ଦିଲ୍ଲୀରେ ଭୟଙ୍କର ଅଗ୍ନିକାଣ୍ଡ। ଏଥିରେ ୨୧ ଜଣ ଜୀବନ୍ତ ଦଗ୍ଧ ହୋଇ ଯାଇଛନ୍ତି। ଦିଲ୍ଲୀ ପୋଲିସ ଏହା ସ୍ପଷ୍ଟ କରିଛି। ଏକ ରେଷ୍ଟୁରାଣ୍ଟରେ ଲାଗିଥିଲା ନିଆଁ । ଆଜି ସକାଳ ୯ଟାରେ ନିଆଁ ଲାଗିଥିଲା। ମାଲବୀୟ ନଗରରେ ଏହି ଅଘଟଣ ଘଟିଛି। ନିଆଁ ଲିଭାଇବାକୁ ଅଗ୍ନିଶମ ବାହିନୀ ପହଞ୍ଚି ନିଆଁ ଲିଭାଉଛି। ୪୦ରୁ ଅଧିକ ଲୋକଙ୍କୁ ଉଦ୍ଧାର କରାଯାଇଛି । ଅନେକ ଏବେ ବି ନିଖୋଜ ଅଛନ୍ତି । … ମୃତାହତଙ୍କ ମଧ୍ୟରେ ଅନେକ ବିଦେଶୀ ଥିବା ଜଣାପଡ଼ିଛି । ଏହି ଅଘଟଣରେ ଶୋକ ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ମୋଦି। ମୃତକଙ୍କ ପିଛା ସେମାନଙ୍କ ପରିବାରକୁ ୨ ଲକ୍ଷ ଟଙ୍କା ଓ ଆହତଙ୍କୁ ୫୦ ହଜାର ଟଙ୍କା ଲେଖାଏଁ ସହାୟତା ଘୋଷଣା କରିଛନ୍ତି । ବିିରୋଧୀ ଦଳ ନେତା ନବୀନ ପଟ୍ଟନାୟକ ମଧ୍ୟ ଏହି ଘଟଣାରେ ଶୋକ ପ୍ରକାଶ କରିଛନ୍ତି। ମୃତକଙ୍କ ପରିବାରକୁ ସମବେଦନା ଜଣାଇବା ସହିତ ଆହତଙ୍କ ଆଶୁ ଆରୋଗ୍ୟ କାମନା କରିଛନ୍ତି ନବୀନ ପଟ୍ଟନାୟକ।
ମୁଖ୍ୟମନ୍ତ୍ରୀ ହେବେ ଡିକେ ଶିବକୁମାର; ସାଙ୍ଗରେ ଶପଥ ନେବେ ୧୩ ମନ୍ତ୍ରୀ
ନନ୍ଦିଘୋଷ ବ୍ୟୁରୋ : କର୍ଣ୍ଣାଟକ ରାଜନୀତିରେ ଆଜିଠାରୁ ଏକ ନୂତନ ଅଧ୍ୟାୟ ଆରମ୍ଭ ହେବାକୁ ଯାଉଛି। ରାଜ୍ୟର ନୂଆ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ ପ୍ରଭାବଶାଳୀ କଂଗ୍ରେସ ନେତା ଡିକେ ଶିବକୁମାର। ବେଙ୍ଗାଳୁରୁରେ ଆୟୋଜିତ ହେବାକୁ ଥିବା ଏହି ଭବ୍ୟ ଶପଥ ଗ୍ରହଣ ସମାରୋହ ଉପରେ ଏବେ ସାରା ଦେଶର ନଜର ରହିଛି। ମିଳିଥିବା ସୂଚନା ଅନୁଯାୟୀ, ପ୍ରଥମ ପର୍ଯ୍ୟାୟରେ ଡିକେ ଶିବକୁମାର ୧୩ ଜଣ କ୍ୟାବିନେଟ୍ ମନ୍ତ୍ରୀଙ୍କ ସହିତ ଶପଥ ଗ୍ରହଣ କରିବେ। ଏହାପରେ ଆଗାମୀ ଦିନରେ କ୍ୟାବିନେଟ୍ର ସମ୍ପ୍ରସାରଣ କରାଯିବ। କଂଗ୍ରେସର ଏହି ନୂଆ ନେତୃତ୍ୱ ଆଗାମୀ ବର୍ଷଗୁଡ଼ିକରେ ରାଜ୍ୟ ସରକାରଙ୍କ ମୁଖ୍ୟ ଚେହେରା ଭାବରେ କାର୍ଯ୍ୟ କରିବେ।
ଏହି ନୂତନ ମନ୍ତ୍ରିମଣ୍ଡଳର ଚୂଡ଼ାନ୍ତ ରୂପରେଖ ପ୍ରସ୍ତୁତ କରିବା ପାଇଁ ଗତ ମଙ୍ଗଳବାର ଦିନ ଦିଲ୍ଲୀରେ କଂଗ୍ରେସ ହାଇକମାଣ୍ଡଙ୍କ ଏକ ହାଇପ୍ରୋଫାଇଲ୍ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ଡିକେ ଶିବକୁମାର ଏବଂ ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟା ଉପସ୍ଥିତ ଥିଲେ। କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ, ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ, ସାଧାରଣ ସମ୍ପାଦକ କେସି ଭେନୁଗୋପାଳ ଏବଂ କର୍ଣ୍ଣାଟକ ପ୍ରଭାରୀ ରଣଦୀପ ସୁରଜେୱାଲାଙ୍କ ସହ ଦୀର୍ଘ ସମୟ ଧରି ବିସ୍ତୃତ ଆଲୋଚନା ହୋଇଥିଲା। ଏହି ବୈଠକର ମୁଖ୍ୟ ଏଜେଣ୍ଡା ଥିଲା ନୂଆ କ୍ୟାବିନେଟ ଗଠନ, ବିଭିନ୍ନ ଗୋଷ୍ଠୀ ମଧ୍ୟରେ କ୍ଷମତା ସନ୍ତୁଳନ ଏବଂ ସାଙ୍ଗଠନିକ ସମୀକରଣକୁ ସନ୍ତୁଳିତ କରିବା।
ସୂଚନା ଅନୁଯାୟୀ, କ୍ୟାବିନେଟ୍ର ପ୍ରଥମ ପର୍ଯ୍ୟାୟ ଶପଥ ଗ୍ରହଣରେ ଡିକେ ଶିବକୁମାର ମୁଖ୍ୟମନ୍ତ୍ରୀ ଦାୟିତ୍ୱ ନେଉଥିବା ବେଳେ ବରିଷ୍ଠ ନେତା ଜି. ପରମେଶ୍ୱର ରାଜ୍ୟର ଏକମାତ୍ର ଉପମୁଖ୍ୟମନ୍ତ୍ରୀ ଭାବେ ଶପଥ ନେଇପାରନ୍ତି। ଏହାସହ ମନ୍ତ୍ରିମଣ୍ଡଳରେ ସାମିଲ ହେବାକୁ ଥିବା ଅନ୍ୟ ସଦସ୍ୟଙ୍କ ନାମ ମଧ୍ୟ ପ୍ରାୟ ଚୂଡ଼ାନ୍ତ ହୋଇସାରିଛି। ସେମାନଙ୍କ ମଧ୍ୟରେ ଯତୀନ୍ଦ୍ର, କେ.ଏଚ୍. ମୁନିୟାପ୍ପା, ୟୁଟି. ଖାଦେର, କେ.ଜେ. ଜର୍ଜ ଏବଂ କୃଷ୍ଣ ବାଇରେ ଗୌଡାଙ୍କ ଭଳି ଅନେକ ପ୍ରମୁଖ ଓ ହେଭିୱେଟ୍ ନେତାଙ୍କ ନାମ ରେସରେ ଆଗରେ ରହିଛି।
