ଭୁବନେଶ୍ୱର: ସାରା ରାଜ୍ୟରେ କରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି । କରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ସରକାର ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରିଛନ୍ତି । ସଂକ୍ରମଣର ଚେନ ଭାଙ୍ଗିବାକୁ ରାତି ୯ରୁ ନାଇଟ କର୍ଫ୍ୟୁ ଘୋଷଣା କରିଛନ୍ତି । ତେବେ ଏହି ନାଇଟ କର୍ଫ୍ୟୁ ସମୟରେ ଜନସାଧାରଣ ଘରେ ରହିବାକୁ ସରକାରଙ୍କ ପକ୍ଷରୁ କୁହାଯାଇଛି । ତେବେ ନାଇଟ କର୍ଫ୍ୟୁ ସମୟରେ ମହଙ୍ଗା ପଡିଲା ଜନ୍ମଦିନ ପାଳନ । ନାଇଟ କର୍ଫ୍ୟୁ ସମୟରେ ଏକାଧିକ ଯୁବକ ବିଚରାସ୍ତାରେ ବାର୍ଥ ଡେ’ ସେଲିବ୍ରେସନ କରୁଥିବାର ଦେଖିବାକୁ ମିଳିଥିଲା । ଡେଲ୍ଟା ଛକ ଟ୍ରାଫିକ ପୋଷ୍ଟରେ ଚାଲିଥିଲା ବାର୍ଥ ଡେ’ ସେଲିବ୍ରେସନ । ବାର୍ଥ ଡେ’ ପାଳନ କରୁଥିବା ସମୟରେ ପୋଲିସକୁ ଦେଖି ଛତ୍ରଭଙ୍ଗ ଦେଇଥିଲେ ଯୁବକ । ଯାହା ଫଳରେ ପୋଲିସ ଘଟଣାସ୍ଥଳରୁ ୧୨ରୁ ଅଧିକ ଗାଡିକୁ ଜବତ କରିଛି ।
କାଶ୍ମୀରକୁ ନେଇ ପାକିସ୍ତାନର ନୂଆ ଚାଲ୍, ତୁର୍କୀ ସହ ମିଶି ବ୍ରିଟେନରେ ରଚିଛି ଷଡ଼ଯନ୍ତ୍ର
ନୂଆଦିଲ୍ଲୀ: କାଶ୍ମୀରକୁ ନେଇ ପାକିସ୍ତାନର ନୂଆ ଚାଲ୍ । ଭାରତର ଅବିଛେଦ ଅଙ୍ଗ ଜାମ୍ମୁ-କାଶ୍ମୀରକୁ ନେଇ ସବୁଠି ପାକିସ୍ତାନ ମାଟି କାମୁଡ଼ିବା ପରେ ନୂଆ ଷଡ଼ଯନ୍ତ୍ର ରଚିଛି । ତୁର୍କୀକୁ ହାତବାରିସୀ କରି ଭାରତକୁ ଫସାଇବାକୁ ଖେଳିଛି ଚାଲ୍ । ଜାତିସଂଘରେ କାଶ୍ମୀର ମାମଲାରେ ପାକିସ୍ତାନ ଭାରତଠାରୁ ମୁହଁତୋଡ଼ ଜବାବ ପାଇବା ପରେ ବ୍ରିଟେନର ଦ୍ୱାରସ୍ଥ ହୋଇଛି । ବ୍ରିଟେନରେ ଭାରତର ଗୃହମନ୍ତ୍ରୀ ଅମିତ ଶାହ ଓ ସେନାମୁଖ୍ୟ ଏମ୍.ଏମ୍ ନରଭଣେଙ୍କ ଗିରଫଦାରୀ ଦାବି କରିଛି ତୁର୍କୀର ଏକ ଲ ଫାର୍ମ । ପାକିସ୍ତାନର ପ୍ରରୋଚନାରେ ତୁର୍କୀର ଲ ଫାର୍ମ ୨ ହଜାର ଲୋକଙ୍କ ମନ୍ତବ୍ୟ ଥିବା ଏକ କଥିତ ରିପୋର୍ଟକୁ ଲଣ୍ଡନ ପୋଲିସକୁ ପ୍ରଦାନ କରିଛି ।
ଦାବି କରିଛି, ରିପୋର୍ଟରେ ଥିବା ଲୋକଙ୍କ ମତାମତ କାଶ୍ମୀରରେ ହେଉଥିବା ହିଂସାର ପ୍ରମାଣ । ଏହି ରିପୋର୍ଟକୁ ଲ ଫାର୍ମ ଲଣ୍ଡନ ପୋଲିସର ଯୁଦ୍ଧାପରାଧ ୟୁନିଟକୁ ଦେଇ ଗୃହମନ୍ତ୍ରୀ ଓ ସେନାମୁଖ୍ୟ ଗିରଫଦାରୀ ଦାବି କରିଛି । ଦୀର୍ଘବର୍ଷ ଧରି ତୁର୍କୀ-ସାଉଦି ଆରବ ସମ୍ପର୍କ ଭଲ ନଥିବା ବେଳେ ଏହି ସଂସ୍ଥା ଗତବର୍ଷ ସାଉଦି ଆରବ ବିରୋଧରେ ୟମନକୁ ନେଇ ଯୁଦ୍ଧାପରାଧ ଆବେଦନ କରିଥିଲା ।
