଣାରେ ଦିଆଯିବ । ରାଜ୍ୟବାସୀଙ୍କୁ ସମ୍ବୋଧନ କରି ବଡ ଘୋଷଣା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ଟିକା ପାଇଁ ରାଜ୍ୟବାସୀଙ୍କୁ ଟଙ୍କାଟିଏ ବି ଖର୍ଚ୍ଚ କରିବାକୁ ପଡିବ ନାହିଁ । ସମସ୍ତ ଖର୍ଚ୍ଚ ବହନ କରିବେ ରାଜ୍ୟ ସରକାର । ଏଥିପାଇଁ ୨ ହଜାର କୋଟି ଟଙ୍କା ଖର୍ଚ୍ଚ କରାଯିବ ବୋଲି ଘୋଷଣା କଲେ ମୁଖ୍ୟମନ୍ତ୍ରୀ । ସମ୍ବୋଧନ କରି ମୁଖ୍ୟମନ୍ତ୍ରୀ କହିଛନ୍ତି ସାରା ଦେଶରେ କୋଭିଡ ସ୍ଥିତି ଭୟଙ୍କର ହୋଇଛି । ମୃତ୍ୟୁ ସଂଖ୍ୟା ବି ଚିନ୍ତାଜନକ ସ୍ଥିତିରେ ରହିଛି । ଅନେକ ରାଜ୍ୟରେ ଶବଦାହ ପାଇଁ ଜାଗା ମିଳୁନାହିଁ । ଏଭଳି ସ୍ଥିତିରେ ଆମକୁ ଆହୁରି ସଚେତନ ରହିବାକୁ ପଡିବ ବୋଲି ନିବେଦନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

ସେହିପରି ମୁଖ୍ୟମନ୍ତ୍ରୀ କହିଛନ୍ତି ବିପଦ ସମୟରେ ଓଡିଶା ବର୍ତ୍ତମାନ ଅନେକ ରାଜ୍ୟକୁ ସାହାଯ୍ୟ ଜାରି ରଖିଛି । ୬ଟି ରାଜ୍ୟରେ ସଂକ୍ରମିତଙ୍କ ଚିକିତ୍ସା ପାଇଁ ଅକ୍ସିଜେନ ସିଲିଣ୍ଡରର ଅଭାବ ରହୁଥିବା ବେଳେ ଓଡ଼ିଶା ସେମାନଙ୍କୁ ସହଯୋଗର ହାତ ବଢାଇଛି । ଅନବରତ ସେମାନଙ୍କୁ ଅକ୍ସିଜେନ ସିଲିଣ୍ଡର ପଠାଉଛି । କିନ୍ତୁ ଆମ ସ୍ଥିତି ସେମାନଙ୍କ ଠାରୁ ଯଥେଷ୍ଟ ଭଲ ରହିଛି । ତଥାପି ଆମକୁ ଆହୁରି ସଚେତନତାର ଆବଶ୍ୟକତା ରହିଛି ।

କୋଭିଡରେ ହଜାର ହଜାର ଲୋକେ ମୃତ୍ୟୁ ମୁଖରେ ପଡୁଛନ୍ତି । ଦିଲ୍ଲୀ, ମହାରାଷ୍ଟ୍ର, ଛତିଶଗଡ଼, ଉତ୍ତରପ୍ରଦେଶ, ଗୁଜୁରାଟ ଭଳି ରାଜ୍ୟରେ ଭୟଙ୍କର ସ୍ଥିତି ଉପୁଜିଛି । ଯାହା ଭାରତ ଇତିହାସରେ କେବେ ମଧ୍ୟ ଘଟିନାହିଁ । ଏ ବିଷୟରେ ମୁଁ ପ୍ରଧାନମନ୍ତ୍ରୀଙ୍କ ସହ କଥା ହୋଇଥିଲି । ଓଡ଼ିଶା ଅନ୍ୟ ରାଜ୍ୟକୁ ଅକ୍ସିଜେନ ପଠାଇ ଶହ ଶହ ଆକ୍ରାନ୍ତଙ୍କ ଜୀବନ ବଞ୍ଚାଇଛି । ଆମ ରାଜ୍ୟରେ ଏଭଳି ସ୍ଥିତି ନଘଟୁ ।

ଆପଣମାନଙ୍କୁ ଅନୁରୋଧ ସଚେତନ ଏବଂ ସତର୍କ ରୁହନ୍ତୁ । କାହାର ରୋଜଗାରିଆ ପୁଅର ମୃତ୍ୟୁ ଘଟୁଛି ତ, ଆଉ କିଏ ବାପା ଛେଉଣ୍ଡ ହୋଇଯାଇଛି । ପୁଣି କେଉଁ ମାଆର କୋଳ ଖାଲି ହୋଇଯାଇଛି । ଏଭଳି ସ୍ଥିତି ମୋତେ ଅନେକ କଷ୍ଟ ଦେଇଛି । ତେଣୁ ଏହି ସ୍ଥିତି ଆଉ ନଘଟୁ । ମୋ ପରିବାର ସୁରକ୍ଷିତ ରହୁ । ମୋ ପରିବାରର କିଛି ଅମଙ୍ଗଳ ନଘଟୁ  । ରାଜ୍ୟ ସରକାର ଏପରି ସ୍ଥିତିରେ ମାଗଣାରେ ରାଜ୍ୟବାସୀଙ୍କୁ ଟିକା ଦେବେ  । କାହାରି ହାତରୁ ଟଙ୍କାଟିଏ ଖର୍ଚ୍ଚ ହେବନାହିଁ ବୋଲି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ  ।

ଖବର ସାଜିଲେ ଖବରଦାତା, କୋଭିଡରେ ଆଖିବୁଜିଲେ ଅମଜଦ ବାଦଶାହ

ଭୁବନେଶ୍ୱର: ପୁଣି ଜଣେ ସାମ୍ବାଦିକଙ୍କୁ ଛଡାଇ ନେଲା କୋଭିଡ । ପ୍ରତିଷ୍ଠିତ ତଥା ବରିଷ୍ଠ ସାମ୍ବାଦିକ ଅମଜଦ ବାଦଶାହଙ୍କ କରୋନାରେ ଆଜି ମୃତ୍ୟୁ ଘଟିଛି । କିଛିଦିନ ତଳେ ଅମଜଦଙ୍କ ଠାରେ କୋଭିଡ ଲକ୍ଷଣ ଦେଖା ଦେବା ପରେ ସେ କରୋନା ଟେଷ୍ଟ କରାଇଥିଲେ । ପରେ ଝାରସୁଗୁଡ଼ା କୋଭିଡ ହସ୍ପିଟାଲରେ ଚିକିତ୍ସିତ ହୋଇ ଆସୁଥିଲେ । ସ୍ୱାସ୍ଥ୍ୟବସ୍ଥା ଗୁରୁତ୍ତର ହେବାରୁ ଅମଜାଦଙ୍କୁ ରାଉରକେଲାସ୍ଥିତ ଜୟପ୍ରକାଶ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । କିନ୍ତୁ ଚିକିତ୍ସାଧିନ ଅବସ୍ଥାରେ ସେଠାରେ ଆଜି ତାଙ୍କର ମୃତ୍ୟୁ ଘଟିଥିବା ମେଡିକାଲ ପକ୍ଷରୁ ସୂଚନା ଦିଆଯାଇଛି ।

 

ପଶ୍ଚିମ ଓଡିଶାରେ ଜନ୍ମଗ୍ରହଣ କରିଥିବା ଅମଜଦ ବାଦଶାହା ଭାରତୀୟ ଜନସଂଚାର ସଂସ୍ଥାନ, ଢେଙ୍କାନାଳରେ ସାମ୍ବାଦିକତା ଅଧ୍ୟୟନ କରିଥିଲେ । ପରେ ରାଜ୍ୟର ଅନେକ ଅଗ୍ରଣୀ ଟେଲିଭିଜନରେ ସାମ୍ବାଦିକ ଭାବରେ ନିଜର ପରିଚୟ ସୃଷ୍ଟି କରିପାରିଥିଲେ । ଜଣେ ସରଳ ଏବଂ ମିଷ୍ଟଭାଷୀ ମଣିଷ ଭାବେ ପରିଚିତ ଅମଜାଦଙ୍କ ଦେହାନ୍ତରେ ସମଗ୍ର ସାମ୍ବାଦିକ ଜଗତରେ ଶୋକ ବାର୍ତ୍ତା ଖେଳିଯାଇଛି । ଅନେକ ନେତା ଓ ମନ୍ତ୍ରୀ ଅମଜାଦଙ୍କ ମୃତ୍ୟୁରେ ଗଭୀର ଶୋକବାର୍ତ୍ତା ଜଣାଇବା ସହ ପରିବାର ବର୍ଗଙ୍କୁ ମଧ୍ୟ ସ୍ୱାନ୍ତନା ଦେଇଛନ୍ତି ।

 

୨୦୦୫ରେ ଇଟିଭିରୁ ସାମ୍ବାଦିକତା କ୍ୟାରିଅର ଆରମ୍ଭ କରିଥିଲେ ଝାରସୁଗୁଡାର ଅମଜାଦ ବାଦଶାହା । ଏହାପରେ ରାଜ୍ୟର ବହୁ ଅଗ୍ରଣୀ ଗଣମାଧ୍ୟମରେ ନିଜ ଦକ୍ଷତାର ପରିଚୟ ଦେଇଛନ୍ତି ଅମଜଦ । ବିଭିନ୍ନ ପ୍ରସଙ୍ଗରେ ରୋକଠୋକ କହୁଥିବା ସାମ୍ବାଦିକ ଥିଲେ ଅମଜଦ । ଦି ସୋସିଓକ୍ରାଟ ଓ ଏନଏଫଟିଭିର କନସଲଟିଂ ଏଡିଟର ଭାବେ ଦାୟିତ୍ବ ତୁଲାଉଥିଲେ । ଅନେକଙ୍କ ଖବର ଲେଖୁଥିବା ଅମଜାଦ ଆଜି ନିଜେ ପାଲଟିଯାଇଛନ୍ତି ଖବର । ବାଦଶାହ ଟକ୍ସ ନାମକ ୟୁଟ୍ୟୁବ ଚାନେଲ ଖୋଲି ବିଭିନ୍ନ ପ୍ରସଙ୍ଗ ଉପସ୍ଥାପାନ କରୁଥିଲେ । ଦେଶ-ବିଦେଶ ଖବର ଉପରେ ଅଧିକ ରୁଚି ରଖୁଥିଲେ ଅମଜଦ ।

  ପରିବେଶ ସୁରକ୍ଷା ସଂପର୍କିତ ତାଙ୍କର ଅନେକ ଆର୍ଟିକିଲ ଜାତୀୟ ପତ୍ରିକା ଡାଉନ ଟୁ ଅର୍ଥରେ ପ୍ରକାଶ ପାଇଛି । ଡେଭଲପମେଣ୍ଟ ରିପୋର୍ଟିଂରେ ସେ ବେଶ ଖ୍ୟାତି ଅର୍ଜନ କରିଥିଲେ । ଗୁଗୁଲ ନ୍ୟୁଜ ଇନିସିଏଟିଭର ପୋଲ ଚେକ୍ କାର୍ଯ୍ୟକ୍ରମରେ ମିଡିଆ ସଂସ୍ଥାର କର୍ମଚାରୀଙ୍କୁ ପ୍ରଶିକ୍ଷଣ ଦେଉଥିଲେ ଅମଜଦ । ଗତ ୭ ତାରିଖରେ କୋଭିଡ ପଜିଟିଭ ସଂପର୍କରେ ଫେସବୁକରେ କରିଥିଲେ ଶେଷ ପୋଷ୍ଟ । ଏହି ପୋଷ୍ଟରେ ସେ ଲେଖିଥିଲେ, ସେ ପଜିଟିଭ ହୋଇଥିବା କାରଣରୁ କୋଭିଡ ପ୍ରୋଟୋକଲ ମାନି ହୋମ୍ ଆଇସୋଲେସନରେ ରହୁଛନ୍ତି । ତାଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିବିଶେଷ ନିଜ ସତର୍କତାରେ ରୁହନ୍ତୁ । ତାଙ୍କ ଆରୋଗ୍ୟ ପାଇଁ ପ୍ରାର୍ଥନା କରିବାକୁ ସେ ସମସ୍ତଙ୍କୁ ନିବେଦନ କରିଥିଲେ ।

