ନନ୍ଦିଘୋଷ ବ୍ୟୁରୋ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ) ୨୦୦୦ ଟଙ୍କିଆ ନୋଟକୁ ବଜାରରୁ ଫେରାଇ ନେବାକୁ ନିଷ୍ପତ୍ତି ନେଇଛି । ଅବଶ୍ୟ ଏବେ ବଜାରରେ ଏହି ନୋଟ୍ ବୈଧ ରହିବ । ଭାରତୀୟ ରିଜର୍ଭ ବ୍ୟାଙ୍କ ବ୍ୟାଙ୍କଗୁଡ଼ିକୁ ପରାମର୍ଶ ଦେଇଛି ଯେ ସେମାନେ ତତ୍କାଳ ପ୍ରଭାବରେ ୨୦୦୦ ଟଙ୍କିଆ ନୋଟ୍ ଜାରି କରିବା ବନ୍ଦ କରନ୍ତୁ । ଆରବିଆଇ କହିଛି ଯେ ୩୦ ସେପ୍ଟେମ୍ବର ପର୍ଯ୍ୟନ୍ତ ଏହି ନୋଟ୍ ବୈଧ ରହିବ । ଅର୍ଥାତ ଯାହାଙ୍କ ପାଖରେ ଏବେ ୨ହଜାର ଟଙ୍କା ନୋଟସ ଅଛି, ସେଗୁଡ଼ିକୁ ବ୍ୟାଙ୍କରେ ବଦଳାଇବାକୁ ପଡ଼ିବ । ନୋଟ୍ ବଦଳାଇବାର ପ୍ରକ୍ରିୟା ମେ ୨୩ ତାରିଖରୁ ଆରମ୍ଭ ହେବ । ଆରବିଆଇ ପ୍ରେସ ରିଲିଜରେ କହିଛି ଯେ ୨୦୧୮-୧୯ରେ ହିଁ ୨ହଜାର ଟଙ୍କିଆ ନୋଟ୍ ଛପା କାର୍ଯ୍ୟ ବନ୍ଦ କରାଯାଇଥିଲା । ୨୦୧୭ ସୁଦ୍ଧା ୮୯ ପ୍ରତିଶତ ୨ ହଜାର ଟଙ୍କିଆ ନୋଟ୍ ବଣ୍ଟନ ବନ୍ଦ ହୋଇଥିଲା ।
ବଜାରରେ ମୋଟ ଛପାର ୧୦.୮ପ୍ରତିଶତ ୨ ହଜାର ଟଙ୍କିଆ ନୋଟ୍ ଅଛି । ଏବେ ବଜାରରେ ଥିବା ୨ ହଜାର ଟଙ୍କିଆ ନୋଟ୍ ବୈଧ ଅଟେ । ସେପ୍ଟେମ୍ବର ୩୦, ୨୦୨୩ ପର୍ଯ୍ୟନ୍ତ ବୈଧ ରହିବ ୨ ହଜାର ଟଙ୍କିଆ ନୋଟ୍ । ଏକକାଳୀନ ୧୦ଟି ୨ ହଜାର ଟଙ୍କିଆ ନୋଟ୍ ବ୍ୟାଙ୍କରେ ଡିପୋଜିଟ୍ କରିପାରିବେ । ୨ ହଜାର ଟଙ୍କିଆ ନୋଟ୍ ଗ୍ରାହକଙ୍କୁ ନଦେବାକୁ ବ୍ୟାଙ୍କକୁ ପରାମର୍ସ ଦେଇଛି ଆରବିଆଇ । ୨୦୧୬ ନଭେମ୍ବରରେ ବିମୁଦ୍ରୀକରଣ ପରେ ୨ହଜାର ଟଙ୍କା ନୋଟ୍ ବଜାରକୁ ଅଣାଯାଇଥିଲା । ବିମୁଦ୍ରୀକରଣରେ ୫୦୦ ଏବଂ ହଜାରେ ଟଙ୍କା ନୋଟ୍ ବନ୍ଦ କରାଯାଇଥିଲା । ଏହି ସମୟରେ ସରକାର କହିଥିଲେ ଯେ ଏହି ପଦକ୍ଷେପ ଦୁର୍ନୀତି ସମାପ୍ତ କରିବା ପାଇଁ ନିଆଯାଇଛି । ବିରୋଧୀଦଳ ମାନେ କହିଥିଲେ ଯେ ସରକାର ଏହି ନିଷ୍ପତ୍ତି ବିନା ଭାବି ଚିନ୍ତି ନେଇଛନ୍ତି ।