ତେବେ ପାକିସ୍ତାନ, ପ୍ରୋତ୍ସାହନରେ ତୁର୍କୀ କରିଥିବା ଆବେଦନ ନେଇ ବ୍ରିଟେନ୍, ଭାରତ ସହ ସମ୍ପର୍କ କରି ନାହିଁ । ତୁର୍କୀ ଲ ଫାର୍ମ ଦାଖଲ କରିଥିବା ରିପୋର୍ଟରେ କାଶ୍ମୀରରେ ମାନବାଧିକାର ଉଲ୍ଲଂଘନ ଓ ନରସଂହାର କଥା ଉଲ୍ଲେଖ ରହିଥିବା ବେଳେ ସୀମାରେ ପାକିସ୍ତାନ ସମର୍ଥିତ ଆତଙ୍କବାଦ କାର୍ଯ୍ୟକଳାପ କଥା ଉଲ୍ଲେଖ ନାହିଁ । ବରଂ ସୀମାରେ ଆତଙ୍କବାଦ କାର୍ଯ୍ୟକଳାପ ସମ୍ପୂର୍ଣ୍ଣ ବନ୍ଦ ରହିଥିବା ଦାବି କରାଯାଇଛି । ଯେତେବେଳେ କି ପ୍ରକୃତ ସତ ପ୍ରତିଦିନ ସୀମାରେ ଗୁଳିଗୋଳା ବର୍ଷଣ ହେଉଛି ।
ଭାରତ ବିରୋଧରେ ବ୍ରିଟେନରେ ଆବେଦନ କରିଥିବା ଲ ଫାର୍ମ ଷ୍ଟୋକ୍ ୱାଇଟ୍ ଇସଲାମିକ୍ ଆଇନ୍ ଉପରେ କାମ କରେ । ଏବଂ ତୁର୍କୀ ସହ ଏହି ସଂସ୍ଥାର ଭଲ ସମ୍ପର୍କ ରହିଛି । ଅନ୍ୟପଟେ ତୁର୍କୀ ସହ ପାକିସ୍ତାନ ଲଗାତାର ବନ୍ଧୁତ୍ୱ ବଢ଼ାଉଥିବା ବେଳେ ତୁର୍କୀ ରାଷ୍ଟ୍ରପତି ଏର୍ଦାଗାନ ବାରମ୍ବାର କାଶ୍ମୀରକୁ ନେଇ ଭାରତ ବିରୋଧୀ ମନ୍ତବ୍ୟ ଦେଉଛନ୍ତି । ସେହିଭଳି ସାଇପ୍ରସ୍ ପ୍ରସଙ୍ଗରେ ଭାରତ, ତୁର୍କୀର ସମର୍ଥନ କରୁନାହିଁ ।
ଜିନେଭା ଆଇନ୍ ୧୯୫୭ ଅନୁସାରେ, ବିଶ୍ୱସ୍ତରରେ ଯୁଦ୍ଧାପରାଧ ଯାଞ୍ଚ ଲାଗି ବ୍ରିଟେନ୍ ପାଖରେ ନ୍ୟାୟ ଅଧିକାର ରହିଛି । ଏବେ ଯାହାର ଫାଇଦା ଉଠାଇବାକୁ ଚେଷ୍ଟା କରୁଛନ୍ତି ତୁର୍କୀ ଓ ପାକିସ୍ତାନ । ପୂର୍ବରୁ କାଶ୍ମୀର ପ୍ରସଙ୍ଗରେ ପାକିସ୍ତାନର ଇମ୍ରାନ ସରକାର ଜାତିସଂଘରେ ଭାରତ ଠାରୁ ମୁହଁତୋଡ଼ ଜବାବ ଖାଇଛି । କାଶ୍ମୀର ହାତେଇବାକୁ କେତେବେଳେ ଆମେରିକା ତ ଆଉ କେବେ ଚୀନର ମଧ୍ୟସ୍ଥତା ଚାହୁଁଛି । ଏବେ ପୁଣି ବ୍ରିଟେନରେ ଭାରତ ବିରୋଧରେ ଅଭିଯୋଗ କରି ନୂଆ ଷଡ଼ଯନ୍ତ୍ର ରଚିଛି ।
କ୍ୟାପିଟାଲ ହସ୍ପିଟାଲରେ କାୟା ମେଲାଇଛି କରୋନା, ୪୦ ଡାକ୍ତର କୋଭିଡ ପଜିଟିଭ୍
ଭୁବନେଶ୍ୱର: ହସ୍ପିଟାଲ ସାରା କରୋନା ପଜିଟିଭ । ସ୍ୱାସ୍ଥ୍ୟକର୍ମୀଙ୍କଠାରୁ ଆରମ୍ଭ କରି ଡାକ୍ତର ସମସ୍ତେ କରୋନାରେ ସଂକ୍ରମିତ । କ୍ୟାପିଟାଲ ହସ୍ପିଟାଲରେ ମୋଟ ୧୪୪ ଜଣ ଡାକ୍ତରଙ୍କ ମଧ୍ୟରୁ ୪୦ ଜଣ ଡାକ୍ତର କରୋନା ପଜିଟିଭ ଚିହ୍ନଟ ହୋଇଛନ୍ତି । ସେଥିମଧ୍ୟରୁ ୩୦ ଜଣ ଘରେ ସଂଗରୋଧରେ ରହିଥିବାବେଳେ ବାକି ଡାକ୍ତର ହସ୍ପିଟାଲରେ ରହିଛନ୍ତି । ସେହିପରି ଅନ୍ୟ କିଛି ଡାକ୍ତର ସୁସ୍ଥ ହୋଇ କାର୍ଯ୍ୟରେ ଯୋଗଦେଇଛନ୍ତି ।
