ଗଞ୍ଜାମ ବନ୍ୟାର ଅସନ୍ତୋଷ: ବିଧାୟକଙ୍କୁ ମାଡ଼, ପ୍ରଶାସନିକ ଅଧିକାରୀଙ୍କୁ ଗୋଡ଼ାଉଛନ୍ତି ଲୋକେ

ନନ୍ଦିଘୋଷ ବ୍ୟୁରୋ: ଗଞ୍ଜାମରେ ପ୍ରଳୟଙ୍କାରୀ ବନ୍ୟା ଲୋକଙ୍କ ଆଖିର ନିଦ ହଜାଇ ଦେଇଥିବା ବେଳେ ରାଜ୍ୟ ବିଜେପି ସରକାର ଓ ସ୍ଥାନୀୟ ପ୍ରଶାସନ ଉପରେ ଯେମିତି କିଛି ପ୍ରଭାବ ପକାଇନାହିଁ । ଲୋକେ ବନ୍ୟାରେ ସର୍ବସ୍ବ ହରାଇ ଦାଣ୍ଡକୁ ଚାଲି ଆସିଛନ୍ତି । ହେଲେ ଠିକ ସମୟରେ ନା ପ୍ରଶାସନ ନା ସରକାର ତାଙ୍କ ପାଖରେ ପହଞ୍ଚିଛି । ଆଉ ବନ୍ୟାର ତିନିଦିନ ପରେ ଲୋକଙ୍କ ପାଖରେ ପହଞ୍ଚିବାକୁ ଚେଷ୍ଟା କରି ଜିଲ୍ଲାର ବିଭିନ୍ନ ସ୍ଥାନରେ ହଟହଟା ହେଉଛନ୍ତି ପ୍ରଶାସନିକ ଅଧିକାରୀ ଏବଂ ବିଜେପି ଲୋକ ପ୍ରତିନିଧି । ଏପରିକି ବିଜେପି ବିଧାୟକଙ୍କୁ ଆକ୍ରମଣ କରିବାକୁ ପଛାଇ ନାହାନ୍ତି ଉତ୍ତ୍ୟକ୍ତ ଲୋକେ ।

ବିଧାୟକଙ୍କୁ ମାଡ଼

ବନ୍ୟାର ତିନିଦିନ ପରେ ପୁରୁଷୋତ୍ତମପୁର ଅଞ୍ଚଳ ପରିଦର୍ଶନ କରିବାକୁ ଆସି ଉତ୍ତ୍ୟକ୍ତ ଲୋକଙ୍କ ଆକ୍ରମଣର ଶିକାର ହୋଇଛନ୍ତି ଖଲ୍ଲିକୋଟର ବିଜେପି ବିଧାୟକ ପୂର୍ଣ୍ଣଚନ୍ଦ୍ର ସେଠୀ । ଉତ୍ତ୍ୟକ୍ତ ଲୋକେ ତାଙ୍କୁ ଘେରି ଯାଇ ନିଜର ଅସନ୍ତୋଷ ଜାହିର କରିଥିଲେ । ଏହାସହ ତାଙ୍କୁ ଘୋଷଡି ନେଇ ତଳେ ପକାଇ ଦେଇଥିଲେ । ଆକ୍ରମଣର ଶିକାର ହେବା ପରେ ବିଧାୟକ ନିଜ ଗାଡିରେ ବସି ପଡ଼ି ସେଠାରୁ ଫେରି ଯାଇଥିଲେ ।

ଶେରଗଡ଼ରେ ପ୍ରଶାସନକୁ ଘେରିଲେ

କେବଳ ପୁରୁଷୋତ୍ତମପୁର ନୁହେଁ, ଶେରଗଡ଼ରେ ମଧ୍ୟ ଲୋକଙ୍କ ଅସନ୍ତୋଷ ଦେଖିବାକୁ ମିଳିଛି । ବନ୍ୟାଞ୍ଚଳ ପରିଦର୍ଶନରେ ଆସିଥିବା ଅତିରିକ୍ତ ଜିଲ୍ଲାପଳ ସଚିଦାନନ୍ଦ ନାୟକ ଏବଂ ଶେରଗଡ଼ ବିଡିଓ ତୃପ୍ତିମୟୀ ଜେନାଙ୍କ ଗାଡିକୁ ଶେରଗଡ଼ ମୁଖ୍ୟ ବଜାରରେ ଅଟକାଇଥିଲେ ଲୋକେ । ଏହାପରେ ସେଠାରେ ଏକାଠି ହୋଇଯାଇଥିଲେ ଶହ ଶହ ଉତ୍ତ୍ୟକ୍ତ ଲୋକେ । ଗୋ-ବ୍ୟାକ୍, ଗୋ-ବ୍ୟାକ୍ ଡାକରେ ପୂରା ଅଞ୍ଚଳ କମ୍ପିଥିଲା । ସ୍ଥିତି ଏମିତି ହୋଇଥିଲା ଯେ, ଦୁଇ ପ୍ରଶାସନିକ ଅଧିକାରୀ ଗାଡିରୁ ଓହ୍ଲାଇ ଉତ୍ତ୍ୟକ୍ତ ଲୋକଙ୍କ ସହ ଆଲୋଚନା କରିବାକୁ ସାହାସ ମଧ୍ୟ କରିପାରିଲେ ନାହିଁ । ଶେଷରେ ଲୋକଙ୍କ ବିରୋଧର ସମ୍ମୁଖୀନ ହୋଇ ସେଠାରୁ ଫେରି ଯିବାକୁ ବାଧ୍ୟ ହୋଇଥିଲେ ।

