ନୂଆଦିଲ୍ଲୀ: ଆଜି ଜାତୀୟ ସିନେମା ଦିବସ । ଏହି ଅବସରରେ ଆଜି ଆପଣ ଯେକୌଣସି ସିନେମା ହଲରେ ଯେକୌଣସି ଫିଲ୍ମ ମାତ୍ର ୭୫ ଟଙ୍କାରେ କିଣିପାରିବେ। ମଲ୍ଟିପ୍ଲେକ୍ସ ଆସୋସିଏସନ୍ ଅଫ୍ ଇଣ୍ଡିଆ ସମେତ ସାରା ଦେଶରେ ସିନେମା ଆଜି ଭାରତରେ ଜାତୀୟ ସିନେମା ଦିବସ ପାଳନ କରୁଛି । ଏଥିପାଇଁ ୭୫ ଟଙ୍କାରେ ଟିକେଟ ମିଳିବା ପାଇଁ ନିଷ୍ପତ୍ତି ନିଆଯାଇଛି । ଜାତୀୟ ସିନେମା ଦିବସ ପୂର୍ବରୁ ପାଳନ କରାଯାଇନଥିଲା । ଏହି ବର୍ଷ ଏହି ଧାରା ଆରମ୍ଭ ହୋଇଛି । କୋଭିଡ କାରଣରୁ ଦୁଇ ବର୍ଷର ଥିଏଟର ବନ୍ଦ ପରେ ପୁନଃ ଆରମ୍ଭ ହେବାର ଆନନ୍ଦରେ ଏହି ଦିନ ପାଳନ କରାଯାଉଛି। ପ୍ରେକ୍ଷାଳୟ ଦ୍ୱାରା କରାଯାଇଥିବା ଏହି ଘୋଷଣା ଦର୍ଶକଙ୍କୁ ସିନେମା ହଲକୁ ଫେରାଇ ଆଣିବା ପାଇଁ ଏକ ବଡ଼ ପଦକ୍ଷେପ। ଯେଉଁମାନେ ଲକଡାଉନ୍ ପରଠାରୁ ପ୍ରେକ୍ଷାଳୟକୁ ଯାଇ ନାହାଁନ୍ତି, ସେମାନଙ୍କୁ ସିନେମା ହଲକୁ ଯିବା ପାଇଁ ଆଜି ବଡ଼ ଦିନ । PVR, INOX, ସିନେପୋଲିସ୍, କାର୍ନିଭାଲ୍, ମିରାଜ୍ ଓ ସିଟିପ୍ରିଡ୍, ଏସୀୟ, ମୁଭିଟାଇମ୍ ସମେତ ଦେଶର ପ୍ରାୟ ୪ ହଜାର ସିନେମା ହଲରେ ୭୫ ଟଙ୍କାରେ ଟିକେଟ୍ କିଣି ଦର୍ଶକ ବିଭିନ୍ନ ଫିଲ୍ମ ଦେଖିପାରିବେ ।
ଆଖଣ୍ଡଳମଣୀ ପୀଠ ବିକାଶ କାମର ସମୀକ୍ଷା କରିବେ ମୁଖ୍ୟ ଶାସନ ସଚିବ ଓ ଫାଇଭ-ଟି ସଚିବ
ଭୁବନେଶ୍ୱର: କେତେ ବାଟ ଆଗେଇଛି ଭଦ୍ରକ ଆଖଣ୍ଡଳମଣୀ ପୀଠର ବିକାଶ କାମ । ଆଜି ଗ୍ରାଉଣ୍ଡ ଜିରୋରେ ସମୀକ୍ଷା କରିବେ ମୁଖ୍ୟ ଶାସନ ସଚିବ ଓ ଫାଇଭ-ଟି ସଚିବ । ଅପରାହ୍ଣ ୪ଟାରେ ମୁଖ୍ୟ ଶାସନ ସଚିବ ସୁରେଶ ମହାପାତ୍ର ଓ ଫାଇଭ-ଟି ସଚିବ ଭି. କେ ପାଣ୍ଡିଆନ ମନ୍ଦିର ପରିଦର୍ଶନ ସହ ଉନ୍ନତିମୂଳକ କାର୍ଯ୍ୟର ସମୀକ୍ଷା କରିବେ । ପ୍ରଥମ ପର୍ଯ୍ୟାୟରେ ମନ୍ଦିର ଓ ପୀଠ ପାଇଁ ଦିଆଯାଇଥିବା ୨୧ କୋଟି ଟଙ୍କାର କାର୍ଯ୍ୟ କେତେବାଟ ଆଗେଇଛି। ସେନେଇ ସମୀକ୍ଷା କରିବାର କାର୍ଯ୍ୟକ୍ରମ ରହିଛି।