କ୍ୟାପିଟାଲ ହସ୍ପିଟାଲରେ ପ୍ରତ୍ୟେକ ଦିନ ୭ ରୁ ୮ ଜଣ କରୋନାରେ ସଂକ୍ରମିତ ହେଉଛନ୍ତି । ତେବେ ହସ୍ପିଟାଲରେ ମୋଟ ୧୬୦୦ ରୁ ୨୦୦୦ କର୍ମଚାରୀଙ୍କ ମଧ୍ୟରୁ ପ୍ରାୟ ୧୪୦ ଜଣ କରୋନାରେ ସଂକ୍ରମିତ ହୋଇଛନ୍ତି । ଯାହା ଫଳରେ ହସ୍ପିଟାଲ କାର୍ଯ୍ୟ ପ୍ରଭାବିତ ହୋଇଛି । ବର୍ତ୍ତମାନ କମ୍ ସଂଖ୍ୟକ କର୍ମଚାରୀରେ କ୍ୟାପିଟାଲ ହସ୍ପିଟାଲର କାର୍ଯ୍ୟ ଚାଲୁଛି । ଚିକିତ୍ସା ପାଇଁ ଓପିଡିକୁ ସକାଳ ସମୟରେ ଏକ ଘଣ୍ଟା ବଢ଼ାଇ ଦିଆଯାଇଛି । ସେହିପରି ୨୪ ଘଣ୍ଟା ଜରୁରୀକାଳୀନ ସେବା ଯୋଗାଇ ଦିଆଯାଉଥିବା କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ କହିଛନ୍ତି ।
ଗୋଆ ବିଧାନସଭା ନିର୍ବାଚନ ପୂର୍ବରୁ ବିଜେପିକୁ ଝଟକା, ଦଳରୁ ଇସ୍ତଫା ଦେଲେ ଓ୍ୱିଲଫ୍ରେଡ୍
ପାଣାଜୀ: ଗୋଆ ବିଧାନସଭା ନିର୍ବାଚନ ପୂର୍ବରୁ ଭାରତୀୟ ଜନତା ପାର୍ଟିକୁ ବଡ଼ ଝଟକା । ବିଧାନସଭା ସଦସ୍ୟତା ପଦ ଓ ଦଳରୁ ଇସ୍ତଫା ଦେଇଛନ୍ତି ବିଜେପି ବିଧାୟକ ଓ୍ୱିଲଫ୍ରେଡ୍ । ବିଧାନସଭା ନିର୍ବାଚନ ପାଇଁ ଦଳ ପକ୍ଷରୁ ପ୍ରଥମ ପ୍ରାର୍ଥୀ ତାଲିକା ଘୋଷଣା ହେବା ପୂର୍ବରୁ ହିଁ ଓ୍ୱିଲଫ୍ରେଡ୍ ଦଳରୁ ଇସ୍ତଫା ଦେଇଛନ୍ତି । ୨୦୧୭ରେ ଓ୍ୱିଲଫ୍ରେଡ କଂଗ୍ରେସ ଟିକେଟରେ ନୁବେମ ବିଧାନସଭା ଆସନରୁ ନିର୍ବାଚନ ଜିତିଥିଲେ । କିନ୍ତୁ ୨୦୧୯ରେ ଓ୍ୱିଲଫ୍ରେଡଙ୍କ ସହ ୯ ଜଣ କଂଗ୍ରେସ ବିଧାୟକ ବିଜେପିରେ ସାମିଲ ହୋଇଥିଲେ । ଆଗାମୀ ବିଧାନସଭା ନିର୍ବାଚନରେ ସେ ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିବେ ବୋଲି ଘୋଷଣା କରିଛନ୍ତି । ୨୦୨୨ ଗୋଆ ବିଧାନସଭା ନିର୍ବାଚନ ପୂର୍ବରୁ ସେ ଦଳ ଛାଡ଼ିବା ଓ ବିଜେପି ଟିକେଟରେ ନିର୍ବାଚନ ନ ଲଢ଼ିବା ନେଇ ବିଜେପିକୁ ସୂଚନା ଦେଇସାରିଥିଲି ବୋଲି ଓ୍ୱିଲଫ୍ରେଡ୍ କହିଛନ୍ତି ।
Today, I gave my resignation as MLA Nuvem Constituency & decided to contest as an Independent Candidate.