ଖାନ୍ ସାର୍ଙ୍କ କୋଚିଂ ସେଣ୍ଟର ଉପରେ ଗୁଳିମାଡ଼: ସୁରକ୍ଷାକର୍ମୀ ଗୁରୁତର
ପାଟନା: ଦେଶର ଜଣାଶୁଣା ତଥା ଲୋକପ୍ରିୟ ଶିକ୍ଷକ ଖାନ୍ ସାର୍ଙ୍କ କୋଚିଂ ସେଣ୍ଟର ଉପରେ ବଡ଼ଧରଣର ଆକ୍ରମଣ ହୋଇଛି। ଗତ ରାତିରେ କିଛି ସଶସ୍ତ୍ର ଦୁର୍ବୃତ୍ତ ବିହାର ପାଟନାରେ ଥିବା ତାଙ୍କ କୋଚିଂ ସେଣ୍ଟର ଉପରକୁ ଅତର୍କିତ ଗୁଳିମାଡ଼ କରିଛନ୍ତି। ଏହି ଗୁଳିକାଣ୍ଡରେ ନିୟୋଜିତ ଥିବା ଜଣେ ସୁରକ୍ଷାକର୍ମୀ ଗୁରୁତର ଭାବେ ଆହତ ହୋଇଛନ୍ତି। ଗୁଳିମାଡ଼ କରିବା ସହ ଦୁର୍ବୃତ୍ତମାନେ କୋଚିଂ ସେଣ୍ଟରରେ ବ୍ୟାପକ ଭଙ୍ଗାରୁଜା ମଧ୍ୟ କରିଛନ୍ତି। ବ୍ୟବସାୟିକ ଏବଂ କୋଚିଂ ସେଣ୍ଟର ଶତ୍ରୁତାରୁ ଏହି ଆକ୍ରମଣ ହୋଇଥିବା ପୋଲିସ ସନ୍ଦେହ କରୁଛି।
ଗତ ମଙ୍ଗଳବାର ରାତିରେ ଏହି ଗୁଳିକାଣ୍ଡ ଘଟିଥିବା ବେଳେ ଆଜି ସକାଳୁ ଏହି ଖବର ସାମ୍ନାକୁ ଆସିଛି। ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ନିଜେ ଜିଲ୍ଲା ଏସପି ଏବଂ ଏସଏସପି ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। କୋଚିଂ ସେଣ୍ଟର ଏବଂ ଏହାର ଆଖପାଖ ଅଞ୍ଚଳରେ ଲାଗିଥିବା ସିସିଟିଭି (CCTV) ଫୁଟେଜ୍କୁ ଆଧାର କରି ପୋଲିସ ଦୁର୍ବୃତ୍ତମାନଙ୍କୁ ଚିହ୍ନଟ କରିବାକୁ ଚେଷ୍ଟା ଚଳାଇଛି।
ଖାନ୍ ସାରଙ୍କ ପ୍ରତିକ୍ରିୟା:
ଏହି ଆକ୍ରମଣ ପରେ ନିଜର ପ୍ରତିକ୍ରିୟା ରଖିଛନ୍ତି ଖାନ୍ ସାର୍। ସେ କହିଛନ୍ତି, ଆମେ ବହୁତ କମ୍ ଫି’ରେ ଅତି ଶସ୍ତାରେ ଗରିବ ପିଲାମାନଙ୍କୁ ପାଠ ପଢ଼ାଉଥିବାରୁ ଏହାକୁ କେତେକ ଲୋକ ସହିପାରୁନାହାନ୍ତି। କାହିଁକି ଏତେ ଶସ୍ତାରେ ପାଠ ପଢ଼ାଉଛ ବୋଲି କହି ସେମାନେ ଆମକୁ ଟାର୍ଗେଟ କରୁଛନ୍ତି। କିନ୍ତୁ ସେମାନେ ଆମକୁ କେବେ ବି ଦବାଇ ପାରିବେ ନାହିଁ। ଏହାସହ ଶିକ୍ଷାନୁଷ୍ଠାନ ଏବଂ ଛାତ୍ରଛାତ୍ରୀଙ୍କ ସୁରକ୍ଷା ପାଇଁ ପୋଲିସ ପ୍ରଶାସନ ଉଚିତ ପଦକ୍ଷେପ ନେବା ଦର୍କାର ବୋଲି ସେ ଦାବି କରିଛନ୍ତି।
ଖାନ୍ ସାର୍ଙ୍କ କୋଚିଂ ସେଣ୍ଟର ଉପରେ ଆକ୍ରମଣ ଖବର ପ୍ରସାରିତ ହେବା ପରେ ଆଜି ସକାଳୁ ସେଠାରେ ଉତ୍ତେଜନା ପ୍ରକାଶ ପାଇଛି। ନିଜ ପ୍ରିୟ ଶିକ୍ଷକଙ୍କ ସୁରକ୍ଷାକୁ ନେଇ ଚିନ୍ତିତ ଥିବା ଶହ ଶହ ଛାତ୍ରଛାତ୍ରୀ ଏବଂ ସେମାନଙ୍କ ଅଭିଭାବକ କୋଚିଂ ସେଣ୍ଟର ନିକଟରେ ଜମା ହୋଇଛନ୍ତି। ଅପରାଧୀଙ୍କୁ ତୁରନ୍ତ ଗିରଫ କରିବା ପାଇଁ ସେମାନେ ଦାବି କରିଛନ୍ତି।
ପୁରୀରେ BRICS ସମ୍ମିଳନୀ: ପ୍ରତିନିଧିଙ୍କୁ ସ୍ୱାଗତ କଲେ ନବୀନ…
ଭୁବନେଶ୍ୱର: ପୁରୀରେ ଆୟୋଜିତ ହେଉଥିବା ପ୍ରସିଦ୍ଧ ‘ବ୍ରିକ୍ସ ଡିସାଷ୍ଟର ରିସ୍କ ରିଡକ୍ସନ ୱାର୍କିଂ ଗୃପ ମିଟିଂ’କୁ ପ୍ରଶଂସା କରିଛନ୍ତି ରାଜ୍ୟ ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହି ଆନ୍ତର୍ଜାତୀୟ ସମ୍ମିଳନୀ ପବିତ୍ର ଶ୍ରୀକ୍ଷେତ୍ର ପୁରୀରେ ଅନୁଷ୍ଠିତ ହେଉଥିବାରୁ ଜଣେ ଓଡ଼ିଆ ହିସାବରେ ସେ ବେଶ୍ ଗର୍ବିତ ବୋଲି ପ୍ରକାଶ କରିଛନ୍ତି।
ମହାବାତ୍ୟା ପରଠାରୁ ବଦଳିଛି ଓଡ଼ିଶାର ଚେହେରା:
