spot_img
Home Blog Page 5613

କୋଭିଡରୁ ସୁସ୍ଥ ହୋଇ କୋଭିସିଲ୍ଡ ନେଇଥିଲେ ଅଧିକ ସୁରକ୍ଷିତ

ନୂଆଦିଲ୍ଲୀ: କୋଭିଡରୁ ଯେଉଁମାନେ ଆରୋଗ୍ୟ ହୋଇଛନ୍ତି ଏବଂ ଗୋଟିଏ କିମ୍ବା ଦୁଇଟି କୋଭିସିଲ୍ଡ ଡୋଜ ନେଇଛନ୍ତି ସେମାନେ ଭାଗ୍ୟବାନ। କାରଣ ଡେଲଟା ଭାରିଆଣ୍ଟ ବିରୋଧରେ ସେମାନେ ଅଧିକ ସୁରକ୍ଷିତ। କୋଭିଡରେ ସଂକ୍ରମିତ ହୋଇ ନଥିବା ତଥା ଗୋଟିଏ କିମ୍ବା ଦୁଇଟି ଟିକା ନେଇଥିବା ବ୍ୟକ୍ତିଙ୍କ ତୁଳନାରେ ସେମାନଙ୍କ ପ୍ରତିରୋଧକ ଶକ୍ତି ଅଧିକ ବୋଲି ନୂଆ ଗବେଷଣାରୁ ଜଣାଯାଇଛି। ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ ପକ୍ଷରୁ ଏହା କୁହାଯାଇଛି।

ଗବେଷଣାରେ ଜଣାପଡ଼ିଛି ଯେ, ଡେଲଟା ଭାରିଆଣ୍ଟ ବିରୋଧରେ ମାନବ ଶରୀରର ହ୍ୟୁମୋରାଲ ଓ ସେଲୁଲାର ଇମୁନ ଏକ ଶକ୍ତିଶାଳୀ ପ୍ରତିରୋଧକ। ଏପରିକି ସବୁଠାରୁ ଅଧିକ ଭୟଙ୍କର ତଥା ସଂକ୍ରମଣଶୀଳ ଡେଲଟା ବିରୋଧରେ ମୁକାବିଲା ଲାଗି ଏହା ଗୁରୁତ୍ବପୂର୍ଣ୍ଣ। ଯେଉଁମାନେ ଆରୋଗ୍ୟ ହୋଇଛନ୍ତି ଓ କୋଭିସିଲଡ ନେଇଛନ୍ତି ସେମାନଙ୍କ ନିକଟରେ ପ୍ରତିରୋଧକ ଶକ୍ତି ଅନ୍ୟମାନଙ୍କ ତୁଳନାରେ ଯଥେଷ୍ଟ ଅଧକ। ଟିକାକରଣ ଯୋଗୁ ଡେଲଟା ପ୍ରଭାବ ଅତି କମ୍ ହୋଇଥାଏ ଏବଂ ସେମାନଙ୍କ କ୍ଷେତ୍ରରେ ହ୍ୟୁମୋରାଲ ଓ ସେଲୁଲାର ଇମୁନ ଗୁରୁତ୍ବପୂର୍ଣ୍ଣ ଭୂମିକା ସୃଷ୍ଟି କରେ। ଟିକା ନେବା ପରେ ଏକ ନ୍ୟୁଟ୍ରାଲ ଆଣ୍ଟିବଡି ସୃଷ୍ଟି ହୋଇଥାଏ, ଯାହାକି ଡେଲଟା ଭାରିଆଣ୍ଟର ସଫଳ ମୁକାବିଲା କରିଥାଏ । କୋଭିଡରୁ ସୁସ୍ଥ ବ୍ୟକ୍ତି ଏପରିକି ଗୋଟିଏ ଟିକା ନେଇଥିଲେ ବି ପୁନଃସଂକ୍ରମଣ ତାଙ୍କୁ ପ୍ରାୟ ହୋଇନଥାଏ । ଏବଂ ନୂଆ ନୂଆ ଭାରିଆଣ୍ଟ ବିରୋଧରେ ସେମାନଙ୍କ ପ୍ରତିରୋଧକ ଶକ୍ତି ବୃଦ୍ଧି କରିଥାଏ ବୋଲି ଗବେଷଣାରେ ଜଣାପଡିଛି ।

ବ୍ରହ୍ମପୁରରେ ପହଞ୍ଚିଲା ୧ ଲକ୍ଷ ୪୦ ହଜାର କୋଭାକ୍ସିନ ଟିକା

ବ୍ରହ୍ମପୁର: ଟଳିବ ଟିକା ସଂକଟ। ବ୍ରହ୍ମପୁରରେ ପହଞ୍ଚିଲା କୋଭାକ୍ସିନ ଟିକା । ଭୁବନେଶ୍ବର ପରେ ଏଣିକି ଗଞ୍ଜାମ ଜିଲ୍ଲାରେ ଦିଆଯିବ କୋଭାକ୍ସିନ୍ ଟିକା । ୧୮ ବର୍ଷରୁ ଉର୍ଦ୍ଧ୍ବ ସମସ୍ତଙ୍କୁ କୋଭାକ୍ସିନ୍ ଟିକା ଦେବା ପାଇଁ ଗଞ୍ଜାମ ଜିଲ୍ଲାପାଳ ଓ ମହାନଗର ନିଗମକୁ ଚିଠି ଲେଖିଥିଲେ ସ୍ବାସ୍ଥ୍ୟ ବିଭାଗ ଏସିଏସ । ଏହାପରେ ବ୍ରହ୍ମପୁର ସିଟି ହସ୍ପିଟାଲରେ ୧ ଲକ୍ଷ ୪୦ ହଜାର COVAXIN ଟିକା ପହଞ୍ଚିଛି।