ବିଡିଓଙ୍କ ଗାଡି ଆଗରେ ଶୋଇଲେ

ସାନଖେମୁଣ୍ଡିରେ ମଧ୍ୟ ଦେଖିବାକୁ ମିଳିଛି ଅସନ୍ତୋଷ ।  ସାନଖେମୁଣ୍ଡି ବିଡିଓ ଜିତେନ୍ଦ୍ର କୁମାର ମିଶ୍ରଙ୍କୁ ପ୍ରବଳ ବିରୋଧର ସମ୍ମୁଖୀନ ହେବାକୁ ପଡ଼ିଛି । ଏପରିକି ତାଙ୍କ କାର ସାମ୍ନାରେ ସ୍ଥାନୀୟ ସରପଞ୍ଚଙ୍କ ପ୍ରତିନିଧି ଶୋଇଯାଇଥିଲେ । ବନ୍ୟା ସତ୍ତ୍ବେ ପ୍ରଶାସନିକ ଅଧିକାରୀଙ୍କ ଦେଖା ନମିଳିବା ପ୍ରତିବାଦରେ ଏପରି କରିଥିଲେ ସରପଞ୍ଚଙ୍କ ପ୍ରତିନିଧି । ଅର୍ଣ୍ଣବ ବାତ୍ୟା ପରେ ପ୍ରବଳ ବର୍ଷା ଯୋଗୁଁ ସବୁଠି ଜଳ ପ୍ରଳୟ ଦେଖିବାକୁ ମିଳିଛି । ସମସ୍ତ କାର୍ଯ୍ୟାଳୟ ସହ ବିଦ୍ୟାଳୟ ବନ୍ଦ ରହିଛି । ପାଣି ଥିବାରୁ ଅନେକ ବିଦ୍ୟାଳୟ, ଅଙ୍ଗନବାଡ଼ି କେନ୍ଦ୍ର ଖୋଲାଯାଇ ପାରିନି । ଲୋକଙ୍କ ବିପଦ ସମୟରେ କୌଣସି ପ୍ରଶାସନିକ ଅଧିକାରୀଙ୍କ ଦେଖାମିଳି ନଥିଲା । ଏମିତି ସ୍ଥିତିରେ ବିଡିଓଙ୍କ କାର ଆଗରେ ଶୋଇ ପ୍ରତିବାଦ ଜଣାଇଥିଲେ ସରପଞ୍ଚଙ୍କ ପ୍ରତିନିଧି ମିଥୁନ ସେଠୀ ।

ଅଣ୍ଟା ଭାଙ୍ଗିଦେଲା ଅର୍ଣ୍ଣବ ପରବର୍ତ୍ତୀ ବନ୍ୟା, ପାଣି ଛାଡ଼ିବା ପରେ ଗଞ୍ଜାମ ଜିଲ୍ଲାର ସବୁଠି ପ୍ରଳୟର ଦୃଶ୍ୟ

ନନ୍ଦିଘୋଷ ବ୍ୟୁରୋ: ଛାରଖାର କରିଦେଲେ ବାତ୍ୟା ଅର୍ଣ୍ଣବ ପରବର୍ତ୍ତୀ ଲଗାଣ ବର୍ଷା । ବନ୍ୟାରେ ଉବୁଟୁବୁ ଗଞ୍ଜାମ ଜିଲ୍ଲାରେ ଏବେ ସବୁଠି ହାହାକାର । ବର୍ଷା ଛାଡ଼ିଲା, ଅନେକ ସ୍ଥାନରୁ ପାଣି ବି କମିଲା । ହେଲେ ଜିଲ୍ଲାବାସୀଙ୍କ ଉପରେ ଅଜାଡ଼ି ଦେଇଗଲା ଅକଥନୀୟ ଯନ୍ତ୍ରଣା ଆଉ ଦୁଃଖ । ଏବେ ବି ଜଳ କଷ୍ଟରେ ଘାଣ୍ଟି ହେଉଛନ୍ତି ଅନେକ ଅଞ୍ଚଳବାସୀ । ସବୁଠି ଭଙ୍ଗା ଓ ବିଭୀଷିକାର ଚିତ୍ର । ନିଜ ଉଜୁଡ଼ି ଯାଇଥିବା ଘର ଓ ବ୍ୟବସାୟକୁ ଦେଖି ଆଖିରୁ ଲୁହ ଝରାଉଛନ୍ତି ଲୋକେ ।

