ଭୁବନେଶ୍ବର : ୮୦ ବର୍ଷ ବୟସରେ ପାଦ ଥାପିଲେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପପୁଲାରିଟି ଚାର୍ଟରେ ଆଜି ବି ଏକ ନମ୍ବର ଥିବା ନବୀନଙ୍କୁ ଛୁଟିଛି ଶୁଭେଚ୍ଛାର ସୁଅ । ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ମାନ୍ୟଗଣ୍ୟ ବ୍ୟକ୍ତି ତାଙ୍କୁ ଶୁଭେଚ୍ଛା ଜଣାଇବା ସହ ଦୀର୍ଘାୟୁ ପ୍ରାର୍ଥନା କରିଛନ୍ତି । ସରଳ ଜୀବନ ବିତାଉଥିବା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜକୁ ଜାକଜମକରୁ ଦୂରରେ ରଖନ୍ତି । ହେଲେ ଶୁଭେଚ୍ଛୁମାନେ ନବୀନଙ୍କ ଏକମାତ୍ର ଝଲକ ଦେଖିବାକୁ ବ୍ୟାକୁଳ । ଜନ୍ମଦିନରେ କିପରି ଭାବେ ନିଜ ପ୍ରିୟ ନେତାଙ୍କୁ ଶୁଭେଚ୍ଛା ଜଣାଇବେ, ସେଥିପାଇଁ ଆଜି ସକାଳୁ ନବୀନ ନିବାସରେ ଭିଡ଼ ଜମିଥିଲା । ମୁଖ୍ୟମନ୍ତ୍ରୀ ଥିବା ସମୟରେ ବହୁ ବର୍ଷ ତଳେ ଜନ୍ମଦିନରେ ନବୀନ ନିବାସରେ ଏହି ପରି ଭିଡ଼ ଦେଖିବାକୁ ମିଳୁଥିଲା । ଆଜି ବିରୋଧୀ ଦଳ ନେତା ଥିବା ନବୀନଙ୍କୁ ଜନ୍ମଦିନର ଶୁଭେଚ୍ଛା ଜଣାଇବାକୁ ନବୀନ ନିବାସରେ ସେହି ପରି ଭିଡ଼ ଜମିଥିଲା । ସ୍କୁଲ ପିଲା, ସ୍ବେଚ୍ଛାସେବୀ ଓ ନେତାଙ୍କ ସମେତ ନବୀନ ଫ୍ୟାନମାନେ ନବୀନ ନିବାସ ଯାଇ ତାଙ୍କୁ ଓ୍ବିସ୍ କରିଥିଲେ । ଭିତରେ ନବୀନଙ୍କ ସହ ସେଲଫି ଓ ଫଟୋ ଉଠାଇବାକୁ ପ୍ରତିଯୋଗିତା ଚାଲିଥିଲା । ଏହି ଅବସରରେ ନବୀନଙ୍କୁ ଶୁଭେଚ୍ଛା ଜଣାଇବା ସହ ତାଙ୍କ ଜନସେବା ଓ ନେତୃତ୍ବକୁ ଭୂୟସୀ ପ୍ରଶଂସା କରିଛନ୍ତି ବିଜେଡି ସଂସଦୀୟ ଦଳ ନେତା ମାନସ ରଞ୍ଜନ ମଙ୍ଗରାଜ ।

ଗତକାଲି ଛାତ୍ର ସଂସଦ ନିର୍ବାଚନରେ ବି ଦେଖିବାକୁ ମିଳିଥିଲା ନବୀନ ମାନିଆ । ନିର୍ବାଚନ ଜିତିବାକୁ କଳ ବଳ କୌଶଳ ଆପଣେଇଥିବା ସରକାରୀ ଦଳ ଉପରେ କିପରି ନବୀନ ଭାରି ପଡ଼ିଲେ, ସେଥିପାଇଁ ବି ନବୀନଙ୍କୁ ସମସ୍ତେ ପ୍ରଶଂସା କରିବା ସହ ଶୁଭେଚ୍ଛା ଜଣାଇଥିଲେ । କାରଣ ନବୀନଙ୍କ ସରଳ ଜୀବନ ସମସ୍ତ ପାଇଁ ପ୍ରେରଣାଦାୟୀ । ମୁଖ୍ୟମନ୍ତ୍ରୀ ଥିବା ସମୟରେ ସେ ଯେଉଁ ବିକାଶଧାରାରେ ଓଡ଼ିଶାକୁ ସାମିଲ କରିଥିଲେ, ତାହା ତାଙ୍କୁ ଭାରତର ଏକ ଜନପ୍ରିୟ ନେତା କରି ପାରିଛି । ରାଜନୀତିରେ ସେ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି । କଥା କମ୍ କାମ ବେଶୀରେ ବିଶ୍ବାସ କରି ଓଡ଼ିଶା ପ୍ରଗତିର ସାରଥୀ ହୋଇ ପାରିଛନ୍ତି ନବୀନ । ନବୀନଙ୍କ କ୍ରେଜ କଣ, ତାହା ସମସ୍ତେ ଜାଣିଛନ୍ତି । ଯେଉଁଥିପାଇଁ ନବୀନ ନିବାସ ପରି ଆଜି ସୋସିଆଲ ମିଡିଆ ମଧ୍ୟ ତାଙ୍କୁ ଶୁଭେଚ୍ଛା ଜଣାଇବାରେ ଭରି ଯାଇଛି ।