ଆସନ୍ତାକାଲି ଗଞ୍ଜାମ ଜିଲ୍ଲାର ସମସ୍ତ ଟିକାକରଣ କେନ୍ଦ୍ରକୁ ଏହା ବିତରଣ କରାଯିବ । ଯେଉଁମାନେ ପ୍ରଥମ ଡୋଜ୍ କୋଭିସିଲ୍‌ଡ ନେଇଛନ୍ତି, ସେମାନେ ଦ୍ବିତୀୟ ଡୋଜ୍ ମଧ୍ୟ କୋଭିସିଲ୍‌ଡ ନେବେ। ଯେଉଁମାନେ ପ୍ରଥମ ଡୋଜ୍‌ ନେବେ, ସେମାନେ କୋଭାକ୍ସିନ୍ ଟିକା ନେବେ। ଗତ କିଛିଦିନ ହେବ ଜିଲ୍ଲାରେ ଟିକା ଅଭାବ ଯୋଗୁ ଟିକାକରଣ ବନ୍ଦ ରହିଥିଲା। ଫଳରେ ଲୋକମାନେ ଟିକାକେନ୍ଦ୍ରରୁ ନିରାଶ ହୋଇ ଫେରୁଥିଲେ। ତେବେ ବର୍ତ୍ତମାନ ଟିକା ପହଞ୍ଚିବା ପରେ ଗଞ୍ଜାମ ଜିଲ୍ଲାବାସୀ ଖୁସି ପ୍ରକଟ କରିଛନ୍ତି।

 

ଓଡ଼ିଶା ଗସ୍ତରେ ଆସିଛନ୍ତି କେନ୍ଦ୍ର ଯୁଗ୍ମ ସଚିବ ଉଷା ପାଢ଼ୀ

ଭୁବନେଶ୍ୱର: ଓଡିଶା ଗସ୍ତରେ ଆସିଛନ୍ତି କେନ୍ଦ୍ର ସରକାରଙ୍କ ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ଯୁଗ୍ମ ସଚିବ ଉଷା ପାଢ଼ୀ। ରାଜ୍ୟ ସରକାରଙ୍କ ପ୍ରତିନିଧିଙ୍କ ସହ ଆଲୋଚନା କରିଛନ୍ତି କେନ୍ଦ୍ର ଯୁଗ୍ମ ସଚିବ। ଭୁବନେଶ୍ୱରର ଖାରବେଳ ଭବନରେ ସୂଚନା ଏବଂ ପ୍ରଯୁକ୍ତି ବିଭାଗର ପ୍ରମୁଖ ଶାସନ ସଚିବ ମନୋଜ କୁମାର ମିଶ୍ର ଓ ପରିବହନ ବିଭାଗର ପ୍ରମୁଖ ଶାସନ ସଚିବ ମଧୁସୂଦନ ପାଢ଼ୀଙ୍କ ସହିତ ଉଷା ଆଲୋଚନା କରିଛନ୍ତି ।

ରାଜ୍ୟରେ ଚାଲୁ ରହିଥିବା ବିଭିନ୍ନ ବିମାନ ଚଳାଚଳ କ୍ଷେତ୍ର ସମ୍ବନ୍ଧରେ ଦୀର୍ଘ ସମୟ ଧରି ଉଭୟ କେନ୍ଦ୍ର ଓ ରାଜ୍ୟ ପ୍ରତିନିଧି ଆଲୋଚନା କରିଛନ୍ତି । ରାଜ୍ୟରେ ଚାଲିଥିବା ଓ ରାଜ୍ୟ ସରକାରଙ୍କ ପ୍ରସ୍ତୁତି ବାବଦରେ ସୂଚନା ଏବଂ ପ୍ରଯୁକ୍ତି ବିଭାଗର ପ୍ରମୁଖ ଶାସନ ସଚିବ ମନୋଜ କୁମାର ମିଶ୍ର ସୂଚନା ଦେଇଛନ୍ତି । ବିମାନ ଚଳାଚଳ କ୍ଷେତ୍ରରେ ରାଜ୍ୟ ସରକାରଙ୍କ ରୋଡ଼ମ୍ୟାପ ବାବଦରେ ସଚିବ ଅବଗତ କରିଛନ୍ତି।

