ନନ୍ଦିଘୋଷ ବ୍ୟୁରୋ : ଗୋଟେ ଛୁଆର ବାପା ହେବା ପରେ ବି ଯୁବତୀଙ୍କୁ ପ୍ରେମ । ମିଛ ବିବାହ ସହ ପ୍ରତାରଣା କରି ବନ୍ଧାହେଲା ପ୍ରତାରକ ପୁରୁଷ । ଏମିତି ଜଣେ ପ୍ରତାରକ ପୁରୁଷଙ୍କୁ ଗିରଫ କରି କୋର୍ଟଚାଲାଣ କରିଛି ଚନ୍ଦ୍ରଶେଖରପୁର ଥାନା ପୋଲିସ । ଗିରଫ ଅଭିଯୁକ୍ତ ହେଲେ ଗଞ୍ଜାମ ଭଞ୍ଜନଗର ଅଞ୍ଚଳରୁ ଆସି ଭୁବନେଶ୍ବର ଶ୍ରୀ ବିହାରରେ ରହୁଥିବା ୪୭ ବର୍ଷିୟ ଦେବରାଜ ବିଶୋୟୀ । ମାମଲାରୁ ଜଣାପଡିଛି ଦେବରାଜ ପୂର୍ବରୁ ବିବାହିତ ହୋଇଥିଲେ ମଧ୍ୟ ଏ ସମ୍ପର୍କରେ ସମସ୍ତ ତଥ୍ୟ ଲୁଚାଇ ଅନ୍ୟଜଣେ ଯୁବତୀଙ୍କ ସହ ପ୍ରେମ ସମ୍ପର୍କରେ ରହିଥିଲେ । ଏପରିକି ଗତ ୮ ମାସ ତଳେ ମନ୍ଦିରରେ ସମ୍ପୃକ୍ତ ଯୁବତୀ ତଥା ପୀଡିତାଙ୍କୁ ବିବାହ କରିବା ସହ ଉଭୟେ ସ୍ଵାମୀ ସ୍ତ୍ରୀ ଭାବେ ଭୁବନେଶ୍ବର ଶ୍ରୀ ବିହାର ଅଞ୍ଚଳରେ ରହୁଥିଲେ । ତେବେ ଗତ କିଛି ଦିନ ହେବ ଦେବରାଜ ହଠାତ୍ ଉଭାନ୍ ହୋଇଯାଇଥିଲେ । ପରେ ଯୁବତୀ ଜଣଙ୍କ ଜାଣିବାକୁ ପାଇଥିଲେ ଯେ ଦେବରାଜ ପୂର୍ବରୁ ବିବାହିତ । ତାଙ୍କର ପିଲାଟିଏ ମଧ୍ୟ ରହିଛି। ଏ ନେଇ ଯୁବତୀ ଦେବରାଜଙ୍କୁ ପଚାରିବାରୁ ଯୁବତୀଙ୍କ ସହ ଥିବା ସମ୍ପର୍କକୁ ସେ ଅସ୍ୱୀକାର କରିଥିଲେ । ଶେଷରେ ଯୁବତୀ ଜଣ ଙ୍କ ଚନ୍ଦ୍ରଶେଖରପୁର ଥାନାର ଦ୍ବାରସ୍ଥ ହୋଇଥିଲେ । ପୋଲିସ ତଦନ୍ତ କରିବା ସହ ପ୍ରତାରକ ଦେବରାଜଙ୍କୁ ଗିରଫ କରି କୋର୍ଟ ଚାଲାଣ କରିଛି ।
ମେଡିକାଲର ଅବ୍ୟବସ୍ଥାକୁ ନେଇ ତାତିଲେ ଅଞ୍ଚଳବାସୀ ; ଶ୍ରୀରାମ ସେବା ଟ୍ରଷ୍ଟ ପକ୍ଷରୁ ମେଡିକାଲ ସାମ୍ନାରେ ଧାରଣା