ଏହି ଅବସରରେ ଓଡ଼ିଶାର ବିପର୍ଯ୍ୟୟ ପରିଚାଳନା କ୍ଷମତାକୁ ମନେ ପକାଇ ନବୀନ କହିଛନ୍ତି ଯେ, ୧୯୯୯ ମସିହାର ମହାବାତ୍ୟା ପରଠାରୁ ଓଡ଼ିଶା ଅନେକ କିଛି ଶିଖିଛି। ଭୟାବହ ସମୟ ପରଠାରୁ ଓଡ଼ିଶା ଅତ୍ୟନ୍ତ ସାହସ ଓ ଦୃଢ଼ ମନୋବଳ ସହିତ ପ୍ରତ୍ୟେକ ପ୍ରାକୃତିକ ବିପର୍ଯ୍ୟୟର ମୁକାବିଲା କରି ଆସୁଛି। ରାଜ୍ୟର ଏହି ସଫଳତା ପଛରେ ମାତ୍ର ଗୋଟିଏ ମନ୍ତ୍ର ରହିଛି, ତାହା ହେଉଛି “ପ୍ରତ୍ୟେକ ଜୀବନ ହେଉଛି ମୂଲ୍ୟବାନ” ।
ନବୀନ ଆହୁରି ମଧ୍ୟ କହିଛନ୍ତି ଯେ, ଓଡ଼ିଶାର ବିଶ୍ୱପ୍ରସିଦ୍ଧ ‘ଜିରୋ କାଜୁଆଲିଟି ମଡେଲ’ (Zero Casualty Model) ମୂଳରେ ରହିଛି ସୁଦୃଢ଼ ଭିତ୍ତିଭୂମି ଏବଂ ଗୋଷ୍ଠୀଗତ ପ୍ରସ୍ତୁତି। ଦିନେ ଓଡ଼ିଶାକୁ କେବଳ ଏକ ବିପର୍ଯ୍ୟୟ ପ୍ରବଣ ରାଜ୍ୟ ଭାବେ ଦେଖାଯାଉଥିଲା, ହେଲେ ଆଜି ଆମର ପ୍ରସ୍ତୁତି ଯୋଗୁଁ ଓଡ଼ିଶା ସାରା ବିଶ୍ଵରେ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଏକ ଆଲୋକ ବର୍ତ୍ତିକା ସଦୃଶ ଭାବେ ଉଭା ହୋଇଛି।
ଏହି ମେଗା ସମ୍ମିଳନୀରେ ଯୋଗ ଦେଇଥିବା BRICS ସମୂହର ସମସ୍ତ ବିଦେଶୀ ଓ ଦେଶୀ ପ୍ରତିନିଧିମାନଙ୍କୁ ଓଡ଼ିଶା ମାଟିକୁ ସ୍ଵାଗତ ଜଣାଇଛନ୍ତି ବିରୋଧୀ ଦଳ ନେତା। ଏହାସହ ଆଗାମୀ ଦିନରେ ଏକ ସୁରକ୍ଷିତ ଏବଂ ବିପର୍ଯ୍ୟୟ ସହନଶୀଳ ବିଶ୍ଵ ଗଠନ ଦିଗରେ ଏକାଠି ହୋଇ କାମ କରିବାକୁ ସେ ସମସ୍ତଙ୍କୁ ଆହ୍ଵାନ ଦେଇଛନ୍ତି।
ସୌମ୍ୟରଂଜନ ହତ୍ୟାକାଣ୍ଡ: NHRCର ତଦନ୍ତ ଜୋରଦାର
ନନ୍ଦିଘୋଷ ବ୍ୟୁରୋ : ଭୁବନେଶ୍ଵର ବାଲିଅନ୍ତା ଭିଡ଼ ହିଂସାରେ କନଷ୍ଟେବଳ ସୌମ୍ୟରଂଜନ ସ୍ଵାଇଁ ହତ୍ୟାକାଣ୍ଡ ଘଟଣାର ତନାଘନା ଜାରି ରହିଛି। ଏହି ମାମଲାରେ ଜାତୀୟ ମାନବାଧିକାର କମିଶନ (NHRC) ରେ ହାଜର ହୋଇଛନ୍ତି ଦୁଷ୍କର୍ମ ଉଦ୍ୟମ ଅଭିଯୋଗ କରିଥିବା ଯୁବତୀ। ତାଙ୍କ ସହିତ ସଂପୃକ୍ତ ଆମ୍ବୁଲାନ୍ସ ଡ୍ରାଇଭର ମଧ୍ୟ NHRC ରେ ହାଜର ହୋଇଛନ୍ତି। ପୂର୍ବରୁ ଉଭୟଙ୍କୁ କମିଶନଙ୍କ ପକ୍ଷରୁ ନୋଟିସ୍ ଜାରି କରାଯାଇଥିଲା। ଏହି ହାଜର ପରେ NHRC ପକ୍ଷରୁ ଦୁଇ ଜଣଙ୍କୁ ପଚରାଉଚରା କରାଯିବା ସହ ପୂରା ଘଟଣା ସଂପର୍କରେ ତଥ୍ୟ ସଂଗ୍ରହ କରିଛି ତଦନ୍ତ ଟିମ୍।
ଦୁର୍ଘଟଣା ଓ ସୌମ୍ୟରଂଜନଙ୍କୁ ମାଡ଼ ମରାଯିବା ପରେ ଘଟଣାସ୍ଥଳକୁ ଆମ୍ବୁଲାନ୍ସ ଡକାଯାଇଥିଲା। ହେଲେ କିଏ ଓ କାହିଁକି ସେହି ଆମ୍ବୁଲାନ୍ସକୁ ଫେରାଇ ଦେଇଥିଲା, ତାକୁ ନେଇ ଏବେ ବଡ଼ ପ୍ରଶ୍ନ ଉଠିଛି। ଆମ୍ବୁଲାନସକୁ ଫେରାଇ ଦେବା ପରେ ସୌମ୍ୟଙ୍କ ହାତ ଗୋଡ଼ ବାନ୍ଧି, ବାଉଁଶରେ ଟେକି ଏକ ଟ୍ରକରେ ନିଆଯାଇଥିଲା। ଗାଈଗୋରୁଙ୍କ ଭଳି ଅତି ଅମାନୁଷିକ ଭାବେ ତାଙ୍କୁ ବୋହି ନେବା ଘଟଣାକୁ ନେଇ ସାରା ରାଜ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା।
ଅନ୍ୟପଟେ, ସୌମ୍ୟଙ୍କ ମୃତଦେହର ବ୍ୟବଚ୍ଛେଦ (ପୋଷ୍ଟମର୍ଟମ) କରିଥିବା ଭୁବନେଶ୍ଵର କ୍ୟାପିଟାଲ ହସପିଟାଲର ଡାକ୍ତର ଲକ୍ଷ୍ମୀଧର ବେହେରା ମଧ୍ୟ NHRC ରେ ହାଜର ହୋଇଛନ୍ତି। ଏହାସହ ନୋଟିସ ହୋଇଥିବାରୁ ପୋଲିସ କମିଶନର ଏସ୍ ଦେବଦତ୍ତ ସିଂହ, ଭୁବନେଶ୍ଵର ଡିସିପି ଜଗମୋହନ ମୀନ ଓ ଆଇପିଏସ ଦୟାଲ ଗଙ୍ଗୱାର ମଧ୍ୟ କମିଶନଙ୍କ ସମ୍ମୁଖରେ ହାଜର ହୋଇପାରନ୍ତି।
ସୂଚନାଯୋଗ୍ୟ ଯେ, ଆଇପିଏସ ଦୟାଲ ଗଙ୍ଗୱାରଙ୍କ ଘରେ ହିଁ ସୌମ୍ୟରଂଜନ କାମ କରୁଥିଲେ ବୋଲି ପୂର୍ବରୁ ଅଭିଯୋଗ ହୋଇଥିଲା।
ଅତ୍ୟଧିକ ରାଗ ଆସୁଛି କି ? କେମିତି କରିବେ ନିୟନ୍ତ୍ରଣ ..