ସେପଟେ ପୁରୀ, ରାଉରକେଲା, ଭବାନୀପାଟଣା ଏବଂ ଜୟପୁର ବିମାନ ବନ୍ଦରର ବିକାଶ ବିଷୟରେ ବିସ୍ତ୍ରୁତ ଆଲୋଚନା ହୋଇଛି । ରାଉରକେଲା ଏବଂ ଜୟପୁର ବିମାନବନ୍ଦର କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ଖୁବ୍ ଶୀଘ୍ର ଉଡାନ୍ ଯୋଜନାରେ ସାମିଲ ହେବା ନେଇ ଦାବି ଉପସ୍ଥାପନ କରାଯିବ । ନୂତନ ବିମାନ ବନ୍ଦର ଗୁଡ଼ିକ ସହିତ ବାୟୁ ସଂଯୋଗ ସମସ୍ୟା ବିଷୟରେ ମଧ୍ୟ ଆଲୋଚନା ହୋଇଛି । ‘ଉଡାନ ଯୋଜନା’ରେ ନୂତନ ସଂଯୋଗ ପାଇଁ ପ୍ରକ୍ରିୟା ଖୁବଶୀଘ୍ର ଆରମ୍ଭ ହେବ । ଏ ନେଇ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏବଂ ଓଡିଶା ସରକାର ମିଳିତ ଭାବରେ ଚୂଡାନ୍ତ ନିଷ୍ପତ୍ତି ନେବେ।

ରାଜ୍ୟରେ ଟିକା ଅଭାବ, ମାତ୍ର ୩ଟି ଜିଲ୍ଲାରେ ହେବ ଟିକାକରଣ

ଭୁବନେଶ୍ୱର: ଟଳୁନି ଟିକା ସଙ୍କଟ। ଟିକା ଅଭାବରୁ ଆଜି ରାଜ୍ୟରେ ମାତ୍ର ୩ଟି ଜିଲ୍ଲାରେ ହେବ ଟିକାକରଣ। କେନ୍ଦ୍ରାପଡ଼ା, ପୁରୀ ଓ ରାୟଗଡ଼ାରେ ହେବ ଟିକାକରଣ । ପୁରୀର ୬୭ ଟିକା କେନ୍ଦ୍ରରେ ଟିକାକରଣ କରାଯିବ। ସେହିପରି କେନ୍ଦ୍ରାପଡ଼ାରେ ୮୦ ଓ ରାୟଗଡ଼ାରେ ୧୬ଟି କେନ୍ଦ୍ରରେ ହେବ ଭ୍ୟାକ୍ସିନେସନ। ମୋଟ ୧୬୩ଟି ଟିକା କେନ୍ଦ୍ରରେ ଦିଆଯିବ ଟିକା। ରାଜ୍ୟରେ ୯ ଲକ୍ଷ ୮୧ ହଜାର ୧୯୦ କୋଭିସିଲଡ ଡୋଜ ଉପଲବ୍ଧ ଥିବା ବେଳେ ୩ ଲକ୍ଷ ୯୧ ହଜାର ୫୪୦ କୋଭାକ୍ସିନ ଡୋଜ ରହିଛି।

ଗତକାଲି ୧୫ଟି ଜିଲ୍ଲାରେ ବନ୍ଦ ରହିଥିଲା ଟିକାଦାନ। ଏପଟେ ଟିକାକରଣ ରାଙ୍କିଙ୍ଗରେ ଓଡ଼ିଶା ଦ୍ୱିତୀୟ ସ୍ଥାନରେ ରହିଛି। ୫୫.୩୯ ପ୍ରତିଶତ ଟିକାକରଣ କରି ଦେଶରେ ଦ୍ୱୀତୀୟ  ସ୍ଥାନରେ ରହିଛି ଓଡ଼ିଶା। ଟିକାକରଣରେ ସାରାଦେଶରେ ରାଜସ୍ଥାନ ଆଗୁଆ ରହିଛି। ମେଘାଳୟରେ ସର୍ବନିମ୍ନ ୧୪.୨୮ପ୍ରତିଶତ ଟିକାକରଣ ହୋଇଛି। ଟିକାକରଣରେ ଓଡ଼ିଶା ପଛକୁ ଆନ୍ଧ୍ର, ହିମାଞ୍ଚଳ ପ୍ରଦେଶ ଓ ଗୁଜରାଟ ଭଳି ରାଜ୍ୟ ରହିଛନ୍ତି।

ରାଜଧାନୀରେ ପୁଣି ଲକ୍ଷାଧିକ ଟଙ୍କା ଠକେଇ, CMC ଗ୍ରୁପ୍ ନାଁରେ ଲକ୍ଷାଧିକ ଲୁଟ୍

ଭୁବନେଶ୍ୱର: ରାଜଧାନୀରେ ପୁଣି ଲକ୍ଷାଧିକ ଟଙ୍କାର ଠକେଇ ଅଭିଯୋଗ । CMC ଗ୍ରୁପ୍ ନାଁରେ ଲକ୍ଷାଧିକ ଟଙ୍କା ଠକେଇ କରାଯାଇଥିବା ମଞ୍ଚେଶ୍ବର ଥାନାରେ ଅଭିଯୋଗ ହୋଇଛି । ଦୁଇ ଜଣ ମହିଳା କର୍ମଚାରୀଙ୍କ ସହାୟତାରେ ପାଖାପାଖି ୨ଶହ ଲୋକଙ୍କ ଠାରୁ ଲକ୍ଷାଧିକ ଟଙ୍କା ଠକେଇ କରାଯାଇଥିବା ଏତଲାରେ ଦର୍ଶାଯାଇଛି । ପଳାଶୁଣି ନିକଟ ପ୍ରାଚୀବିହାର ସମ୍ପୂର୍ଣ୍ଣା ସ୍ବୟଂସହାୟକ ଗୋଷ୍ଠି ଏହି ଠକେଇର ଶିକାର ହୋଇଛି ।

