spot_img
Home Blog Page 3181

ମଣିପୁର ନିଆଁରେ ତାତିଲା ପାର୍ଲାମେଣ୍ଟ, ପ୍ରଧାନମନ୍ତ୍ରୀଙ୍କୁ ଉତ୍ତର ମାଗିଲେ ବିରୋଧୀ

ନୂଆଦିଲ୍ଲୀ: ପାର୍ଲାମେଣ୍ଟରେ ମଣିପୁର ତାତି। ମିଳିତ ବିରୋଧୀଙ୍କ ଗୋଟିଏ ଦାବି । ମଣିପୁର ସ୍ଥିତିକୁ ନେଇ ଉତ୍ତର ରଖନ୍ତୁ ପିଏମ୍ ? ତିନି ମାସ ଧରି ମଣିପୁର ଜଳୁଥିବା ବେଳେ କାହିଁକି ପ୍ରଧାନମନ୍ତ୍ରୀ ଚୁପ୍ ? କାହିଁକି ମଣିପୁର ପ୍ରସଙ୍ଗରେ ପଦୁଟୁଏ କହୁନାହାନ୍ତି ପିଏମ୍ ? ସର୍ବଦଳୀୟ ବୈଠକ କରି କାହିଁକି ଏଭଳି ଘୃଣିତ ଅନ୍ୟାୟ, ଅପରାଧ ପ୍ରତି ଆଖି ବୁଜି ଦେଇଛି ଗୃହ ମନ୍ତ୍ରଣାଳୟ? ବିଦେଶରେ ଭାରତ ବିକାଶର ଡିମଡିମ୍ ପିଟୁଥିବା ବେଳେ ମଣିପୁର ସ୍ଥିତି ବିଶ୍ବରେ ଦେଶକୁ ଲଜ୍ଜିତ କରିଛି ବୋଲି କହିଛି ଆମ ଆଦମୀ ପାର୍ଟି । ବିଜେପିର ଡବଲ ଇଞ୍ଜିନ ସରକାର ଥିବା ରାଜ୍ୟରେ ଡବଲ ବର୍ବରତା, ଡବଲ ଶୋଷଣ । ଯାହାର ପ୍ରମାଣ ଦେଉଛି ମଣିପୁର ।

ଦେଶର ଅଖଣ୍ଡତା ରକ୍ଷା କରିବାରେ ଫେଲ୍ ମାରିଛି ବିଜେପି । ବିଜେପି ଶାସନ ଦେଶର ସୁରକ୍ଷା ପ୍ରତି ବିପଦ ବୋଲି ଆପ୍ ସାଂସଦ ରାଘବ ଚଡ୍ଡା କହିଛନ୍ତି । ମହିଳାଙ୍କ ପ୍ରତି ଏଭଳି ଘୃଣ୍ୟ ଅପରାଧ ପରେ ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ସ୍ମୃତି ଇରାନୀ କାହିଁକି ଚୁପ୍ ବୋଲି ପ୍ରଶ୍ନ କରିଛି କଂଗ୍ରେସ । ସତ କହିବାକୁ ମନ୍ତ୍ରୀ ସାହସ ଦେଖାନ୍ତୁ ବୋଲି କଂଗ୍ରେସ କହିଛି । ମଣିପୁରରେ ମହିଳା ଉପରେ ଅତ୍ୟାଚାର ସୀମା ଟପିଥିବା ବେଳେ ରାଷ୍ଟ୍ରୀୟ ମହିଳା ଆୟୋଗଙ୍କ ଅସ୍ଥିତ୍ବକୁ ନେଇ ବି କଂଗ୍ରେସ ପ୍ରଶ୍ନ ଉଠାଇଛି । ଗୃହ କାର୍ଯ୍ୟ ଆରମ୍ଭରୁ ବିରୋଧୀଙ୍କ ହଙ୍ଗାମା ଯୋଗୁ ରାଜ୍ୟସଭା ଦିନ ୧୨ଟା ଓ ଲୋକସଭାକୁ ଦିନ ୨ଟା ଯାଏଁ ମୁଲତବି ରଖାଯାଇଥିଲା ।