ନନ୍ଦିଘୋଷ ବ୍ୟୁରୋ : ଆପଣଙ୍କୁ ବିନା କାରଣରେ ସବୁବେଳେ ରାଗ ଆସୁଛି କି ? ଚିଡିଚିଡା ଲାଗୁଛି କି ବା ଛୋଟ ଛୋଟ କଥାରେ ସହଜରେ ରାଗିଯାଉଛନ୍ତି କି ତାହେଲେ ହୋଇଯାଆନ୍ତୁ ସାବଧାନ, ଆପଣ ମଧ୍ୟ ପଡ଼ିପାରନ୍ତି ଏହି ସବୁ ସମସ୍ୟାରେ । ଛୋଟ ଛୋଟ କଥାରେ ସମସ୍ତଙ୍କୁ ରାଗ ଆସିବା ଏକ ସାଧାରଣ କଥା । କିନ୍ତୁ ଏହାକୁ ସାଧାରଣ ଭାବି ଅଣଦେଖା କରିବା ଆଦୌ ଠିକ୍ ନୁହେଁ । ଯଦି ଆପଣଙ୍କୁ ବିନା କାରଣରେ ଅତ୍ୟଧିକ ରାଗ ଆସୁଥାଏ ତେବେ ଏହାର ଖରାପ ପ୍ରଭାବ ଆପଣଙ୍କ ଉପରେ ପଡିଥାଏ । ଯାହା ନାନା ପ୍ରକାରର ଶାରୀରିକ ସମସ୍ୟା ସୃଷ୍ଟି କରିଥାଏ । ଯେପରିକି ମାନସିକ ଚାପ, ଚିନ୍ତା, ଚିଡିଚିଡା ଭଳି ଅନେକ ସମସ୍ୟା । ଅଧିକ ରାଗିବା କେବଳ ଶରୀର ନୁହେଁ ମାନସିକ ସ୍ଥରରେ ବି ଚାପ ସୃଷ୍ଟି କରିଥାଏ । ତେବେ ଆସନ୍ତୁ ଜାଣିବା ଏମିତି ରାଗ କାହିଁକି ଆସିଥାଏ ? ଏହାଦ୍ବାରା କେଉଁ ପ୍ରକାରର ସମସ୍ୟା ସୃଷ୍ଟି ହୋଇଥାଏ ଓ ରାଗକୁ କେମିତି ନିୟନ୍ତ୍ରଣ କରିବେ ?
ଅତ୍ୟଧିକ ରାଗ ଆସିବାର କାରଣ :
ଆମକୁ ପ୍ରଥମେ ଜାଣିବା ଦରକାର କିଛି ଅନୁଭବ କଲେ କି ଶୁଣିଲେ ଜଣଙ୍କୁ ରାଗ କାହିଁକି ଆସିଥାଏ ? ଶରୀରର କେଉଁ ଅଙ୍ଗ ଏହାର କାରକ ଅଟେ ? ବାସ୍ତବରେ ଆମ ମସ୍ତିଷ୍କରେ ଆମିଗ୍ଡାଲା ନାମକ ଏକ ଛୋଟ ଅଂଶ ରହିଛି । ଯାହାକୁ ଶରୀରର ଆଲାରାମ ବୋଲି କୁହାଯାଇଥାଏ । ଯଦି କୌଣସି କଥା ଖରାପ ଲାଗେ କି କୌଣସି କାମ ଇଚ୍ଛା ଅନୁସାରେ ହୋଇନଥାଏ ସେତେବେଳେ ମସ୍ତିଷ୍କର ଏହି ଅଂଶଟି ଆକ୍ଟିଭ ହୋଇଯାଇଥାଏ । ଜଣେ ବ୍ୟକ୍ତି ଅଧିକ ରାଗୁଥିବାର କାରଣ ହେଲା ତାଙ୍କର ଏହି ଅଂଶଟି ଅଧିକ ଆକ୍ଟିଭ ରହିଥାଏ । ଯାହା ଚିନ୍ତା କରିବା ଓ ସ୍ଥିତି ପରଖିବା ଅଂଶକୁ ବ୍ଲକ କରି ଦେଇଥାଏ ।
ରାଗ ଆମ ଶରୀର ଉପରେ କ’ଣ ପ୍ରଭାବ ପକାଇଥାଏ ?
ସାଧାରଣ ଭାବରେ କହିବାକୁ ଗଲେ ରାଗ ସମସ୍ତଙ୍କୁ ଆସିଥାଏ କିନ୍ତୁ ଏହା ଦ୍ବାରା ଆମ ଶରୀରରେ କେଉଁ ପରିବର୍ତ୍ତନ ହୋଇଥାଏ ଆସନ୍ତୁ ଜାଣିବା …ମସ୍ତିଷ୍କରେ ଆମିଗ୍ଡାଲା ଆକ୍ଟିଭ ହେବା ମାତ୍ରା ଏଣ୍ଡ୍ରିନାଲିନ ଏବଂ କୋର୍ଟିସୋଲ ନାମକ ଷ୍ଟ୍ରେସ ହରମୋନ ବାହାରିଥାଏ । ଯାହା ରାଗ ସମୟରେ ଏକାଧିକ ଶାରୀରିକ ପରିବର୍ତ୍ତନ କାରଣ ହୋଇଥାଏ । ତେବେ ମୁଖ୍ୟ କାରଣ ହେଉଛି ହୃଦସ୍ପନ୍ଦନ ବଢିଯିବା, ହଠାତ ରକ୍ତଚାପ ବୃଦ୍ଧି, ମାଂସପେଶୀ ଟାଣ ହୋଇଯିବା, ନିଶ୍ବାସ ନେବାରେ କଷ୍ଟ ଅନୁଭବ କରିବା ଭଳି ଲକ୍ଷଣ ଦେଖିବାକୁ ମିଳିଥାଏ । ଏହାସହ ମୁହଁ ଓ ହାତରେ ରକ୍ତ ପ୍ରବାହ ବଢ଼ିଯିବା କାରଣରୁ ଶରୀର ନାଲି ପଡିଯାଏ ।
ଅଧିକ ରାଗ ହେବା ବଡ଼ ବେମାରୀର ସଙ୍କେତ କି ?