ଭୁବନେଶ୍ବର : କୋଟିଆ କାହାର ? ଓଡିଶାର ନା ଆନ୍ଧ୍ରର ? ତାକୁ ନେଇ ପୁଣି ଦ୍ବନ୍ଦ୍ବ ଦେଖାଦେଇଛି । କୋଟିଆରେ ଆନ୍ଧ୍ର ସରକାର ପଂଚାୟତ ନିର୍ବାଚନ ପାଇଁ ବିଜ୍ଞପ୍ତି ଜାରି କରିବା ପରେ ରାଜ୍ୟ ସରକାରଙ୍କୁ ଘେରିଛି ବିଜେଡି । ବିଜେଡି ପ୍ରଶ୍ନ କରିଛି, କୁଆଡ଼େ ଗଲା ବିଜେପିର ଓଡିଆ ଅସ୍ମିତା ନାରା ? ବିଜେପି ଶାସନକୁ ଆସିଲା ଦିନଠାରୁ ଓଡିଶାରେ ପଡୋଶୀ ରାଜ କରୁଛନ୍ତି । କେତେବେଳେ ଆନ୍ଧ୍ର ତ କେତେବେଳେ ଛତିଶଗଡ଼ ଓଡିଶା ଉପରେ ନିଜର ଜାହିର ପ୍ରତିପାଦନ କରୁଛନ୍ତି । ଓଡିଶାର ବିଜେପି ସରକାର ସବୁ ଦେଖି ଚୁପ ରହୁଛନ୍ତି । କୋଟିଆ ଓଡିଶାର ଥିଲା ଓ ରହିବ ବୋଲି ବିଜେଡି କହିବା ସହ ଆଗକୁ ହକ ପାଇଁ ଲଢେଇ ଜାରି ରହିବ ବୋଲି କହିଛି । କଂଗ୍ରେସ କହିଛି, ଆନ୍ଧ୍ର ପାଇଁ କେନ୍ଦ୍ରରେ ବିଜେପି ସରକାର ଅଛି । ତେଣୁ କୋଟିଆରେ ଆନ୍ଧ୍ର ସରକାର ପଞ୍ଚାୟତ ନିର୍ବାଚନ ଲାଗି ବିଜ୍ଞପ୍ତି ପ୍ରକାଶ କରୁଥିଲେ ମଧ୍ୟ ଚୁପ ରହିଛନ୍ତି ରାଜ୍ୟ ସରକାର । କଂଗ୍ରେସ କେବେ ବି କୋଟିଆ ପ୍ରସଙ୍ଗରେ ଚୁପ ବସିବ ନାହିଁ । ଆଗକୁ ଦଳ ଏହା ବିରୋଧରେ ତ୍ରୀବ୍ର ସ୍ବର ଉଠାଇବ ବୋଲି ଚେତାବନୀ ଦେଇଛି ଦଳ ।

କୋଟିଆରେ ବାରମ୍ବାର ଆନ୍ଧ୍ରର ବାରମ୍ବାର ବିଭିନ୍ନ କାର୍ଯ୍ୟକ୍ରମ ନେଇ ବିଜେପି ସରକାରକୁ ପ୍ରଶ୍ନବାଣରେ ଘାଇଲା କରିଛନ୍ତି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ । କଟାକ୍ଷ କରି କହିଛନ୍ତି, ବିଜେପି ସରକାର ନିର୍ବାଚନରେ ଯାହା କହିଥିଲେ ତାହା ତାଙ୍କର କିଛି ମନେ ନାହିଁ । ସରକାର କେବଳ ନିଜ ଦଳର ଆତ୍ମ ପ୍ରଚାର କରିବାରେ ଲାଗିଛନ୍ତି । ଆନ୍ଧ୍ର ସରକାର କୋଟିଆରେ ଚଞ୍ଚକତା କରୁଛନ୍ତି ବୋଲି ଆଇନ ମନ୍ତ୍ରୀ କହିଛନ୍ତି । ଆନ୍ଧ୍ର କୋଟିଆରେ ପଂଚାୟତ ନିର୍ବାଚନ କଲେ ଓଡିଶା ସରକାର ତାହା କରାଇଦେବେ ନାହିଁ । କୋଟିଆର କିଛି ଅଂଶରେ ଆନ୍ଧ୍ର ଏମିତି କରୁଛି ବୋଲି ସରକାର କହିଛନ୍ତି । କୋଟିଆକୁ ନେଇ ଆନ୍ଧ୍ର ଓ ଓଡିଶା ମଧ୍ୟରେ ବିବାଦ ଲାଗି ରହିଥିବା ବେଳେ ଆନ୍ଧ୍ର ପଂଚାୟତ ନିର୍ବାଚନ ଲାଗି ବିଜ୍ଞପ୍ତି ଜାରି କରିବା ଓଡିଶାକୁ ଖଣ୍ଡଖଣ୍ଡ କରିବାକୁ ଷଡ଼ଯନ୍ତ୍ର ବୋଲି ବିରୋଧୀ ଅଭିଯୋଗ କରିଛନ୍ତି । ସରକାର କିନ୍ତୁ ଚିରାଚରିତ ଉତ୍ତର ଦେଇ ଚୁପ ବସିଛନ୍ତି ।