ନନ୍ଦିଘୋଷ ବ୍ୟୁରୋ: ବିଶ୍ବ ପ୍ରତି ମାଡିଆସୁଛି କି ବଡ ବିପଦ ! ସଙ୍କେତ ଦେଲେଣି ମହାପ୍ରଭୁ ! ଘଟିବାକୁ ଯାଉଛି କି କିଛି ବଡ ଅଘଟଣ ? ଏଭଳି ଅନେକ ପ୍ରଶ୍ନ ଏବେ ଉଙ୍କି ମାରୁଛି ସମସ୍ତଙ୍କ ମନରେ । କାରଣ ଏମିତି କିଛି ଘଟିଛି ଯାହା ସମସ୍ତଙ୍କୁ ଭୟଭୀତ କରିଦେଇଛି । ପୁରୀ ବଡ଼ଦାଣ୍ଡରୁ ସାମ୍ନାକୁ ଆସିଛି ବିଚିତ୍ର ଦୃଶ୍ୟ। ହଠାତ ଶ୍ରୀମନ୍ଦିର ଆଡକୁ ମାଡ଼ି ଆସିଲେ ବହୁ ସଂଖ୍ୟାରେ ଚିଲ।

ଆଜି ପୂର୍ବାହ୍ନରେ ମାଉସୀ ମା ମନ୍ଦିର ନିକଟ ବଡ଼ଦାଣ୍ଡରେ ଏଭଳି ଦୃଶ୍ୟ ଦେଖିବାକୁ ମିଳିଥିଲା। ବହୁ ସଂଖ୍ୟାରେ ଚିଲ ରାସ୍ତାର ଏ ପାର୍ଶ୍ୱରୁ ସେ ପାର୍ଶ୍ୱକୁ ଘୁରି ବୁଲିଥିଲେ । ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା । ପୂର୍ବରୁ ଅନେକ ସମୟରେ ଶ୍ରୀମନ୍ଦିର ଉପରେ ଗୋଟିଏ ଚିଲ ବସିଥିବା ବା ଉଡୁଥିବାର ଦେଖିବାକୁ ମିଳିଥିଲା, କିନ୍ତୁ ବଡ଼ଦାଣ୍ଡରେ ଏଭଳି ଦୃଶ୍ୟ କେବେ ଦେଖିବାକୁ ମିଳିନଥିଲା। ଏହାକୁ ନେଇ ଏବେ ନାନା ଚର୍ଚ୍ଚା କରାଯାଉଛି । କେହି କେହି ଏହାକୁ ଅଶୁଭ ଏବଂ କିଛି ବଡ ବିପଦର ଆଭାସ ବୋଲି କହୁଛନ୍ତି । ତେବେ ରାସ୍ତାରେ କିଛି ମାଂସ ପଡ଼ିଥିବାରୁ ଏହାର ବାସ୍ନାରେ ଚିଲ ମାନେ ବଡଦାଣ୍ଡକୁ ଚାଲି ଆସିଥିଲେ ବୋଲି କୁହାଯାଉଛି । ଯେହେତୁ ସେହି ରାସ୍ତା ଦେଇ ଅନେକ ଗାଡ଼ି ଯିବା ଆସିବା କରୁଥିଲା, ତେଣୁ ଚିଲମାନଙ୍କୁ ରାସ୍ତାରୁ ମାଂସ ଟୁକୁଡା ନେବାରେ ବାଧା ଉପୁଜିଥିଲା। ଫଳରେ ବହୁ ସଂଖ୍ୟାରେ ଚିଲ ସେଠାକୁ ଚାଲିଆସିଥିଲେ ।