ଖଡ଼ଗ ନଦୀଗର୍ଭ ଜଳାଶୟକୁ ମୁଖ୍ୟମନ୍ତ୍ରୀଙ୍କ ଅନୁମୋଦନ, ଉପକୃତ ହେବେ ୩ ଜିଲ୍ଲାର ୨୦ ହଜାର ଲୋକ

ଭୁବନେଶ୍ୱର: ଖଡ଼ଗ ନଦୀଗର୍ଭ ଜଳାଶୟକୁ ମୁଖ୍ୟମନ୍ତ୍ରୀଙ୍କ ଅନୁମୋଦନ । ଉପକୃତ ହେବେ ବୌଦ୍ଧ, ବଲାଙ୍ଗୀର ଓ କନ୍ଧମାଳର ୨୦ ହଜାର ଲୋକ । ଖର୍ଚ୍ଚ ହେବ ୧୨୬ କୋଟି ଟଙ୍କା । ଖଡଗ ନଦୀରେ ନିର୍ମାଣ ହେବ ନଦୀଗର୍ଭ ଜଳାଶୟ । ୧୨୬ କୋଟି ଟଙ୍କାର ଏହି ପ୍ରକଳ୍ପକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁମୋଦନ କରିଛନ୍ତି । ପୂର୍ବରୁ ଏହି ପ୍ରକଳ୍ପକୁ ବୈଷୟିକ ପରାମର୍ଶଦାତା କମିଟି ମଧ୍ୟ ସ୍ବୀକୃତି ପ୍ରଦାନ କରିଥିଲେ । ଏହି ପ୍ରକଳ୍ପ ଦ୍ବାରା ତିନୋଟି ଜିଲ୍ଲା – ବୌଦ୍ଧ ଜିଲ୍ଲାର କଣ୍ଟାମାଳ ବ୍ଳକ, କନ୍ଧମାଳ ଜିଲ୍ଲାର ବାଲିଗୁଡା ବ୍ଳକ ଓ ବଲାଙ୍ଗୀର ଜିଲ୍ଲାର ଗୁଡଭେଲା ବ୍ଳକର ପ୍ରାୟ ୨୦ ହଜାରରୁ ଅଧିକ ଲୋକ ଉପକୃତ ହେବେ । ଏହି ଯୋଜନାରେ ବାଲିଗୁଡା ବ୍ଳକର ଲଡଗାଁ ଗ୍ରାମ ନିକଟରେ ପ୍ରାୟ ୧୨୬ କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ କାର୍ଯ୍ୟ କରାଯିବ । କୌଣସି ବିସ୍ଥାପନ ବିନା ଏହି ପ୍ରକଳ୍ପ ନିର୍ମାଣ କରାଯିବ ଓ ଏହା ନଦୀଗର୍ଭ ଜଳ ସଂରକ୍ଷଣ କରିବା ସହିତ ଖରାଦିନେ ଏହି ଅଞ୍ଚଳର ପାନୀୟ ଜଳର ଆବଶ୍ୟକତା ପୂରଣ, ମାଛ ଚାଷ ଓ ଭୂତଳ ଜଳସ୍ତର ବୃଦ୍ଧିରେ ମଧ୍ୟ ବିଶେଷ ସହାୟକ ହେବ ।

ଗତ ୫ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ 5T ସଚିବ ଭିକେ ପାଣ୍ଡିଆନ ବୌଦ୍ଧ ଜିଲ୍ଲା ଗସ୍ତ ସମୟରେ ସ୍ଥାନୀୟ ଜନସାଧାରଣ ଖଡଗ ନଦୀରେ ଏକ ବ୍ୟାରେଜ ନିର୍ମାଣ ପାଇଁ ଦାବିପତ୍ର ଦେଇଥିଲେ । ଏ ସଂପର୍କରେ 5T ସଚିବ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରି ଜନସାଧାରଣଙ୍କ ଦାବି ସଂପର୍କରେ ଅବଗତ କରାଇଥିଲେ ଏବଂ ମୁଖ୍ୟମନ୍ତ୍ରୀ ଜନସାଧାରଣଙ୍କ ଅନୁରୋଧକୁ ଗ୍ରହଣ କରିଥିଲେ ।