ଅମଜାଦଙ୍କ ପରିବାର ସାରା ଓଡିଶାରେ ପରିଚିତ । ସାମ୍ପ୍ରଦାୟିକ ସଦଭାବନାର ଏକ ନିଛକ ଉଦାହରଣରେ ସୃଷ୍ଟି କରିଛି ଅମଜାଦଙ୍କ ପରିବାର । ଝାରସୁଗୁଡାର ରେମାଣ୍ଡ ଗାଁରେ ଆୟୋଜିତ ରଥଯାତ୍ରାରେ ଅମଜାଦଙ୍କ ପରିବାର ମୁଖ୍ୟ ସଦସ୍ୟ ଛେରା ପହଁରା କରନ୍ତି । ଏହି ପରମ୍ପରା ବହୁ ବର୍ଷରୁ ଚାଲି ଆସୁଛି । ଅମଜଦ ବାଦଶାହଙ୍କ ମୃତ୍ୟୁ ଓଡିଶା ସାମ୍ବାଦିକ ଜଗତ ତଥା ମିଡିଆ ଅଧ୍ୟାପନା ଜଗତ ପାଇଁ ବହୁ ବଡ କ୍ଷତି । ଅମଜଦଙ୍କ ମୃତ୍ୟୁକୁ ନେଇ ସାମ୍ବାଦିକଙ୍କ ମହଲରେ ଶୋକର ଲହରୀ ଖେଳିଯାଇଛି ।

 କିଛିଦିନ ତଳେ କରୋନାରେ ଗଞ୍ଜାମ ଜିଲ୍ଲାର ୨ ସାମ୍ବାଦିକଙ୍କ ମୃତ୍ୟୁ ଘଟିଥିଲା । ଏକ ୱେବ ଚ୍ୟାନେଲରେ କୁକୁଡ଼ାଖଣ୍ଡି ବ୍ଲକରେ କାର୍ଯ୍ୟରତ ଯୁବ ସାମ୍ବାଦିକ ଗୋବିନ୍ଦ ବେହେରା ଏବଂ ଏକ ଦୈନିକ ଖବରକାଗଜର ଚିକିଟି ପ୍ରତିନିଧି ଭାବେ କାର୍ଯ୍ୟରତ ଯୁବ ସାମ୍ବାଦିକ ମନୋଜ କୁମାର ସାହୁଙ୍କ ମୃତ୍ୟୁ ଘଟିଥିଲା ।

ଖ୍ୟାତାନାମା ଡାକ୍ତରଙ୍କ ପରାମର୍ଶ: ୮୫ ପ୍ରତିଶତ କରୋନା ରୋଗୀଙ୍କୁ ଦରକାର ନାହିଁ ଅକ୍ସିଜେନ୍-ରେମଡେସିଭିର