ପୁରୀ: ଦିନକୁ ଦିନ ଶ୍ରୀମନ୍ଦିରରେ ଜମୁଛି ଅସମ୍ଭାଳ ଭିଡ଼ । ଶ୍ରୀମୁଖ ଦେଖିବାକୁ ଘଣ୍ଟା ଘଣ୍ଟା ଅପେକ୍ଷା କରୁଛନ୍ତି ଭକ୍ତ । ବଢୁଛି ଜନ ଅସନ୍ତୋଷ ।  ଶୃଙ୍ଖଳା ରକ୍ଷା ପାଇଁ ଧାଡି ଦର୍ଶନ ବ୍ୟବସ୍ଥା ନେଇ ଯୋଜନା ରଖିଛି ପ୍ରଶାସନ । ନାଟ ମଣ୍ଡପ ଭିତରେ କାଠରେ ନିର୍ମିତ ସ୍ୱତନ୍ତ୍ର ରାମ୍ପ ପକାଯିବାକୁ ଲକ୍ଷ୍ୟ ରଖାଯାଇଥିବା ବେଳେ ଉଠିଛି ପ୍ରଶ୍ନ । ଶୃଙ୍ଖଳିତ ଦର୍ଶନ ବ୍ୟବସ୍ଥା ନାମରେ ସେବାୟତ ମାନଙ୍କର ଆଲମିରା ହଟାଯାଇଥିବା ବେଳେ ସେଠାରେ ପୁନର୍ବାର କାଠ ରାମ୍ପ ପକାଯିବା ଠିକ ନୁହେଁ ବୋଲି ମତ ପ୍ରକାଶ ପାଇଛି । ପ୍ରାଚୀନ କାଳରୁ ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନ ଓ ସୁରକ୍ଷା ନେଇ ପ୍ରତିହାରି ସେବାୟତ ମାନଙ୍କର ପ୍ରମୁଖ ଭୂମିକା ରହିଛି । ବର୍ତ୍ତମାନ ସମୟରେ ଭିତରେ ଦର୍ଶନ ପାଇଁ ହ୍ୟୁମାନ ଚେନ ଅଥବା ରୋପ୍ ର  ବ୍ୟବହାର କରିବାକୁ ପ୍ରସ୍ତାବ ଦିଆଯାଇଛି। ଯାହା ଧାଡି ଦର୍ଶନ ବ୍ୟବସ୍ଥା ଠାରୁ ଉତ୍କୃଷ୍ଟ ହେବ ବୋଲି ପ୍ରତିହାରୀ ନିଯୋଗ ସମ୍ପାଦକ ଯୁକ୍ତି ବାଢିଛନ୍ତି ।

ଶୃଙ୍ଖଳିତ ଦର୍ଶନ ବ୍ୟବସ୍ଥା ନେଇ ଶ୍ରୀମନ୍ଦିରରେ ଖୁବଶୀଘ୍ର ରାମ୍ପ ମାଧ୍ୟମରେ ଧାଡି ଦର୍ଶନ ବ୍ୟବସ୍ଥା ଗ୍ରହଣ କରାଯିବାକୁ ବ୍ୟବସ୍ଥା କରାଯାଉଛି। ଏ ନେଇ ଆଇଆଇଟି ଭୁବନେଶ୍ୱର ଦ୍ୱାରା ସ୍ୱତନ୍ତ୍ର ରାମ୍ପ ପ୍ରସ୍ତୁତ କରାଯାଇଥିବା ବେଳେ ଏହାର ପରୀକ୍ଷଣ କରାଯାଇ ଶ୍ରୀମନ୍ଦିରରେ ପକାଯିବ । ତେବେ ହ୍ୟୁମାନ ଚେନ ବା ରୋପ୍ ଦ୍ୱାରା ଦର୍ଶନ ବ୍ୟବସ୍ଥା ପ୍ରସ୍ତାବ ଉପରେ ସମୀକ୍ଷା କରାଯାଇଛି । ତାହା ସେତେଟା ସଫଳ ହେବ ନାହିଁ ବୋଲି ଆଇନ ମନ୍ତ୍ରୀ ମତ ରଖିଛନ୍ତି। ରାମ୍ପ ଦ୍ୱାରା ଶୃଙ୍ଖଳିତ ଧାଡି ଦର୍ଶନ ବ୍ୟବସ୍ଥା ହେବ ବୋଲି ଆଇନ ମନ୍ତ୍ରୀ ସୂଚନା ଦେଇଛନ୍ତି । ତେବେ ଶ୍ରୀମନ୍ଦିରରେ ଦୈନିକ ହଜାର ହଜାର ଭକ୍ତଙ୍କ ଭିଡ଼ ପରିଲକ୍ଷିତ ହେଉଥିବା ବେଳେ ଦର୍ଶନ ବ୍ୟବସ୍ଥାରେ କେବେ ଶୃଙ୍ଖଳା ହେବ ତାହା ଦେଖିବାକୁ ବାକି ରହିଛି  ।