ନନ୍ଦିଘୋଷ ବ୍ୟୁରୋ: GI ଜର୍ଣ୍ଣାଲରେ ସ୍ଥାନ ପାଇଲା ରାଜ୍ୟର ୭ଉତ୍ପାଦ । ନୟାଗଡର କଣ୍ଟେଇମୁଣ୍ଡି ବାଇଗଣକୁ ମିଳିବ GI ଟ୍ୟାଗ୍ । ସେହିଭଳି ଢେଙ୍କାନାଳ ମଗଜି, ଶିମିଳିପାଳ କାଈ ଚଟଣୀକୁ GI ଟ୍ୟାଗ ପ୍ରଦାନ କରାଯିବ । ଖଜୁରୀ ଗୁଡ଼, କୋରାପୁଟର କଳାଜିରା ଚାଉଳ, ଡଙ୍ଗରିଆ କନ୍ଧଙ୍କ ଏମ୍ବ୍ରୋଡରି ଚାଦର-କପଡ଼ାଗଣ୍ଡାକୁ ମଧ୍ୟ GI ଟ୍ୟାଗ ମିଳିବ । ତେବେ ନୟାଗଡ କଣ୍ଟିଲୋ ଅଂଚଳରେ ଉତ୍ପାଦିତ ଏହି କୃଷିଜାତ ଦ୍ରବ୍ୟ କଣ୍ଟେଇମୁଣ୍ଡି ବାଇଗଣ GI ଜର୍ଣ୍ଣାଲରେ ସ୍ଥାନ ପାଇବା ପରେ ଏହାର ସ୍ୱତନ୍ତ୍ରତା ବୃଦ୍ଧି ପାଇଛି । ପୋଷାକ ତତ୍ତ୍ୱରେ ପରିପୂର୍ଣ୍ଣ ଏହି ବାଇଗଣର ସ୍ୱାଦ ମଧ୍ୟ ଭାରୀ ନିଆରା । ଏ ନେଇ ନୟାଗଡ଼ ଜିଲ୍ଲାରେ ଖୁସିର ମାହୋଲ ଦେଖିବାକୁ ମିଳିଛି । କିଛି ମାସ ପୂର୍ବରୁ ନୟାଗଡ଼ ଜିଲ୍ଲା ପ୍ରଶାସନ ସହାୟତାରେ କଣ୍ଟିଲୋ ସ୍ଥିତ ନୀଳମାଧବ କୃଷି ସଂଗଠନ ଏହି କଣ୍ଟେଇମୁଣ୍ଡି ବାଇଗଣକୁ ଜିଆଇ ମାନ୍ୟତା ପାଇଁ ଆବେଦନ କରିଥିଲ ।
ଷ୍ଟକ ଏକ୍ସଚେଞ୍ଜରେ ତାଲିକାଭୁକ୍ତ ହେବ କ୍ଷୁଦ୍ର, ମଧ୍ୟମ ଓ ଅଣୁ ଶିଳ୍ପ
ଭୁବନେଶ୍ୱର: ରାଜ୍ୟରେ ପୁଞ୍ଜିନିବେଶ କରୁଥିବା କ୍ଷୁଦ୍ର, ମଧ୍ୟମ ଓ ଅଣୁ ଶିଳ୍ପ ଷ୍ଟକ ଏକ୍ସଚେଂଜରେ ତାଲିକାଭୁକ୍ତ ହେବେ। ଏଥିପାଇଁ ଆବଶ୍ୟକ ପୁଂଜି ସହାୟତା ରାଜ୍ୟ ସରକାର ଯୋଗାଇ ଦେବେ । ନ୍ୟାସନାଲ ଷ୍ଟକ ଏକ୍ସଚେଂଜ ଓ ବମ୍ବେ ଷ୍ଟକ ଏକ୍ସଚେଂଜରେ ସ୍ଥାନ ପାଇବାକୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ସହାୟତା ଯୋଗାଇଦେବେ ରାଜ୍ୟ ସରକାର। ଏମଏସଏମଇ ଶିଳ୍ପଗୁଡିକ ମୁଖ୍ୟତଃ ପୁଞ୍ଜି