ମନ୍ଦିର ପାଇଁ ୬ କୋଟି, ସାଇନ୍ସ ସିଟି ପାଇଁ ୬ କୋଟି ୬୦ ଲକ୍ଷ, ପାନ୍ଥ ନିବାସ ପାଇଁ ୩ କୋଟି ୫୦ ଲକ୍ଷ, ଦୋକାନ ଗୃହ ପାଇଁ ୪ କୋଟି ଟଙ୍କା, ଶିବଗଙ୍ଗା ପୁଷ୍କରଣୀର ପୁନରୁଦ୍ଧାର ପାଇଁ ୧ କୋଟି ୩୦ ଲକ୍ଷ ଟଙ୍କା ପ୍ରଥମ ପର୍ଯ୍ୟାୟରେ ଦିଆଯାଇଥିଲା। ଏସବୁ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ, ଦ୍ୱିତୀୟ ପର୍ଯ୍ୟାୟ ସମ୍ପ୍ରସାରଣ କାର୍ଯ୍ୟର ସମୀକ୍ଷା କରିବା ସହ ସେବାୟତଙ୍କ ସହ ଆଲୋଚନା କରିବେ ମୁଖ୍ୟ ଶାସନ ସଚିବ ଓ ୫ଟି ସଚିବ। ପୀଠର ବିକାଶ ଓ ଉଚ୍ଛେଦ ହେବାକୁ ଥିବା ସେବାୟତଙ୍କୁ ଥଇଥାନ ପାଇଁ ସହାୟତା ଦେବାର ଯୋଜନା ରହିଛି। ପ୍ରଥମେ ଧାମରା ହେଲିପ୍ୟାଡରେ ଓହ୍ଲାଇ ବାଲିମୁଣ୍ଡାରେ ସ୍ଥାପନ ହେବାକୁ ଥିବା ଏଆରଷ୍ଟ୍ରିପ କାର୍ଯ୍ୟର ସମୀକ୍ଷା କରିବେ। ପରେ କଇଥକୋଲାରେ ୭୫୦ ଏକର ଜାଗାର ପ୍ରସ୍ତାବିତ ଇଣ୍ଡଷ୍ଟ୍ରିଆଲ ପାର୍କ ପାଇଁ ଅଧିଗ୍ରହଣ ହୋଇଥିବା ଜମି ବୁଲି ଦେଖିବେ । ଏହାସହ ଏହି ପ୍ରକଳ୍ପ ପାଇଁ ପ୍ରସ୍ତୁତ ବ୍ଲୁପ୍ରିଣ୍ଟ ଦେଖିବା ସହ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିବେ। ସେହିପରି ୨୨୫ କୋଟି ଟଙ୍କାର ନିର୍ଆଣଧିନ ଧାମରା ଜାମୁଝାଡ଼ି ରାସ୍ତା ପରିଦର୍ଶନ କରିବେ ମୁଖ୍ୟ ଶାସନ ସଚିବ ଓ 5T ସଚିବ ।
ପୁଣି କଟକରୁ ନକଲି ଔଷଧ ଜବତ, ୧ ସପ୍ତାହ ଭିତରେ ୪୫ ଲକ୍ଷ ଟଙ୍କାର ନକଲି ମେଡିସିନ ଜବତ
କଟକ: ପୁଣି କଟକରୁ ନକଲି ଔଷଧ ଜବତ। ଗତକାଲି ପୁଣି ଜବତ ହୋଇଛି ୨୨ ଲକ୍ଷ ଟଙ୍କାର ନକଲି ମେଡିସନ୍। କଟକର ତିନିଟି ଫାର୍ମାସୀରୁ ଜବତ ହୋଇଛି ସମସ୍ତ ନକଲି ଔଷଧ। ଟେଲମା ବ୍ରାଣ୍ଡର ଔଷଧକୁ ଜବତ କରିଛି ଡ୍ରଗ କଣ୍ଟ୍ରୋଲ ବିଭାଗ । ଗିରଫ ଦୁଇ ଷ୍ଟକିଷ୍ଟଙ୍କ ଦ୍ୱାରା ବିକ୍ରି ହୋଇଥିଲା ଏହି ସବୁ ଔଷଧ। ଏହାକୁ ମିଶାଇଲେ ଦୁଇ ସପ୍ତାହ ଭିତରେ ଜବତ ହେଲାଣି ୪୫ ଲକ୍ଷ ଟଙ୍କାର ନକଲି ମେଡିସିନ।
