spot_img
Home Blog Page 5733

୧୦୪ ହେଲ୍ପଲାଇନ କର୍ମଚାରୀଙ୍କୁ ସାଧୁବାଦ ଜଣାଇଲେ ମୁଖ୍ୟମନ୍ତ୍ରୀ

ଭୁବନେଶ୍ୱର: କରୋନା ମହାମାରୀରେ ଦେବଦୂତ ସାଜିଛନ୍ତି କରୋନା ଯୋଦ୍ଧା। କେବଳ ସ୍ୱାସ୍ଥ୍ୟ କର୍ମୀ ନୁହେଁ ବରଂ କୋଭିଡ ପାଇଁ ଜାରି ହୋଇଥିବା ହେଲ୍ପଲାଇନ ନମ୍ବର ୧୦୪ର କର୍ମଚାରୀମାନେ ମଧ୍ୟ ଭଲ ସେବା ଯୋଗାଇଛନ୍ତି। ଆଉ ଏଥିପାଇଁ ୧୦୪ ହେଲ୍ପଲାଇନର ସମସ୍ତ କର୍ମଚାରୀଙ୍କୁ ସାଧୁବାଦ ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

କୋଭିଡ୍ ସମୟରେ ୧୦୪ ହେଲ୍ପଲାଇନ ମହତ୍ୱପୂର୍ଣ୍ଣ ସାବ୍ୟସ୍ତ ହୋଇଛି । ତ୍ୱରିତ ସ୍ୱାସ୍ଥ୍ୟ ସେବା ଯୋଗାଇବାରେ ମହତ୍ୱପୂର୍ଣ୍ଣ ସାବ୍ୟସ୍ତ ହୋଇଥିବା ମୁଖ୍ୟମନ୍ତ୍ରୀ ଟ୍ୱିଟ୍ କରି ସୂଚନା ଦେଇଛନ୍ତି । ଲୋକଙ୍କୁ ସଠିକ ସ୍ୱାସ୍ଥ୍ୟ ସହାୟତା ପ୍ରଦାନକରି ବହୁମୂଲ୍ୟ ଜୀବନ ସୁରକ୍ଷିତ କରିଥିବାରୁ ପ୍ରଶଂସା କରିଛନ୍ତି । ଜୀବନ ସୁରକ୍ଷିତ କରୁଥିବା ସମସ୍ତ କର୍ମଚାରୀଙ୍କୁ ଧନ୍ୟବାଦ ଜଣାଇଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

ରାଜଧାନୀରେ ତଣ୍ଟି କାଟି ଲୁଟ ଉଦ୍ୟମ କରିଥିବା ଅଭିଯୁକ୍ତ ଗିରଫ

ଭୁବନେଶ୍ୱର: ନୟାପଲ୍ଲୀ ଥାନା ସିଆରପି ଅଞ୍ଚଳରେ ତଣ୍ଟି କାଟି ମୋବାଇଲ ଛଡ଼ାଇବା ଉଦ୍ୟମ ଘଟଣାରେ ଗିରଫ ହେଲା ଅଭିଯୁକ୍ତ। ଆକ୍ରମଣ ପରେ ଆହତ ମହିଳା ନୟାପଲି ତାନାରେ ଏତଲା ଦେଇଥିଲେ । ତେବେ ଏହାପରେ  ଲୁଟେରାକୁ ଧରିବା ପାଇଁ ଏକ  ସ୍ୱତନ୍ତ୍ର ଟିମ ଗଠନ ହୋଇଥିଲା। ତେବେ ଆଜି ଅଭିଯୁକ୍ତକୁ ଭୁବନେଶ୍ୱରରୁ ଗିରଫ କରିଛି ନୟାପଲି ଥାନା ପୋଲିସ୍ ।

