ମାଲକାନଗିରି: ମାଲକାନଗିରି ଜିଲ୍ଲା ବବଳିପାହାଡ଼ ଏବଂ କୁଂଖରୀ ଜଙ୍ଗଲରେ ମାଓ ପୋଲିସ ମୁହାଁମୁହିଁ। ମାଓ କ୍ୟାମ୍ପ ଥିବା ଖବର ପାଇ ଚଢ଼ାଉ ବେଳେ ମାଓ ଓ ଯବାନଙ୍କ ମଧ୍ୟରେ ଗୁଳି ବିନିମୟ ହୋଇଛି। ଗୁଳି ବିନିମୟରେ ଟପ ମାଓ ନେତା ସୁରେଶ ଓ ଅନ୍ୟ ସଦସ୍ୟମାନେ ଛତ୍ରଭଙ୍ଗ ଦେଇଛନ୍ତି। ପୋଲିସ ଘଟଣାସ୍ଥଳରୁ ବିପୁଳ ପରିମାଣର ମାଓ ସାମଗ୍ରୀ ଜବତ କରିଛି। ଗୋଟିଏ ୩୦୩ ରାଇଫଲ, ମାଗାଜିନ, ଗୁଳି, ଔଷଧ, ୱାକିଟକି, ପୋଷାକ, ଜୋତା ସହ ବହୁ ଜିନିଷ ଜବତ କରାଯାଇଛି। ଗତ ୧୪ ତାରିଖରେ କୋରାପୁଟ ପୋଲିସ SZC କ୍ୟାଡରର ମାଓବାଦୀ ମହେନ୍ଦ୍ରକୁ ଗିରଫ କରିଥିଲା। ଏହାପରେ ଏହି ସଫଳତା ମିଳିଥିବା ମାଲକାନଗିରି ଏସପି ସୂଚନା ଦେଇଛନ୍ତି।
ବାପାମାଙ୍କୁ ନିର୍ଯାତନା ଦେଉଥିଲା ଉଦ୍ଧତ ପୁଅ, ଗଛରେ ବାନ୍ଧିଲେ ଗାଁ ଲୋକ
କେନ୍ଦୁଝର: ବାପାମାଙ୍କୁ ନିର୍ଯାତନା ଦେଉଥିବା ଉଦ୍ଧତ ପୁଅକୁ ଗଛରେ ବାନ୍ଧିଲେ ଗାଁ ଲୋକ । କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଘଷିପୁରା ଥାନା ସଟତିରା ଗାଁରେ ଏଭଳି ଘଟିଛି। ଉଦ୍ଧତ ପୁଅ ନାଁରେ ଥାନାରେ ଅଭିଯୋଗ କରିଛନ୍ତି ବାପମାଆ।

ସଟତିରା ଗାଁର ଯଦୁମଣି ନାହକଙ୍କ ଏକମାତ୍ର ପୁଅ ଶଙ୍କର ନିଜ ଇଚ୍ଛାରେ ବାହା ହେବାପରେ ବାପାମାଆଙ୍କୁ ଘରେ ରହିବାକୁ ଦେଉନାହିଁ । ଆବାସ ଯୋଜନାରେ ବାପା ଯଦୁମଣିଙ୍କ ନାଁରେ ପକ୍କାଘର ରହିଛି। ହେଲେ ପୁଅର ବାରଣ ଯୋଗୁ ବାପା ମାଆ ଚାଳଘରେ ରହୁଛନ୍ତି। ଦିନକୁ ଦିନ ପୁଅର ନିର୍ଯାନତା ବୃଦ୍ଧି ପାଉଥିବାରୁ ଯଦୁମଣି ଓ ପତ୍ନୀ ପାକନ ଗାଁ ଭଦ୍ରଲୋକଙ୍କୁ ଡାକି ସମାଧାନ କରିବାକୁ ଚାହିଁଥିଲେ। ହେଲେ ଭଦ୍ରଲୋକଙ୍କୁ ପୁଅ ଶଙ୍କର ଆକ୍ରମଣ କରିଥିଲା। ପରେ ଗ୍ରାମବାସୀ ମିଳିତ ଭାବେ ଶଙ୍କରକୁ ଏକ ଗଛରେ ବାନ୍ଧି ପକାଇ ପୋଲିସ୍ ନିକଟରେ ଅଭିଯୋଗ କରିଥିଲେ। ତେବେ ଏହା ମଧ୍ୟରେ ଶଙ୍କର ଫେରାର ହୋଇଯାଇଛି ।
ବଢ଼ୁଛି ସୋନୁଙ୍କ ଅଡ଼ୁଆ, ଦ୍ୱିତୀୟ ଦିନରେ ବି ଘରେ ସର୍ଭେ ପାଇଁ ପହଞ୍ଚିଲା ଆୟକର ବିଭାଗ
ମୁମ୍ବାଇ: ବଢ଼ିବାରେ ଲାଗିଛି ସୋନୁ ସୁଦଙ୍କ ଅଡ଼ୁଆ । ବୁଧବାର ଭଳି ଆୟକର ବିଭାଗ ଟିମ୍ ଆଜି ମଧ୍ୟ ସୋନୁଙ୍କ ସର୍ଭେ କରିବାକୁ ପହଞ୍ଚିଯାଇଛି। ବୁଧବାର ଆୟକର ବିଭାଗ ସୋନୁଙ୍କ ଘର ସମେତ ତାଙ୍କ ଲିଙ୍କରେ ଥିବା ୬ଟି ସ୍ଥାନ ଉପରେ ସର୍ଭେ କରିଥିଲା। ହେଲେ କିଛି ବି ଜବତ ହୋଇନଥିଲା। ତେବେ ଆଜି ସକାଳୁ ପୁଣିଥରେ ଏହି ଟିମ୍ ସର୍ଭେ କରିବାକୁ ସୋନୁଙ୍କ ଘରେ ପହଞ୍ଚିଛନ୍ତି।
ସୂଚନାନୁସାରେ, ସୋନୁ ସୁଦଙ୍କ ଆର୍ଥିକ ରେକର୍ଡ, ଆୟ, ଆକାଉଣ୍ଟ ବୁକ୍, ଖର୍ଚ୍ଚ ସମ୍ବନ୍ଧୀୟ ତଥ୍ୟ ଯାଞ୍ଚ କରାଯାଉଛି। ତେବେ ସୋନୁଙ୍କ ଘରେ ଚାଲିଥିବା ଏହି ସର୍ଭେକୁ ନେଇ ଆଦମୀ ପାର୍ଟି ଅସନ୍ତୋଷ ବ୍ୟକ୍ତ କରିଛି।
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିବାଲ ସୋନୁଙ୍କ ସପକ୍ଷରେ ଟ୍ୱିଟ୍ କରିଛନ୍ତି । ସେ ଲେଖିଛନ୍ତି ଯେ ସତ୍ୟର ମାର୍ଗରେ ବହୁତ ବାଧାବିଘ୍ନ ଆସେ କିନ୍ତୁ ସତ୍ୟ ସବୁବେଳେ ବିଜୟୀ ହୁଏ। ସୋନୁ ସୁଦଙ୍କ ସହ ସେହି ଲକ୍ଷ ଲକ୍ଷ ପରିବାରର ପ୍ରାର୍ଥନା ଅଛି ଯେଉଁମାନଙ୍କୁ ସେ ଅସୁବିଧା ସମୟରେ ସାହାଯ୍ୟ କରିଥିଲେ।
ଅନ୍ୟପଟେ ଅଭିନେତା ସୋନୁଙ୍କର କିନ୍ତୁ ଏଯାଏ ଏ ସମ୍ବନ୍ଧୀୟ କୌଣସି ପ୍ରତିକ୍ରିୟା ମିଳିନାହିଁ । ଲଗାତା ଦୁଇ ଦିନ ଧରି ତାଙ୍କ ଘରେ ସର୍ଭେ କ’ଣ ପାଇଁ କରାୟାଉଛି, ତା’ର ମଧ୍ୟ କାରଣ ଅସଷ୍ପଷ୍ଟ ରହିଛି।
ଆହୁରି ଲୁଚିଛି କି ପୁରୀ ଏମାର ମଠରେ ରୂପା ଇଟା, ଏନେଇ ଆରମ୍ଭ ହେଲା ମେଟାଲ ଡିଟେକ୍ଟର ଦ୍ୱାରା ଯାଞ୍ଚ
ପୁରୀ: ପୁରୀ ଏମାର ମଠ ଯାଞ୍ଚ ପ୍ରକ୍ରିୟା ଆରମ୍ଭ ହୋଇଛି। ମେଟାଲ ଡିଟେକ୍ଟର ଦ୍ୱାରା ମଠର ବିଭିନ୍ନ ସ୍ଥାନକୁ ଯାଞ୍ଚ କରାଯାଉଛି। ଏଏସ୍ଆଇ ଓ ପ୍ରଶାସନର ସ୍ୱତନ୍ତ୍ର ଟିମର ଯାଞ୍ଚରେ ସାମିଲ ହୋଇଥିବା ବେଳେ ଏମାର ମଠର ଟ୍ରଷ୍ଟ କମିଟି ସଦସ୍ୟ ମଧ୍ୟ ସାମିଲ ହୋଇଛନ୍ତି। ପୂର୍ବରୁ ଏମାର ମଠ ଇଣ୍ଟେରିମ୍ ଟ୍ରଷ୍ଟ ବୋର୍ଡ ଦେବୋତ୍ତର ବିଭାଗକୁ ଯାଞ୍ଚ ପାଇଁ ଚିଠି ଲେଖିଥିଲା।

ସେହି ଅନୁସାରେ ଆଜି ଦୋବୋତ୍ତର ବିଭାଗ ପକ୍ଷରୁ ଯାଞ୍ଚ ଆରମ୍ଭ ହୋଇଛି। ଯାଞ୍ଚରେ ଦେବୋତ୍ତର ବିଭାଗ କର୍ମଚାରୀ ମେଟାଲ୍ ଡିଟେକ୍ଟର ଟିମ୍, ଶ୍ରୀମନ୍ଦିର ପ୍ରଶାସନ କର୍ତ୍ତୃପକ୍ଷ ସାମିଲ ହୋଇଛନ୍ତି। ପୂର୍ବରୁ ଏହି ଧନଶାଳୀ ମଠରୁ ୫୨୨ ରୁପା ଇଟା ମିଳିଥିଲା। ଏହାପରେ ଦ୍ୱିତୀୟ ଥର ଯାଞ୍ଚ ବେଳେ ୪୫ ରୁପା ଇଟା ମିଲିଥିଲା। ମଠ ତଳେ ଆଉ କିଛି ଥିବା ସନ୍ଦେହରେ ପୁଣି ଥରେ ଚାଲିଛି ଯାଞ୍ଚ।
ସୁନା କିଣିବା ପାଇଁ ପୁଣି ମିଳିଲା ସୁଯୋଗ, ଜାଣନ୍ତୁ କେତେ କମିଲା ସୁନା ଦର
ନୂଆଦିଲ୍ଲୀ: ଆଜି ସକାଳେ ଦେଶର ପ୍ରମୁଖ ସହରଗୁଡ଼ିକରେ ସୁନା ଓ ରୂପା କାରବାର ଆରମ୍ଭ ହୋଇଛି । ଦେଶର ଅଧିକାଂଶ ସହରରେ ସୁନା ଓ ରୂପା ଦାମରେ ପାର୍ଥକ୍ୟ ରହିଛି । ଆଜି MCX ରେ ଏବଂ ଆନ୍ତର୍ଜାତୀୟ ବଜାରରେ ସୁନା ବୃଦ୍ଧି ସହିତ କାରବାର ଆରମ୍ଭ ହୋଇଛି । ତଥାପି, MCX ଏବଂ ଆନ୍ତର୍ଜାତୀୟ ବଜାର ଦର ଟିକସ ବିନା, ତେଣୁ ଘରୋଇ ବଜାରରେ ହାରରେ ପାର୍ଥକ୍ୟ ରହିଛି ।