ନକଲି ଔଷଧ ମାମଲାର ଅନୁସନ୍ଧାନ ପାଇଁ ଆଜି ବିହାର ଯିବ ସ୍ୱତନ୍ତ୍ର ତଦନ୍ତକାରୀ ଟିମ୍। ପୂର୍ବରୁ ମଧ୍ୟ ମାମଲାର ତଦନ୍ତ ପାଇଁ ରାଜ୍ୟ ବାହାରକୁ ଯାଇଛି କମିଶନରେଟ ପୋଲିସ । ଦିନକୁ ଦିନ ନକଲି ଔଷଧ କାରବାରର ଚେର ଲମ୍ବିବାରେ ଲାଗିଛି । ଗତ ୯ ତାରିଖରେ କଟକ ଭି.ଆର ଡ୍ରଗ ଏଜେନ୍ସି ଓ ପୂଜା ଏଣ୍ଟରପ୍ରାଇଜେସରୁ ଜବତ ହୋଇଥିଲା ୨୦ ଲକ୍ଷରୁ ଅଧିକ ଟଙ୍କାର ନକଲି ଔଷଧ। ଏବେବି ପୋଲିସ ଓ ଭେଷଜ ନିୟନ୍ତ୍ରଣ ବିଭାଗ ମିଳିତ କାର୍ଯ୍ୟାନୁଷ୍ଠାନ ଜାରି ରଖିଛି।
ଗିରଫ ହେଲେ ଟାଙ୍ଗରପାଲି ଅତିରିକ୍ତ ତହସିଲଦାର କୁଳମଣି ପଟେଲ
ସୁନ୍ଦରଗଡ଼: ଗିରଫ ହେଲେ ସୁନ୍ଦରଗଡ଼ ଜିଲ୍ଲା ଟାଙ୍ଗରପାଲି ଅତିରିକ୍ତ ତହସିଲଦାର କୁଳମଣି ପଟେଲ । ତାଙ୍କୁ ଗିରଫ କରି କୋର୍ଟ ଚାଲାଣ କରିଛି ଭିଜିଲାନ୍ସ । କୁଳମଣିଙ୍କୁ ସୁନ୍ଦରଗଡ଼ ସ୍ପେଶାଲ ଜଜ ଭିଜିଲାନ୍ସ କୋର୍ଟ ଚାଲାଣ କରାଯାଇଛି । ଅତିରିକ୍ତ ତହସିଲଦାରଙ୍କ ଆୟର ଉତ୍ସ ଠାରୁ 253% ଅଧିକ ସମ୍ପତ୍ତି ଥିବା ଭିଜିଲାନ୍ସ ତଦନ୍ତରୁ ଜଣାପଡ଼ିଛି । ଏନେଇ ଅତିରିକ୍ତ ତହସିଲଦାର ଓ ତାଙ୍କ ପତ୍ନୀଙ୍କ ନାମରେ ମାମଲା ରୁଜୁ କରାଯାଇଛି ।
ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗ ପରେ ଗତକାଲି ଅତିରିକ୍ତ ତହସିଲଦାରଙ୍କ ଘର ସମେତ ୮ଟି ସ୍ଥାନରେ ରେଡ କରିଥିଲା ଭିଜିଲାନ୍ସ । ସୁନ୍ଦରଗଡ଼ର ପ୍ରାଇମ ଏରିଆରେ ରହିଛି ମୋଟ୍ ୨୧ଟି ପ୍ଲଟ୍, ୨ଟି ବହୁତଳ କୋଠା ଓ ୪ଟି ଘର ଥିବା ଜାଣିବାକୁ ପାଇଥିଲା ଭିଜିଲାନ୍ସ । କେବଳ ଏତିକି ନୁହେଁ, ୨ଟି ଚାରି ଚକିଆ ଯାନ, ୨ଟି ଟ୍ରାକ୍ଟର, ୩ଟି ଦୁଇ ଚକିଆ ଯାନ ଠାବ ହୋଇଥିଲା । ଚଢ଼ାଉ ବେଳେ ଘରୁ ନଗଦ ଟଙ୍କା ମଧ୍ୟ ଜବତ ହୋଇଥିଲା ।