I want to assure my supporters in Nuvem & my well-wishers throughout Goa that I have and will work for the betterment of my constituency, state, & country.#ProgressiveNuvem pic.twitter.com/0GrDT1koiv— Wilfred D'sa (@wilfreddsagoa) January 19, 2022
ବୁଲ୍ଲି ବାଈ ଆପ୍ ମାମଲା: ଓଡ଼ିଶାରୁ ଆଉ ଜଣଙ୍କୁ ଗିରଫ କଲା ମୁମ୍ବାଇ ପୋଲିସ
ଭୁବନେଶ୍ୱର: ବହୁ ଚର୍ଚ୍ଚିତ ବୁଲ୍ଲି ବାଈ ଆପ୍ ଘଟଣାରେ ପୋଲିସ ମିଳିଛି ଆଉ ଏକ ସଫଳତା । ଚାରି ଜଣଙ୍କୁ ମୁମ୍ବାଇ ପୋଲିସ ଗିରଫ କରିବା ପରେ ଆଉ ଜଣଙ୍କୁ ଗିରଫ କରିଛି ମୁମ୍ବାଇ ପୋଲିସ । ମୁମ୍ବାଇ ପୋଲିସ ଓଡ଼ିଶାରୁ ଆଉ ଜଣେ ଅଭିଯୁକ୍ତଙ୍କୁ ଗିରଫ କରିଛି । ଓଡ଼ିଶାରୁ ଗିରଫ ହୋଇଥିବା ଅଭିଯୁକ୍ତକୁ ମିଶାଇ ଏହି ମାମଲାରେ ମୋଟ ୫ ଜଣଙ୍କୁ ଗିରଫ କରିଛି ମୁମ୍ବାଇ ପୋଲିସ ।
Bullibai app case | Mumbai Police arrests one more person in the matter, from Odisha today
— ANI (@ANI) January 20, 2022
ଏହା ପୂର୍ବରୁ ମୁମ୍ବାଇ ପୋଲିସ ବିଶାଲ ଝା, ଶ୍ୱେତା ସିଂ, ମୟଙ୍କ ରାଓ୍ୱତ ଓ ନୀରଜ ବିଷ୍ଣୋଇଙ୍କୁ ଏହି ମାମଲାରେ ମୁମ୍ବାଇ ପୋଲିସ ଗିରଫ କରିଥିଲା । ଏହି ଆପ୍ ଜରିଆରେ ମୁସଲମାନ ମହିଳାଙ୍କ ଫଟୋ ଅପଲୋଡ୍ କରି ସେମାନଙ୍କ ନିଲାମ ଡକାଯାଉଥିଲା। କେବଳ ଏତିକି ନୁହେଁ ସେମାନଙ୍କ ଫଟୋରେ ଅଶ୍ଳୀଳ କମେଣ୍ଟ ମଧ୍ୟ କରାଯାଉଥିଲା।
ସୂଚନା ଅନୁସାରେ ବୁଲ୍ଲିବାଈ ହେଉଛି ଏକ ଆପ୍ । ଏହି ଆପ୍ ମାଧ୍ୟମରେ ମୁସଲମାନ ମହିଳାଙ୍କୁ ଟାର୍ଗେଟ କରାଯାଉଥିଲା । ଏହି ଆପ୍ ମାଧ୍ୟମରେ ମୁସଲିମ୍ ମହିଳାଙ୍କ ମଧ୍ୟରେ ଘୃଣାଭାବ ଖେଳାଯାଉଥିଲା । ଆପତ୍ତିଜନକ ଫଟୋ ସହ ଖରାପ କଥା ମଧ୍ୟ ଏହି ଫଟୋରେ ଲେଖାଯାଉଥିଲା । ଏହି ଆପ୍ ସେହିପରି ଭାବରେ କାର୍ଯ୍ୟ କରୁଥିଲା ଯେପରି କିଛି ଦିନ ପୂର୍ବରୁ ସୁଲ୍ଲି ଡିଲ୍ ଆପ୍ ତିଆରି ହୋଇଥିଲା । ସୁଲ୍ଲି ଡିଲ୍ ଆପ୍ Githubରେ ଲଞ୍ଚ ହୋଇଥିଲା ଆଉ ଏବେ ବୁଲ୍ଳିବାଈ ଆପ୍ ମଧ୍ୟ Githubରେ ଲଞ୍ଚ କରାଯାଇଥିଲା ।
ବିଜେପି ନେତାଙ୍କୁ ଗାଁରେ ପୂରାଇ ଦେଲେନି ଲୋକେ
ମୁଜଫରପୁର: ଆଉ ଦିନ କେଇଟା ପରେ ଉତ୍ତର ପ୍ରଦେଶ ନିର୍ବାଚନ । ମୈଦାନ ପ୍ରସ୍ତୁତ, ପ୍ରଚାର ଲଢେଇ ଜୋରଦାର । ବିରୋଧୀ ଦଳଙ୍କଠାରୁ କଡା ଟକ୍କରର ସମ୍ମୁଖୀନ ହେଉଥିବା ଶାସକ ବିଜେପିକୁ ଦଳୀୟ ନେତାଙ୍କ ଚିନ୍ତା । ଗୋଟିଏ ପଟେ ଘର ଭାଙ୍ଗୁଛି ଅନ୍ୟପଟେ ବିଜେପି ନେତାଙ୍କ ବିରୋଧରେ ଜନ ଅସନ୍ତୋଷ ଯୋଗୀ ଟିମକୁ ଆକଚା ମାକଚା କରି ପକାଇଲାଣି ।