ପ୍ରଥମ ପର୍ଯ୍ୟାୟରେ ଅଗ୍ରିମ ୧୩୦ ଟଙ୍କା ଓ ପରେ ଦୁଇ ହଜାର ଟଙ୍କା ପ୍ରତ୍ୟେକ ସଦସ୍ୟଙ୍କ ଠାରୁ ନିଆଯାଇ ତାଙ୍କୁ ୪୦ ହଜାର ଟଙ୍କାର ଋଣ କରାଇ ଦେବାକୁ ପ୍ରତିଶ୍ରୁତି ଦିଆଯାଇଥିଲା । କିନ୍ତୁ ଏହାପରେ ୪ ମାସ ବିତି ଯାଇଥିଲେ ମଧ୍ୟ କୌଣସି ଋଣ ନ ମିଳିବାରୁ ଶେଷରେ ବାଧ୍ୟ ହୋଇ ଠକେଇର ଶିକାର ମହିଳା ମାନେ ଥାନା ଘେରାଉ କରିଥିଲେ । ଏହି ଘଟଣାର ତଦନ୍ତ ପାଇଁ CMC ଗ୍ରୁପର ଦୁଇ ଜଣ ମହିଳାଙ୍କୁ ଅଟକ ରଖି ପଚରାଉଚରା କରୁଛି ପୋଲିସ । ସେପଟେ ସଂସ୍ଥଶ ମାଲିକ ଫେରାର ଥିବା ସୂଚନା ରହିଛି ।

ଘର ଘର ବୁଲି ଗର୍ଭବତୀଙ୍କୁ ଟିକା ଦେବ BMC, ୧୯୨୯ ଟୋଲ ଫ୍ରୀ ନମ୍ବରରେ ସବିଶେଷ ତଥ୍ୟ

ଭୁବନେଶ୍ୱର: ଗର୍ଭବତୀଙ୍କୁ ଟିକା କରଣ ପ୍ରସଙ୍ଗ । କେନ୍ଦ୍ର ସରକାର ଗାଇଡ ଲାଇନ୍ ଆସିବା ପରେ ରାଜ୍ୟ ସରକାର ଖୁବଶୀଘ୍ର ପ୍ରସ୍ତୁତି ଆରମ୍ଭ କରିଛନ୍ତି । ଏ ନେଇ ବିଏମସି ପକ୍ଷରୁ ପ୍ରସ୍ତୁତି ଚାଲିଛି । ଅଙ୍ଗନବାଡ଼ି ଓ ଆଶା କର୍ମୀଙ୍କ ସହଯୋଗରେ ତାଲିକା ପ୍ରସ୍ତୁତ କରାଯାଇ ଗର୍ଭବତୀଙ୍କୁ ଚିହ୍ନଟ କରାଯିବ ।

ଘର ଘର ବୁଲି ଗର୍ଭବତୀଙ୍କୁ ଟିକା ଦେବାର ବ୍ୟବସ୍ଥା କରିବ ବିଏମସି । ୧୯୨୯ ଟୋଲ ଫ୍ରୀ ନମ୍ବର ରେ ମଧ୍ୟ ସବିଶେଷ ତଥ୍ୟ ପାଇ ପାରିବେ । ପୂର୍ବବର୍ଷ ଭଳି ଘର ଘର ବୁଲି ଯେପରି ଟେଷ୍ଟିଂ କରାଯାଇଥିଲା ସେପରି ଘର ଘର ବୁଲି ଟିକାକରଣ କରାଯିବାକୁ ବିଏମସି ଯୋଜନା କରିଥିବା ସୂଚନା ଦେଇଚନ୍ତି ଜୋନାଲ ଡେପୁଟି କମିଶନର ।