ନୂଆଦିଲ୍ଲୀ : ଦେଶରେ କରୋନାର ସଙ୍କଟଜନକ ପରିସ୍ଥିତି ମଧ୍ୟରେ ଦେଶର ଖ୍ୟାତାନାମା ଡାକ୍ତରମାନେ ପୁଣି ଥରେ କୋଭିଡ୍ ସମ୍ବନ୍ଧିତ ପ୍ରସଙ୍ଗରେ ଆଲୋଚନା କରିଛନ୍ତି। ଏହି ଆଲୋଚନାରେ ଦିଲ୍ଲୀ ଏମ୍ସର ନିର୍ଦ୍ଦେଶକ ଡ. ରଣଦୀପ ଗୁଲେରିଆ ସମେତ ଦେଶର ବଡ ଡାକ୍ତର ଯୋଗ ଦେଇଥିଲେ। ଏଥିରେ ମେଦାନ୍ତ ହସ୍ପିଟାଲର ଚେୟାରମ୍ୟାନ୍ ଡ. ନରେଶ ତ୍ରେହାନ, ମେଡିସିନ ଏମ୍ସର ପ୍ରୋଫେସର ତଥା ଏଚଓଡି ଡ. ନବୀନ ଓ୍ଵିଗ୍ ଓ ସାଧାରଣ ସ୍ଵାସ୍ଥ୍ୟ  ସେବାର ନିର୍ଦ୍ଦେଶକ ଡ. ସୁନିଲ କୁମାର ସାମିଲ।

ଡ ରଣଦୀପ ଗୁଲେରିଆ କହିଛନ୍ତି ଯେ, କରୋନାର ବର୍ତ୍ତମାନର ସ୍ଥିତିକୁ ନେଇ ଲୋକେ ଭୟଭୀତ। ଘରେ ଇଞ୍ଜେକ୍ସନ, ସିଲିଣ୍ଡର ରଖିବା ଆରମ୍ଭ କରି ଦେଇଛନ୍ତି। ଏହି କାରଣରୁ ହସ୍ପିଟାଲଗୁଡିକରେ ଅକ୍ସିଜେନ୍ ସିଲିଣ୍ଡରର ଅଭାବ ଦେଖା ଦେଇଛି। କରୋନା ଏକ ସାଧାରଣ ସଂକ୍ରମଣ। ଏଥିରେ ୮୫ ରୁ ୯୦ ପ୍ରତିଶତ ଲୋକଙ୍କୁ ଜ୍ଵର ଏବଂ ଦେହହାତ ଗୋଡ ବିନ୍ଧା ହୋଇଥାଏ। ଏଥିରେ ଅକ୍ସିଜେନ୍, ରେମଡେସିଭିରର ଆବଶ୍ୟକତା ନାହିଁ।

ସେ କହିଛନ୍ତି ଯେ, ଯେଉଁ ରୋଗୀମାନେ ଘରେ ଅଛନ୍ତି ଏବଂ ଅକ୍ସିଜେନ୍ ସ୍ତର ୯୪ରୁ ଅଧିକ ରହିଛି ସେମାନଙ୍କୁ ରେମଡେସିଭିରର କୌଣସି ଆବଶ୍ୟକତା ନାହିଁ। ଯଦି ସାଧାରଣ ରେମଡେସିଭିର ନିଅନ୍ତି ତେବେ ଆପଣଙ୍କ କମ ଲାଭ ଏବଂ ଅଧିକ କ୍ଷତି ଘଟିପାରେ। ଲୋକେ  ଆତଙ୍କିତ ହୋଇ ରେମଡେସିଭିର ଇଞ୍ଜେକ୍ସନ ଗଚ୍ଛିତ କରିବା ଆରମ୍ଭ କରିଦେଇଛନ୍ତି। ଫଳରେ ବଜାରରେ ଏହାର ଅଭାବ ଦେଖିବାକୁ ମିଳିଛି ଏବଂ  କଳାବଜାରୀ ମଧ୍ୟ ଆରମ୍ଭ ହୋଇ ଯାଇଛି। ତେଣୁ ଲୋକଙ୍କୁ ଏମିତି ଭୟଭୀତ ହେବାର ଆବଶ୍ୟକତା ନାହିଁ ବୋଲି ଡ ଗୁଲେରିଆ କହିଛନ୍ତି।