ରାଜ୍ୟସଭା ଉପାଧ୍ୟକ୍ଷ ପ୍ୟାନେଲର ସଦସ୍ୟ ହେଲେ ସୁଲତା ଦେଓ

ନୂଆଦିଲ୍ଲୀ: ରାଜ୍ୟସଭା ଉପାଧ୍ୟକ୍ଷ ପ୍ୟାନେଲର ସଦସ୍ୟ ହେଲେ ସୁଲତା ଦେଓ । ବିଜେଡି ରାଜ୍ୟସଭା ସାଂସଦ ସୁଲତା ଦେଓଙ୍କୁ ଏହି ନୂଆ ଦାୟିତ୍ବ ମିଳିଛି । ସୁଲତା ଦେଓଙ୍କୁ ରାଜ୍ୟସଭା ଉପାଧ୍ୟକ୍ଷ ପ୍ୟାନେଲର ସଦସ୍ୟ ଭାବେ ରାଜ୍ୟସଭା ଅଧ୍ୟକ୍ଷ ନିଯୁକ୍ତି ଦେଇଛନ୍ତି ।

ଦକ୍ଷ ହେବ ଅଗ୍ନିଶମ ବିଭାଗ, ଅଗ୍ନିଶମ ସେବା ବିଭାଗରେ ୨୬ ନୂତନ ପଦବୀକୁ ମୁଖ୍ୟମନ୍ତ୍ରୀଙ୍କ ଅନୁମୋଦନ

ଭୁବନେଶ୍ୱର: ଅଗ୍ନିଶମ ସେବା ବିଭାଗରେ ୨୬ ନୂତନ ପଦବୀକୁ ମୁଖ୍ୟମନ୍ତ୍ରୀଙ୍କ ଅନୁମୋଦନ । ଓଡ଼ିଶା ଅଗ୍ନିଶମ ସେବା ବିଭାଗରେ ବିଭିନ୍ନ ପାହ୍ୟାରେ ୨୬ଟି ନୂତନ ପଦବୀକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁମୋଦନ କରିଛନ୍ତି । ଏଥି ମଧ୍ୟରେ ତିନି ଗୋଟି ଷ୍ଟେସନ ଅଫିସର ପଦବୀ ଥିବା ବେଳେ ତିନି ଗୋଟି ଲିଡିଂ ଫାୟାର ମ୍ୟାନ୍ ଓ କୋଡିଏଟି ଫାୟାର ମ୍ୟାନ୍ ପଦବୀ ରହିଛି । ଏହି ନୂତନ ପଦବୀ ସୃଷ୍ଟି ହେବା ଫଳରେ ଅଗ୍ନିଶମ ସେବା ବିଭାଗ ଆହୁରି ଅଧିକ ଦକ୍ଷ ଭାବରେ ଲୋକଙ୍କୁ ସେବା ଯୋଗାଇଦେବ ବୋଲି ଆଶା କରାଯାଏ ।

ମଣିପୁରରେ ମଣିଷର ରାକ୍ଷସ ରୂପ, ଗଣଦୁଷ୍କର୍ମ ପରେ ରାସ୍ତାରେ ଉଲଗ୍ନ କରି ଚଲାଇ ଚଲାଇ ନେଲେ ଅଭିଯୁକ୍ତ