ନନ୍ଦିଘୋଷ ବ୍ୟୁରୋ : ମେଡିକାଲର ଅବ୍ୟବସ୍ଥାକୁ ନେଇ ତାତିଲେ ଅଞ୍ଚଳବାସୀ । ଶ୍ରୀରାମ ସେବା ଟ୍ରଷ୍ଟ ପକ୍ଷରୁ ମେଡିକାଲ ସାମ୍ନାରେ ଧାରଣା । ଉଦଳାରେ ଥିବା ଉପଖଣ୍ଡ ଚିକିତ୍ସାଳୟରେ ବିଭିନ୍ନ ପ୍ରକାର ସମସ୍ୟା ରହିଛି । ମେଡିକାଲରେ ଥିବା ଲିଫ୍ଟ ଅଚଳ ଥିବାବେଳେ ପାନୀୟ ଜଳ ସମସ୍ୟା, ଅନେକ ସମୟରେ ରୋଗୀ ଏବଂ ସମ୍ପର୍କୀୟଙ୍କୁ ଦୁର୍ବ୍ୟବହାର କରାଯାଉଥିବା ଅଭିଯୋଗ ହୋଇଛି । ସିନିୟର ଡାକ୍ତର ଙ୍କ ବଦଳରେ ଜୁନିୟର ଡାକ୍ତର ମେଡିକାଲରେ ବେପରୁଆ ଭାବେ ରୋଗୀ ଦେଖୁଛନ୍ତି । ଅନେକ ସମୟରେ ରୋଗୀ ଦେଖାରେ ଅବହେଳା କରି ରୋଗୀଙ୍କୁ ବାରମ୍ବାର ରେଫର କରାଯାଉଥିବା ଅଭିଯୋଗ ହୋଇଛି । ବାରମ୍ବାର ଏ ନେଇ ଟ୍ରଷ୍ଟ ପକ୍ଷରୁ ଦାବି ଉଠାଇ ଥିବା ବେଳେ କେହି ଏଥିପ୍ରତି କର୍ଣ୍ଣପାତ ନ କରିବାରୁ ଆଜି ତାତିଛନ୍ତି ଅଞ୍ଚଳବାସୀ । ରୋଗୀ ସେବା ନାମରେ ଶୋଷଣ କରାଯାଉଥିବାରୁ ଏହାକୁ ବିରୋଧ କରି ତୁରନ୍ତ ସମାଧାନ କରା ନ ଗଲେ ଆଗାମୀ ଦିନରେ ଆନ୍ଦୋଳନ ବ୍ୟାପକ କରାଯିବ ବୋଲି କହିଛନ୍ତି ଆନ୍ଦୋଳନକାରୀ ।
ରାଉରକେଲା ଇସ୍ପାତ କାରଖାନା ମୁଖ୍ୟ ଫାଟକ ଆଗରେ ଶ୍ରମିକ ସଂଘ ପକ୍ଷରୁ ବିକ୍ଷୋଭ
ନନ୍ଦିଘୋଷ ବ୍ୟୁରୋ : ରାଉରକେଲା ଇସ୍ପାତ କାରଖାନା ମୁଖ୍ୟ ଫାଟକ ଆଗରେ ଶ୍ରମିକ ସଂଘ ପକ୍ଷରୁ ବିକ୍ଷୋଭ । ରାଉରକେଲା ଇସ୍ପାତ କାରଖାନା କର୍ମଚାରୀ ଙ୍କ ୩୯ ମାସର ବକେୟା ଦରମା ପ୍ରଦାନ କରିବା ନୁତନ ମଜୁରୀ ଚୁକ୍ତିନାମା କାର୍ଯ୍ୟକାରୀ କରିବା, ଇସ୍ପାତ କାରଖାନାର ୪୦ ଶତକଡା କର୍ମଚାରୀଙ୍କୁ ଛଟେଇ କରିବା ପାଇଁ ଆରମ୍ଭ ହୋଇଥିଵା ଉଦ୍ୟମକୁ ବିରୋଧ କରି ଆନ୍ଦୋଳନ କରାଯାଇଛି । ଏହାସହ ରାଉରକେଲା ଇସ୍ପାତ କାରଖାନାର ଅଫିସରଙ୍କୁ ଗେଟରେ ଯାଞ୍ଚ ନକରିବା ପାଇଁ ହୋଇଥିବା ନିଷ୍ପତ୍ତିକୁ ବିରୋଧ କରାଯାଇଛି । ରାଉରକେଲା ଶ୍ରମିକ ସଂଘ ସାଧାରଣ ସମ୍ପାଦକ ପ୍ରଶାନ୍ତ ବେହେରାଙ୍କ ନେତୃତ୍ବରେ ଆନ୍ଦୋଳନ କରାଯାଇଛି । ରାଉରକେଲା ଇସ୍ପାତ କାରଖାନା ଲାଭରେ ଚାଲିଥିବାରୁ କର୍ମଚାରୀଙ୍କ ଵକେୟା ଏରିୟର ପ୍ରଦାନ କରିବା ସହ ସମସ୍ତ ବକେୟା ଅର୍ଥ ପ୍ରଦାନ କରିବା ପାଇଁ ଦାବି କରାଯାଇଛି ।
ପାଣିପାଇଁ ହଲ୍ଲାବୋଲ ; ହାତରେ ଗରା ବାଲଟି ଧରି ଧାରଣା ଦେଲେ ଗାଁ ଲୋକ
ନନ୍ଦିଘୋଷ ବ୍ୟୁରୋ : ପାଣିପାଇଁ ହଲ୍ଲାବୋଲ । ହାତରେ ଗରା ବାଲଟି ଧରି ଧାରଣା ଦେଲେ ଗାଁଲୋକେ । କପ୍ତିପଦା ବ୍ଲକ ଗଡ଼ସାହି ୬ ନମ୍ବର ୱାର୍ଡର ଦୃଶ୍ଯ । ଖରା ଆରମ୍ଭରୁ ଅଞ୍ଚଳରେ ଦେଖାଦେଇଛି ପାଣି ସମସ୍ୟା । ବାରମ୍ବାର ଅଭିଯୋଗ ପରେ ମଧ୍ୟ ଶୁଣୁନି ପ୍ରଶାସନ । ତେଣୁ ଜିଲ୍ଲାପାଳଙ୍କ ଅଭିଯୋଗ ଶୁଣାଣି ଶିବିର ଆଗରେ ଧାରଣାରେ ବସିଲେ ମହିଳା । ୭୦ ରୁ ଅଧିକ ପରିବାର ପାଇଁ ପାନୀୟ ଜଳର କୌଣସି ସୁବିଧା ନାହିଁ। ଗ୍ରାମରେ ଥିବା ଗୋଟିଏ ନଳକୂପ ଥିବାବେଳେ ସେଥୁରୁ ବାହାରୁନି ପାଣି । କେବଳ ସେତିକି ନୁହେଁ ୱାଟକୋ ତରଫରୁ ଦିଆଯାଉଥିବା ପାଣି ମଧ୍ୟ ମନ ମୁତାବକ ଆସୁଛି । ପାନୀୟ ଜଳ ସମସ୍ୟା ତୁରନ୍ତ ସମାଧାନ ନ ହେଲେ ଆଗାମୀ ଦିନରେ ଆନ୍ଦୋଳନ ତୀବ୍ରତର ହେବ ବୋଲି କହିଛନ୍ତି ବିକ୍ଷୋଭକାରୀ ।
ଜଳୁଛି ଏକର ଏକର ନଳ ବଣ ; ନିଆଁ ଲିଭାଇବାରେ ଅସମର୍ଥ ଅଗ୍ନିଶମବାହିନୀ
ନନ୍ଦିଘୋଷ ବ୍ୟୁରୋ : ପୁଣି ଚିଲିକାରେ ଲାଗିଲା ନିଆଁ । ଜଳୁଛି ଏକର ଏକର ନଳ ବଣ । ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ କାଳୁପଡା ଘାଟ ନିକଟରେ ଲାଗିଛି ନିଆଁ ।ନିଆଁର ବ୍ୟାପକତା ଦେଖି ଲୋକେ ଆତଙ୍କିତ ହୋଇ ପଡିଛନ୍ତି । ନିଆଁ ଲାଗିବା ଫଳରେ ଚିଲିକାର ବାସ କରୁଥିବା ବିରଳ ଫିସିଙ୍ଗ କ୍ୟାଟ, ଗାଢ଼ ଭାଲୁ, କୋକି ଶିଆଳି ଆଦି ଜଳ ଜୀବଙ୍କ ଜୀବନ ବିପଦରେ ପଡିଛି । ତେବେ ପ୍ରଶାସନର ନିଘା ନଥିବା ଅଭିଯୋଗ ହୋଇଛି । ମାଛ ମାରିବା ପାଇଁ ମାଫିଆ ନଳ ରେ ନିଆଁ ଲଗାଉଥିବା ଅନୁମାନ କରାଯାଉଛି । ନିଆଁ କୁ ଆୟତ କରିବା ପାଇଁ ଟାଙ୍ଗୀ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଁଚିଛି । ଡ଼ଙ୍ଗା ସହାୟତାରେ ମୋଟର ବୋଟ ପାଇପ ନେଇ ଅଗ୍ନିଶମ ଟିମ ଚିଲିକା ଭିତରକୁ ଯାଇଥିଲେ ସୁଦ୍ଧା ନିଆଁକୁ ଆୟତ୍ତ କରିପାରି ନାହାନ୍ତି ।
ମହିଳାଙ୍କୁ ଦୁଷ୍କର୍ମ ରାଜଧାନୀରେ ଚାଞ୍ଚଲ୍ୟ ; ଫେରାର ଅଭିଯୁକ୍ତକୁ ଘରେ ଆଶ୍ରୟ ଦେବା ପଡିଛି ମହଙ୍ଗା
ନନ୍ଦିଘୋଷ ବ୍ୟୁରୋ : ମହିଳାଙ୍କୁ ଦୁଷ୍କର୍ମ, ରାଜଧାନୀରେ ଚାଞ୍ଚଲ୍ୟ । ଖଣ୍ଡଗିରି ଅଞ୍ଚଳରେ ଘଟିଛି ଏଭଳି ଘଟଣା । ଫେରାର ଅଭିଯୁକ୍ତକୁ ଘରେ ଆଶ୍ରୟ ଦେବା ପଡିଛି ମହଙ୍ଗା। ଅଭିଯୁକ୍ତ ଜଣଙ୍କ ହେଲା ବାସୁଆଘାଇର ଅମିତାଭ ପ୍ରଧାନ । ପୂର୍ବରୁ ତା ନାଁରେ ମାମଲା ଥିଲା । ଏସବୁ ଜାଣିବା ପରେ ମଧ୍ୟ ତାକୁ ଘରେ ରହିବାକୁ ସୁଯୋଗ ଦେଇଥିଲେ ପୀଡିତା। ଡୁମୁଡୁମା ଅଞ୍ଚଳରେ ପୀଡିତାଙ୍କ ସହ ରହି ତାଙ୍କୁ ଦୁଷ୍କର୍ମ ନେଇ ସାଙ୍ଘାତିକ ଅଭିଯୋଗ ଖଣ୍ଡଗିରି ଥାନାରେ ହୋଇଥିଲା । ଏପରିକି ପୀଡିତାଙ୍କ ୫ ଲକ୍ଷ ଟଙ୍କା ନେବା ସହ ଗର୍ଭ ନଷ୍ଟ କରିବା ଅଭିଯୋଗରେ ଅଭିଯୁକ୍ତ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି ଖଣ୍ଡଗିରି ଥାନା ପୋଲିସ।
ଜମି ବ୍ୟବସାୟୀ ସୁଧୀର ପାତ୍ରଙ୍କ ହତ୍ୟା ମାମଲା ; ଆଜି ସରିବ ସମସ୍ତ ଅଭିଯୁକ୍ତଙ୍କୁ ୩ଦିନିଆ ରିମାଣ୍ଡ ଅବଧି
ନନ୍ଦିଘୋଷ ବ୍ୟୁରୋ : ଅଭିଯୁକ୍ତଙ୍କ ମୁହଁରେ ଗଞ୍ଜାମ ଜିଲ୍ଲା ଗୋପାଳପୁର ଥାନା ଅଞ୍ଚଳର ଜମି ବ୍ୟବସାୟୀ ସୁଧୀର ପାତ୍ରଙ୍କ ହତ୍ୟା ମାମଲା । ଆଜି ସରିବ ସମସ୍ତ ଅଭିଯୁକ୍ତଙ୍କୁ ୩ଦିନିଆ ରିମାଣ୍ଡ ଅବଧି । ୩ ଦିନ ରିମାଣ୍ଡରେ ୫ ଅଭିଯୁକ୍ତଙ୍କୁ ଜେରାବେଳେ ପୋଲିସ ହାତରେ ଲାଗିଛି ସାଂଘାତିକ ସୁରାକ । ଗତକାଲି ଅଭିଯୁକ୍ତଙ୍କୁ ନେଇ ସିନ ରି କ୍ରିଏସନ କରାଇଥିଲା ପୋଲିସ । ଅପହରଣ ଠାରୁ ହତ୍ୟା ପର୍ଯ୍ୟନ୍ତ ସମସ୍ତ ଘଟଣା ଗୋଟି ଗୋଟି କରି ବଖାଣିଛନ୍ତି ଅଭିଯୁକ୍ତ । ଗୋପାଳପୁରରୁ ବୁଗୁଡ଼ା ଯାଏଁ ଲମ୍ବିଥିଲା ଅପହରଣ ଓ ହତ୍ଯାର ଏହି ଜଘନ୍ଯ କାଣ୍ଡ । ସୁଧୀର ପାତ୍ରଙ୍କୁ ଅପହରଣ ପରେ ବୁଗୁଡ଼ା ବ୍ଳକ କରଚୁଲି ପଞ୍ଚାୟତର ରାମପାଦ ଜଙ୍ଗଲକୁ ନେଇ ଅତି ନିର୍ମମ ଭାବେ ପିଟି ପିଟି ହତ୍ୟା କରିଥିଲେ ଅଭିଯୁକ୍ତ । ପ୍ରଥମେ ଗୋପାଳପୁର ପରେ ବୁଗୁଡ଼ା ଥାନା ନିକଟ ଘଂଚ ଜଙ୍ଗଲକୁ ଅଭିଯୁକ୍ତଙ୍କୁ ନେଇ ସିନ ରିକ୍ରିଏସନ୍ କରାଇଥିଲା ପୋଲିସ । କେଉଁଠି ସୁଧୀରଙ୍କୁ ରଖିଥିଲେ, କିଏ କିଏ ମାଡ ମାରିଥିଲେ । କିଏ ଚାଳାଇଥିଲା ଗୁଳି ଏନେଇ ସବିଶେଷ ତଥ୍ୟ ଯୋଗାଡ କରିଛି ପୋଲିସ । ପ୍ରଥମେ ତେଜ ପ୍ରତାପ ସିଂହ, ପରେ ନାରାୟଣ ପ୍ରଧାନ ଓ ଆଶିଷ ମହାପାତ୍ରକୁ କ୍ରାଇମ୍ ସ୍ପଟ୍ କୁ ଆଣି ସିନ ରିକ୍ରିଏସନ କରିଛି ପୋଲିସ୍ । ଅତିରିକ୍ତ ଏସପି ଦୀପକ ଜେନାଙ୍କ ଆଗରେ ସବିଶେଷ ତଥ୍ୟ ଓଗାଳିଛନ୍ତି ଅଭିଯୁକ୍ତ । ତେବେ ଆଶିଷ ଓ ନାରାୟଣ ବୁଗୁଡ଼ା ଅଞ୍ଚଳର । ତେଣୁ ଅନ୍ୟ ଅଭିଯୁକ୍ତଙ୍କୁ ଏହି ଜଙ୍ଗଲ ଜାଗା ବିଷୟରେ ଦୁହେଁ ଜଣାଇଥିବା ବେଳେ ହତ୍ୟା ପରେ ଅଭିଯୁକ୍ତ ମାନେ ବ୍ୟବହୃତ ବନ୍ଧୁକକୁ ବାଘୁଆ ଘାଇରେ ଫୋପାଡ଼ି ଚାଲି ଯାଇଥିଲେ l ବନ୍ଧୁକ ପକାଇଥିବା ସ୍ଥାନକୁ ଅଭିଯୁକ୍ତ ମାନେ ଚହ୍ନଟ କରିଥିବା ବେଳେ ବାଘୁଆ ଘାଇରୁ ବନ୍ଧୁକ ଉଦ୍ଧାର କରିବାକୁ ପୋଲିସ ଉଦ୍ଯମ ଆରମ୍ଭ କରିଛି ।
ସପ୍ତମ ଶ୍ରେଣୀ ଛାତ୍ରୀଙ୍କୁ ଅସଦାଚରଣ ଅଭିଯୋଗରେ ଶିକ୍ଷକ ଗିରଫ
ନନ୍ଦିଘୋଷ ବ୍ୟୁରୋ : ସପ୍ତମ ଶ୍ରେଣୀ ଛାତ୍ରୀଙ୍କୁ ଆସଦାଚରଣ ଅଭିଯୋଗ ରେ ଶିକ୍ଷକ ଗିରଫ । ସେବାଶ୍ରମ ର ସପ୍ତମ ଶ୍ରେଣୀ ଛାତ୍ରୀଙ୍କୁ ଅସଦାଚରଣ ଅଭିଯୋଗ ଘଟଣାରେ ପ୍ରଶାସନିକ କାର୍ଯ୍ୟାନୁଷ୍ଠାନ ପରେ ପୋଲିସର କାର୍ଯ୍ୟାନୁଷ୍ଠାନ । ପ୍ରଶାସନ ଅଭିଯୁକ୍ତ ପ୍ରଧାନ ଶିକ୍ଷକଙ୍କୁ ଚାକିରୀରୁ ନିଲମ୍ବିତ କରିଥିବା ବେଳେ ବର୍ତ୍ତମାନ ପୋଲିସ ଗିରଫ କରି କୋର୍ଟ ଚାଲାଣ କରି ଜେଲ ପଠାଇଛି । ପ୍ରଧାନଶିକ୍ଷକଙ୍କୁ ଗିରଫ କରି ପୋକ୍ସୋ କୋର୍ଟରେ ହାଜର କରିବା ପରେ ଜାମିନ ନାମଞ୍ଜୁର ହେବାରୁ ଶିକ୍ଷକ ସୁକାନ୍ତ କୁମାର ଷଡ଼ଙ୍ଗୀଙ୍କୁ ଜେଲ ପଠାଇ ଦିଆଯାଇଛି । ଗତ ଏପ୍ରିଲ ୧୫ ତାରିଖ ରାତିରେ ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ଥାନା ଅନ୍ତର୍ଗତ ଏକ ସେବାଶ୍ରମର ସପ୍ତମ ଶ୍ରେଣୀ ଛାତ୍ରୀଙ୍କୁ ପ୍ରଧାନଶିକ୍ଷକ ସୁକାନ୍ତ କୁମାର ଷଡଙ୍ଗୀ ଅସଦାଚରଣର କରିଥିବା ଅଭିଯୋଗ ହୋଇଥିଲା ।
ପଶ୍ଚିମବଙ୍ଗ ବିଧାନସଭା ନିର୍ବାଚନର ଦ୍ଵିତୀୟ ପର୍ଯ୍ୟାୟ ଭୋଟ ପାଇଁ ଆଜି ସରୁଛି ପ୍ରଚାର
ନନ୍ଦିଘୋଷ ବ୍ୟୁରୋ : ପଶ୍ଚିମବଙ୍ଗ ବିଧାନସଭା ନିର୍ବାଚନର ଦ୍ଵିତୀୟ ପର୍ଯ୍ୟାୟ ଭୋଟ ପାଇଁ ଆଜି ସରୁଛି ପ୍ରଚାର। ଏହି ପର୍ଯ୍ୟାୟରେ ୧୪୨ଟି ଆସନରେ ହେବ ଭୋଟ। ହାତରେ କ୍ୟାମ୍ପେନିଂ ପାଇଁ ଆଜି ମାତ୍ର ଗୋଟିଏ ଦିନ। ତେଣୁ ଜୋରସୋରରେ ସବୁ ଦଳ ପ୍ରଚାର କରୁଛନ୍ତି। ଟିଏମସି ଓ ବିଜେପି ମଧ୍ୟରେ ଜୋରଦାର ଲଢ଼େଇ। ନିଜ ଭବାନୀପୁର ଆସନରେ ନିଜେ ପ୍ରଚାର କରିଛନ୍ତି ମମତା ବାନାର୍ଜୀ । ସେ କହିଛନ୍ତି, ମୋଦି ଓ ଶାହ ପ୍ରଥମେ ଦିଲ୍ଲୀ ଓ ପହଲଗାଓଁର କଥା ସମାଧାନ କରନ୍ତୁ। ତାପରେ ପଶ୍ଚିମବଙ୍ଗ କଥା ବୁଝିବେ। ଟିଏମସି ପାଇଁ କେଜରିୱାଲ ବି ପ୍ରଚାର କରିଛନ୍ତି। ବିଜେପିର ବହୁ ବଡ଼ ବଡ଼ ନେତା ମଧ୍ୟ ଜୋରସୋରରେ ପ୍ରଚାର ଚଲାଇଛନ୍ତି। ନିଜେ ପ୍ରଚାର କରିଛନ୍ତି ଅମିତ ଶାହା, ରାଜନାଥ ସିଂହ ଓ ନିତିନ ନବୀନ। ଭୋଟ ପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି।