ଜାଣନ୍ତୁ ସୁନା ଓ ରୂପାର ଦାମ
ଇଣ୍ଡିଆନ୍ ବୁଲିଅନ୍ ଜୁଏଲର୍ସ ଆସୋସିଏସନର ୱେବସାଇଟରେ ସୁନା ଗୁରୁବାର ଦିନ ୧୦ ଗ୍ରାମ ପ୍ରତି ୧୯୩ ଟଙ୍କା ଶସ୍ତା ହୋଇ ଦଶ ଗ୍ରାମରେ ୪୭୧୫୯ ଟଙ୍କାରେ ବନ୍ଦ ହୋଇଯାଇଛି । ଅନ୍ୟପକ୍ଷରେ, ଶୁକ୍ରବାର ଦିନ ଗଣେଶ ପୂଜା ଏବଂ ଶନିବାର, ରବିବାର ଛୁଟିଦିନ ହେତୁ ଏହି ସାଇଟରେ ଦର ଅପଡେଟ୍ ହୋଇନାହିଁ । ତେଣୁ, ଗୁରୁବାର ଦିନ ସୁନା ଏହାର ସର୍ବକାଳୀନ ଦାମରୁ ୧୦ଗ୍ରାମ ପିଛା ପ୍ରାୟ ୯,୧୯୦ଟଙ୍କା ଶସ୍ତା ହୋଇଛି । ଅଗଷ୍ଟ ୨୦୨୦ ରେ ସୁନା ଏହାର ସର୍ବକାଳୀନ ବୃଦ୍ଧି ହାସଲ କରିଥିଲା । ସେତେବେଳେ ସୁନା ଦଶ ଗ୍ରାମ ପିଛା ୫୬,୨୦୦ଟଙ୍କା ଥିଲା। ଅନ୍ୟପକ୍ଷରେ, ରୂପା ହାର ଗୁରୁବାର କିଲୋଗ୍ରାମରେ ୬୪୦୬୭ ଟଙ୍କା ରହିଛି ।

ସେହିପରି ଭୁବନେଶ୍ୱରେ ଆଜି ସକାଳେ ସୁନା ଏବଂ ରୂପାର ମୂଲ୍ୟ ଥିଲା, ୨୨ କ୍ୟାରେଟ ସୁନାର ଦାମ ୪୪୩୯୦ ଟଙ୍କା: ୨୪ କ୍ୟାରେଟ ସୁନାର ଦାମ ୪୮୨୯୦ ଟଙ୍କା । ରୂପାର ଦାମ- ୬୪୨୦୦ ଟଙ୍କା ।

ଜାଣନ୍ତୁ ଅନ୍ତର୍ଜାତୀୟ ବଜାରରେ ସୁନାର ମୂଲ୍ୟ କେତେ ରହିଛି
ଅନ୍ତର୍ଜାତୀୟ ବଜାରରେ ସୁନା ହ୍ରାସ ହୋଇ ଶନିବାର କାରବାର ବନ୍ଦ ହୋଇଥିଲା । ଯୁକ୍ତରାଷ୍ଟ୍ରରେ ସୁନା କାରବାର ୬.୪୭ ଡଲାରରେ ହ୍ରାସ ହୋଇ ୧,୭୮୭.୭୮ ଡଲାରରେ ପହଞ୍ଚିଛି । ଅନ୍ୟ ପଟେ ରୂପା କାରବାର ୦.୩୦ ଡଲାର ହ୍ରାସ ପାଇ ୨୩.୭୪ ଡଲାରରେ ବନ୍ଦ ହୋଇଥିଲା ।