ଆଜ୍ଞା ହଁ କିଛି ବିଶେଷଜ୍ଞଙ୍କ ମତରେ ବାରମ୍ବାର ରାଗ ଆସିବା ଶରୀର ପ୍ରତି ବହୁତ କ୍ଷତିକାରକ । ବାରମ୍ବାର ରାଗିବା ଦ୍ବାରା ଜଣେ ବ୍ୟକ୍ତି ଚିନ୍ତାଗ୍ରସ୍ତ ହେଇଯାଏ ଯାହାଫଳରେ କି ହୃଦଘାତ, ବ୍ରେନ୍ ଷ୍ଟ୍ରୋକ ଏବଂ ଅନିଦ୍ରା ପରି ରୋଗ ହେବାର ସମ୍ଭାବନା ବଢ଼ାଇ ଦେଇଥାଏ ।
ରାଗ ନିୟନ୍ତ୍ରଣର ଉପାୟ :
ଆମ ଭିତରେ କୌଣସି କାରଣରୁ ଆସୁଥିବା ରାଗକୁ ନିୟନ୍ତ୍ରଣ କରିହେବ । ସେଥିପାଇଁ କିଛି ଛୋଟ ଛୋଟ କଥା ଉପରେ ଧ୍ୟାନ ଦେବାକୁ ପଡିବ । ଯେମିତିକି ନିୟମିତ ଯୋଗ ଓ ଧ୍ୟାନ, ସନ୍ତୁଳିତ ଖାଦ୍ୟ, ଆବଶ୍ୟକ ଅନୁଯାୟୀ ପାଣି ପିଇବା ଦ୍ବାରା ମସ୍ତିଷ୍କ ଶାନ୍ତ ରହିଥାଏ । ଯଦି ଆପଣଙ୍କୁ ହଠାତ ରାଗ ଲାଗୁଛି ତେବେ ଲମ୍ବା ନିଶ୍ବାସ ନିଅନ୍ତୁ, ୧ରୁ ୧୦ ପର୍ଯ୍ୟନ୍ତ ଓଲଟା ଗଣିବା ଆରମ୍ଭ କରିଦିଅନ୍ତୁ । ଏହା ରାଗକୁ ଶାନ୍ତି କରିବାରେ ସହାୟକ ହେବ । ସେହିପରି ରାଗ ଆସିଲେ ଯଥା ସମ୍ଭବ ସେହି ସ୍ଥାନରୁ କିଛି ସମୟ ପାଇଁ ଅନ୍ୟତ୍ର ପଳାନ୍ତୁ ଓ ଥଣ୍ଡା ପାଣି ପିଅନ୍ତୁ । ତଥାପି ଯଦି ଆପଣ ଅତ୍ୟଧିକ ରାଗିବା ଭଳି ସମସ୍ୟାରେ ପଡୁଛନ୍ତି ତେବେ ଡାକ୍ତରଙ୍କ ପରାମର୍ଶ ନିଶ୍ଚିତ ନିଅନ୍ତୁ ।
ଛୋଟ ପିଲାମାନଙ୍କ ପାଇଁ ସୋସିଆଲ ମିଡିଆ ବ୍ୟାନ୍ ! ସରକାରଙ୍କ ବଡ଼ ନିଷ୍ପତ୍ତି …
ନନ୍ଦିଘୋଷ ବ୍ୟୁରୋ : ଛୋଟ ପିଲାଙ୍କ ପାଇଁ ସୋସିଆଲ ମିଡିଆ ନିଷେଧ । ୧୬ ବର୍ଷରୁ କମ୍ ବୟସର ପିଲାମାନେ ଆଉ ସୋସିଆଲ ମିଡିଆ ଆକାଉଣ୍ଟ ତିଆରି କରିପାରିବେ ନାହିଁ । ଫେସବୁକ୍, ଇନଷ୍ଟାଗ୍ରାମ, ଟିକଟକ୍ ଏବଂ ୟୁଟ୍ୟୁବ୍ ସହ ସବୁ ପ୍ରମୁଖ ସୋସିଆଲ ମିଡିଆ ପ୍ଲାଟଫର୍ମ ବ୍ୟବହାର କରିବା ପୂର୍ବରୁ ବୟସ ଯାଞ୍ଚ ଆବଶ୍ୟକ ହେବ। ନୂଆ ନିୟମ ପାଳନ ନକରୁଥିବା କମ୍ପାନୀଗୁଡ଼ିକୁ ମଧ୍ୟ ଜରିମାନା ଦେବାକୁ ପଡିବ । ମାଲେସିଆ ୧୬ ବର୍ଷରୁ କମ୍ ବୟସର ପିଲାମାନଙ୍କ ପାଇଁ ସୋସିଆଲ ମିଡିଆକୁ ନିଷେଧ କରିଛି, କିନ୍ତୁ ଏହା ଏପରି କରିବାରେ ଏହା ପ୍ରଥମ ଦେଶ ନୁହେଁ ପୂର୍ବରୁ ମଧ୍ୟ ଅଷ୍ଟ୍ରେଲିଆ ଏହା କରିସାରିଛି । ମାଲେସିଆ ସୋମବାରଠାରୁ ଏହି ନୂତନ ନିୟମ ଲାଗୁ କରିଛି ।
ମାଲେସିଆରେ ୧୬ ବର୍ଷରୁ କମ୍ ବୟସର ପିଲାମାନେ ଆଉ ସୋସିଆଲ ମିଡିଆ ଆକାଉଣ୍ଟ ବ୍ୟବହାର କରିପାରିବେ ନାହିଁ । ଫେସବୁକ୍, ଇନଷ୍ଟାଗ୍ରାମ, ଟିକଟକ୍ ଏବଂ ୟୁଟ୍ୟୁବ୍ ସମେତ ଯେକୌଣସି ପ୍ରମୁଖ ସୋସିଆଲ ମିଡିଆ ପ୍ଲାଟଫର୍ମକୁ ଆକ୍ସେସ୍ କରିବା ପୂର୍ବରୁ ବୟସ ଯାଞ୍ଚ ବାଧ୍ୟତାମୂଳକ ହେବ । ୧୬ ବର୍ଷରୁ କମ୍ ବୟସର ପିଲାମାନଙ୍କୁ ଆକାଉଣ୍ଟ ତିଆରି କରିବାରୁ ନିବୃତ୍ତ କରିବା ଅତ୍ୟାବଶ୍ୟକ ବୋଲି ବିବେଚନା କରାଯାଉଛି । ଏହି ସରକାରୀ ନିୟମ ଉଲ୍ଲଂଘନ କରୁଥିବା କମ୍ପାନୀଗୁଡ଼ିକ ୨.୫ ମିଲିୟନ ଟଙ୍କା ପର୍ଯ୍ୟନ୍ତ ଜରିମାନା ଦେଇପାରିବେ
କିନ୍ତୁ ଏହି ନୂତନ ନିୟମ ଅନୁଯାୟୀ ଯଦି କୌଣସି ପିଲା କୌଣସି ପ୍ରକାରେ ଆକାଉଣ୍ଟ ତିଆରି କରିବାରେ ସଫଳ ହୁଏ ତେବେ ତାଙ୍କ ମାତାପିତାଙ୍କୁ ଦଣ୍ଡିତ କରାଯିବ ନାହିଁ ।
