ପୁରୀ: ଆଗଉଛି ପୁରୀ ବିମାନବନ୍ଦର ନିର୍ମାଣ ପ୍ରକ୍ରିୟା । ଗ୍ରୀନ ଫିଲ୍ଡ ଏୟାରପୋର୍ଟ ପାଇଁ ଇଡକୋର ସ୍ଥିତି ତଦାରଖ କରିଛନ୍ତି ୩ ଜଣିଆ ଟିମ୍ । ଟେକ୍ନୋ ଫିଜିବିଲିଟି ଆସେସମେଣ୍ଟ ସର୍ଭେ ନେଇ ପୁରୀ ଜିଲ୍ଲାପାଳଙ୍କ ସହିତ କରିଛନ୍ତି ଆଲୋଚନା । ଏୟାରପୋର୍ଟ ପାଇଁ ଅଧିକାଂଶ ଜମି ଅଧିଗ୍ରହଣ କରାଯାଇଛି। ସିଆରଜେଡ୍ କଟକଣା ଓ ବିଭିନ୍ନ ଦିଗ ନେଇ ମଧ୍ୟ ହୋଇଛି ଆଲୋଚନା । ଖୁବଶୀଘ୍ର ନିର୍ମାଣ କାମ ଆରମ୍ଭ ହେବ ବୋଲି କହିଛନ୍ତି ଜିଲ୍ଲାପାଳ । ସେପଟେ ବିମାନବନ୍ଦର କାର୍ଯ୍ୟର ଅଗ୍ରଗତିକୁ ସ୍ବାଗତ କରିଛନ୍ତି ଅଞ୍ଚଳବାସୀ ।
ପୂରଣ ହେବାକୁ ଯାଉଛି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବପ୍ନ । ବିଶ୍ବ ଐତିହ୍ୟ ନଗରୀ ହେବ ଶ୍ରୀକ୍ଷେତ୍ର । ଆଉ ପାଦେ ଆଗେଇଲା ପୁରୀ ବିମାନବନ୍ଦର ନିର୍ମାଣ ପ୍ରକ୍ରିୟା । ଗ୍ରୀନଫିଲ୍ଡ ଏୟାରପୋର୍ଟ ପାଇଁ ସ୍ଥିତି ସମୀକ୍ଷା କଲେ ଇଡକୋର ୩ ଜଣିଆ ଟିମ୍ । ଟେକ୍ନୋ ଫିଜିବିଲିଟି ଆସେସମେଣ୍ଟ ସର୍ଭେ ଓ ଜମି ଅଧିଗ୍ରହଣ ସଂପର୍କରେ ଜିଲ୍ଲାପାଳଙ୍କ ସହିତ କରିଛନ୍ତି ଆଲୋଚନା । ସିଆରଜେଡ୍ ଅଞ୍ଚଳ ମଧ୍ୟରେ ପ୍ରସ୍ତାବିତ ଏୟାରପୋର୍ଟର କିଛି ଅଂଶ ଆସୁଛି । ଏହାର ସମାଧାନ ପରେ ଖୁବଶୀଘ୍ର ଏୟାରପୋର୍ଟ କାର୍ଯ୍ୟ ଆରମ୍ଭ ହେବ ବୋଲି କହିଛନ୍ତି ଜିଲ୍ଲାପାଳ ସମର୍ଥ ବର୍ମା ।
ସୂଚନାଯୋଗ୍ୟ, ପୁରୀରେ ଶ୍ରୀଜଗନ୍ନାଥଙ୍କ ନାଁରେ ବିମାନବନ୍ଦର ପ୍ରତିଷ୍ଠା ପାଇଁ ରାଜ୍ୟ ସରକାର କେନ୍ଦ୍ରକୁ ପ୍ରସ୍ତାବ ଦେଇଥିଲେ । ଏହା ଚାରିଧାମକୁ ସଂଯୋଗ କରିବା ସହ ପର୍ଯ୍ୟଟନ କ୍ଷେତ୍ରରେ ବିକାଶ ଦିଗରେ ବେଶ ସହାୟକ ହେବ ବୋଲି ମୁଖ୍ୟମନ୍ତ୍ରୀ ଦର୍ଶାଇଥିଲେ । ଏଥିପାଇଁ ଗିରଳ ଛକଠାରେ ୧୫୦୦ ଏକର ଜମି ଚିହ୍ନଟ ହୋଇଛି । ରାଜ୍ୟ ସରକାରଙ୍କ ସହଯୋଗରେ ଭୂତଳ ସର୍ଭେ ସହ ପ୍ରସ୍ତାବିତ ସ୍ଥାନ ଯାଞ୍ଚ କରାଯାଇଛି ।
ଖୁବଶୀଘ୍ର ଶ୍ରୀଜଗନ୍ନାଥ ଗ୍ରୀନଫିଲ୍ଡ ଏୟାରପୋର୍ଟ ନିର୍ମାଣ କାମ ଆରମ୍ଭ ହେବ । ଦୁଇବର୍ଷ ମଧ୍ୟରେ ଏହାକୁ ଶେଷ କରିବାକୁ ଲକ୍ଷ୍ୟ ରଖାଯାଇଛି ।