ଇମ୍ଫାଲ: ଯେତେ ନିନ୍ଦା କଲେ ବି କମ୍ ହେବ । ମଣିଷ ଯେବେ ରାକ୍ଷସ ପାଲଟେ, ହିଂସ୍ର ଆଚରଣ ସମାଜର ସବୁ କ୍ଷେତ୍ରରେ ଦେଖିବାକୁ ମିଳେ । ଶବ୍ଦରେ ବୀଭତ୍ସ ଘଟଣାକୁ ନିନ୍ଦା କରିବା ବି ମୁସ୍କିଲ । ବିଜେପିର ଡବଲ ଇଞ୍ଜିନ ସରକାରରେ ମଣିପୁରରେ ଚାଲିଛି ତାଲିବାନୀ ଶାସନ । ମହିଳାଙ୍କ ପାଇଁ ନର୍କ ପାଲଟିଛି ମଣିପୁର । ସ୍ବାର୍ଥୀ, ଲଜ୍ଜାହିନ, ମାନବିକତା ବିହିନ ସରକାରରେ ଅସୁରକ୍ଷିତ ପାଲଟିଛନ୍ତି ମହିଳା । କ’ଣ କରୁଛି ସରକାର ? ତିନି ମାସ ପରେ ବି କାହା ସ୍ବାର୍ଥରେ ସରକାର ଚୁପ୍ । ମଣିପୁରରେ ହିଂସା ଭିତରେ ଏକ ଘୃଣିତ ଦୃଶ୍ୟ ସାମ୍ନାକୁ ଆସିଛି । ଦୁଇ ମହିଳାଙ୍କୁ ଗଣଦୁଷ୍କର୍ମ ପରେ ରାସ୍ତାରେ ସମ୍ପୂର୍ଣ୍ଣ ଉଲଗ୍ନ ଅବସ୍ଥାରେ ଚଲାଇ ଚଲାଇ ନିଆଯାଉଥିବାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ସାରା ବିଶ୍ବ ସ୍ତବ୍ଧ ହୋଇଛି । ସରକାର କାହା ସ୍ବାର୍ଥରେ ଚୁପ୍ ବୋଲି ପ୍ରଶ୍ନ ଉଠିଛି । ରାସ୍ତାରେ ଯିବା ବେଳେ ଅଭିଯୁକ୍ତମାନେ ମହିଳାଙ୍କ ସହ ଦୁର୍ବବ୍ୟବହାର କରୁଛନ୍ତି ।

ସ୍ବାଧୀନତାକୁ ୭୫ ବର୍ଷ ପୂରିଥିବା ବେଳେ ଆଜାଦି କା ଅମୃତ ମହୋତ୍ସବ ପାଳୁଥିବା ଭାରତବର୍ଷର ଏ କି ସ୍ଥିତି ? ଆଜିର ଭାରତରେ ଏଭଳି ଦୃଶ୍ୟ ମଣିଷ ସମାଜକୁ ସବୁଠୁ ଘୃଣ୍ୟ ମନେ ହେବ । ମଣିପୁରର କାଙ୍ଗପୋକି ଜିଲ୍ଲାରେ ଏଭଳି ଘଟଣା ଘଟିଥିବା ଜଣାପଡ଼ିଛି । ଏହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏଭଳି ଘଟଣାକୁ ନେଇ କୁକି ଓ ମିତେଇ ଜନଜାତିଙ୍କ ମଧ୍ୟରେ ବିବାଦ ଆହୁରି ଘନେଇବାରେ ଲାଗିଛି । ଦୁଇ ପୀଡିତା କୁକି ଜନଜାତିର ବୋଲି ଜଣାପଡ଼ିଛି । ବିଜେପି ଶାସିତ ରାଜ୍ୟରେ ଲୋକଙ୍କର ଏଭଳି ସ୍ଥିତିକୁ ନେଇ ବିରୋଧୀ ଦଳ ପ୍ରବଳ ବର୍ଷିଛନ୍ତି । ଘଟଣାକୁ ସାରା ଦେଶରେ ଚାଞ୍ଚଲ୍ୟ ସୃଷ୍ଟି କରିଛି । ପୋଲିସ ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛି । ଅନ୍ୟମାନଙ୍କୁ ଖୋଜୁଛି ପୋଲିସ । ଘଟଣାଟି ମେ’ ମାସର ବୋଲି ଜଣାପଡ଼ିଛି । ପ୍ରଧାନମନ୍ତ୍ରୀ ଘଟଣାକୁ ନେଇ ଦୁଃଖ ପ୍ରକାଶ କରିବା ସହ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ।