କୋଭିଡ ସମୟରେ ରକ୍ତଭାବ ଦୂର କରିଛି ଓଡ଼ିଶା ମୋ ପରିବାର, ମୁଖ୍ୟମନ୍ତ୍ରୀ ଜଣାଇଲେ ଧନ୍ୟବାଦ

ଭୁବନେଶ୍ୱର: କୋଭିଡ ସମୟରେ ରକ୍ତଦାନ କରୁଥିବା ବ୍ୟକ୍ତିମାନଙ୍କ ନିଷ୍ଠା ଏବଂ ପରୋପକାରୀ ମନୋଭାବର ତୁଳନା ନାହିଁ। ଜୁନ ମାସରେ ‘ଓଡ଼ିଶା ମୋ ପରିବାର’ର ଜୀବନ ବିନ୍ଦୁ ଶିବିରରୁ ୧୪,୨୧୪ ୟୁନିଟ୍ ରକ୍ତ ସଂଗ୍ରହ ହେବା ଅତ୍ୟନ୍ତ ଖୁସିର ବିଷୟ। ଏଥିରେ ଉଲ୍ଲେଖନୀୟ କାର୍ଯ୍ୟ କରିଥିବା ସମସ୍ତ ବିଧାୟକ, ସଂଯୋଜକ ଓ କର୍ମୀଙ୍କୁ ମୋର ସାଧୁବାଦ ଜଣାଉଛି ।

ରାଜ୍ୟରେ ରକ୍ତ ଅଭାବ ପଡିଥିବା ବେଳେ ଓଡ଼ିଶା ମୋ ପରିବାର ପକ୍ଷରୁ ସମଗ୍ର ରାଜ୍ୟରେ ଜୀବନ ବିନ୍ଦୁ ମାଧ୍ୟମରେ ରକ୍ତଦାନ ଶିବିର କାର୍ଯ୍ୟକ୍ରମ ଅନୁଷ୍ଠିତ ହୋଇ ଆସିଛି  । ଯେଉଁଥିପାଇଁ ଅନେକ ଜୀବନ ବଞ୍ଚିପାରିଛି  । ଅନେକ ଅଭାବ ବ୍ୟକ୍ତି ରକ୍ତ ଅଭାବରୁ ବଞ୍ଚିତ ହୋଇନାହାଁନ୍ତି  । ସେଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶା ମୋ ପରିବାରର ସମସ୍ତ ସଦସ୍ୟଙ୍କୁ ଧନ୍ୟବାଦ ଜଣାଇଛନ୍ତି  ।

 

 

ବୁଢ଼ାବଳଙ୍ଗ ଏବଂ ସ୍ଵର୍ଣ୍ଣନନ୍ଦୀ କୂଳରେ ପ୍ରାଚୀନ ସଭ୍ୟତାର ସନ୍ଧାନ

ବାଲେଶ୍ଵର:  ମିଳିଲା ପ୍ରାଚୀନ ସଭ୍ୟତାର ସନ୍ଧାନ । ରେମୁଣା ବ୍ଲକ୍ ଦୁର୍ଗାଦେଈପୁର ଅଞ୍ଚଳରେ ପ୍ରାଚୀନ ସଭ୍ୟତାର ସନ୍ଧାନ ମିଳିଛି । ବୁଢ଼ାବଳଙ୍ଗ ଏବଂ ସ୍ଵର୍ଣ୍ଣନନ୍ଦୀ କୂଳରେ ଗଢ଼ି ଉଠିଥିବା ପ୍ରାଚୀନ ସଭ୍ୟତାର ଅଂଶବିଶେଷ ଆବିଷ୍କାର କରାଯାଇଛି । ଉତ୍କଳୀୟ ନୌବାଣିଜ୍ୟ ଓ ଦକ୍ଷିଣ -ପୂର୍ବ ଏସିଆ ଗବେଷଣା ଅନୁଷ୍ଠାନ ପତ୍ନତାତ୍ତ୍ବିକ ସର୍ବେକ୍ଷଣ ବେଳେ ଏସବୁର ସନ୍ଧାନ ମିଳିଛି ।

ଆବିଷ୍କୃତ ସାମଗ୍ରୀ ପ୍ରାୟ ଅଢେଇ ହଜାର ବର୍ଷ ତଳର ବୋଲି ଜଣା ପଡ଼ିଛି । ମାଟି ତଳୁ ବାହାରିଛି ମାଟିପାତ୍ର, ମାଟି ନିର୍ମିତ ଖେଳନା, ଅଳଙ୍କାର । ଲୌହଯୁଗ ସମୟର ମଧ୍ୟ ଲୁହା ସ୍ଲାବ୍‌, ଭାଲା, କଣ୍ଟା ଓ କଳା ଓ ଲାଲ ରଙ୍ଗର ମାଟିପାତ୍ର ମିଳିଛି ।