ବିଜେପି ବିରୋଧରେ ଜନ ଅସନ୍ତୋଷ ଏତେ ତୀବ୍ର ହେବାରେ ଲାଗିଛି ଯେ ନିଜ ନିର୍ବାଚନମଣ୍ଡଳିକୁ ବି ପଶିବାକୁ ଡରୁଛନ୍ତି ଦଳୀୟ ନେତା । ମୁଜଫରପୁରର ବିଜେପି ବିଧାୟକ ସମ୍ମୁଖୀନ ହୋଇଛନ୍ତି ଏମିତି ସ୍ଥିତିର । ବିଧାୟକଙ୍କୁ ଗ୍ରାମବାସୀ ତଡ଼ି ଦେଉଥିବାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ମୁଜଫରପୁର ଖତୋଲି ବିଧାୟକ ତଥା ବିଜେପି ବିଧାୟକ ପ୍ରାର୍ଥୀ ବିକ୍ରମ ସିଂହ ସୈନୀଙ୍କୁ ନିଜ ନିର୍ବାଚନମଣ୍ଡଳିରେ ବିରୋଧର ସମ୍ମୁଖୀନ ହେବାକୁ ପଡୁଛି । ଏକ ଦଳୀୟ କାର୍ଯ୍ୟକ୍ରମରେ ସାମିଲ ହେବାକୁ ବିକ୍ରମ ଯାଇଥିବା ବେଳେ ଗ୍ରାମବାସୀ ତାଙ୍କୁ ସେଠାରୁ ତଡ଼ି ଦେଇଛନ୍ତି । ସେତିକି ନୁହେଁ ବିକ୍ରମ ଗାଡ଼ିରେ ବସି ଫେରିବାକୁ ଉଦ୍ୟମ କରୁଥିବା ବେଳେ ଗ୍ରାମାବସୀ ତାଙ୍କୁ ଘେରି ଯାଇ ସରକାରୀ ବିରୋଧୀ ସ୍ଲୋଗାନ ଦେଉଥିବା ଭିଡିଓରେ ଦେଖିବାକୁ ମିଳୁଛି । ଏପରିକି ଲୋକଙ୍କୁ ଶାନ୍ତ କରିବାକୁ ବିକ୍ରମ ହାତ ଗୋଡି କ୍ଷମା ମାଗୁଥିବା ମଧ୍ୟ ଦେଖିବାକୁ ମିଳୁଛି ।
ବ୍ରହ୍ମୋସ୍ ମିଜାଇଲର ସଫଳ ପରୀକ୍ଷଣ, ସବୁଠି ହୋଇପାରିବ ଉତକ୍ଷେପଣ
ବାଲେଶ୍ୱର: ପ୍ରତିରକ୍ଷା କ୍ଷେତ୍ରରେ ବଢ଼ିଲା ଭାରତର ବଳ । ଚାନ୍ଦିପୁର କ୍ଷେପଣାସ୍ତ୍ର ପରୀକ୍ଷା କେନ୍ଦ୍ରର ୩ ନମ୍ବର ଲଞ୍ଚପ୍ୟାଡରୁ ପରୀକ୍ଷଣ ହେଲା ITCM । ସକାଳ ୧୦ଟା ୩୫ ମିନିଟରେ ଉତକ୍ଷେପଣ ହୋଇଛି ଇଣ୍ଡିଜେନିୟସ୍ ଟେକନୋଲୋଜି କ୍ରୁଜ୍ ମିଜାଇଲ୍ । ପରୀକ୍ଷା ସମୟରେ ପୂର୍ବରୁ ସ୍ଥିରିକୃତ ସମସ୍ତ ଟ୍ରାଜେଟୋରୀ ଅନୁସାରେ ITCM ଗତି କରିଥିବା ପ୍ରତିରକ୍ଷା ବିଭାଗ ତରଫରୁ କୁହାଯାଇଛି । ତେବେ ପରୀକ୍ଷା ସମୟରେ ଖଞ୍ଜା ଯାଇଥିବା ରାଡାରରୁ ମିଳିଥିବା ତଥ୍ୟକୁ ପ୍ରତିରକ୍ଷା ବିଭାଗର ବୈଜ୍ଞାନିକମାନେ ସମୀକ୍ଷା କରୁଛନ୍ତି ।
Today India successfully testfired a new version of the BrahMos supersonic cruise missile off the coast of Odisha in Balasore. The missile was equipped with new technological developments which were successfully proven: Defence sources pic.twitter.com/l9hcQn7BKw
— ANI (@ANI) January 20, 2022