ସୂଚନାଯୋଗ୍ୟ, ଗତ ମେ ୩୧ ତାରିଖରେ ମହିଳା ଜଣକ ପରିବା ଆଣିବା ପାଇଁ ଯାଉଥିବା ସମୟରେ ନୟାପଲ୍ଲୀ ଭିଆଇପି ରୋଡ଼ରେ ଜଣେ ଦୁର୍ବୃତ୍ତ ତାଙ୍କୁ ଏକୁଟିଆ ଦେଖି ଲୁଟ୍ ଉଦ୍ୟମ କରିଥିଲା । ଧାରୁଆ ଛୁରୀରେ ଆକ୍ରମଣ କରି ଲୁଟ କରିବା ପାଇଁ ଚେଷ୍ଟା କରିଥିଲା । ଯାହାର ସମ୍ପୂର୍ଣ୍ଣ ଚିତ୍ର କଏଦ ସିସିଟିଭିରେ କଏଦ ହୋଇଥିଲା।

ବିଦେଶୀ ଟିକା ପାଇଁ ସହଜ ହେଲା ରାସ୍ତା, ହେବନାହିଁ ଲୋକାଲ ଟ୍ରାଏଲ

ନୂଆଦିଲ୍ଲୀ: ବିଶ୍ୱ ସ୍ୱାସ୍ଥ୍ୟ ସଂଗଠନ କିମ୍ବା କିଛି ବିଶେଷ ଦେଶର ଅନୁମତି ପ୍ରାପ୍ତ କରୋନା ଟିକାକୁ ନେଇ କେନ୍ଦ୍ର ସରକାର ବଡ଼ ନିଷ୍ପତ୍ତି ନେଇଛନ୍ତି। ଡିସିଜିଆଇ ଆମେରିକା,ଇଂଲଣ୍ଡ ଭଳି ଦେଶରେ ଅନୁମତି ପ୍ରାପ୍ତ କରୋନା ଟିକାର ଲୋକାଲ ଟ୍ରାଏଲ ପାଇଁ ଥିବା ବାଧ୍ୟବାଧକତାକୁ ହଟାଇ ଦେଇଛନ୍ତି। ଏହାର ଅର୍ଥ ହେଉଛି ବିଦେଶୀ କରୋନା ଭ୍ୟାକ୍ସିନ ଗୁଡିକୁ ଏବେ ଭାରତରେ ବ୍ରିଜିଂ ଟ୍ରାଏଲ ଦେଇ ଯିବାକୁ ପଡିବ ନାହିଁ। ବୁଧାବାର ଦିନ ଏସମ୍ପର୍କରେ ଡ୍ରଗ୍ କଣ୍ଟ୍ରୋଲର ଜେନରାଲ ଅଫ୍ ଇଣ୍ଡିଆ (ଡିସିଜିଆଇ) ସୂଚନା ଦେଇଛନ୍ତି । ଦେଶରେ ଟିକା ଅଭାବ ଭିତରେ ଡିସିଜିଆଇର ଏହି ନିଷ୍ପତି ବିଦେଶରୁ ଟିକା ଯୋଗାଣକୁ ସହଜ କରିବ । ସୂଚନାଯୋଗ୍ୟ ଯେ, ଫାଇଜର ଓ ମଡର୍ଣ୍ଣା ଭଳି ବିଦେଶୀ ଟିକା କମ୍ପାନୀ ସରକାରଙ୍କ ସମ୍ମୁଖରେ ଏହି ସର୍ତ୍ତ ରଖିଥିଲେ ।