ଦୁର୍ଗାପୂଜା ପୂର୍ବରୁ କମିଶନରେଟ୍ ପୋଲିସର ଫ୍ଳାଗମାର୍ଚ୍ଚ
ଭୁବନେଶ୍ୱର: ଦୁର୍ଗାପୂଜା ପୂର୍ବରୁ କମିଶନରେଟ୍ ପୋଲିସର ଫ୍ଳାଗମାର୍ଚ୍ଚ । ଖୋଲାରେ ମଦ୍ୟପାନ, ଖଟି, ନିଶା କାରବାର ଏବଂ ହାର୍ଡକୋର କ୍ରିମିନଲଙ୍କ ବିରୋଧରେ ସ୍ବତନ୍ତ୍ର ଡ୍ରାଇଭ୍ । ୟୁନିଟ୍-6 ବସ୍ତିରେ କ୍ୟାପିଟାଲ୍ ଥାନା ପକ୍ଷରୁ ସ୍ପେଶାଲ୍ ଡ୍ରାଇଭ କରାଯାଇଥିବା ବେଳେ ଲକ୍ଷୀସାଗର ଥାନା ପକ୍ଷରୁ ହଳଦୀ ପଡିଆ ବସ୍ତି ଏବଂ ଖାରବେଳ ନଗର ଥାନା ପକ୍ଷରୁ ମାଳିସାହିରେ ଫ୍ଳାଗମାର୍ଚ୍ଚ କରାଯାଇଛି । ଏଥିରେ ୩ ଥାନାର ଆଇଆଇସିଙ୍କ ସମେତ ଏସିପି ଏବଂ ୩ ପ୍ଳାଟୁନ ପୋଲିସ ଫୋର୍ସ ନିୟୋଜିତ ହୋଇଥିଲେ ।
ମାଲିକର ଅଜାଣତରେ ବଦଳିଗଲା ଗାଡ଼ିର ମାଲିକାନା
କୋରାପୁଟ: ମାଲିକର ଅଜାଣତରେ ବି ଅନ୍ୟ ନାଁରେ ବଦଳିପାରେ ଗାଡ଼ିର ମାଲିକାନା । ଆଶ୍ଚର୍ଯ୍ୟ ଲାଗିଲେ ବି ସତ । ଏହା ଆମେ କହୁନୁ, ଏପରି ତଥ୍ୟ ଦେଇଛନ୍ତି ସୁନାବେଡ଼ା ଏସଡିପିଓ । ଗତ ୨୫ ତାରିଖରେ କିଛି ଲୋକ କୋରାପୁଟ ଜିଲ୍ଲା ସିମିଳିଗୁଡ଼ା ନିକଟରେ ଜଗୁ ହନ୍ତାଳଙ୍କ ନିକଟରୁ ଏକ ଅଲଟୋ କାରକୁ ଜୋର ଜବରଦସ୍ତ ନେଇ ଯାଇଥିଲେ । ଏନେଇ ସୁନାବେଡ଼ା ଥାନାରେ ଅଭିଯୋଗ କରିଥିଲେ ଜଗୁ । ତଦନ୍ତ ପରେ ଏମିତି କିଛି ତଥ୍ୟ ପୋଲିସର ହସ୍ତଗତ ହୋଇଛି ।
ଗାଡ଼ିଟି ଜଗୁ ହନ୍ତାଳଙ୍କ ବଦଳରେ ବିପିନ୍ ଛତ୍ରିୟାଙ୍କ ନାମରେ ମାଲିକାନା ପରିବର୍ତ୍ତନ ହୋଇଛି । ଗାଡ଼ି ଚୋରି ପରେ ଏହାର ମାଲିକାନା ପରିବର୍ତ୍ତନ ପାଇଁ ଫର୍ଜି କାଗତପତ୍ର ଜରିଆରେ ଆବେଦନ କରାଯାଇଥିଲା । କିନ୍ତୁ ବିକିବା ଲୋକ ଜଗୁ ହନ୍ତାଳ RTO କାର୍ଯ୍ୟାଳୟ ଯାଇ ନାହାନ୍ତି ବୋଲି କହିଛନ୍ତି । ଏପଟେ କିଣିବା ଲୋକ ବିପିନ ଛତ୍ରୀଆ ବି ଚୋରି ଗାଡି କିଣିଛନ୍ତି ସତ କିନ୍ତୁ ସେ ବି RTO କାର୍ଯ୍ୟାଳୟ ଯାଇନଥିବା କହିଛନ୍ତି ।
