କଳାହାଣ୍ଡି ପରେ ବଲାଙ୍ଗୀରରେ ଭୂମିକମ୍ପ ଝଟକା । ଭୋର୍ ସକାଳ ୪ଟା ୪୦ ମିନିଟ୍ ସମୟରେ ମୃଦୁ ଭୂମିକମ୍ପ ଝଟକା ଲାଗିଛି । ଭୂମିକମ୍ପ ପରେ ଭୟର ବାତାବରଣ ଖେଳିଯାଇଛି । ପୂର୍ବରୁ ବଲାଙ୍ଗୀରରେ ଭୂମିକମ୍ପ ଝଟକା କେବେ ଅନୁଭବ ହୋଇନଥିବା ବେଳେ ଆଜି ସକାଳୁ ଭୂମିକମ୍ପ ଝଟକା ଅନୁଭବ ହେବାପରେ ଲୋକେ ଡରି ଯାଇଥିଲେ । ଗୋଟିଏରୁ ଦୁଇ ସେକେଣ୍ଡ ଧରି ଝଟକା ଅନୁଭବ ହୋଇଥିଲା । ବଲାଙ୍ଗୀର ସହର, ତୁଷୁରା ଓ ପାଟଣାଗଡ଼ ଅଞ୍ଚଳରେ ଭୂମିକମ୍ପ ଝଟକା ଅନୁଭୂତ ହୋଇଛି । ଖୋଦ୍ ବଲାଙ୍ଗୀର ଅତିରିକ୍ତ ଜିଲ୍ଲାପାଳ ରାଜସ୍ବ ପବିତ୍ର ବେହେରା ଭୋର୍ ସକାଳୁ ଭୂମିକମ୍ପ ଝଟକା ଅନୁଭବ କରିଥିବା କହିଛନ୍ତି ।

ବିଷାକ୍ତ ଦହିବରା ଖାଇ ୩୦ ଅଧିକ ଲୋକ ଅସୁସ୍ଥ। ଯାଜପୁର ଦଶରଥପୁର ବ୍ଲକ ଜୟନ୍ତରା ପଂଚାୟତ ପାଟପୁର ଗ୍ରାମରେ ଘଟିଛି ଘଟଣା। ଗତକାଲି ପାଟପୁର ଅଞ୍ଚଳରେ ଦହିବରା ଖାଇ ଅପରାହ୍ନରେ ଅସୁସ୍ଥ ହୋଇ ସମସ୍ତେ ଝାଡାବାନ୍ତିରେ ଆକ୍ରାନ୍ତ ହୋଇଥିଲେ। ପ୍ରଥମେ ସେମାନଙ୍କୁ ଦଶରଥପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ସେମାନଙ୍କ ମଧ୍ୟରୁ ଗୁରୁତରମାନଙ୍କୁ ଯାଜପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଆକ୍ରାନ୍ତଙ୍କ ମଧ୍ୟରୁ ୬ରୁ ଅଧିକ ଶିଶୁ ଅଛନ୍ତି।

ସାଲେପୁର : ଚକୋଲେଟ ଦେଇ ନିଆରା ଭାବେ ପ୍ରତିବାଦ କରୁଛନ୍ତି ବିଦ୍ୟୁତ ଉପଭୋକ୍ତା। ଏଭଳି ଦୃଶ୍ୟ ଦେଖିବାକୁ ମିଳିଛି କଟକ ଜିଲ୍ଲା ସାଲେପୁର ବ୍ଲକ ବହୁଗ୍ରାମ ବିଦ୍ୟୁତ କାର୍ଯ୍ୟାଳୟ ପରିସରରେ । ବିଦ୍ୟୁତ ବିଭାଗର ଅପରାଗତା,ମନମୁଖି କାର୍ଯ୍ୟକୁ ନେଇ ସାଲେପୁର ବ୍ଲକ ପଶ୍ଚିମ ଗଛ ଡିହ ସାହି ଗ୍ରାମର ଶତାଧିକ ବିଦ୍ୟୁତ ଉପୋଭୋକ୍ତ ମାନେ ଆଜି ସନ୍ଧ୍ୟା ସମୟରେ ବିଦୁତ କର୍ମଚାରୀ ଙ୍କୁ ଚକୋଲେଟ୍ ଦେଇ ଅଭିନବ ଭାବେ ନୀରବ ପ୍ରତିବାଦ କରିଥିଲେ। ଗତ କାଲି ବର୍ଷା ପବନ ଯୋଗୁ ବିଭିନ୍ନ ସ୍ଥାନରେ ଗଛ ପଡ଼ି ବିଦୂତ ସରବରାହ ବନ୍ଦ ଥିଲା ମାତ୍ର ବିଦୁତ ବିଭାଗର ଅପାରଗତା ଯୋଗୁ ଗ୍ରାମବାସୀ ମାନେ ଗଛ ଡାଳ ପତ୍ର ସଫା କରିଥିଲେ ସୁଦ୍ଧା ୨୪ ଘଣ୍ଟା ଧରି ଗାଁରେ ବିଦ୍ୟୁତ ସରବରାହ ବନ୍ଦ ରହିଥିଲା। ଯେତେ କହିଲେ ମଧ୍ୟ କେହି ଶୁଣି ନଥିଲେ ଗୋଟିଏ ଦିନ ପରେ ଗାଁ କୁ କରେଣ୍ଟ ଆସିଥିଲା ଯାହା ବିଦ୍ୟୁତ ବିଭାଗର ପାରିବା ପଣିଆ କୁ ପଦାରେ ପକାଇଛି ।

କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ସୁଡ୍ରା ଗ୍ରାମରେ ଅଭାବନୀୟ ଘଟଣା । ଦୀପ ନିଆଁରୁ ଘଟିଲା ବଡ଼ ଧରଣର ଅଗ୍ନିକାଣ୍ଡ । ଅଗ୍ନିକାଣ୍ଡରେ ଜଣେ ବୃଦ୍ଧା ଜୀବନ୍ତ ଦଗ୍ଧ ହୋଇଯାଇଥିବା ବେଳେ ଅଳ୍ପକେ ବର୍ତ୍ତିଲେ ଚାରି ଭାଇ । ନିଆଁରେ ପୋଡ଼ି ଦୁଇଭାଇ ଗୁରୁତର ହୋଇଥିବା ବେଳେ ଅନ୍ୟ ଦୁଇ ଭାଇ ସାମାନ୍ୟ ଆହତ ହୋଇଛନ୍ତି । କରେଣ୍ଟ ନଥିବା ଯୋଗୁଁ ଘରେ ଏକ ମହମବତି ଲଗାଇ ରାତିରେ ଶୋଇଥିଲେ ପରିବାର ଲୋକେ । କୌଣସି କାରଣ ବଶତଃ ମହମବତି ନିଆଁ ନିକଟରେ ଥିବା ପେଟ୍ରୋଲ ସଂସ୍ପର୍ଶରେ ଆସି ଅଗ୍ନିକାଣ୍ଡ ଘଟିବା ସହ ନିକଟରେ ଥିବା ଗ୍ୟାସ୍ ସିଲିଣ୍ଡର ମଧ୍ୟ ଜଳି ବଡ଼ ଧରଣର ଅଗ୍ନିକାଣ୍ଡ ଘଟିଥିବା କୁହାଯାଉଛି । ଅନ୍ୟପଟେ ସୁଡ୍ରା ଗ୍ରାମର ସୁବାସ ଚନ୍ଦ୍ର ସାହୁଙ୍କ ପରିବାର ବ୍ୟବସାୟୀ ହୋଇଥିବା ବେଳେ ତାଙ୍କ ଘର ସମେତ ଦୋକାନ ସମ୍ପୂର୍ଣ୍ଣ ଜଳି ପାଉଁଶ ହୋଇଯାଇଛି । ଅଗ୍ନିକାଣ୍ଡରେ ବୃଦ୍ଧା ମା ନାରସୁ ସାହୁଙ୍କ ମୃତ୍ୟୁ ଘଟିଥିବା ବେଳେ ଦୁଇ ଭାଇ ଗୁରୁତର ଆହତ ହୋଇଛନ୍ତି ଏବଂ ୭ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସମ୍ପତ୍ତି ନଷ୍ଟ ହୋଇଯାଇଥିବା କହିଛନ୍ତି ସୁବାସ ।