କେଉଁ ସଂସ୍ଥାଠାରୁ ମଞ୍ଜୁରୀ ପ୍ରାପ୍ତ ଭ୍ୟାକ୍ସିନକୁ ମିଳିବ ରିହାତି ?
USFDA,EMA,UK MHRA,PMDA ,ଜାପାନ କିମ୍ବା WHO ଦ୍ୱାରା ଜରୁରୀକାଳିନ ବ୍ୟବହାର ପାଇଁ ଯେଉଁ ସବୁ ଭ୍ୟାକ୍ସିନକୁ ଅନୁମତି ମଳିଛି ସେଗୁଡିକୁ ଭାରତରେ ବ୍ରିଜିଂ ଟ୍ରାଏଲ ନକରିବାକୁ ଅନୁମତି ମିଳିଛି । ଏଥିରେ ସେହି ସବୁ ଟିକା ମଧ୍ୟ ସାମିଲ ଅଛନ୍ତି ଯାହାକୁ ବିଦେଶରେ ଆଗରୁ ଲକ୍ଷାଧିକ ଲୋକ ନେଇ ସାରିଛନ୍ତି । ଡିସିଜିଆଇର ବିଜି ସୋମାନି କହିଛନ୍ତି ଯେ, ନ୍ୟାସନାଲ ଗ୍ରୁପ୍ ଅନ୍ ଭ୍ୟାକ୍ସିନ ଆଡମିନିଷ୍ଟ୍ରେସନ୍ (NEGVAC)ର ସୁପାରିସ ଆଧାରରେ କରାଯାଇଛି ।

ଆଗରୁ କ’ଣ ଥିଲା ବ୍ୟବସ୍ଥା ?
ଆଗରୁ କୌଣସି ଟିକାକୁ ଭାରତରେ ବିକ୍ରି କରିବାକୁ ହେଲେ ଲୋକାଲ କ୍ଲିନିକାଲ ଟେଷ୍ଟ୍ ବା ବ୍ରିଜିଂ ଷ୍ଟଡିଜ୍ ଦେଇ ଯିବାକୁ ପଡୁଥିଲା । ଏହା ଅନ୍ତର୍ଗତରେ ଭାରତୀୟଙ୍କ ଠାରେ ପରିକ୍ଷାମୁଳକ ଭାବେ ଟିକା ଲଗା ଯାଉଥିଲା । ଟିକାର ପ୍ରଭାବ କ’ଣ ରହୁଛି ତାହା ଦେଖାଯାଉଥିଲା । ଟିକା ସୁରକ୍ଷିତ ବୋଲି ଅଧ୍ୟୟନରୁ ଜଣା ପଡିଲା ପରେ ଏହାକୁ ଭାରତରେ ବ୍ୟବହାର ପାଇଁ ଅନୁମତି ମିଳୁଥିଲା । ସୂଚନାଯୋଗ୍ୟ ଯେ, କେନ୍ଦ୍ର ସରକାର ବିରୋଧରେ ଭ୍ୟାକ୍ସିନ ଅର୍ଡର ଜାରି କରିବାରେ ବିଳମ୍ବର ଅଭିଯୋଗ ଆସୁଥିଲା । ସରକାର ନିଜ ନୀତିର ସମର୍ଥନରେ କହିଥିଲେ ଯେ, ଫାଇଜର, ଜନସନ୍ ତଥା ମଡର୍ଣ୍ଣା ସହିତ ୨୦୨୦ରୁ ନୂଆଦିଲ୍ଲୀ ସମ୍ପର୍କରେ ଅଛି ।

ସରକାର ପ୍ରତିଷ୍ଠିତ ବିଦେଶୀ ଟିକା କମ୍ପାନୀଙ୍କୁ ଲୋକାଲ ଟ୍ରାଏଲରୁ ରିହାତି ଦେଇଥିଲେ । ରାଜ୍ୟ ସରକାର ମଧ୍ୟ କେନ୍ଦ୍ର ବିରୋଧରେ ପର୍ଯ୍ୟାପ୍ତ ଭ୍ୟାକ୍ସିନ ଯୋଗାଇ ନଦେବାର ଅଭିଯୋଗ କରିଥିଲେ । ବର୍ତ୍ତମାନ ଭାରତରେ କୋଭାକ୍ସିନ୍,କୋଭିସିଲ୍ଡ ଓ ସ୍ପୁଟନିକ୍ ଭିର ବ୍ୟବହାର ହେଉଛି ।

