ନୂଆଦିଲ୍ଲୀ: ସମସ୍ତ ପ୍ରକାର ପରିଚୟ ପତ୍ର ପାଇଁ ରହିବ ଗୋଟିଏ ଡିଜିଟାଲ୍ ୟୁନିକ୍ ଆଇଡି । ଏହା ଉପରେ ବିଜ୍ଞାନ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟ କାମ କରୁଛି । ମନ୍ତ୍ରଣାଳୟ ଫେଡରେଟେଡ୍ ଡିଜିଟାଲ୍ ଆଇଡେଣ୍ଟିଟ୍ ପ୍ରକଳ୍ପ ନେଇ ପ୍ରସ୍ତାବ ଦେଇଛି । ତଦନୁସାରେ, ନାଗରିକଙ୍କ ସମସ୍ତ ପରିଚୟ ପତ୍ରକୁ ଅନ୍ୟ ଆଇଡି ସହ ଯୋଡ଼ା ଯିବ । ଏହା ଏକ ଡିଜିଟାଲ୍ ଆଇଡି ଜରିଆରେ ହୋଇପାରିବ । ଏଥିରେ ପାସପୋର୍ଟ, ଡ୍ରାଇଭିଂ ଲାଇସେନ୍ସ, ଆଧାର ଓ ପ୍ୟାନ କାର୍ଡକୁ ଲିଙ୍କ୍ କରାଯାଇପାରେ ।
ରିପୋର୍ଟ ଅନୁସାରେ, ଅମ୍ବ୍ରେଲା ଡିଜିଟାଲ୍ ଆଇଡି ନାଗରିକଙ୍କ ପରିଚୟ ପତ୍ର ଉପରେ ନିୟନ୍ତ୍ରଣ ରଖିବା ସହ କେଉଁ ଉଦେଶ୍ୟ ଲାଗି ପରିଚୟ ପତ୍ରର ବ୍ୟବହାର ହେବ ସେଥିଲାଗି ବିକଳ୍ପ ଦେବ । ପ୍ରସ୍ତାବକୁ ମନ୍ତ୍ରଣାଳୟ ଖୁବଶୀଘ୍ର ସାର୍ବଜନୀନ କରିବ ବୋଲି ଆଶା କରାଯାଉଛି । ଏନେଇ ମନ୍ତ୍ରଣାଳୟ ଫେବ୍ରୁଆରୀ ୨୭ ପର୍ଯ୍ୟନ୍ତ ମତ ମାଗିବ ।
ପ୍ରସ୍ତାବିତ ଢ଼ାଞ୍ଚା ଅନୁସାରେ, ଫେଡରେଟେଡ୍ ଡିଜିଟାଲ୍ ପରିଚୟପତ୍ର ଏକ ରେଜିଷ୍ଟ୍ରି ଚାବି ଭାବେ କାମ କରିବ । ଯେଉଁଠି ସମସ୍ତ ରାଜ୍ୟ ଓ କେନ୍ଦ୍ର ସରକାରଙ୍କ ଆଇଡି ସଂଗୃହୀତ ହେବ । ନାଗରିକ ଇ-କେୱାଇସି ମାଧ୍ୟମରେ ଅନ୍ୟ ତୃତୀୟ ପକ୍ଷ ସେବା ପାଇବା ଲାଗି ଏହି ଡିଜିଟାଲ୍ ଆଇଡିର ଉପଯୋଗ କରି ପାରିବେ ।
ଏଥିସହ ଜଣେ ନାଗରିକ ସମସ୍ତ ଡିଜିଟାଲ୍ ଆଇଡିକୁ ଅନ୍ୟ ସହ ଯୋଡ଼ି ପାରିବେ । ଏବେ ବାରମ୍ବାର କୌଣସି କାମ ପାଇଁ ଏହା ବାରମ୍ବାର କରିବାକୁ ପଡ଼ୁଛି । ମନ୍ତ୍ରଣାଳୟ ଏହି ପ୍ରସ୍ତାବ ଇଣ୍ଡିଆ ଏଣ୍ଟରପ୍ରାଇଜ୍ ଆର୍କିଟେକ୍ଚର ୨.୦ ଅନୁସାରେ ଦେଇଛି । ପ୍ରଥମଥର ୨୦୧୭ରେ ଡିଜାଇନ୍ କରାଯାଇଥିଲା ।