ପାଇଁ ବ୍ୟାଙ୍କ, ଆର୍ଥିକ ଅନୁଷ୍ଠାନ, ବନ୍ଧୁ ଓ ସମ୍ପର୍କୀୟଙ୍କ ଉପରେ ନିର୍ଭର କରିଥାନ୍ତି । କିନ୍ତୁ ପାରମ୍ପରିକ ଉତ୍ସରୁ ଅବଶ୍ୟକ ପୁଂଜି ସଂଗ୍ରହ ହୋଇପାରେନି । ଏହି ସମସ୍ୟାର ସମାଧନ ପାଇଁ ଏମଏମଏସଇ ଶିଳ୍ପଗୁଡିକ ଷ୍ଟକ ଏକ୍ସଚେଂଜରେ ତାଲିକାଭୁକ୍ତ ହେବା ଜରୁରୀ ।
ଏନଏସଇ ଓ ବିଏସଇ ଭଳି ଜାତୀୟସ୍ତରର ଷ୍ଟକ ଏକ୍ସଚେଂଜରେ ଏମଏସଏମଇ ଶିଳ୍ପ ପାଇଁ ସରଳ ପ୍ରକ୍ରିୟା ରହିଛି । ତେଣୁ ଏମଏସଏମଇ କ୍ଷେତ୍ରରେ ପୁଂଜିନିବେଶ କରୁଥିବା ନିବେଶକ ଷ୍ଟକ ଏକ୍ସଚେଂଜରେ ସ୍ଥାନିତ ହେବା ପାଇଁ ରାଜ୍ୟ ସରକାର ପ୍ରୋତ୍ସାହିତ କରିବାକୁ ଆର୍ଥିକ ସହାୟତା ଯୋଗାଇଦେବେ । ଏନେଇ ଏମଏସଏମଇ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଏନଏସଇ କିମ୍ବା ବିଏସଇରେ ଲିଷ୍ଟେଡ୍ ହେବା ପରେ କମ୍ପାନୀ ପକ୍ଷରୁ ଏମଏସଏମଇ ବିଭାଗକୁ ଆବଶ୍ୟକ ଦସ୍ତାବିଜ୍ ସହ ଆବେଦନ କଲେ ଏ ବାବଦରେ ଖର୍ଚ୍ଚ ହୋଇଥିବା ଅର୍ଥ ରାଜ୍ୟ ସରକାର ଯୋଗାଇଦେବେ । ୩୦ ଦିନ ମଧ୍ୟରେ ସହାୟତା ରାଶି କମ୍ପାନୀର ବ୍ୟାଙ୍କ ଆକାଉଣ୍ଟରେ ଜମା ହେବ।
ପୁଟିନଙ୍କ ପରେ ଚୀନ ରାଷ୍ଟ୍ରପତି ଜିନପିଙ୍ଗ ବି ଆସିବେନି ଭାରତ
ନୂଆଦିଲ୍ଲୀ: ଭାରତରେ ଆଗାମୀ ମାସରେ ହେବାକୁ ଥିବା ଜି ୨୦ ଶିଖର ସମ୍ମିଳନୀରୁ ଦୂରତା ରଖିବାକୁ ଚାହୁଁଛନ୍ତି ରାଷ୍ଟ୍ରପତି ସି ଜିନପିଙ୍ଗ । ମିଡିଆ ରିପୋର୍ଟ ମୁତାବକ ଚୀନର ପ୍ରଧାନମନ୍ତ୍ରୀ ଲି କିଆଙ୍ଗ ସେପ୍ଟେମ୍ବର ୯ ରୁ ୧୦ ପର୍ଯ୍ୟନ୍ତ ଦିଲ୍ଲୀରେ ହେବାକୁ ଥିବା ଜି ୨୦ ଶିଖର ସମ୍ମିଳନୀରେ ଚୀନ ପକ୍ଷରୁ ପ୍ରତିନିଧିତ୍ବ କରିପାରନ୍ତି । ଚୀନ କି ଭାରତ ବୈଦେଶିକ ମନ୍ତ୍ରାଳୟ ପକ୍ଷରୁ ଏନେଇ କୌଣସି ସ୍ପଷ୍ଟ ସୂଚନା ମିଳିନାହିଁ ।