ଭୁଶୁଡିଲା ୨ ମହଲା କୋଠା: ୩ଜଣ ପିଲାଙ୍କ ସମେତ ୭ମୃତ

ଉତ୍ତରପ୍ରଦେଶ ଗୋଣ୍ଡାରେ ଅଭାବନୀୟ ଘଟଣା । ବିସ୍ଫୋରଣରେ  ଦୁଇ ମହଲା ବିଶିଷ୍ଟ କୋଠା ଭୁଶୁଡିଲା  ୭ଜଣଙ୍କ ମୃତ୍ୟୁ ହୋଇଥିବାବେଳେ ୭ଜଣ ଗୁରୁତର ଆହତ ହୋଇଛନ୍ତି। ମୃତକଙ୍କ ମଧ୍ୟରେ ୨ପୁରୁଷ, ୨ ମହିଳା ଓ ୩ଜଣ ଶିଶୁ ରହିଛନ୍ତି। ଘଟଣାରେ ପ୍ରାୟ ୧୪ ଜଣ ମାଟି ତଳଫସିରହିଥିଲେ । ତେବେ ଏମାନଙ୍କୁ ବହୁତ କଷ୍ଟରେ ବାହାର କରିଥିଲେ ଆଖପାଖର ଲୋକ । ଭଙ୍ଗା କୋଠା ତଳେ ଆହୁରି ବି କିଛି ଜଣ ଫସିରହିଥିବା ସନ୍ଦେହ କରାଯାଉଛି। ତେଣୁ ପୋଲିସ ଘଟଣା ସ୍ଥଳରେ ଉଦ୍ଧାର କାର୍ଯ୍ୟ ଜାରି ରଖିଛି।

ୱାଜିରଗଞ୍ଜ ପୋଲିସ ଷ୍ଟେସନ ଅଧୀନରେ ଥିବା ଟିକ୍ରି ଠେଠରପୁର ଗାଁରେ ଘଟିଛି ଏହି ଅଘଟଣ । ଯେଉଁଠାରେ ଏକ ଘରେ ହଠାତ୍ ବିସ୍ଫୋରଣ ହୋଇଥିଲା । ସିଲିଣ୍ଡର ବିସ୍ଫୋରଣ ଯୋଗୁଁ ଏହି ଦୁର୍ଘଟଣା ଘଟିଥିବା ପୋଲିସ ଅନୁମାନ କରୁଛି । ସର୍ଚ୍ଚ ଅପରେସନ ଜାରି ରଖିଛି ପୋଲିସ। ଆଗକୁ ମୃତ୍ୟୁ ସଂଖ୍ୟା ବଢ଼ିପାରେ ବୋଲି ସୂଚନା ଦେଇଛି ପୋଲିସ୍।

କୁହାଯାଉଛି ଯେ ଘର ମାଲିକ ପାଖରେ ବାଣ ତିଆରି କିରବାର ଲାଇସେନ୍ସ ଥିଲା। ଏଭଳି ପରିସ୍ଥିତିରେ ବିସ୍ଫୋରଣ କଣ ପାଇଁ ଘଟିଲା ତାର କାରଣ ଖୋଜୁଛି ପୋଲିସ।  ତେବେ ପ୍ରାଥମିକ ତଦନ୍ତରୁ ଏହା ସିଲିଣ୍ଡର ବିସ୍ଫୋରଣ ବୋଲି ପୋଲିସ ଅନୁମାନ କରୁଛି।

ଦ୍ୱିତୀୟ ବିବାହ କରୁଥିଲେ ସ୍ୱାମୀ; ବିରୋଧ କରିବାରୁ ସ୍ତ୍ରୀକୁ ପିଟିଲେ ଶ୍ୱଶୁର ଓ ଦେଢ଼ଶୁର

ଭୁବନେଶ୍ୱର: ସ୍ୱାମୀର ଦ୍ୱିତୀୟ ବାହାଘରକୁ ବିରୋଧ କରିବାରୁ ବୋହୂକୁ ମାଡ ମାରିଲେ ଶ୍ୱଶୁର ଓ ଦେଢ଼ଶୁର। ଭୂବନେଶ୍ୱର ଖଣ୍ଡଗିରି ଥାନା ଅଞ୍ଚଳରେ ଘଟିଛି ଏଭଳି ଅଭାବନୀୟ କାଣ୍ଡ। ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେଉଛି।

