କଟକ: ସାଲେପୁର ନିଶ୍ଚିନ୍ତକୋଇଲି ସୁକରପଡାରେ ଅଭାବନୀୟ ଘଟଣା । ପୋଖରୀରରେ ବୁଡ଼ି ଦୁଇ ଭଉଣୀଙ୍କ ମୃତ୍ୟୁ ହୋଇଛି । ଗାଧୋଇବା ବେଳେ ବୁଡିଯାଇଥିଲେ ଦୁଇ ଭଉଣୀ । ମୃତ ଦୁଇ ନାବାଳିକା ହେଲେ ସେହି ଗ୍ରାମର ଲିପସିତା ପଣ୍ଡା ଓ ଇପସିତା ପଣ୍ଡା । ଲିପସିତାଙ୍କୁ ୯ ବର୍ଷ ହୋଇଥିବା ବେଳେ ଇପସିତାଙ୍କ ବୟସ ୫ବର୍ଷ । ଏକାଠି ପୋଖରୀରେ ଗାଧୋଉଥିବା ବେଳେ ବୁଡ଼ି ଯାଇ ଉଭୟଙ୍କ ମୃତ୍ୟୁ ହୋଇଛି ।
ରାଜ୍ୟରେ ଆଉ ୨ କୋଭିଡ୍ ସଂକ୍ରମିତ ଚିହ୍ନଟ, ସବ୍ ଭ୍ୟାରିଆଣ୍ଟ BA.2 ଦ୍ବାରା ଆକ୍ରାନ୍ତ
ଭୁବନେଶ୍ବର: ରାଜ୍ୟରେ ଚିହ୍ନଟ ହେଲେ ଆଉ ୨ ଜଣ କୋଭିଡ୍ ସଂକ୍ରମିତ। ଏ ପର୍ଯ୍ୟନ୍ତ ରାଜ୍ୟରେ ୪୮ ଜଣ ପଜିଟିଭ ଚିହ୍ନଟ ହୋଇଛନ୍ତି । ତେବେ ଆକ୍ରାନ୍ତଙ୍କ ମଧ୍ୟରୁ କେହି ମେଡିକାଲରେ ଭର୍ତ୍ତି ହୋଇନାହାନ୍ତି। ସମସ୍ତେ ଓମିକ୍ରନ ସବ୍ ଭ୍ୟାରିଆଣ୍ଟ BA.2 ଦ୍ବାରା ଆକ୍ରାନ୍ତ ହୋଇଛନ୍ତି। ଏ ସଂପର୍କରେ ଜନସ୍ବାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର ସୂଚନା ଦେଇଛନ୍ତି।
ରାଜ୍ୟରେ ଦୁଇଟି ଟିକା ନେବା ପରେ ଲୋକଙ୍କ ଭିତରେ ହାଇବ୍ରିଡ ଇମ୍ୟୁନିଟି ସୃଷ୍ଟି ହୋଇଛି। ସଚେତନତା ବି ବଢ଼ିଛି। ରାଜ୍ୟରେ ପ୍ରତି ଜିଲ୍ଲା ହସପିଟାଲରେ ଅକ୍ସିଜେନ୍ ପ୍ଲାଣ୍ଟ ସ୍ଥାପନ କରାଯାଇଛି। କୋଭିଡର ଆଉ ଏକ ଲହର ଆସିଲେ ମୁକାବିଲା ପାଇଁ ରାଜ୍ୟ ସରକାର ପ୍ରସ୍ତୁତ ରହିଛନ୍ତି। ଆବଶ୍ୟକ ଔଷଧ ମଧ୍ୟ ମହଜୁଦ ରହିଥିବା ଜନସ୍ବାସ୍ଥ୍ୟ ନିର୍ଦ୍ଦେଶକ କହିଛନ୍ତି।
ବାଂଲାଦେଶକୁ ୨-୦ରେ ପରାସ୍ତ କରି ସିରିଜ୍ ଜିତିଲା ଭାରତ
ଢାକା: ବାଂଲାଦେଶ ବିରୋଧରେ ସିରିଜ୍ ଜିତିଲା ଟିମ୍ ଇଣ୍ଡିଆ । ମୀରପୁର ଟେଷ୍ଟରେ ଭାରତ ୩ ଓ୍ୱିକେଟରେ ବିଜୟୀ ହୋଇଛି । ଏହି ବିଜୟ ସହ ଭାରତ ଏହି ସିରିଜକୁ ୨-୦ରେ ନିଜ ନାମରେ କରିଛି । ଦ୍ୱିତୀୟ ଟେଷ୍ଟକୁ ଜିତିବାକୁ ଭାରତ ଆଗରେ ୧୪୫ ରନର ବିଜୟ ଲକ୍ଷ୍ୟ ରହିଥିଲା । ଭାରତ ଏହି ଲକ୍ଷ୍ୟକୁ ୭ ଓ୍ୱିକେଟ ହରାଇ ନିଜ ନାମରେ କରିଥିଲା ।
ଢାକାରେ ଖେଳାଯାଇଥିବା ଏହି ମ୍ୟାଚରେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ବାଂଲାଦେଶ । ପ୍ରଥମ ବ୍ୟାଟିଂ କରି ପ୍ରଥମ ଇନିଂସରେ ବାଂଲାଦେଶ ମାତ୍ର ୨୨୭ ରନ କରି ଅଲଆଉଟ ହୋଇଥିଲା । ତେବେ ଭାରତ ପ୍ରଥମ ଇନିଂସରେ ୩୧୪ ରନ କରିଥିଲା । ଯାହାଫଳରେ ଭାରତ ପ୍ରଥମ ଇନିଂସରେ ୮୭ ରନ ଆଗରେ ରହିଥିଲା । ତେବେ ଦ୍ୱିତୀୟ ଇନିଂସରେ ବାଂଲାଦେଶ ମାତ୍ର ୨୩୧ ରନ କରି ଅଲଆଉଟ ହୋଇଥିଲା । ଯାହାଫଳରେ ଭାରତ ସାମ୍ନାରେ ୧୪୫ ରନର ବିଜୟ ଲକ୍ଷ୍ୟ ରହିଥିଲା ।
୧୪୫ ରନର ବିଜୟ ଲକ୍ଷ୍ୟ ନେଇ ପଡ଼ିଆ ଓହ୍ଲାଇଥିବା ଭାରତ ଆରମ୍ଭରୁ ବ୍ୟାଟିଂ ବିପର୍ଯ୍ୟୟର ସାମ୍ନା କରିଥିଲା । କିନ୍ତୁ ଶ୍ରେୟସ ଆୟର ଓ ରବିଚନ୍ଦ୍ରନ ଅଶ୍ୱିନୀଙ୍କ ଦମଦାର ବ୍ୟାଟିଂ ଫଳରେ ଭାରତ ଏହି ମ୍ୟାଚ ଜିତିବାରେ ସଫଳ ହୋଇଛି । ତେବେ ଏହି ମ୍ୟାଚରେ ଅଲରାଉଣ୍ଡ ପ୍ରଦର୍ଶନ ପାଇଁ ରବିଚନ୍ଦ୍ରନ ଅଶ୍ୱିନୀଙ୍କୁ ମ୍ୟାନ ଅଫ ଦି ମ୍ୟାଚ ପୁରସ୍କାର ଦିଆଯାଇଥିବାବେଳେ ଚେତେଶ୍ୱର ପୂଜାରାଙ୍କୁ ପ୍ଲେୟାର ଅଫ ଦି ସିରିଜ୍ ପୁରସ୍କାର ପ୍ରଦାନ କରାଯାଇଥିଲା ।
ତୁନିଷ ଶର୍ମାଙ୍କ ଆତ୍ମହତ୍ୟା ଘଟଣାରେ ପୁରୁଷ ବନ୍ଧୁ ସେଜାନ ମହମ୍ମଦ ଗିରଫ
ମୁମ୍ବାଇ: ଟିଭି ଅଭିନେତ୍ରୀ ତୁନିଷା ଶର୍ମା ଆତ୍ମହତ୍ୟା ଘଟଣାରେ ଅଭିନେତା ସେଜାନ ମହମ୍ମଦ ଖାନଙ୍କୁ ଗିରଫ କଲା ପୋଲିସ । ସେଜାନଙ୍କ ବିରୋଧରେ ମାମଲା ରୁଜୁ ହେବା ପରେ ତାଙ୍କୁ ଗିରଫ କରାଯାଇଛି । ଦୁହିଁଙ୍କ ମଧ୍ୟରେ ପ୍ରେମ ସମ୍ପର୍କ ଥିବାବେଳେ ଗତ ୧୫ ଦିନ ତଳେ ବ୍ରେକ-ଅପ୍ ହୋଇଥିବା ସୂଚନା ମିଳିଛି ।
ଆଜି ମୁମ୍ବାଇର ଜେ. ଜେ. ହସ୍ପିଟାଲରେ ତୁନିଷାଙ୍କ ପୋଷ୍ଟମର୍ଟମ ହୋଇଛି । ଅଭିନେତ୍ରୀଙ୍କ ମା’ଙ୍କ ପକ୍ଷରୁ ଏଫଆଇଆର ରୁଜୁ ପରେ ସେଜାନଙ୍କୁ ପୋଲିସ ଗିରଫ କରିଥିଲା । ଆଲିବାବା ଦୋସ୍ତାନା ଇ କାବୁଲରେ ଅଭିନୟ କରିଥିବା ତୁନିଷା ମୁମ୍ବାଇରେ ଏକ ସୁଟିଂ ସେଟରେ ଆତ୍ମହତ୍ୟା କରିଥିଲେ । ତାଙ୍କୁ ହସ୍ପିଟାଲକୁ ନିଆଯାଇଥିଲେ ମଧ୍ୟ ଡାକ୍ତର ମୃତ ଘୋଷଣା କରିଥିଲେ ।
ଅଭିନେତା ଶିବିନ ନାରଙ୍ଗଙ୍କ ସହ ସେ ଏକ ମ୍ୟୁଜିକ ଭିଡିଓ ସୁଟିଂ କରିବାର କାର୍ଯ୍ୟକ୍ରମ ଥିଲା । ଫିତୁର ଓ ବାର ବାର ଦେଖୋ ଫିଲ୍ମରେ ସେ ଅଭିନୟ କରିଥିଲେ । ଇଣ୍ଟରନେଟଓ୍ବାଲା ଲଭ, ଇସ୍କ ସୁଭାଲ୍ଲା, ଗାଏବ, ସେର ଇ ପଞ୍ଜାବ ମହାରାଜ ରଞ୍ଜିତ ସିଂ ଆଦି ସୋ’ରେ ଅଭିନୟ କରି ଚର୍ଚ୍ଚିତ ଥିଲେ । ମୃତ୍ୟୁବେଳକୁ ତାଙ୍କୁ ମାତ୍ର ୨୦ ବର୍ଷ ହୋଇଥିଲା ।
ଆଜିଠୁ କରୋନା ଆକ୍ରାନ୍ତ ଓ ମୃତକଙ୍କ ଡାଟା ନଦେବାକୁ ଘୋଷଣା କରିଛି ଚୀନ
ବେଜିଂ: ଚୀନରେ କରୋନା ବିସ୍ଫୋରଣ । କୋଟି କୋଟି ଲୋକ ଦୈନିକ ଆକ୍ରାନ୍ତ ହେଉଥିବା ବେଳେ ମୃତ୍ୟୁ ସଂଖ୍ୟା ବି ରେକର୍ଡ କରିଛି । ମହାମାରୀ ଭୟଙ୍କର ହେଉଥିବା ବେଳେ ଆଜିଠୁ କରୋନା ଆକ୍ରାନ୍ତ ଓ ମୃତକଙ୍କ ଡାଟା ନଦେବାକୁ ଘୋଷଣା କରିଛି ଚୀନର ନ୍ୟାସନାଲ ହେଲଥ କମିଶନ । ଚାଇନିଜ ସେଣ୍ଟର ଫର ଡିଜିଜ କଣ୍ଟ୍ରୋଲ ପକ୍ଷରୁ କରୋନା ସଂକ୍ରାନ୍ତ ରିପୋର୍ଟ ପ୍ରକାଶ ପାଇବ ।
ଗତ ୨୪ ଘଣ୍ଟାରେ ୩ କୋଟିରୁ ଅଧିକ ଲୋକ ଆକ୍ରାନ୍ତ ହୋଇଥିବା ବେଳେ ହଜାର ହଜାର ଲୋକଙ୍କ ମୃତ୍ୟୁ ହେଉଛି । ହସପିଟାଲରେ ବେଡ୍ ସହିତ ଔଷଧର ଅଭାବ ଦେଖାଯାଉଛି । ଟେଷ୍ଟିଂ କ୍ଷେତ୍ରରେ ନାନା ପ୍ରକାର ସମସ୍ୟା ସୃଷ୍ଟି ହେବା ସହ ଟ୍ରାକିଂ କରିବା ସମ୍ଭବ ହେଉନି । ସ୍ଥିତି ଏପରି ଯେ ଶବସତ୍କାର ପାଇଁ ଲାଗୁଛି ଲମ୍ବା ଲାଇନ୍ ।
କେତେକ ସହରରେ ପୂର୍ବବର୍ଷ ଅପେକ୍ଷା ଅଧିକ ଲୋକ ସଂକ୍ରମିତ ହେଉଛନ୍ତି । ଏପଟେ ଭାରତରେ ଜାରି ହୋଇଛି ଆଲର୍ଟ । ଭୟଭୀତ ନହୋଇ ସତର୍କ ରହିବାକୁ ପରାମର୍ଶ ଦେଇଛି ସ୍ବାସ୍ଥ୍ୟ ମନ୍ତ୍ରାଳୟ । ଭେଣ୍ଟିଲେଟର, ଅକ୍ସିଜେନ ସିଲିଣ୍ଡର ପ୍ରସ୍ତୁତ ରଖିବାକୁ ସବୁ ରାଜ୍ୟକୁ ଚିଠି ଲେଖିଛି କେନ୍ଦ୍ର । ଟେଷ୍ଟିଂ, ଟ୍ରାକିଂ ଓ ଟିକାକରଣକୁ ଗୁରୁତ୍ବ ଦେବାକୁ ଜାରି ହୋଇଛି ଆଡଭାଇଜରୀ । ଏୟାରପୋର୍ଟରେ ହେଉଛି ରାଣ୍ଡମ ଟେଷ୍ଟ । ଅନ୍ୟପଟେ ଓଡ଼ିଶାରେ ୩ ମାସ ଧରି ପଜିଟିଭ ରେଟ ବଢିନାହିଁ । ସମ୍ଭାବ୍ୟ କରୋନା ମୁକାବିଲା ପାଇଁ ସ୍ବାସ୍ଥ୍ୟ ଭିତ୍ତିଭୂମି ସୁଦୃଢ ରହିଛି । ଆସନ୍ତା ୨୭ରେ ସବୁ ଡାକ୍ତରଖାନାରେ ମକଡ୍ରିଲ୍ କରାଯିବ ।
ଖ୍ରୀଷ୍ଟଧର୍ମାବଲମ୍ବୀ ପାଳୁଛନ୍ତି ବଡଦିନ, ବିଭିନ୍ନ ଚର୍ଚ୍ଚରେ ବ୍ୟାପକ ବ୍ୟବସ୍ଥା
ନନ୍ଦିଘୋଷ ବ୍ୟୁରୋ: ଆଜି ପବିତ୍ର ବଡ଼ଦିନ । ଉତ୍ସବ ପାଳୁଛନ୍ତି ଖ୍ରୀଷ୍ଟଧର୍ମାବଲମ୍ବୀ । ଉତ୍ସବମୁଖର ହୋଇଛି ସାରା ବିଶ୍ବ । ମଧ୍ୟରାତ୍ରିରେ ଧରାବତରଣ କରିଛନ୍ତି ପ୍ରଭୁ ଯୀଶୁ । ସମବେତ ପ୍ରାର୍ଥନା କରି ପ୍ରଭୁଙ୍କ ଧରାବତରଣକୁ ପାଳନ କରିଛନ୍ତି ଶ୍ରଦ୍ଧାଳୁ । ବିଭିନ୍ନ ଚର୍ଚ୍ଚରେ କରାଯାଇଛି ବ୍ୟାପକ ବ୍ୟବସ୍ଥା । ବଡ଼ଦିନ ପାଇଁ ଚର୍ଚ୍ଚଗୁଡ଼ିକୁ ସୁନ୍ଦର ଆଲୋକମାଳାରେ ସଜାଯାଇଛି । ରାଜଧାନୀ ଭୁବନେଶ୍ବର ସମେତ ସାରା ରାଜ୍ୟର ଚର୍ଚ୍ଚରେ ଲାଗିଛି ଗହଳି ।
ପ୍ରଭୁ ଯୀଶୁଖ୍ରୀଷ୍ଟଙ୍କୁ ଦର୍ଶନ କରି ଆଶୀର୍ବାଦ ନେଉଛନ୍ତି ଖ୍ରୀଷ୍ଟ ଧର୍ମାବଲାମ୍ବୀ । ଆଜିକୁ ପ୍ରାୟ ୨୦୨୨ ବର୍ଷ ପୂର୍ବେ ପ୍ରଭୁ ଯୀଶୁ ଜନ୍ମଗ୍ରହଣ କରିଥିଲେ ବୋଲି ବିଶ୍ବାସ ରହିଛି । ସେ ଜନ୍ମ ହେବା ସହ ଖ୍ରୀଷ୍ଟାବ୍ଦର ଆରମ୍ଭ ହୋଇଥିବା କୁହାଯାଉଛି । ଶେଷ ଜୀବନରେ ଯୀଶୁଙ୍କୁ କୁଶବିଦ୍ଧ କରାଯାଇ ହତ୍ୟା କରାଯାଇଥିଲା ।
ଏନେଇ ଖ୍ରୀଷ୍ଟ ଧର୍ମଗ୍ରନ୍ଥ ବାଇବେଲରେ ଉଲ୍ଲେଖ କରାଯାଇଛି। ଏହା ପର ଠାରୁ ପ୍ରତିବର୍ଷ ଡିସେମ୍ବର ୨୫ ତାରିଖକୁ ପ୍ରଭୁ ଯୀଶୁଖ୍ରୀଷ୍ଟଙ୍କ ଜନ୍ମଦିନ ଭାବେ ପାଳନ କରାଯାଉଛି ।
ଜାଡରେ ଥରୁଛି ସାରା ରାଜ୍ୟ, ୧୦ ଡିଗ୍ରୀ ତଳେ ଅଧିକାଂଶ ସହରର ତାପମାତ୍ରା
ଭୁବନେଶ୍ବର: ରାଜ୍ୟରେ ଜାରି ରହିଛି ଶୀତ ଲହରୀ । ଜାଡରେ ଥରୁଛି ସାରା ରାଜ୍ୟ । ଲଗାତାର ତାପମାତ୍ରା ହ୍ରାସ ପାଉଥିବାବେଳେ ଶୀତ ବଢିବାରେ ଲାଗିଛି । ମୟୂରଭଞ୍ଜରୁ-ମାଲକାନଗିରି, ବାଲେଶ୍ବରରୁ ବ୍ରହ୍ମପୁର ସବୁଠି ଅସହ୍ୟ ଥଣ୍ଡା। ଶୀତରୁ ବର୍ତ୍ତିବା ପାଇଁ କିଏ ନିଆରା ସାହାରା ନେଉଛି ଆଉ କିଏ ଚା’ ପିଉଛି । ପୁଣି ଖେଳକୁଦ ସାଙ୍ଗକୁ ବ୍ୟାୟାମ କରି ଶୀତରୁ ଉପଶମ ପାଇଁ ଉଦ୍ୟମ ଚଳାଇଛନ୍ତି ଜନସାଧାରଣ ।
ଜି. ଉଦୟଗିରିରେ ପାରଦ ପାଖାପାଖି ୫ ଡିଗ୍ରୀ ରହିଥିବାବେଳେ ମୟୂରଭଞ୍ଜ, ସେମିଳିଗୁଡା, ଫୁଲବାଣୀ ଓ ଦରିଙ୍ଗବାଡିରେ ପାରଦ ୧୦ ଡିଗ୍ରୀ ତଳେ ରହିଛି । ଅଧିକାଂଶ ସହରର ତାପମାତ୍ରା ୧୫ ଡିଗ୍ରୀ ତଳେ ରହିଛି । ଗୁରୁଚାପ ବଳୟର ପ୍ରଭାବରେ ଆଗାମୀ ଦୁଇଦିନ ଉତ୍ତର ଉପକୂଳ ସମେତ ପାର୍ଶ୍ବବର୍ତ୍ତୀ ଜିଲ୍ଲା ମାନଙ୍କରେ ହାଲୁକାରୁ ମଧ୍ୟମ କୁହୁଡି ଦେଖିବାକୁ ମିଳିବ ।
ଅନ୍ୟପଟେ କାଲିଠୁ ତାପମାତ୍ରା ସାମାନ୍ୟ ବୃଦ୍ଧି ସହିତ ଶୀତ କମିବ ବୋଲି ପାଣିପାଗ କେନ୍ଦ୍ର ଆକଳନ କରିଛି ।
ଘର କୋଣରେ ରହିବେ ମହିଳା, ତାଲିବାନ ସରକାର ଆଣିଲେ ନୂଆ ଯୋଜନା
କାବୁଲ: ଅସଲ ରୂପ ଦେଖାଉଛି ତାଲିବାନ୍ । ମହିଳାଙ୍କୁ ଘର କୋଣରେ ରଖିବାକୁ ତାଲିବାନ ସରକାରଙ୍କ ଯୋଜନା । ଆଫଗାନିସ୍ତାନରେ ଏନଜିଓରେ କାମ କରିପାରିବେନି ମହିଳା । ଛାତ୍ରୀଙ୍କୁ ବିଶ୍ବବିଦ୍ୟାଳରେ ପ୍ରବେଶ ଉପରେ କଟକଣା ପରେ ଏନଜିଓରେ କାମ କରିବାକୁ ମନା କରିଛି ତାଲିବାନ୍ । ମହିଳାଙ୍କୁ ବ୍ୟାନ କରିବାକୁ ସମସ୍ତ ଏନଜିଓ ସଂସ୍ଥାକୁ ନିର୍ଦ୍ଦେଶ ଦେଇଛି ତାଲିବାନ୍ ସରକାର ।
କାମ କରୁଥିବା ମହିଳାଙ୍କୁ ତୁରନ୍ତ ବ୍ୟାନ୍ ପାଇଁ ନିର୍ଦ୍ଦେଶ ଦିଆଯାଇଛି । ଇସଲାମିକ ଡ୍ରେସ କୋର୍ଡକୁ ମାନୁନଥିବା ଅଭିଯୋଗରେ ମହିଳାଙ୍କୁ ବ୍ୟାନ କରାଯାଇଛି । ପରବର୍ତ୍ତୀ ନିର୍ଦ୍ଦେଶ ନଆସିବା ପର୍ଯ୍ୟନ୍ତ କୌଣସି ମହିଳା ଏନଜିଓରେ କାମ କରିପାରିବେ ନାହିଁ ବୋଲି ଆଫଗାନ ଅର୍ଥମନ୍ତ୍ରାଳୟ ପ୍ରବକ୍ତା କହିଛନ୍ତି । ପୂର୍ବରୁ ଛାତ୍ରୀଙ୍କୁ ବିଶ୍ବବିଦ୍ୟାଳୟରେ ପ୍ରବେଶ ନକରିବାକୁ କଟକଣା ଜାରି କରିଥିଲା ତାଲିବାନ୍ । ଯାହାକୁ ସାରା ବିଶ୍ବରେ ନିନ୍ଦା କରାଯାଉଛି ।
ବଢ଼ୁଛି ହକି ବିଶ୍ବକପ ଉତ୍କଣ୍ଠା, ଆଜିଠୁ ଓଡ଼ିଶା ଭ୍ରମଣ କରିବ ହକି ବିଶ୍ୱକପ ଟ୍ରଫି
ଭୁବନେଶ୍ୱର: ବଢ଼ୁଛି ହକି ବିଶ୍ବକପ ଉତ୍କଣ୍ଠା । ସାରା ଦେଶରେ ପରିକ୍ରମା କରି ଫେରିଲା FIH ଓଡ଼ିଶା ପୁରୁଷ ହକି ବିଶ୍ୱକପ୍ ଟ୍ରଫି । ଆଜିଠୁ ଓଡ଼ିଶାର ସବୁ ଜିଲ୍ଲା ପରିକ୍ରମା କରିବ ଟ୍ରଫି । ସୁନ୍ଦରଗଡ଼ରେ ଏହି ବିଶ୍ୱକପ ଟ୍ରଫି ୧୭ଟି ବ୍ଲକ୍ ପରିକ୍ରମା କରିବ । ଏହାଦ୍ବାରା ଲୋକଙ୍କ ମଧ୍ୟରେ ଉତ୍ସାହ ବଢ଼ିବ । ୨୧ ଦିନ ଧରି ହକି ବିଶ୍ବକପ ଟ୍ରଫି ଦେଶର ୧୩ ସହର ଓ ଗୋଟିଏ କେନ୍ଦ୍ରଶାସିତ ଅଞ୍ଚଳରେ ପରିକ୍ରମା କରିସାରିଛି । ପଶ୍ଚିମବଙ୍ଗ, ମଣିପୁର, ଆସାମ, ଝାଡ଼ଖଣ୍ଡ, ଉତ୍ତରପ୍ରଦେଶ, ପଞ୍ଜାବ, ହରୟାଣା, ଦିଲ୍ଲୀ, ମଧ୍ୟପ୍ରଦେଶ, ମହାରାଷ୍ଟ୍ର, ତାମିଲନାଡୁ, କେରଳ, କର୍ଣ୍ଣାଟକ ଓ ଛତିଶଗଡ଼ ବୁଲିଛି ଟ୍ରଫି ।
ସୂଚନା ଅନୁସାରେ ଆସନ୍ତା ୧୩ ତାରିଖରୁ ଆରମ୍ଭ ହେଉଛି ଓଡ଼ିଶା ପୁରୁଷ ହକି ବିଶ୍ବକପ । ଏଥିରେ ୧୬ଟି ଟିମ୍ ଅଂଶଗ୍ରହଣ କରିବେ । ଭୁବନେଶ୍ବର ଓ ରାଉରକେଲାରେ ଖେଳାଯିବ ବିଶ୍ୱକପର ସମସ୍ତ ମ୍ୟାଚ ।
ଭୁବନେଶ୍ବରରେ ପୁଣି ଆରମ୍ଭ ହେଲା ରାହାଗିରି, ନାଚଗୀତରେ ଝୁମୁଛି ରାଜଧାନୀ
ଭୁବନେଶ୍ୱର: ଆଜିଠୁ ପୁଣି ରାହାଗିରିର ମଜା ଉଠାଉଛନ୍ତି ରାଜଧାନୀ ବାସିନ୍ଦା । ଭୁବନେଶ୍ବରରେ ଆରମ୍ଭ ହୋଇଛି ପଥୋତ୍ସବ ବା ରାହାଗିରି । ସ୍ମାର୍ଟ ଜନପଥରେ ଲାଗିଛି ଗହଳି । ବିଭିନ୍ନ ମନୋରଞ୍ଜନଧର୍ମୀ କାର୍ଯ୍ୟକ୍ରମରେ ଝୁମୁଛନ୍ତି ରାଜଧାନୀବାସୀ । ମିନି ମାରାଥନ ସହ ରାଜରାସ୍ତାରେ ଚାଲିଛି ଖେଳକୁଦ । ଅନୁଷ୍ଠିତ ହେଉଛି ବିଭିନ୍ନ ବର୍ଗଙ୍କ ମଧ୍ୟରେ ଏକାଧିକ ପ୍ରତିଯୋଗିତା ।
ବିଏମସି, ବିଡିଏ ଓ ସ୍ମାର୍ଟ ସିଟି ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ନାଚଗୀତ, ସ୍କେଟିଂ, ସାଇକେଲିଂ ଓ ବିଭିନ୍ନ ଖେଳର ଆସର ଜମିଛି । ଆଗକୁ ହକି ବିଶ୍ବକପ ଆସୁଥିବା ବେଳେ ରାହାଗିରି ଲୋକଙ୍କ ମନରେ ନୂଆ ଉତ୍ସାହ ଭରିଛି ।