ଦିଲ୍ଲୀ ଜି ୨୦ ଶିଖର ସମ୍ମିଳନୀରେ ସି ଜିନପିଙ୍ଗ ଓ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ମଧ୍ୟରେ ସମ୍ଭବତଃ ଏକ ସୌଜନ୍ୟମୂଳକ ସାକ୍ଷାତ ହୋଇ ପାରିଥାନ୍ତା । ଗତବର୍ଷ ନଭେମ୍ବରରେ ହୋଇଥିବା ଜି ୨୦ ଶିଖର ସମ୍ମିଳନୀରେ ଜିନପିଙ୍ଗ ଓ ବାଇଡେନଙ୍କ ମଧ୍ୟରେ ଶେଷଥର ପାଇଁ ସାକ୍ଷାତ ହୋଇଥିଲା ।
ପୂର୍ବରୁ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଜି ୨୦ ଶିଖର ସମ୍ମିଳନୀରେ ସାମିଲ ହେବେ ନାହିଁ ବୋଲି ଘୋଷଣା କରିଥିଲେ । ପୁଟିନଙ୍କ ସ୍ଥାନରେ ବୈଦେଶିକ ମନ୍ତ୍ରୀ ସର୍ଗଇ ଲାଭରୋଭ ଦିଲ୍ଲୀ ଆସିବେ । ସେପଟେ ପୁଟିନ ଭାରତ ନ ଆସି ଚୀନ ଯାଇପାରନ୍ତି । ଚୀନରେ ଜିନପିଙ୍ଗଙ୍କ ସହ ସାକ୍ଷାତ କରିବେ ପୁଟିନ
କୋରେଇରେ ଶେଷହେଲା ବିକାଶ ସମୀକ୍ଷା, ଫେବ୍ରୁଆରୀରୁ ବୁଲି ବୁଲି ଲୋକଙ୍କଠାରୁ ଗ୍ରହଣ କରିଥିଲେ ଅଭିଯୋଗ ପତ୍ର
କୋରେଇ: କୋରେଇ ମାଟିରେ ଶେଷ ହୋଇଛି ଓଡ଼ିଶା ରୂପାନ୍ତରଣ ପାଇଁ ୬ ମାସର ଯାତ୍ରା । କୋରେଇ ମାଟିରେ ବିକାଶର ସମୀକ୍ଷା କରି 5T ସଚିବ କହିଛନ୍ତି, ବୁଲି ବୁଲି ଲୋକଙ୍କଠୁ ଅଭିଯୋଗ ଗ୍ରହଣ କରିବାକୁ ଦାୟିତ୍ବ ଦେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଫେବ୍ରୁଆରୀରେ ଆରମ୍ଭ ହୋଇଥିବା କାର୍ଯ୍ୟକ୍ରମ କୋରେଇ ମାଟିରେ ଶେଷ ହୋଇଛି । ଆସନ୍ତା ସପ୍ତାହେ ଭିତରେ ମୁଖ୍ୟମନ୍ତ୍ରୀ କୋରେଇ ମାଟିର ବିକାଶ ପାଇଁ ଖୁସି ଖବର ଦେବେ । ମନ୍ଦିର, ମସଜିଦ, ଚର୍ଚ୍ଚ, କମ୍ୟୁନିଟି