ତେବେ ଶ୍ୱଶୁର ଓ ଦେଢ଼ଶୁର ମାଡ଼ ମାରିବା ସହିତ ମୋବାଇଲ୍ ଭାଙ୍ଗିଥିବା ନେଇ ଥାନାରେ ଅଭିଯୋଗ କରିଛନ୍ତି ବୋହୂ। ଅଭିଯୋଗ ଅନୁସାରେ ଗଂଜାମ ଜିଲ୍ଲାର ବିଷ୍ଣୁ ପ୍ରିୟା ଗୌଡ଼ ୨୦୧୫ରୁ ଭୁବନେଶ୍ୱର ଡୁମୁଡୁମା ଅଞ୍ଚଳର ହାଇଦର ଅଲ୍ଲୀଙ୍କୁ ପ୍ରେମ ପରେ ଗତ ୪ମାସ ତଳେ ବିବାହ କରିଥିଲେ। ତେବେ ଗତ କିଛି ମାସ ଧରି ପରିବାର ଲୋକେ ହାଇଦରଙ୍କର ଅନ୍ୟ ଜାଗାରେ ବିବାହ କରିବାକୁ ଯୋଜନା କରୁଥିଲେ। ପୂର୍ବରୁ ଏନେଇ ବିଷ୍ଣୁ ପ୍ରିୟା ଥାନାରେ ଅଭିଯୋଗ ମଧ୍ୟ କରିଥିଲେ।

ଏବେ ପୁଣି ଥିରେ ସ୍ୱାମୀଙ୍କ ବିବାହ ହେଉଥିବା ଖବର ଶୁଣି ଯାଇଥିବା ବେଳେ ଶ୍ୱଶୁର ଓ ଦେଢଶୂର ଆକ୍ରମଣ କରିଥିଲେ । ମୋବାଇଲ୍ ଭାଙ୍ଗିବା ସହିତ ୨ଲକ୍ଷରୁ ଅଧିକ ଟଙ୍କା ନେଇଯାଇଥିବା ବୋହୂ ଅଭିଯୋଗ କରିଛନ୍ତି ।

ଜଳେଶ୍ୱରରେ କଙ୍ଗାରୁ କୋର୍ଟ; ସ୍ୱାମୀ-ସ୍ତ୍ରୀକୁ ଗଛରେ ବାନ୍ଧି ନିର୍ଧୁମ ପିଟିଲେ ଲୋକେ

ଜଳେଶ୍ୱର:  ଜଳେଶ୍ୱର ବାଲିଆପାଳରେ ଦେଖିବାକୁ ମିଳିଛି କଙ୍ଗାରୁ କୋର୍ଟ । ଛେଳି ଚରାଇବାକୁ ନେଇ ଦେଖିବାକୁ ମିଳିଛି ଉତ୍ତେଜନା। ପର ବାଡ଼ିରେ ଛେଳି ପଶିବାରୁ ସ୍ୱାମୀ ଓ ସ୍ତ୍ରୀକୁ ଗଛରେ ବାନ୍ଧି ନିର୍ଧୁମ ପିଟିଲେ ଗାଁ ଲୋକେ।