ମେଦାନ୍ତ ହସ୍ପିଟାଲର ଡ. ନରେଶ ତ୍ରେହନ ରେମଡେସିଭିରକୁ ନେଇ କହିଛନ୍ତି ଯେ, ଏହା କୌଣସି ମ୍ୟାଜିକ୍  ଇଞ୍ଜେକ୍ସନ ନୁହେଁ। ଯେବେ ଶରୀରରେ ଅମ୍ଳଜାନ ସ୍ତର ୯୫ ରୁ ୯୭ ରହିଛି ତେବେ ଅକ୍ସିଜେନ୍‌ର କୌଣସି ଆବଶ୍ୟକତା ନାହିଁ। ହାଲୁକା ଲକ୍ଷଣ ସହିତ ପଜିଟିଭ୍ ଚିହ୍ନଟ ହେଲେ ଘରେ ଭଲ ଯତ୍ନ ନେଇ ଏବଂ ଆଇସୋଲେସନରେ ରହି ସୁସ୍ଥ ହୋଇ ପାରିବେ।

ବାଗଦାଦ୍ କୋଭିଡ ହସ୍ପିଟାଲରେ ଅଗ୍ନିକାଣ୍ଡ, ମୃତ୍ୟୁ ସଂଖ୍ୟା ୮୨କୁ ବୃଦ୍ଧି

ବାଗ୍‌ଦାଦ୍‌: ରବିବାର ଦିନ ଇରାକ୍‌ର ରାଜଧାନୀ ବାଗ୍‌ଦାଦ୍‌ରେ ଥିବା ‘ଇବନ୍ ଅଲ୍‌-ଖାତିବ୍‌ ହସ୍ପିଟାଲ୍‌’ର ‘କରୋନାଭାଇରସ୍‌ ଇଣ୍ଟେନ୍‌ସିଭ୍ କେୟାର୍‌ ୟୁନିଟ୍‌’ରେ ନିଆଁ ଲାଗିବା ଘଟଣାରେ ମୃତ୍ୟୁ ସଂଖ୍ୟା ୮୨ ଛୁଇଁଛି। ୧୧୦ ଜଣ ଆହତ ହୋଇ ହସ୍ପିଟାଲ୍‌ରେ ଚିକିତ୍ସିତ ହେଉଛନ୍ତି ବୋଲି ସୂତ୍ରରୁ ଜାଣିବାକୁ ମିଳିଛି।

ମେଡିକାଲ୍‌ସୂତ୍ରରୁ ପ୍ରାପ୍ତ ସୂଚନା ଅନୁସାରେ, ‘ଅକ୍ସିଜେନ୍‌ ସିଲିଣ୍ଡର୍‌ ଗଚ୍ଛିତ ରଖିବାରେ ତ୍ରୁଟି ଯୋଗୁଁ ବିସ୍ଫୋରଣ ଘଟି ଡାକ୍ତରଖାନାରେ ନିଆଁ ଲାଗିଯାଇଥିଲା । ଅନ୍ୟ ଏକ ସୂତ୍ରରୁ ଜଣାପଡ଼ିଛି ଯେ, ‘ଇବନ୍ ଅଲ୍‌-ଖାତିବ୍‌ ହସ୍ପିଟାଲ୍‌’ର ଇଣ୍ଟେନ୍‌ସିଭ୍‌ କେୟାର୍‌ ୟୁନିଟ୍‌ରେ ଥିବା ୩୦ଜଣ ରୋଗୀଙ୍କ ଶଯ୍ୟା ପାଖରେ ସେମାନଙ୍କର ଆତ୍ମୀୟସ୍ବଜନମାନେ ଉପସ୍ଥିତ ଥିଲେ। ମଧ୍ୟରାତ୍ର ବେଳକୁ ହସ୍ପିଟାଲ୍‌ର ବିଭିନ୍ନ ମହଲାରେ ଅଗ୍ନିଶିଖା ବ୍ୟାପିଯାଇଥିଲା।