ଆଜି ପରୀକ୍ଷା ହୋଇଥିବା କ୍ଷେପଣାସ୍ତ୍ରରେ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ମାନିକ୍ ଇଞ୍ଜିନକୁ ବ୍ୟବହାର କରାଯାଇଛି । ଏହି ଇଞ୍ଜିନ୍ ପୂର୍ବ ଇଞ୍ଜିନ୍ ଅପେକ୍ଷା ଅଧିକ ହାଲୁକା ଥିବାବେଳେ, ଏହାର ବେଗ ମଧ୍ୟ ଅଧିକ ବୋଲି କୁହାଯାଉଛି । ଭାରତ ଡାଏନାମିକ୍ ଲିମିଟେଡ ଦ୍ୱାରା ନିର୍ମିତ ITCMର ଓଜନ ୧୫୦୦ କିଲୋଗ୍ରାମ ଥିବାବେଳେ, ଲମ୍ବ ୬ ମିଟର ଓ ମୋଟେଇ ୦.୫୨ ମିଟର ରହିଛି । ଏହି ମିଜାଇଲରେ ୨୦୦ରୁ ୩୦୦ କିଲୋଗ୍ରାମ ପର୍ଯ୍ୟନ୍ତ ଉଭୟ ପାରମ୍ପାରିକ ଓ ଆଣବିକ ଯୁଦ୍ଧାସ୍ତ୍ର ସହିତ ୧ ହଜାର କିଲୋମିଟର ପର୍ଯ୍ୟନ୍ତ ଲକ୍ଷ୍ୟଭେଦ କରିପାରିବ ।
ଆଖି ସମସ୍ୟା ହୋଇପାରେ ଓମିକ୍ରନ୍ ଲକ୍ଷଣ
ନୂଆଦିଲ୍ଲୀ: କରୋନା ନୂଆ ଭାରିଆଣ୍ଟ ଓମିକ୍ରନ ଯେତିକି ମାଡୁଛି, ନୂଆ ନୂଆ ଲକ୍ଷଣ ପଦାକୁ ଆସିବାରେ ଲାଗିଛି । ଆଗରୁ ପେଟ ସମସ୍ୟା ଓମିକ୍ରନର ଲକ୍ଷଣ ହୋଇପାରେ ବୋଲି ଆମେ ରିପୋର୍ଟରେ ଜଣାଇଥିଲୁ । ଏବେ ଏକ ନୂଆ ଲକ୍ଷଣ ଓମିକ୍ରନକୁ ନେଇ ପଦାକୁ ଆସିଛି । ଏହା ଆଖି ସହ ଜଡିତ । ଓମିକ୍ରନ ସଂକ୍ରମିତ ହେଲେ କାଶଠାରୁ ଝାଡା ହେବା ପର୍ଯ୍ୟନ୍ତ ଲକ୍ଷଣ ଦେଖିବାକୁ ମିଳୁଥିଲା । ଏବେ କିଛି ଡାକ୍ତର କହୁଛନ୍ତି ଓମିକ୍ରନର ପ୍ରଥମ ଲକ୍ଷଣ ଆଖିରୁ ଆରମ୍ଭ ହୋଇପାରେ ।
ବିଶ୍ବ ସ୍ବାସ୍ଥ୍ୟ ସଂଗଠନ (WHO) ଆଖି ସମସ୍ୟାକୁ ଅସମାନ୍ୟ ଓ କମ ଦେଖା ଯାଉଥିବା ଲକ୍ଷଣ ସୂଚୀରେ ରଖିଛି । ଏଥିରେ ଆଖି ସହ ଜଡିତ ଗୋଟିଏ କିମ୍ବା ଗୋଟିଏରୁ ଅଧିକ ଲକ୍ଷଣ ସାମିଲ ହୋଇପାରେ ।
ରିପୋର୍ଟ ଅନୁସାରେ ଆଖି ଗୋଲାପୀ ପଡ଼ିବା, ଧଳା ଭାଗ ଓ ପତା ତଳେ ଦାଗ ପଡ଼ିବା ଓମିକ୍ରନ ସଂକ୍ରମଣର ଲକ୍ଷଣ ହୋଇପାରେ । ଏହାବାଦ ଆଖି ଲାଲ ଦିଶିବା, ପୋଡ଼ାଜଳା ହେବା, ଦରଜ ହେବା ଓମିକ୍ରନ ଲକ୍ଷଣ ହୋଇପାରେ । ଆଖିକୁ ଜାଲ ଜାଲିଆ ଦିଶିବା, ଅଧିକ ଆଲୁଅରେ ସମସ୍ୟା ହେବା, ଆଖିରୁ ପାଣି ଗଡ଼ିବା ମଧ୍ୟ କରୋନା ଭୁତାଣୁ ଓମିକ୍ରନର ଲକ୍ଷଣ ହୋଇପାରେ ।
୨୦୨୦ରେ ହୋଇଥିବା ଏକ ସର୍ଭେ ରିପୋର୍ଟ ଅନୁସାରେ କରୋନା ସଂକ୍ରମିତ ରୋଗୀଙ୍କ ମଧ୍ୟରୁ ୫ ପ୍ରତିଶତ ଆଖି ସମସ୍ୟାର ଶିକାର ହୋଇପାରନ୍ତି । ଏଥିରେ ଡରିବାର କିଛି ନାହିଁ । ସବୁ ଆଖି ସମସ୍ୟାର ମାନେ ନୁହେଁ ଆପଣ ଓମିକ୍ରନ ସଂକ୍ରମିତ । ଅନ୍ୟ କାରଣରୁ ମଧ୍ୟ ଆଖିରେ ସମସ୍ୟା ଦେଖାଦେଇପାରେ । ତେଣୁ କରୋନାର ଅନ୍ୟ ଲକ୍ଷଣ ଦେଖା ଯାଉଛି କି ନାହିଁ ତାହା ଉପରେ ମଧ୍ୟ ନଜର ରଖନ୍ତୁ ।
କ’ଣ କହୁଛି ସର୍ଭେ ?