ସୂଚନା ଅନୁସାରେ ବାଲିଆପାଳ ଥାନା ରେମୁ ଗାଁର ଜଣେ ବ୍ୟକ୍ତି ଛେଳି ଚରେଇବା ପାଇଁ ଯାଇଥିଲେ। ଗ୍ରାମର କାର୍ତ୍ତିକ ବିଶ୍ୱାଳ ନାମକ ଜଣେ ବ୍ୟକ୍ତିଙ୍କ ବାଡ଼ିକୁ ଛେଳିଟି ପଶି ଯାଇଥିଲା । ଯାହାକୁ ନେଇ ବ୍ୟକ୍ତି ଜଣଙ୍କ ରାଗିଯାଇଥିଲେ । ପରେ ଉଭୟଙ୍କ ମଧ୍ୟରେ ଏ ନେଇ ବଚସା ହୋଇଥିଲା। ଫଳରେ ଉତ୍ୟକ୍ତ ବ୍ୟକ୍ତି ତାଙ୍କୁ ଅଟକ ରଖି ମାରପିଟ କରିଥିଲେ। ପରେ ତାଙ୍କ ସ୍ତ୍ରୀ ତାଙ୍କୁ ଉଦ୍ଧାର କରିବାକୁ ଯାଇଥିବା ବେଳେ ଉଭୟ ସ୍ୱାମୀ ସ୍ତ୍ରୀଙ୍କୁ ଗଛରେ ବାନ୍ଧି ଲୋକେ ନିସ୍ତୁକ ମାଡ଼ ମାରିଥିବାର ଏକ ଭିଡିଓ ଭାଇରାଲ ହେବାରେ ଲାଗିଛି। ଏନେଇ ବାଲିଆପାଳ ଥାନାରେ ଏକ ମାମଲା ରୁଜୁ ହୋଇଛି।

ପୁଣି ବାଲ୍ୟ ବିବାହ ଅଭିଯୋଗ, ୧୪ ବର୍ଷୀୟ ପୁଅ ସହ୧୩ ବର୍ଷୀୟା ଝିଅର ବିବାହ

ଯାଜପୁର: ଯାଜପୁର ସୁକିନ୍ଦା ବ୍ଲକ ନଗଡାରେ ପୁଣି ବାଲ୍ୟ ବିବାହ ଅଭିଯୋଗ। ଉକ୍ତ ନାବାଳକ ଓ ନାବାଳିକାଙ୍କୁ ଉଦ୍ଧାର କରିଛନ୍ତି ଚାଇଲ୍ଡ ଲାଇନ ସଦସ୍ୟ । ଗତ ୩୦ ତାରିଖରେ ନଗଡାରେ ଏକ ବାଲ୍ୟ ବିବାହ ହୋଇଥିଲା। ତଳନଗଡାର ୧୪ ବର୍ଷୀୟ ପୁଅ କେନ୍ଦୁଝର ଜିଲ୍ଲାର ୧୩ ବର୍ଷୀୟା ଝିଅଙ୍କୁ ବିବାହ କରିଥିଲେ।

ଏନେଇ ଖବର ପାଇବା ପରେ ଚାଇଲ୍ଡ ଲାଇନ ତରଫରୁ ଉଭୟଙ୍କୁ ଉଦ୍ଧାର କରାଯାଇଛି। ଜିଲ୍ଲା ଶିଶୁ ମଙ୍ଗଳ କମିଟିରେ ହାଜର ପରେ ପୁଅକୁ ବାଳାଶ୍ରମ ଓ ଝିଅକୁ ୱାନ୍ ଷ୍ଟପ୍ କେନ୍ଦ୍ରରେ ରଖାଯାଇଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚାଇଲ୍ଡ ଲାଇନପକ୍ଷରୁ କୁହାଯାଇଛି । ନଗଡା ଅଞ୍ଚଳରେ ପୂର୍ବରୁ ମଧ୍ୟ ଅନେକ ବାଲ୍ୟ ବିବାହ ଦେଖାଦେଇଛି। ଯେତେ ସଚେତନ କଲେ ମଧ୍ୟ ସଜାଗ ହେଉନାହାନ୍ତି ସ୍ଥାନୀୟ ବାସିନ୍ଦା । ଫଳରେ ବାଲ୍ୟ ବିବାହରେ ରୋକ ଲାଗିପାରୁନାହିଁ।