ଦୁର୍ଘଟଣା ଦେଖିବାକୁ ଯାଇ ଦୁର୍ଘଟଣାର ଶିକାର, ଅହମ୍ମଦାବାଦର ଇସ୍କନ ବ୍ରିଜ୍ ଉପରେ ସିରିଜ୍ ଦୁର୍ଘଟଣା

ଅହମ୍ମଦାବାଦ: ଦୁର୍ଘଟଣା ଦେଖିବାକୁ ଯାଇ ଦୁର୍ଘଟଣାର ଶିକାର । ଗୁଜରାଟ ଅହମ୍ମଦାବାଦର ଇସ୍କନ ବ୍ରିଜ୍ ଉପରେ ସିରିଜ୍ ଦୁର୍ଘଟଣା । ପ୍ରଥମେ ଏକ ଥର୍‌ ଓ ଡମ୍ପର ମଧ୍ୟରେ ଧକ୍କା ହୋଇଥିଲା ।  ସ୍ଥାନୀୟ ଲୋକ ଓ ପୋଲିସ ଘଟଣାସ୍ଥଳରେ ଉପସ୍ଥିତ ଥିବା ବେଳେ ଦ୍ରୁତ ଗତିରେ ଆସୁଥିବା ଏକ କାର୍‌ ଲୋକଙ୍କ ଉପରେ ଚଢ଼ିଗଲା । ଫଳରେ ଘଟଣା ସ୍ଥଳରେ ହିଁ ୯ ଜଣଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୨ ଜଣ ପୋଲିସ ରହିଛନ୍ତି । ଜଣେ କନଷ୍ଟେବଳ ଓ ଅନ୍ୟଜଣେ ହୋମଗାର୍ଡ ରହିଛନ୍ତି । ଅନ୍ୟ ମୃତକଙ୍କ ମଧ୍ୟରେ ବୋଟାଦ ଓ ସରେନ୍ଦ୍ରନଗରର କିଛି ଯୁବକ ବି ରହିଛନ୍ତି ।

ସୂଚନା ଅନୁସାରେ ଲୋକଙ୍କ ଉପରେ ଚଢ଼ିଯାଇଥିବା କାର୍‌ ୧୬୦ କିଲୋମିଟର ସ୍ପିଡରେ ଆସୁଥିଲା । ବିଳମ୍ବିତ ରାତିରେ ଏସଜି ହାଇୱେରେ ଏପରି ଘଟଣା ଖୁବ୍‌ ଚର୍ଚ୍ଚାରେ ରହିଛି । କାର କେଉଁଠୁ ଆସୁଥିଲା ? କାହା ଗାଡ଼ି ? କିଏ ଡ୍ରାଇଭ କରୁଥିଲା, ସେସବୁର ତଦନ୍ତ ଚାଲିଛି ।

