ଭୁବନେଶ୍ବର : ରାଜ୍ଯ ସରକାରଙ୍କୁ ଶିକ୍ଷକ ଆଶାୟୀ ସଂଘର ଅଲ୍ଟିମେଟମ । ଜୁନ ୨୨ ସୁଦ୍ଧା ନୂତନ ଶିକ୍ଷକ ପଦବୀ ପୂରଣ ପାଇଁ ବିଜ୍ଞାପନ ପ୍ରକାଶ କରିବାକୁ ଦେଲା ମହଲତ । ୪ ଦିନ ଭିତରେ ବିଜ୍ଞାପନ ପ୍ରଶା ନପାଇଲେ ୨୫ରୁ ରାଜରାସ୍ତାରେ ଆମରଣ ଅନଶନ କରିବେ ଦେଢ଼ ଲକ୍ଷ ଆଶାୟୀ । ଏ ନେଇ ଭୁବନେଶ୍ୱର ରେ ସାମ୍ବାଦିକ ସମ୍ମିଳନୀରେ ସୂଚନା ଦେଇ କହିଛନ୍ତି ଅଲ ଓଡିଶା ଶିକ୍ଷକ ଆଶାୟୀ ସଙ୍ଘ । ବର୍ତ୍ତମାନ ସୁଦ୍ଧା ଯେଉଁ ୨୬ ହଜାର ଶିକ୍ଷକ ନିଯୁକ୍ତି ହୋଉଛି ଏହା ପୂର୍ବ ସରକାରଙ୍କ ସମୟରେ ବିଜ୍ଞାପନ ପ୍ରକାଶ ପାଇଥିଲା । ନୂଆ ସରକାର ଏହି ନିଯୁକ୍ତି ଦେଇ ବାହାବା ନେବାକୁ ଚେଷ୍ଟା କରୁଛନ୍ତି l ରାଜ୍ୟରେ ଏକ ଲକ୍ଷ ୨୦ ହଜାର ଶିକ୍ଷକ ଆଶାୟୀ କ୍ବାଲିଫାଏ କରିଥିବା ବେଳେ OTET ଓ OSSTET ପରୀକ୍ଷା ଦେଇ ନିଯୁକ୍ତି ପାଇବା ଆଶାରେ ଅପେକ୍ଷାରେ ରହିଛନ୍ତି । ପ୍ରତିବର୍ଷ ୧୫ ହଜାର ଲେଖାଏଁ ଶିକ୍ଷକ ନିଯୁକ୍ତି କରିବେ ଓ ୩ ବର୍ଷ ରେ ୪୫ ହଜାର ଶିକ୍ଷକ ନିଯୁକ୍ତି ନେଇ ଘୋଷଣା କରିଥିଲେ ବିଜେପି ସରକାର । ରାଜ୍ୟର ବିଭିନ୍ନ ହାଇସ୍କୁଲରେ ୧୨ ହଜାର ଶିକ୍ଷକ ପଦବୀ ଖାଲି ଥିବା ବେଳେ ଆସିଷ୍ଟାଣ୍ଟ ଶିକ୍ଷକ ପାଇଁ ୧୫ ହଜାର ଶିକ୍ଷକ ପଦବୀ ଖାଲି ରହିଛି । ସେହିପରି ଓଡ଼ିଶା ଆଦର୍ଶ ବିଦ୍ୟାଳୟରେ ଏକ ହଜାର ୮୩୧ ପଦବୀ ଖାଲି ରହିଛି । ଏହି ପଦବୀରେ ନିଯୁକ୍ତି ପାଇଁ ଜୁନ ୨୨ ତାରିଖ ଭିତରେ ବିଜ୍ଞପ୍ତି ପ୍ରକାଶ କରିବାକୁ ମହଲତ ଦେଇଛି ସଂଘ ।

ଜୟପୁର : ଭିତ୍ତିଭୂମି ଯୋଗାଇଥିଲେ ପୂର୍ବ ସରକାର । ଲାଭ ପାଉଛନ୍ତି କୋରାପୁଟର କ୍ରୀଡ଼ାବିତ । ଜିମ୍ନାଷ୍ଟିକ ପାଇଁ ମିଳୁଛି ପ୍ରଶିକ୍ଷଣ ଓ ଅଭ୍ୟାସର ସୁଯୋଗ । ରାଜ୍ଯ ତଥା ରାଜ୍ଯ ବାହାରେ ଖେଳି ଆଣୁଛନ୍ତି ସୁନାମ । କୋରାପୁଟ ଜିଲ୍ଲାର ଗ୍ରାମାଞ୍ଚଳ ଖେଳାଳିଙ୍କ ଉନ୍ନତି ପାଇଁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜୟପୁର ସହରରେ ଶହ କୋଟି ଟଙ୍କା ବ୍ୟୟରେ ଏକ ସ୍ପୋର୍ଟ କମ୍ପ୍ଲେସ୍କ୍ ନିର୍ମାଣ କରିଥିଲେ । ସେଥିରେ ଜିମ୍ନାଷ୍ଟିକ ଭଳି ଖେଳକୁ ପ୍ରାଧାନ୍ୟ ଦିଆଯ଼ାଇଥିଲା । ଇଣ୍ଡୋର ଷ୍ଠାଡିୟମରେ ଅନେକ ଖେଳାଳି ଅଭ୍ୟାସ କରିବା ସହ ପାଉଛନ୍ତି ପ୍ରଶିକ୍ଷଣ । ଉନ୍ନତ ବ୍ଯବସ୍ଥା ଯୋଗୁଁ ଜିମ୍ନାଷ୍ଟିକ ପ୍ରତି ବଢୁଛି ଖେଳାଳିଙ୍କ ଆଗ୍ରହ । ପ୍ରତି ବର୍ଷ ସମର କ୍ଯାମ୍ପ ମାଧ୍ୟମରେ ୫ ବର୍ଷରୁ ୧୦ ବର୍ଷ ମଧ୍ୟରେ ବହୁ କ୍ରିଡାବିତ୍ ଏଥାରେ ପ୍ରଶିକ୍ଷଣ ପାଉଛନ୍ତି । ଏଥିପାଇଁ ୪ ଜଣ ପ୍ରଶିକ୍ଷକ ନିଯୁକ୍ତି ପାଇଛନ୍ତି । ଗତ ୩ ବର୍ଷ ମଧ୍ୟରେ ଅନେକ ଖେଳାଳି ଏଠାରୁ ରାଜ୍ଯ ତଥା ରାଜ୍ଯ ବାହାରେ ଖେଳି ସୁନାମ ଅର୍ଜନ କରିଛନ୍ତି । ଏଥିପାଇଁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି ଖେଳାଳି ।
୨୦୨୩ରେ ଭିତ୍ତିଭୁମି ନିର୍ମାଣ ପରେ ୨୦୨୪ରୁ ଏଠାରେ ଦିଆଯ଼ାଉଛି କୋଚିଂ। ଚଳିତବର୍ଷ ସମର କ୍ୟାମ୍ପରେ ୧୬୦ ଜଣ ଖେଳାଳି ଯୋଗ ଦେଇଛନ୍ତି । ଏହାସହ ନିୟମିତ ଭାବେ ୭୦ ଜଣ ଖେଳାଳି କୋଚିଂ ନେଉଛନ୍ତି । କ୍ୟାମ୍ପରେ ଜୟପୁର ତହସିଲଦାର ଯ଼ୋଗଦେଇ କ୍ରିଡାବିତଙ୍କୁ ଉତ୍ସାହିତ କରିଛନ୍ତି । ଆଗାମୀ ଦିନରେ ଜିମ୍ନାଷ୍ଟିକରେ କୋରାପୁଟ ଜିଲ୍ଲା ଏକ ସ୍ବତନ୍ତ୍ର ସ୍ଥାନ ପାଇବ ବୋଲି କହିଛନ୍ତି କ୍ରୀଡ଼ାବିତ୍ ।

ସମ୍ବଲପୁର : ସଜେଇ ହେଲେଣି ଭୋଳାବାବା । ପ୍ରସ୍ତୁତ ବରଯାତ୍ରୀ । ଦେବୀ ପାର୍ବତୀଙ୍କ ସହ ହେବ ମହାଦେବଙ୍କ ବିବାହ । ବରଯାତ୍ରୀରେ ସାମିଲ ଦେବତା, ଦାନବ, ମାନବ, ଯକ୍ଷ, ଗନ୍ଧର୍ବ, କିନ୍ନରଙ୍କ ସହ ସମସ୍ତ ଜୀବଯନ୍ତୁ । ଶିବ-ପାର୍ବତୀଙ୍କ ଏହି ଦୁଲ୍ଲଭ ପରିଣୟ ଦେଖିବାକୁ ସଭିଏଁ ବ୍ଯାକୁଳ । ସମ୍ବଲପୁର ବୁଢ଼ାରଜା, ନନ୍ଦପଡ଼ା, ମୁଦିପଡା, ଝାଡୁଆପଡ଼ା, ବଡ଼ବଜାର, ଠାକୁରପଡ଼ା ଯାତ୍ରା କମିଟି ସହ ସମସ୍ତ ମନ୍ଦିରରେ ଜୋରଦାର ପ୍ରସ୍ତୁତି । ବିଶାଳ ପଟୁଆରରେ ବରଯାତ୍ରୀଙ୍କୁ ସାଙ୍ଗରେ ନେଇ ଦେବୀ ପାର୍ବତୀଙ୍କ ପିତ୍ରାଳୟ ଯିବେ ଭୋଳା ଶଙ୍କର । ବିବାହ ପୂର୍ବରୁ ବର ପିତା ଏବଂ କନ୍ୟା ପିତାଙ୍କ ଘରେ ସରିଛି ହଳଦୀ । ବାଜା, ବାଣ, ରୋଷଣୀରେ କମ୍ପିଲାଣି ସାରା ସମ୍ବଲପୁର ସହର ।
ଶୀତଳ ଷଷ୍ଠୀ ଯାତ୍ରାର ମୁଖ୍ୟ ଆକର୍ଷଣ ଦେବ ବିବାହ ଏବଂ ଶୋଭାଯାତ୍ରା । ଯେଉଁଥିରେ ସାମିଲ ହୋଇଛନ୍ତି ହଜାର ହଜାର କଳାକାର । ପାରମ୍ପରିକ ନାଚ ସହ ବିଭିନ୍ନ ବେଶଭୂଷାରେ ନୃତ୍ୟ କରିବେ ଶ୍ରଦ୍ଧାଳୁ । ଯାତ୍ରାର ମୁଖ୍ୟ ଆକର୍ଷଣ ରହିବ କିନ୍ନରଙ୍କ ଶୋଭାଯାତ୍ରା । ଏଥିପାଇଁ ରାଜ୍ଯ ତଥା ରାଜ୍ଯ ବାହାର କିନ୍ନର ଏକାଠି ହୋଇଛନ୍ତି । ବିବାହ ପୂର୍ବରୁ ବର ଓ କନ୍ୟାଙ୍କ ଘରେ ଜମିଥିଲା ତେଲ ହଳଦୀ । ଦେବ ବିବାହର ଏହି ଦୁଲ୍ଲଭ କାର୍ଯ୍ଯକ୍ରମରେ ଯୋଗଦେଇ ନିଜକୁ ଧନ୍ୟ ମନେ କରିଥିଲେ ସମ୍ପର୍କୀୟ, ବନ୍ଧୁବାନ୍ଧବ । ମାତାଙ୍କୁ ହଳଦୀ ଦେବା ସହ ନିଜେ ହଳଦୀଖେଳି ଖୁସି ମନାଇଥିଲେ ସଭିଏଁ । ମଧ୍ୟରାତ୍ରୀରେ ଦେବ ବିବାହ ସରିବା ପରେ ଆସନ୍ତାକାଲି ନବ ଦମ୍ପତିଙ୍କୁ ଦର୍ଶନ କରିବେ ଶ୍ରଦ୍ଧାଳୁ । ସଂଧ୍ୟାରେ ନଗର ଭ୍ରମଣରେ ବାହାରିବେ ଦେବ ଦମ୍ପତି । ଦୁଇଦିନ ନଗର ଭ୍ରମଣ ପରେ ୨୦ ତାରିଖରେ ହେବ ମନ୍ଦିର ପ୍ରବେଶ । ଏଥିପାଇଁ ଜିଲ୍ଲା ପ୍ରସାସନ ପକ୍ଷରୁ କରାଯାଇଛି ସମସ୍ତ ବ୍ଯବସ୍ଥା ।