ତେବେ ଗାଡ଼ିର ମାଲିକାନା କିପରି ପରିବର୍ତ୍ତନ ହେଲା ଏବେ ତାକୁ ନେଇ ଉଠିଛି ବଡ ପ୍ରଶ୍ନ । ଗାଡି ଲୁଟ ଘଟଣାରେ 2 ଜଣଙ୍କୁ ଗିରଫ କରାଯାଇଥିବା ବେଳେ ଚୋରି ଗାଡି କିଣି ନିଜ ନାମରେ କରିଥିବା ବିପିନ ଛତ୍ରୀଆ ଓ ଫର୍ଜରି କାଗଜ ପତ୍ର କରି ଗାଡି ନାମ ବଦଳାଇଥିବା ମୁଖ୍ୟ ସନ୍ତୋଷ କୁମାର ଖଣ୍ଡେଇଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ ।
ହାଇକୋର୍ଟ ଜର୍ଜ ଡ୍ରାଇଭରଙ୍କ ଝିଅ ପିନ୍ଧିବେ କଳା କୋଟ୍, ପ୍ରେରଣା ଦେଲେ କାର୍ତ୍ତିକା
ଜୟପୁର: ହାଇକୋର୍ଟ ଜର୍ଜ ଡ୍ରାଇଭରଙ୍କ ଝିଅର ସଫଳତା । ଖୁବ୍ ଶୀଘ୍ର କଳା କୋଟ୍ ପିନ୍ଧିବାକୁ ଯାଉଛନ୍ତି ୨୩ ବର୍ଷୀୟା ଝିଅ । ରାଜସ୍ଥାନ ବିଚାରବିଭାଗୀୟ ସେବା ପରୀକ୍ଷା କ୍ଲିଅର କଲେ କାର୍ତ୍ତିକା ଗେହଲଟ୍ । ରାଜ୍ୟ ସ୍ତରରେ ୬୬ ରାଙ୍କ୍ ରଖି ପାସ୍ ହୋଇଛନ୍ତି । ମାତ୍ର ୨୩ ବର୍ଷ ବୟସରେ ଜୁଡିସିଆଲ୍ ସେବା ପରୀକ୍ଷା କ୍ରାକ୍ କରିଛନ୍ତି କାର୍ତ୍ତିକା । କୋଭିଡ୍ ସମୟରେ ଅଫ୍ଲାଇନ୍ କ୍ଲାସ୍ ବନ୍ଦ ହେବା ପରେ ଅନଲାଇନରୁ କୋଚିଂ ଆରମ୍ଭ କରିଥିଲେ କାର୍ତ୍ତିକା ।
ଅନଲାଇନରେ ପ୍ରସ୍ତୁତି କରି ପ୍ରଥମ ଥରରେ ଏହି ପରୀକ୍ଷା ପାସ୍ କରିଛନ୍ତି । ଦିଲ୍ଲୀ ଜବାହାରଲାଲ୍ ନେହୁର ବିଶ୍ବବିଦ୍ୟାଳୟରେ ସ୍ନାତକ ପରେ ଏଲଏଲବି ସ୍ନାତ୍ତୋକତର ପାସ୍ କରିଛନ୍ତି କାର୍ତ୍ତିକା । ଏହା ପରେ ସେ ବିଚାର ବିଭାଗୀୟ ସେବା ପରୀକ୍ଷା ପାଇଁ ପ୍ରସ୍ତୁତି ଜୋରଦାର କରିଥିଲେ । ପରୀକ୍ଷା ଉର୍ତ୍ତୀର୍ଣ୍ଣ ହେବା ପରେ ପରିବାରରେ ଖୁସିର ଲହରୀ ଖେଳିଯାଇଛି । ଅନଲାଇନ କୋଚିଂ ଆପ୍ଲିକେସନ ଉତ୍କର୍ଷ ପରିବାର ପକ୍ଷରୁ କାର୍ତ୍ତିକାଙ୍କୁ ଶୁଭେଚ୍ଛା ଜଣାଇଛନ୍ତି ।
ଋଷରେ ଆଣ୍ଟି-ଓ୍ବାର ପ୍ରୋଟେଷ୍ଟ, ୩୦ଟି ସହରରେ ପୁଟିନଙ୍କୁ ତୀବ୍ର ବିରୋଧ