ନୟାଗଡ଼ର ନବକଳେବର ପାଇଁ ନକ୍ସା ଅଙ୍କନ, ଚମକିବ ମା’ ମଣିନାଗଙ୍କ ମନ୍ଦିର

ନୟାଗଡ଼: ନୟାଗଡ଼ର ନବକଳେବର ପାଇଁ ନକ୍ସା ଅଙ୍କନ । ଚମକିବ ମାଆ ମଣିନାଗଙ୍କ ମନ୍ଦିର । ନୟାଗଡ଼ ଜିଲ୍ଲା ରଣପୁରର ଆରାଧ୍ୟ ଦେବୀ ମାଆ ମଣିନାଗଙ୍କ ପୀଠର ରୂପାନ୍ତରଣ ପାଇଁ ପ୍ରତିଶ୍ରୁତି ଦେଇଛନ୍ତି 5T ସଚିବ ଭିକେ ପାଣ୍ଡିଆନ । ଗଞ୍ଜାମର ମାଆ ତାରାତାରିଣୀଙ୍କର ମନ୍ଦିରର ରୂପାନ୍ତରଣ ଭଳି ଏହାର ଉନ୍ନତିକରଣ କରାଯିବ। ନୟାଗଡ଼ ଜିଲ୍ଲାକୁ ରୂପାନ୍ତରଣ ଫର୍ଦ୍ଦରେ ଯୋଡ଼ିବାକୁ ଗ୍ରାଉଣ୍ଡରେ ପହଞ୍ଚିଛନ୍ତି 5T ସଚିବ । ବିକାଶ ରାସ୍ତାରେ ବାଧାଦେଇପାରିନି ପ୍ରତିକୂଳ ପାଗ । ରେନକୋଟ୍ ପିନ୍ଧି ଲୋକଙ୍କ ପାଖରେ ପହଞ୍ଚିଥିଲେ 5T ସଚିବ। ପ୍ରଥମେ ରଣପୁରର ତଳ ମଣିନାଗ ମନ୍ଦିର ପରିଦର୍ଶନ କରି ମାଆଙ୍କ ନିକଟରେ ପୂଜାର୍ଚ୍ଚନା କରିଛନ୍ତି । ମନ୍ଦିର ବୁଲି ଦେଖିବା ସହିତ ଏହାର ନବକଳେବର ପାଇଁ ଆଲୋଚନା କରିଛନ୍ତି ।‌ ରୂପାନ୍ତରଣ ପାଇଁ ମାଷ୍ଟରପ୍ଲାନ୍ ଦେଖିବା ସହ ପୂଜକ, ଶ୍ରଦ୍ଧାଳୁ ଓ ସ୍ଥାନୀୟ ଲୋକଙ୍କ ସହିତ ଉନ୍ନତିକରଣ ସମ୍ପର୍କରେ ଆଲୋଚନା କରିଥିଲେ ।

ପ୍ରଥମେ ଉଭୟ ଉପର ଓ ତଳ ମଣିନାଗ ମନ୍ଦିରର ବିକାଶ କରାଯିବ । ଭକ୍ତଙ୍କ ପାଇଁ ସମସ୍ତ ସୁବିଧା ସହିତ ପାର୍ଶ୍ଵ ଦେବଦେବୀଙ୍କ ମନ୍ଦିରର ମଧ୍ୟ ଉନ୍ନତିକରଣ କରାଯିବ । ପରବର୍ତ୍ତୀ ପର୍ଯ୍ୟାୟରେ ପର୍ଯ୍ୟଟନର ବିକାଶ କରାଯିବ। ମନ୍ଦିରର ବିକାଶ ଦ୍ବାରା ଆଧ୍ୟାତ୍ମିକ ସହିତ ପ୍ରାକୃତିକ ପରିବେଶରେ ଅନୁଭୂତି ପାଇବେ ପର୍ଯ୍ୟଟକ ଓ ଶ୍ରଦ୍ଧାଳୁ । ଖୁବଶୀଘ୍ର ମୁଖ୍ୟମନ୍ତ୍ରୀ ମନ୍ଦିରର ରୂପାନ୍ତରଣ ପ୍ରକଳ୍ପକୁ ଅନୁମୋଦନ କରିବା ପରେ କାମ ଆରମ୍ଭ ବୋଲି ପ୍ରତିଶ୍ରୁତି ଦେଇଛନ୍ତି ଭିକେ ପାଣ୍ଡିଆନ । ଦୀର୍ଘଦିନ ଧରି ମନ୍ଦିରର ଉନ୍ନତିକରଣ ହୋଇପାରୁନଥିବା ବେଳେ 5T ସଚିବଙ୍କ ପ୍ରତିଶ୍ରୁତି ରଣପୁରବାସୀଙ୍କ ମଧ୍ୟରେ ଖୁସି ଆଣିଦେଇଛି ।