ପ୍ରତ୍ନତତ୍ତ୍ୱବିତ୍ ଡ. ସୁନୀଲ କୁମାର ପଟ୍ଟନାୟକ କହିଥିଲେ, ଦୁର୍ଗାଦେବୀର ପ୍ରତ୍ନତାତ୍ତ୍ୱିକ ଅବଶେଷର ପର୍ଯ୍ୟାଲୋଚନା ପରେ ଭାରତ ସରକାରଙ୍କ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା ଠାରୁ ଉତ୍‌ଖନନ ନିମନ୍ତେ ସ୍ୱୀକୃତି ପତ୍ର ମିଳିଥିଲା। ଉତ୍‌ଖନନ ମାର୍ଚ୍ଚ ୨୦୨୧ରୁ ଆରମ୍ଭ ହୋଇ ମେ’ ୫ ଯାଏ ଚାଲିଥିଲା। ଆଜକୁ ପ୍ରାୟ ୨୫୦୦ ବର୍ଷ ତଳର ଦୁର୍ଗାଦେବୀ ପ୍ରାଚୀନ ସହର ବୁଢାବଳଙ୍ଗ ଓ ସୋଣ ନଦୀ ଅବବାହିକାର ମଧ୍ୟଭାଗରେ ପ୍ରାୟ ୫ କିଲୋମିଟର ପରିଧି ବିଶିଷ୍ଟ ମାଟି ନିର୍ମିତ ପ୍ରାଚୀର ଦ୍ୱାରା ପରିବେଷ୍ଟିତ ଥିଲା। ଉଭୟ ପାର୍ଶ୍ୱରେ ଗଙ୍ଗାହାର ଓ ପ୍ରସନ୍ନ ନାଳ ଗଡ଼ଖାଇ ଭାବରେ ଅଦ୍ୟାବଧି ରହିଛି।

ଖନନରୁ ଏହି ସମୟର ପ୍ରାଚୀନ ମାଟିପାତ୍ର, ମାଟି ନିର୍ମିତ ଅଳଙ୍କାର, ମାଳି ନିର୍ମିତ ଖେଳଣା, ଲୁହା କଣ୍ଟା ଇତ୍ୟାଦି ମିଳିଛି। ପରବର୍ତ୍ତୀ ଲୌହ ଯୁଗ ସମୟର ଲୁହାର ସ୍ମାଗ୍‌, ଭାଲାର ଅଗ୍ରଭାଗ, କଣ୍ଟା ଇତ୍ୟାଦି ଉପଲବ୍ଧ ହୋଇଛି। ଏଥିସହ କଳା ଓ ଲାଲ୍ ରଙ୍ଗର ମାଟିପାତ୍ର ସହ ଚିକ୍କଣ କଳା ରଙ୍ଗ ଥିବା ମାଟିପାତ୍ର ମିଳିଛି। ଦୁର୍ଗାଦେବୀ ପ୍ରତ୍ନତାତ୍ତ୍ୱିକ ଉତ୍‌ଖନନର ପ୍ରଥମ ପର୍ଯ୍ୟାୟରେ ଏହା ଆଜକୁ ପ୍ରାୟ ୪୦୦୦ ବର୍ଷ ପୁର୍ବ ବୋଲି ଜଣାପଡ଼ୁଛି।

ଖ୍ରୀଷ୍ଟ ପୂର୍ବ ୨୧୦୦ ରୁ ୧୦୦୦ ସମୟ କାଳ ମଧ୍ୟରେ ଓଡ଼ିଶା ଉନ୍ନତ କୃଷି ସଭ୍ୟତାର ବିକାଶ ଏବଂ ପରେ ପରେ ଖ୍ରୀଷ୍ଟ ପୂର୍ବ ୧୫୦୦ ରୁ ୬୦୦ ବର୍ଷ ସମୟ କାଳ ମଧ୍ୟରେ ଲୌହ ଯୁଗର ବିକାଶ ଏବଂ ଉନ୍ନତ ଲୌହ ସାମଗ୍ରୀର ବହୁଳ ବ୍ୟବହାର ଏବଂ ପରବର୍ତ୍ତୀ ସମୟରେ ଖ୍ରୀଷ୍ଟ ପୂର୍ବ ୪୦୦ ବେଳକୁ ସହରୀ ସଭ୍ୟତାର ବିକାଶର ଚିତ୍ର ଓଡ଼ିଶା ତଥା ପୂର୍ବ ଭାରତରେ ଏକ ଦୃଷ୍ଟାନ୍ତ ଦୁର୍ଗାଦେବୀରୁ ପ୍ରାପ୍ତ ହୋଇଛି ବୋଲି ଡ. ପଟ୍ଟନାୟକ ସ୍ପଷ୍ଟ କରିଛନ୍ତି।

ବିରୋଧୀଙ୍କୁ ରଣେନ୍ଦ୍ରଙ୍କ ପ୍ରଶ୍ନ, ୧୭ ଜିଲ୍ଲାରେ ରବିଚାଷ ବେଳେ ୩୦ ଜିଲ୍ଲାରେ ଆନ୍ଦୋଳନ କାହିଁକି ?