ଭୁବନେଶ୍ବର : ବାଲିଅନ୍ତାରୁ ବାରଙ୍ଗ, ମୋରଡ଼ାରୁ ମଞ୍ଚେଶ୍ୱର । ନିନ୍ଦା ମୁଣ୍ଡାଉଛି ପୋଲିସ, ବଦନାମ ହେଉଛି ଖାକି । ବେଦରଦି ବର୍ଦ୍ଦିରେ ଲାଗୁଛି ବର୍ବରତାର ଦାଗ । ଭଲକରି ଚିହ୍ନି ରଖନ୍ତୁ ଏ ଦୁଇ ବାବୁଙ୍କୁ । ଇଏ ହେଉଛନ୍ତି ରାଜେଶ କୁଲୁ । ମଞ୍ଚେଶ୍ୱର ଥାନାର ASI। ଆଉ ଇଏ ହେଉଛନ୍ତି ଜ୍ୟୋତିରଞ୍ଜନ ବେହେରା । ମଞ୍ଚେଶ୍ୱର ଥାନାର ହୋମଗାର୍ଡ । ଏକ ଠକେଇ କେସରେ ୨ଟି ସିଜ ମୋବାଇଲକୁ ମୁକୁଳାଇବା ପାଇଁ ପୂର୍ବରୁ ୩୦ ହଜାର ଓ ଗତକାଲି ୨୦ ହଜାର ଲାଞ୍ଚ ନେଉଥିବା ବେଳେ ଏହି ୨ କରିତକର୍ମାଙ୍କୁ କାବୁ କରିଥିଲା ଭିଜିଲାନ୍ସ । ଦୁହିଁଙ୍କୁ ଆଜି ଭୁବନେଶ୍ୱର ଡିଭିଜନ ପକ୍ଷରୁ ଗିରଫ କରାଯାଇଥିବା ବେଳେ ସେପଟେ ଚାକିରୀରୁ ASI ଜଣଙ୍କୁ ବହିଷ୍କୃତ କରାଯାଇଛି । ଜ୍ୟୋତିରଞ୍ଜନ ଓ ଲାଞ୍ଚ କାରବାରର ମାଷ୍ଟରମାଇଣ୍ଡ ଅବଦୁଲ ସର୍ଫରାଜଙ୍କୁ ଏକ ମାସ ଭିତରେ ପକ୍ଷ ରଖିବା ପାଇଁ ନୋଟିସ୍ ଦିଆଯାଇଛି ।
ପିପୁଲସ ଫ୍ରେଣ୍ଡଲି ହେବାକୁ ସଦାସର୍ବଦା ପ୍ରାଧାନ୍ୟ ଦେଇଛନ୍ତି DGP । କିନ୍ତୁ ବୟାନ ଓ ବାସ୍ତବତା ଭିତରେ ରହୁଛି ଅନେକ ତଫାତ । କେବଳ ଲାଞ୍ଚ ନେବା ନୁହେଁ, ବର୍ବରତା ପାଇଁ ମଧ୍ୟ ମାନବାଧିକାର କମିଶନରେ ପୋଲିସ ବିରୋଧରେ ଗଡୁଛି ସର୍ବାଧିକ ମାମଲା । OHRCରେ ନ୍ୟାୟ ଅପେକ୍ଷାରେ ବର୍ତ୍ତମାନ ୧୫ ହଜାରରୁ ଉର୍ଦ୍ଧ୍ବ ମାମଲା ଗଡୁଥିବା ବେଳେ ସେଥିମଧ୍ୟରୁ ୯ ହଜାର କେବଳ ପୋଲିସ ବିରୋଧରେ । ସେଥିମଧ୍ୟରୁ ଅନେକ ହାଜତ ମୃତ୍ୟୁ ମାମଲା ମଧ୍ୟ ରହିଛି । କମିଶନରେଟ ପୋଲିସରେ ମଧ୍ୟ ସମଦଶା ଦେଖିବାକୁ ମିଳିଛି । ବିଗତ ୮ ବର୍ଷରେ କମିଶନରେଟ ପୋଲିସର ୧୧୦ ରୁ ଉର୍ଦ୍ଧ୍ବ କେସ ଏବେ ମାନବାଧିକାର କମିଶନଙ୍କ ବିଚାରାଧୀନ ରହିଛି । ସେପଟେ ନୟାଗଡ଼ ଜିଲ୍ଲା ଶରଣକୁଳ ଥାନା ଆଇଆଇସି ସୁଜିତ ଦାସଙ୍କ ବିରୋଧରେ ଜଣେ ମହିଳା ସଙ୍ଗିନ ଅଭିଯୋଗ ଆଣିବା ପରେ ତାଙ୍କ ବିରୋଧରେ ମାମଲା ରୁଜୁ ସହ ତାଙ୍କୁ ଜିଲ୍ଲା ମୁଖ୍ୟାଳୟକୁ ବଦଳି କରାଯାଇଛି ।