ରାଜ୍ୟରେ କରୋନା ସ୍ଥିତି ଭଲ ଥିଲେ ମଧ୍ୟ ଆଶ୍ୱସ୍ତ ହେବାନାହିଁ, କେତେବେଳେ ବି ସଂକ୍ରମଣ ବଢ଼ିପାରେ
ଭୁବନେଶ୍ୱର: ଦେଶରେ ଏଣ୍ଡେମିକ୍ ଆଡ଼କୁ ଯାଉଛି ପାଣ୍ଡେମିକ୍। ଏନେଇ ୧୦ ଦିନ ଆଗରୁ W.H.O ରିପୋର୍ଟ ଦେଇସାରିଛି। ହୁ’ର ରିପୋର୍ଟକୁ ଗ୍ରହଣ କରିବାକୁ ହେବ ବୋଲି କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର। କିନ୍ତୁ ଏହା ଶତ ପ୍ରତିଶତ ନିଶ୍ଚିନ୍ତ ନୁହନ୍ତି ବୋଲି ସେ କହିଛନ୍ତି। ତେବେ ପ୍ରତି ମଡେଲର ଅପ୍ ଡାଉନ୍ ଅଛି। ଏ କ୍ଷେତ୍ରରେ ବି ହୋଇପାରେ ସେହିଭଳି ଅପ୍ ଡାଉନ ହେଉଥିବ। କରୋନା କମୁଥିବାରୁ ଏବେ ଆମେ ଆଶ୍ୱସ୍ତ ହେବା ନାହିଁ।
କାରଣ ଏବେ ସମ୍ପୂର୍ଣ୍ଣ ଭାବରେ କରୋନା ସଂକ୍ରମଣରୁ ରାଜ୍ୟ ଓହରିନାହିଁ। ତେବେ ଏବେ ମଧ୍ୟ କଟକଣାକୁ ମାନି ଚଳିବାକୁ ହେବ। ଲକ୍ଷଣ ଆସିଲେ ଡାକ୍ତରଖାନା ଯିବା ପାଇଁ ଲୋକଙ୍କୁ ସ୍ୱାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର ପରାମର୍ଶ ଦେଇଛନ୍ତି। ସେପଟେ କେରଳରେ କରୋନା ସଂକ୍ରମଣ ବଢି ଚାଲିଥିଲା, ଏବେ କମୁଛି। ସେହିପରି ବର୍ତ୍ତମାନ ମହାରାଷ୍ଟ୍ରରେ ବଢୁଛି, ପରେ କମିବ। ତେଣୁ ସେହି ମଡେଲ ଦେଖିଲେ ଆମେ ଢିଲା ହେବା ଉଚିତ ନୁହେଁ।
ଯଦିଓ ଆମେ ଭଲ ସ୍ଥିତିରେ ଅଛୁ, ଆମର ପଜିଟିଭିଟି ରେଟ୍ କମ୍ ଅଛି। ହସପିଟାଲାଇଜେସନ ହାର କମ୍ ଅଛି। ହେଲେ ବିପଦ ଦୂର ହୋଇନାହିଁ। ଆମ ରାଜ୍ୟରେ କେବେ ବି ସଂକ୍ରମଣ ବଢ଼ିପାରେ ତାହା କହିହେବ ନାହିଁ। ତେଣୁ କଟକଣା ଆମ ରାଜ୍ୟରେ ଚାଲୁ ରହିବ ବୋଲି ସ୍ୱାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର କହିଛନ୍ତି।
UAEର ୧୪ ହୋଟେଲର ୭୫୦ ଷ୍ଟାଫଙ୍କ ଶେଷ ହେଲା କୋଭିଡ ଟେଷ୍ଟ, IPL ସମୟରେ ହେବ ମୋଟ୍ ୩୦ ହଜାର ଟେଷ୍ଟ
ଦୁବାଇ: ଆଇପିଏଲର ଦ୍ୱିତୀୟ ପର୍ଯ୍ୟାୟକୁ କରୋନାରୁ ବଞ୍ଚାଇବାକୁ ବିସିସିଆଇ ଖୁବ ଚେଷ୍ଟା କରୁଛି । ଲିଗ୍ ସମୟରେ ୟୁଏଇର ଭିପିଏସ୍ ହେଲଥ କେୟାର ଜରୁରୀକାଳୀନ ମେଡିକାଲ୍ ସର୍ଭିସ୍, ସ୍ପୋର୍ଟସ୍ ମେଡିସିନ୍ ସପୋର୍ଟ, ସ୍ପେଶାଲିଷ୍ଟ ଟେଲି କନ୍ସଲଟେସନ୍, ଡକ୍ଟର ଅନ୍ କଲ୍, ଆମ୍ବୁଲାନ୍ସ, ଏୟାର ଆମ୍ବୁଲାନ୍ସ ଭଳି ସେବା ପାଇଁ ସହଭାଗୀ ହୋଇଛି।

ଔଷଧ ଏବଂ କୋଭିଡ -19 ପରିଚାଳନା ପାଇଁ ଏକ ୧୦୦ ଜଣିଆ ସଦସ୍ୟ ଦଳ ଗଠନ କରାଯାଇଛି, ଯାହା ଖେଳାଳିମାନଙ୍କୁ ସାହାଯ୍ୟ କରିବେ । ଡାକ୍ତର, ନର୍ସ, ପାରାମେଡିକ୍ସ ଏବଂ ଲ୍ୟାବ ଟେକ୍ନିସିଆନଙ୍କୁ ନେଇ ପ୍ରତ୍ୟେକ ମ୍ୟାଚ୍ ପାଇଁ ଷ୍ଟାଡିୟମରେ ଦୁଇଟି ଡାକ୍ତରୀ ଦଳ ଉପଲବ୍ଧ ହେବ।

କମ୍ ମ୍ୟାଚ କିନ୍ତୁ ଟେଷ୍ଟ ଅଧିକ
ଦ୍ୱିତୀୟ ପର୍ଯ୍ୟାୟରେ କମ୍ ମ୍ୟାଚ୍ ଥିବା ସତ୍ତ୍ୱେ ଅଧିକ କୋଭିଡ୍ ଟେଷ୍ଟ ହେବ । ଖେଳାଳିମାନେ ୟୁଏଇରେ ପହଞ୍ଚିବା ପୂର୍ବରୁ ଦୁବାଇ ଏବଂ ଆବୁଧାବିର ୧୪ ହୋଟେଲରେ ୭୫୦ରୁ ଅଧିକ କର୍ମଚାରୀଙ୍କ କରୋନା ଟେଷ୍ଟ କରାଯାଇଥିଲା। ନୂତନ କୋଭିଡ ପ୍ରୋଟୋକଲ ଅନୁଯାୟୀ ସମସ୍ତ ତୃତୀୟ ଦିନରେ ସମସ୍ତ ଖେଳାଳି ଏବଂ ଅଧିକାରୀଙ୍କ କୋଭିଡ ଟେଷ୍ଟ । ଟୁର୍ନାମେଣ୍ଟ ସମୟରେ ୩୦ ହଜାର ଥର କରୋନା ଟେଷ୍ଟ ହେବା ନେଇ ସୂଚନା ମିଳିଛି । ଏଥିସହ, ସୁରକ୍ଷିତ ବାୟୋ-ବୁବୁଲ୍ସ ପାଇଁ ନର୍ସ ଏବଂ ଅନ୍ୟାନ୍ୟ ଡାକ୍ତରୀ କର୍ମଚାରୀଙ୍କୁ ସେହି ୧୪ ହୋଟେଲରେ ସ୍ଥାନିତ କରାଯାଇଛି ଯେଉଁଠାରେ ଖେଳାଳିମାନେ ଲିଗ୍ ଶେଷ ପର୍ଯ୍ୟନ୍ତ ରହୁଛନ୍ତି ।