ଭୁବନେଶ୍ୱର: ଧାନକିଣା ପ୍ରସଙ୍ଗକୁ ନେଇ ବିରୋଧୀ ଚଳାଇଛନ୍ତି ନାଟକବାଜି । ୧୭ ଜିଲ୍ଲାରେ ରବିଚାଷ ହେଉଥିବା ବେଳେ ୩୦ ଜିଲ୍ଲାରେ ଆନ୍ଦୋଳନ କାହିଁକି ବୋଲି ଯୋଗାଣ ଓ ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ପ୍ରଶ୍ନ କରିଛନ୍ତି । ଗତବର୍ଷ ୮୩ ପ୍ରତିଶତ ରବିଧାନ ସଂଗ୍ରହ ହୋଇଥିବା ବେଳେ ଚଳିତବର୍ଷ ୯୧ ପ୍ରତିଶତ ଧାନ ସଂଗ୍ରହ ହୋଇଛି । ପଞ୍ଜୀକୃତ ଚାଷୀଙ୍କ ଧାନ କିଣାଯାଇଛି । ଚଳିତବର୍ଷ ୮ ପ୍ରତିଶତ ଲୋକ ଧାନ ବିକିଛନ୍ତି ବୋଲି । ମନ୍ତ୍ରୀ କହିଛନ୍ତି, ମୁଁ ସବୁବେଳେ ବିରୋଧୀଙ୍କୁ କହିଛି, ଟୋକନ ବ୍ୟବସ୍ଥା ଟେକ୍ନୋଲୋଜି ଦ୍ବାରା ନିୟନ୍ତ୍ରିତ। ଏହା ଅଟୋମେଟେଡ ସିଷ୍ଟମ। ବିରୋଧୀ କଂଗ୍ରେସ ଏବଂ ବିଜେପି ଭାଇମାନଙ୍କୁ କହିଛି, ଯେଉଁମାନେ ବାଛବିଚାରର ଶିକାର ହୋଇଛନ୍ତି ଲିଖିତ ଆକାରରେ ଦେବାପାଇଁ ।

ମିଡିଲମ୍ୟାନ ମାନେ ସିଷ୍ଟମ ଭିତରେ ପଶିପାରୁନାହାନ୍ତି ।ଆମ ବ୍ୟବସ୍ଥାକୁ କେନ୍ଦ୍ର ଖାଦ୍ୟ ସଚିବ ରବିକାନ୍ତ ପ୍ରଶଂସା କରିଛନ୍ତି । ଉତ୍ତରପ୍ରଦେଶ ସରକାର ପି-ପାସ ବ୍ୟବସ୍ଥା ଲାଗୁ କରୁଛନ୍ତି । ଅବଧି ବୄଦ୍ଧି ପାଇଁ ଚିଠି ଲେଖାଯିବ ନାହିଁ। ବିଜେପି ରାଜନୈତିକ ଉଦ୍ଦେଶ୍ୟ ରଖି ଏଭଳି ନାଟକବାଜି କରୁଛି । ଦେଶର ଅବସ୍ଥା କ’ଣ ? ପେଟ୍ରୋଲ ଡିଜେଲ ଦର କେଉଁ ଆଡକୁ ଯାଉଛି ? ସେ ଯଦି୧୦୦ରୁ ଅଧିକ ପେଟ୍ରୋଲ ଡିଜେଲ ଦରକୁ ନେଇ ଗର୍ବ ଅନୁଭବ କରୁଥିବେ, ମୋର କହିବାର ନାହିଁ। ତେବେ ତେଲଦର ବୃଦ୍ଧି ଉପରୁ ଜନତାଙ୍କ ନଜର ହଟାଇବା ପାଇଁ ବିଜେପି ଆନ୍ଦୋଳନ କରୁଛି ବୋଲି ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଛନ୍ତି ।

ପାରଳା ମହାରାଜା କୃଷ୍ଣଚନ୍ଦ୍ର ଗଜପତି ଦେବଙ୍କ ପ୍ରତି ଅସମ୍ମାନଜନକ ଲେଖା, ଥାନାରେ ଏତଲା

ଗଜପତି: ଓଡିଶାର ପ୍ରଥମ ପ୍ରଧାନମନ୍ତ୍ରୀ କୃଷ୍ଣଚନ୍ଦ୍ର ଗଜପତିଙ୍କ ପ୍ରତି ଅସମ୍ମାନ ଲେଖା ପ୍ରକାଶନ କରିଥିବା ବ୍ୟକ୍ତିଙ୍କୁ ଗିରଫ ପାଇଁ ପାରଳା ଥାନାରେ କରାଯାଇଛି ଅଭିଯୋଗ। ସ୍ୱତନ୍ତ୍ର ଓଡିଶା ପ୍ରଦେଶ ଗଠନର ଅନ୍ୟତମ ବିନ୍ଧାଣୀ ତଥା ଓଡିଶାର ପ୍ରଥମ ପ୍ରଧାନମନ୍ତ୍ରୀ ସ୍ୱର୍ଗତ ପାରଳା ମହାରାଜା କୃଷ୍ଣଚନ୍ଦ୍ର ଗଜପତି ଦେବଙ୍କ ପ୍ରତି ଅସମ୍ମାନଜନକ ଲେଖା “ଜୟପୁର ରାଜବଂଶାଳୀ” ପୁସ୍ତକର ୩୩୨ ପୃଷ୍ଠାରେ ପ୍ରକାଶ ପାଇଛି। ସମଗ୍ର ଓଡିଶାର ଗର୍ବ ଗୌରବ ତଥା ମହାପୁରୁଷ ସ୍ୱର୍ଗତ କୃଷ୍ଣଚନ୍ଦ୍ର ଗଜପତିଙ୍କୁ ନେଇ ଏଭଳି ଅସମ୍ମାନ ପ୍ରଦର୍ଶନ କରି ଲେଖା ପ୍ରକାଶ ପାଇଥିବାରୁ ଏହା ବିରୁଦ୍ଧରେ ପାରଳାଖେମୁଣ୍ଡି ଉତ୍କଳ ହିତୈଷଣୀ ସମାଜ ପକ୍ଷରୁ ଏହାର ଦୃଢ ପ୍ରତିବାଦ କରାଯିବା ସହ ବିହିତ କାର୍ଯ୍ୟାନୁଷ୍ଠାନ ନିମନ୍ତେ ସ୍ଥାନୀୟ ଥାନାରେ ଲିଖିତ ଅଭିଯୋଗ କରାଯାଇଛି।

କୋରାପୁଟ ଜିଲ୍ଲା ଜୟପୁର ସହର ନିବାସୀ କୃଷ୍ଣଚନ୍ଦ୍ର ମିଶ୍ର ଓ ସୁବାଷ ଚନ୍ଦ୍ର ମିଶ୍ର ନାମକ ଦୁଇ ଜଣ ବ୍ୟକ୍ତି “ଜୟପୁର ରାଜବଂଶାଳୀ” ନାମକ ଏକ ପୁସ୍ତକର ୩୩୨ ପୃଷ୍ଠାରେ ପାରଳା ମହାରାଜା ସ୍ୱର୍ଗତ କୃଷ୍ଣଚନ୍ଦ୍ର ଗଜପତି ନାରାୟଣ ଦେବଙ୍କୁ ଅସମ୍ମାନଜନକ ଭାବରେ “କୃଷ୍ଣଚନ୍ଦ୍ର ଗଜପତି ବ୍ରିଟିଶ ସରକାରଙ୍କ ଚାଟୁକାରକ ଥିଲେ, କୃଷ୍ଣଚନ୍ଦ୍ର ଗଜପତିଙ୍କ କୁଚକ୍ରାନ୍ତ ଯୋଗୁଁ ୧୯୩୬ ଏପ୍ରିଲ ୧ ତାରିଖରେ ଓଡିଶା ଭାଷା ଭାଷୀ ଅଞ୍ଚଳର ଅଧା ଅଂଶ ସେତେବେଳର ମାଡ୍ରାସ ପ୍ରେସିଡେନ୍ସି ଅଧିନସ୍ଥ ଆନ୍ଧ୍ର ଅଞ୍ଚଳରେ ମିଶାଇ ଦେଇ ଓଡିଆଙ୍କୁ ଦୁଇ ଭାଗ କରି ସୀମାରେଖା ଟାଣିଛନ୍ତି। ଓଡିଶାର ଅଧେ ଆନ୍ଧ୍ରରେ ସାମିଲ କରି ନିଜର ସ୍ୱାର୍ଥ ସାଧନ କରିଛନ୍ତି। ଏହି ମହାରାଜା ପୂଜ୍ୟପୂଜାର ଅଧିକାରୀ ଅଟନ୍ତି କି?” ଏପରି କିଛି ଉଲ୍ଲେଖ କରାଯାଇଥିବା ଅଭିଯୋଗ ଆଣିଛି ଉତ୍କଳ ହିତୈଷଣୀ ସମାଜ।

ଏପରି ଅବାଞ୍ଛିତ ଓ ଅସମ୍ମାନଜନକ ମନ୍ତବ୍ୟ ଦ୍ୱାରା ସର୍ବସାଧାରଣରେ ସେହି ଦିବଙ୍ଗତ ମହାପୁରୁଷଙ୍କ ପ୍ରତିଷ୍ଠା, ମର୍ଯ୍ୟାଦା କ୍ଷତିଗ୍ରସ୍ତ ହେବା ସହ ଆମ ଅନୁଷ୍ଠାନ ଏବଂ ରାଜ୍ୟର ଅଗଣିତ ଜନସାଧାରଣଙ୍କ ମାନସରେ ଏହା ଅସହ୍ୟ ଯନ୍ତ୍ରଣାଜାତ କରିବା ସହ ଓଡିଶାବାସୀଙ୍କୁ ଲାଞ୍ଛିତ କରୁଛି। ଏନେଇ ପାରଳାଖେମୁଣ୍ଡି ଥାନାରେ ଲିଖିତ ଅଭିଯୋଗ କରିଛନ୍ତି। ଉଭୟଙ୍କ ବିରୁଦ୍ଧରେ ବିହିତ କାର୍ଯ୍ୟାନୁଷ୍ଠାନ ସହ ସମ୍ପୃକ୍ତ ପୁସ୍ତକର ବିକ୍ରୟ ଓ ବଣ୍ଟନକୁ ତୁରନ୍ତ ବନ୍ଦ କରାଯାଉ। ଏହି ଅଭିଯୋଗ ପତ୍ରକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବୟ ଗଜପତି ଜିଲ୍ଲାପାଳଙ୍କୁ ବିହିତ କାର୍ଯ୍ୟାନୁଷ୍ଠାନ ନିମନ୍ତେ ମଧ୍ୟ ପ୍ରେରଣ କରାଯାଇଛି।