ସରିଥିଲା ବାହାଘର, ରାତିରେ ହୋଇଥାନ୍ତା ଚତୁର୍ଥୀ । ହେଲେ ଚତୁର୍ଥୀ ପୂର୍ବରୁ ବର ଘରୁ କନ୍ୟାକୁ ଉଠାଇ ଆଣିଲା ଚାଇଲଡ଼ ଲାଇନ। ପୋଲିସ ସହାୟତାରେ ଚାଇଲଡ଼ ଲାଇନ ଟିମ ନାବାଳିକାକୁ ଉଦ୍ଧାର କରି CWCରେ ହାଜର କରିଛି। CWC ପକ୍ଷରୁ ନାବାଳିକାକୁ କାଉନସେଲିଂ କରାଯାଇ ୱାନ ଷ୍ଟପ ସେଣ୍ଟରରେ ରଖାଯାଇଛି। ଘଟଣା ଘଟିଛି ନୟାଗଡ଼ ଇଟାମାଟି ଥାନା ଡେଙ୍ଗେରାଗୋଡି ଗାଁରେ ।ସୂଚନା ଅନୁଯାୟୀ ଦିଲ୍ଲୀପ କୁମାର ପରିଡା ଭାପୁର ବ୍ଲକ ଅଞ୍ଚଳର ଜଣେ ନାବାଳିକାଙ୍କୁ ବିବାହ କରି ଚତୁର୍ଥୀ ପାଇଁ ପ୍ରସ୍ତୁତି କରୁଥିବା ବେଳେ ବିଶେଷ ସୂତ୍ରରୁ ଖବର ପାଇ ଚାଇଲଡ଼ ଲାଇନ ଟିମ ଚଢ଼ାଉ କରି ନାବାଳିକାକୁ ଉଦ୍ଧାର କରିଛି। ପୋଲିସ ଏବଂ ଚାଇଲଡ଼ ଲାଇନ ଟିମ କୁ ଦେଖି ଘଟଣା ସ୍ଥଳରୁ ଅଭିଯୁକ୍ତ ଦିଲ୍ଲୀପ କୁମାର ପରିଡା ଫେରାର ହୋଇଛି। ଏହି ଘଟଣାର ତଦନ୍ତ କରାଯିବ ବୋଲି ନୟାଗଡ଼ ବ୍ଲକ CDPO କହିଛନ୍ତି। ବାଲ୍ୟ ବିବାହ ପାଇଁ ନୟାଗଡ଼ ଜିଲ୍ଲା ଚର୍ଚ୍ଚାରେ ରହିଥିବା ବେଳେ ଜଣେ ଅଙ୍ଗନ ବାଡ଼ି ହେଲପର ନିଜ ପୁଅଙ୍କୁ ଜଣେ ନାବାଳିକାଙ୍କ ବିବାହ କରିବା ଜିଲ୍ଲା ପ୍ରଶାସନ ପାଇଁ ମୁଣ୍ଡ ବ୍ୟଥା ପାଲଟିଛି।

କେନ୍ଦୁପତ୍ର ତୋଳାଳୀ ଓ କର୍ମଚାରୀ ମାନଙ୍କୁ ରାଜ୍ୟ ସରକାର ବାରମ୍ବାର ପ୍ରତାରଣା କରୁଥିବାର ଅଭିଯୋଗ ନେଇ ଆନ୍ଦୋଳନକୁ ଓହ୍ଲାଇଲେ ଓଡ଼ିଶା କେନ୍ଦୁପତ୍ର କର୍ମଚାରୀ ସଂଘ l ଗତକାଲିଠୁ କଳା ବ୍ୟାଚ ପିନ୍ଧି ବିଭିନ୍ନ ପତ୍ର ଫଡି ମାନଙ୍କରେ କେନ୍ଦୁପତ୍ର କର୍ମଚାରୀ ସଂଘ ଧାରଣା ଦେଇଥିବା ବେଳେ ଆଜିଠାରୁ କାର୍ଯ୍ୟବନ୍ଦ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି l ସବୁଠାରୁ ବଡ଼କଥା ହେଲା ପୂର୍ବ ସରକାର କେନ୍ଦୁପତ୍ର ତୋଳାଳୀ ଓ କର୍ମଚାରୀ ମାନଙ୍କୁ ପ୍ରତିବର୍ଷ ଏପ୍ରିଲ ମାସରେ ବୋନସ ଦେଉଥିବା ବେଳେ ବିଜେପି ସରକାର ଏ ପର୍ଯ୍ୟନ୍ତ ବୋନସ ଘୋଷଣା କରିନାହାନ୍ତି ଯାହାକୁ ତୀବ୍ର ବିରୋଧ କରିଛନ୍ତି କେନ୍ଦୁପତ୍ର କର୍ମଚାରୀ ସଂଘ ସଭାପତି ବିଜୟ ମହାନ୍ତି l ଅନ୍ୟପଟେ କନ୍ୟା ବିବାହ ସହାୟତା ସହ ଅନ୍ୟ ସୁବିଧା ସୁଯୋଗ ଦେବାରେ ରାଜ୍ୟ ସରକାର ବିଫଳ ବୋଲି କହିଛନ୍ତି କେନ୍ଦୁପତ୍ର କର୍ମଚାରୀ ସଂଘ ସାଧାରଣ ସମ୍ପାଦକ ସଂଜିତ ମହାନ୍ତି

ଯାଜପୁର : ଜିଲ୍ଲା ମୁଖ୍ୟ ଚିକିତ୍ସାଳୟର ପ୍ରସୂତି ବିଭାଗରେ ନବଜାତ ଶିଶୁ ଜନ୍ମ ପରେ ଉତ୍ତେଜନା। ଚିକିତ୍ସା ଅବହେଳାରୁ ଶିଶୁ ଗୁରୁତର ହୋଇଥିବା ପୀଡ଼ିତାଙ୍କ ପରିବାର ପକ୍ଷରୁ ଅଭିଯୋଗ ହୋଇଛି। ଭଣ୍ଡାରିପୋଖରୀ ବ୍ଲକ କୁମ୍ଭାରିଆ ଗ୍ରାମର କୈଳାସ ଚନ୍ଦ୍ର ଓଝାଙ୍କ ପତ୍ନୀ ରଶ୍ମିତା ସୁତାରଙ୍କୁ ପ୍ରସୂତି ବିଭାଗରେ ଭର୍ତ୍ତି କରାଯାଇଥିଲା l ରଶ୍ମିତାଙ୍କ ଅପରେସନ ପରେ ଶିଶୁ ଜନ୍ମ ହୋଇଥିଲା l ଶିଶୁ ଜନ୍ମ ନେବା ପରେ ଗୁରୁତର ଥିବାରୁ ଯାଜପୁର ଶିଶୁ ବିଭାଗର ଆଇସିୟୁରେ ଭର୍ତ୍ତି କରାଯାଇଥିଲା। ଅବସ୍ଥା ଅଧିକ ଜଟିଳ ହେବାରୁ ଶିଶୁକୁ କଟକ ଶିଶୁଭବନକୁ ରେଫର କରିଥିଲେ ଡାକ୍ତର l ଶିଶୁ ଜନ୍ମ ପରେ ପରିବାର ଲୋକଙ୍କୁ ନ ଦେଖାଇ କଟକ ନେଇଯିବାକୁ କହିବାରୁ ମେଡିକାଲ ପରିସରରେ ଉତ୍ତେଜନା ଦେଖାଦେଇଥିଲା l ଦୀର୍ଘ ସମୟ ଧରି ଉତ୍ତେଜନା ଲାଗିରହିବା ପରେ ଘଟଣାସ୍ଥଳରେ ଯାଜପୁର ପୋଲିସ ପହଂଚି ବୁଝାସୁଝା କରିଥିଲେ l ପରେ ଶିଶୁକୁ କଟକ ସ୍ଥାନାନ୍ତର କରାଯାଇଥିଲା l ଡାକ୍ତରଙ୍କ ଚିକିତ୍ସା ଅବହେଳା ଅଭିଯୋଗ କରି ଉତେଜନା ସୃଷ୍ଟି କରିଥିଲେ ପରିବାର ଲୋକେ l ଅନ୍ୟପଟେ ଚିକିତ୍ସାରେ କୌଣସି ଅବହେଳା ହୋଇନଥିବା କହିଛନ୍ତି ଚିକିତ୍ସା ଅଧିକାରୀ। ଶିଶୁକୁ ସଠିକ ଚିକିତ୍ସା ଦିଆଯାଇଥିବା ସେ କହିଛନ୍ତି।