ଭିପିଏସ୍ ହେଲଥ କେୟାରର ସିଇଓ ଡ. ଶାଜିର ଗଫାର କହିଛନ୍ତି, ‘ଆମ ଦଳ ଆଇପିଏଲ ସମୟରେ ଚିକିତ୍ସା ସୁବିଧା ଯୋଗାଇବାକୁ ପ୍ରସ୍ତୁତ ରହିଛି। ସମଗ୍ର ଟୁର୍ନାମେଣ୍ଟରେ ଏକ ସୁରକ୍ଷିତ ପରିବେଶ ଯୋଗାଇବା ପାଇଁ ଆମେ ଯଥାସମ୍ଭବ ଚେଷ୍ଟା କରୁଛୁ । ମହାମାରୀ ସମୟରେ ଉଚ୍ଚ-ପ୍ରୋଫାଇଲ୍ କ୍ରୀଡା ଇଭେଣ୍ଟରେ ୟୁଏଇର ଭଲ ଷ୍ଟ୍ରାଇକ୍ ହାର ରହିଛି । ଆଇପିଏଲ୍ ପରେ ଟି-୨୦ ବିଶ୍ୱକପ୍ ମଧ୍ୟ ଅଛି । ଆଶାକରେ ଏହା ୟୁଏଇକୁ ଏକ ସୁରକ୍ଷିତ ବିଶ୍ୱସ୍ତରୀୟ କ୍ରୀଡ଼ା ଗନ୍ତବ୍ୟସ୍ଥଳ ଭାବରେ ଉଭା କରିବାରେ ସାହାଯ୍ୟ କରିବ ।’

୨୦୧୯ ପରେ ପ୍ରଥମ ଥର ପାଇଁ ଷ୍ଟାଡିୟମ ଭିତରେ ଫ୍ୟାନ୍ସଙ୍କ ଉପସ୍ଥିତି
ସୀମିତ ସଂଖ୍ୟକ ଫ୍ୟାନ୍ସଙ୍କୁ ଆଇପିଏଲ ପାଇଁ ଷ୍ଟାଡିୟମକୁ ଯିବାକୁ ଅନୁମତି ଦିଆଯାଇଛି । ବହୁ ପ୍ରତୀକ୍ଷିତ ଟି-୨୦ ଲିଗର ଦ୍ୱିତୀୟ ପର୍ଯ୍ୟାୟ ସେପ୍ଟେମ୍ବର ୧୯ରୁ ୟୁଏଇର ଦୁବାଇ, ଆବୁଧାବି ଏବଂ ଶାରଜାଠାରେ ଖେଳାଯିବ । ପ୍ରଥମ ମ୍ୟାଚ୍ ଦୁବାଇରେ ଡିଫେଣ୍ଡିଂ ଚାମ୍ପିଅନ୍ ମୁମ୍ବାଇ ଇଣ୍ଡିଆନ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ହେବ।

୨୦୧୯ ପରେ ପ୍ରଥମ ଥର ପାଇଁ ପ୍ରଶଂସକଙ୍କ ଉପସ୍ଥିତିରେ ଲିଗ୍ ମ୍ୟାଚ୍ ଖେଳାଯିବ । ତେବେ କେତେ ପ୍ରତିଶତ ପ୍ରଶଂସକ ଷ୍ଟାଡିୟମରେ ପ୍ରବେଶ କରିବେ ସେ ନେଇ ଲିଗ୍ର ଆୟୋଜକମାନେ କିଛି ସୂଚନା ଦେଇନାହାନ୍ତି । କିନ୍ତୁ ସୂଚନାନୁସାରେ ଷ୍ଟାଡିୟମର କ୍ଷମତାର ୫୦ ପ୍ରତିଶତ ପ୍ରଶଂସକଙ୍କୁ ଏଣ୍ଟ୍ରି ଦିଆଯିବ ।





