ନନ୍ଦିଘୋଷ ବ୍ୟୁରୋ : ମଣିପୁରରେ ଭୟଙ୍କର ମଦମୃତ୍ୟୁ । ବିଷାକ୍ତ ମଦ ପିଇ ପ୍ରାଣ ହରାଇଲେଣି ୧୫ ଜଣ। ୬୦୦ରୁ ଅଧିକ ଅସୁସ୍ଥ ହୋଇ ବିଭିନ୍ନ ହସ୍ପିଟାଲରେ ହୋଇଛନ୍ତି ଭର୍ତ୍ତି। ମଣିପୁରର ଚାନ୍ଦେଲ ଜିଲ୍ଲାରେ ଘଟିଥିବା ମଦମୃତ୍ୟୁ ଘଟଣାରେ ବର୍ତ୍ତମାନ ସୁଦ୍ଧା ଗଲାଣି ୧୫ ଜୀବନ। ଅନେକ ଲୋକ ମୃତ୍ୟୁ ସହ ସଂଘର୍ଷ କରୁଥିବା ସୂଚନା ମିଳିଛି। ଅସୁସ୍ଥ ଲୋକଙ୍କ ଚିକିତ୍ସା ଲାଗି ସ୍ବତନ୍ତ୍ର ଡାକ୍ତରୀ ଟିମ ନିୟୋଜିତ ହୋଇଛନ୍ତି । ସିଜା ହସ୍ପିଟାଲରେ ୩୪୭ ଜଣ, ରିଜିଓନାଲ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସେସରେ ୧୫୩ ଜଣ, ଜବାହାରଲାଲ ନେହରୁ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସେସରେ ୭୪ ଓ ବାବିନା ହସ୍ପିଟାଲରେ ୭୪ ଜଣଙ୍କ ଚିକିତ୍ସା ଚାଲିଛି। ଅସୁସ୍ଥଙ୍କ ସଂଖ୍ୟା ଅଧିକ ହେବ ବୋଲି ଆଶଙ୍କା କରାଯାଉଛି। ଅସୁସ୍ଥ ବ୍ୟକ୍ତିମାନଙ୍କ ଜରୁରୀକାଳୀନ ଚିକିତ୍ସା ଜାରି ରହିଥିଲେ ବି ଅନେକଙ୍କ ଅବସ୍ଥା ଗୁରୁତର ରହିଛି। ବିଷାକ୍ତ ମଦମୃତ୍ୟୁ ଘଟଣାର ତଦନ୍ତ ଜାରି ରହିଛି ।