ମସ୍କୋ: ଋଷରେ ଆଣ୍ଟି-ଓ୍ବାର ପ୍ରୋଟେଷ୍ଟ । ମସ୍କୋ ସମେତ ୩୦ଟି ସହରରେ ପୁଟିନଙ୍କ ନିଷ୍ପତ୍ତିକୁ ତୀବ୍ର ବିରୋଧ । ୟୁକ୍ରେନକୁ ଅଧିକ ୩ଲକ୍ଷ ରିଜର୍ଭ ସୈନ୍ୟ ପଠାଇବା ନିର୍ଦ୍ଦେଶ ପରେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବିରୋଧରେ ବିକ୍ଷୋଭ ଉଗ୍ର ରୂପ ନେଇଛି । ରିଜର୍ଭ ସୈନିକ ହେଉଛନ୍ତି ଋଷର ସାଧାରଣ ନାଗରିକ । ଯେଉଁମାନଙ୍କୁ ସୈନ୍ୟ ତାଲିମ ଦିଆଯାଇଥାଏ । ଆବଶ୍ୟକ ପଡ଼ିଲେ ସେମାନଙ୍କୁ ଯେକୌଣସି ସ୍ଥାନରେ ମୁତୟନ କରାଯାଇପାରେ ।
ୟୁକ୍ରେନକୁ ରିଜର୍ଭ ସୈନ୍ୟ ପଠାଇବା ଘୋଷଣା ପରେ ବିକ୍ଷୋଭ ଜୋରଦାର ହୋଇଛି । ପ୍ରାୟ ୧୩ଶହ ବିକ୍ଷୋଭକାରୀଙ୍କୁ ଉଠାଇ ନେଇଛି ପୋଲିସ । ରାଜଧାନୀ ମସ୍କୋ ଓ ଋଷର ସବୁଠୁ ବଡ଼ ଶିଳ୍ପ ସହର ପିଟର୍ସବର୍ଗରେ ଲକ୍ଷାଧିକ ଲୋକ ରାସ୍ତାକୁ ଓହ୍ଲାଇ ପ୍ରଦର୍ଶନ ଜାରି ରଖିଛନ୍ତି । ସେପଟେ ୟୁକ୍ରେନରେ ମୋବିଲାଇଜେସନ ଘୋଷଣା ପରେ ଦେଶ ଛାଡ଼ି ଚାଲିଯାଉଛନ୍ତି ଋଷ ନାଗରିକ । ତୁର୍କି, ଆର୍ମେନିଆ, ଜର୍ଜିଆ ଆଦି ଦେଶକୁ ଯାଉଥିବା ଫ୍ଲାଇଟ ଫୁଲ୍ । ନାଗରିକଙ୍କ ପଳାୟନ ରୋକିବାକୁ ୧୮ରୁ ୬୫ବର୍ଷୀୟ ନାଗରିକଙ୍କ ଟିକେଟ ଉପରେ ରୋକ ଲଗାଇ ଦିଆଯାଇଛି ।
ପ୍ରତିରକ୍ଷା ମନ୍ତ୍ରଣାଳୟ ବିନା ଅନୁମତିରେ ଟିକେଟ ବିକ୍ରି ନ କରିବାକୁ ଆଡଭାଇଜରୀ ଜାରି କରାଯାଇଛି । ଅନ୍ୟପଟେ ଯୁଦ୍ଧ ଅପରାଧ ପାଇଁ ଋଷଠାରୁ ଭିଟୋ ପାଓ୍ବାର ପ୍ରତ୍ୟାହାର କରିନେବାକୁ ନିବେଦନ କରିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ସେପଟେ ପ୍ରଥମ ଥର ଲାଗି ଋଷ-ୟୁକ୍ରେନ ମଧ୍ୟରେ ହୋଇଛି ବଡ଼ ଧରଣର ବନ୍ଦୀ ଅଦଳ ବଦଳ ପ୍ରକ୍ରିୟା । ଏହି ପ୍ରକ୍ରିୟାରେ ପ୍ରାୟ ୩୦୦ ବନ୍ଦୀଙ୍କୁ ଅଦଳବଦଳ କରାଯାଇଛି ।
ଅକ୍ଟୋବର ୬ରୁ ଶ୍ରୀମନ୍ଦିରରେ ଶ୍ରୀଜିଉଙ୍କ କାର୍ତ୍ତିକ ନୀତି