୧୯୯୦ ମସିହାଠାରୁ ବଢିଗଲା ୨୦୨୬ର ବନ୍ୟା । ସରକାରଙ୍କ ଅସାବଧାନତା ଓ ଖାମଖିଆଲି ମନୋଭାବ ଯୋଗୁଁ ଦୁର୍ଦ୍ଦଶା ଭୋଗୁଛନ୍ତି ଗଞ୍ଜାମ ଜିଲ୍ଲାବାସୀ । ଆଉ ଗଞ୍ଜାମ ଜିଲ୍ଲା ପ୍ରଶାସନ କେବଳ ବୈଠକ ଉପରେ ବୈଠକ ଡାକି ବନ୍ୟା ପରିଚାଳନା ସମୀକ୍ଷା କରୁଛି । ଗଞ୍ଜାମ ଜିଲ୍ଲାର ଜଳ ବିଭୀଷିକା ସବୁ ବର୍ଗର ଲୋକଙ୍କ ମେରୁଦଣ୍ଡକୁ ଦୋହଲାଇ ଦେଇଛି । ଧାନ ଫସଲ, ପନିପରିବା ଚାଷ, ମାଛ ଓ କୁକୁଡ଼ା ଚାଷୀ ମୁଣ୍ଡରେ ହାତ ଦେଇ ବସିଛନ୍ତି । ଉଜୁଡ଼ା ଚାଷକୁ ଦେଖି କିପରି ନିଜର ପରିବାର ଚଳାଇବେ ତାକୁ ନେଇ ଚିନ୍ତାରେ ଲୋକେ । ଏହି ବନ୍ୟା ଉଜାଡ଼ି ଦେଇଛି ଅନେକଙ୍କ ହସ ଖୁସିର ସଂସାର । ପ୍ରକୃତିର ତାଣ୍ଡବରେ ଛାରଖାର ହୋଇଛି ଗଞ୍ଜାମ ଜିଲ୍ଲାର ଅନେକ ଅଞ୍ଚଳ ।

ବାତ୍ୟା ଅର୍ଣ୍ଣବ ପ୍ରଭାବରେ ଲଗାତାର ପ୍ରବଳ ବର୍ଷା ଓ ନଦୀରେ ବନ୍ୟାଜଳ ଆସିବା ଯୋଗୁଁ ଜିଲ୍ଲାରେ ସୃଷ୍ଟି ହୋଇଛି ଭୟଙ୍କର ବନ୍ୟା । ଅନେକ ଗାଁ ଜଳବନ୍ଦୀ ହୋଇଥିବା ବେଳେ ଘରଦ୍ୱାର, ରାସ୍ତାଘାଟ ସବୁକିଛି ଛାରଖାର ହୋଇଯାଇଛି । ଲୋକଙ୍କ ଆଖିରେ ଲୁହ, ମନରେ ଅସରନ୍ତି ଦୁଃଖ । ଜିଲ୍ଲାର ସୋରଡ଼ା, ଆସିକା, ଧରାକୋଟ, ପୁରୁଷୋତ୍ତମପୁର, ଚିକିଟି, ପାତ୍ରପୁର ଓ ସାନଖେମୁଣ୍ଡି ଭଳି ଅଞ୍ଚଳ ବନ୍ୟାରେ ବିଶେଷ ପ୍ରଭାବିତ ହୋଇଛି ।

ବନ୍ୟାଜଳ ଧୀରେ ଧୀରେ ହ୍ରାସ ପାଉଥିଲେ ମଧ୍ୟ ଲୋକଙ୍କ ଦୁର୍ଦ୍ଦଶା କମିନାହିଁ । ଘରକୁ ଫେରି ଭଙ୍ଗା କାନ୍ଥ, ନଷ୍ଟ ଆସବାବପତ୍ର ଓ ଉଜୁଡ଼ା ଚାଷଜମିକୁ ଦେଖି ଆଖିରୁ ଲୁହ ଝରାଉଛନ୍ତି ବିପନ୍ନ । ପ୍ରକୃତିର ଏହି କରାଳ ରୂପ ଗଞ୍ଜାମବାସୀଙ୍କ ମେରୁଦଣ୍ଡ ଭାଙ୍ଗି ଦେଇଛି । ରାସ୍ତାଘାଟ ସବୁଠି ପ୍ରଳୟଙ୍କରୀ ବନ୍ୟା ତାଣ୍ଡବ ରଚିଛି । ବାହାରେ ପଡ଼ିଛି ଲୋକଙ୍କ ଆସବାବପତ୍ରଠାରୁ ଆରମ୍ଭ କରି ଘରକରଣା ଦ୍ରବ୍ୟ । ଘର ସଫା କରି ନିଜର ଘରକରଣା ସାଉଁଟୁଛନ୍ତି ଲୋକେ ।