NHRCର ନୂଆ ଅଧ୍ୟକ୍ଷ ଭାବେ ଆଜି ଶପଥ ନେବେ ଜଷ୍ଟିସ୍ ଅରୁଣ କୁମାର ମିଶ୍ର

ନୂଆଦିଲ୍ଲୀ : ଜାତୀୟ ମାନବାଧିକାର ଆୟୋଗ ବା NHRCର ଅଧ୍ୟକ୍ଷ ଭାବେ ଆଜି ଶପଥ ନେବେ ଜଷ୍ଟିସ୍ ଅରୁଣ କୁମାର ମିଶ୍ର। ଗତ ୬ ମାସ ଧରି NHRCର ଅଧ୍ୟକ୍ଷ ପଦ ଖାଲି ପଡିଥିବା ବେଳେ ଆଜି ଅରୁଣ କୁମାର ମିଶ୍ର ଏହି ପଦ ପାଇଁ ଶପଥ ନେବେ। ଗତ ସୋମବାର ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ଚୟନ ସମିତି ବୈଠକରେ ଏ ନେଇ ନିଷ୍ପତ୍ତି ନିଆଯାଇଥିଲା।

ଗତବର୍ଷ ସେପ୍ଟେମ୍ବର ୨ ତାରିଖରେ ବରିଷ୍ଠ ଆଇନଜୀବୀ ଜଷ୍ଟିସ୍ ଅରୁଣ କୁମାର ମିଶ୍ର ସୁପ୍ରିମକୋର୍ଟରୁ ଅବସର ନେଇଥିଲେ। ଜଷ୍ଟିସ୍ ମିଶ୍ର କୋଲକାତା ଓ ରାଜସ୍ଥାନ ହାଇକୋର୍ଟର ମୁଖ୍ୟ ବିଚାରପତି ଭାବେ ଦାୟିତ୍ୱ ତୁଲାଇଛନ୍ତି । ସେହିଭଳି ମଧ୍ୟପ୍ରଦେଶ ହାଇକୋର୍ଟରେ ମଧ୍ୟ ସେ ବରିଷ୍ଠ ଜଜ୍ ଭାବେ କାମ କରିଛନ୍ତି ଜଷ୍ଟିସ୍ ମିଶ୍ର । ଅରୁଣ କୁମାର ମିଶ୍ରାଙ୍କ ସହ ଜାମ୍ମୁ-କାଶ୍ମୀର ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ଜଷ୍ଟିସ୍ ମହେଶ ମିତ୍ତଲ କୁମାର ଏବଂ ଇଣ୍ଟେଲିଜେନ୍ସି ବ୍ୟୁରୋ ବା ଆଇବିର ପୂର୍ବ ନିର୍ଦ୍ଦେଶକ ରାଜୀବ ଜୈନଙ୍କୁ NHRCର ସଦସ୍ୟ ଭାବେ ନିଯୁକ୍ତି କରାଯାଇଛି । ଚୟନ ସମିତି ବୈଠକରେ ପ୍ରଧାନମନ୍ତ୍ରୀଙ୍କ ସହ ଗୃହମନ୍ତ୍ରୀ ଅମିତ ଶାହା, ରାଜ୍ୟସଭା ଉପସଭାପତି ହରିବଂଶ, ଲୋକସଭା ଅଧ୍ୟକ୍ଷ ଓମ ବିର୍ଲା ଏବଂ ରାଜ୍ୟସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ୍ ଖଡଗେ ପ୍ରମୁଖ ଉପସ୍ଥିତ ଥିଲେ ।

କେନ୍ଦ୍ରକୁ ବିଧାୟକ ଅରବିନ୍ଦ ଢାଲିଙ୍କ ଚିଠି: ରାଜ୍ୟରେ ଥିବା ଶରଣାର୍ଥୀଙ୍କୁ ମିଳୁ ନାଗରିକତ୍ୱର ପରିଚୟ

ଭୁବନେଶ୍ୱର: ରାଜ୍ୟରେ ଥିବା ଶରଣାର୍ଥୀଙ୍କୁ କେନ୍ଦ୍ର ସରକାର ନାଗରିକତ୍ୱର ପରିଚୟ ଦେବାକୁ ଦାବି କରି ବିଜେଡି ବିଧାୟକ ଅରବିନ୍ଦ ଢାଲି କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିବା ସହ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି। ବିଧାୟକଙ୍କ କହିବା କଥା ଯେ ଏମାନଙ୍କୁ ନାଗିରକତ୍ୱ ଦିଆଗଲେ ଶରଣାର୍ଥୀ ମାନେ ଜମି ପଟ୍ଟା, ପାସପୋର୍ଟ ଓ ବିଭିନ୍ନ ସରକାରୀ ସୁବିଧା ସୁଯୋଗ ପାଇପାରିବେ।