ମହାରାଷ୍ଟ୍ରର ରାଇଗଡ଼ ଜିଲ୍ଲାରେ ଭୂସ୍ଖଳନ, ୫ ଜଣଙ୍କ ମୃତ୍ୟୁ

ମୁମ୍ବାଇ: ମହାରାଷ୍ଟ୍ର ରାଇଗଡ଼ରେ ଭୂସ୍ଖଳନ । ରାଇଗଡ଼ ଜିଲ୍ଲା ଖାଲାପୁର ତହସିଲ ଆଦିବାସୀଙ୍କ ଗାଁ ଇରସାଲୱାଡ଼ିରେ ବିଳମ୍ବିତ ରାତିରେ ଧସିଲା ପାହାଡ଼ । ଗାଁର ୧୭ଟି ଘରେ ପାହାଡ଼ ଅତଡ଼ା ଖସିବା ଫଳରେ ପୁରା ଗାଁ ଛାରଖାର । ଘଟଣାରେ ୪ ଜଣଙ୍କ ମୃତଦେହ ଉଦ୍ଧାର ହୋଇଥିବା ବେଲେ ୫୦ ଲୋକ ଦବି ରହିଥିଲେ । ଘଟଣାସ୍ଥଳରେ ଏନଡିଆରଏଫର ୨ଟି ଟିମ୍ ଉଦ୍ଧାରକାର୍ଯ୍ୟ ଜାରି ରଖିଛନ୍ତି । ୨୫ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ବେଳେ ୨୧ ଆହତଙ୍କୁ ମେଡିକାଲରେ ଭର୍ତ୍ତି କରାଯାଇଛି । ସକାଳୁ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଘଟଣାସ୍ଥଳରେ ପହଞ୍ଚି ସ୍ଥିତି ଯାଞ୍ଚ କରିଛନ୍ତି । ୨ ଦିନ ଧରି ଲଗାତର ବର୍ଷା ଫଳରେ ମହାରାଷ୍ଟ୍ରର ବିଭିନ୍ନ ନଦୀ ଜଳସ୍ତର ବଢ଼ିଛି । ମୁମ୍ବାଇ, ରାଇଗଡ଼ ଓ ପାଲଘରକୁ ଭୀଷଣ ବର୍ଷା ନେଇ ରେଡ୍ ଆଲର୍ଡ ଜାରି କରିଛି ଆଇଏମଡି । ପୂରା ମହାରାଷ୍ଟ୍ରରେ ୧୨ ଏନଡିଆରଏଫ୍ ଟ୍ରୁପ୍ ନିୟୋଜିତ ଅଛନ୍ତି । ଭୀଷଣ ବର୍ଷାକୁ ନଜରରେ ରଖି ମୁମ୍ବାଇରେ ସବୁ ସରକାରୀ ଓ ବେସରକାରୀ ସ୍କୁଲ ବନ୍ଦ ରହିଛି ।