୧୬ ବର୍ଷରୁ କମ୍ ବୟସର ପିଲାମାନଙ୍କୁ ସୋସିଆଲ ମିଡିଆରୁ ଦୂରେଇ ରଖିବା ପାଇଁ ସରକାର ଏହି ନିଷ୍ପତ୍ତି ନେଇଛନ୍ତି । ସରକାରଙ୍କ ଉଦ୍ଦେଶ୍ୟ ହେଉଛି ପିଲାମାନଙ୍କୁ କ୍ଷତିକାରକ ବିଷୟବସ୍ତୁ, ସାଇବର ଧମକ ଏବଂ ଅନଲାଇନରେ ଅତ୍ୟଧିକ ସମୟ ବିତାଇବା ସହିତ ଜଡିତ ଅଭ୍ୟାସରୁ ରକ୍ଷା କରିବା । ସରକାର ସ୍ପଷ୍ଟ କରିଛନ୍ତି ଯେ ଏହା ପିଲାମାନଙ୍କୁ ଇଣ୍ଟରନେଟରୁ ସମ୍ପୂର୍ଣ୍ଣ ଭାବରେ ନିଷେଧ କରିବାକୁ ଚାହୁଁନାହିଁ ବରଂ ସେମାନଙ୍କର ସୁରକ୍ଷା ସୁନିଶ୍ଚିତ କରିବା ପାଇଁ ଲକ୍ଷ୍ୟ ରଖିଛି।
ଏହି ନିୟମ କାର୍ଯ୍ୟକାରୀ କରିବା ପାଇଁ ସେମାନଙ୍କୁ ଏକ ନିର୍ଦ୍ଦିଷ୍ଟ ସମୟସୀମା ମଧ୍ୟ ଦିଆଯାଇଛି । ସୋସିଆଲ ମିଡିଆରେ ପ୍ରସାରିତ ହେଉଥିବା ବିଷୟବସ୍ତୁ ୧୬ ବର୍ଷରୁ କମ୍ ବୟସର ପିଲାମାନଙ୍କ ମାନସିକ ବିକାଶକୁ ବିଭିନ୍ନ ଭାବରେ ପ୍ରଭାବିତ କରେ । ଫଳସ୍ୱରୂପ, ଅଷ୍ଟ୍ରେଲିଆ ବିଶ୍ୱର ପ୍ରଥମ ଦେଶ ଭାବରେ ସାମାଜିକ ଗଣମାଧ୍ୟମରେ ପିଲାମାନଙ୍କ ପ୍ରବେଶକୁ ପ୍ରତିବନ୍ଧିତ କରିବାର ନିଷ୍ପତ୍ତି ନେଇଥିଲା ।
କବିସୂର୍ଯ୍ୟନଗର ଘଟଣାରେ ବିଜେଡିର ଉଦବେଗ ; ଏହି ଘଟଣା ଓଡ଼ିଶାବାସୀଙ୍କୁ ବିବ୍ରତ କରିଛି
ଗଞ୍ଜାମ : କବିସୂର୍ଯ୍ୟନଗର ଥାନାରେ ପୋଲିସର ଦିବ୍ୟାଙ୍ଗ ସୁଶାନ୍ତ ସାହୁଙ୍କୁ ପିଟି ପିଟି ମାରିବା ଘଟଣାର ଘୋର ନିନ୍ଦା କରିଛି ବିଜେଡି । ଏହି ଘଟଣା ଓଡ଼ିଶାବାସୀଙ୍କୁ ବିବ୍ରତ କରିଛି । ୭ ଦିନ ଧରି ହାଜତରେ ନିରନ୍ତର ଭାବେ ବର୍ବରତା କରିଥିଲା ପୋଲିସ । ଯେଉଁଥିରେ ସୁଶାନ୍ତଙ୍କର ମୃତ୍ୟୁ ହୋଇଯାଇଥିଲା । FIR ମେ ୨୧ ତାରିଖରେ କବିସୂର୍ଯ୍ୟନଗରରେ ହେଲା । ଏହା ପୂର୍ବରୁ ତିନୋଟି ଭିଡିଓ ଦେଖାଇଛି । ସୁଶାନ୍ତଙ୍କ ପତ୍ନୀ, ଭାଇ ଓ ବେଆଇନ ଖଣିର ଭିଡିଓ ଦେଖାଇ ବିଜେଡି ଅଭିଯୋଗ କରିଛି, ବେଆଇନ ଖଣି ପାଇଁ ଏହା ଆରମ୍ଭ ହୋଇଥିଲା । ଏହି ଖଣି ଦୁଇ କିଲୋମିଟର ଲମ୍ବା । ଏଥିରେ ସରକାରୀ ଦଳ MLA ଙ୍କ ନିର୍ଦ୍ଦେଶରେ ପୋଲିସ କଲେକ୍ସନ ଏଜେଣ୍ଟ ହୋଇଛି । ସେମାନେ ହିଁ ନେତାଙ୍କୁ ଏହି ଟଙ୍କା ପଠାନ୍ତି । ଏହାର ମୂଳ କାର୍ପଟଦାର ଯିଏ ପୋଲିସ ସହ ସାଲିସ କରିବାକୁ ଯାଇଥିଲେ । ସେମାନେ ଆସ୍କା ବିଧାୟକଙ୍କ ଘନିଷ୍ଠ । ବେଆଇନ ଖଣି ପାଇଁ କବିସୂର୍ଯ୍ୟନଗର IIC ମେ ୨୧ରେ FIR କଲେ । ମାଲିକ ଗିରଫ ହୋଇ ପାରୁନି ବୋଲି ବିନା FIRରେ ସୁଶାନ୍ତ ସାହୁଙ୍କୁ କବିସୂର୍ଯ୍ୟନଗର ଥାନାକୁ ୨୫ରେ ଅଣାଯାଇ ୩୧ ଯାଏଁ ନିର୍ଧୁମ ବାଡେଇଲେ । ତା ପରେ ଲଙ୍କାଗୁଣ୍ଡା ପକାଇ ଥାର୍ଡ ଡିଗ୍ରି ଦେଲେ । ୩୧ରେ ସୁଶାନ୍ତ ଗୁରୁତର ହେବା ପରେ ଭାଇକୁ ଡକାଇ ଘରକୁ ଛାଡି ଦେଇ ଧମକ ଦେଲେ । MKCG ଆସିବା ଆଗରୁ ସେ ମରି ଯାଇଥିଲେ । ଏ ଯାଏଁ ପୋଲିସ ବିରୋଧରେ FIR ହେଲାନି । ଲଙ୍କା ଗୁଣ୍ଡ ଓ ଗରମ ପାଣି ଆଣିଥିବା ଡ୍ରାଇଭରକୁ ବିଦା, ବାକିଙ୍କୁ ନିଲମ୍ବନ ଓ ବଦଳି ହେଲା ।
SDPO ସୁଜିତ ନାୟକଙ୍କ ବିରୋଧରେ FIR ହେଲାନି କାହିଁକି ବୋଲି ବିଜେଡି ପ୍ରଶ୍ନ କରିଛି । ପୋଲିସ ଗୁଣ୍ଡା ହେଲେ FIR କିଏ କରିବେ ? ଅସ୍ମିତାର ଡିଣ୍ଡିମ ପିଟୁଥିବା ମୁଖ୍ୟମନ୍ତ୍ରୀଙ୍କ ଡିଜିପି, SP, IG ଅଣଓଡ଼ିଆ । ଡିଜିପି ଯୋଗ ଦେବା ପରଠାରୁ ଓଡ଼ିଶା ଅପରାଧରେ ଏକ ନମ୍ବର ରହିଲା । ଦୁଇ ବର୍ଷ ମୋହନ ସରକାର ପୂର୍ତ୍ତି କାର୍ଯ୍ୟକ୍ରମରେ ଲାଗିଛନ୍ତି । ହେଲେ ଓଡ଼ିଶାରେ ଅତ୍ୟାଚାର କଥା ଭୁଲି ଯାଇଛନ୍ତି । ଆଠଗଡ଼, ବୁଢାଆମ୍ବ ଲୋକ ଅଭିଯୋଗ କରୁଛନ୍ତି ଯେ ଥାନା ବାବୁ ଗୋଡ଼ାଇ ଗୋଡ଼ାଇ ବାଡ଼ଉଛନ୍ତି । ସବୁ ବିଜେପି କାର୍ଯ୍ୟକ୍ରମରେ ସାମିଲ ହେଉଛନ୍ତି ପୋଲିସ । ଘାଟ, ପାହାଡ଼ ଦାୟିତ୍ୱ ନେଇଛନ୍ତି ପୋଲିସ । ବିଜେଡିର ଦାବି ହେଲା IIC, SDPO, SI, ASI, କନଷ୍ଟେବଳ, ଡ୍ରାଇଭର ଓ ହୋମଗାର୍ଡଙ୍କ ନାଁରେ ନିଜ ଆଡୁ FIR ରୁଜୁ କରୁ ପୋଲିସ । ସୁଶାନ୍ତ ସାହୁଙ୍କୁ ୭ ଦିନ କାହିଁକି ଥାନାରେ ଅଟକ ରଖିଲା ପୋଲିସ ? ଏ ଅଧିକାର ଦେଲା କିଏ ? ବିନା କେସରେ ମାରିଲ କେମିତି ?
ଗତ ୧୫ ଦିନରେ ୪ ହାଜତ ହତ୍ୟା ହେଲାଣି । ତେଣୁ ଡିଜିପି ବହିଷ୍କାର ହେବା ଦରକାର । ବିଜେଡି ସ୍ପଷ୍ଟ ଦାବି କରୁଛି, ଯେଉଁ IPS ଅଫିସର ଓ ଅନ୍ୟ ଅଧିକାରୀ ଏପରି କାଣ୍ଡ କରୁଛନ୍ତି ଓ ଆଗକୁ ଆହୁରି କରିବେ, ସେମାନେ ଆଉ ନିୟମିତ କି ସ୍ଥାୟୀ ହେବାର ଅଧିକାର ନାହିଁ । ଆଗାମୀ ୨୪ ଘଣ୍ଟା ଭିତରେ ତଦନ୍ତକାରୀ SP, IG ସମ୍ପୃକ୍ତ ପୋଲିସମାନଙ୍କ ବିରୋଧରେ FIR ହେଉ । ସୁଶାନ୍ତଙ୍କ ପରିବାରକୁ ନ୍ୟାୟ ମିଳୁ ଓ ସର୍ବାଧିକ ସହାୟତା ମିଳୁ । ଗଞ୍ଜାମ ଜିଲ୍ଲା ବିଜେଡି କାର୍ଯ୍ୟକାରୀ ସଭାପତି ପୂର୍ଣ୍ଣ ସ୍ୱାଇଁଙ୍କ ନେତୃତ୍ୱରେ ଏକା ଟିମ ଆଜି ସୁଶାନ୍ତଙ୍କ ପରିବାରକୁ ଭେଟି ନବୀନ ପଟ୍ଟନାୟକଙ୍କ ବାର୍ତ୍ତା ଜଣାଇ ଦେବ ।
ମୟୂରଭଞ୍ଜ ଆସିବେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ; ଜୁନ ୧୯ରେ ଆସିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ
ନନ୍ଦିଘୋଷ ବ୍ୟୁରୋ : ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ଆସିବେ ମୟୂରଭଞ୍ଜ । ଆସନ୍ତା ଜୁନ ୧୯ ରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ୨୦ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଇ ଦିନିଆ ରାଇରଙ୍ଗପୁର ଗସ୍ତରେ ଆସିବେ । ରାଷ୍ଟ୍ରପତିଙ୍କ କାର୍ଯ୍ୟକାଳ ସରିବା ପୂର୍ବରୁ ତାଙ୍କ ଗାଁ କୁ ବୁଲି ଆସିବାକୁ କଥା ଦେଇଥିଲେ ପ୍ରଧାନମନ୍ତ୍ରୀ । ଆଉ ଏବେ ପ୍ରଧାନମନ୍ତ୍ରୀ ରାଷ୍ଟ୍ରପତିଙ୍କ ଗାଁ ରାଇରଙ୍ଗପୁର ଆସିବାର ଯୋଜନା କରିଛନ୍ତି । ପ୍ରଧାନମନ୍ତ୍ରୀ ରାଇରଙ୍ଗପୁରରେ ବଡ଼ ସାଧାରଣ ସଭା କରି ବହୁ ଯୋଜନାର ଶୁଭାରମ୍ଭ କରିବେ । ରାଷ୍ଟ୍ରପତିଙ୍କ ଗାଁ ପାହାଡ଼ପୁର ଯିବେ । ଓଡ଼ିଶାରେ ପ୍ରଥମ ଥର ଭାରତୀୟ ଜଙ୍ଗଲ ମ୍ୟାନେଜମେଣ୍ଟ ଇନଷ୍ଟିଚ୍ୟୁଟ ଖୋଲିବ । ଯାହାର ଶିଳାନ୍ୟାସ କରିବେ ପ୍ରଧାନମନ୍ତ୍ରୀ ।
ଏହାର କୁସୁମୀ ବ୍ଲକ ସୁଳିଦୁମାରେ ଶିଳାନ୍ୟାସ କରିବେ ପ୍ରଧାନମନ୍ତ୍ରୀ । ପୂର୍ବରୁ ଜବତ ବାଘ ଛାଲ ସହ ଅନ୍ୟ ଜନ୍ତୁଙ୍କର ବୈଜ୍ଞାନିକ ପରୀକ୍ଷା ପାଇଁ ଡେରାଡୁନକୁ ପଠେଇବାକୁ ପଡୁଥିଲା । ଏହି ଇନଷ୍ଟିଚ୍ୟୁଟ ହେବା ପରେ ଏବେ ଓଡ଼ିଶାରେ ଏହାର ପରୀକ୍ଷଣ ହେବ । ତେବେ ଚୂଡାନ୍ତ ଗସ୍ତ ସୂଚୀ ଆସିନି ବୋଲି କହିଛନ୍ତି ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ କହିଛନ୍ତି । ଏ ନେଇ ମୟୂରଭଞ୍ଜ ସାଂସଦ ନବ ଚରଣ ମାଝୀଙ୍କୁ ଫୋନ ଆସିଥିଲା । ପ୍ରଧାନମନ୍ତ୍ରୀ ଆସିଲେ ମୟୂରଭଞ୍ଜର ଐତିହ୍ୟ ବିକଶିତ ହେବ ବୋଲି କହିଛନ୍ତି ମନ୍ତ୍ରୀ ।
ସକାଳେ ନା ରାତିରେ କେତେବେଳେ ପିଇବେ ମେଥି ଦାନା ପାଣି ? ଆସନ୍ତୁ ଜାଣିବା ….