ଭାରତୀୟ ସ୍ବାସ୍ଥ୍ୟ ବିଶେଷଜ୍ଞ କରୋନା ସହ ଆଖି ସମସ୍ୟା ସମ୍ପର୍କକୁ ସାମାନ୍ୟ ବିବେଚନା କରିଛନ୍ତି । ସେମାନଙ୍କ ମତରେ ଏହା ଓମିକ୍ରନ ସଂକ୍ରମଣର ପ୍ରାରମ୍ଭିକ ଲକ୍ଷଣ ହୋଇପାରେ । ଏହାକୁ ଗୁରୁତର ସହ ନେବାର ଆବଶ୍ୟକତା ରହିଛି ।
ତେବେ କିଛି ସର୍ଭେ ଆଖି ସହ ଜଡିତ ଲକ୍ଷଣକୁ ଅଧିକ ଗୁରୁତର ସହ ନେଇଛନ୍ତି । ଏକ ସର୍ଭେରେ ଦାବି କରାଯାଇଛି ଯେ ୩୫.୮ ପ୍ରତିଶତ ସୁସ୍ଥ ଲୋକଙ୍କ ତୁଳନାରେ ୪୪ ପ୍ରତିଶତ କରୋନା ରୋଗୀ ଆଖି ସମସ୍ୟାରେ ପଡିଥାନ୍ତି । ଏଥିରେ ଆଖିରୁ ପାଣି ଗଡ଼ିବା ଓ ଲାଇଟ୍ ସେନସିଭିଟି ଭଳି ଲକ୍ଷଣ ସାଧାରଣ ହୋଇଥାଏ ।
ବିଏମଜେ ଓପନ ପାଥଲୋମୋଲୋଜିରେ ପ୍ରକାଶିତ ରିପୋର୍ଟ ଅନୁସାରେ ୮୩ ପ୍ରତିଶତ କୋଭିଡ-୧୯ ରୋଗୀଙ୍କ ମଧ୍ୟରୁ ୧୭ ପ୍ରତିଶତଙ୍କଠାରେ ଆଖି ଜଳାପୋଡ଼ା ହେବା, ୧୬ ପ୍ରତିଶତଙ୍କଠାରେ ଆଖି ଦରଜ ସମସ୍ୟା ଦେଖା ଦେଇଥାଏ । ରୋଗୀ ସଂକ୍ରମଣ ମୁକ୍ତ ହେବା ସହ ଆଖି ସମସ୍ୟାରେ ମଧ୍ୟ ସୁଧାର ଆସିଥାଏ ।
ଆଖିରେ କେମିତି ପଶିଥାଏ ଓମିକ୍ରନ ?
ଗୋଲଡେନ ଆଇଜର ଜେନେରାଲ ପ୍ରୋଟେକ୍ସନ ନିଶା ଅସଲମଙ୍କ ଅନୁସାରେ, ‘କୋଭିଡି ଭାରିଆଣ୍ଟ ଯେଉଁ ସେଲ୍ ରିସେପ୍ଟର ଦେଇ ଶରୀର ମଧ୍ୟରେ ପ୍ରବେଶ କରିଥାଏ ଯାହା ଆଖିରେ ରହିଛି । ଭାଇରସ୍ ଏହି ରିସେପ୍ଟରକୁ ଲୁଚି ଶରୀର ମଧ୍ୟରେ ପ୍ରବେଶ କରିଥାଏ । ଆଖିର ଅଲଗା ଅଲଗା ସ୍ଥାନରେ ଏହି ରିସେପ୍ଟର ଦେଖିବାକୁ ମିଳିଥାଏ । ଯେମିତି କି ରେଟିନା କୋଶିକା, ଆଖିର ଧଳା ଅଂଶ ।’ କିଛି ସର୍ଭେରେ କୁହାଯାଇଛି କରୋନାର ଡେଲଟା ଓ ବିଟା ଭାଇରସ ତୁଳନାରେ ଓମିକ୍ରନ ଏହି ରିସେପ୍ଟର ସଂସ୍ପର୍ଶରେ ଆସିବାର ଅଧିକ କ୍ଷମତା ରଖେ । ଯଦି ଏମିତି ହୁଏ ତେବେ ଆଖି ସମସ୍ୟା ଓମିକ୍ରନ ଲକ୍ଷଣ ହୋଇପାରେ ।
କେମିତି କରିବେ ଆଖିର ଚିକିତ୍ସା ?