ଭାରତ ସରକାର ୫ଟି ରାଜ୍ୟର ଶରଣାର୍ଥୀଙ୍କୁ ନାଗରିକତ୍ୱ ପ୍ରଦାନ କରୁଥିବା ବେଳେ, ଓଡିଶାର ୧୦ଟି ଜିଲ୍ଲାରେ ଥିବା ୧୦ ଲକ୍ଷ ଶରଣାର୍ଥୀଙ୍କୁ କାହିଁକି ନାଗରିକତ୍ୱ ଦିଆଯିବନି ବୋଲି ସେ ପ୍ରଶ୍ନ କରିଛନ୍ତି । କେନ୍ଦ୍ର ସରକାର ତୁରନ୍ତ ଏହାର ବିଚାର କରି ନାଗରିକତ୍ୱ ପ୍ରଦାନ କରନ୍ତୁ ବୋଲି ସେ ସେ ଦାବି କରିଛନ୍ତି।

ବିଶେଷ କରି ମାଲକାନିଗିର, ନବରଙ୍ଗପୁର, ଖୋର୍ଦ୍ଧା, କୋରାପୁଟ, ସମ୍ବଲପୁର, ବଲାଙ୍ଗୀର, ଭଦ୍ରକ, କେନ୍ଦ୍ରାପଡା ପରି ଜିଲ୍ଲାରେ ଶରଣାର୍ଥୀ ଥିବାରୁ ସେମାନଙ୍କୁ ନାଗରିକତ୍ୱ ଦେବାକୁ ଦାବି କରିଛନ୍ତି । ପୂର୍ବରୁ ରାଜ୍ୟ ସରକାର ଏ ନେଇ କେନ୍ଦ୍ରକୁ ଅବଗତ କରିଛନ୍ତି।

ଭିଜିଲାନ୍ସ ଜାଲରେ ରାଉରକେଲା TDCCର ଜିଲ୍ଲା ପରିଚାଳକ

ରାଉରକେଲା: ଭିଜିଲାନ୍ସ ଜାଲରେ ରାଉରକେଲା TDCCର ଜିଲ୍ଲା ପରିଚାଳକ ଜୟପ୍ରକାଶ ମହାନ୍ତି ।୧୯ଲକ୍ଷ ଟଙ୍କା ନେଇ ଯାଉଥିବା ବେଳେ ଧରିଲା ଭିଜିଲାନ୍ସ। ଭୁବନେଶ୍ୱର ବାସଭବନକୁ ଯାଉଥିବା ବେଳେ ଭିଜିଲାନ୍ସ ଚଢାଉ।

ଜୟପ୍ରକାଶ  ନିଜ ସରକାରୀ ଗାଡିରେ ୧୯ ଲକ୍ଷ ଟଙ୍କା ନେଇ ଯାଉଥିବା ବେଳେ ମସନିକାନୀ ଚେକଗେଟ ନିକଟରେ ଭିଜିଲାନ୍ସ ହାତରେ ଧରାପଡ଼ିଛନ୍ତି । ଭିଜିଲାନ୍ସ ୧୯ ଲକ୍ଷ ଟଙ୍କା ଜବତ କରିବା ସହ ଘଟଣାର ତଦନ୍ତ ଆରମ୍ଭ କରିଛି । ସୁନ୍ଦରଗଡ ଜିଲ୍ଲା TDCC ଅଫିସ ଓ ଭୁବନେଶ୍ବର ବାସଭବନରେ ମଧ୍ୟ ଯାଞ୍ଚ କରୁଛି ଭିଜିଲାନ୍ସ ବିଭାଗ । ଏନେଇ ସୂଚନା ଦେଇଛନ୍ତି ଭୁବନେଶ୍ୱର ଡିଏସପି ବୀରେନ୍ଦ୍ର କୁମାର ନାୟକ।