ସାମାଜିକ ଗଣମାଧ୍ୟମରେ ପ୍ରସାରିତ ହୋଇଚାଲିଥିବା ଭିଡିଓରେ ଦେଖାଯାଉଛି, ଇରାକୀ ରାଜଧାନୀର ଦକ୍ଷିଣପୂର୍ବ ଉପକଣ୍ଠରେ ଥିବା ଏହି ଡାକ୍ତରଖାନାରୁ ନିଆଁ ଲିଭାଇବା ନିମନ୍ତେ ଦମକଳ ବାହିନୀ ଉଦ୍ୟମ କରୁଥିବା ବେଳେ ରୋଗୀ ଏବଂ ସେମାନଙ୍କ ଆତ୍ମୀୟମାନେ ଡାକ୍ତରଖାନାରୁ ଧାଇଁ ପଳାଉଛନ୍ତି।

ଅବହେଳା କାରଣରୁ ଏହି ଅଗ୍ନିକାଣ୍ଡ ଘଟିଥିବା କଥା ବିଭିନ୍ନ ସୂତ୍ରରୁ ଜଣାପଡ଼ିବା ପରେ ସାମାଜିକ ଗଣମାଧ୍ୟମରେ ଇରାକ୍‌ବାସୀମାନେ କ୍ରୋଧ ବ୍ୟକ୍ତ କରିଛନ୍ତି। ଘଟଣାର ତଦନ୍ତ କରି କର୍ତ୍ତବ୍ୟରେ ଅବହେଳା କରିଥିବା କର୍ମଚାରୀଙ୍କ ପ୍ରତି ଦଣ୍ଡବିଧାନ କରିବା ଲାଗି ଏକ ତଦନ୍ତ କମିସନ୍ ବସାଇବାକୁ ବାଗ୍‌ଦାଦ୍‌ର ରାଜ୍ୟପାଳ ମହମଦ୍‌ ଜବର୍‌ ସ୍ବାସ୍ଥ୍ୟ ମନ୍ତ୍ରାଳୟକୁ ନିର୍ଦେଶ ଦେଇଛନ୍ତି।

ରାତି ୮ଟାରେ ରାଜ୍ୟବାସୀଙ୍କୁ ବାର୍ତ୍ତା ଦେବେ ମୁଖ୍ୟମନ୍ତ୍ରୀ

ଭୁବନେଶ୍ୱର: ରାତି ୮ଟାରେ ରାଜ୍ୟବାସୀଙ୍କୁ ସମ୍ବୋଧନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗୋଟେପଟେ କୋଭିଡ ମହାମାରୀର ଦ୍ୱିତୀୟ ଲହରୀ ସମଗ୍ର ବିଶ୍ୱରେ ତାଣ୍ଡବ ରଚାଇଛି । ରାଜ୍ୟରେ ମଧ୍ୟ ଦୈନିକ ସଂକ୍ରମଣ ବୃଦ୍ଧି ଘଟିବାରେ ଲାଗିଛି । ଏଭଳି ସ୍ଥିତିରେ ରାଜ୍ୟବାସୀଙ୍କୁ ବାର୍ତ୍ତା ଦେବେ ମୁଖ୍ୟମନ୍ତ୍ରୀ ।

ଦେଶର ଅଧିକାଂଶ ରାଜ୍ୟରେ ଅକ୍ସିଜେନ ସଙ୍କଟ ଏବଂ କୋଭିଡ ମାମଲା ବୃଦ୍ଧି ନିୟନ୍ତ୍ରଣ ବାହାରକୁ ଚାଲିଯାଇଥିବା ବେଳେ ଓଡିଶାରେ ସ୍ଥିତି ଏବେ ବି ଆୟତରେ । ସରକାରଙ୍କ ଆଗୁଆ ପଦକ୍ଷେପ ଯୋଗୁଁ ରାଜ୍ୟରେ ସଂକ୍ରମଣକୁ ରୋକାଯାଇପାରିଛି । ଅଧିକ ଟେଷ୍ଟ ଯୋଗୁଁ ସଂକ୍ରମିତଙ୍କ ସଂଖ୍ୟା ବଢୁଥିବା ବେଳେ ନିୟନ୍ତ୍ରଣରେ ରହିଛି କରୋନା ।