ସେଣ୍ଟର ପାଇଁ ଆସିଥିବା ଅଭିଯୋଗର ବିଚାର କରାଯାଇ ୮ ତାରିଖ ଭିତରେ ସମାଧାନ କରାଯିବ । ମୁଖ୍ୟମନ୍ତ୍ରୀ ଦେଇଥିବା ଅନୁଦାନର ସଠିକ ବିନିଯୋଗ କରିବାକୁ 5T ସଚିବ ଆହ୍ବାନ ଦେଇଛନ୍ତି ।
କୋରେଇର ପାନୀୟ ଜଳ ସମସ୍ୟାର ସମାଧାନ ପାଇଁ ୨୩ଟି ପଞ୍ଚାୟତରେ ୧୪୦ କୋଟି ଖର୍ଚ୍ଚ ହେବ । ତୁଳସୀପୁର ଏବଂ ରାଉତରାପୁର ମେଗାଲିଫ୍ଟ ପାଇଁ ୯୦ କୋଟି ଟଙ୍କା ଖର୍ଚ୍ଚ କରାଯାଇଛି । ଏହାର ନିର୍ମାଣ କାମ ଚଳିତ ବର୍ଷ ଶେଷ ହେବ । ଏହା ମାଧ୍ୟମରେ ୧୦ ହଜାର ଏକର ଜମି ଜଳସେଚିତ ହେବ । ପାଣିକୋଇଲିରେ ଟ୍ରମାକେୟାର ସେଣ୍ଟର କାମ ମୁଖ୍ୟମନ୍ତ୍ରୀ ହାତକୁ ନେଇଛନ୍ତି । ଏଥିପାଇଁ ୧୦୧ କୋଟି ଟଙ୍କା ଖର୍ଚ୍ଚ ହେଉଥିବାବେଳେ ୩ ମାସ ମଧ୍ୟରେ କାମ ସରିବ । କୋରେଇ ସିଏଚସି ପାଇଁ ୨୦ କୋଟି ମଞ୍ଜୁର କରାଯାଇଛି । ନଦୀ ବନ୍ଧ ଉପରେ ରାସ୍ତା ପାଇଁ ୫୦ କୋଟି, ଏନଏଚ ୧୬ରୁ ଅଟଳପୁର ରାସ୍ତା ପାଇଁ ୧୫ କୋଟି ଓ ବୈତରଣୀ ନଦୀବନ୍ଧକୁ ସୁଦୃଢ କରିବାକୁ ୧୦ କୋଟି ଟଙ୍କା ଅନୁମୋଦିତ ହେଇଥିବା 5T ସଚିବ କହିଛନ୍ତି ।
ରାଜଧାନୀ ଗୋଠପାଟଣା-ଦାସପୁରରେ ପ୍ରତିଷ୍ଠା ହେବ ନୂଆ ସହର, ୮୨୧ ଏକର ଜାଗାରେ ହେବ ନିର୍ମାଣ କାର୍ଯ୍ୟ
ଭୁବନେଶ୍ୱର: ଭୁବନେଶ୍ୱର ଗୋଠପାଟଣା- ଦାସପୁରରେ ସୃଷ୍ଟି ହେବ ନିୟୁ ସିଟି । କେନ୍ଦ୍ର ସରକାର ଙ୍କ ଅନୁମୋଦନ ପରେ ଏଠାରେ କାର୍ଯ୍ୟ ଆରମ୍ଭ କରାଯିବ। ରାଜ୍ୟ ସରକାର ଏନେଇ କେନ୍ଦ୍ରକୁ ପ୍ରସ୍ତାବ ଦେଇଛନ୍ତି । ସର୍ବଭାରତୀୟ ସ୍ତରରେ ନୂଆ ସହର ଗଢି ତୋଳିବା ରେସରେ ବିଡିଏ ଆଗରେ ଅଛି । ୮୨୧ ଏକର ଜାଗାରେ ନିର୍ମାଣ ହେବ ନୂଆ ସହର । ଦେଢ଼ରୁ ଦୁଇ ଲକ୍ଷ ଲୋକଙ୍କ ରହଣି ପାଇଁ ହେବ ବ୍ୟବସ୍ଥା । ଅତ୍ୟାଧୁନିକ ସୁବିଧା ସହ ୧୫ ମହଲା ଆପାର୍ଟମେଣ୍ଟ ନିର୍ମାଣ ହେବ । ଆପାର୍ଟମେଣ୍ଟ ନିକଟରେ ଅତ୍ୟାଧୁନିକ ସୁବିଧା ସୁଯୋଗ ସହ ପାର୍କ, ଜିମ୍, ମାର୍କେଟ କମ୍ପ୍ଲେକ୍ସ, ହସ୍ପିଟାଲ, ସ୍କୁଲ, ସିନେମା ହଲ, ସପିଂ ମଲ, ସୁଇମିଂ ପୁଲ, ଖେଳ ପଡ଼ିଆ ଆଦି ନିର୍ମାଣ ହେବ । ଏହା ବ୍ୟତୀତ ରାଜଧାନୀରେ ନୂଆ ୫୦୦ ଏକର ଜାଗା ବିଡିଏ ଲୋକଙ୍କ ଉଦ୍ଦେଶ୍ୟରେ ବିଭିନ୍ନ ହାଉସିଂ ପ୍ରୋଜେକ୍ଟ ଆଣିବାକୁ ଯୋଜନା ରଖିଛି । ବିଡିଏ ଦ୍ଵାରା ନିର୍ମିତ ବରମୁଣ୍ଡା ଆନ୍ତର୍ଜାତୀୟ ବସ୍ ଷ୍ଟାଣ୍ଡ ଆସନ୍ତା ୨ ମାସ ମଧ୍ୟରେ କାର୍ଯ୍ୟକ୍ଷମ ହେବ।
ଜଟଣୀରେ ଗୃହପାଳିତ ପଶୁଙ୍କ ପାଇଁ ଏକ ସେଣ୍ଟର କରାଯିବ। ସେହିପରି ଭଗବାନପୁରରେ ହୋଲସେଲ ନୂଆ ପରିବା ହାଟ, ଭୁବନେଶ୍ୱରରେ ୧୦ଟି ନୂଆ ପାର୍କ, ୨୦ଟି ଖେଳପଡ଼ିଆ, ଦୟା ସଫେଇ ପାଇଁ ୭ଟି ନୂଆ ଟ୍ରିଟମେଣ୍ଟ ପ୍ଲାଣ୍ଟ, ୩ ନିର୍ବାଚନ ମଣ୍ଡଳୀର ୩ଟି ଶ୍ମଶାନ, ଟ୍ରକ ଟର୍ମିନାଲ, ବିଡିଏ ଷ୍ଟାଫଙ୍କ ପାଇଁ ନୂଆ ଘର ଭଳି ଉନ୍ନୟନ ମୂଳକ କାର୍ଯ୍ୟ ଖୁବଶୀଘ୍ର ଶେଷ କରିବାକୁ ଯୋଜନା କରିଛି ବିଡିଏ । ଓଡ଼ିଶାର ସହରାଞ୍ଚଳରେ ରୂପାନ୍ତରଣର ନିରନ୍ତର ଯାତ୍ରା ଏବଂ 5T ଶାସନ ନୀତି ଅନୁଯାୟୀ ବିଡିଏ ବିଗତ ବର୍ଷମାନଙ୍କରେ ଉଲ୍ଲେଖନୀୟ ସଫଳତା ହାସଲ କରିପାରିଛି । ଜୟଦେବ ଭବନରେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷଙ୍କର ୪୧ ତମ ପ୍ରତିଷ୍ଠା ଦିବସ ତଥା ସ୍ୱନକ୍ଷତ୍ର ଅବସରରେ ଏହି ଯୋଜନା ସମ୍ପର୍କରେ ଆଲୋଚନା ହୋଇଛି ।