ପୁରୀ: ଅକ୍ଟୋବର ୬ରୁ ଶ୍ରୀମନ୍ଦିରରେ ଶ୍ରୀଜିଉଙ୍କର କାର୍ତ୍ତିକ ନୀତି। ରାଧାଦାମୋଦର ବେଶ ଓ ବାଳ ଭୋଗ ନୀତି ଆରମ୍ଭ ହେବ। ଏନେଇ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ଜିଲ୍ଲାପାଳଙ୍କ ଅଧ୍ୟକ୍ଷତାରେ ବସିଥିବା ଉଭୟ ନୀତି ସବ୍ କମିଟି ଓ ଛତିଶା ନିଯୋଗ ବୈଠକରେ ନୀତି ନିର୍ଘଣ୍ଟ ଚୁଡାନ୍ତ ହୋଇଛି। କୋଭିଡ କଟକଣା ହଟିବା ପରେ ହବିଷ୍ୟାଳୀଙ୍କ ପ୍ରବଳ ଭିଡ଼ ସମ୍ଭାବନା ରହିଛି। ଏହାକୁ ଦୃଷ୍ଟିରେ ରଖି ଶ୍ରୀମନ୍ଦିରରେ ଶୃଙ୍ଖଳିତ ନୀତି କାନ୍ତି ଉପରେ ଗୁରୁତ୍ବ ଦିଆଯାଇଛି। ଅକ୍ଟୋବର ୬ ତାରିଖରୁ ନଭେମ୍ବର ୮ ପର୍ଯ୍ୟନ୍ତ ମହାପ୍ରଭୁଙ୍କ କାର୍ତ୍ତିକ ନୀତି ଅନୁଷ୍ଠିତ ହେବ।
ନିର୍ଦ୍ଧାରିତ ନୀତି ନିର୍ଘଣ୍ଟ ଅନୁଯାୟୀ ଅକ୍ଟୋବର ୬ରୁ ସକାଳ ୬.୧୫ରେ ରାଧାଦାମୋଦର ବେଶ ଓ ସକାଳ ୧୦ ଟାରୁ ୧୦.୩୦ ମଧ୍ୟରେ ବାଳଧୂପ ନୀତି ଅନୁଷ୍ଠିତ ହେବ। ଅକ୍ଟୋବର ୩୧ ରେ ମହାପ୍ରଭୁଙ୍କ ହରିହର ବେଶ, ନଭେମ୍ବର ୪ରେ ଠିଆକିଆ ବା ଲକ୍ଷ୍ମୀନାରାୟଣ ବେଶ, ୫ରେ ବାଙ୍କଚୁଡ ବେଶ, ୬ରେ ଡାଳିକିଆ ବା ତ୍ରିବିକ୍ରମ ବେଶ, ୭ରେ ଲକ୍ଷ୍ମୀନୃସିଂହ ବେଶ ଓ ୮ରେ ରାଜାଧିରାଜ ବା ସୁନାବେଶ ଅନୁଷ୍ଠିତ ହେବ। ହବିଷ୍ୟାଳୀଙ୍କ ଶୃଙ୍ଖଳିତ ଦର୍ଶନ ଉପରେ ଗୁରୁତ୍ବ ଦିଆଯାଇଛି। ସେହିପରି କାର୍ତ୍ତିକ ମାସରେ ଭିଆଇପି ଦର୍ଶନ ଉପରେ କଟକଣା ଲଗାଇବା ପାଇଁ ଛତିଶା ନିଯୋଗର ସଦସ୍ୟ ଠକରେ ଦାବି କରିଥିଲେ।
ଅକ୍ଟୋବର ୨୫ରେ ହେବାକୁ ଥିବା ସୂର୍ଯ୍ୟ ପରାଗ ଓ ନଭେମ୍ବର ୮ରେ ହେବାକୁ ଥିବା ଚନ୍ଦ୍ର ଗ୍ରହଣ ପାଇଁ ମଧ୍ୟ ନୀତି ନିର୍ଘଣ୍ଟ ହୋଇଛି। ଅକ୍ଟୋବର ୨୪ ସଂନ୍ଧ୍ୟାରୁ ଶ୍ରୀମନ୍ଦିରରେ ସାଧାରଣ ଦର୍ଶନ ବନ୍ଦ ରହିବ। ସେହିପରି ନଭେମ୍ବର ୮ରେ ଅପରାହ୍ନରୁ ସଂନ୍ଧ୍ୟା ପର୍ଯ୍ୟନ୍ତ ଶ୍ରୀମନ୍ଦିରରେ ମଧ୍ୟ ଦର୍ଶନ ବନ୍ଦ ରହିବ। ଅକ୍ଟୋବର ୨୫ରେ ଶ୍ରୀମନ୍ଦିରରେ ଭୋଗମଣ୍ଡପ ସରିବା ପରେ ରାଧାଦାମୋଦର ବେଶ ହେବ। ମଇଲମ ହୋଇ ଗ୍ରହଣ ସ୍ପର୍ଶ ପରେ ଗ୍ରହଣ ମହାସ୍ନାନ ଓ ଗ୍ରହଣ ଭୋଗ ନୀତି କରାଯିବ।