କରୋନାର ଟ୍ରିପଲ ମ୍ୟୁଣ୍ଟାଟକୁ ସୀମାରେ ହି ଚେକ ଦେଇଛନ୍ତି ସରକାର । ଫଳରେ ଏବେ ସୁଦ୍ଧା ରାଜ୍ୟରେ ଗୋଟିଏ ବି ଟ୍ରିପଲ ମ୍ୟୁଟାଣ୍ଟ ସଂକ୍ରମିତ ଚିହ୍ନଟ ହୋଇନାହାନ୍ତି । ଅନ୍ୟପଟେ ରାଜ୍ୟର ସମସ୍ତ ସହରାଞ୍ଚଳରେ ଦୁଇ ଜିନିଆ ସଟଡାଉନ ମଧ୍ୟ ଜାରି କରିଛନ୍ତି ରାଜ୍ୟ ସରକାର । ଏଭଳି ସମୟରେ ମୁଖ୍ୟମନ୍ତ୍ରୀଙ୍କ ବାର୍ତ୍ତା ଗୁରୁତ୍ୱ ବହନ କରୁଛି ।

ପବଜି ଖେଳ ସାଜିଲା କାଳ, ଟ୍ରେନ ଧକ୍କାରେ ଛାତ୍ରଙ୍କ ମୃତ୍ୟୁ

ଖୋର୍ଦ୍ଧା: ପବଜି ଖେଳିବା ହେଲା କାଳ । ଅକାଳରେ ଟ୍ରେନ ଧକ୍କାରେ ଚାଲିଗଲା ଛାତ୍ରଙ୍କ ଜୀବନ । ସୂଚନା ମୁତାବକ ବାଲୁଗାଁ ଥାନା ଗଙ୍ଗାଧରପୁର ରେଳ ଷ୍ଟେସନରେ ପ୍ରଶାନ୍ତ ବେହେରା ନାମକ ଜଣେ ଛାତ୍ରଙ୍କ ମୃତ୍ୟୁ ହୋଇଛି । ପନ୍ଦର ବର୍ଷୀୟ ଶୁସାନ୍ତ ବେହେରା ମୋବାଇଲେ ପବଜି ଖେଳୁଥିବାବେଳେ ଅନ୍ୟ ମନସ୍କ ହୋଇ ରେଳ ଧାରଣା ନିକଟକୁ ଚାଲି ଆସିଥିଲେ । ଠିକ ସେତିକିବେଳେ ପଛପଟୁ ଆସୁଥିବା ଏକ ଟ୍ରେନ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ପ୍ରଶାନ୍ତ ବେହେରାଙ୍କ ପୁଅ ଶୁସାନ୍ତଙ୍କ ମୃତ୍ୟୁ ହୋଇଥିବା ଜଣାପଡିଛି ।

ଟ୍ରେନ୍ ଚାଳକଙ୍କ ଠାରୁ ଖବର ପାଇ ଗଙ୍ଗାଧରପୁର ଅଗ୍ନିଶମ ବାହିନୀ ଘଟଣା ସ୍ଥଳରେ ପହଁଚିଥିଲା । ଗୁରୁତର ଅବସ୍ଥାରେ ଛାତ୍ରଙ୍କୁ ଉଦ୍ଧାର କରିବା ସହ ଟାଙ୍ଗୀ ମେଡିକାଲରେ ଭର୍ତ୍ତି କରିଥିଲା । ଡାକ୍ତରଙ୍କ ଆପ୍ରାଣ ଉଦ୍ୟମ ସ୍ୱତେ ଶୁସାନ୍ତ ବଞ୍ଚି ପାରିନଥିଲେ । ମେଡିକାଲରେ ଟାଙ୍ଗୀ ପୋଲିସ ପହଁଚିବା ସହ ଶବ ଜବତ କରି ତଦନ୍ତ ଚଳାଇଥିବା ଜଣାପଡିଛି ।