ବ୍ଲଡପ୍ରେସର, ଡାଇବେଟିସ୍ ଅଛି କି ? ତାହେଲେ ଏମିତି ଖାଆନ୍ତୁ ମେଥି ଦୂର ହେବ ରୋଗ । କାରଣ ମେଥି ଦାନା ଉଭୟ ସ୍ବାସ୍ଥ୍ୟ ଏବଂ ସୌନ୍ଦର୍ଯ୍ୟ ପାଇଁ ଅତ୍ୟନ୍ତ ଲାଭଦା୍ୟକ ହୋଇଥାଏ । ରାତିରେ ଏବଂ ସକାଳେ ମେଥି ଦାନା ପାଣି ପିଇବା ଦ୍ବାରା ଶରୀର ଉପରେ ଭିନ୍ନ ଭିନ୍ନ ପ୍ରଭାବ ପଡ଼ିଥାଏ । ତେବେ ଆସନ୍ତୁ ଜାଣିବା ସକାଳେ ମେଥି ଦାନା ପାଣି ପିଇବା ଦ୍ୱାରା ଆପଣଙ୍କ ସ୍ୱାସ୍ଥ୍ୟ ଉପରେ କ’ଣ ପ୍ରଭାବ ପଡ଼ିବ ଏବଂ ରାତିରେ ମେଥି ଦାନା ପାଣି ପିଇବା ଦ୍ୱାରା ଆପଣଙ୍କ ଶରୀର ଉପରେ କ’ଣ ପ୍ରଭାବ ପଡ଼ିବ। ଖାଦ୍ୟ ଆମ ଶରୀର ଉପରେ ସଠିକ୍ ପ୍ରଭାବ ପକାଇଥାଏ ଯେତେବେଳେ ଏହାକୁ ଆମେ ସଠିକ୍ ସମୟରେ ଖାଇଥାଉ। ସେହିପରି, ଶୋଇବା ଏବଂ ଉଠିବା ସମୟ, ଏବଂ ଔଷଧ ସେବନ ମଧ୍ୟ ଶରୀର ଚକ୍ର ଉପରେ ଆଧାରିତ ହୋଇଥାଏ।
ସକାଳେ ମେଥି ପାଣି
ଯଦି ଆପଣଙ୍କର ରକ୍ତରେ ଶର୍କରା ସ୍ତର ଅଧିକ ଥାଏ, ତେବେ ସକାଳେ ମେଥି ଦାନା ପାଣି ପିଇବା ଲାଭଦାୟକ, କାରଣ ଏହା ଇନସୁଲିନ୍ ପ୍ରତିରୋଧକୁ ଉନ୍ନତ କରେ ଏବଂ ରକ୍ତରେ ଶର୍କରାକୁ ନିୟନ୍ତ୍ରଣ କରେ। ଏହା ସହିତ, ଯଦି ଆପଣ ଓଜନ ହ୍ରାସ କରିବାକୁ ଚାହୁଁଛନ୍ତି, ତେବେ ସକାଳେ ମେଥି ଦାନା ପାଣି ପିଅନ୍ତୁ। ସକାଳେ ମେଥି ଦାନା ପାଣି ପିଇବା ଦ୍ୱାରା PCOS ହ୍ରାସ ପାଇଥାଏ ଏବଂ ଶର୍କରା ନିୟନ୍ତ୍ରଣ କରିବାରେ ସାହାଯ୍ୟ ମିଳିଥାଏ । ଯଦି ଆପଣ ସକାଳେ ମେଥି ଦାନା ପାଣି ପିଉଛନ୍ତି, ତେବେ ଏହାକୁ ଖାଲି ପେଟରେ ପିଇବା ଉଚିତ। ଆପଣ ଏହା ସହିତ ଭିଜା ମେଥି ଦାନା ମଧ୍ୟ ଚୋବାଇ ପାରିବେ ।
ରାତିରେ ମେଥି ପାଣି
ଯେଉଁମାନେ କୋଷ୍ଠକାଠିନ୍ୟ, ଅନିୟମିତ ଝାଡ଼ା, ପେଟ ଫୁଲିବା ଏବଂ ଖରାପ ହଜମ ସମସ୍ୟାରେ ପୀଡିତ, ସେମାନଙ୍କ ପାଇଁ ରାତିରେ ମେଥି ଦାନା ପାଣି ପିଇବା ଲାଭଦାୟକ, କାରଣ ଏହା ହଜମ ପ୍ରକ୍ରିୟାକୁ ଉନ୍ନତ କରିଥାଏ। ସରଳ ଭାଷାରେ କହିବାକୁ ଗଲେ, ରାତିରେ ମେଥି ଦାନା ପାଣି ପିଇବା ଦ୍ୱାରା ପାଚନ ସମସ୍ୟାରୁ ମୁକ୍ତି ମିଳିଥାଏ
ମେଥି ଦାନା ପାଣି କେବେ ପିଇବା ଉଚିତ ?
ମେଥି ଦାନା ପାଣି ପିଇବାର ସର୍ବୋତ୍ତମ ସମୟ ହେଉଛି ରାତିରେ, ରାତ୍ରି ଭୋଜନ ପରେ। ବିକଳ୍ପ ଭାବରେ ଆପଣ ଏହାକୁ ଶୋଇବା ପୂର୍ବରୁ ପିଇପାରିବେ, କିନ୍ତୁ ଏହାକୁ ସୀମିତ ପରିମାଣରେ ସେବନ କରିବାକୁ ନିଶ୍ଚିତ କରନ୍ତୁ।
ମେଥି ବିହନରେ ଥିବା ପୁଷ୍ଟିକର ତତ୍ତ୍ୱ
ଏକ ରିପୋର୍ଟମ ଅନୁଯାୟୀ, ୧ ଚାମଚ ମେଥି ବିହନରେ ୩ ଗ୍ରାମ ଫାଇବର, ୩ ଗ୍ରାମ ପ୍ରୋଟିନ୍, ୩.୭୨ ମିଲିଗ୍ରାମ ଲୌହ ଏବଂ ୨୧.୨ ମିଲିଗ୍ରାମ ମ୍ୟାଗ୍ନେସିୟମ୍ ଥାଏ। ଏଥିରେ ଭିଟାମିନ୍ ସିର ଉତ୍ସ ହେବା ସହିତ ଅନ୍ୟାନ୍ୟ ପୋଷକ ତତ୍ତ୍ୱ ମଧ୍ୟ ଯଥେଷ୍ଟ ପରିମାଣରେ ଥାଏ।