ଆଜିଠୁ ଦ୍ୱିତୀୟ ଟେଷ୍ଟ, ସିରିଜ୍ କବଜା ଲକ୍ଷ୍ୟରେ ଟିମ୍ ଇଣ୍ଡିଆ

ନୂଆଦିଲ୍ଲୀ: ଆଜିଠୁ ଭାରତ ଏବଂ ୱେଷ୍ଟଇଣ୍ଡିଜ୍ ମଧ୍ୟରେ ଶତକୀୟ ଟେଷ୍ଟ୍ ମୁକାବିଲା । ପୋର୍ଟ ଅଫ୍ ସ୍ପେନରେ ଏହି ମ୍ୟାଚ ଖେଳାଯିବ । ଏହି ଟେଷ୍ଟ୍ ଚଳିତ ଶୃଙ୍ଖଳାର ଦ୍ବିତୀୟ ତଥା ଅନ୍ତିମ ଟେଷ୍ଟ ମୁକାବିଲା। ପ୍ରଥମ ଟେଷ୍ଟରେ ବିଜୟ ସହ ଏହି ଦୁଇ ଟିକିଆ ସିରିଜରେ ୧-୦ରେ ଆଗୁଆ ରହିଛି ଭାରତ । ଭାରତ ଶୃଙ୍ଖଳା ଜିତିବା ସମ୍ଭାବନା ଅଧିକ ଥିବାବେଳେ ଘରୋଇ ଦଳ ନିଶ୍ଚିତ କିଛିଟା ଲଢ଼େଇ କରିବାକୁ ଆଶା ରଖିବ। ଡୋମିନିକାରେ ଭାରତୀୟ ସ୍ପିନ୍‌ ଯୋଡ଼ି ରବିଚନ୍ଦ୍ରନ ଅଶ୍ବିନ ଓ ରବୀନ୍ଦ୍ର ଜାଡେଜା ଚମତ୍କାର ପ୍ରଦର୍ଶନ କରିଥିଲେ । ତେବେ ଦ୍ୱିତୀୟ ଟେଷ୍ଟରେ ମଧ୍ୟ ଭାରତୀୟ ସ୍ପିନ ବୋଲରଙ୍କ ରାଜୁତି ରହିବା ସମ୍ଭାବନା ଅଧିକ । ସେପଟେ ପ୍ରଥମ ଟେଷ୍ଟ୍‌ରେ ୭୬ ରନ୍‌ କରିଥିବା ବିରାଟ କୋହଲିଙ୍କଠାରୁ ୨୦୧୮ ମସିହା ପରେ ବିଦେଶରେ ପ୍ରଥମ ଶତକ ଆଶା କରାଯାଉଛି। ସେହିପରି ଶୁବମନ ଗିଲଙ୍କଠାରୁ ଏକ ଆତ୍ମବିଶ୍ବାସ ଭରା ପାଳିର ଅପେକ୍ଷା ରହିଛି । ବିଗତ ୨୧ ବର୍ଷରେ ଭାରତ ବିପକ୍ଷରେ ୱେଷ୍ଟଇଣ୍ଡିଜ ଗୋଟିଏ ବି ଟେଷ୍ଟ ଜିତିପାରିନି ।

ଆଜିଠୁ ଯୁକ୍ତଦୁଇ ଦ୍ବିତୀୟ ପର୍ଯ୍ୟାୟ ନାମଲେଖା

ଭୁବନେଶ୍ୱର: ଆଜିଠୁ ଯୁକ୍ତଦୁଇ ଦ୍ବିତୀୟ ପର୍ଯ୍ୟାୟ ନାମଲେଖା । ଗତକାଲି ସେକେଣ୍ଡ କଟ୍ ଅଫ ମାର୍କ ପ୍ରକାଶ ପାଇଥିଲା । ଯୋଗ୍ୟ ବିବେଚିତ ଛାତ୍ରଛାତ୍ରୀ ଆଜିଠୁ ୨୨ ତାରିଖ ପର୍ଯ୍ୟନ୍ତ ନାମ ଲେଖାଇ ପାରିବେ । ଦ୍ବିତୀୟ ପର୍ଯ୍ୟାୟରେ ମୋଟ ୭୦ ହଜାର ୧୦୫ ଜଣ ଛାତ୍ରଛାତ୍ରୀ ଆଡମିଶନ ପାଇଁ ମନୋନୀତ ହୋଇଛନ୍ତି । କଳାରେ ୪୯ ହଜାର ୭୦ ଛାତ୍ରଛାତ୍ରୀଙ୍କୁ ମିଳିଛି ଇଣ୍ଟିମେସନ୍ ଲେଟର । ସେହିପରି ବାଣିଜ୍ୟରେ ୩ ହଜାର ୧୮୨,  ବିଜ୍ଞାନରେ ୧୬ ହଜାର ୯୨୭ ଛାତ୍ରଛାତ୍ରୀ ନାମ ଲେଖାଇବା ପାଇଁ ମନୋନୀତ ହୋଇଛନ୍ତି । ନାମଲେଖା ପରେ ବଳକା ସିଟ୍ ପାଇଁ ହେବ ସ୍ପଟ୍ ସିଲେକସନ । ୨୭ ତାରିଖରେ ପ୍ରକାଶ ପାଇବ ତାଲିକା । ୨୯ ରୁ ୩୧ ପର୍ଯ୍ୟନ୍ତ ହେବ ସ୍ପଟ୍ ନାମଲେଖା  । ପ୍ରଥମ ପର୍ଯ୍ୟାୟରେ ୩ ଲକ୍ଷ ୪୩ ହଜାର ୭୬୯ ଛାତ୍ରଛାତ୍ରୀ ନାମ ଲେଖାଇଛନ୍ତି ।