କରୋନା ସଂକ୍ରମିତ କିଛି ରୋଗୀଙ୍କ କ୍ଷେତ୍ରରେ ଆଖି ସମସ୍ୟା ଅଧିକ ଜଟିଳ ହୋଇନପାରେ । ହେଲେ କିଛି ଲୋକ ଏହାଦ୍ବାରା ବହୁତ ସମସ୍ୟାରେ ପଡିଥାନ୍ତି । ଏହି ସମସ୍ୟାର ଘରୋଇ ଚିକିତ୍ସା କରାଯାଇପାରିବ । ଏନଏଚଏସ ଅନୁସାରେ, ପାଣି ଗରମ କରି ତାକୁ ଥଣ୍ଡା କରିଦିଅନ୍ତୁ । ଏହାପରେ ସଫା ତୁଳାକୁ ଗୁଳା କରି ଉକ୍ତ ପାଣିରେ ବୁଡାଇ ସାବଧାନତାର ସହ ଆଖିକୁ ପୋଛନ୍ତୁ ।
ସମସ୍ୟାରୁ ମୁକ୍ତି ପାଇବାକୁ କିଛି ସମୟ ପାଇଁ ଆଖିରେ ଥଣ୍ଡା କପଡ଼ା ପକାଇ ପାରିବେ । ଯଦି ଯନ୍ତ୍ରଣା ଅଧିକ ହେଉଛି ତେବେ ଡାକ୍ତରଙ୍କ ପରାମର୍ଶ ନିଅନ୍ତୁ । ଯଦି ଆପଣ ଆଇସୋଲେସନରେ ଅଛନ୍ତି ତେବେ ଡାକ୍ତରଙ୍କୁ ଅନଲାଇନରେ ପରାମର୍ଶ ମାଗି ପାରିବେ । ଅଥବା ପରିବାରର ଅନ୍ୟ କାହାକୁ ଡାକ୍ତରଙ୍କ ପାଖକୁ ପଠାଇ ତାଙ୍କ ପାଖରୁ ପରାମର୍ଶ ଗ୍ରହଣ କରି ଆଖିର ଚିକିତ୍ସା କରିପାରିବେ ।
ମାଲକାନଗିରିରେ ଏନକାଉଣ୍ଟର, ପୋଲିସ ଗୁଳିରେ ଦୁର୍ଦ୍ଦାନ୍ତ ମାଓବାଦୀ ମୁନି ମୃତ
ମାଲକାନଗିରି: ମାଲକାନଗିରି ସୀମାରେ ପୁଣି ଏନକାଉଣ୍ଟର । ପୋଲିସ ଏନକାଉଣ୍ଟରରେ ଜଣେ ଦୁର୍ଦ୍ଦାନ୍ତ ମାଓବାଦୀ ନିହତ ହୋଇଛି । ମୃତ ମାଓବାଦୀ ମହୁପଦର ଏଲଓଏସ କମାଣ୍ଡର ମୁନି ବୋଲି ଜଣାପଡ଼ିଛି । ମୁନି ନାଁରେ ଥିଲା ୫ ଲକ୍ଷ ଟଙ୍କାର ପୁରସ୍କାର ରହିଥିଲା । ସୂଚନା ଅନୁସାରେ କଟେକଲ୍ୟାଣ ଥାନା ଅନ୍ତର୍ଗତ ଚିକପାଲ ଜଙ୍ଗଲରେ ଯବାନମାନେ କମ୍ବିଂ ଅପରେସନ କରୁଥିଲେ । ଏହି ସମୟରେ ମାଓବାଦୀମାନେ ଯବାନଙ୍କ ଉପରକୁ ଗୁଳିଚାଳନା କରିଥିଲେ । ଯାହାର ଦୃଢ ଜବାବ ଦେଇଥିଲେ ଯବାନ । ଦୀର୍ଘ ସମୟ ଧରି ଉଭୟଙ୍କ ମଧ୍ୟରେ ଗୁଳି ବିନିମୟ ହୋଇଥିଲା । ଏହି ଏନକାଉଣ୍ଟର ପରେ ଘଟଣାସ୍ଥଳରୁ ଗୋଟିଏ ୧୨ ବୋର ବନ୍ଧୁକ ସହ ବିପୁଳ ମାତ୍ରାରେ ବିସ୍ଫୋରକ ସାମଗ୍ରୀ ଜବତ ହୋଇଛି ।
ମଶାଣିରୁ ଜୀବନ୍ତ ଫେରିଥିବା ଶିଶୁର ମୃତ୍ୟୁ
ମୟୂରଭଞ୍ଜ: ମୟୂରଭଞ୍ଜ କରଞ୍ଜିଆରେ ବଞ୍ଚି ଥାଉ ଥାଉ ଶିଶୁ ପୁତ୍ର ମୃତ ଘୋଷଣା ଅଭିଯୋଗ । ଆଜି ଶେଷରେ ଆଖି ବୁଜିଲା ନବଜାତ ଶିଶୁ ପୁତ୍ର । ମୟୂରଭଞ୍ଜ କରଞ୍ଜିଆ ହସ୍ପିଟାଲରେ ଶିଶୁ ପୁତ୍ରକୁ ମୃତ ଘୋଷଣା କରିଛନ୍ତି ଡାକ୍ତର । ସମୟ ପୂର୍ବରୁ ଶିଶୁ ପୁତ୍ର ଜନ୍ମ ହୋଇଥିଲା । ଜନ୍ମ ବେଳେ ଶିଶୁ ପୁତ୍ରର ଓଜନ ମାତ୍ର ଆଠଶହ ଗ୍ରାମ ଥିଲା ବୋଲି ଡାକ୍ତର କହିଛନ୍ତି । ତେବେ ଗତକାଲି ଶିଶୁ ପୁତ୍ର ଜନ୍ମ ନେବା ପରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ଡାକ୍ତର ମୃତ୍ୟୁ ଘୋଷଣା କରିବା ପରେ ଶିଶୁ ପୁତ୍ରକୁ ଶେଷକୃତ୍ୟ ପାଇଁ ମଶାଣିକୁ ନେଇଥିଲେ । କିନ୍ତୁ ମଶାଣିରେ ଶେଷକୃତ୍ୟ ପୂର୍ବରୁ ଚେଇଁ ଉଠିଥିଲା ଶିଶୁ । ଏହାପରେ ପରିବାର ଲୋକ ପୁଣି ଥରେ ଶିଶୁକୁ ଧରି ମେଡିକାଲରେ ଭର୍ତ୍ତି କରିଥିଲେ । ତେବେ ଆଜି ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଏପରି ଦାୟିତ୍ୱହୀନ କାର୍ଯ୍ୟ କରିଥିବା କର୍ମଚାରୀ ଏବଂ ଅଧିକାରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ପରିବାର । ଏହି ଘଟଣାର ତଦନ୍ତ ପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ।