ନନ୍ଦିଘୋଷ ବ୍ୟୁରୋ: ଗ୍ରେଟର ନୋଏଡାର ରାବୁପୁରା ଅଞ୍ଚଳରେ ଚାଞ୍ଚଲ୍ୟ । ଗୋଟିଏ ପରିବାରର ୫ଜଣଙ୍କ ସନ୍ଦେହଜନକ ମୃତ୍ୟୁ । । ମୃତକଙ୍କ ମଧ୍ୟରେ ବାପା, ମାଆ ୩ ଜଣ ଛୁଆ ରହିଛନ୍ତି । ଉତ୍ତରପ୍ରଦେଶ ଗ୍ରେଟର ନୋଏଡାର ରାବୁପୁରା ଥାନା ଅଞ୍ଚଳରେ ଏହି ଘଟଣା ଘଟିଛି । ଗୋଟିଏ ପରିବାରର ୫ ଜଣଙ୍କ ମୃତ୍ୟୁ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ପୋଲିସ ଘଟଣାର ତଦନ୍ତ କରୁଥିବା ବେଳେ ଘର ଆଖପାଖରେ ଗାଁଲୋକଙ୍କ ପ୍ରବଳ ଭିଡ ଜମା ହୋଇ ରହିଛି ।
ପ୍ରାରମ୍ଭିକ ସୂଚନା ଅନୁଯାୟୀ, ପରିବାରର ମୃତ୍ୟୁ କିଛି ଖାଇବା ଯୋଗୁଁ ଫୁଡ୍ ପଏଜନିଙ୍ଗ୍ କାରଣରୁ ହୋଇଥିବା ସନ୍ଦେହ କରାଯାଉଛି । ନୋଏଡା ପୋଲିସ କହିଛି ଯେ, ୧୭ ଅକ୍ଟୋବରରେ ରାବୁପୁରା ପୋଲିସ ଷ୍ଟେସନ୍ ସୁଚନା ମିଳିଥିଲା ଯେ, ନଗଲା ଶ୍ରୀ ପଦମ୍ ଗାଁରେ ରହୁଥିବା ଗୋଟିଏ ପରିବାରର ପାଞ୍ଚ ସଦସ୍ୟଙ୍କର ମୃତ୍ୟୁ ହୋଇଛି । କୁହାଯାଉଛି ଯେ ପରିବାର ଶେଷ ଥର ପାଇଁ ରାତି ଖାଇବାରେ ଚା ପିଇଥିଲେ ଏବଂ ମ୍ୟାଗି ଖାଇଥିଲେ । ହେଲେ ରାତିରେ ଶୋଇବା ପରେ ଆଉ ସକାଳକୁ ଉଠିଲେ ନାହିଁ । ଫଳରେ ଗାଁ ଲୋକଙ୍କ ସନ୍ଦେହ ହେବାରୁ ସେମାନେ ଘର ଭିତରେ ଯାଇ ଦେଖିବାରୁ ୫ ଜଣଙ୍କ ଶବ ବିଛଣା ଉପରେ ପଡିଥିବା ଦେଖିବାକୁ ମିଳିଥିଲା ।
ଘଟଣା ସମ୍ପର୍କରେ ସୂଚନା ପାଇବା ପରେ, ପୋଲିସ ତଦନ୍ତ ଆରମ୍ଭ କରିଛି । ପୋଲିସ ସମସ୍ତ ୫ ଜଣଙ୍କ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇଛି । ପୋଷ୍ଟମର୍ଟମ ରିପୋର୍ଟ ଆସିବା ପରେ ହିଁ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି କହଛି ପୋଲିସ । ମୃତକଙ୍କ ମଧ୍ୟରେ ଅଛନ୍ତି ୩୭ ବର୍ଷୀୟ ମହେଶ, ତାଙ୍କ ସ୍ତ୍ରୀ ଲଳିତା, ୧୧ ବର୍ଷର ପୁଅ ଲଡ୍ଡୁ, ୭ ବର୍ଷର ଝିଅ ମିଷ୍ଟି ଏବଂ ୩ ବର୍ଷର ଝିଅ ସାକ୍ଷୀ । ପରିବାରର ୫ ଜଣଙ୍କ କ୍ଷେତ୍ରରେ ଖାଦ୍ୟ ବିଷାକ୍ତତା ସନ୍ଦେହ କରାଯାଉଛି । ଯଦିଓ ଏହା ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ, ତେବେ ବିଷାକ୍ତ ଖାଦ୍ୟ ମୃତ୍ୟୁର କାରଣ କି ଅନ୍ୟ କୌଣସି କାରଣ ଥିଲା ତାହା ପୋଷ୍ଟମର୍ଟମ ରିପୋର୍ଟ ପ୍ରକାଶ ପାଇବା ପରେ ସ୍ପଷ୍ଟ ହେବ ।