ମଧ୍ୟପ୍ରାଚ୍ୟ ସଂକଟ ନେଇ ଆଜି ଇସଲାମାବାଦରେ ପୁଣି ଆଲୋଚନା ; ଇରାନର ବୈଦେଶିକ ମନ୍ତ୍ରୀ ଆଜି ଇସଲାମାବାଦ ଆସୁଛନ୍ତି
ନନ୍ଦିଘୋଷ ବ୍ୟୁରୋ : ମଧ୍ୟପ୍ରାଚ୍ୟ ସଂକଟ ନେଇ ଆଜି ଇସଲାମାବାଦରେ ପୁଣି ଆଲୋଚନା। ଏଥର ଆମେରିକା ଓ ଇରାନ ମଧ୍ୟରେ ନୁହେଁ, ପ୍ରଥମେ ଇରାନ ଓ ପାକିସ୍ତାନ ମଧ୍ୟରେ ହେବ ଆଲୋଚନା। ଏଥିପାଇଁ ଇରାନର ବୈଦେଶିକ ମନ୍ତ୍ରୀ ଆରାଘଚି ଆଜି ଇସଲାମାବାଦ ଆସୁଛନ୍ତି। ସେ ପାକ୍ ପ୍ରଧାନମନ୍ତ୍ରୀ ସରିଫ ଓ ସେନା ମୁଖ୍ୟ ଜେନେରାଲ ମୁନିରଙ୍କୁ ଭେଟିବେ। କୁହାଯାଉଛି ଆମେରିକା ସହିତ କଥାବାର୍ତ୍ତା ଆଗରୁ ପାକିସ୍ତାନକୁ ନିଜ ଦାବି ଜଣାଇବ ଇରାନର ବୈଦେଶିକ ମନ୍ତ୍ରୀ। ଏହି ଶାନ୍ତି ଆଲୋଚନାରେ ପାକିସ୍ତାନ ମଧ୍ୟସ୍ଥି ଭାବେ କାମ କରୁଛି। ଉଭୟ ପକ୍ଷ ମଧ୍ୟରେ ଆଲୋଚନା ପରେ କଥାବାର୍ତ୍ତା ଆଗେଇବ ନା କଣ ହେବ, ତାହା ଜଣାପଡ଼ିବ। ଶନିବାର ଆମେରିକା ଓ ଇରାନ ମଧ୍ୟରେ ଇସଲାମାବାଦରେ ଆଲୋଚନା ହେବାର ଥିଲା। କିନ୍ତୁ ଆମେରିକା ପ୍ରତିନିଧି ଦଳ ଆସିବା ଆଗରୁ ହିଁ ଇସଲାମାବାଦରୁ ପଳାଇଥିଲେ ଇରାନ ଟିମ୍। ସରିଫ ଓ ମୁନିରଙ୍କୁ ଭେଟି ନିଜ ଦାବି ତାଲିକା ଧରାଇ ପଳାଇ ଥିଲେ। ସିଧା ଓମାନ ଯାଇ ସେଠାକାର ସୁଲତାନଙ୍କୁ ଭେଟିଥିଲେ। ସେପଟେ ଆମେରିକାର ଟିମ୍ ଇସଲାମାବାଦ ଗସ୍ତ ବାତିଲ କରିଥିଲା। ଏବେ ଅପେକ୍ଷା ଆଜିର ଆଲୋଚନାର କଣ ବାହାରୁଛି। ତେବେ ଏକଥା ସତରେ ମଧ୍ୟପ୍ରାଚ୍ୟ ଶାନ୍ତି ପ୍ରକ୍ରିୟା ଅବ୍ୟାହତ ରହିଛି ଓ ଯୁଦ୍ଧ ବନ୍ଦ ହେବାର ଆଶା ଉଜ୍ଜିବୀତ ରହିଛି । ଇରାନ ବୈଦେଶିକ ମନ୍ତ୍ରୀ ଆବାସ ଆରାଘଚି ରୁଷ ବି ଗସ୍ତ କରିବେ ବୋଲି ଜଣାପଡ଼ିଛି।