କଟକ, ଖୋର୍ଦ୍ଧା ଓ ନୟାଗଡ ଜିଲ୍ଲାର ମିଶନ ଶକ୍ତି ମା ମାନଙ୍କୁ ଭେଟିଲେ ମୁଖ୍ୟମନ୍ତ୍ରୀ
ଭୁବନେଶ୍ୱର: ସଂଧ୍ୟାରେ ନବୀନ ନିବାସଠାରେ କଟକ, ଖୋର୍ଦ୍ଧା ଓ ନୟାଗଡ ଜିଲ୍ଲାର ମିଶନ ଶକ୍ତି ଗୋଷ୍ଠୀର ମା ମାନେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କୁ ଭେଟି ଥିଲେ । ଏହି ଅବସରରେ ଗତ ଅଗଷ୍ଟ ୧୫ ତାରିଖ ୭୫ତମ ସ୍ବାଧୀନତା ଦିବସ ପାଳନ ଅବସରରେ ମା ମାନେ ଜାତୀୟ ପତାକା ତିଆରି ଦାୟିତ୍ବ ନେଇ ଦକ୍ଷତାର ସହ ତୁଲାଇ ଥିବାରୁ ମୁଖ୍ୟମନ୍ତ୍ରୀ ସମସ୍ତଙ୍କୁ ଧନ୍ୟବାଦ ଜଣାଇଥିଲେ।
ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଭି.କେ. ପାଣ୍ଡିଆନ ମିଶନ ଶକ୍ତି ମା ମାନଙ୍କ କାର୍ଯ୍ୟର ପ୍ରଶଂସା କରି କହିଥିଲେ ଯେ ଆପଣମାନଙ୍କ ଉପରେ ମୁଖ୍ୟମନ୍ତ୍ରୀଙ୍କ ସଂପୂର୍ଣ୍ଣ ଭରସା ରହିଛି। ଆପଣମାନେ ମଧ୍ୟ ଗାଁ ଗାଁରେ ବିକାଶର ନେତୃତ୍ୱ ନେଇ ମୁଖ୍ୟମନ୍ତ୍ରୀଙ୍କ ସ୍ବପ୍ନ ଓ ଭରସାକୁ ସାକାର କରିପାରିଛନ୍ତି ।
ଜାତୀୟ ପତାକା ତିଆରି ପରି ଏକ ମର୍ଯ୍ୟଦାପୂର୍ଣ୍ଣ ଦାୟିତ୍ବ ଅର୍ପଣ କରିଥିବାରୁ ମିଶନ ଶକ୍ତିର ମା ମାନେ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇ ଥିଲେ। ମିଶନ ଶକ୍ତିରେ ସାମିଲ ହୋଇ ଆମେ ଗର୍ବିତ ବୋଲି ସେମାନେ ପ୍ରକାଶ କରିବା ସହିତ ଏଥିପାଇଁ ଆଜି ବିଭିନ୍ନ କ୍ଷେତ୍ରରେ ନିଜର ପ୍ରତିଭାର ବିକାଶ ହୋଇପାରିଛି ବୋଲି ସେମାନେ କହିଥିଲେ ।
ସୂଚନାଯୋଗ୍ୟ ଯେ ଚଳିତ ବର୍ଷ ସ୍ୱାଧୀନତାର ୭୫ତମ ପୂର୍ତ୍ତି ଅବସରରେ ରାଜ୍ୟ ସରକାର ମିଶନ ଶକ୍ତି ମା ମାନଙ୍କୁ ୩୦ ଲକ୍ଷ ଜାତୀୟ ପତାକା ପ୍ରସ୍ତୁତି ଓ ବଣ୍ଟନ ଦାୟିତ୍ୱ ଦେଇଥିଲେ।